El akanye birye, ‘Deiyok ani,’ tenena kume ati, nyabuk. “Yata ning ati, ‘Arup ara, Elisa dam binun,’ tenepmalam do? Tonda, atalak ara, wala tikin talak kume. Tonda, arup ara, Allah el si erena ati, pil don sum kum upmale. ‘Aweik sum kum upmal do?’ tenena ati nyapkine,” nyabuk. Nyabukura, el kil arye, an walwal nyana kume. “Na talye binuna atia,” nyabuk.
Kolose 2:16 - Eipomek16 Yesus wanwanun yo deice dipsuka deice arye, aning-aning nirya malye kibuka, deice tam ulirye, nun malye ning nirya kum kipdeipsukce, teleb akunum kipdeipsuke. Akunum teleb keipdeipsuka anya arye, yuk nang arye, anggunti, “Anang ara, malye unyake,” nyapdeipsikcopura, aning ara kekena kumce, dib kum tenenamlulume. Yata nang arye do nirya, anggunti, “Kume, aninye ara, ayala din ning dinyake, ayala mek dinyake, aweik sum ati, ‘Mambul sum,’ kum tenenyake. Tonda, dikdik sen sum, Sabat sum ati, nun wininyap ning atonun ara, kum wininyake. Nunce wala tikilongon talak yunyap ara, kum yunyake. Ati sik malye ninye unyake,” nyabuka, anggun nong deice malye yupu nyapdeipsikcopura, anggunce, ‘Dauplye’ tenen, kum kekenamlulume. အခန်းကိုကြည့်ပါ။ |
Kolose 2:16
42 ပူးပေါင်းရင်းမြစ်များ
Tonda, aning atouk, asum-asum nirya Allah Yahweh el si erena ap, el arena ap ati, pil dona kumce, dikdik sen sum, Sabat sum deice arye, kam ning opnarye, aning nirya boyangalamikce, uku dongolamik talak babye, Lewi yala nang aryuk mot nyalamikce, Allah el si erelamik. Aning atonun, winiryuk wala upmalye talak babye, Allah arye nyapdeiamuk touk,” Awala, atanggal deice arye, mambul weik sum uplyopura, na arena ap, na si erebuka kina ap, na si erena ap ati, aning arenamnulume,” nyapdeibuk touk, sik Lewi yala nang aryuk, aning boyanuka arelamikce, mot nyalamik. Atalak-atalak nirya ara, sik imam deiyok nang arye, ‘Winipnamlum-winipnamlum,’ nyabuka laka nyapdeiamuk touk, sik amu tam ulamik Lewi yala nang aryuk, apil talibuka dolamik. Minop talak ulamik atonun, winiryuk nang nirya babye, sik aLewi yala nang sikcuk, apil talibuka pia dopnin balamik touk, tuba pil donyake.
Raja Hizkia bira, ‘Allah arye nun malye winin ning kilipnamsilʼ tenen, domba ato ning obuka, uku dapnarye, Allah si eren ati arelyangan talak ara, el weilamuk domba ato ning dobukapnarye, asum-asum nirya beren tam babye, sintam babye, batakna kumce, yuk-yuk arelyangalamuk. Tonda aning atonun, Allah arye, “Asum ara mem sum anya arye, talye pil dona kumce, dikdik sebuka, na siuk erepnamnulume,” nyapdeiamuk sum, Sabat sum deice arelamik ning ati, tonda, winiryuk wala kipne talak ap arelamik ning ati, Raja Hizkia birye arelyangalamuk. Tonda, min talak Allah arye, “Wininamlume, apil donamlume,” nyapdeiamukba, Musa birye sekeiamuk buku noutam nyapdeiamuk atonun, yuk deiyok talak ap, weik sum ap, pil don ning nirya babye, Raja Hizkia birye, atonun ubuka arelyangalamuk.
Tonda, nun dana-dana tam unyak ninye, yuk-yuk yala nang arye, nun pil kum donyap sum, Sabat sum deice ara, dekna ning, talye bona do, din ning do nirya, ‘Aning-aning deknuyap’ tenen, nun dam boyasicopura, nunce kum deknamabe. Ara, nun ni koproba Allah el si erena ati, mambul sum, Sabat sum deice arye pil kum donyaba ati, dekna ning boyasica babye, nun kum deknamabe. Aning atonun, an Allah arye, ‘Arup sum ara, na mambul sum anya arye, asum deice arye, na si erepnamnulume,’ nyapdeipsulum sum nirya ara, atonun wininamabe. Pil dona ap, dekna ap kum winipnamabe. Tonda, keting tamun nukdebuka, nakub barye keting tamun deice arye, talye wa wibuka, linamabe. Bukni, keting tamun nukuka tekbarye akunum uplyopura, tahun ketujuh (7) nirya ara, nun winiryuk wa kum wipnamabe. Tonda, nun wa tuku noutam ara, yala kum koupnamabe. Talye awamlye ninguk, talye palamle ning libuka dinamabe. Ara, mince nyapdeiamsulum touk, keting tamun tekbarye deice arye, nun tuku ap, wa ap nirya ara, dikdik sena atonun kipnamla atia. Tonda, yuk nang arye, nun uang yo bok do, yata ning do, tia ati dopropsik ning ara, tekbarye keting tamun deice arye, ‘Aning dauplye. Nun ning, tia ati dopromsulum ning nirya ara, tuba tamubuka arena kume,’ nyapnamabe.
Auang yo bok bulupmakce, adeice arye yuk wininamak ning ara ani. Ara, arup ning atonun, ance, ‘Wininamlulume,’ nyamsulum touk, pil dona kumce, nun Sabat sum deice nirya ara roti din ning 12 kibuka dabuka, an mambul si eren aik pum tam bukni, yolana deice delilbanamabe. Aning atonun, ance, ‘Atalak ara, aning arenamnulume,’ nyamsulum touk, roti deiyok ning, el si gandum do, yuk yala ning do, arepnamkiyabe. Tonda, nun malye winina ati, talye mangkau asa arye oplopsutum bukni, nun punun ning ati, ‘Kam ning obuka uku dapmunce, arenamnulume,’ nyamsulum touk, tuba wininamabe. Tonda, Sabat sum deice arekinyap ning ap, tonda wala tikin talak weik kwalina yubuka anti arekinyap ning ap, tonda ance, ‘Asum-asum nirya weik kwalina yunamlume,’ nyapdeiamsulum ning ap, tonda pia teleb ning, anti teleb ning arekinyap ning ap, tonda nun malye winin ning kum danalina ati, arekinyap ning ap, pia kum bataknamabe. Ance, ‘Aning-aning nirya winibuka arenamnulume,’ nyamsulum touk arepnamkiyabe. Aning nirya ara, ance nunti, ‘Sik aninye ara, wenebuka kum opnamne,’ tenepsuluma ati, nun punun ning ati arekinyap ning kanye deibuka dololyame. Ati, na ni an si eren aik pil aning-aning nirya dolamice ning ara, kum bataknamabe. Tuba pil dona uk unamabe.
Lewi yala nang arye, Allah nyalamuk Mem Yupu yininmek talak ara, Israel ninye kekenmekce, ‘Se, ayupu ara mambul weike’ tenen, engenmek. Engenmekba, amutuku ninye deiyok taleamuknye, Gubenur Nehemia ap, tonda Allah el si eren aik pum tam pil dolamukce, Allah yupu peterena pil taleamuka deiyoknye Esra ap, tonda, atalak Allah el yupu peterenmek nang, Lewi yala nang ap, sik Israel ninye nirya arye bulubuka kekenmek nang ati nyabik. “Nun ni koprop Allah, el si Yahweh ara, arup ara el weik ilil sum uple. Ati ara, Allah yupu atalak nyapmap ning ati, kekebuka tenipmunce, engena meme,” nyabik.
Anggunce delilyangamunye ning nirya ara, talye dem ati boyangalulume. Winibuka boyangamunye ning nirya ara, dukna dukikiba, tong ati ukinikilongolamak touk, usunune. Narye anggunti lik upniliba, kum dilisunune. Anggunce wala tikilongon talak ap, Sabat sum ap, weik mambul sum ap upliba, Allah yupu kekena ati, bulubuka wekelyangamunyak ara, na like.
Allah arye na Yeheskiel biti nyapnukba, narye tamubuka nyapse. Ara, “Se, na ni koproba Allah Yahweh, anda aning-aning nirya deice tam erebuka, mikip weiknye ulyama ati, moropkine! Na nio, na pia mitik talak arye dipdongobuka, wini talak babye, narye malye una deice arye, malye kum kipdeipdase. Ara, kam ulye ning, talye dipmalye ning ap, tonda yuk yu kam ning, ninye arye weilamak kam ning oplobik ning ap ara, aning tup ap, el kalimna ap ara, pia kum dilamsirye, winibabye tuba kum dinune. Allaho, ance, ‘Aning nirya ara, pia kum dinamlume,’ nyamsulum ning ara, pia kum dilamse touk, tuba kum dinune.” Na Yeheskiel birye Allah ati, nyabuka moropse.
Narye, ‘Winibuka arelyanganamlulume,’ nyabuka, lak nyapsise touk, aning nirya arelyanganamnulum bukni, Israel nang, sik ninye deiyoknye, Raja elce deiyok kiplirye, aning nirya winipnamle. Ara, sik Israel nang arye, malye-malye winilamikce ning ati, ‘Allah arye aning kum kiplirye, teleb kipdeipnamsilʼ tenen, kam ning opnarye, arelyamnil ning ara, kam ning oplirye, uku dongopnamle ning ap, gandum ning arenamniyak ning ap, na arena ati, anggur mek makau kwebuka, arenamniyak ning ap, aning nirya ara, Rajanye, elcuk dekuka arelyanganamnulule. Tonda, narye, ‘Sik Israel nang ara, sik mambul weik sum ara ani,’ nyabuka, lak nyalamsise sum ap, tonda winiryuk wala upnyopura, ‘Awala ani,’ tenena ati, arenamniyak talak ap, tonda talye pil dona kumce, dikdik sebuka, na si erenamsiak sum, Sabat sum nirya ap, tonda Israel nang ati, narye, ‘Sik mambul weik sum ani,’ nyabuka, ‘Kwalya kwalin sum yuk-yuk kipse touk, aning nirya wininamnyake. Atalak-atalak nirya ara, Israel nang sik ninye deiyoknye birye, na Allah ati aren ning ara, buluplirye, arelyanganamnulule. Ara, sik anang nirya arye, malye unyap ning kum kipsuturye, bikuka lyepdopsutueʼ tenen, kintinibuka deilinamak ning ap, gandum arenamak ning ap, kam ning obuka, uku dongonamak ning ap, ‘Nun ni Allah ap, teleb ubuka neika uptibyeʼ tenen, arenamak ning ap, sik Israel nang malye winin ning pununa ap, dukungolona ap ati ara, Israel mutuku Rajanye birye kintiniplirye, aning nirya, arelyanganamnulule. Winiplyopura, na Allah arye, Israel yala nang nirya arye, malye-malye wininyak ning ati, kum kipdeipnirye, biklyopura, anggunti lyepdopnamsine.
Tonda, anggun malye ululum ninye arye, anggun bidamang ati nyalalulume. ‘Anango, wala winiryuk tiknamle talak upliba, Allah el si erenyap talak ara, dan sum akunum kum datuba, nunce tonap tuba tamubuka, nun gandum minop dektibye do?’ Tonda, anggun ayupu nyabuka nyalulume. ‘Allah si erena ati, pil dona kum diparyuk, dikdik senyak sum, Sabat sum ara, dan talak sirya daknamle do? Sabat sum akunum sirya daktuba, nunce nun gandum duk dektibirye, deken ning dopropnamabe,’ tenelulume. Tonda, deken ning, ‘Weik doproptibye’ tenen, gandum duk lun ning ara, mitik ning aryuk lululume. Mitika aryuk lululum bukni, ‘Aning dekena ati, yo bok weik tabakuka arepsululume,’ nyabuka morolulume. Tonda, gandum duk sak libikirye, timbangan deice delinyak talak ara, anggun timbangan ara, tilila ninguk kiklilulume. Aning dipkoprob ikin ara, kum nyalulume. Winimunya deice arye, anggun mutuku ninye ati, tilila yupu uk nyalulume. Anggunce, ‘Kume, gandum duk el ikin ara, mitik anun uka,’ nyaplobuka, tilila yupu nyapmunce, sik ning talye ubula dobuka dilulume.
Atonun, anggun kanye delin talak nirya babye, terompet deice pong-pong nyanamlulume. Wala tikilongon talak ap, tonda narye, ‘Na si erena ati, anggun weik kwalya sum ani,’ nyalamse touk, aweik sum akunum kiplyopura, na Allah arelbana ap, si erena ap ati, anggunce cang pong-pong ana, el si terompet, pong-pong anamlulume. Nyapmunyopura, nara anggun ni koproba Allah Yahweh arye kekenamsine. Tonda, anggun malye winilamlum ning ati, wenebuka oplopsitinye bukni, anggun namin kina ati, kam ning obuka, nati arepmunce, uku dalbinumunye talak ara, cang pong-pong ana, el si terompet deice arye, pong-pong nyanamlulume. Aning atonun, na ap, anggun ap, neika teleb kina ati ara, kam ning obuka arepnumunye talak babye, cang pong-pong ana, terompet deice arye, pong-pong anamlulume. Nara, anggun ni koproba, Allah Yahweh arye nyapsine. Allah arye nyabuk.
Yata ning do nirya, ninye nong buru tam ulye ning nirya ara, dilulumba, si bam bol bisik arye anggun mun pum wekesulul bukni, adeice arye anggun talima malye kum winilisulule. Aning kum bukni, anggun talima ap, anggun kanye ap noutamak ulye ning ap, malye tenelulum ning ap ara, talima noutamak tenemunya deice arye, malye winilulume. Winibuka malye umunye ning deice anggunce anggun bidamnye ati malye winililalulume,” Yesus arye Farisi nang awekuka kekenmeka ati nyabuk.
Nun dilamap ning, talima pum bisik kum wekesulul bukni, mun pum bisikuk mapmasilya, deiuk yaltakanyabe,” Yesus arye nyabuk. (Yesus ayupu nyabuka deice arye, “Din ning yala-yala nirya dilamibya deice arye, talima malye kum ulisulule. Tonda, din ning yala-yala nirya babye, dibibyopura, adeice arye Allah el yupu kum yaniltanyabe. Aning kum bukni, nun talima noutamak malye tenenyap ning ap, dipkoprop malye wininyap ning ap, adeice arye, Allah el yupu yaniltanyabe. Anyuk, yuk ton kume,” nyabuka laka nyapsuke.)
Aning kum winipnamap bukni, teleb ninguk winipnamap ara, surat sekibirye sik dam dopkwetepnamabe. Pia kum winipnamak ning ara, winibuka nyapnamabe. Yata din ning do, ninye arye si talye erenyak ning ap, ‘Talye si erepnamabe’ tenen, obuka arinyak ning ap ara, nun kum dipmanto ning ara, sik Yahudi yala kum ninye babye, adin ning yala nirya pia kum dinamake. Tonda, ubula arye talye yolana nirya pia kum wininamake. Tonda, minop ngang colopdongobuka obikcopura, ining kum saklamle ning nirya nong kalibuka pia kum dinamake. Tonda, ining mek yala nirya pia kum dinamake. Winibuka nyapnamabe,” Yakobus arye nyabuk. Nyabukce, ayupu ton nyabuk.
Aning ati ara, sikce yuk diba tenenyak ninye nirya ati, yata deiyok ati, “Sikda malye wininyake,” nyabuka wenepmunce, yupu lipsisikuka bokolinamlum do? Tonda, yata deiyok ati, sik diba tenebikce unyak ninye, anggun weit yapu atonun nang ati, ‘Kume, anang ara, nun wininyap ning atonun kum wininyaka anya arye, nunda weik mambul nang unyap bukni, sikda mambul kum nang unyake,’ tenelulum do? Kume, na kayapo, Allah arye ninye im sirya, mutuku sirya nirya ati, yupu lepsisikuka bokeipnamsil talak ara, el Yupu Lepsisikuka Bokolina Deiyoknye, el teleb buna ning deice bukliba, nun nirya asukumuk yanuka tikibirye, nun winilamepye ning ati laka nyabibyeba, elce, “Aning telebe, aning ara malye,” nyabuka, yupu lepsisikuka bokeipnamsila ati nyapsine.
Anggunda kanye talima dukdongobuka, Kristus ap ululuma anya arye, Kristus arye anggunti, akunum dipsuka anya arye, adeice arye el dibuk touk, anggun babye, atonun akunum diplume. Aning ati ara, tukwak ninye arye, “Winina meme, aning ara kum diptume, aning talina ara meme,” nyabuka, mem yupu atonun nyaldelisinyaka ara, kekena kume. Ato yupu ara, daupnamle. Aning atonun amu tam tuba kum ululum bukni, ‘Ayupu ara mambule’ tenen, kekepmunce dobolbamunye ning ara, yata ati do? ‘Amem yupu atonun yupu nirya ara, mambule,’ tenebuka, talibuka kum unamlume.
Ura, sik yuk nang arye, urasin yuk peterenyak yupu, talye yupu yala-yala nirya peteresikceba, kekemunya deice arye, ‘Yuk malye bisik bobisicak’ tenen, sik yupu kekena kume. Allah bico tenesilirye, el kanye aniryuk melisilyeba, nun kanye talima mikip kilisilirye, talima kwa disulul ara, telebe uka. Aninguk talibuka unamlulume. Bukni, yuk nang arye, sik bidamang kanye aryuk, ‘Winina meme,’ nyabuka, din ning ati, mem nyabikirye, mem pil dolamaka deice arye, nun kanye talima mikip kum kilisulule. Din ning ati, “Aning ara dina meme,” nyabuka mem nyabikirye, mem pil donyak nang babye, wininyaka deice arye, dipkoprop kum melilanyake. Anang arye talye piluk donyake.
Apil-apil dolamik ning nirya ara, talye arena ning ap, talye din ning ap, talye dinmek ap, ninye talima teleb ulina ati, talye mek likuka pil dolamik ning ap, apil-apil dolamik ning nirya ara, mem pil uamuk bukni, talye winipmanto ning, nong bol deice atonun piluk dolamik. Apil ara, minop talak arye dipdongobuka, anoutam talak nirya pil dopra yangalamik bukni, wini talak ara, Allah arye winiryuk nyalisilye yupu, akunum nyapsuka ati, aminop pil dolamik ning ara, tuba kum talinamabe. Minop talak dolamik mem pil nirya, akunum sirya dakubu.
Na kayapu nang, nun dib tenen nang unyaba anya arye, anggunce anggun kayapu nang ati, minina yupu kum nyalanamlulume. Anggun diba teneplum nang arye, yuk diba tenebik nang ati, malye yupu ap, minina yupu ap nyapmunce, sik nong deice deipmunyopura, ara Allah arye, ‘Wininamlulume, aning ara, kum wininamlulume,’ tenen, nyapsuk yupu yanina atonun ululume. Ara talye ati kume. Anggun babye diba teneplum nang arye, yuk diba tenenyak nang ati, “Anggunda malye nang ululume,” nyabuka, malye yupu nyalalulumopura, ara anggunda yupu bokolina deiyok nang atonun ululume. Aning ara, pia malye winilulume. Allah el yupu deice arye, “Malye yupu kum nyalanamlulume,” nyapsuk bukni, aning akunum winipmunyopura, el yupu akunum yaniplume. Allah arye nyapsuk yupu noutam bukni, ayupu nirya dobolbana kum arye, ton yupu yaniltana, ton yupu kekena kum umunya deice arye, yupu bokolina deiyok nang atonun akunum umunce, el yupu nirya yaniltalulume. Ati aning ara winina meme nyapsine.
Nyabuka ati, Daud birye tamubuka nyabuk. “Ati kel biklyame. Ambusum ara, wala tikilongon talak weik kwalya kwalinyap ning ara, akunum upmala ati ara, na ap, an ni Raja Saul ap, dipnamaname. ‘Winipnaname’ akunum nyapnuk bukni, ance telebe urtenepminyopura, na adiparyuk bai tam binirye, duknubuka unamane. Duknubuka daunmanya ani, like bitinye akunum uplyopura, daunmanya ani, sintam kipnamale.
ကြော်ငြာတွေ