Keluaran 20:12 - Eipomek

¹² “Anggun ni yapu ap, anggun nin yapu ap, ‘Sikda mambule’ tenen, sik yupu moubuka kekemunya deice arye, teleb winipmunyopura, keting tamun weika arye tonap arepnamsine. Pia teleb mutuku arepsinyopura, kam tuba unamlume,” Allah el si Yahweh arye nyabuk.

Keluaran 20:12 ပူးပေါင်းရင်းမြစ်များ

Kejadian 48:12

Nyabukura, Yusup birye el mapu bitinye Israel el keil deice bukmarikak arye dobuka, Israel el urasin tam deibukce, Yusup el nong kanupdongobuka, ‘Na ni kipnun’ tenen, el urasin ara tuku tam luknupdongobuk.

Kejadian 50:12

Ati ara, Yakub birye, “Aning ara winipnamlulume,” nyapdeiamuk touk elce deiamuk mapu arye aninguk winibik.

1 Raja-Raja 2:19

Nyabukopura, Batsyeba aning kekebukce, Adonia nyapmok ning ati, Raja dam biyuk. Biyukopura, Raja Salomo minop tikukabukce, kutam tuku dipdongobuka, el lin yanganmok ati, si erebuka kibuk. Kibukopura, Salomo adiparyuk, el buknamok ning, el si takta deice bulbiyuk. Winibukopura, Salomo birye nyabukba, el pil melin nang arye, el lin buknamok ning ati, el si takta dobuka, el sirik tam delilyayik ura, asukum bukuk.

2 Raja-Raja 2:12

Atalak ara, Elisa aning nirya eibukce, ngalukuka malye nyabuk. “Se, na ni, na nio. Israel nang, sik kuda basam deice balamak nang ap, kuda arye, kirikuka tuku deice balamle ning ara akunum eipne,” nyabuk. Ara, Elisa ap, tikmarikce Elia tunimabukura, Elisa birye anye tonap kum eibuk. Kum eibuka ati ara, kanye imun pia weik ubukba, Elisa birye el ongolamuk baju kwilikuka bitinye kibuk.

Keluaran 21:15

Yatanye do nirya, el li ap, el nin ap ati, opliba dipdicopura, anye el babye adiparyuk wenebuka obiceba dipnamlule.

Keluaran 21:17

Yatanye do nirya, el anye birye, el li do, el nin do, sikti, ‘Ikin uptueʼ tenen, malye yupu nyabuka wenelamlinye bira, adiparyuk anye el wenena ati opmunyeba, dipnamlule.

Amsal 15:5

Walwal kanye bobuka unyak nang ara, sik ni yapu arye, wenena yupu ap, lipsisikuka peterena yupu ap, nyanyak ning kekebikirye, moubuka kum dobolbanyake. Yaniltana uk unyake. Bukni, ninye ton sik ni yapu do, yuk nang do, sikce nyabice wenena yupu ap, lipsisikuka peterena yupu ap, moubuka kekenyak nang ara, pia weik kel nang unamake.

Amsal 17:6

Ninye ton akunum wisi deiplyopura, elce deiamliba, dadeipdanin, banamak ninye nirya, pia weik upra banamakopura, el mapu weik kipnin baca ati, kanye delilule. Winipmanto ara, ninye deiyoknye Raja arye, kweirya ning, sik kisok deice kalulamak tonun, wisi nang sik mapu weik ucopura, atonun ulule. Anang ara, kanye delinyake. Tonda sal ap, kilapu ap deibikiba, dadeipdanin banamak mapu nirya arye, sik ni yapu ap, sik nin yapu ap ati, kanye delinamake.

Amsal 20:20

Winipmanto ning ara, lukunyan talak noutamak weisa tangaplirye kuna dakliba, aning nirya kum elilamak touk, yata ninye do nirya, sik nin yapu ap, sik ni yapu ap ati, malye yupu nyabuka suplinye bira, Allah arye aninye ati, minopce wenebuka oplomliba, dipnamake.

Amsal 28:24

Yatanye do nirya, el li ap, el lin ap, sik ning ubula dopdoplirye, minin yupu deice arye, “Aning ara, na deipnirik nang bitinya, sik ninguk dopropmana anya arye, aning ara malye kum wininune,” tenebuka pililamlanye bira, dipkoprob pia weik malye ulule. El li ap, el lin ap talilamdeice ning, talye lukparabuka ubula dololula anya arye, yuk nang arye, aning-aning talye lukparabuka ulultaklamak nang atonun ulule.

Amsal 3:16

Weik kel bikna deice arye pia diksukum ninguk, moubuka tenepmunya deice arye, ouku weik tonap arepsiliba, pia kam unamlume. Weik kel bikna deiyok ning moubuka talimunyopura, bon ayala-ayala ning nirya weika arye dopropmunce, bona utotoa talin nang unamlume. Tonda, yuk ninye nirya arye, anggunti, ‘E, anang ara, mambul nang unyake’ tenen, si erenamsiake.

Amsal 30:11

Ton ninye ara, sik ni yapu dorapce, deipdanin yangalamik ninye nirya ati, supnin yangalamik. Winipdanin, yangalamik ani, sik nin yapu nirya babye, pia teleb kanye ton bobuka kum ulamik. Winibuka ulamikce, sikti, “Telebe,” nyabuka kanye kum delilamik.

Amsal 30:17

Ninye ton el li koproba ap, el lin ap, sik akunum wisi dadikirye, aik bukdikce talak ara, sik bitinye ati, akutubuka malye yupu nyalulnye bira, aminyan talak Allah arye, anye bira wenebuka oploplirye, bai tam donokliba, Gagak maka ap, Rajawali maka ap arye, anye bira el asing ara, lukuka dipnamdake.

Yeremia 35:18

Nyapnukura, Allah arye, sik Rekhab yala nang ati nyapnukba, na Yeremia birye, sik Rekbah yala nang ati nyapse. Anyapse yupu ara ani. “Allah arye nyapsile. Nara, Allah Yahweh, im deice yin talin malaikat nirya, sik deiyoknye unune. Anggun Israel nang arye, nati, ‘Nun ni koproba,’ nyabuka, si erenululumba, narye anggunti, melibuka kalikisunun Allah, narye ayupu nyapsine. Anggunda, anggun apu Yonadab birye nyapdeipsuk yupu, tuba moubuka taliplume. Yonadab birye, ‘Aning wininamlume, aning ara, pia kum wininamlume,’ nyapdeipsuk yupu, anggunce aninguk moubuka talipmunce, melibuka dobolbalulume.

Yeremia 35:7

Nyabikopura, ayupu ton laka nyapnik. “Aninguk kum bukni, nun apu koproba Yonadab birye, ayupu ton nyapdeipsuke. “Nun Rekhab yala nang, kam unamap talak nirya ara, nunce anggur wa ton, talibuka kum winamabe. Tonda anggur kouna ap, dekna ap, pia kum wininamabe. Tonda, yuk yala ning, yala yuk-yuk nirya babye, anggur duk wa wibuka kum kounamabe. Tonda nun unamap sukum kat aik babye, kum dobuka unamabe. Nun ayala nang nirya ara, pia ati, tia tenda aikuk, kintinibuka deibipyeura, atenda aik diamuk pia aunamabe. Deiyok ara, Allah arye nun Rekhab yala nang nirya ati nyapsuke. “Narye, ‘Winipnamlume,’ nyapsise touk, pia ati, winipmunyeura, kam una deiyok ning arepsinyeba, ateleb mutuku noutamuk, keting tamun pia weik arye, teleb kibuka unamlume. Kum winipmunyeura, kume,” nyapsuke.

Yehezkiel 22:7

Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.

Imamat 19:3

Tonda, ninye nirya adiparyuk, anggun nin yapu ap, anggun ni yapu ap ati, ‘Sikda mambule’ tenen, kinamlulume. Winipmunyopura, tekbarye sum nirya ara, pil dona kumce, asum deice na Allah arye nyapdeamsi touk, na siuk erebuka, si erenamnululume. Nara, anggun ni Allah Yahweh unune. Anggun ni Allah, na tonok unune.

Imamat 19:32

“Tonda dan aik do nirya, anggun bukmunye talak, sik wisi nang babye, wisi kilapu babye, ato nang anggun bukmamunyak yacopura, adiparyuk, tikuka, ‘Telebe,’ nyabuka, kinamlulume. Aning atonun, nara anggun ni Allah ununa ati, ‘Nun ni Allah el si Yahweh, elda weik mambule’ tenen, nati ilil upsilyeba, anggunce na siuk, erenamnulume. Nara Yahweh, anggun ni koproba, Allah arye nyapsine,” nyabuk.

Maleaki 1:6

Na Allah Yahweh, aning-aning nirya talibuka, im deice yin talin malaikat sik weik deiyoknye unune. Narye, na si eren aik pum tam, pil dona deiyok nang, anggun imam-imam nang ati nyapsine. Anggun teneipdelulume. Anggun kele, yata ninye do, sik mapu arye, sik ni yapu ati kanye delinyake. Atonun, weik nang amu tam unyakce, aik pum tam talye pil donyak ninye ara, sik deiyok nang ati kanye delinyake. Nara, anggun ni koproba Allah Yahweh unune. Tonda anggun weik deiyoknye unune. Ati ara, yata ning ati, anggunce nati, si kum erenululum do? Nara, weik mambulnye unun bukni, anggunce nati, ilil kum usulul do? Dipkoprop anggunce na ap, na si ap ati, malye nyanululume. Bukni, aning nyapsiniba, angguncuk tamubuka nyalulume, “Nunda yata ning wininyaba deice arye, an si ati malye nyanyap do?” nyabuka asipdenulume.

Matius 19:19

‘Tonda, anggun ni yapu ap, anggun nin yapu ap ati, bico tenebuka kibuka melinamlulume. Tonda, an bidamang patan ati, bico tenepdamince, teleb ubuka uminye touk, ance yuk ninye ati bico tenebuka melilanamlyame.’ (Ulangan 5:16-20) Ayupu ara, Musa sekeiamuk yupu nyapmakine,” Yesus arye nyabuk.

Markus 10:19

Tonda, Yesus arye abona weik talinanye biti ayupu nyabuk. “Allah arye, ‘Winamlulume, aning ton kum wininamlulume,’ nyapdeibukura, Musa arye mem yupu sekeiamuk ara, an akunum kel kiplume. Ayupu ara, ani. ‘Ninye ona ap, yuk kilapu talye ubula yona ap, yuk nang ning ubula dolona ap, yuk nang ati minina yupu nyana ap, talye tilila yupu nyana ap, tenebuka, arye talye yupu nyaplobuka dolona ap, anirya ara, pia meme. Tonda anggun ni yapu ap, anggun nin yapu ap, si erebuka melinamlume.’ Ayupu nirya ara, Musa sekiamuk yupu noutamak aupmal ati, nyapmakine,” Yesus arye nyabuk.

Markus 7:10

Musa arye, ‘Anggun ni yapu ap, anggun nin yapu ap, si erebuka pin-pin arye melinamlume. Yata kil do, yatanye do, sik ni yapu ap, sik nin yapu ap, malye yupu nyabiceura, wenebuka onamlulume.’ Musa arye nyapdeiamuk. (Keluaran 20:12; 21:17)

Lukas 18:20

Allah arye, ‘Winipnamlulume, anye kum winipnamlulume,’ nyapdeibukura, Musa arye sekamuk yupu noutamak, mem yupu ubuk ning ara, anda akunum kel kilyame. ‘Ara, kil talye-talye yona meme. Ninye talye oltakana meme. Ubula dolona meme. Yuk nang ati, ubula kisina meme. Anggun ni yapu ap, anggun nin yapu ap ati, bico tenebuka kinamlulume,’ nyabuka sekeiyamsuke. Musa arye sekamsuk yupu ara nyapkine,” Yesus arye bona weik talinanye biti nyabuk.

Efesus 5:21

Tonda, anggunce Kristus ati, ‘Elda mambule, nun Deiyoknye usulule’ tenen, winimunya deice arye, anggun ap, neika umunye ninye ati ara, sik amu tam bukuka nimalye arye, unamlume. Kanye talima kum ereldanamlulume.

Ulangan 11:8

Musa birye sik Israel nang ati, ayupu ton dukdongobuka nyabuk. “Ati, Allah arye nyapdeipnukba, narye anggunti, ‘Aning ara, wininamlume. Aning ara, pia kum wininamlume,’ nyamsise yupu nirya ara, arup arye nyapmasin ning ara, diba tenepmunce, moubuka talipmunce wininamlume. Winipmunya deice arye, anggun mikip kipsiliba, Yordan mek koubuka, otam mutuku binuka wekmunce, malye kipnamlume. Allah arye, ‘Anggun ti amutuku arepsiniba, talibuka unamlume,’ nyapdeiamsuk mutuku uk, obinuka wekmunce, talibuka unamlume.

Ulangan 11:9

Tonda, arup arye nyapdeipmasin yupu moubuka talipmunce, pia kum batakmunyopura, Allah arye anggun kam una ati, lo weik tonun ton arepnamasile. Ara, anggun omutuku noutam wekelbimunce, unamlum mutuku ara, keting tamun tonap weik tonun mapmunce, unamlume. Amutuku ara, Allah arye anggun apu yapu ati, nyalin yupu nyapdeiamuka deice arye nyabuk. “Anggunce deipmunyeba, dadeipdanin banamak nang nirya ara, pia teleb mutuku arepnamsine. Tonda, winipmanto yupu ara, amutuku ara, sapi basam moum yung ap, mong mek ap, pia weik ulye mutuku dopropnamlume. Ara, amutuku noutam ara, yata teleb ning do, yala-yala nirya, pia teleb ning weik aulula ati nyapsine. Amutuku arepnamsine,” nyapdeiamuk. Ati ara, wini talak amutuku uk, binuka unamlume.

Ulangan 21:18

Winipmanto yupu ton nyapnusine. Ura, anggun deiamlum mapu arye, anggun ni yapu ap, anggun nin yapu ap, anggun yupu kum kekepsikcopura, el li, el lin birye, ‘Teleb winipnamleʼ tenen, obuka weneprikibuk, amapu pia mandipna dobikirye, sik yupu kum kekepmanto ubikcopura, ubuka wininamlume.

Ulangan 25:15

‘Ikin ara, yata barye do?’ tenen, kiklilenyak ning deice ap, tonda lubuka lilamak ning deice ap arye, dipkoprob ninguk winamlulume. Winipnamluma deice arye, anggun unak ati, lo arepsilyeura, Allah Yahweh elce arepsuk mutuku talibuka unamlume.

Ulangan 27:16

Tonda, “Yata nang do nirya, sik wisi nang ati, bico kum tenebikirye, anang ati, si erebuka kina kumce, batakikiba, talye kankan uk ulamikcopura, epdakca menenga ara, Allah arye arepliba, anang sik mapu dam, ikin ning yalyeba, dolonamake. Adeice arye dipnamake,” nyabuka, yupu deice arye, sun yupu nyanamake. Ayupu ara, anggun Israel nang nirya kekepmunyopura, anggunce tamubuka nyanamlum yupu ara, ani. “Yo, dipkoprob nyapmasuluma ati, nunce, “Aninguk winipnamleʼ tenen, ‘Akunuma,’ nyababe,” nyapnamlume.

Ulangan 32:47

Ati ara, anyapmasin yupu ara, talye ati kum nyapsine. Bukni, anggun kam una ati, nyapsine. Ayupu kekepmunce, dukdongobuka kanye lamapdongobuka, ulamunyopura, ayupu deice arye, Yordan mek koubuka, otam binuka unamlum mutuku noutamak arye, keting tamun weika arye, teleb ubuka, kam pia unamlume.” Musa arye nyabuk.

Ulangan 4:26

Nyabuka ayupu ton nyabuk. “Arup narye nyapnusin yupu ara, kekepnululume. Aminyan talak, anggunce malye winiplumce, talye ning si erena ati, puturubuka deipmunyopura, Allah arye anggunti, yu uplyopura, weik arye wenepnamsile. Tonda, im deice ulul ning ap, tukwak ulul ning ap nirya, awamlye ning nirya disinyaka deice arye, ‘Narye, dipkoprob yupu nyapsine,’ nyabuka, mikip arye nyapsine. Ara, yuk ning si erepmunyopura, Allah arye anggunti, obuka sirya daknamsile. Ura wini talak ara, anggunce, ‘Yordan mek koubuka, otam mutuku pia binuka unamap,’ tenepluma ara, aupmal bukni, malye winipmunyopura, keting tamun weik kum upnamlume. Minopce Allah arye anggunti, amutuku noutamakuk wenepsilirye, obuka sirya daknamsile.

Ulangan 4:40

Tonda namin asa arye umunce, Allah arye, ‘Aning ara, wininamlulume. Tonda aning ara, kum wininamlulume,’ nyabuka, el yupu nyapdeibukba, asum arye narye anggunti, peteresinye ning nirya ara, kekenamlulume. Ara, arup arye dipdongobuka, dorunamle talak nirya ara, Allah arye nyalul yupu, pia moubuka talibuka wininamlume. Aninguk winipmunyopura, aminyan talak nirya, anggun ap, anggunce deipmunyeba, deipdanin banalum ninye nirya babye, telebuk wininamlume. Tonda, winipmunyopura, Allah arye wini talak arepnamsil mutuku, binuka unamlum talak ara, keting tamun pia weik talibuka unamlume. Allah arye, ‘Aninye ara, amutuku pia talibuka unamak’ tenen, arepnamsile.” Musa birye, Israel ninye ati nyabuk.

Ulangan 5:16

Anggun mapu nirya arye, anggun ni yapu nirya ap, anggun nin yapu nirya ap arye, sik nyabikce yupu, moubuka kekemunce, aning talibuka wininamlume. Ayupu ara, narye anggun ni Allah Yahweh arye, nyapdeipsise touk wininamlume. Anggunce ayupu kekebuka winimunyopura, anggun kam una ara, keting tamun tonap, lo weik tonun arepnamsine. Tonda, anggunce ayupu kekebuka winimunyopura, anggun ni koproba Allah narye, ‘Ateleb mutuku arepnamsine,’ nyalin yupu deice arye, nyapdeiamsise mutuku ara, amutuku talibuka unamlum talak ara, teleb updeipsiniba, teleb kanye bobuka umunce, telebuk unamlume.

Ulangan 5:33

Anggunce si erelamlum Allah, el si Yahweh arye anggunti, “Aning wininamlule. Aning ara, pia kum wininamlume,’ nyapdeipmasil yupu nirya ara, aninguk moubuka talipmunyopura, kam unamlume. Tonda, Allah arye anggunti, winiryuk arepmasil mutuku binuka, amutuku nirya malye kibuka, talipmunce, unamlum talak ara, ayupu uk talibuka winimunyopura, anggun keting tamun yupa weik tonun arepsiliba, pia telebuk unamlume.” Musa birye, sik Israel nang ati nyabuk.

Ulangan 6:2

Tonda anggunce, anggun ni koproba Allah, el si Yahweh ati, ‘Se, elda pia mambule, el siuk erenamabe,’ tenenamlum tenen, ayupu peterepnusine. Tonda, Allah arye, ‘Aning wininamlulume. Aning ara, kum wininamlulume,’ nyabuka, el yupu nyapdeiamuk ning ara, ‘Anggunce moubuka talipmunce wininamlulume,’ nyapsine. Tonda, anggunce deipmunyeba, dadeipdanin banamak ninye nirya ara, ‘Sikce Allah el yupu ati, dib tenebikirye, moubuka wininamak’ tenen, nyapsine. Winipmunyopura, Allah arye anggun kam unamlum talak ara, keting tamun ouku weik arepsiliba, pia unamlume.”

Kolose 3:20

Anggun mapu nirya ara, anggun ni yapu ap, anggun nin yapu ap nirya ati, sik amu tam umunce, yata winin ning ati do nirya, atalak-atalak nirya sik yupu moubuka kekepmunce, melibuka dobolbamunyopura, Allah arye kanye delisulula anya arye, adiparyuk wininamlume.

Rut 3:6

Ayupu akunum sirya nyabukopura, Rut adiparyuk, gandum wa wiamikak sekuka, gandum kwekenmekce, kala kokon pil donmekak biyuk. Biyukopura, el yamal kil nyapdeipmok touk, aning nirya winibuk.

1 Samuel 22:3

Daud akeil deiya, aulamuka ani batakuka, Moab tam noutamak bukni, Mispa mutuku biyuk. Amutuku akunum biyukopura, Moab mutuku talibuka ulamuk deiyoknye, Raja Moab biti, binuka morobukce, nyabuk. “Naio, ance na ni ap, na nin ap, an taliplum mutuku ayana uptiring do? An mutuku noutamak aulamdice ani, Allah arye, na melina ati tenepnuk ning ara, ‘Yatato wiripnamnil do?’ tenen, kel biknyopura, sikda na dam, tamubuka yatiringe. Aning ati, yanuka moropkine,” Daud birye, Moab mutuku taleamuknye biti nyabuk.