Keluaran 27:9 - Eipomek9 Na si erena ati, ninye ap, na ap neika una ati ara, noutam upnamle bukni, anyaik sirik dana-dana tam nirya ara, poka arye dobuka antapdongopnalume. Winipmunce, arah selatan tam ati ara, apoka el cang ara, dopmunyeba, 44 meter upnamle. Aning deice ara, cang kain lenan gorden ara, urasin pia teleb ninguk, kirikuka lapkwetepnamlume. အခန်းကိုကြည့်ပါ။ |
Keluaran 27:9
29 ပူးပေါင်းရင်းမြစ်များ
Tonda asum aryuk, Allah el si Yahweh, el si eren aik urasin dam ara, weik lo ton aupmok ning ara, Salomo birye bublan kuka, teleb kipdeibuk. Winina ati ara, alo noutam Salomo birye aning-aning weik arye Allah ati arebuk. Elce arebuk ning ara, ‘Allah si erepnuyap’ tenen, kam ning obukabukce, uku dongobuk. Tonda, ninye koulamak ning gandum ap, aning atonun bukni, yuk ning ap arebuk. Tonda, ‘Allah ap, ninye ap, teleb ubuka neika unamap’ tenen, kam ning arepmek ning arye, meta ap, tuba aupmok ning ara, weik arye ton arebukce uku dongobuk. Ura, Salomo birye, aning-aning nirya, Allah el si eren aik buru tam weik lo noutam arye arebuka deiyok ara, ani. Ara, Allah arena ati weik pala keil dobuka, pala keil yangapdeiamik ning ara, mitik ati ara, asum arye aning-aning nirya arebik ning ara, pia weik ati, akeil pala kintinip deiamik adeice arye, aning nirya deipmanto kum ubuk. Akeil deice ara mitik lo ubuka ati ara, talye arye yuk sukumuk arebuk.
Aning atouk ton, Allah si eren aik, bai tam bukni anyaik dam ara, lo weik uamukak ap, lo mitik tonun uamukak ap, ninye weik bulubuka weklamik sukum bitinye ara, Manasye birye, ‘Im deice tam ulul ning ap, kurya ap, wala ap, keting ap, si erenamaba ati, kam ning obuka uku dongonamap,’ tenena ati, mesba ton dobuk.
Tonda, ninye deiyoknye Raja Salomo birye nyapdeibukura, el pil don nang arye, sik imam nang bulubuka weken asik dam mitik ning ati, Allah el si eren aik dam bukni, mening damuk kintinibik. Tonda, aik pum tam arye, aik dam wekelbanak bisik bublan ara, bitinye kintinip deibik. Abublan bitinye ara, dana-dana tam nirya botopdeibikce, dekena teleb kat ning, el si perunggu arye, abublan deice taplak deiamikba, urasin teleb kibuk.
Ati ara, el si eren aik bublan wekelbanamap talak nirya ap, el si eren aik dam, ninye wekenak bulubuka wekelbanamap talak nirya ap, Allah elti, “Se, anda pia telebuk ulyame,” nyabuka, teleb yupu nyana deice arye, banamabe. Anyaik dam ap, anyaik koprop ap, wekelbinamap talak nirya ara, Allah ati, “Se, ance bico tenebuka melilamsulum ning nirya ati, telebe nyanmakiyabe. Anda, pia telebuk ulyame,” nyabuka, mot sena deice arye, nun ni koprop Allah, el si atibuk, teleb kilinamabe.
Diba, sik malye tuba wininyak nang ara, kum danamak bukni, ance nunti, “Aning ara, wininamlume. Aning ara, pia kum wininamlume,” nyapdeiamsulum yupu uk talikirye, diksukum telebuk wininyak nang nirya ara, pia telebuk wininamake. Sikce unamak ning nirya ara, telebuk unamle! Ara, pia teleb cang yo, el si ara kurma yo palamle touk, unamake. Ara, winipmanto, Libanon mutuku noutam ara, weik yo, el si aras yo mikip arye tiklirye, cang ap, urasin teleb ap, ulamle touk, ance sik diksukum wininyak nang ati, telebuk winiliminyeba, pia telebuk unamake!
Akain lenan gorden talena ati ara, acangnye yo nakub dikin dobuka, yana kintineipnamlulume. Akintineibuka deipmunye cang yo ara, ‘Tuku bol piplyakʼ tenen, el amu tam, urasin teleb kat ning perunggu arye, el delinak ning ara, 20 memebuka delinamlume. Tonda, ayo nirya deice tam ara, moubuka talena ati, dekna weik namin ning, el si perak aryuk, moubuka kintineip deipnalyame. Tonda, ayo deice nirya ara, buna atonun ubuka winipmunye arye, kin-kin botopdeipnamlume.
Tonda, Allah el si eren aik, kup-kup dana-dana tam nirya, antanap dongobuka dopnamlum poka yo ap, ‘Ayo ara, tuku bol piplyakʼ tenen, amu tam yangabuka deipnamlum kat ning perunggu arye, kintinip deipnamlum ning ap, adeipmunya deice ara, cang kain lenan arye, kirikdongopnamlum ning ap, kintinipnamlume. Tonda, anyaik dana-dana tam, kup-kup antanap dongobuka donamlum cang kain lenan noutam ara, bublan kintinina ati, potokmunce, apoka bublan terikna ati, weik pala cang kain ap nirya, kintinip deipnamlume.
Tonda, acang kain el kwaribuka talena ati ara, lima puluh (50) ton kisok bukuka bisik botolilamikce kintinilamikba, minop pala kain, el kup-kup kintinibuka deibik. Atonun, ton tam ning babye, kwaribuka talena ning lima puluh (50) ton, el kup-kup talena ati, kisok bukuka bisik botolilamikce, kintinibuka, memepdeibik.
Tonda, Allah el si eren aik bukni, bai tam kain arye poka antanabuka dopnamik ning ati, cang kain dobuka lap kwetepnamik kain ap, akain ayukumna poka yo ap, ayukumna yo, ‘Tuku bol piplyakʼ tenen, el amu tam kat ning perunggu arye, palibuka delin ning ap, tonda, anyaik dam poka bublan dam lalkwetena ati, pala kaluna ap, kaluna kitina tapu ap, tonda, adoltakna aik bibikuka delina ati, tatca yo ap, aning nirya dobuka, Musa el dam boyanuka deibik. Ara, Allah el si eren aik pum tam upnamuk ning aning-aning nirya ara, akunum memebuka, Musa el damak boyanuka deiamik.
Allah si eren aik, cang kain aik ap, kam ning obuka uku dongona ati, pala keil lelebuka dika deibukak ap, aning-aning bai tam nirya ara, cang baju dobukabukce, poka atonun kibuka wilina ati, lapkwetebukce, wibuka ongopdeibuk. Winibukopura, apoka bublan dam ara, cang baju ton lapkwetebuk. Winibukopura, Musa birye pil dobuka sirya dakukce, tonap pil kum dolamuk. Aning nirya ara, Allah arye nyabuk touk pil dobuk.
Winipmunyopura, na Allah Yahweh ap, ninye ap eldana ati, Pia Teleb Aik, urasin din tam bukni, anyaik dana-dana tam nirya ara, cang kain arye, poka ton dopnamlume. Acang kain gorden arye, antanabuka denepnalame. Tonda, ‘Talye nang arye, na Teleb Lek Aik dam wekikcakʼ tenen, anyaik dam wekelbana ati, apoka bublan wekelban bisik babye, cang kain arye lapkwetepminba, doloplirye, lipdongopnamlule.
Aning-aning nirya akunum kiklibukce, atalak ara, anye birye, acang keil arye deibuka domik aik batakuka, bai tam bobinuka deipnuke. Ara, Allah el si eren aik dam bukni, bai tam lo weik batakamika eilina ati, bobinuka deipnuke. Allah el si eren aik dam bukni, bai tam dana-dana nirya ara, pala keil poka antanap dongobuka domika kup-kup ak nirya ara, mitik aik ton weik tonun domik ning eipse. Anyaik urasin tam ara, pia lo weik batakamikba uamuk. Alo otam ara, Allah el si eren aik uamuk. Amitik aik weik tonun, yuk-yuk wilibuka domik ning ara, yupa weik 30 aik ubuk. Anyaik domika urasin tam ara, ‘Tuku sung-sunga palipsilyakʼ tenen, ninye banamikak ati, keil pala arye tuku deice yangapdeiamikba, akeil deice ara, amsuna tokamne atouk uamukak eipse.
Allah el si eren aik bai tam bukni, dana-dana tam nirya, antanap dongobuka keil deibuka poka domik ning wekelbana ati, botopdeiamik bisik bublan bukni, dabu tam (arah utara) domikba uamuk ning babye, anye birye otam binuka, pina arye deibuka, kiklipdeyukura eipse. Awekelbana ati bisik bublan, el si gapura ton, cang weik keil arye deibuka domik aik eipse. Anye birye anyaik el pala ap, el cang ap ati, yuk-yuk kiklipdeyuk.
Tonda, dabu tam cang keil arye, deibuka domik aik noutam arye kirikuka, bai tam obinmase talak ara, Allah el si eren aik otam uamukba, atam noutam ara, anyaik dam lo weik ton batakamikba, awamuk ning eipse. Tonda, dabu tam bukni, bai tam arye wekelbana ati, bisik bublan arye dipdongobuka, otam Allah el si eren aik dam wekelbana ati, bisik bublan ton domik ning awamukba, anye birye, ‘Anoutam lo weik nirya ara, yata barye meter ubuk do?’ tenen, pina arye deibuka kiklipdeyukura, keting panalyangan tam, lo atonun ubuka ati, el aning cang ara, lima puluh (50) meter panjang kibuk.
Aning nirya akunum winibukopura, anye birye lengdar mapmasa deice arye, na bobinuka, Allah el si eren aik dam bobinuka deipnukba, aning ton eipse. Asukum ara, Allah el si eren aik mening dam bana ati, yuk tam bisik arye ubuka, wekelbana ati domikce, bublan ton botopdeiamik bisik memebuka botopdeiamik ning eipse. Awekelbana ati bisik bublan ara, cang keil arye deibuka domik aik ara, iknapnye tam (arah selatan) wekelban bisik bublan ati, pina arye deibuka kiklipdeyukura, el cang ap, el pala ap ara, otam bublan wekelban bisik nirya kiklipmok meter atouk kibuk.
Ura, Allah el si eren aik mening dam wekelban bisik bukni, keting panalyangan tam babye, sikce cang weik keil arye deibuka domik aik, yuk-yuk dana-dana tam nirya ara, keting panalyangan tam urasin atouk kibuka domik. Ati, sik kalikin nang tikinak ati, lo mitik tonun memebuka domik ning ap, alo kup-kup abilinga deice botopdeiamik jendela bisik ap, alo mitik tonun wililona ati, anuotam arye domik abilinga nirya ap, abilinga taram deice ara, korma yo, tonda, el si kelapa yo, urasin atonun memepdeiamik gambar nirya ara, urasin atouk uamukba eipse. Tonda, alo mitik tonun dana-dana tam uamukba, anoutam ninye bana ati, mitik tonun mitik bisik el si ara lorong, kintinip deiamik ning ara, anye birye bopmuk pina arye deibuka kiklipdeyukura, el cang ara, dua puluh lima (25) meter panjang kibuk. El pala ara, dua belas setengah (12.5) meter kibuk. Ara, akeil cang arye deibuka domik aik, el nong nirya, el cang ap, pala ap uamuk touk, abisik mitik tonun babye atonun kibuk. Ati, Allah el si eren aik mening dam bukni, bai tam arye aik tam wekelyangan bisik bublan, keting panalyangan tam ara, asum eipmase cang keil arye, deibuka domik aik nirya ara, sik kiklilena ukuran ap, urasin nirya ara, pia neik touk uamukak eipse.
Atalak ara, nara anye birye bobinuka, Allah el si eren aik wekelban bisik ati, cang keil arye deibuka domik aik noutam, kirikuka binumurye otam binuka deipnuke. Ara, Allah el si erena ati, aik mening dam bukni, lo mitik tonun, batakamik noutam bobinukce deipnuke. Asukum ara, cang keil arye deibuka domik aik lilun ara, mitikto aik bitinye wilibuka domik ning ton eipse. Tonok aik ara, dabu tam cang weik bisik wekelbalamik bisik bublan dam, dana-dana tam domik aik, el urasin ara, iknapnye tam (arah selatan) kiamik ning eipse. Bitinye aik ara, keting panalyangan tam, cang weik wekelbalamik bisik bublan dam bukni, anyaik el urasin ara, dabu tam (arah utara) domik aik awamukak, eipse.
Anyaik domikce, el urasin deiamik tam, lo el pala ara, sepuluh meter (10) kibuk. Anyaik bukni ton tam ara, el urasin deibuka domik tam ara, bai tam arye ninye yanibuka yangana ati, keil pala yangap deiamikce, domik tam ara, lantai batu dam, anyaik urasin bai tam kipdeiamikce, domik. Anyaik domik ning, tonok minyuma domik ning ara, tuku deice amu tam domik. Anyapce ubuka, bitinye ning ara, noutam domik. Anyapce ubuka winilye ning ara, eitam domikce, tiga tingkat aik nyabuka dolamaka atonun, ubuka domik. Atiga tingkat aik domik ning, el urasin ara, Allah si eren aik iknapnye tam kipdeiamikce, domik tamuk kiamik.
Aning atonun, Allah si eren aik dam bukni, buru tam delilamik cang kain ap, anyaik dam wekelbana ati, bublan dam tirikilongolamik kain ap, tonda Allah arena ati, keil pala yangapdeiamikce, uku dongonak, el si mesba dam antanapdongobuka, delilamik kain ap, anyaik kirikin tapu ap nirya ara, ‘Malye kum kipnamle bukni, tuba teleb unamleʼ tenen, Gerson yala nang arye, apil talibuka dolamik. Winilamikce, ilil kanye bobuka, apil dolamik.
Tonda, Allah si erena ati, tenda arye dolamik aik bukni, buru tam dana-dana ara, poka ato ning ati, kalulongona cang kain ap, anyaik dam wekelban bisik, lalkwetena ati bublan dam delinyak kain ap, Allah arena ati, uku danyak sukum, mesba antanap dongobuka, lalkwetena ati delinyak kain ap, tonda anyaik buru tam poka atonun cang kain, bikilina ati tapu arye, kirikuka koulongon ning ap, tonda aning nirya, pil dona ati talinyak ning ap, sik Gerson yala nang aryuk bonamake. Israel ninye yuk mutuku binukce talak ara, sik Gerson yala nang aryuk, aning nirya tongobuka bobanamnyake.
Tonda, sik anang aryuk, Allah si eren aik bukni, buru tam poka atonun ati, cang kain lalkwetena ati, iklamak ayukumna nirya ap, ayukumna barina ati, kwa din yo ap, ayukumna iknamakce ati, lakilina ati kirikin tapu ap, anyaik donmakibuk, ‘Lokona kum, katabum apnamleʼ tenen, winin ayukumna ara, sik anang aryuk bobanamnyake. Ara, sik Merari yala nang arye, aning nirya bulupdeibikirye, ance, “Aning bopnulyame, anye bira aning bopnamle,” nyabikce touk, sikce aninguk bobanamnyake.
ကြော်ငြာတွေ