Anang ara, pera mutuku unyak bukni, yuk nang arye nyabikiba, an si ton kekepnamake. Ton ning ara, Allah an mikip ap, an weik mambul si ap, an taruk mikip arye mutuku-mutuku nirya noutam, weik mambul pil donalam ning, kekebikirye kel biknamake. Kekebikcopura, an morona ati, anyaik dam yakirye antibuk si erenamkiyake.”
Keluaran 6:6 - Eipomek6 Ati ara, Israel nang nirya ati, nyapnalame. Allah arye nyasulule, “Nara anggun ni koproba Allah, na si Yahweh unune. Na mikip deice arye, Mesir nang anggun nong deice ikin pil weik disinyak noutam ara, lyepdopnamsine. Ara, na mikip ap, mambul weik ning winipnamne deice arye, Mesir nang wenebuka opnirye, lyepnamsine. အခန်းကိုကြည့်ပါ။ |
Keluaran 6:6
46 ပူးပေါင်းရင်းမြစ်များ
Aning-aning nirya, pia kum bukni, Israel yala ninye nirya ara, natibuk, Allah Yahweh, na siuk erenamnulume. Min talak anggunda, Mesir mutuku noutam ulamlum bukni, amutuku weiknye birye, ikin pil anggun nong deice delilamsukba, imun kanye bobuka ulamlum bukni, na taruk mikip weik deice arye, boyanuka, ateleb mutuku boyanamsise. Ati ara, na siuk, anggunce eremunce, na dam kutam tuku dikdongobuka, na siuk erenamnulume. Tonda, na si erebuka kina ati, kam ning opmunce, boyanuka arelyangalamnumunce, uku danamlulume.
Tonda, dan mutuku nang ton an mapu koproba, sik Israel yala nang unyak touk, yuk mutuku nang ton atonun unyak do? Kume, yuk yala nang nirya ara, sik Israel nang atonun kum unyake. Yuk yala nang nirya ara, mutuku sirya im sirya nirya noutam daunyak bukni, ance, Sik Israel nang ara, ‘Naʼ tenen, nang ukirye, na si erenamniyakʼ tenen, ance nun dobuka, Mesir mutuku noutam arye lyepdopsulume. Lyepropsulum deice arye, yuk-yuk mutuku unyak nang nirya kekebuka bikikura, sikce, ‘Se, dipkoprob Allah Yahweh, elda mikip weiknye, elda mambul weiknye ululeʼ tenen, bikamik. Tonda, tuba bikinyake. Ton ning ara, bikinamake. Mesir mutuku noutam arye, akunum lyepromsulumce, Kanaan tam noutam ulamik nang, nun Israel nang, nun mal olan nang nirya ara, sik mutuku noutam arye minop yakuka dopkweteplumba, an ‘Naʼ tenen, nang, nun Israel nang ati, amutuku tuku areamsulumba, wini talak aning talibuka telebuk unyabe. Aning nirya winilamluma deice arye, ninye kekelamikce, ‘Se, Allah Yahweh el si ara, mambul weiknye ululeʼ tenen, biklamkike.
Allah ance, ‘Na tenen nang ani’ tenen, wipsulum Israel nang ati, an mikip weik taruk deice arye, nun ikin ulamupu ning noutam arye, akunum melibuka lyepsulume. Ara, nun apu yapu Yakub ap, Yusuf ap arye deiamdikba, dadeipdanin yangalamupu nang, nun Israel nang ati, melibuka lyepropsuluma ati, nyapkine na nio.
Nara, anggun ni koproba Allah, na si Yahweh unune. Na siuk erenululume. Anggun Mesir mutuku noutam, ikin weik ulamlum talak ara, na Allah aryuk lopdeipsiseura, yuk teleb mutuku bobinamsise. Ati, aminyan talak nirya babye, anggun patapsilye ning ati, din ning do, yuk ning do nirya ara, ‘Melibuka arepsilyame,’ nyabuka, moropnumunyopura, narye anggun patapmasilye ning nirya arenamsine.
Tonda, nun apu koproba, Yusuf ap, el mapu silip nirya ati, Allah arye, ‘Aning ara, pia wininamlume,’ nyapdeibuk. Ara, Yusuf birye amutuku batakuka, Mesir mutuku ulamik nang ati, olbinamuk talak ara, Allah arye, ‘Aning wininamlume,’ nyapdeiamuk touk, wini talak nun babye atonun wininamabe. Allah arye, ‘Aning winipnamlume,’ nyapdeipsuk talak ara, ayupu min kum kekelamse. Asaf birye nyabuk.
Bukni, Allah arye ayupu nyapdeipsuke. “Anggunda moubuka teniplulume! Ikin weik ning anggun takunya deice wamsuk ning ara, naryuk aning dobuka kum kipdeipse. Sik Mesir mutuku nang arye, dilamsik pil ati, keil kina ning, el si keranjang, ikin weik ning dobuka, bobalamlum ning ara, na Allah aryuk, aikin ning ara dopromsa deice arye, kanam kipdeipsise.
Mesir mutuku winiryuk Raja, Firaun arye nyapdeibukba, el mapu arye, pil dona deiyok nang, yu nang dobuka kintinip deibik. Ara, ‘Sik Israel ninye kalikikirye, ikin ning, sik nong deice deipnamak’ tenen, wipdeibik. Winibikba, ayu nang arye, Israel ninye mikip arye talibukabikce, sik nong deice, ikin pil pia weik deibikba, ikin kanye bobuka, weik ikin piluk dolamik. Ara, Israel ninye arye, Firaun el ‘Na’ tenen ning delinak ati, kota si Piton mutuku ap, Ramses mutuku ap, pia ikin pil dolamika deice arye, akota bitinye pil dolamik.
Luba kina kume. Kaplina ati, weik kwalina kwalipnamlum sum, Paskah sum ara, na Allah Yahweh arye, na mapu koprop Israel ninye nirya, Mesir mutuku ulamika noutam arye dobuka bobinamsise. Ati atalak ara, ‘Allah Yahweh arye nun boyanamsuk sum tenena ati, anggun Israel ninye nirya ara, Kaplin Kwalina (Paskah) ati, kwalibuka dinamlume.
Winilamunyeba, doyanamle talak ara, anggun mapu arye, “Awinilamunye ning nirya ara, yata deiyok ati winilulum do?” nyabuka asipsicopura, anggunce tamubuka anggun mapu ati nyanamlume. “Kume, aning ara, nun Mesir mutuku noutam ulamupubuk, sik Mesir mutuku nang arye, ikin weik pil dilamsikba, talye piluk dolamupu bukni, ‘Allah Yahweh, el taruk mikip deice arye lopdeipsukce, lyebuka Kanaan mutuku boyanamsuk ning’, tenena ati wininyabe,” nyanamlume.
Aning wininyaba deiyok ara, ‘Allah Yahweh arye, winyamuke’, tenena ati wininyabe. Ara winipmanto, ninye arye winyamice ning tenena ati, taruk deice ap, asok deice ap, denelamaka touk, ‘Nun ni Allah arye winyamsuke’, tenena ati wininyabe. Tonda, ‘Nun Mesir mutuku noutam ulamupubuk, Allah Yahweh el taruk, mikip deice arye boyanamsuk’, tenena ati, wininyabe. Aning ton, anggun mapu nirya ati nyanamlume. Musa birye sik Israel ninye ati nyabuk.
Nyabukba, Musa tamubuka Israel ninye dam yayukce, ayupu nirya Israel ninye ati, nyabuk. Asum ara, nun ni koprop Allah Yahweh, el taruk mikip deice arye, Mesir mutuku ikin kanye bobuka ulamlum talak arye, akunum lyebuka lopdeiamsuke. Ara, Mesir mutuku ninye arye tapu koubukapsikce, ikin weik pil pia, anggun nong deice delilamsikba, ikin piluk talye dolamlum bukni, Allah arye lyebuka lopdeipsuke. Ati ara, ‘Asum arye aning nirya pia tenenamapʼ tenen, keting tamun nirya ara, asum arye anggunce, ‘Kume nunda Mesir mutuku ulamupu talak ara, ikin weik pil pia weik tonun dolamupubuk, Allah Yahweh el mikip weiknye birye, lyebuka lopdeipsukce, boyanamsuka ati, pia teninamapʼ tenen, wininamlume. Ati, aning ara, asum arye pia tenenamlume. Aning tenina ati, asum arye, roti kwaning nen ning ara, pia kum dinamlume. “Allah arye nyapdeipmasile,” nyabuka, Musa birye, Israel ninye ati nyabuk.
Ance, ‘Anang ara ‘Naʼ tenen, ninye’ tenen, wiamsulumce lyepsulum ninye pia bico tenebuka tuba melisilyame. Pia kum batakasilyame. Winimince, ‘Dipkoprop bisik ani,’ nyabuka bobuka yangasilyama ani, wini talak babye, bobinamsilame. Tonda aninye ara an mikip deice arye pia melipnamlyame. Ance aninye bobuka balaminya ani, ance sikti, kintinip deiamlum mutuku, an uminyak, malye ning pia kum ululak, pia teleb touk delilbinamsilyame.
Ura, Musa el yamal koprop Yitro bira, Midian mutuku ulamuk. Yitro elda, Allah si erena ati, aren ning uku dongon pil talibuka pil dona deiyoknye, Imam ulamuk. Ulamukce kekelamukba, yuk nang arye, “Musa birye, Israel ninye Mesir mutuku ulamikbuk, bobuka bisik noutam yangalul talak ara, Allah Yahweh arye Musa ap, Israel ninye ap, sik dam yanuka, weik mambul pil aning-aning nirya winipnin yangalule,” nyalamikba kekelamukce, ‘Musa ap, na ap epdanimirye yupu talipnanam tenen, Musa dam biyuk.
Tonda, na yupu akunum nyapdeipsine. Anggun kanye imun tenelulum ning ara, lyepropnamsine. Lyepropsinirye, teleb mutuku arepnamsine. Amutuku ati, ‘Se amutuku noutamak ara, susu ap, mong mek ap, weik pia aulule,’ nyanyake. Ara, aning-aning nirya, teleb ning ayala-yala nirya, amutuku noutamak weik ulula anya arye, nyanyak atia. Amutuku unyak nang, sik si, Kanaan nang ap, Het nang ap, Amuri nang ap, Peres nang ap, Hewi nang ap, Yebus nang ap, aninye-aninye nirya unyak mutuku arepnamsine. Sik mutuku ara, pia teleb anya arye, amutuku uk arepnamsine,” Allah arye nyabuk. Tonda, ayupu ton nyabuk.
Ati ara, Mesir mutuku nang arye talinyakba, sik ikin ulye ning ara, lyebuka dobukapnirye, amutuku noutamak arye lyebuka dopnamsine. Winipnirye, do bobuka pia teleb uplirye, lo weik ubuk mutuku, anggunti arepnamsine. Amutuku ati, “Se amutuku noutamak ara, susu ap, mong mek ap, weik pia aulule,” nyanyake. Nyanyaka deiyok ara, ani. Ara, aning-aning nirya, teleb ning nirya, amutuku noutamak weik ulula anya arye, nyanyake. Amutuku unyak nang, sik si ara ani. Kanaan nang ap, Het nang ap, Amuri nang ap, Peres nang ap, Hewi nang ap, Yebus nang ap, aninye-aninye nirya, amutuku noutamak unyake. Sik mutuku ara, pia teleb anya arye, amutuku uk arepnamsine.
Ayupu nyabukba, Musa birye, Allah el si Yahweh arye, ‘El tenepmal kanye ara, namin kipturye bataktue’ tenen, ayupu nyabuka, Allah ati morobuk. “Se na ni Yahweh, an yu weik upkiliba, ‘Israel ninye wenebuka opnamne,’ tenepmalam ning ara, yata deiyok ati do? ‘Yu upmakil ning ara, bataktum do?’ tenen, moropkine. Aninye nirya ara, Mesir mutuku noutamak ulamik ani, an taruk mikip deice arye boyanamsulume. Tonda, ninye kum winipmanto ning, mikip weik pil dopluma deice, dalubuka boyanamlum ninye ati, ‘An yu aninye deice kum deipnamlyam’ tenen, moropkine,” Musa birye Allah ati nyabuk.
Ara, Allah arye, na Musa biti nyapnuk. “Narye nyapmakinye bira, Allah unune. Na si koproba ara, Yahweh unune. Narye, ‘Winibuka nyalbinulyame,’ nyapkinye touk, ance Mesir mutuku taleamuk ninye deiyoknye, Raja Firaun dam bimince, ayupu uk lak nyapnalyame,” nyapdeipnuk. Ara, “Ance Firaun biti, ‘Aning-aning nirya talibuka, ulya deiyoknye Allah arye nyapdeiamnuk yupu ara, narye anti nyapkine,’ nyabuka, lak nyalbinamlyame.” Allah arye nyapnuk.
Tonda, na taruk erepsirye, Abraham ap, Isak ap, Yakub ati, ‘Amutuku dipkoprob arepnamsine,’ nyabuka nyalin yupu mikip deice arye nyapdeiamse ning ara, anggun Israel nang nirya dobuka, amutuku bobinamsine. Winipnirye, amutuku nirya arepsinyeba, anggun mutuku pia upnamlume. Angguncuk, amutuku nirya talinaluma ati, anggun ninguk pia aunamle. Deiyok ara, na anggun ni koproba Allah Yahweh unirye, ayupu nyapmasina ati, dipkoprob nong upnamle.” Allah el si Yahweh arye, Musa biti nyabuk.
Aning nirya akunum winipnyopura, adeice arye, Mesir mutuku nang eibikirye, kel biknamake. Ara, ‘Se, anye mikip weik arye, kanye imun ning weika arye deipmasilnye bira, ara dipkoprob Allah Yahweh, elda Allah ulule. Atalak ara, ‘Na Allah arye, Mesir ninye noutamak arye, Israel ninye, sik ayala-yala nirya lobuka bobinyopura, Mesir mutuku ninye nirya kel kipnamniyake.’ Allah arye, Musa biti nyabuk.
Deiyok ara, Allah Yahweh aning-aning nirya eitam erebuka, mikip weik ululnye birye, im deice tam unyak yin talin malaikat nirya, sik deiyoknye ulule. Winibuka ululnye birye, Israel nang, sik deice ikin weik ning deibukce, wenebuka babye, sikce, ‘Se aikin deipsil ning ara, pia mambule,’ kum tenebik. Tonda, sik malye winilamik ning ati, ‘Se, nun malye winin ning batakuka, nun ni koproba Allah Yahweh, el damuk tamubuka binuka, el siuk erenamabe,’ kum tenebik.
Ati ara, Allah Yahweh arye, amutuku ulamik wel nang nirya ap, amutuku noutam ulamik youwak kilapu ap, amutuku ulamik kwaknamne mapu ap nirya ara, Allah arye, ‘Se, sikda na bico ati, amutuku nang kum wenepnamne,’ kum tenebuk. Akum bukni, sik nirya ati talye wenebuk. Winibuk ning ara, talye ati kuma. Deiyok ara, sik atalak ulamik Israel nang nirya ara, malye winin ninguk talibuka ulamikce, Allah ati kum tenelamik. Elce, ‘Aning wininamlume, aning ara, pia kum wininamlume,’ nyapdeibuk yupu nirya ara, kekena kumce, yaniltalamik. Tonda, sik nirya ara, talye-talye yupu ap, deiyok ton una kum yupu ap, talye nyalamik. Ati, Allah bico kum tenebukce, el yu ubukba, anang nirya ati wenebuk. Allah arye, sik Israel nang ati, ikin ning weika arye, sik nong deice deiamuk bukni, narye, ‘Yo, akununaʼ tenen, el yu ara, kum bapdongamuk. Elce tuba yu ubukba, el taruk mikip arye, Israel yala nang ati, tuba wenelamuk.
Atalak ara, ikin weik ning upnamle ati, anggun nirya ara, Israel yala nang bukni, danoutam arye bokuka, sik Manasye yala nang ap, Efraim yala nang ap, tuba olanauk winilamik. Winilamik bukni, aninguk kume. Sik Efraim yala nang ap, Manasye yala nang ap, sik bitinye neika keprobikura, sik Yehuda yala nang ati olbinamik. Winilamika babye, Allah el yu tuba ubukba, sik anang ati tuba wenebukce, atalak babye ‘Tuba ton ap wenepnamne,’ tenelirye, kintinilule.
Dipkoprop nyapsine. Nara Allah, naryuk, anggun Yerusalem mutuku ululum nang ati, opnamsine! Ara, na mikip weik taruk deice aryuk, anggunti yanuka opnamsine. Tonda, tuba-tuba narye anggunti, yu weik unulul ning ara, pia weik tonun, mek langdilamle atonun unulule. Narye anggunti, yu weik unulula ati, derepsinirye, wenebuka oplopnamsine.
“Yuknye kume. Na Allah aryuk, na mikip weik talibuka unye ning ap, tonda na mikip weik unilye taruk ap deice arye, tukwak mutuku ubuk ning nirya kwepdeiamse. Tonda, tukwak mutuku nirya unyak nang ap, tonda tukwak mutuku noutam kam ulye ning yala-yala nirya ap ara, naryuk kwepdeipse. Akwepdeipse ning nirya ara, na kanye aryuk, yatanye biti do, ‘Anye bira mikip weik deiyok ning arepkinun,’ tenepninye bira, narye atenepnye touk arenune.
Allaho, an mikip weik deice arye taleplumce, an mapu koproba Israel nang ara, Mesir mutuku noutam, ikin weik ulamikba, bobuka ateleb mutuku tamubuka boyanamsulume. Tukwak nang arye, kum winipmanto pitin-pitin ning ap, tonda ninye arye kum dopmanto pil ap, mikip weik ninye arye winipmanto kum pil ap, dolamluma deice arye, Israel nang lobuka lyepropsulume. Ance, kum winipmanto ning nirya ara, an mikip weik taruk deice arye, pil dolamlumba, sik atalak ulamik nang ara, aning nirya eililamikce, ‘Seʼ tenen, imun kanye bobuka, ilil weik asa ulamik.
Nara Allah pia kam tuba ununye birye, nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, narye anggun wenena ati, na mikip weik taruk ara, na yu upmanilye deice arye, anggun Israel nang ati, moubuka talipsinirye, anggun deiyoknye unamsine. Ninye deiyok talipnirye, anggun deice tam Raja unamsine. Anggunda, na amu tamuk ulamunce, na yupu uk kekenamlume.
Israel ninye sik talinyak Allah ara, minop arye nun apu yapu wipdeibuka, akuamukce sik Mesir mutuku noutamak, ninye asik nang ato sik tuba aulamik talak ara, Allah arye sikti, meilyamuka deice arye Israel ninye yupa weik tabaknin balamik. Tonda, el meilyamuk deice arye sik winilamik ning nirya telebuk ulamuk. Weik kipdeibukce, nun apu yapu ara, Allah weik mikip deice arye amutuku noutamak arye menekuka bobiyuk.
Ura, anggun wini talak ululum Israel nang ara, anggunce deiplum mapu ati, ayupu kum nyapsine. Anggun mapu ara, aning nirya kum elilamikce, kum bikamike. Bukni, akunum wisi danmalum nang anggun nirya ara, akunum elilamlumce, bikamluma anya arye, anggunti nyapsine. Ara, wini talak ara, yata winin ning do, anggun ni koproba Allah arye, anggun dam winilamukba bikamlum ning ara, moubuka teninamlume. Ara, elce peterelamsuk ning ap, el mikip weik deice arye, pil dolamsuk ning ap, el mikip weik taruk deice arye meliamsuk ning nirya ap ara, tuba-tuba tenenamlume. Anggun mapu ara, aning ton kum bikamik bukni, anggun wisi akunum dalum nang nirya ara, anggunce akunum eibuka bikamlume.
Tonda, aning ton tuba teninamlume. Min talak ara, anggun Mesir mutuku noutam ulamlum talak, ikin weik ulamsuk ning ton, moubuka tenenamlume. Ara, anggun Mesir mutuku noutam ulamlum talak ara, ikin weik pil dilamsikba, imun kanye bolamlume. Winilamluma ani, anggun ni koproba Allah Yahweh arye, lyebuka boyanamsuke. Ati, Mesir nang arye, anggunti winilamsika atonun, anggun babye, anggun pil melin nang ati, kum wininamlume. Anggun talye pil don nang ara, tekbarye keting tamun uplyopura, anang batakmunyeba, talye binamake. ‘Winibuka unamlume,’ nyabuka, arup arye ayupu kunum nyapsine.
Nun apu yapu arye morolamikba, Allah el mikip weik deice arye, Mesir mutuku noutamak arye, bobuka yangalamsuke. Allah el mikip ara, weik ulula ati, elce ninye winipmanto kum pil ap, ninye kum winipmanto ning ap, weik mambul ning areamuk ning ap, adeice arye, anang nirya arye, ‘Se aning ara, dipkoprob Yahweh aryuk pil donmasile,’ tenebikce, ilil weik ubukba, yok sirim talibuk. Yahweh arye, nun apu yapu lyebukce, dobuka boyasuke.
Ton ning ara, anggunce luba kina meme! Allah el si Yahweh arye, ‘Israel ninye ara, ‘Naʼ tenen, ninye unamak’ tenen, ‘Wininamlulume. Aning ara, kum wininamlulume,’ nyapdeipsukce, nyalisilye yupu nirya ara, pia moubuka tenepmunce, unamlume. Tonda, Allah el si Yahweh arye anggunti, akunum nyapdeipsuk touk, yata ning do nirya, talye ning urasin atonun kipdeipna arye, si erena ara pia meme. Allah arye aning ati, akunum ‘Meme,’ nyasilye ning, pia kum wininamlulume.
Aning atonun, anggun kel do? Dan mutuku ninye ati, yuk mutuku ninye talilamika noutamak, Allah arye dalubuka lyebukce, yukak bobiyuk do? Bukni, Allah arye anggun Israel ninye ati, Mesir mutuku noutam arye lyebuka boyanamsuka deiyok ara, ‘Israel nang, ‘Naʼ tenen, ninye unamak’ tenen, winibuk. Kume, yuk ninye nirya ara, ‘Allah arye aning atonun winipsuke,’ kum nyaptinge. Anggun Israel ninye uka. Allah arye aning winibuka deiyok ara, ‘Israel ninye ‘Naʼ tenen, nang unamak’ tenen, winibuk. Tonda, Allah arye anggun Israel ninye ati, Mesir mutuku noutamak arye dalubuka dobukapsukce, lyepsuk talak ara, winilina ap, ninye kum winipmanto ning ap, im deice mambul pil dona ap, ninye olana ning ap, el bidamang mikip weik kina ap, el taruk koproba arye mikip weik pil dolamuk ning ap, anirya deice arye, anggunti dalubuka lyepsuke. Aning babye, weik mambule. Aning-aning nirya ara, anggun ni koproba Allah, Yahweh, el bidamang taruk arye, mikip weik ning winibukba, ninye nirya ilil weik ulamukba, anggun Israel ninye arye, aning-aning nirya ara, anggun bidamang asing arye elilalumce, akunum kel bikamlume. Aning ara, weik mambule.
Aning wininamluma deiyok ton nyapnusine. Ara, anggunce pia moubuka teninalume. Ara, ‘Minop talak, nunda Mesir mutuku ulamupu talak nirya ara, amutuku nang, sik amu tamuk ulamupuba, ikin weik pil aruklamsik ati, sik talye pil melin nanguk ulamupu ani, nun ni Allah Yahweh, el mikip weik ap, el mikip weik taruk deice arye boyanamsuke,’ tenenalume. Ati ara, narye anggunti, ‘Wininamlume, anggun dikdik sen sum, Sabat sum kintinipnamnulume,’ nyapdeipsise touk, dikdik sen sum, Sabat sum yuk, wibuka kintinipmunce, na Allah ati, si erenamnulume.
Ati, arup nyapmasin touk, aning-aning nirya wininamlum talak ara, moubuka umunce, kintinibuka dinamlulume. Anggun ni koproba Allah ati, luba kina pia kume. Anggunda, Mesir mutuku ulamlumba, anggun nong deice ikin pil dilamsikba, dolamlum ning ara, ur talye pil dolamlum bukni, Allah el si Yahweh arye, dobuka lyepsukce, boyanamsuk ning ara, luba kina meme. Allah ati, pia teninauk unamlulume.
Ara, anggun asing koproba arye elilamlume. Allah arye, Mesir mutuku noutam, sik Mesir mutuku nang ati, pirilen ning weik arye arelamukba, batakdongopsike. Winilamuka deice arye, lyebuka dopropsukce, amutuku boyanamsuka ati, aning atonun tuba tonap wininamle. Ara, ‘Allah el mikip ara, weik mambule, tenenamak’ tenen, ninye kum winipmanto pil dolamuk ning ap, pia mambul uk deiyok ning arebuk ning ap, el mikip deice arye, ikin ning weik, sik nong deice delilamuk. Aning nirya winilamuka deice arye, Allah el mikip deice arye, anggun Israel ninye lyebuka dopropsukce, boyanamsuke. Ati yuk mutuku unyak ninye ati, ilil kum tenenamlulume. Abinamlum mutuku nang ati, ‘Nun ilile,’ tenepmalum bukni, anggun ni koproba Allah, el si Yahweh arye, ato pil doplirye, aninye ati wenebuka opnamle.
“Allah arye anggunti, wipdeipsuka deiyok ara, ‘Anggunda ninye weik unyaka ati ara, wipnamne,’ kum tenelamuk bukni, deiyok ara ani. Ara, elce tuba bico tenyamsukce, elce anggun apu yapu ati, ‘Wininamsine,’ nyalilamsuk yupu ati, tuba tenelirye, anggun wini talak ululum ninye ati, wipdeipsuke. Minop talak, ‘Wininamne,’ nyabuka, akunum nyabuka ati, Mesir mutuku noutamak ikin weik ulamsuk buk, dobuka lyepsuke. Mesir mutuku weik deiyoknye Firaun, el mikip weik kibukce, anggunti taleamsuke. Winilamukce, ikin pil weik, anggun apu yapu nong deice delilamukba, ikin weik ulamik. Winibuka ulamik bukni, Allah el mikip weik deice arye, lyepsukce dobuka boyasuke.”
“Naio, Israel ninye ara, ance pia tenipnamlyame. Allah ance, ‘Na mapu unamake. Na tenen ninye pia unamak’ tenen, wiamsulumce, Mesir mutuku noutamak, an mikip deice arye bobuka yanamlume. Ati, ‘Anang pia kum opnamlyame’ tenen, moropkine. Na Musa birye Allah ati moropse. “Nyabuka moropsa ati ara, wini talak ara, na Musa birye, anggun Israel ninye ati, ayupu laka nyapsine. Ayupu nyabukapsirye, Allah ati morolamsise. Musa birye Israel ninye ati, laka nyabuk.
ကြော်ငြာတွေ