Keluaran 23:22 - Eipomek

²² Bukni, anggunce el yupu pia moubuka kekepmunce, aninguk talibuka winipmunce, tonda, narye anggunti, “Aning ara, wininamlume, aning ara, pia kum wininamlume,” nyapsise ninguk kekebuka, winipmumyopura, narye anggun melina ati, anggun mal olan nang yanganamak talak ara, na yu upniliba, anggunti unirye, sik anang nirya obuka, sirya daknamne. Aning atouk, dan mutuku nang do nirya, yuk mutuku ninye arye, ‘Israel nang sik nong deice ikin ning delinamabʼ tenen, yanganamak talak babye, narye aninye nirya ati, sik nong deice ikin ning arepnamna deice arye, amutuku nang nirya malye kipnamne.

Keluaran 23:22 ပူးပေါင်းရင်းမြစ်များ

Kejadian 12:3

Yata ninye do nirya, sikce anti, teleb yupu nyabuka, teleb kipdeibkicopura, narye anang ati, tamubuka teleb kipdeipnamne. Aning atonun, yata nang do, sikce anti, malye yupu nyabuka, an nong deice ikin ning deipkicopura, narye anang ton tamubuka, sik nong deice ikin ning delinamne. Aninye sik wenemna ati supnamne. Narye melipkineba, an deice arye, yuk ninye tukwak nang im sirya, mutuku sirya nirya ati, teleb kipdeipnamne.” Allah arye Abram biti, nyalin yupu nyapdeibuk.

Ulangan 30:7

Allah el si Yahweh arye, malye winina ati, anggun ning doproplirye, anggun mal olan nang ap, yu tenesinyak nang ap, yu deice arye ikin ning, anggun nong deice delisinyak nang nirya ati, sik deice sunamle.

Zakaria 2:8

Allah arye, na nabi Zakaria biti, nyapnuka deiyok ara, ani. Ara, yata mutuku nang arye do, anggun Israel yala nang ati, yanuka olyangalamsikce, anggun ning yala-yala nirya, alubuka dololamik ning ati nyapkine. Anggun moubuka tenipdelulume! Dipkoprob nyapne. Na pia talima nang, Israel nang ati, ikin ning sik nong deice delinyak nang do, olyanganyak nang do, anggunti ara, weik tonun wenepnamsine. Deiyok ara, Israel nang ara, na pia talima nang unyaka ati, Israel nang ati, malye umunce, ikin ning deipmunyopura, ara nati malye ulin ning winipmanuluma ati, nyapsine. Nara Allah Yahweh, im deice unyak yin talen malaikat nirya ara, sik deiyoknye ununa ati, naryuk ayupu nyapmasine.

Yeremia 30:20

Atalak ara, narye teleb kipdeipsiniba, sik mutuku nang ara, minop talak ninye weik areamsiba, yupa pia weik ulamik touk, kipdeipniba, sik mapu babye, mince ulamik touk, mapu weik deibikcopura, dadeipdanin yanganamak nang, pia weik upnin banamake. Tonda, anang sikda, ‘Na mapu koproba, pia unamakʼ tenen, mikip kipdeipyopura, sikda pia, teleb unamake. Tonda, yata mutuku nang arye do, sikce Israel nang deice ikin ning delinamak nang ara, narye sik anang deice babye, pia ikin ning deibuka wenepnamnarya.

Bilangan 24:9

Israel ninye ara, yim bai kam ap, kil bai kam ap arye, yu weik ulamrak atonun unamake. Ara, winipmanto, ‘Yuk kam ning obuka dipnuname’ tenen, duknubuka bulamdaka atonun unyake. Ati yata ninye arye, sikti, binuka duptinge do? Kume, opsicak ati, sik dam bana pia meme. Israel ninye babye, aning atonun unyaka ati, yuk mutuku nang arye Israel ninye ati, obuka sirya kum daktinge. Aning ati ara, yata mutuku ninye do nirya, sikce Israel ninye ati, ‘Teleb unamak’ tenen, teleb yupu nyabikcopura, Allah arye ayuk mutuku nang ati, teleb ubuka delinamle. Aning atonun, Israel ninye ati, ‘Ikin uptuba, malye upnamak’ tenen, malye yupu nyabuka, sun ninye ara, Allah arye ayuk mutuku nang ati, supliba ikin weik unamake. Bileam birye ayupu nirya ara, Israel ninye unamik ning ati nyabuk.

2 Tesalonika 1:6

Bukni, Allah elda yupu bokolina ati, pia diksukum ululnye binya arye, yuk nang arye anggunti, ikin ning delisinyak nang nirya ati ara, Allah arye kwang daklirye, sik nong deice weik ikin ning deilinamle.

Ulangan 28:1

Musa birye, sik Israel nang nirya ati, nyabuk. Anggun Israel nang ara, anggunce si erelulum Allah, el si Yahweh, el tibuk mikip arye talimunce, elce, “Aning ara, wininamlume. Aning ara, pia kum wininamlume,” nyapdeibuk yupu, moubuka kekepmunce, wininamlume. Ati ara, arup narye anggun kekenak laka nyapdeipsin yupu, moubuka talimunce, aninguk dipkoprob winimunyeura, anggun si erelulum Allah, el si Yahweh arye, anggun erepdeipsilyeura, mutuku-mutuku nirya unyak nang arye, anggun si biksikirye, si erenamsiake. Anggunda, yuk mutuku nang nirya ara, sik deice tam unamlume. Sik yuk mutuku unyak nang ara, anggun amu tamuk unamake.

Keluaran 15:16

Sik nirya arye, ‘Se yata wiripnamsil do?’ tenen, ilil weik upliba, imun kanye bobuka unamake. Allah an mikip weik deice arye, ilil upliba, keil talye darabuka bulamle touk, unamake. Ara, Allah arye meliamuk ninye sik bisibuka banmaca ani, amutuku noutam banamak talak, yan dobikce talak nirya ara, yuk malye nang nirya, olena kum bukni, keil ikin ulamle touk, talye tunim abuka unamake.

Bilangan 24:8

Tonda, Israel ninye ara Mesir mutuku ulamik bukni, sik ni koproba Allah arye lyebuka dobuka boyanamuke. Winilamuka ati ara, wini talak ara sik mikip asa weik unyake. Winipmanto ning ara, aninye ara bai sapi basam yang mikip anya arye oploplirye balamle atonun ubuka unyake. Mikip weik unamake anya arye, sik mal olan nang nirya ati, obuka sirya dakuka bataklopnin yanganamake. Sikce, sik mal olan nang ati, sik yo nia cobuka kulabuka, sikce buklopnin yanganamake. Tonda Allah arye melipliba, sikce sik mal olan nang ati, mal dopnaba ninye nong deice bikuka, sik mal olan nang ati obuka sirya daknamake.

Yosua 9:7

Nyabuka morobik bukni, sik Israel deiyok nang ap, Israel nang nirya arye, tamubuka nyabik, “Anggunda, mining dam nun unyap mutuku noutam, anyuk ululum nanguk yanamlum do? Ati, nunda yata deiyok ati, nyalin yupu nyapdanuyap do? Tonda, nun aunamap mutuku dam, yanuka umumyopura, yata deiyok ati, ‘Olana kum aryuk, teleb kibuka neika unamabeʼ tenen, nunce nyalin yupu nyapdeipdanamap do?” nyabuka, sik Hewi nang ati nyabik.

Mazmur 35:1

Raja Daud birye, Mazmur yupu mot sekuk. Daud birye nyabuk yupu ara, ani. Se na ni koproba Allah, ance na olyanganinyak nang arye, mal olyanganinyaka ati, ‘Ance sik anang ati, tamubuka optume’ tenen, moropkine. Yu nang arye nati, ‘Anye opnuyap,’ teneninyak nang ara, ‘An Allah arye anang ati, wenebuka opnamlam’ tenen, moropkine na nio.