Keluaran 19:6 - Eipomek6 Ati ara, anggunce na yupu moubuka kekepmunyopura, narye anggunti, ‘Sikda weik mambule. Aning ara na si erena ati, Allah ap, ninye ap ansinilina deiyok nang atonun unyake. Anggunda, na balye tam bukmunba, na akwamse ninye, sikda pia telebe,’ tenenamsine.” Allah arye Musa biti nyabuk. Nyabukopura, ayupu ton nyabuk. “Anyapmakin yupu nirya bobuka, sik Israel ninye ati nyalbinamlyame,” Allah arye Musa biti nyabuk. အခန်းကိုကြည့်ပါ။ |
Keluaran 19:6
37 ပူးပေါင်းရင်းမြစ်များ
Aning ara, talye ati kum moropkine. Deiyok ara, tukwak mutuku noutam nirya ara, ninye pia weik aulamik bukni, ance anang, Israel nang ati, ‘Israel nang, na ninye koprop unamak tenen wiamlumce neika unamabe,’ tenyamlumce aninye wipdeiamsulume. Ance, ‘Na mapu’ tenen, wiamsulumce, Musa dam nyapdeiamlumba, elce nyapdeiamsuk atonun, ‘Israel ninye na ninye koprop unmake,’ nyapdeiamsulume. Ayupu nyapdeamsulum talak ara, nun yok punun nang Mesir mutuku arye, boyanamlum talak arye nyapsulume. Se na ni Allah, an si Yahweh ulyame. Anda aning-aning deice tam talibuka Erenena Weik Deiyoknye umince, an tenyamlum touk ulyame. Ati ara, narye moropkine.” Salomo birye nyabuka morobuk.
Tonda, nun ni koproba Allah, ancuk, Sik Israel nang nirya ara, na mapu koproba atonun unamakʼ tenen, nun Israel yala nang ati, akunum wipdeiamsulum nang ara, an ‘Naʼ tenen nang pia unamabe. Aning atonun, na ni an si Yahweh erenamkinyabe. Nun ni koproba Allah, anda pia talibuka unamsilame.” Raja Daud birye Allah ati nyabuk.
Atalak ara, Israel yala nang, sik apu koproba Yehuda birye, deiamukba, dadeipdanin yangalamik nang ara, Allah arye, sik Israel nang ati, ‘Na mapu unamak’ tenen, anang wipbukce, lyeprobukba, el ap, sik ap, neika ulamik. Ara, Allah arye, ‘Sik Israel yala nang nirya talepnirye, sik weik deiyoknye, pia unamne,’ tenebuka deice arye, Israel nang lyepdobukce, taleamuk.
Atalak ara, Allah, el si Yahweh arye Israel ninye ati ayupu nyabuk. “Anggunda na Yahweh arye nyapnusin ning nirya ara pia wininamlulume. Ara, narye nyasunun yupu moubuka kekepmunce, na tenenye touk diksukumuk winipnamlulume. Ara, narye anggunti, ‘Aning ara winibuka-winibuka unamlume,’ nyabuka deipnirye, aresunun yupu nirya, moubuka kekepmunce, dobolbanamlume. Aning atonun narye anggunti, ‘Aning kum unamlume’ nyasunun yupu mem yupu nirya kekepmunce, aning nirya kum winipmunyopura, narye melinamsine. Ara, Mesir ninye anggun ona ati, weik kanye imun ning ap, uk deiyok ning ap arepse touk, anggun Israel ninye ati ara, pia kum arepnamsine. Auk ara, aning-aning nirya kum dipnamsile. Ara, nara anggun ninye deiyoknye, Allah ununa ati, na Yahweh arye anggunti kwetepsinirye, lyebuka kam bukuka deipnamsine,” Allah el si Yahweh arye Israel ninye ati nyapdeibuk.
Tonda, urasin teleb dekna weik ning, emas deice arye, mitik yo lakase atonun ning kentinipnamlume. Aning deice arye, meterai atonun ning ubuka, anyapnukin yupu sekuka, laka kipdeipnulyame. Ayupu ara ani. ‘Allah Yahweh, an ‘Naʼ tenen ning, pia teleb ulule,’ nyabuka sekeipnamlume. Aning deiyok ara, ‘Aning ongonamlanye bira, Allah el ninguk ulule. Tonda, malye ning tonok babye kum upmalibuk, pia telebuk ululeʼ tenen, aemas ning deice arye, ayupu laka kibuka sekeipnamlume.
Winipsa deiyok ara ani. Narye anggun Israel ninye ati, pia bico tenesunune. Na kanye ara, anggunda ‘Naʼ tenen, ninye ululume. Anggunda akunum wipdeiamsa ati, narye lukparabuka wenebuka kum oplopsise bukni, anggun pununa ati, yuk pera mutuku ninye wenepsirye oplopse. ‘Israel ninye tuba kam unamak’ tenen, yuk mutuku ninye weik, punubuka wenepse.” Allah arye nyabuk.
Yuk nang arye anggun Israel yala ninye ati, ‘Sikda Allah ap, ninye ap, ansinilina deiyok nang unyake,’ nyanamsiyake. Nyapsikirye, ‘Sikda Allah el si eren aik pum tam pil dona deiyok nang unyake,’ nyanamsiyake. Yuk pera mutuku ninye nirya arye, sik aninye talibuka unyak dekna weik ning nirya ap, sikce talinyak ning ap nirya dobuka, anggun Israel ninye ati arelyanganamsiyake. Winipsikcopura, anggun aning nirya talipmunce, pia kanye deibuka unamlume.
Na Allah arye nyapsine. Yerusalem mutuku tamubuka yanamak nang ara, narye winiryuk si arepniba, anang mutuku sirya, im sirya nirya ara, sik si ati nyanamake. “Allah arye akunum Lyepdobuk Nang, ‘Sikda ‘Naʼ tenen, nang unamakʼ tenen, akunum wipdeibuka ati, sikda, ‘Pia Lek Nang,’ nyabuka, si sinamsiake. Tonda, ‘Allah Yahweh arye, ikin noutam arye, Lobukabukce Lyepdobuk Nang,’ nyabuka, si kum sinamsiake. Dipkoprob, anggun Yudea tam nang ati nyapsine. Ninye mutuku sirya, im sirya nirya ara, anggun winiryuk si ati, ‘Anggunda, Allah arye pia epsukce, Eibuka Lyepdopsuk Nang,’ nyabuka, si kum sinamsiake. Tonda, Yerusalem mutuku ati ara, ninye nirya ara, amutuku ati, Allah arye, ‘Min batakuk mutuku,’ nyabuka, si sinamake. Allah arye, anggun Yudea tam Israel yala nang ati, aminyan winipnamuk ning ati, nyabuk.
Tonda sik pera mutuku arye tamubuka boyanamak nang noutam ara, narye, ‘Imam-imam pil dona deiyok nang ap, imam pil melibuka dona ati Lewi yala nang ap, atonun kipdeipniba, anang arye na si eren aik pum tam pil donamniakʼ tenen, wipdeipnamne. Na Allah Yahweh arye nyapsina ati, aning ara dipkoprob winipnamne.
Winipmanto ara, ninye baju bumang celana ongobikirye, deiyok deice delilamak touk, Yehuda yala nang ap, Yerusalem mutuku nang ap ara, ninye arye bumang celana deiatinga deibuka, nong kitipdongobuka, koulongolamak touk, ‘Sikda na deiceuk unamakʼ tenen, patanulule. Adeice arye sikda, na mapu unyak nang nirya arye, na si bikina ap, na si erena ap, wininamaniake,’ tenenune. Bukni, na mapu sikce, na yupu kum kekeninyake. Allah arye nyabuk.
Nyabukce ayupu ton nyapdeipnuk. “Israel ninye ‘Anggunda ‘Naʼ tenen, ninye unamak’ tenen, naryuk wipdeiamsise. Anya arye anggunda, ‘Naʼ tenen, ninye ululume. Ninye arye wa wibuka koubikiba, kouamice ning nong upliba, weik arye kanye deibuka lilamak touk, narye anggunti minopce wibuka deiamsisa ati, narye anggunti weik arye kanye deipsise. Ati ara, anggunda na kanye deilin nang unyak tenesunune. Utenesununa ati, yata mutuku ninye do, yuk mutuku nang arye, anggun dam ikin ning deipsikirye, ‘Opnamap’ tenen, pirilamsika babye, narye aninye ati, kanye imun ning weik arelamsiba, imun kanye bobuka ulamik. Israel ninye ati, ikin ning deilisinyak ninye ara, narye sik anang dam, ikin ning sik nong deice deipseba, kanye imun ulamik. Aning ara dipkoprob na Allah Yahweh arye akunum nyapsine.” Allah arye nyapnuk. Yeremia birye nyabuka sekuk.
Atalak ara, narye anggun apu yapu melibuka boyangalamsirye, nyapse yupu ara, ani. Nara, anggun ni koproba Allah ununa anya arye, narye nyasinye yupu uk kekepmunce, moubuka talinamlume. Narye nyasinye yupu talibuka winimunyeura, narye anggunti, pia melinamsine. Adeice arye, ‘Anggunda, na mapu koprop unamlume,’ nyalamse. Tonda, narye anggunti, “Abisik binamlume, abisik kum binamlume. Aninguk wininamlulume. Aning ara, pia kum wininamlume,” nyabuka nyalilamse yupu, ‘Dipkoprop ninguk winipmunyopura, anggun wininamlum ning nirya ara, telebuk unamsile,’ nyalamse. Na Allah arye, anggun apu yapu ati, ayupu uk nyalamse. Winilamsi buk, ayupu kekebuka yangalamik talak ara, pia telebuk winipnin yangalamik.
Ance Israel ninye nirya ati, nyapnamlyame. “Anggunda, malye winin ning nirya batakuka, diksukumuk winimunce, telebuk unamlulume. Nara, Yahweh unune. Nara, anggun ni Allah, malye ning ara, tonok babye kum uniliba, diksukumuk winibuka, teleb unun touk, anggun babye, malye ning nirya batakuka, diksukumuk winibuka, teleb unamlulume.
Kanaan mutuku noutam ulamik nang ara, malye winin ning weika arye wininyaka ati, ‘Anang ara, na pia like,’ tenelamse bukni, narye, “Anggun Israel nang ara, aning-aning nirya ubuk mutuku, pia teleb mutuku arepnamsine,” nyabuka, nyalin yupu nyapdeiamse mutuku ara, wini talak ara, arepsine. Ati amutuku ara, anggun pia talibuka unamlume. Na dipkoprob, anggun ni Allah Yahweh unune. Yuk nang yala-yala nirya, im sirik, mutuku sirik nirya, daunyak mutuku noutam arye, wilibuka anggun tonok arepnamsine.
Deiyok ara, ani. Na mapu anggunda, yuk mutuku im sirya, mutuku sirya nirya unyak nang arye, talibuka unyak mutuku noutam arye, anggun Israel nanguk, yuk-yuk bokuka deipseba, telebuk unamlume. Amutuku noutam unamlum talak ara, na mapu koproba, pia teleb nang unamlume ati, anggun nirya pia malye ning ton, winina kumce, teleb asa uk unamlume. Ara, nara anggun ni koproba Allah Yahweh unune. Nara, malye winin ning tonoknye babye, na dam pia kum ulula ati, nara pia etekdopnye, pia teleb leknye ununa ati, anggun babye, na unye touk, malye winina kumce, pia teleb etekdop lek nang unamlume.
Bukni, Harun el yala nang bukni, anyapmasin uk talilamliba, sik nong bol malye wamlye nang ara, na Pia Teleb Lek Aik pum tam, yuk-yuk wilibuka dona ati, cang kain lapkwecamika dam ara, kum binamle. Tonda, Israel nang, sik malye wininyak ning kilina ati, kam ning opnarye, uku dongon ning, el si mesba deibikak ara, aning dam kum yanganamnyake. Deiyok ara, sik nong bol malye wamlye nang arye, na pia teleb lik ning nirya dam yaceura, malye ulinyaka ati, nyapne. Nara, Allah Yahweh unune. Na Allah arena ati, kintinibuka deiamik aik bitinye ap, anyaik pum tam wilibuka deipse pia teleb kibuka lek ning deipseba, aning nirya ara, pia teleb lek ning ulule. Ati ara, sik nong bol malye nang arye, anyaik ap, anyaik pum tam ulye ning ara, uk diliba, nong bol malye wamlye nang arye, anyaik pum tam ning ‘Bol pipmace deice arye, malye kilinyakʼ tenen, nyapsine. Ati, anyaik dam kum yanganamnyake. Nara, anggun ni koproba Allah Yahweh arye, nyapsine.
Ara, talye ati kume. Ninye mutuku-mutuku nirya aulamik bukni, anoutamak arye tonok yala nanguk, sik Israel nang ati, na Allah arye wiamsise. ‘Na tenena ninye unamak’ tenen, anggun wiamsise bukni, wini talak ara, anggunce tuba malye winin ninguk, pia weik arye tuba ululumba, elisunune ati, dipkoprob narye anggunti, weik arye wenebuka opnamsine.
Ayupu ara, talye ati kum nyapsine. Anggun Mesir mutuku noutam ulalum bukni, amutuku batakuka, bisik noutam yangalalum talak ara, na nyalin yupu deice arye nyapdeipse. Ara, ‘Narye anggunti, pia kalikuka melinamsine. Melinamsina deice arye, na si eren aik punubuka donamnulume,’ nyabuka, nyalin yupu deice arye, anggun dam akunum nyapdeiamsise. Ati, wini talak ara, ‘Se yata wiripnusiyak do?’ tenen, anggun kanye talimauk, dina kume. Na aryuk melinamsine.” Allah arye nyabuk.
Sik anang nirya, tabakuka adiparyuk, Musa ap, Harun ap, sik dam biyik. Biyikce, nyabik, “Musao, ance tonap kum winipnulyame. Akunum winipmalame. Yata deiyok ati, Israel ninye ara, ‘Malye ning nirya batakmunce, pia lek teleb nanguk unamlume,’ nyabuka, tupa-tupa nyasilyam do? Nun nirya ara, Allah el kanye delin ninye akunum unyabe. Tonda, nun ni koproba, Allah Yahweh, nun kan-kan aulule. El si eren aik ara, nun unyap noutam ulule. Aning ara, anda yata deiyok ati, an bidamnye binyuk, erepdeipdalam do? Aning ara, “Israel ninye nirya, sik deice tam unune. Sikda, mitik mambul bukni, ‘Nara weik mambulnye ununeʼ tenen, erepdalamce, maknya kintinipdalam do? Yuk nang ara, an atonunye kum unyaka ati do?” nyabuka wenebik.
Na kayapo, malye unyaba ati, Allah arye adiparyuk talye wenebuka oplopsutu bukni, weik arye bico tenesulule. Bico tenesilirye, pia teleb kibuka melisulule. Aning ati ara, minop talak Allah el si erena ati, kam ning obuka arilamik touk, ‘Anggun kanye talima ap, nong ap nirya ara, Allah ati arepmunce, diksukumuk unamlum’ tenen, mikip arye nyapsine. Wininamlum ning ara, talye yupu deiceuk nyabuka, nong bol deice atonun una kum bukni, anggun kanye talima pum tam ara, dipkopropa pia diksukumuk umunce, ‘Allah el pil dobuka, el siuk erenamnap’ tenen, unamlume. Winibuka upmunyopura, Allah arye kanye delinamsile.
Yatanye birye do nirya, el nong koprop bukni, Allah el aik ati, malye winililulba, el nong malye uplyopura, Allah arye anye biti, wenebuka oplopnamle. Ara, talye ati kume. Deiyok ara, dib nong ara, Allah el aik atonun ulula anya arye, anggun nong ara, pia mambule. Allah arye nunti, ‘Na ning’ tenen, akunum wipdeipsuke. Winipmanto yupu deice arye, “Nunda Allah el aik unyabe,” nyapmasina ara, dipkoprop ayupu el nong ara, anggun dib tenelulum ninye, anggun kanye talima ap, anggun nong ap ati nyapsine. Aning ati ara, anggun malye winilana bataklulume. Kanye moupnamlulume.
Tonda, yata yala ning do nirya, talye el yuk dipmalye ning ara, kum dobuka dinamlume. Bukni, talye el yuk dipmalye ning aupmalyopura, anggunce aning dobuka, anggun kan-kan yanuka unamak ninye asik nang ara, atonun upmalye ning ara, arepmunyeba, sik ninye asik nang ara, aning dobuka dina telebe. Akumopura, adipmalye ning ara, anggunce dobuka, anggun ap ulamlum ninye asik nang dam dekena ara, teleb uka. Anggunda Allah Yahweh arye, ‘Anang ara ‘Naʼ tenen, nang unamakeʼ tenen, akunum wepsukce, el mapu koproba kipdeipsuk nang anya arye, ato malye ning ara, kum dobuka dinamlume. Tonda, kil domba basam do, kil kambing basam do, sik moum yung dobuka, mek makau pum dikdongopmunyopura, abasam arye deipmakce mapu dobuka, kum yupnamlulume. Tonda kum dinamlume. Musa birye, sik Israel nang ati, nyabuk.
Anggunce el nyapdeiamsuk yupu moubuka kekepmunce, pia winipmunyopura, anggun Israel ninye ati ereipsiliba, ninye nirya arye, ‘Se, anang ara, sik mambul weike. Allah elda pia telebe,’ nyabuka, Allah el si erenamake. Allah arye, ninye ayala-yala nirya, weika arye kwepdeibuk bukni, yuk yala ninye im sirya, mutuku sirya nirya ara, mitik mambul unyak bukni, anggun Israel ninye ara, Allah arye ereipsiliba, weik mambul ninye unamlume. Wininamla ara, talye ati kume. Ara, ‘Israel ninye, ‘Naʼ tenena ninye unamaka ati, sikti, wipdeipnamne. Sik ti konop nang nyanamake. ‘Sik ti, yuk mutuku nang arye si dopnamake’ tenen, Allah el si Yahweh arye wiamsuke. Aning nirya ara, Allah arye, anggun apu yapu ati kunum, “Wininamne,” nyabuka, nyapdeiamuk touk, winipnamsile. Musa birye Israel ninye ati laka nyabuk.
Allah Yahweh el tibuk, mikip arye talimunce, el Allah Yahweh arye, “Aning ara, wininamlume. Aning ara, pia kum wininamlume,” nyapdeibuk yupu kekebuka wininamlume. Winipmunya deice arye, anggun si erelulum Allah Yahweh arye, “Anang ara, ‘Naʼ tenen, nang unamaka ati, anggunti wipdeipnirye, pia melinamsine,” nyabuka, nyalin yupu deice arye nyapsuk ning atouk, anggunda Allah el mapu koproba unamlume. Ati, Allah arye nyalin yupu deice arye nyapdeiamsuk atouk, pia telebuk unamlume.
“Narye, ‘Talye ning si erenyak ning nirya, adiparyuk dakuka, uku dapnamlulume,’ nyapmasina deiyok ara, ani. Ara, anggun ni koproba Allah, el si Yahweh arye, akunum wipdeiamsuka atia. Anggunda, el ‘Naʼ tenen, ninye ati ara, yuk talye ning do, Isa Mutuku Dongonye do, aning-aning nirya ati, si kum erenamlume. Allah el siuk erenamlulume. Allah arye, ninye im sirya, mutuku sirya nirya ati, bico tenelul bukni, anggun Israel nang ati ara, weik arye bico tenesilirye, anggun diamuk ati, ‘Na tenena ninye dipkoprop’ tenesulule. Yuk ninye ton kume.” Musa birye, Israel ninye ati nyabuk.
Anggun babye, kam keil atonun ululuma anya arye, Yesus ap kanye dukdongobuka ululum talak nirya ara, el dopropsilirye, aik atonun dobuka teleb updeipnamsile. Tonda, ‘Allah ap, malye winin ninye ap, ansinibuka neika utibye’ tenen, ansinilina deiyok nang ati, Allah arena deiyok nang atonun kilisulule. Winisilyopura, Yesus Kristus ap, talima dukdongobuka diksukum umunye deice arye, Allah ati teleb ning arenamlume. Ara asing elinyap ning kum bukni, tonda nong kipman talye ning ati arenamlulum bukni, Allah arye, ‘Aning teleb,’ tenelye ning uk, anggun kanye talima noutam arye arilulum ning, elti, arenamlume. Winipmunyopura, kanye delinamsile.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Lyepsuka deiyok ara, ‘Na ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, Allah el yupu kekenamak’ tenen, Yesus teleb updeipsukba, Allah arye, ‘Anggunda na tenen ninye’ tenen, talisulule. Ati, ‘Ninye nirya arye Yesus el siuk pia erenamak’ tenen, Allah moronune. Ninye im sirya, mutuku sirya nirya arye, Yesus ati, “Elda weik mikipnye ulule. Dotalak nirya ara el siuk weik arye erenamabe,” nyabuka, ‘El ti si pia erenamak’ tenen, ‘Se,’ tenenune. ‘Aning ara dipkoprop nong upnamle’ tenen, “Amin,” nyapsine.
Sik minyuma talak kam buknamak ninye ara, Allah arye teleb updeipliba, pia kanye deibuka unamake. Sikda pia mambule. Allah arye aninye ati webuka deiamuk ati, sikda malye winin ning tonok babye kum talinyakce, pia diksukum ninyeuk unyake. Aninye ara, Allah arye minyuma talak kam bukeipnamle. Bukni, yuk malye ninye nirya ara, dipna bitinye talak ton dipnamak bukni, atalak minyuma kam bukuka unamak ninye ara, like bitinye talak kum dipnamake. Telebuk pia kam unamake. Sikda, keting tamun yupa weik 1.000 tahun deice arye Allah ap, Kristus ap, sik amu tam buknamak bukni, sik bitinye ap, aninye ap ninye deiyok ning talibuka, aning-aning nirya talibuka unamake. Sik aninye ara, Allah el mambul pil don nang pia unamake.
Ance dekuka lyeplum ninye nirya ara, “Nun ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, ‘Allah el yupu kekenamak’ tenen, teleb kipdeiplume. Teleb kipdeiplumba, Allah arye, ‘Sikda na tenen ninye’ tenen, aninye nirya talilule. Talilirye, sik dobuka, ‘Weik ninye deiyok nang unamak’ tenen, ninye deiyok kina ati deiyok ning areplumba, tukwak mutuku nirya talibuka unamake,” nyabuka mot nyanmekba, kekepse.
ကြော်ငြာတွေ