Kidung Agung 7:1 - Eipomek

¹ Se, narye dopnamkin kilo! Anda, ninye deiyoknye Raja dobuk wel kil atonun ulyame. An yan ara, yan ongon ning, el si ara sendal, ongopminba, urasin pia telebuk ukulule. Tonda, an keil ap, bomok ap, nong bol nirya ara, teleb ukulule. An nong nirya ara, kel weik bikamuknye birye, dopmanto ning atonun ulyame. Anda, urasin pia teleb kil ulyama atia.

Kidung Agung 7:1 ပူးပေါင်းရင်းမြစ်များ

Kejadian 32:3

Yakub el du koproba Esau bira, atalak Edom mutuku bukni, mutuku si ara, Seir mutuku ulamuk.

Mazmur 45:13

Se, nun deiyoknye Rajao! Tirus mutuku ninye ara, pia bona talin nang unyak bukni, aminyan talak ara, sik talima noutam nirya arye anti, ‘Kanye deipsuturye, melinamsil’ tenen, pia teleb ning boyanuka, an dam arelyanganamake.

Keluaran 28:15

Allah si eren aik, pil don nang, anggun deiyoknye bira, ‘Allah el tenelye ninguk, moubuka kekepnirye, kel biknamneʼ tenen, unamle talak nirya ara, aning kel bikna deiyok ning ton, weik kel nang arye kintinip deipnamake. Ara, Efod baju ara, taram dam ongonamle baju kintinip deipmamunye touk, aning babye atonun ubuka wipnamlume. Ara, abaju wina ara, anggun adiparyuk, baju win tapu, el si wol tapu, el urasin ara, warna biru ning ap, warna unggu ap, ining bi ning ap arye, dobuka wipnamake. Tonda, urasin teleb ning, emas deice arye wipmace baju win tapu arye, dobuka wipnamake. Tonda, pia namin teleb baju, el si lenan, abaju wina ati dobuka wipnamake. Winipminyopura, taram dam ongonamle ning ap, Efod baju ap, urasin pia teleb ning aryuk dobuka wipnamlyame. Aning ara, Efod deice birilkwetenamle.

Keluaran 28:42

Tonda, sik anang ongon ati, sik nunukne baju ning wipnumunyopura, (mitik tonun arye nunukna celana atonun ning ara), kain lenan dobuka wipmunce, kintinibuka deipnamlume. Abumang celana el cang ara, der dam arye dipdongobuka, keil dam sukdopnamlula anya arye, aning atonun ubuka, mitik cang arye wipnamlume. Winibuka wipmunyeba, ongonamak talak ara, anyaik pum pil donmakce talak, lak kipmanto ak ara, lelilongonamle.

Keluaran 35:35

Ura, Allah Yahweh arye, sik anang ati, kel weik bikna deiyok ning areamuka deice arye, apil don ning, aning-aning nirya, pia teleb kibuka dolamdik. Ara, yo boyanuka puturun pil dona ap, tonda, ‘Aning ara wininamak, winipnamak,’ tenenyak ning ap, namin kain warna biru ap, kain warna unggu tua ap, tonda kain lenan halusnye kam ning warna merah ap, tonda yuk yala kain ap, ‘Winibuka wipnarye, kintinibuka pil dopnanane,’ tenelamdike. Sik anang arye, ‘Aning ara, winibuka-winibuka dopnaname,’ tenena deiyok ning, kel bikdika deice arye, aning nirya pil dorurake. Dipkoprob, Bezaleel ap, Aholiab ap, yuk nang ap, sikti, Allah Yahweh arye, pil dona ati, kel weik bikna deiyok ning areamuk. Winyamuk deice arye, Allah Yahweh el si eren aik dona ati winin ning, aning-aning nirya pil dolamdike. Sik anang nirya ara, dipkoprob kel weik bikamik nang ati, anang ara, peterena deiyok nang unyake. Musa birye sik Israel ninye ati lak nyabuk.

Kidung Agung 7:2

Narye dopnamkin kilo! An mun deiyok ara, mek din makau, el si ara cawan atonunuk ulule. Ara, ninye arye mek din makau dobuka, anggur duk mek kwebikirye, amakau dikdongobikiba, pia langdibuka balamle touk ukulule. Winipmanto ning ton, gandum duk bulubuka deibikirye, mitik tonun mutuku kon atonun upliba, anang arye, kita dobuka, agandum duk dana-dana tam antanap dongobuka deibikiba, urasin pia teleb ulye touk, an mun nirya ara, atonunuk ulule.

Daniel 2:32

Apatung el kisok tam ara, kat dekna weik ning emas, pia teleb ning arye memamik. Tonda, el taram tam ap, taruk tatang ap ara, perak arye memamik. El mun noutam ap, keilak ap ara, kat ning el si tembaga arye, memamik.

Lukas 15:22

Nyabuk bukni, ami el li birye, el pil melina nang ati ayupu nyabuk. “Anggunda, ‘Weik nang kipnamap’ tenen, arilamak cang baju, el si juba ati, pia teleb ning ara, minopce dobuka yamunce, na mi ati ongopdeipnulume. Tonda, ‘Anyaik deiyoknye atonun ulule, tenepnamake’ tenen, taruk dukdongon ning dobuka boyamunce ongopdeipnamlulume. Tonda, ‘Anye bira, talye melinanye kume, weiknye ulule, tenepnamak’ tenen, el yan ongon sandal boyamunce ongopdeiplulume.

2 Korintus 6:18

Dopropsinirye, nara anggun ni koprop unamsine. Anggunda na mapu ap, na kil mapu ap unamnulume. Nara, aning-aning nirya bisibuka, deice tam mikip weik ununye birye nyapsine,” na Allah arye nyapsine. (2 Samuel 7:8) Allah arye nyapdeibukba, Samuel arye sekeiyamsuk yupu ara, na Paulus arye nyapsine.

Efesus 6:15

Yin talin nang arye, sik yan deice kat sepatu ongolamak atonun, Allah el laka teleb yupu, ninye lyena ati, el teleb yupu kel bikimunya deice arye, kintinip deipnamlulume. El laka teleb yupu kekebibya deice arye, el ap, ansinipdeipsiliba, kanye deibuka unyabe. Winipmanto ara, Allah el laka teleb yupu ara, ninye yan deice ongolamak ning, kat sepatu atonun, upnamsile.

Pilipi 1:27

Bukni, atalak-atalak nirya ara, anyapmasin atouk do, yuk winipnamsil ning do, yatato winipnamsil do nirya, weik mambul tenenamlum ning ara, nyapnusine. Ara, ‘Kristus el laka teleb yupu, ninye lyena yupu nyasilye touk, pia moubuka kekebibirye, ayupu uk teleb-teleb ubuka, diksukumuk unamabe,’ tenenamlume. Winipmunyopura, na dilyasitinye talak babye, dilyangana kum arye, kekenauk upsitinye talak babye, na biknamsine. Ara, ‘Sik Pilipi mutuku ninye ara, sik kanye talima ap, kanye ap, ansinibuka kanye lamabuka unamak’ tenen, kel biknamsine. Tonda, anggun nong ara, yuk-yuk ululum bukni, tonok kanyeuk bobuka, tonoknye ato kibuka, Yesus el laka teleb yupu pil dona ati, pia pi dobuka, neika pil donamlume.

Kolose 2:19

Aninye ara, Yesus Kristus ati, el dipkoprop yupu kum peterenyake. Nun Deiyoknye Kristus ara, kum tenebikirye, pia yuk kanye bobuka unyake. Yesus Kristus ati diba tenebiceura, Allah el mapu kipdeipsuk ninye nirya ati, Allah arye nyalyeba, Kristus kalekuka melisilya deice arye, Allah tenelamsuk atonun, kanye wisipsilirye, teleb kibuka weik upra banamabe. Winisilya ara, nun nong deiyok ara, kisok usilye touk, tonda nun nong mil-mil arye dukulolongosilye atouk, Kristus arye nun diba tenenyap nang nirya ati, dukdongopsukce, neika kipsukce, nun Weik Deiyoknye usulule.