Keluaran 4:31 - Eipomek31 Sik eibika deice arye, diba tenebik. Tonda, Musa ap, Harun ap arye, “Kume, Allah el si Yahweh arye, nun ikin usilye ning ap, kanye imun kanye bolamupu ning ap ara, aning nirya Yahweh akunum kel bikamukce, nunti bico tenepmasilce, melinamsile,” nyabuka, laka nyaprikba, kekebikopura, sik Israel ninye nirya arye, gutam tuku dipdongobuka, Allah el si Yahweh ati, el si erebik. အခန်းကိုကြည့်ပါ။ |
Keluaran 4:31
27 ပူးပေါင်းရင်းမြစ်များ
Yakub ap, Lea ap neika mapmarikba, Allah arye melibukba, Lea birye mi bomuka ani, sal mi deibukce, el si ara, Ruben nyabuka si dobuk. Lea birye el mi deibukce, nyabuk. “Winira, na ni Allah, el si Yahweh arye, kanye imun ulamnuk ning kel kipnukce, akunum melipmanile. Sal mi deipmana anya arye, wini talak na akanye Yakub birye, kanye deipnamnile,” nyabuk.
Sik daulamika ani, aminyan talak Yusup birye el du yapu ati nyabuk. “Winira na dipnamnarya. Na dipnaman bukni, Allah arye anggun nirya ati melipnamsile. Ara, Allah arye nun apu yapu Abraham ap, Isak ap, Yakub ap ati, ‘Amutuku arepnamsine,’ nyalilamuk mutuku ara melibuka bobinamsile. Mesir mutuku noutamak dopropsilirye, Kanaan tam bobinamsila ati nyapsine,” Yusup birye nyabuk.
Ayupu nirya akunum nyabuka Allah ati morobukopura, ninye deiyoknye Raja Daud birye, sik amutuku noutam bulubuka wekmek nang ati nyabuk. “Nun ni koproba Allah el si Yahweh, nun melisilye Allah ati, ‘Telebe,’ nyabuka kinamlume.” Daud birye nyabukopura, sik awekmek nang, Allah el ‘Naʼ tenen nang, el mapu koproba Israel nang nirya arye, “Allah Yahweh ara, nun ni koproba Allah, nun apu yapu sik melilamlumnye, anda pia telebe,” nyabik. Nyabikopura, sik anang nirya arye kutam tuku dipdongobuka, sik kisok babye tuku deice kanupdongobik. Ara, ‘Nun ni koproba Allah Yahweh ap, tonda nun deiyoknye Raja Daud ap ati, pia kanye deibuka, si erebuka kipnuyapʼ tenen, winibik.
Nyabukopura, ayupu ton nyabuk. “Aning ara, talye ati kum nyapsine. Raja Sanherib elda ninye mikip deice aryuk, yanganmal bukni, nunda nun ni Allah Yahweh, el mikip weik deice unamabe. Aning ati ara, Allah Yahweh arye nunti, kalekuka melipsilirye, el mikip deice aryuk melibuka, sik Asyur mutuku yin nang nirya, obuka sirya daknamale,” nyabuk. Yehuda tam mutuku nirya taleamuknye Raja Hizkia birye, ayupu nyabukba, el taleamuk nang nirya kekebikce, sik nirya ara, ‘E, dip nyapmasileʼ tenebikce, ilil una kumce, malye tenebik.
Anyaik dam bulubuka wekmek ninye, sik Israel yala ninye nirya arye dinmekce, im deice arye auku buk saka yanganmok ning ap, Allah Yahweh el damnye weik dirina ara, Allah Yahweh el si eren aik noutam langdibuk ning ara, sik nirya arye gutam tuku dinikdongopmekce, sik asok ara tukwak kanupdongobik. Sik asok ara, tuku deice dinikdongopmekce, Allah ati si erenmek. Tonda, sik Israel ninye nirya arye, Allah ati si erena ap, mot nyana ap, unmekce, el si erenmek. Sikce tanmek yupu ara ani. “Se, nun ni koprop Allah ara, pia teleb ulirye, nunti weik tonun teleb kilisulule. Elce nunti, weik tonun bico tenesilirye, elce Wininamlulume, winipmunyopura, narye pia teleb kipdeipsinirye, kalekuka melinamsine nyabuka nyalin yupu deice arye nyapdeiamsuknye bira, luba kina kumce, pia kum bataknamsile. Tuba melinamsile nyabuka, si erenmek.
Winibikura, Esra birye, “Nun ni koproba Allah, el si Yahweh ara, pia teleb, mikip weiknye ulule,” nyabuka si erenmok talak ara, sik abulupmek ninye nirya arye, sik taruk erebukabikce nyanmek. “Pia dipkoprop, nyanmalama ati, ‘Dipkoproba akunuma’ tenen, ‘Amin,’ nyapmabe,” nyanmek. Nyanmek ning ara, Allah el si erena ati, atalak aryuk sik nirya nong kanupdongobikce, tukwak dinmekce, Allah el si Yahweh atibuk, el si erebuka winilinmek.
Aning nirya akunum nyabikba, Ayub kekebukopura, el adiparyuk tikdobukce, weik imun kanye bopmuka ati, el cang baju ongopmok ning kwiribuka, kwiliklobuk. Tonda, el kisok potong lyeklobuk. Aning deiyok ara, ‘Yata deiyok ati, aikin kanye bon ning upmanil do?’ tenebukce, winibuk. Winibukopura, ‘Allah moropnun’ tenen, Ayub adiparyuk kanupdongobuka, gutam tuku dipdongobuka, Allah el si erebukce yupu nyabuk.
‘Adomba obuka dinmaba deiyok ara, minop talak Allah el si Yahweh arye, Mesir mutuku noutamak, Israel ninye nun aik dam ara, kaplibuka binamuk bukni, Mesir nang aik wekuka, sik winiryuk mapu omukce, nun nirya batakuka, Mesir mutuku noutam arye bobisuk ati, aning nirya tenibuka kaplin kwalina yunyabe’, nyabuka lake nyanamlume. Musa birye, sik Israel deiyok nang nirya ati nyabuk. Nyabukopura, Israel nang arye kutam tuku dipdongobuka, Allah el si kibuka, si erebik.
Ati ara, Allah el si Yahweh arye, el mikip weik deice arye Mesir ninye opmok ning ara, Israel ninye arye eibik. Eibika deice arye, ‘Se, dipkoprob Allah elda mikip weiknye’ tenen, kel bikikce, Yahweh ati ilil weik ubuk. Ilil weik ubukba, Allah el si Yahweh ap, Allah el pil dona deiyoknye Musa ap ati, diba tenebikce si erebik.
Anyalbiyuk talak ara, Allah el si Yahweh arye tamubuka Musa biti nyabuk. “Na, an dam yanamna ara, weik dua kan-kan yanamne. Dua noutamak yanirye, anti yupu nyapkiniba, Israel ninye nirya babye kekenamniyake. Wininamna deiyok ara, wini talak ara, na yupu an dam nyapkiniba, Israel ninye nirya eibikirye kekebikcopura, anti, ‘E Musa bira, Allah el pil dolinye’ tenen, diba tenebuka kekenamkiyake,” nyabuk. Nyabukura, Musa birye sik Israel ninye arye nyapmik yupu, Yahweh ati laka nyabuk.
Nyabukopura, ayupu ton nyabuk. “Ura, bimince, Israel nang wisi-wisi nang, deiyok nang nirya bulubuka deipmince, nyapnamlyame. Nun apu yapu pununa ninye, Abraham ap, Isak ap, Yakub ap, kalikuka meliamukba, el si erelamik Allah Yahweh arye, na dam yayukce nyapnuk. Ura, sik Mesir mutuku ninye arye, ikin ning weik, anggun nong deice delilamsikba, mambul kanye bomlum ning ara, na tuba elinun anya arye, na kele.
“Yupu nyapminba, sik Israel wisi-wisi nang, yupu lipsisikuka bokolina deiyok nang ara, kekepnamkiyake. Kekebicopura, Israel wisi nang ap, an ap neika, Mesir ninye, sik deiyoknye dam binuka nyapnamlyame. ‘Allah el si Yahweh, Ibrani ninye, nun ni Allah yana nyapmasila ati, nun moropkiyabe. Ara, ance nunti bataksiminba, nun ni koproba Allah, el arelbana ati, like winilye deice arye, bisik mabuka bibirye, ninye una kumak noutamak binuka, Allah el si erena ati, kam ning obuka arenamabe.’ Ayupu nyapnamlyame,” Allah arye nyabukce, ayupu ton nyabuk.
Atalak ara, Allah el si Yahweh arye nyabuk. Na mapu Israel nang ara, Mesir mutuku noutamak, ikin weik unyaka ara, na elinunce, kel kinune. Ara, Mesir nang arye, ikin pil arukunyakbuk, donyak ning ara, akunum elinune. Israel ninye engenyaka ara, na kele. Tonda, ikin asa unyaka ati, na mambul kanye bonune.
Kama dayukba, Allah el si Yahweh arye ayupu ton nyabuk. “Awinipnamle ning ara, winipminba Israel ninye eibicopura, ‘E diba, nun ni koproba Allah, Musa dam yanuka tikukba eibuka ati, dib nyapmasile. Dipkoprop Allah el si Yahweh arye, nun apu yapu nang Abraham ap, Isak ap, Yakub ap ati, kalikuka melipnin yangalamuk Allah ara, Musa dam akunum yanuka tikukba eibuke,’ utenebuka, kel biknamake.” Allah arye nyabuk.
Yehuda yala nang, mitik tonun tuba kam unamak nang ara, na Allah arye lyepropnirye, teleb kipdeipnamne nang ara, sik Pilistin nang minop talak ulamik mutuku, weik laut mekwen kup-kup dam uamuk mutuku nirya ara, sik Yehuda nang dopropsikirye, sikda amutuku noutamuk, yanuka unamake. Tonda, Yehuda yala nang aryuk, sik Pilistin nang taleamik mutuku noutam, mutmuta papnamlak ara, sik domba basam weinamake. Lukunyan kiplyeba, sik domba basam weina deiyok nang mana ati ara, Askelon nang, sik domik aik batakamice, aik wekuka manamake. Aning nirya ara, dipkoprob nong upnamla deiyok ara, ani. Ara, Yehuda yala nang nirya ara, anggun ni Allah Yahweh arye anggunti, ‘Anang melipnirye, tamubuka teleb kipdeipnamsinʼ tenen, erepdeiplyopura, sikda minop talak telebuk ulamik touk, tuba tamubuka, telebuk unamake,” Allah arye, ayupu nyapdeibukba, nabi Sefanya birye, lak nyabuk.
Ton ninye ara, yala keil deice sakmokto ning ara, Allah yupu peterenmaceura, kekebikirye kanye deibuka, diba tenebikirye adiparyuk dolonyake. Diba tenebuka dolonyak bukni, yala ning yating tukwak teleb ubuka kum binamuk arye, koulubuka atonun, anang ara, Allah yupu pia min kum dolokirye, minopce batakanyake. Ara, diba tenebikca ati, yuk nang arye yu uplibuk, ikin ning sik nong deice deililamakopura, tonda yuk ikin ning yalyopura, adiparyuk Allah Yupu kekepmace ning ara batakanyake.
Dipdik talak ara, Naomi ap, el mapu arye domrik kilapu ap ara, Moab mutuku uk unmekce, kekenmekba, yuk nang arye, ‘Allah el si Yahweh arye, el mapu Israel ninye ati, bicoe tenyamukce, melilamuk deice arye, mok weik areamukba, sik wa wibuka koulamik ning ayala-yala nirya teleb ubukba, dina weik bobikirye, din ning weik dilamake,’ nyanmekba kekebikce, Moab mutuku ara, batakuka yanuyika ati, sik nirya kintinibuka deibik.
ကြော်ငြာတွေ