Ura, na Raja weiknye birye, Esra anti, nyapkine. Allah arye kel bikna deiyok ning weik arye areamkuka ati, akel bikna deice arye, ance ninye deiyok nang kipnamlyame. Ara, yupu lipsisikuka bokolina deiyok nang wipdeipminyeba, yuk nang arye, malye kanye bobuka nyace talak ara, sikce kekebikirye, yupu bokeipnamake. Ara, yata nang do nirya, anggun ni koproba Allah arye, ‘Wininamlulume,’ nyapdeiamuk yupu kel bikamik nang, Efrat mek lilun arye, otam keting wekelban tam noutamak unyak nang nirya talibikirye, yupu lipsisikuka bokolina deiyok nang unamake. Winibikirye, ‘Aning telebe, aning malye. Tonda diksukum una ara anye,’ nyabuka peterenamake. Tonda, yata nang do nirya, anggun ni koproba Allah arye, nyapdeiamuk yupu min kum kel bikamik nang ara, an Esra birye peterenamlyame.
Kolose 1:28 - Eipomek28 Yatato ninye do, yata yala ninye do nirya, nunce anang-anang nirya ati, Kristus el yupu, ninye lyena yupu peterenyabe. Ara, ‘Mankau arye malye ubicak’ tenen, “Anggun kanye mouplulume,” nyabuka wenenyabe. Tonda, anang-anang nirya ati, weik kel arye Kristus el yupu pia moubuka peterenyabe. Wininyaba ara, urtalya ati kume. Deiyok ara, Kristus ap, kanye dukdongobuka unyak ninye nirya, Allah el dam welepnamak talak ara, ‘Sik kanye wisipliba, pia diksukum ninyeuk unamak’ tenen, el yupu moubuka peterenyabe. အခန်းကိုကြည့်ပါ။ |
Kolose 1:28
54 ပူးပေါင်းရင်းမြစ်များ
Anggunda moubuka weika arye, kel bikna nang ara, min kum kel bikilulum ninye ara, na yupu moubuka kekepmunyopura, teleb un ning, moubuka kel bikinamlulume. Aning atonun, anggun tuba walwal uk ululum ninye babye, na nyasinye yupu moubuka kekepmunyopura, ‘E, teleb kibuka un ning ara ani’ tenen, nong bol deice ning kel bikna kum bukni, nong noutam ning ton, moubuka kel bikinamlume. Anggunda, yupu kekena kumce malye pia weik ninye ululuma anya arye, na nyasinye yupu moubuka tenenamluma deice arye, pia moubuka tenepmunce, teleb kibuka kel bikinamlulume.
Kel bikna deiyok ning, weik arye kel bikamukce, amutuku ninye ati, peterena deiyoknye ulamukce, pia moubuka peterelamuk. Elce, teleb kibuka kel bikamuka deice arye, elce yuk kili sal ati, ‘Teleb kibuka unamak’ tenen, peterelamuk. Ara, winipmanto domon yupu ap, weik kel bikna deiyok ning ap, moubuka kel bikamuka deice arye peterelamuk. Weik kel kina deiyok ning nirya ara, ‘Deiyok anye’ tenen, moubuka tenelamuka deice arye, nong lakak kibuk ninguk, teleb kibuka sekuka kintinip deiamukce, peterelamuk.
Nyapdeipnukba, na Yeremia birye, Allah ati ayupu tamubuka asipdese. “Naio, narye yata nang, sik dam wenen yupu binuka nyaptiniba, sikce kekepnamak do? Sik anang ara, kum kel bikmanto nang, pia malye kin nang unyaka atia. Na ni Allah Yahweh, an nyapdeipminye yupu, sik anang dam binuka nyapnyopura, sikce, “Kume, ayupu ara, talye yupu uka. Aning ara, mambul kume,” nyabuka, nalibikirye, akutunyake. Narye an yupu bobinuka, sik dam binuka nyaptinya babye, sikce, ayupu ati, kanye deibuka kum kekepnamake.
Anggunda bita dilulume! Anggun ti wenepnusin sum ara, akunum yala! Wini talak ara, ikin pia weik ning, anggun Israel nang dam deipnamsin ning ara, akunum dam yanusile! Anggun Israel nang arye, mandipna kanye bobuka, malye weik winilulum ning nirya ati ara, mitang kipnamsine! Ninye arye koulamak ning palamlirye, keit ning ap, duk ap minop palamle touk, anggun Israel nang ara, weik erepdanuka kwalimunce, kimilalulum ning nirya ara, weik kipnin balule. Awiniluluma deice arye, anggun wenen ning, akunum dam upmasile.
Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.
Aninye mek dongolamuk bukni, elce diba tenena ninye mek dongolamukak, sik Farisi nang ap, Saduki nang ap dilyayikba, eibukopura, anang ara, tuba malye winilamika anya arye, sikti, ayupu nyabuka wenebuk. “Anggun yu una ap, tenepce arye, talya yupu nyabuka, duknuna ap winimunya ara, ninye ton kwatima duknubuka mapmalya arye, si tolamsil touk winilulume. Yatanye birye sikti, ‘Allah arye, malye winin ninye wenebuka opnamle,’ nyabikba kekeplumce, ‘Allah arye nun opsilyak’ tenen, bik-bik abuka bilum do? Yata nang arye, anggunti ayupu laka nyapsuk do?” Yohanes arye sikti, nyabuka wenebuk. Nyabukce, ayupu ton nyabuk.
Aning ati ara, anggun ni Allah im deice ululnye birye, ninye nirya ati, bico tenebuka kanye talima talibuka melilul touk, anggun babye ninye nirya ati, kanye talima arenamsile. Anggunda, Allah el mapu ululuma anya arye, anggun ni Allah malye una kum, diparyuk diksukumuk ulye touk, anggun babye atonun, malye winina kum, diparyuk diksukumuk wininamlulume. Yesus arye nyabuk.
Mek liya yo lukuka delilbiyikce, Yesus tukwak sakukopura, yupa weik wekmek nang ara, eibuk. Eibukce, awekmek nang ara, ninye arye weilamak domba, sik apu yapu dam kum ukcopura, ‘Ortam binun do, atam binun do?’ tenen, kanye walwal uplibuk, teniltolamak touk, aninye babye, wininmek. Ura, aninye ara, ‘Yatanye birye teleb yupu peterepsutu ak, diksukumuk unamap do?’ tenen, teniltona ap, kwelana ap, unmeka ati, Yesus arye anang ati bico tenebukce, ayupu-ayupu yala nirya weik peterenmok.
Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”
Na kayapu, aning ati ara, ‘Anggun kel kipnuluma’ tenen, laka nyapsine. Allah arye Yesus deice aniryuk, nun malye unyap ning ap, nun kanye talima malye tenenyap ning ap, kum kibuka delisilirye, namin kisulule. Yata ninye do nirya, Yesus ati diba tenebiceura, malye ning arye anggun talima ap, kanye ap, talibuka moupsilirye, yupu molisulul ning nirya, Yesus deice aryuk lyepsilirye, loldongosulule. Musa sekamsuk yupu atonun winimunya deice arye, malye ning talipsuka ara, lyebuka kum lopdeipsutue
Ura tonok talak arye, sik Epikuros tam nang ap, Setoa tam nang ap ara, aning-aning nirya tenelamikce, laka nyalamik nang ara, sikce Paulus ati, yupu bisibikce yupu nyapdayik. Yupu nyapdayikce, ton tam nang arye Paulus nalinmek. “Ayupu nyanmalnye bira, yata yupu yanuka peterenmasil do?” nyabik. Ton tam nang arye nyabik. “Kume, nun walwal bukni, nun tenepmapa ara, ‘Sik dib tenepnamak’ tenen, sikce nunti peteresice touk, el babye, yuk mutuku allah-allah si nunti peterenmasile,” nyabuka, sikuk nyapdayik. Paulus arye, ‘Yesus arye lyepnamsile,’ nyabuka, el laka teleb yupu ap, kam bulina yupu ap, peterelamuka ati, sikce ayupu nyabik.
Winipnamsiaka ati, anggunda pia moubuka dinamlulume. Keting tamun winilye deice arye, keting noutam ap, lukunyan ap, na engena deice arye, ‘Pia moubuka tenenamlulume’ tenen, pia laka nyalamsisirye, peterelamsise yupu ara, ‘Anggun talima on ning opsilyak’ tenen, ‘Moubuka dinamlulume,’ nyabuka peterelamsise yupu ara, pia tenenamlulume.” Paulus arye nyabuk.
Asum-asum nirya Yahudi yala nang Allah arilamik aik dam ap, aik yuk-yuk ap, peterepra balamikce, ayupu peterenmek. “Allah arye, ‘Ninye Lyeplirye, talipnamle’ tenen, wipdeiamuknye, Mesias bira, ara, Yesus el uka,” nyabuka laka teleb yupu ninye lyen yupu peterena ap, laka nyana ap, tonok ton batakana kumce, pia tuba-tuba peterenauk ulamik.
Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.
Sik yuk-yuk winibuka unyak bukni, nunda aning atonun kum unyabe. Nunda, “Kristus wanwanun yo deice arye obikbuk, apil dopsuka deice aryuk lyesulule,” nyabuka peterenyabe. Ayupu uk peterebibyeura, sik Yahudi yala ninye kekebikirye, bisik noutamak keil arye yan dum dukliba balamle touk, nun peterenyap yupu ati, ‘Ayupu ara kume,’ tenebikirye, lik upliba batakanyake. Sik Yahudi yala kum ninye arye, nun yupu kekebikirye, ‘Ayupu ara, pia walwal arye lup nang nyalamak touk nyanyake,’ nyasinyake. ‘Nong kum upnamle’ tenen, lik upliba batakanyake.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Allah El Dib Kanye arye, tonoknye biti, Allah el ulul ning ap, el laka teleb yupu deiyok noutamak ning ap laka nyana deiyok ning ariliba, anye bira weik kelnye ulule. Yuknye ati ara, Allah El Dib Kanye melipliba, Allah el yupu kekeplinye bira, “Ayupu nong noutamak ara, ani. Ati winibuka unamabe,” nyabuka, nyalina Deiyoknye usulule.
Ara, na kayapu. Nun nirya arye, ayupu uk peterenyabe, nyapmasina anya arye, ayupu deice arye, “Kristus dibukura, Allah arye kam bukeibuk,” nyabuka peterenyaba ati, anggun kan-kan bukni, ton nang ara, “Kume, diamik ninye ara, Allah arye, kam kum bukeipnamle. Ara kum winipnamle,” nyabuka peterenyaka ara, yata wiribuka kel bikamtingce, ayupu nyapting do? Anyanyak nang ara, sik yata deiyok ati nyanyak do? Sikda tililauk nyanyake, dipkoprop kum nyanyake.
Yatanye do nirya, dib tenebukura, Allah El Dib Kanye arye akunum talilulnye bira, anye birye aning-aning nirya ati, kintinipdelirye, ‘Teleb ning ani, malye ning ani’ tenen, yupu bokdeiptue. Atonye birye winiptu bukni, yuk ninye ara, sik dib tenena kum, yuk talye wininyak ninye ara, aning nirya ati ara, moubuka kum teneptingce, yupu kum bokdeiptinge. Tonda moubuka kum kel biktinge. Deiyok ara, Allah El Dib Kanye arye, sik talima kum talilula ati, nunce peterenyap yupu, moubuka kum kel biktinge nyapsine.
Ura, nun Allah yupu peterena deiyok nang arye, dipkoprop weik kel bikne deiyok yupu peterenyap bukni, ara sik talima akunum wisibuka, dipkoprop Allah el bisikuk banyak ninye kekebikce talakuk, ato yupu deice arye, peterenyabe. “Weik kel bikne deiyok yupu,” nyapmasina ara, atalak noutamak talye-talye unyak ninye ap, atalak noutamak aning-aning nirya talibuka, weik ninye deiyok ninye ap arye, ‘E, ayupu ara, weik kel bikne yupu,’ tenenyak yupu atonun ning ati kum nyapsine. Wini talak ara, aninye weik nang unyak bukni, aminyan talak ara, Allah arye ato ninye nirya wenena ati, malye kibuka weneplirye, sik nyanyak yupu ap, sik wininyak ning ap, kum kipdeipnamle. Sikce, sik tenenyak ning babye, nong kum upnamle. Allah arye sik nirya kum kipdeiplirye, sirya daknamle.
Nunce anggun dam kum yanuka peterepmasitibyetoura, sik Korintus mutuku unmeka ati kanye lon yupu kum nyaptibye bukni, nunce Kristus el laka teleb yupu, ninye lyena yupu dobuka peterepra balamuburye, anggun mutuku ton peterelamsupu. Minop talak yanuka anggun mutuku peterena deiyok kouna deiyok nang ara, nun uka. Ati nun talye ati kum nyanyabe.
Narye anggunti tenepnirye, ‘Anang ara, na tenen nang anya arye, yuk nang dam kipdobicopura, anang arye talebikceura, malye winibicak’ tenen, anggunti kanye deibuka, yukulosunune. Allah arye nun nirya ati bico tenepsilirye, kanye talima melisiliba, yukulosilye touk na babye tenepsirye winisunune. Ara, winipmanto yupu nyapnusine. Ara, tonok tam nang arye, tonok kil dobuka, yuk tam nang ati, “Akil ara, yuk nang arye kum dobik. Pia teleb kam kiluk ulule,” nyabuka, arelamak touk, wininune. Ara, sik kil arin nang arye nyalamak touk, narye anggunti utenyamsise. ‘Korintus ninye ara, Kristus el yupu uk dib tenebikcebuk, tonoknye binyuk, Kristus elcuk aninye talipnamle’ tenen, anggun Korintus mutuku ninye ati wipdeiamsise.
Nunce, nun bidamnye kanye tenenyap ning ap, nun bidamnye nong ap, ati kum peterenyabe. Aning kum bukni, nunce, “Yesus Kristus ara, nun Weik Ninye Deiyoknye el tonok ulule,” nyabuka peterenyabe. Tonda, Yesus el amu tam ubirye, el piluk donyapa anya arye, elti, pil donyap bukni, apil donyapa ara, anggun Korintus mutuku ap, Akaya tam ninye ap, anggun talye melin nang atonun unyabe. Ati nun yupu nyabibibuk, ayupu pia kum kekepmanto ninye ara, Allah arye tenyamuk touk, sik dipnamaka ati kum kekepsitinge. Yuk deiyok ati kume.
Na kanye ara, Allah el mapu nirya ara, ilil weik asa unyak bukni, na Paulus ara, ilil pia kumnye unune. Nara, ilil pia kumnye ununa babye, Allah el kanye deipnukce, ‘Paulus ara, Ninye Lyena Yupu, Kristus el pia teleb yupu bobuka, Yahudi yala kum ninye peterelbinamle,’ tenepnukce, wipdeipnuke. Allah arye, Kristus deice kintinipdeipsukce, el ap kanye dukdongobuka upyopura, arenamsil ning nirya ara, nukmanto kum ati, nunce kum biktibye.
Yesus Kristus arye, winipsuka deiyok ara, ani. Aning tenebuk. ‘Sik malye winin ning nirya kum kipdeipniba, malye ning tonok ning babye kum upliba, nati dib tenenamniyak ninye ara, pia diksukumuk unamak ninye kipdeipnirye, na tenen ninye una ati, aninye dobuka deipnamne’ tenen, Yesus Kristus tenyamsukce winipsuke. Ara, Yesus arye, nunti, ‘Na ti dib tenenyak ninye ara, malye ning tonok ning babye, kum upliba, pia diksukumuk unamak’ tenen, lyepsukce, teleb kipdeipsuke.
Anggun babye ton teneipdelulume. Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeipsuk yupu nirya ara, na kekepsirye peterelamsise. Deiyok ara, anggunce binuka wekmunce, talibuka unamlum mutuku noutamak ara, ‘Allah arye nyapdeipsuk yupu nirya kekebuka, kanye lamapdongobuka unamlum’ tenen, peterelamsise. Ayupu talibuka umunyopura, Allah arye winiryuk mutuku arepsiliba, teleb ubuka, kanye lamapdongobuka, amutuku noutamuk unamlume. Musa birye Israel ninye ati, nyabuk.
Winibuka pia yuk ulalum bukni, wini talak ara, nun ni Allah arye, anggun malye ulalum ning kilibuka lyepdeipsukce, el ap, neika una ati, kanye dukdongopsuke. Teleb kipdeipsukce, el ap, dukdongobuka ansinibdeipsuk ara, el Mi Koprop Kristus ara, ninye nong dayukce, tukwak mutuku yanuka daulamuka ani, nunti dibuk deice arye teleb kipdeipsuke. Winipsuka ara, talye ati kume. Deiyok ara, ‘Na Allah arye sik dobuka, na dam deipnamsin talak ara, sik malye wini ning tonok babye, kum uptu ura, pia diksukumuk unamak’ tenen, teleb kipsukce, el ap, kanye dukdongopsuke. Akunum teleb kipdeipsuk ning ati ara, yata nang arye do nirya, ‘Aning ara, malye ning,’ nyabuka malye yupu kum nyapsitinge.
Yata mikip ning do nirya, ninye deiyok nang ap, yuk yala weik mikip ning nirya ap, isa mikip ap, ninye talima talibuka usilye ning nirya ap ara, Kristus el amutamuk ulule. Elda weik mikipnye ulula anya arye, elce aning-aning nirya malye kibuka, deice tam ulule. Tonda, diba tenena ning ap, talima ap, kanye ap, patapsilye ning nirya ara, Yesus Kristus dukdongobuka neika ululuma deice arye, aning nirya akunum moubuka aupsile. Aning nirya ati ara, tilila yupu peteren nang arye, ‘Yuk bisik dobuka bobisicak’ tenen, pia kanye moubuka unamlulume.
Tonda, Allah el laka teleb yupu, Kristus yupu ati, ‘Dipkoprop moubuka kel kinamabe’ tenen, pia piribuka kel kipra banamlulume. ‘Kristus el yupu pia teleb,’ tenenauk umunye talak nirya ara, weik kele arye peterelana ap, ‘Mankau arye malye winibibyak’ tenen, “Kanye mouplulume,” nyabuka wenelana ap, pia melipdanuka unamlulume. Tonda, winibuka wininamlum talak noutamak nirya ara, minop seklamik yupu, buku Mazmur Allah yupu mot ap, anggunce sekuka nyalulum Allah yupu mot ap, Allah el si erena ati, arisilye mot nirya ap, nyanamlulume. Amot-amot nyanamlum talak ara, anggun kanye talima noutamak arye Allah ati, “Telebe,” nyabuka tenenamlulume.
Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.
Ninye talye yoldalamak ning ap, aning-aning nirya pia pataplibuk, ‘Talya parapkabuka winipnun’ tenena ap ati ara, anggunce yuk nang nirya ati, talye minina yupu nyana ap, malye kilina ap, kum wininamlulume. Nunce anggunti akunum peterepsupu. “Yata ninye do nirya, anyapmasin malye ning ap, aning atonun ning ap, akunum winipmacopura, aminyan ara, Allah weik arye wenebuka opnamle,” nyabuka wenelamsupu.
Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.
Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.
Ura, Kristus arye el bidamang nong dobuka, atonok ninguk aribuka deice arye, nun malye winina deiyok ning ati, kum daneipsukce, apil sirya daksuka anya arye, akunuma, diksukum atonun kipdeipsuke. Winipsuka ati, Allah el kanye ara, ‘Yesus ati diba tenenyak ninye ara, diksukum ninyeuk unyake,’ tenesulule. Yesus arye, nunti diksukum kipdeipsuka anya arye, telebuk unamabe. Winipsuka deice arye, el pil sirya daksuka ati, Allah el taruk sirik tam binuka bukuk. Diksukum kipdeipsuk ninye ara, Allah arye nun talima pil melisilya deice arye, malye winin ning kum kipdeipribasilirye, teleb ulisulule.
Anggunti Allah morosunun ning ara, nyapnusine. Ara, ‘Yesus Kristus melisilya deice arye, anggun talima noutamak pil dosiliba, Allah arye, ‘Wininamake,’ tenyamsuk ning, el kanye delisulul ning nirya weika arye kipnamsile’ tenen, Allah morosunune. Yesus melisilyeba, aning nirya aupsilyopura, adeice arye Allah arye anggunti, ‘Wininamake,’ tenesilye touk, ‘Telebuk unamlulume’ tenen, Allah morosunune. Tonda, ‘Wini talak arye dipdongobuka, doryanamle talak nirya ara, ninye im sirya, mutuku sirya nirya arye, Yesus Kristus el siuk weik arye erenamak’ tenen, pataniliba, Allah moronune. ‘Dipkoprop pia telebuk wininamak’ tenen, “Amin,” nyabuka, Allah morosunune.
Tonda, ayupu ara, moubuka tenenauk unamlulume. Ara, nun du koprop Paulus ara, Allah arye weik kel kina deiyok ning aribuka deice arye, Paulus arye sekeipsuk touk, nun Deiyoknye Yesus minpola wenena kum arye, dinauk usulula ara, talye ati kume. Elda, ‘Ninye mutuku-mutuku nirya lyeptinye’ tenen, dinasululce, minopce kum wenesulule.