Kidung Agung 2:4 - Eipomek

⁴ Na dopnamnilanye birye, na dobuka, weik kwalya kwalibuka, dilamak aik pum tam bobinuka deipnukba, neika unmanumu. Anyaik bobinuka deiyok ara, ‘Pia bico tenenulula ati, na ap, el ap, neika unamanamʼ tenen, bobinuka deipnukba, pia kanye deibuka unmase.

Kidung Agung 2:4 ပူးပေါင်းရင်းမြစ်များ

Ester 7:7

Winibukba, ninye deiyoknye Raja ara, yu weik ubuk. Yu pia weik kibukopura, adiparyuk el bukmok ning deice arye tikuka, el dinmok anggur duk mek batakukabukce, tikuka ninye deiyoknye, el aik tam kutuksakuka biyuk. Winibuk talak ara, Haman birye, ‘Se, nun ni koproba Raja arye nati opnamanil ning ara, akunuma,’ tenebuk. Utenebukce, akunum bikdayuk. Ati ara, Haman bira ninye deiyoknye, el kil Ester ap anyaik pum tuba unmarik talak ara, nyabuka morobuk. “Se, akilo melipnilyame. Nara ikin ning dobuka na deice delina ara, bataknilyame. Raja birye opnamanila ara, ance elti, moroptumba bataknutue. Nara, ona pia meme, kam uk uptinye,” nyabuka morobuk.

Ayub 1:10

Tonda, an pil donanye, Ayub el winilul ning ara, talye ati kume. El talilul ning nirya ap, tonda el pil dolul ning nirya ara, ance moubuka kalikimince, aning-aning nirya yamubuka areminyeba talilule. Tonda, el weilul ning weik arye areminyeba, el ulul mutuku nirya langdilule.

Mazmur 20:5

Tonda, ‘Allah arye anggun talima noutam weik tonun patasulul ning, adiparyuk arepnamsil’ tenen, Allah morosunune. Atonun, sikce, ‘Wininamabe, apil ton doptibye,’ tenen, patapsiliba, yupu talilum ning nirya ara, ‘Allah arye melipsilya deice arye arepnamsil’ tenen, Allah morosunune.

Mazmur 60:4

Se, nun ni Allah, ance lo arepsulumba, nun mal olan nang arye yanuka onmasiceba, ilil pia weik usulule. Winipmanto ara, pia weik mutuku lokmanto ulye talak ara, mutuku kon nirya daraplirye, tokna pakuka saklyeba, ninye nirya ilil weik uplyeba, imun kanye bolamak touk, unmabe. Ati nun ni Allah, ‘Ance nyaptumba, mutuku lulukna nirya, tunim aptu ura, aning ara, pia telebe. Tonda, nun mutuku kon nirya lokukce, tokna pakukabukce, tukwak mutuku nirya opnin balamuk ning nirya ara, ‘Ance tamubuka teleb kipdeipsutume,’ tenen moropkiyabe na nio. Na ni Allaho, ‘Ance tonap tamubuka teleb kipdeipsutuba, nunda min talak teleb ulamupu touk, tonap winiptibye’ tenen, moropkiyabe, nun ni Allah.

Mazmur 84:10

Tonda, nun ni Allah, ance nun deiyoknye Raja melibuka talipminyeura, elda pia diksukumuk wininamle. Tonda, ‘Ance akunum wibuka deiplumnye bira, talipminyeura, elda an amu tam ulirye, pia telebuk wininamle’ tenen, moropkine.

Kidung Agung 1:1

Ninye ap, kilapu ap, kanye delilana ati mot ara, yuk mot ton aupmal bukni, amot ara pia teleb mot ulule. Salomo ap, elce dopnamuk kil ap, pia bico tenelalamdika ati, tonoknye birye, aning tenebukce, akanye delin mot ara, sekdeibuk.

Kidung Agung 1:4

Na dopnamnilamnye bira, anda pia sik arye una kum bukni, ance na taruk minop talipnimince, an ap, na ap, minopce bikbik abuka, an maminye aik binuka, neika unamaname. Ura, na ninye deiyoknye birye, na dobuka, el man aik akunum bobinuka deipmanile. Se, na dopnamnilamnye bira, ance pia teleb kibuka, bico tenenilyama ati, nun neika unimnye talak ara, pia teleb kanye bobuka unamaname. Kanye walwalan anggur mek dilamak nang arye, aning dibikcopura, kanye deibuka unyak bukni, an ap, na ap, neika upnimnyopura, nun bitinye ara, dipkoprob pia pin-pin kanye bobuka, unamname. Anda, weik tonun bico tenenilyama ati, yuk wel kilapu nirya arye, aning tenebikcopura, sikce, ‘Se, elda dipkoprob pia telebnye ulule,’ tenekinyake.

Kidung Agung 5:1

Se narye dopnamkin kilo! Anda na wa win dam atonun unilyama ati, an dam yanmane. Narye na weit kil ati, bico tenenun touk, narye antibuk, pia weik tonun bico tenekunune. Tonda, anda narye akunum dopkise kil atonun ulyame. Ati, anda na wa win dam atonun unilyama ati, awa win dam binyopura, nintong pia teleb nyalamle ning, el si ara mur ap, tonda, to nyalamle ning el si ara rempah-rempah ap, tonda, mong mek ap, anggur duk mek ap, sapi moum yung, el si ara susu ap, aning nirya dobuka dinmance, pia kanye deibuka unmane. Winipmanto ara, din ning ap, teleb anggur duk mek ap, talye mangkau dadinmarumunya ani, kanye walwal upsiliba, akunum boupsilyopura, kanye deipdanuka, telebuk unamdume. Deiyok noutam ara, nun kayapu anggun bitinye asukumuk unmarumce, anggun patapsilye touk, neika mapmarumunya ani, aminyan akunum boupsilyopura, pia kanye deibuka unamrume.

Kidung Agung 6:4

Se na kilo! Weik asik el si ara, Tizra mutuku, urasin pia teleb ulamle touk, an babye, urasin pia teleb kil ulyame. Aning atonun ton, weik asik, el si ara, Yerusalem mutuku domik ning ara, urasin pia teleb ulamle touk, an babye, urasin pia teleb kil ulyame. Aninguk kum bukni, yin talin nang, yupa weik tonun bulubikirye, ‘Ninye olbinamapʼ tenen, lak bikilin ning ati, cang baju erelilamikiba, yuk nang arye aning eibikcopura, ‘Seʼ tenen, kanye lukuldalamak touk, narye anti eipkinyopura, na kanye lopniliba, ‘Se, elda pia teleb ulule,’ tenekunune.

Yesaya 11:10

Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.

Wahyu 3:20

Nara, anggun dam akunum yanmasine. Anggun aik buplan dam tiknirye, ‘Bublan kukeipnuniyak do?’ tenen, bisik lorum-lorum asunune. Yata nang do nirya, na yupu kekebikirye, sik buplan kukeipnicopura, na adiparyuk sik aik weknirye, sik ap, na ap dine dibuka neika unamabe.”