Kidung Agung 4:9 - Eipomek9 Se, na dopnamkin kilo! Ance na kanye talima nirya, akunum dopropmanilama ati, antibuk pia patanilyeba, antibuk pia kanye deibuka, tuba-tuba tenikunune. Narye moun dikunun kilo, like tonok talak ara, ance nati enmanilamba, winipmanilama deice arye, adiparyuk, na kanye talima nirya libuka dopropnulumba, narye anti pia kanye deipkise. Ati ara, na kanye ara, anda, na weit kil atonun ulyame. Tonda, na kanye talima noutam ara, anda na dopnamne kil ulule tenenune. Aning atonun ton, an ngang dam karakalyam kweirya, urasin teleb ulula ati, tonok babye eipnyopura, adeice arye nara anti, weik tonun bico tenekinirye, anti kanye delikunune. အခန်းကိုကြည့်ပါ။ |
Kidung Agung 4:9
31 ပူးပေါင်းရင်းမြစ်များ
Nyabukce, sik ninye deiyok nang arye, sik taruk duk deice ongolamik ning, emas el si ara, cincin dobuka Yusup el taruk duk deice dongopdeibuk. Deiyok ara, ‘Mesir ninye nirya arye, anye nun deiyoknye tenebikirye, kel biknamak,’ tenen, winibuk. Tonda, atalak ninye deiyok nang ongolamik baju, pia teleb ning ap, Yusup el ngang dam karakna ati, emas tapu ap arebukba, Yusup birye aning karakuk.
Tonda, ‘Anye bira, ninye deiyoknye Raja ulule,’ tenen, bikilina ati, cang baju, el si juba, arepkik ning ara, el si juba deice, ‘Nintong teleb nyanamle’ tenen, nintong teleb minyak ap, minyak gaharu ap, nintong nyana teleb yo, el si kayu manis yo ap dobuka, ninye deiyok nang ongon baju, el si ara juba, an ongolamlum ning deice likdeipkike. Ninye deiyoknye un aik ara, dengna weik ning, el si gading arye, domik aik pum tam, teleb sukum ara, kitar deice arye, mot ton nyakiba, ance kanye delilyame.
Ara, anggun ni yapu ap, anggun nin yapu ap, sikce nyanyak yupu moubuka kekepmunyopura, pia telebuk unamlume. Winipmanto ara, ninye arye, urasin pia teleb ning dobuka, ‘Nun ninye deiyoknye ati, ninye nirya arye kwerya dolinamap’ tenen, el kisok deice dolilamak. Aning atouk, ninye arye, pia dekna weik ning dobuka, rantai tapu atonun ning kintinip deibikirye, weik sisin nang sik ngang dam karaklamak touk, anggun ni yapu ap, anggun nin yapu ap arye, nyasinyak yupu nirya ati, moubuka kekenamak mapu ara, pia teleb ulinamsile.
Tonda na mapu, anggunce, talye-talye yolamak kilapu nong bol teleb kibuka urasin pia telebto upmaca ati, anggun kanye talima lipdopsiliba, pia kum tenenamlulume. Tonda, akilapu sik asing ikilanyaka deice arye, anggun kanye talima lipdoposiliba, ‘Malye winipmunyak’ tenen ati, pia moubuka kalikelanamlulume. Anggun kanye talima lipdopsikiba, eibuka dobolbimunyopura, ‘Ara tapu koulongona atonun akunum kipnamsiake,’ tenenamlume. Ati winina meme, nyapsine.
Ance, dengna weik keil, urasin pia teleb ning dobuka, an urasin dam teleb una ati, karakalyam kweirya ap, an ngang dam ara, urasin pia telebuk ulule. Aning atonun, an ngang dam karakalyam dengna weik ning, el si patce duk ara, urasin pia teleb dengna weik keil, el si permata ara, urasin pia telebuk ulule.
Se, anggun Yerusalem mutuku ululum wel kilapu nirya ara, anggun aik pum tam arye batakuka, abisik dam yamunce, Salomo yanamla ara, moubuka elinamlume. Ara, anggun Sion mutuku noutam ululum kilapu nirya, anggun nirya arye, Raja Salomo el kisok deice kalulul ning, el si ara mahkota, moubuka elinamlume. Aning ara, pia urasin teleb ulule. Salomo birye kil dobuk talak ara, el lin koproba arye, akisok kalun ning, el si ara, mahkota dobuka, ‘Na mi Salomo bira, amutuku nirya taliplirye, ninye deiyoknye Raja unamsilʼ tenen, bikilina ati, akalun ning ara, el kisok deice kalupdeibuk. Dipkoprob asum ara, Raja Salomo bira, pia teleb kanye bobukce, pin-pin asa ulamuk.
Se narye dopnamkin kilo! Na kanye talima noutam ara, anda na weit kil do, na dopnamne kil do, atonun tenikinirye, pia bico tenekunune. Ninye arye kanye walwalan anggur mek dibikirye, kanye delinyak bukni, aning ara mitik tonun uka. Pia teleb ning ara, ance nati bico tenepnimince, nati pia kanye deibuka teninilyame. Tonda, ance nintong pia teleb minyak mek dobuka, an nong bol deice likminba, adeice arye nintong pia teleb ninguk nyapkiliba, kekenune. Aning ara, pia teleb bukni, yuk nintong teleb ning el si ara rempah-rempah yuk-yuk ning nirya ara, nintong mitik telebuk ulule.
Se, narye dopnamkin kilo, anda na weit kil atonun ulyame. Tonda, narye anti, ‘Akil dopnamneʼ tenen, anti moun dikunun bukni, wini talak ara, narye anda min kum dopkitinye. Ati neika min kum uptinimnye. Ati ara, winipmanto ning ara, ninye arye pia teleb wa akunum wibikirye, yala akunum koubikcopura, ‘Talye nang wekelbikirye, awa noutam akunum koupmap ning ara, ubula dopropsicakʼ tenen, awa dana-dana tam nirya ara, cang keil poka ton, dobuka antanalongonyake. Aning atonun ton, ninye arye mek pu pia teleb ning, pu dobuka balamukak ara, ‘Malye nang arye yanuka, ateleb mek nirya talye luparabuka kwebikirye, dipsikcakʼ tenen, amek puak nirya kalikna ati, poka dobikirye, amek pu deice tam ara, keil arye bisik bublan botobuka tirikilongonyake.
Utenebuka, na wa wiamsak binmanu bukni, talye kanye bobuka unmasa ani, talye karin arye, na kil anti, tenepkisirye, ‘Se, na kil ap neika uptinimnyeʼ tenen, anti weik tonun patapnuke. Winipmanto ara, ninye deiyoknye, el kereta perang deice bukuka, na dam yaturye, “An ap, na ap, asukumuk neika buktinimirye, banamname,” nyabuka moropnutuba, pia kanye deibuka ulamtinye touk, anti tenipsirye, kanye deipse. Anti weik tonun patapnila atia.
Se, na kilo! Ance nati diniminba, na kanye talima noutam ara, ‘Seʼ tenepnirye, weik tonun patapniliba, moun dem dikunune. Atalak ara, moubuka tenipmanto kum unulule! Ati ara, aning atonun ton, ance na dam tuba kum dinamnilame. Yukak aryuk, ‘Se, na kil anda dinamnilame! Winipmanto ara, kambing ap, domba yupa pia weik bulubikirye, Gilead mutuku kon deice arye, koulukuka yanganyak touk, an baminye talak ara, an kisok potong babye, welepmana, koulukmana kiltolule. Aning ara pia telebe.
Aning ara, talye ati kum nyapsine. Deiyok ara, anggun kwepdeiamsuknye, el Allah ati, ‘Se na dopnuknye bitonun ulule’ tenen, unamlume. Allah ara, el si Yahweh ulule. Elce anggun akanye bitonun melibuka unamsile. El dem aryuk, im deice unyak yin talin malaikat nirya talibuka, sik weik deiyoknye ulule. Anggun Israel ninye arye, malye winilamlum ning ati, opsutu bukni, anggun malye winilulum ning namin kipsilirye, anggun lyepnamsilnye bira, el Allah ulule. Anya arye, Allah ara pia Telebnye ulirye, anggunti pia kalikuka melisulule. Ninye mutuku-mutuku nirya arye, elti, ‘Allah ara, Weik Erebuka Eitamnye ulirye, tukwak mutuku, mutuku-mutuku nirya unyak ninye talilula deiyoknye bira, el si ara Allah Yahweh ulule,’ nyabuka, Allah el si atibuk erenamake.
Tonda, winipmanto ning ton. Tonok welnye birye, tonok kil ati, moun dilamlirye, dololamle touk, Yudah yala nang arye, Yudea tam mutuku nirya ati, ila ton ap, teleb kanye deibikirye, atuku nirya dopropnamake. Winipmanto ton, kil dopnamlinye birye, el dopnamlye kil yanganmaliba, eiplirye kanye delilamle touk, anggunce el siuk erelulum Allah, elce anggun Israel nang ati, kanye deipnamsile. Anggun kwepdeipsuknye, na Allah arye, anggun Israel nang dopnamsine.
Winibukopura, ninye deiyoknye, yupu mikip asa arye nyabuk. “Kasdim mutuku nang, ara keting, wala, kurya kel weik bikin nang ap, aminyan winipnamle ning, lak lena deiyok nang ap, Isa Mutuku Dongonye mikip deice ninye winipmanto kum pil donyak nang ap, yukupmunba, na dam bulubuka yanunyake,” nyabuk. Nyabukura, sik anang nirya bulubuka yayikopura, ninye deiyoknye birye, sik anang nirya ati, nyabuk. “Anggunce, asekmal ning yinipmunce, el nong laka nyapnamnulume. Yatanye birye, ‘Deiyok ara, ani,’ teneplirye, na kel kina ati, laka nyapnamanilanye bira, narye el kina ati, dekna ning pia teleb baju, cang ning ap, kwerya ngang ongolamak ning karakna emas ap, arepnamne. Arepnirye, weiknye kina ati, anye erepdeipnamane. Na ninye deiyoknye ununa atonun, na amu tam deiyok kinanye unamla ati, erepdeipnamne. Ara, na amu tam bukni, weiknye kinanye unamle,” nyabuk.
Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.
Winipmanto yupu ton nyapnusine. Ninye dona ati, arepnamace kil ara, akil dopnamalinye, elcuk akil talilamle. Akil dopnamalinye, el melina nang ara, talyeuk unyak bukni, ‘Nun kwit dan talak yanamle do?’ tenen, kintinibikirye, kekenauk unyake. Winibuka daunmakiba, kil dopnamalinye yalirye, yupu nyaplibuk kekebicopura, kanye deibuka pin-pin arye unyake. Anang kanye deibuka pin-pin arye ulamak touk, na babye atonun unune. Nara, kanye deibuka pin-pin weik arye akunum unune.
Tonda, sik Allah yupu peterena deiyok nang bukni, yuk Rasul nang ap, Yesus el weit yapu ap, Peterus ap sik nirya ara, sik domik kilapu ap, neika peterelbanyake. Sikda sik kilapu ap peterepra banyak touk, narye ton, ato kil Yesus dib tenebuk kil ton kum dopnamtinya ati, nyanululum do? Kume, na deiyok ati, ‘Dopnune,’ teneptinyopura, kil doptinye.
Narye anggunti tenepnirye, ‘Anang ara, na tenen nang anya arye, yuk nang dam kipdobicopura, anang arye talebikceura, malye winibicak’ tenen, anggunti kanye deibuka, yukulosunune. Allah arye nun nirya ati bico tenepsilirye, kanye talima melisiliba, yukulosilye touk na babye tenepsirye winisunune. Ara, winipmanto yupu nyapnusine. Ara, tonok tam nang arye, tonok kil dobuka, yuk tam nang ati, “Akil ara, yuk nang arye kum dobik. Pia teleb kam kiluk ulule,” nyabuka, arelamak touk, wininune. Ara, sik kil arin nang arye nyalamak touk, narye anggunti utenyamsise. ‘Korintus ninye ara, Kristus el yupu uk dib tenebikcebuk, tonoknye binyuk, Kristus elcuk aninye talipnamle’ tenen, anggun Korintus mutuku ninye ati wipdeiamsise.
Allah im deice tam noutamak arye, weik asik el si ara, Yerusalem Winiryuk dopkwetebukba, koluka yanganmoka, eipse. Yerusalem Winiryuk asik noutamak ara, malye ning tonok babye kum ulamukce, pia telebuk uamuk asik eipse. Winipmanto ara, ninye arye, ‘Nun tam nang kil dopnul’ tenen, kam kil el nong deice pia urasin teleb baju ap, kwerya ning ap weika arye memebuka dolilamak touk, Yerusalem Winiryuk (Yerusalem Baru nyalamiknye) asik nirya ara, urasin pia telebuk ubukba, eipse.
ကြော်ငြာတွေ