Keluaran 24:10 - Eipomek

¹⁰ Welebiyikce dinmikba, Israel nang sik deiyoknye Allah, el yan amu tam ara, teleb keil pala deice tikmokba, el dirina ara, im kalum dalamla atonun winipmokba eibik.

Keluaran 24:10 ပူးပေါင်းရင်းမြစ်များ

Kejadian 32:30

Malaikat arye, Yakub biti, teleb yupu nyapdeibuka ati, Yakub birye amutuku si ati, ‘Peniel,’ nyapdeibuk. Tonda ayupu nyabuk. Amutuku si ati, ‘Peniel,’ nyapmana deiyok ara, ani. Ara, na ni Allah el urasin mining dam eipmanubuk, kum oplopnuk ati ara, amutuku si, ‘Peniel,’ nyapne.

Kejadian 32:31

Aning nirya akunum winibukura, berekuk ati, Peniel mutuku batakuka bisik banmok. Bisik banmok talak ara, el yan camdipdanin banmok. Deiyok ara, malaikat arye, Yakub el keil yok, yok dukulongolamlak, talepmok arye, kotoklobukba, uk weik dinmoka ati, atalak arye doryanamle talak nirya ara, pia camdipdanin balamok.

1 Raja-Raja 22:19

Ayupu nyabukura, Mikha birye tamubuka nyabuk. “Dipkoprop nyapmakine. Ati ara, Allah el si Yahweh arye, nyapmakil yupu kekepnulyame. Aning-aning nirya talilulnye Yahweh, el bunak bukmokba, el pil don nang yin talin malaikat wekuka el kwanim tam ap, el sirik tam ap, tikmokak bukmokba, eipse,” nyabuk.

2 Tawarikh 6:17

Ati ara, na ni koproba Allah Yahweh ulyama ati, nun Israel nang nirya ati kalekuka disilyamce melisilyame. Na ni koproba Daud bira, an amu tam ulamukce, an pil dolamuk. Ati ance elti, nyalin yupu nyapdeiamlum ning ara, dipkoprob tuba wininamsilamʼ tenen, moropkine,” nyabuka, Raja Salomo birye, Allah ati nyabuka morobuk.

Keluaran 24:11

Atalak ara, Israel ninye sik deiyok nang arye, Allah atikmokak eibik bukni, Allah arye sikti, derebuka kum wenebuke. Kum derebuka ati, sik abinmik nang diamuk din ning ap, mek ap neika dinmek.

Keluaran 3:6

Nyabukce, Allah arye Musa biti, ayupu ton nyabuk. “Nara, an apu yapu Abraham ap, Isak ap, Yakub ap ati, sik melipnin yangalamsinye bira, na akunume.” Nyabukura, Musa arye, ‘Se’ tenen, el urasin lelipdobuk. Winibuka deiyok ara, ‘Kume Allah ara, na ilil’ tenen, ‘Kum eiptinye’ tenen, lelipdobuk. El ilil weik ubuk.

Keluaran 33:20

Nyabukce, ayupu ton nyabuk. “Na dirina ap, na teleb unun ning ap, eipnalam bukni, na urasin ara, ance lakoprop kum eipnutume. Ara, talye ati kume. Deiyok ara, na urasin lakoprop kibuka eipnutunye bira, yata wiribuka kam tuba uptu do? Kume, anye bira dibina uka,” Allah arye nyabuk.

Keluaran 33:23

An unmaminyak akunum bisibuka binyopura, na taruk lopdopnyeba, na donga tam uk eipnamnilam bukni, na urasin ara pia kum eipnutume,” Allah arye nyabuk.

Kidung Agung 5:14

Tonda, na akanye, na dopsinye bira, el taruk ap, nong nirya ap ara, urasin pia telebuk ulule. Winipmanto ara, el taruk ara, besi beton bukni, dengna weik ning emas ongolongon ning, kisok bukuka bisik botolilamikce, kintinilamikba ulamle touk, ulule. Tonda, emas deice dengna weik keil taplak deiptingiba, urasin pia teleb ulamle touk, el taruk babye atonun, pia teleb ulule. Tonda, el taram ap, mun ap ara, urasin pia teleb ulule. Winipmanto ara, weik bai basam, el si ara gaja basam, el cang weik yang lukikirye, aning deice ara, urasin pia teleb ning puturupdeibikirye, aning deice dengna weik keil, el urasin im mirin atonun ning taplakikiba pia teleb ulamle touk, na akanye el nong nirya babye, aning atonun ubuka, urasin pia telebuk ulule.

Kidung Agung 6:10

Akil yanamla ara, yata mutuku kil ulul do? Akil el si ara yata si nyanyak do? Kume, winipmanto ara, lukunyan mapmapya, bereklyopura, beren tam talak keting dirina eibibirye, pia teleb kanye delilamap touk, ayanamal kil babye eibiyopura, kanye delinyabe. Akil ara, lukunyan talak im noutam arye wala urasin pia teleb ulamle touk, tonda, sintam ara, keting dirina ara, ‘Weik tonun meldang-dang alamle touk, akil babye, urasin pia teleb kil ulule,’ tenenune.

Ratapan 4:7

Min talak arye talibuka ulamsik ninye deiyok nang ara, pia telebuk ulamik. Winipmanto ara, pia kurulamle ning arye, maka kurun potong pia lek ulamle touk ulamik. Ara, sik winin ning nirya ara, pia teleb, diksukumuk ulamik. Sik nong babye, uk dina kum ati, pia mikip weik ubuka, telebuk ulamik.

Yehezkiel 1:1

Ara, atalak ara, keting tamun yupa weik, yupa tonok kepdopnye pamubarye (tiga puluh tahun 30) ubuk. Dumu wala arye, like pamu sum (tanggal 5) ubuk sum ara, Atalak ara, Babel mutuku ninye deiyoknye, Sisinanye Nebukadnesar ap, el yin talin nang ap arye, Israel ninye tongobuka tapu koubikce, Babel mutuku bobinamsikba, daulamua ani, keting tamun pamubarye, akunum kibukopura, mek si Kebar mek lelun unmase. Ara, na Yehezkiel ap, Babel mutuku nang arye, yuk Israel ninye bobuka delilbalamik ninye ap, Kebar mek lilunak unmapu. Atalak ara, Allah arye, im deice bublan kukibukba, weik mambul ning ton, laka kipsukba, narye eipse.

Yehezkiel 10:1

Ura, na Yeheskiel birye mapmasirye, lengdar deice atonun dinmasiba, Kerub bitinye, sik pol otam atam arye dukdongamdik ning bukni, sik Kerub bitinye, sik kisok deice belebuka lak uamuk ning eipse. Ara, pia urasin teleb dekna weik keil, el si ara, batu nilam, aning arye pia teleb ninye bun ning, memepdeibik ning, el si tahkta urasin atonun ning, lak ubukba, narye eipse.

Daniel 10:17

Ati ara, nara an amu tam talye pil melibuka donanye ununa ati, nara yata ton unye ulamtinya deice arye, na ni an dam yupu ton nyapkitinye do? Na mikip ara, kum upmanilba, na isin babye, kum danmanto upmanila ati, yupu nyapmanto kum upmanila ati, yata wiribuka yupu nyapkitinye do?” nyapse.

Bilangan 12:8

Winilula ati ara, Musa ap, na ap nun neika epdanimirye, yupu sisikinyame. El ti ara, narye yupu laka nyalinune. Musa biti, domona yupu ning ton kum nyalinune. Tonda, yuk nang nirya kum bukni, na yupu tanmanye talak ara, Musa el uk ara, na nong urasin kum dilinulul bukni, kanye dem ara, elinulule. Aning nirya ati ara, anggunce Musa elti, malye yupu nyapmarum ning ara, yata ati ilil kum upmasil do? Yata deiyok ati, el deice malye yupu nyarumunya arye yanirurum do? Musa ara, na pil dolulnye ulula atia, nyabuka, Allah el si Yahweh arye, Harun ap, Miryam ap ati wenebuk.

Matius 17:2

Sik amutuku dup welebikopura, el mapu arye adinmek bukni, Yesus ara el urasin yuk ubuk. Yesus el urasin yuk dayukce, keting deiplirye, til pia daklamle touk dirina weik ubuk. El urasin dirina weik ubuka atonun, el baju kurubukce, dirina weik ubuk.

Yohanes 1:18

Minop talak arye dipdongobuka, wini talak noutamak nirya arye, nun tukwak ninye arye, Allah el urasin pia kum elilamubu. Bukni, nun ni Allah, el ulyak ululnye, el Mi Koprop, Allah ap neika ururaknye bira, Yesus arye Allah el ulul ning laka elilule. Yesus el ulamuk ning ap, yupu nyalamuk ning ap deice arye, Allah el ulul ning lak kibuka laka nyalamsuke.

Yohanes 14:9

Nyabukura, Yesus arye nyabuk. “Pilipuso, anggun ap, na ap, asum-asum yupa weik neika akunum ulamubu bukni, anda moubuka min kum kel bikamnulum do? Yatanye do nirya, na elilamnuknye birye, na Ni Koprop Allah ati akunum elilamuke. Nun bitinye ara neika ati, ance, ‘An Ni Koprop Allah laka kipdeipsutume,’ nyapmanilama ara, yata ati do?

Yohanes 6:46

Allah im deice arye dopdeibuknye, elcuk Allah elilamuk. Yuk ninye nirya arye, Allah pia kum elilamik. Allah arye wipdeibukce, sik ak dopdeibuknye, eluk Allah eililule.

1 Timotius 6:16

El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

1 Yohanes 4:12

Yata nang do nirya, ninye arye Allah el nong babye kum elilamubu bukni, nunce bico tenebuka melilanauk winibibyopura, Allah nun talima noutamak usulule. Tonda winibibyopura, elce bico tenena deiyok ning arisilibuk, nun talima ak usilirye, wisisulule.

Wahyu 1:16

Anye el sirik taruk noutamak arye kurya tekbarye bopmok. El si bam bol pum tam arye weik parang ya, dana-dana tam si taca keten weik uamuk parang talipmokak, eipse. El urasin ara, keting arye mili daklamle touk weik dirina ubukba, eipse.

Wahyu 21:11

Allah el dirina ara, pia weik ubuka deice arye, Yerusalem Winiryuk ning babye dirina weik ubuk. El dirina ara pia dekna weik ning silye keil mitik ning, el si ara yaspis, akeil atonun dirin weik ubukce, pia teleb ubuk.

Wahyu 4:3

Abukmok ning deice bukmoknye el urasin ap, el nong ap ara, dekna weik keil mil ap, mirin ap, silye keil el si ara yaspis ap, tonda sardis ap atonun upmokba, eipse. El bukmokak dana-dana tam nirya ara, mile paralamle atonun ning deipmokak el urasin ara, yo bok imbik maka ulamle touk ubukce, sukup-sukup abukba, eipse.