Nyabukce, anyalin yupu tonap dukdongopbuka nyabuk. Allah arye, Abram biti nyabuk yupu ara, ani. “Narye anti, pia teleb kipkinirye, narye melilamkiniba, ance deipminyeba, dadeipdanin balamica ani, deipnamak nang, pia weik upnin banamake. Aninye nirya ati, sik apu koproba kibuka unalame. Na mikip deice arye, an si weik arye, ereipkiniba, ninye nirya arye, anti kekepnamake. Narye melipkineba, an deice arye, yuk nang weika arye, teleb updeipnamne.
Keluaran 20:24 - Eipomek24 Nyabukce, ayupu tonap dukdongobuka nyabuk. Na Allah, na si erena ati, kam ning obuka uku dongonamlume. Wininamlumak ati, anggun minopce tuku dobuka, taplak deipmunyeura, na si erena ati, kam ning obuka arenak kintinipnamlume. Winipmunyak ara anggunce, domba basam ap, sapi basam ap, obuka boyamunyeura, ‘Nun malye wininyap ning ara, Allah arye namin kipsilirye, teleb kilinamsil tenen, uku dongolyanamlume. Tonda, ‘Allah ap, nun ap teleb kibuka neika uberye, el uk melinamsil tenen, kam ning obuka, tuku arye kintinepnamlum ning deice uku dongopmunba, uku diplirye siltong teleb ning na damak welebiliba kekepnirye, anggunti, na kanye delinamsine. Ara, narye anggunti, ‘Aning ara, anggunce na si erena ati, kintinip deipnalumak ara, aninguk deipnamlume,’ nyapnyeura, amutuku nirya ara, na siuk tuba teninamnulume. Anyapmasin touk akunum winipmunyeura, nara, anggun damuk yanganirye, anggunti teleb kilinamsine. အခန်းကိုကြည့်ပါ။ |
Keluaran 20:24
44 ပူးပေါင်းရင်းမြစ်များ
Allah arye, Obet-Edom ap, el aik un ninye nirya ati, kanye deibukce, teleb kipdeibukba, yuk nang arye, “Allah el nyapdeiamuk yupu liamik kwemdina ara, Obet-Edom aik ulula ati, Allah arye anye ap, el aik unyak nang ap, el talilul ning nirya ap ati, pia teleb updeibuk,” nyabuka, Daud biti laka nyabikba, kekebukopura, bikbik abuka biyukce, aning Obet-Edom aik arye doprobikce, tuba tamubuka, el mutuku koprop bobiyuk. Ara, Daud el mutuku, Sion nyalamik mutuku noutam, amarikna boyanuka deibuk.
“Sik yuk mutuku nang, talye tikilyangan nang arye, anti anyaik dam moropkikcopura, an adiparyuk im deice an uminyak arye, sik morobikce ning ara kekepmince, melinamlyame. Winipmince sik moropmakikce touk melipminyopura, amutuku talye tikilyangan nang babye, winipminye deice arye, eipkikirye yuk mutuku binuka nyabikcopura, ninye mutuku-mutuku nirya, an siuk kel biknamake. Winibikirye, anti, ‘Se Allah ara weik mambule’ tenen, ilil unamake. Winibikirye anti sik babye ilil upliba, an mapu Israel nang arye an si erelamika atonun, yuk mutuku nang babye, wininamake. Tonda, an si erena ati, dopkise aik ara, ‘E Raja Salomo birye anyaik ara dobuka deiyok ara, talye ati kume. Ara, dipkoprob Allah el si erena ati dobuke,’ tenenamake. Winipnamak tenen ati moropkine.” Salomo birye nyabuka morobuk.
“Salomo ance nati morolamnulum ning ara, akunum kekepkisirye, melinamkine. Ati ance na si eren aik dopnulum ning ara, ‘Pia telebak unamle’ tenen, narye akunum teleb kipdeipnamkine. Ara, anyaik pum ara, na si akunum sekse ati, na si asukum tuba pia aupnamle. Tonda anyaik ap, anyaik unamak ninye ap ara, pia dinamne. Tonda, na talima noutam ara, anyaik pia teninamne. Aning ara pia kum bataknamne.
Nyabukura, Naaman birye tamubuka nyabuk. “Nyaplamopura, nara an amu tam atonunye birye moropkine. Ance arepnutumba, amutuku tuku weik arye, palibuka lin ning dongopnirye, na keledai basam bitinye, sik balye deice deipniba, na mutuku bobinamne. Minop talak ara, yuk isa ati si erelamsirye, sik si erena ati kam ulamle ning obuka uku dongolamse bukni, winira aning nirya bataknamne. Wini talak arye, dipdongobuka, oyanamle talak noutam ara, Allah el si Yahweh, el tibuk, si erepnirye, aning nirya bobuka el si erena ati arenamne. Tonda, kam ulamle ning opnirye, el si erena ati, uku danamne. Isa Mutuku Dongonye si erenye ning ara, bataknirye wini talak ara, Allah el siuk erenamne,” nyabuk.
Ura, ninye deiyoknye Raja Rehabeam birye, Yerusalem mutuku talebuka ulamuk. Tonda, elce ninye deiyoknye kibuka taleamuk keting tamun empat belas (14) tahun Yehuda tam talebuka ulamuk. Winilamuk talak ara, el ninye deiyok talebuka deiyok kouamuk talak ara, el nena umur ara, keting tamun empat puluh satu (41) tahun nemuk. Winyamuk talak arye, Yehuda tam taleamuk talak nirya ara, keting tamun weik, tujuhbelas (17) tahun deice arye, pia Yerusalem mutuku weik asik noutam ulamukce pil dolamuk. Israel mutuku noutam uamuk mutuku kan-kan ara, weik asik weik auamuk bukni, Allah Yahweh arye, Amutuku Yerusalem noutam ara, na si deipnirye, asukumuk unamne tenelamuk ati, el si eren aik ara, asukumuk memebuka deiamikce domik. Raja Rehabeam bira, el lin koproba el si Naama ulamuk. Naama, elda Amon yala kil ulamuk.
Ati aning nirya ara, dipkoprob narye wininamne. Deiyok ara, asukum mutuku, anyaik noutamak ara, narye akunum wipdeiamsirye, akunum kintinibuka deiamse. Ara, nati pia tuba-tuba si erenamniyak sukum ara, asukum tenen, akunum wipdeiamse. Anyaik ara, narye moubuka dilamnirye dor upnin banamak talak nirya ara, naryuk ‘Naʼ tenen, ninye, Israel nang ati pia melinamne.
Ati ara, Yerusalem mutuku ara, Allah arye wipdeiamukce, ‘Amutuku uniba, na si kibuka si erenamniake,’ tenyamuk mutuku anya arye, na patapnil ning ara, nyapnune. Ara, ninye deiyok nang, Raja nang do, yata mutuku nang arye do, yata yala nang arye, ‘Lik,’ tenebuka, ayupu yaniplobikirye, yuk yupu nyabicopura, Allah arye wenebuka opnamle. Aning atonun, ‘Yerusalem mutuku Allah el si eren aik binuka uluplobicopura, Allah arye, anang nirya obuka, sirya daknamle’ tenen, nyapsine. Na Raja Kores birye nyapsine. Nyabukce, surat sekeiamuk ningak yinibik. Ayupu akunum yinibikopura, Raja Darius birye nyabuk. “Na Raja Darius birye nyapmasin yupu uk, kekebuka winipmunyopura, aning ara, teleb uka. Ati, adiparyuk pia pi dobuka, kanye deipmunce, ayupu kekebuka, pil moubuka dopnin banamlulume, nyapsine. Na Raja Darius birye nyapsine,” nyapdeibuk.
Bukni, winipnamsina babye, anggunce tamubuka na dam yamunce, narye, ‘Aning ara wininamlulume, aning ara kum wininamlulume,’ nyapse atonun kekebuka winipmunyopura, yuk mutuku nang arye obisipsikirye, pia yukak bobinamsitinga babye, anggun kwit capu mutuku sirya, im sirya, daunamting nang babye, narye bulubuka, tonokak deipnamsine. Ara, ‘Aunamlume,’ tenen, wibuka kintinip deiamsisak uk umunce, na si erenamnulume. Ara, ‘Na si asukum unamle’ tenen, ‘Kintinipse mutuku ati nyapsine,’ nyabuka, nyapdeipsulum yupu ati nyapkine na nio.” Nehemia birye nyabuk.
Narye, malye winina kumce, pia diksukum winin ning ara, moubuka biknamne! Aning nirya, akunum winipnyopura, yuk nang arye, nati, ‘Elda malye winilul ning ara, ani-ani,’ nyabuka, malye kum nyapnitinge. Diksukum winin ning ara, moubuka biknamne bukni, dan talak arye, “Aning nirya ara, akunum bikamsa ati, nara pia diksukum wininune,” nyaptinye do? Na walwale. Na talima noutam ara, pia diksukum kanye uk teninamne. Na mapu silip ap, na tam nang ap, unamne noutam nirya ara, malye winina kumce, diksukumuk wininamne.
Allah Yahweh arye, anggunti, pia teleb kipdeipnamsil’ tenen, narye anggunti, Allah moronamsine. Tonda, Allah arye Yerusalem mutuku noutam unyak nang, sik Israel yala nang nirya ati, pia teleb kipdeiplyeba, sikce wininamak ning nirya ara, pia telebuk uplyeura, sik amot nyabikca, kekepmunye nang ara, anggun kam unamlum talak nirya ara, aning nirya eibuka biknamlum’ tenen, anggunti Allah morosunune.
Nun ni Allah, el si Yahweh arye, yata ning do nirya, im deice ulye ning nirya ap, tukak mutuku ulye ning nirya ara, elcuk kwepdeiamuk deiyoknye ulule. Allah Yahweh arye, el si erenyak ninye nirya ati, ‘Teleb kipdeipsilirye, pia telebuk wininamlum’ tenen, Allah moronamabe. Ara, el si deiamuk mutuku, weik mambul mutuku si, Sion mutuku noutamak arye, ‘Pia teleb kipdeipnamsil’ tenen, Allah moronyabe.
Sikce anyaik pum tam uamuk ning nirya, akunum ulubukabikce, anyaik pum tam uamuk ning nirya ara, uku dongobikba, uku arye, dibuka sirya dakuke. Allah ance, “Anyaik pum tam ara, na siuk erenikiba, na ap, sik ap, asukumuk neika unamabe,” nyapdeiamsulum asik nirya ara, sik ayu nang arye, pia malye kipdeibik. Winibikopura, anyaik nirya dakuka ululobikce, tuku deice deibik.
Allah arye, Efraim yala nang ulamik mutuku kum wibuk bukni, sik batakuka, Israel mutuku iknapnye tam ulamik nanguk, sik ulamik mutuku wibuk. Ara, Yehuda birye deiamukba, sikce dadeipdanin yangalamik nang arye ulamik mutuku ara, ‘Na si eren aik ara, sik mutuku uk dopnamne,’ tenebuka ati, sik mutuku wibuka erepdeibuk. Allah arye amutuku wibuka deiyok ara, Sion mutuku awamuka ati, Allah arye amutuku ati, kanye deiamuka ani, ‘Na si eren aik ara, asukumuk aunamle’ tenen, amutuku wibuka erepdeibuk.
Nyabukopura, Yitero birye, Allah Yahweh ati, ‘Telebe,’ nyapnirye, ‘Uku dongopnunʼ tenen, Allah el arena ati, kam ning ton obuka kintinibuk. Ara, kam ning obuka uku dongon ning ap, yuk yala arena ning ap bobuka, Allah Yahweh el dam boyayuk. Atalak ara, Harun ap, Israel ninye sik deiyok-deiyok nang nirya ap, Yitro dam yayikura, bulubuka bukmekce, Yahweh el si erena ati, neika roti kwaning dinmek.
Ura, anggunce, na Allah arena ati, kam ning obuka uku dongonak ara, keil yangabuka kintineipnamlumak ara, ninye taruk deice arye keil pum ning deibuka dongopnamak keil ara, dobuka pia kum delinamlume. Talya auplye pala keilak bobuka yamunce, yangapnamlulume. Aning wininamluma deiyok ara, ani. Ara, keil telen ning arye teikuka deiamice keil anyak dobuka, aknapdeipmunce kintineipmunyeura, akunum malye kipdeipnamlume. Ara, ninye taruk deice arye, keil teikne ning deibuka onmace deice arye, akeil akunum malye ulinyake. Ati ara, ato keil ara, na si erena ati, uku dongon ning ara, pia kum kintipnamlulume. Ato keil deice, kam ning obuka, na arena ati, uku kum dongolyanamlulume.
Nyabikopura, Musa birye Yahweh nyapmok yupu nirya sekuk. Akunum sekukopura, mapmeka berekukopura, osum beren tam ara, Musa birye Sinai mutuku dam amu biyukce, keil pala dobuka taplakreibuk. Ara, Allah el si erena ati kam ning obuka, Allah el arin ning akeil deice uku seknirye, ‘El si erenamabe’ tenen, keil pala dobukabukce, pala keil taplakakuka pipdeibik. Tonda, Israel nang bikilina ati, cang keil dobuka ayukumna atonun tuku palibuka ikdeibuk. Ara obarye (12) ikuk. Ara, Israel yala dua belas (12) aulamik touk, obarye tenebuka ikuk.
Winibukopura, atalak babye Musa birye Israel kam nang wibukabukce nyabuk. “Allah el kanye teleb kilin ning ati, kam ning obuka uku dapnululume. Tonda, ‘Yuk nang ap teleb kibuka neika uptibye’ tenen, sapi basam weik kam ning obuka areplum bukni, uku kum dapnululume. Aning nirya ara, nun ni Yahweh ati arelbinululume,” nyabuk.
Allah arye Musa ati, ayupu lak nyabuk. Na Allah ati, kam ning obuka, uku yanganak dona ati ara, winibuka dopnamlume. Ara, akasia yo arye dobuka moupdeipnamlume. Amemena ati ara, el mouse yuk-yuk memepdeipmunce, el cang ap, el pala ap ara, neiktoto nun kiplildebuka bitinye karin 2,2 meter kintineip deipnalume (Ara, empat segi neiktoto upnamle). Tonda, atam arye, itam tikilin yo ara, el cang ara, 1,3 meter kiklipdebuka sekmince, kintineip deipnalyame.
Sikce Allah an nyapsulum touk diba tenebikirye, kanye deibuka an yupu moubuka talibuka diksukumuk unyak nang ati, ance melibuka yangasilyame. Bukni, Allah ance, ‘Wininamake, aning ara kum wininamake,’ tenesiminye ning ara, nunce, ‘Nun lik’ tenen, an yupu yanilamuburye malyeuk ulamupuba, an yu ulamkuke. Winibuka yu ulamkuka anya arye, nun wenena ati ikin ning weik nun deice delilamsulume. Nunda, pia malye un ninye unyaba ati, wini talak ara, yata wiribuka lyepsutumce, ila tamubuka teleb kipdeipsutum do?
Bukni, yatanye do, sik malye winipmalinye bira, domba ato ning, adiparyuk Allah Yahweh arena ati bobuka, Allah Yahweh ap, ninye ap, ansinilina ati, sapi bol arye domik doltakna tenda aik, bublan dam kum yanuka opmalinye bira, pia malye weik ulule. Sapi ato ning ara, talye yukak bai tam arye oplirye, ‘Allah ati yanuka arepnune,’ teneplinye bira, el anye biti, na mi koproba kum unamle. El anye bira, na mapu, sik Israel nang kan-kan ton, pia kum unamle. Anye dobuka, sik ulamicak batakuka, bai tamuk dopkwetepmunce, yaknamlulume. Anye bira, na babye bataknamna ati, na mi kum unamle. El yuk daulamlya ani, dipnamlarya.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.
Aning atonun winipmunyopura, Allah arye, ‘Amutuku unamne. Winipnyopura, amutuku uk, na si erenamniyake,’ tenyamuk mutuku, lak nyapsilyopura, asukumuk binuka umunce, Allah el si erena ati, el arin ning bobuka, elti, arepnamlulume. Arup arye nyapnusin ning nirya ara, amutuku uk, boyanamlulume. Boyamunyopura, anggun ni koproba Allah ati, arenamlulume. Ara, ‘Nun malye wininyap ning, Allah arye namin kipnamsil’ tenen, Allah ati arenamlum ning ara, ani. Ara, kam ulul ning sapi do, domba do dobuka opmunce, uku dongopmunba, uku dipnamle. Ton ning ara, aupnamle. Tonda, anggun wa linamlum ning ara, nirya bokuka, sepuluh persen (10%) deipmunce, tonok ning ara dobuka, Allah ati arepnamlulume. Ara, sepuluh persen mitik tonun ati nyapne. Tonda, anggun kanye koproba arye, ‘Aning ton, na ni Allah ati arepnamne,’ tenepmunce, kintinipnamlum ning ap, tonda Allah ati, ‘Dipkoprop wininamne ati, amambul ning dobuka Allah ati arenamne,’ nyabuka, nyalin yupu nyamlum ning ap, Allah atibuk arenamlume. Ara, aning-aning nirya ara, Allah el si erena ati, elce nyapnamsil mutuku, asukumuk arenamlume.
Allah arye, ‘Na si erenamniak mutuku ara ani,’ tenyamukce, nuknamsil mutuku, anggun unamlumak arye amutuku bisik bana pera weik uplirye, tup ning patapsilya ati, mambul kanye bona meme. Anggun unamlum mutuku noutamak aryuk dina telebe. Ara, anggun weilulum ning, sapi do, domba do, kambing do, maka do, Allah arye areamsuk ning nirya obuka dina telebe. Ara, narye, ‘Winibuka wininamlulume,’ nyabuka nukamsise touk, obuka dina telebe. Aning opmunyopura, anggun tup ning nirya ara, anggun kanye arye tenepdemunce, anggun asik doplumak ap, anggun aik koproba pum tam ap, dina teleb uka.
Amutuku ninye winilamak touk kum bukni, anggun Israel ninye ara, Allah arye el si erenak ati, ‘Asukum binuka wekenamlulume,’ nyabuka, laka nyapnamsilak anyuk, amutuku uk binuka, el si erenamlulume. Allah arye, ‘Aunamnak anye’ tenyamukce, wibuka nyapnamsilak ara, amutuku unamle. Asukumuk anggunce binuka wekmunce, elti, kibuka, el si diamuk erenamlulume. Yuk ning ati si erena pia meme.
Anggun ni koproba Allah Yahweh arye, ‘Asukum ara, na si deipnamneʼ tenen, el si erena asik wipdeipnamlak ara, anyasik dam ara, el urasin damuk, elce kintinililyakuk, anggun nirya arye, Allah el aren ning noutam, bokuka boyanamlum ning nirya, asukumuk yanuka delinamlume. Ara gandum do, anggur mek do, minyak zaitun mek do, aning nirya noutam bokukapmunce, Allah ati arelyanganamlume. Tonda, sapi basam do, kambing basam do, domba basam do, ayala basam nirya ara, sik mi winiryuk min yuma deipnamle ning ara, anirya boyamunce, Allah ati arelyanganamlume. Aning nirya dina ati, Allah el arena ati, kintinip deipnamlumak ara, asukumuk yanuka dinamlume. Winipmunya deice arye, anggunce tuba-tuba teninamlume. Ara, ‘Se, nun ni koproba Allah Yahweh, elda weik mambulnyeʼ tenen, ilil upsiliba, el si erena ati, biknamlume.
Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.
Daulamunya ani, wa wiamunya min yuma mouplye ning ara, yuma ning nirya ara, libukapmunce, Allah ati arelbanamlulume. Allah arye arepnamsil mutuku noutam koupmunba, moupnamle yuma ning nirya ara, aling arye libuka arepnamlulume. Arepnamlum sukum ara, Allah el si Yahweh arye, ‘Asukum ara, na si seknamne. Na si eren aik ara ani,’ nyabuka wiamukce, nyapnamsilakuk, arelbanamlulume.
“Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”
ကြော်ငြာတွေ