Tonda sik yupu deice wala si silamik ning ara, wala si Bul wala noutam ara, anyaik don pil ara sirya dakik. Tonda sik keting tamun nuklamik touk, ara keting tamun kumce utam, (11) sebelas deice arye, aketing tamun ara Salomo ap, el pil don nang ap arye, Allah el si eren aik dobuka sirya dakik. Ara, Allah arye, “Wininamlume, wininamlume,” nyamuk touk, sikce dolamika ani, sirya dakik. Solomo ap, el pil don nang ap arye, keting tamun tekbarye deice arye, dolamika ani sirya dakik.
Keluaran 39:32 - Eipomek32 Allah Yahweh ap, ninye ap, elana ati, el si erena ati, tenda arye don aik dona ati, aning-aning nirya akunum memebuka deibikce, dolamika ani, sirya dakik. Ara, Allah Yahweh arye Musa ati, “Winipnamlulume,” nyabuk touk, sik Israel ninye nirya arye, anyapdeiamuk touk, akunum winibik. အခန်းကိုကြည့်ပါ။ |
Keluaran 39:32
24 ပူးပေါင်းရင်းမြစ်များ
Huram arye yangabuka yulamak ning kuali ap, tuku palin ning sikop ap, mek din makau mitik ning mangkok ap, dopdeibuk. Aning nirya ara, Huram birye, Allah si eren aik ati, Raja Salomo si deice arye, aning nirya akunum pil dobuka sirya dakuk. Anyaik noutam una ati, dopdeibuk ning nirya ara ani. Weik yo ayukumna bitinye dopdeibuk. Ayukumna yo bitinye ikik ning deiyok eitam mouse ara, urasin teleb kibuka dobuk ayukumna yo dup tam ara, mangkok mek makau urasin ato ning arye dobuka kintinibuk. Tonda, ayukumna deice nirya ara, rantai tapu arye wibuk. Tonda, empat ratus yo duk, el si delima urasin ato ning, perunggu arye ton doprobukce, lonceng nyelamak ning bitinye memepdeibukce, rantai tapu arye wibuka, ayukumna yo mouse tam deipmok sukumuk binuka, dopdeibuk ning ara, takunya dam outam ton dopdeibuk. Tonda, weik mek makau bobana ati, takunya arye outam kereta dobukce, adice arye, yangalin ning ton takubarye (10) dopdeibuk. Weik bumang makau perunggu deice arye ton dopdeibuk. Amek makau talena ati, sapi basam atonun, dua belas ton perunggu deice arye dopdeibuk. Kuali ap, mitik sikop ap, tonda mitik mek makau mangkok-mangkok ton dobukce, kintinibuk. Allah Yahweh el si erena aik noutam, Allah si erena pil don ning nirya ara, Raja Salomo birye, “Winibuka dopdeipnamnilame,” nyapdeiamuk ning nirya ara, Huram birye akunum dobuka memebuk. Ara, perunggu deice arye cakuka dobukce, urasin teleb una ati, alam-alam apdeibukba, mel parabuk.
Ayupu nyabukce, ayupu ton nyabuk. Sik donamak ning nirya ara, narye nyapnamne touk kekebikirye donamake. Ara, na si erena ati cang kain aik ap, anyaik pum bisik deipnamaka ap, na nyapse yupu dobuka marikna pum bisik deipnamaka ap, amarikna deice bublan memepnamak ning ap, donamake. Amarikna bublan deice ara, Israel ninye sik malye winin ning kilina ati, ining dikdonokniba dulbinuka palipnamle ning ati nyapne. Aning-aning nirya ara, narye nyapnamne touk donamake.
Tonda, apala emas ning deice ara, ayupu akunum sekikce, kintinipmek ning ara, ‘Imam nang, sik weik deiyoknye, aning ongonamleʼ tenen, aning dobuka, el kisok kitin ning, serban urasin tamuk deibik. Adelina ati ara, kain wol warna biru ning dobuka, aemas ning, el kisok deice kitin ning serban ara, urasin tam kirikdongobik. Aning nirya ara, Allah Yahweh arye, Musa ati, “Winipnulyame,” nyabuk touk winibik.
Allah el si erena ati, tia doltakna aik akunum dobikce, sirya dakikura, aning-aning nirya dobuka, Musa dam delilyanmek. Adelilyanmek ning ara ani. Anamin kain tenda aik ap, diripkwetepniba talen ning ap, ayukumna yo ap, wirikna yo ap, tonda, anyaik ayukumna yo, ‘Tuku bol piplyakʼ tenen, amu tam baribuka yangabuka delin ning ara, Musa dam boyanuka arebik.
Na si erena ati, dopnamunye aik bukni, anyaik pia noutam, wilibuka bitinye deipmamumnye, el si ara, Pia Teleb Lengna Ati pum tam, na Allah Yahweh arye, sikti, “Aning ara wininamlume, aning ara, pia kum winipnamlume,” nyabuka, nyalin yupu deiyoknye nyapdeipsise ning, keil pala bitinye deice sekdeipsi ning ara, yo marikna el si Peti Perjanjian pum tam deipmunye ning ara, ance aning dopropmince, adopmamunye aik noutam, Pia Teleb Lengna Aik pum tamuk, binuka deipnulyame. Winipminyopura, anyaik wilina ati, ayupu deipmamumnye urasin tam ara, cang kain, el si gorden arye, biribuka dopkwetepminba, doloplirye ayo deice ara, lipdongopnamlule.
Allah si eren aik, cang kain aik wekelbinuyik talak ap, tonda ‘Allah arye nun malye ning ati, namin kipsutue’ tenen, kam ning obuka uku dalamik ning ati, pala keil lelebuka yangapdeibuk dam binun talak ap, sik taruk ap, yan ap, mek liklamik. Aning winilamik ning nirya ara, Allah arye nyabuk touk winilamik.
Sik anang pil don ning ara, ani. Allah arye nyapdeiamukba, Musa birye sekamuk yupu, libuka deiamik marikna yo, el si ara, Peti Perjanjian bobana ap, aning kalekina ap ati, pil talibuka dolamik. Tonda, Allah si eren aik pum tam uamuk yo lakase, meja ap, upna lana ati, delilamak ning ap, Allah el arena ati, anyaik pum tam uamukba, imam nang arye talibuka, pil dolamik ning ap, Allah arena ati, mesba delilamik ning nirya ap, ‘Aning nirya telebuk unamleʼ tenen, kaliklamik. Tonda, cang kain bola arye, ninye nirya talye wekna kum aik, pia teleb aik pum tam wekelbana ati, wililamik ning kintinilin nang ulamik. Sik Kehat yala nang arye, anyaik pum tam uamuk ning nirya ati, ilil kanye bobuka, apil talibuka dolamik.
Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.
Allah arye Musa ati, wipdeibukba, Musa arye Allah el ‘Na’ tenen ninye, Israel ninye sik melina ati, pil batakna kumce, apil nirya teleb ubuka pil dolamuk. Ara, Allah arye Musa ati, ‘Apil donamnile,’ tenyamuk touk, pil dolamuk. Aning atonun, Allah arye Yesus ati, ‘Apil donamnile,’ tenyamuk touk, Yesus babye pia teleb ubuka pil dolamuk. Ara, tonok ning babye batakna kum arye, elti, wipdeibuknye Allah arye, tenyamuk touk pil teleb ubuka dolamuk.
Allah ati arilbanyak deiyok nang, sik pil donyak aik, pia teleb aik noutamak ara, im deice mitik atonun ulul bukni, sik tukwak ning ara, talye winipmanto ninguk, keting kukia atonun ulule. Dipkoprop ning ara, im deice ning uka. Aning ati ara, Musa arye Allah el si erena ap, el arena ap ati, cang kain atonun ning arye, dolin aik tia tenda aik dopnuyuk talak ara, Allah arye Musa ati, ayupu nyabuk. ‘Sinai mutuku dup weleplumba, narye, “Anyaik urasin ara winibuka, winibuka dopnamlyame,” nyamkise touk, kanye moupmince moubuka dopnulyame, nyabuk.’ (Keluaran 25:40)
Nyabuk bukni, Samuel birye, tamubuka nyabuk. “Allah el birye, ‘Aning winiptinge,’ tenesilye ning ara, namin asa arye, el amu tam una teleb do? Akam ulul ning dobuka, Allah ati uku dalbana teleb do? Pia weik teleb ning ara, dan do? Allah arye nyasilye yupu, kekebuka dobolbana ara, pia teleb ning atie. Mitik teleb ning ara, anggun malye winin ning, namin kina ati, kam ning obuka, uku dalbana uka. Aning atonun, mitik teleb ning ara, domba basam meta dobuka, uku dalbana bukni, weik teleb ning ara, Allah arye nyasilye yupu kekebuka, dobolbana uka.
ကြော်ငြာတွေ