Keluaran 4:21 - Eipomek

²¹ Allah el si Yahweh arye, Musa biti nyabuk. ‘Ninye winipman kum pil donamle’ tenen, na mikip an deice arelamkisa anya arye, an Mesir mutuku biminye talak ara, ninye kum winipmanto ning nirya, Mesir mutuku nang, sik deiyoknye Firaun dam binuka wininamlame. Winipnamlam bukni, narye elti, kat kanye ning arepneba, elce, ‘Yo telebe. Israel nang Mesir mutuku batakuka bitinge,’ pia kum nyapnamle. Anggun talina uk unamsile.

Keluaran 4:21 ပူးပေါင်းရင်းမြစ်များ

Kejadian 6:3

Winibuka winilamikba, Allah el si Yahweh arye, nyabuk. “Kume, na Dib Kanye arye, ninye tukwak ninye ati, “Winiplulum, winiplulume,” nyabuka, pia pi dobuka pil kum donamle. Tukwak ninye nirya ara, dipna atonunuk unyake. Sik keting tamun ara, yupa weik, 120 tahun kipnamle,” nyabuk.

1 Raja-Raja 22:22

Nyabukura, Yahweh arye amalaikat ati asibuk. “Yata wiripminya deice arye, el talima tamopnamle do?” nyabuk. Nyabukba, amalaikat arye nyabuk. “Aning ara, narye Ahab dam yupu nyalinamak nang nabi-nabi nang ati, sik talima noutam tilila yupu binuka nyapniba, kekebikirye, atilila yupu uk Ahab biti binuka nyalinamake,” nyabuk. Amalaikat arye nyabukba, Allah el si Yahweh arye tamubuka, aisa ati nyabuk. “Aning binuka nyapdeipminba, anabi nang arye Ahab biti atilila yupu nyabicopura, dipkoprob kekebuka Ahab talima tamupnamle. Ati, adiparyuk winipnalame,” nyabuka Allah arye, aisa ati nyabuk. Mikha birye nyabuk. Ura, aning eibuk ning nirya ara, Mikha birye Ahab biti nyabuk.

Mazmur 105:25

Allah arye, Mesir mutuku ulamik nang ati, kanye tamupdeibukba, sik anang arye, el mapu koprop Israel yala ninye nirya ati, derebuka malye yupu nyabuka, weik ikin ning sik nong deice delilamik. Tonda, Allah el mapu Israel ninye sikti, tilila yupu nyaplobuka, ikin ning delilamikce, amutuku ninye ati, ‘Minina yupu nyabibya deice arye, amutuku ninye nirya arye, Israel ninye ati, ‘Nun lik’ tenenamake’ tenen, talye yupu uk nyalamik. Tonda, Mesir mutuku ninye arye, sik Israel ninye ati tilila yupu uk nyalamik.

Mazmur 78:43

Aning kum bukni, tonda sikce, ‘Se, Mesir mutuku noutam, ikin weik ulamupu talak ara, Allah aryuk, pia ninye dopmankum pil dolamuka deice arye, lopdeipsukce, lyepdopsuke,’ tuba kum tenelamik. Aning babye, luba kinauk ulamik. Atonun, Mesir mutuku noutam bukni, mutuku si Zoan mutuku dam ara, Allah arye ninye kum winipmanto ning, pil dolamuk deice arye, Israel nang lyelamuk ning ara, sik tuba kum biklamikce, malyeuk winilamik.

Keluaran 10:1

Allah el si Yahweh arye, Musa biti nyabuk. “Ance, Firaun un dam bilyame. Narye, el nong kwepdeiamsa ati, wini talak narye arepsiba, el ap, el pil dona deiyok nang ap, sik talima malya kibuka bisinyak ning ara, narya. Deiyok ara, Mesir ninye ara, ‘Se Allah arye dipkoprob pil dopsile, tenebikirye kel kipnamak’ tenen, sik noutamak ninye kum winipmanto ning pil dopneba, kel kipnamake. ‘Utenepnamak’ tenen, talima kat una deiyok ning Firaun biti arepse.

Keluaran 10:20

Allah el si Yahweh arye winibuk bukni, elce arebukba, Firaun el talima tuba malye kibuka kekena kumce bisibukce, ‘Israel ninye batakniba, kum binamake,’ tenebukce nyabuk.

Keluaran 10:27

Nyabuk bukni, Allah el si Yahweh arye Firaun biti kat kanye bon ning arebukba, kum kekebukce, talima malye winibuka, “Israel ninye batakniba kum binamake,” nyabuk.

Keluaran 11:10

Ayupu nyabuk touk, Musa ap, Harun ap, sikce ninye kum winipmanto ning, Firaun dam winiprik. Bukni, Allah el si Yahweh arye, Firaun biti mandipna kanye kibuka, kekena kum deiyok ning arebukba, tuba kum kekebukce, el talima kanye tuba malye kibuka kekena kumce bisibukce, ‘Israel ninye kum binamake,’ nyabuka, Israel ninye kum batakdongobukce, el mutuku noutamakuk talibukba, ulamik. Tubakuk aunmek.

Keluaran 11:9

Ura, asum talak ara, Allah el si Yahweh arye Musa biti akunum nyapdeipmoke. “Narye Mesir mutuku noutamak, ‘Ninye kum winipmanto ning ap, ninye winipmanto kum pil ap, pia weika arye winipnamne,’ tenepsa ati, na Allah arye, Firaun el talima kat ning arepneba, malye kibuka kum kekeplyopura, an yupu kum kekepnamkile. El tuba kekena kum diparyuk unamle.” Allah arye Musa ati nyabuk.

Keluaran 14:17

Winipyopura, ‘Mesir ninye malye kiplirye, Israel ninye binukce bisikuk aminyan binuyap’ tenen, na Allah arye arepneba, sik talima kat upliba, kum kel kibikirye, laut mekwen noutam bisikuk binuyake. Sik bikcopura, narye wenebuka oplopnamane. Ara, narye weiknye Firaun ap, el yin talin nang ap, el kuda libuka tuku deice ban ning, kereta kuda ap, aning deice bukuka yanmak nang ap, na mikip deice arye opnamne. Akunum opnyopura, aminyan talak yuk ninye nirya kekebikirye, na si erebuka, ‘Se Allah ara pia mambule,’ nyapnamake,” Allah arye nyabuk.

Keluaran 14:4

Winibice talak ara, na Allah arye kintinip deipnyopura, Firaun talima malye uplirye, anggunti dobolyanamsile. Bukni narye weiknye Firaun ap, Mesir ninye nirya ap, sik nong deice weik ikin ning deipnamne. Tonda, Firaun el yin talin nang weik, na mikip deice arye opnyopura, ninye nirya arye na Yahweh ati, ‘Se weik mambulnye ulule’ tenen, kel kipnamake.” Allah el si Yahweh arye nyabukopura, sik Israel nang arye aning nyabuk touk winibuka bindobik.

Keluaran 14:8

Winibika babye, Israel ninye ‘Amutuku batakuka bisik noutamakuk binuka seknamap’ tenen, ilil kum diparyuk banmeke. Sik banmek talak ara, Allah el si Yahweh arye arebukba, Firaun el talima tam malye kanye dongobukce, ‘Israel nang kum bataknune’ tenebukce, kanye imun uamuk ning nirya tenibuka kum kel kibukce, ‘Israel nang tomopnun’ tenen, dobolbiyuk.

Keluaran 3:19

Allah arye nyabuk. “Na kele, Mesir mutuku deiyoknye bira, adiparyuk, ‘Yo dabinlulume,’ nyapbuka, kum nyapnamasile. Kume, narye weik ikin ning, el nong deice kum deipnyopura, el kekeplirye, kum bataknamsile.

Keluaran 3:20

Ati ara, na mikip weik deice arye wenena ap, ninye kum winipmanto ning ap, sik mutuku noutamak pil dopnamne deice arye, Mesir mutuku ninye wenebuka opnamne. Aning nirya akunum winipnyopura, atalak aryuk bataksiliba binamlume.” Allah arye nyabuk.

Keluaran 7:13

Winibuk bukni, Firaun el talima kat kibukce, ‘Sik nyapmarak yupu ara, kum kekepnune’ tenebuk. Malye kibuka kekena kum ubuka deiyok ara, Allah el si Yahweh arye, Musa ati, ‘Firaun kum kekepnamsile’ nyapdeiamuk touk winibuk.

Keluaran 7:3

Nyapnamle bukni, narye, ‘Firaun kum kekepnamle’ tenen, talima malye un ning, Firaun biti arepnyopura, el kum kekenamle. Narye ninye winipmanto kum ning, weik mambul ning ap, kanye imun ning ap, weika arye tabakuka, Mesir mutuku deipnamne.

Keluaran 8:11

Allah moropnyopura, yakai kum danamle. Ati ara, yakai anggun asik ap, anggun dam ap upamala ara, an ap, an pil dona deiyok nang ap, Mesir mutuku ninye aik pum upmala ning nirya ap, nirya kum danamle. Anirya ubuka, Nil mekinuk wekelbinamake,” Musa birye nyabuk.

Keluaran 8:15

Anirya winibuk bukni, weiknye Firaun birye, yakai nirya akunum dibikba eibuk. Eibukopura, ‘Naie, winira kanam asa upsile,’ tenebukce, Allah arye winipmok ning kum tenebukce, el talima tuba kat kibuka malye kibuk. Allah arye, “Firaun malye kibuka wininamle,” nyabuk touk, Musa ap, Harun ap, sik nyaprik yupu kum kekebuk. Tuba talima kat kibuka, mandipna kanye bobuk.

Keluaran 8:32

Bukni, atalak babye, Firaun birye, aning babye kum kekebukce, el talima tuba malye kibuk. Kibukce nyabuk. “Aninye ara, pia kum binamake,” Firaun birye nyabuk.

Keluaran 9:12

Bukni, Allah arye, Firaun biti arebukba, el talima kat kibuka malye kibukce, tuba kum kekebuk. Ara, Allah arye, ‘Winipnamle’ nyabuk touk, kum kekepmanto ubuka ati, Allah arye nyabukba, Musa ap, Harun ap, sik yupu nyaprika babye, kum kekebuk.

Keluaran 9:35

Firaun pia mandipna kanye dobuka, kum kekamna atonun, el talima kat ubuka ati ara, Allah arye nyapdeibukba, Musa birye nyabuka atonun, Firaun kum kekebukce, ‘Israel ninye batakniba kum binamake,’ tenebukce nyabuk.

Yesaya 6:10

Aninye ara, ‘Sik kanye talima kat unamle’ tenen, na yupu kum kekepmanto una deiyok ning arepnyopura, sik kanye talima katauk unamle. Aning atonun, amul kunukna deiyok ning arepneba, sik amul arye teleb kibuka, kum kekepmanto unamake. Tonda, sik asing kuna deiyok ning arepneba, asing kupliba, narye mambul pil donamne ning ara, bita kum eipnamake. Aning-aning nirya ara, sik wenena ati, kum winipnyopura, sik asing arye eibikirye, sik amul arye kekebikirye, sik kanye talima pum tam moubuka tenebikirye, kel kibikcopura, pia ilil kanye bobuka, unyak ning nirya, batakikirye, ‘Na dam tamubuka yacak’ tenen, nyapne. Ara, na dam tamubuka yatingopura, narye sik malye ning ati, kilipnirye, teleb kipdeiptinye bukni, sik malye-malye weik wininyaka ati, ‘Aning kum winipnamak’ tenen, talima kat una deiyok ning arepneba, kum kekepmanto una deiyok ninguk, talibuka pia unamake. Allah arye, ayupu nyapdeibukba kekepse.

Yesaya 63:17

Diba, nun ni Allah Yahweh, anda yata ning ati nunti namin kipsulumba, bisik kirikuka banyap do? Tonda, ance nunti lik kanye bon ning arepsulumba, nunce anti, ilil kum upsiliba, anti tuba kum tenekibirye, yata deiyok ati kwanim bisikuk banyap do? Yata deiyok ati, ance bataksulumba, nun talima pum tam ara malye tenen kanye upsukba, anti nun kum ilil usulul do? Wininyaba ati, na nio, ance melipsilyame. Nunda an mapu koprop unyabe. Tonda, nun Israel ninye yala yuk-yuk unyap nang nirya ara, an ‘Naʼ tenen, ninye uk unyaba anya arye, ance tamubuka nunti lyepnamsilyame. Tonoknye birye deipliba, el min yuma deiamlye mi uk el talilamle ning dololamle touk, sirya talak ara nun Israel ninye dopropnamsilama ati, tamubuka melinamsilame. Na nio, nun talima pum tam pil dopsiminba, tuba tonap moubuka teninamabe.

Yohanes 12:40

‘Allah arye aninye ati, asing kun ning akunum aribuk. Tonda, sik kanye talima noutamak ara, kat akunum kibuk. Allah arye aninye ati, asing kuna ap, talima kat una ap, akunum aribukba wininyake. Sik asing arye teleb kibuka kum elinyake. Sik kanye talima noutamak ara, ‘Deiyok ani’ tenen, moubuka kum tenenyake. Sik kum kel bikmanto pia ulamika ani, sik malye winin ning batakuka balye tamubuka, na tam kum kipnamake. Sik malye wininyak ning bataktingopura, narye sikti, kwetebuka, teleb ulilamtinye bukni, sikda talima kat ninye anya arye, aning kum wininamake. Allah arye nyabuk.’ (Yesaya 6:10)

Roma 1:28

Aninguk kum bukni, amalye winilamik ninye arye, ‘Allah ap, el ulul ning nirya ap ati, tonap kum tenenamabe. Aning nirya ara nong kum danamle. Allah el ulul ning yala-yala nirya ara, tuba kum tenenamabe. Elda nun like,’ tenyamika ati, Allah arye aninye nirya ati, lik ubukba, ‘Sik aninye daulamica ani, dipnamake’ tenen, batakukba, sik pia malye tenelamik ning deice arye tapu koupdongamukba ulamik. Winilamikba, Allah arye, “Winina meme,” nyasilye ning nirya talibuka winilamik dib arye, pia malyeuk upra balamik.

Roma 9:18

Allah arye ayupu nyabuka ati ara, nun kele. Allah el kanye aniryuk tenesilye touk, ton ninye ara, oltakana kumce, bico teneplirye, melibuka lyesulule. Bukni, el tenelye touk yuk ninye ara, ‘Sik kanye talima kat unamle’ tenen, kunukna deiyok ning arilirye, ‘Aninye sik talima kat unamle’ tenen, kunukna ning arilirye, aninye sik talima kat kililule.

2 Korintus 2:16

Aning ati ara, ton ninye ara, Yesus el yupu kekebikirye, ‘E, ayupu ara, pia teleb yupu ulula anya arye, aning kekebibyopura, Allah lyepsiliba, kam pia unamabe. Aninye ara, yun ning siltong teleb nyasilye touk wininyak,’ tenenyake. Bukni, ton ninye ara, dipnamaka anya arye, anang ara, Yesus el yupu kekebikirye, ‘E, ayupu ara nun like. “Allah arye wenepsiliba dipnamape,” nyanmasiyaka ara, nun like. Sik dib tenenyak ninye ara, akunuma oltakana ning lyulamle tong nyasilye touk wininyake. Anang ara, nun like,’ tenesinyake. Ati, Yesus yupu kekenyak ninye ara, sik kanye yuk-yuk ulula ati, yata ninye sik bidamang mikip deice aryuk, amambul pil dopting do? Kume, aning kum winiptibye.

Ulangan 2:36

Nun ni Allah Yahweh, el mikip weik deice arye, nunti meliamsukba, Raja Sihon birye taleamukba, el tam nang ulamik mutuku asik dolamika nirya ara, alubuka dopromubu. Ara, Aroer asik dolamika ara, Arnon mek lilun tam uamuk mutuku ap, tonda amek duman noutam ulamikce, asik dolamik ning ap, anerye dipdongobuka, otam Gilead mutuku ap, anoutam mutuku nirya ara, alubuka dopromubu. Raja Sihon taleamuk mutuku noutam nirya ara, sik asik dana-dana tam weik cang keil poka domik ning, awamuk bukni, aning-aning nirya ati ara, uluplobuburye, anyasik dolamika nirya ara, “Se, aning ara, kanye imun upsila anya arye, bataknamabe,’ pia kum tenyamupu. Amutuku nirya, malye kibuburye, alubuka dopromubu.

Yosua 11:20

Tonda, awinibuk ning ara, talye ati kume. Deiyok ara, Allah Yahweh arye, ‘Israel nang ap, Kanaan mutuku noutam unyak nang ap, olana uk upnamak,’ tenebuka ati, sik Kanaan tam ulamik nang ara, sik talima mikip kipbukce arebuk. Winibukba, sikce amutuku-amutuku nang nirya ara, mikip ubuka yu ubukce, ‘Israel nang obuka sirya daknamabe,’ tenebikce, pirilelamik. Bukni, Allah Yahweh arye, Musa biti nyabuk ning ara, ‘Sik ap, amutuku noutam unyak nang ap ara, na kayapu nangʼ tenen, bico tenena pia kum aryuk, “Aninye nirya obuka, sirya daknamlume,” nyapdeipmok touk, anang nirya obikce, kum kipdeibik. Ara, Yahweh arye, Musa biti, “Winipnamlyame,” nyabuk touk, winibuka ati, Allah arye melibukba, Israel nang arye, amutuku ulamik nang nirya, ona uk ulamika ani, sirya dakik.

1 Peterus 2:8

Tonda ayupu dipdelulume. Yesaya arye ayupu sekeipsuke. ‘Akeil ara, ninye balelamice anyak, yan dum duklyopura, kwelanyake. Tonda akeil arye, yan dum duklyopura, sakanyake.’ (Yesaya 8:14) Sik diba tenena kum nang arye, Yesus el yupu kum kekenyakce, talibuka kum dobolbanyak anya arye, ninye arye yan dum duklyopura, sakalamak atonun, malyeuk unyake. Ara, talya ati kume. Allah arye aninye ati, ‘Wininamak,’ tenyamuk touk unyake.