Ayupu nyapdeipmakin yupu ara, an unalam talak ati, kum nyapdeipmakin. Ara, oketeng tamun, oketeng tamun weike, pia doyanamle keting tamun noutamak nirya ara, kum bataknamne. Narye nyalin yupu nyapmakin ning ara, pia yupu ati nyapkine. Narye anti talikiniba, na si pia erenilyam touk, ance deipminyeba, dadeipdanin banamak nang, ayala-yala nirya pia talipniba, sikce na siuk erenamniyake. Sik nirya arye nati, “Nun ni koproba Allah ara, an uka,” nyaniceura, aninye ati, narye pia talinamne.
Keluaran 15:2 - Eipomek2 Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe. အခန်းကိုကြည့်ပါ။ |
Keluaran 15:2
64 ပူးပေါင်းရင်းမြစ်များ
Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame.
Allah ance, ‘Anye bira Raja unamle’ tenen, wibuka ereiyamnulumnye biti, meliamnuluma deice arye, na mal olan nang nirya, opnin balamsa ani, Israel ninye yala nirya ati, sik ninye deiyoknye Raja una ati, tuba tamubuka ereipnulume. Tonda Allah ance, ‘Anye bira, Raja Israel unamle’ tenen, bico tenebuka wiamnulumnye bira, na Daud biti, batakana pia kum aryuk, tuba nati, teleb ubuka melinilyame. Tonda, na ap, na mapu silip ap, dadeipdanin banamak ninye nirya ap ati, batakana pia kum aryuk, bico tenebuka winisiminba, telebuk pia unamake. Ayupu nirya ara, Raja Daud birye, mot sebuka, Allah el si ati erenmokce, nyabuk.
Morobukce ayupu ton nyabuk. “Bukni, dipkoprob Allah anda atukwak mutuku noutamakuk ulamtum do? Kume, im deice babye weik mutukue. Tonda im deice pia eitam babye, dinap weik aulul bukni, Allah anda amutuku babye, kum suktalipnamtume. Anda weik mambulnye biti nyapkine. Ati ara, aning atonun, na dopse aik ara, pia mitik aik dopse ati, anyaik pum tam babye kum uptume. Anda tonok sukumuk kum ulyama ati nyapne.
Allah el si Yahweh ara, nun ninye nirya, nun deiyoknye, nun ni Allah usulule. Allah arye, “Aning ara wininamlume, aning ara pia kum wininamlume. Teleb ning ara ani,” nyapdeiamsuk ning ap, tuba nyasulul ning ap, ayupu ara, tukwak mutuku noutam, mutuku sirya im sirya nirya unyak nang dam ara, pia daunamle. Sik nirya arye, aning nirya bikinyake.
Deiyok ara ani. Ara, ‘Minop talak ara, na ni Allah Yahweh, el si eren aik kintinibuka doptinyeʼ tenen, pia patapnile. Ati anyaik dopnamnarya. Allah el si eren aik akunum dopnyeura, atalak ara, kanye deipnirye, na aik koproba ton, tamubuka wektinirye, na aik noutam maptinye. Allah anda, aning-aning nirya talibuka, pia deice tam umince, Pia Mikip Weiknye ulyamnye bira, nun apu koproba Yakub biti, pia melilamlume. Ati, na kanye ara, an si eren aik minop doptinyeura, aminyan talak, na aik koproba wekna teleb uka. An aik min kum dopnyeura, na aik koproba kum wektinye,’ tenenune.
Winibuka unyak bukni, narye Yahweh ati, “Naio, anda na si erenun Allah, an tonok ulyame,” nyanune. “Ance aning-aning nirya talemince, mikip weiknye ulyame ati ara, an ara na deiyoknye ulyame,” nyakinune. Ati ara, na ni Yahweho, narye anti morokunun yupu nirya ara, ‘Kekepnimince, minop yanuka, melipnamnilam’ tenen, moropkine.
Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.
Allah Yahweh arye, el tenen nang, nun Israel nang nirya ati, elcuk, mikip kilisulule. Tonda, Allah arye, ‘Anye bira, Israel yala nang nirya talibuka, sik ninye deiyoknye, Raja unamle’ tenen, wipdeinuknye biti, melibuka lyelonulule. Weik mutuku yangan keil dam duknupnirye, kanye deibuka ulamne atonun, Allah arye na weipnupce, tuba kalikinulule. Raja birye, Allah el dam ulya deice arye, yuk nang arye elti, malye kum kipdeiptinge.
Na kanye talima pum tam nirya arye, na ni Allah Yahweh ati, ‘Elda pia telebuk winilule. El winilul ning atonun ning, yuk nang arye ton, pia kum wininyake. Elda tonoknye ulule,’ nyabuka, el si pia erenamne. Winipniba, ikin pil arukunyakba, imun kanye bobuka unyak ninye kekebikirye, sik babye, pin-pin kanye bobuka, unamake.”
Tonda, anyasik noutam donyaka dana-dana tam, antanap dongobuka, domik cang keil poka ara, dipdelulume. Tonda, sik Yerusalem mutuku nang arye, ‘Nun mal olan nang arye, yanuka opsikcak’ tenen, domik keil aik nirya ara, moubuka eipmunce, dilbinamlulume. Aning nirya winipnamluma deiyok ara, ani. Ara, anggun asukum ululum nang arye, aminyan talak unamak mapu, anggunce deiplumba, deipdanin banamak mapu ati, aning nirya, laka nyanamlume.
Malye unyak yu nang arye, winisinyak bukni, narye an pia mikip weik ulyamnye biti, mot deice arye nyanamne. Tonda, asum-asum nirya, akunum bereklyopura, an si erena ati, kanye kil-kil mot nyanamne. Ara, anda, weik tonun bico tenesimince, ance, ‘Winibuka pia telebuk kilinamsine,’ nyabuka, nyalin yupu deice arye, nyapdeiamsulum ning ara, aning tenebuka, mot deice arye nyanamne. Amot ara, talye ati kum nyanamne. Deiyok ara, an mikip weik deice arye akunum pia melibuka kaliklamnuluma ati, mot nyanamne. Winipmanto ara, ‘Nun mal olan nang arye opsikcak’ tenen, ninye arye weik keil arye, deibuka donyak keil aik atonun, akunum winilamnuluma ati, mot nyanamne. Tonda, ‘Yu nang arye opnikcak’ tenen, imun kanye bobuka, unmanye talak ara, duknuptiniba, yu nang arye, kum opnitinga atonun akunum winilyama ati, amot ara, nyanamne.
Nun nirya arye, nun ni Allah Yahweh aning-aning nirya talibuka, weik mikip ulya deiyoknye ulule. Tonda, nun mal olan nang arye, ‘Opsikcak’ tenen, Allah arye nun nirya ati, lobuka lyelosulule. Ati na ning ara, Allah Yahweh ati, “Naio anda pia telebuk ulyame,” nyabuka, el si uk erenamabe. Tonda, Allah arye asum-asum nirya, nun ikin usulul ning ati, eibuka, melisulule.
Nun Israel yala nang nirya arye, Allah Yahweh, el siuk erenyaba ati, elti, ara, “Naio anda pia telebuk ulyame,” nyabuka, el si tuba erenamabe. Tonda, winipmanto ara, dikdik sena ati, el yan erebuka delilula dam, anggun nirya arye, kutam tuku deice dipdongobuka, kisok kanubuka, el siuk erenamlume. Nun ni koproba Allah, elda pia yuke. Malye winin ning tonok babye, pia kum winilirye. Teleb, lek dem ulule.
Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.
Nyabikba, Musa birye tamubuka sikti, nyabuk. “Anggun ilil una kum asa, anggun tikmunce dinululume. Arup ara, Allah el si Yahweh arye anggun lyena ati winipnul ning eibuka kel biknamalume. Ati ara, anggunce Mesir ninye arup eipnamaluma ara, anggunce yuk talak tonap kum eipnamlume. Nirya dipnamake,” nyabuk.
Nyabukce, Allah arye Musa biti, ayupu ton nyabuk. “Nara, an apu yapu Abraham ap, Isak ap, Yakub ap ati, sik melipnin yangalamsinye bira, na akunume.” Nyabukura, Musa arye, ‘Se’ tenen, el urasin lelipdobuk. Winibuka deiyok ara, ‘Kume Allah ara, na ilil’ tenen, ‘Kum eiptinye’ tenen, lelipdobuk. El ilil weik ubuk.
Winipnye talak ara, dopropsinirye, anggunda na mapu koproba unamlume. Nara anggun ni koproba Allah unamne. Winipnye deice arye, anggun biknumunce, ‘Se dipkoprob Yahweh, elda nun ni koproba Allah usulule. El mikip deice aryuk, Mesir mutuku ikin pil dolamupu noutam arye akunum lyepdopnamsil’ tenen, biknamnululume.
Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.
Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.
Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.
Na Allah Yahweh im deice bukuka ununye birye nyapsine. “Winipmanto ara, tukwak mutuku ninye deiyok nang arye, weik bun ning deice bukikirye, yupu bokolilamak touk, nara, im deiceuk, pia bukuka unune. Im deice ununa anya arye, tukwak mutuku ara, yan dikdik sena ati delilamak touk, unune. Ati, yata wiribuka aik doptumba, anyaik pum tam dikdik sebuka uptinye do?”
Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.
Winipnin balalum talak ara, ance, ‘Na tenena ninye unamak’ tenen, wipdeiamlum nang, an mapu atibuk, ‘Lyepropnamne,’ tenelamsulumce, lyepdopsulume. Ara ance, ‘Aninye ara, na ning uka’ tenen, wibuka deiamsulum nang ati, wibuka dopropsulumce, lyepsulume. Winipmunye talak arye, sik pia malye-malye weik winilamik ninye, sik ninye deiyoknye bira, weik arye weneplume. El taleamuk ning nirya ara, uluploplumce, el taleamuk ning nirya, akunum sirya dakuka, kum kipdeiplume.
Winipnamne talak ara, ayupa winilye ara, tonok bokuka seper tiga, ‘Naʼ tenen deipnamne ning ara, lyebuka deipnamne. Sik alyebuka deipnamne nang ara, pia teleb lek nang kipdeipnamne. Winipnamne bukni, winina ati ara, ‘Teleb unamak do, kum do?’ tenen, ikin ning arye, anang nirya piripdenamne. Winipmanto ara, dekna weik kat ning, el si perak dobuka, ‘Malye ning kum uplyeba, teleb ninguk lak upnamleʼ tenen, uku dongobikceba, uku diplyopura, pia teleb ninguk lak ulule. Aning atonun, dekna weik kat ning emas ati, ‘Malye ning kum uplyeba, teleb ninguk tuba unamleʼ tenen, uku arye pirilelamle touk, sik anang babye, ‘Teleb wininamak do, kum do?’ tenen, piripdenamne. Winipnyeba, sik anang nirya arye, nati “Nun ni Allah melipsilyame,” nyabuka moronamake. Winikceura, narye sikti, tamubuka nyanamne. Narye sikti, tamubuka nyanamne yupu ara, ani. “Anggunda, na mapu koproba ululume,” nyapnamne. Winibuka nyapnyeba, sikce tamubuka nati, nyapnamniake. “An Allah Yahweh ara, nun ni Allah ulyama ati, an siuk erenamkiabe,” nyabuka, natibuk si erebuka kinamniake.
Allah arye amambul pil dobuka, el Mi Koprop ati aribuka deiyok ara, ‘Ninye mutuku-mutuku nirya, nati si erebuka, na si kilamniayak atonun, na Mi Koprop ati atonun, si erebuka el si kipnamake’ tenen, yupu bokolina deiyok pil ara, el mi koprop ati aribuk. Ati, yata ninye do nirya, Allah el Mi Koprop ati si erebuka, el si kum kinyak ninye ara, wininyaka deice arye, Allah el babye ati si erebuka, el si kum kinyake. Yesus arye sik Yahudi yala deiyok nang ati nyabuk.
Nun peterenyap yupu ara, ani. Allah ap, ninye ap insinibuka teleb una ati deiyok yupu ani. “Ara, Allah arye tukwak ninye nirya, sik malye wininyak ning ati, ‘Namin kibuka kum daneipnirye, ila tamubuka ton kum tenepnirye, sik malye ning ati kum wenebuka opnamne’ tenen, Kristus dopdeipsukba, Yesus arye el ninye lyena pil dopsuka deice arye, Allah arye ninye mutuku-mutuku nirya ap, el ap ansinibuka neika teleb ulisulule.” Ayupu nirya laka nyabuka laka peterelbana ati, Allah arye nun wibuka deipsukbuk, apil talibuka donyabe.
Ara, anggun Efesus mutuku ninye babye aning atonun, Kristus ap, kanye talima dukdongobuka ulamunyopura, Allah arye anggun ap, yuk dib tenenyak ninye nirya ap dobuka, tonok aik nong atonun kilisululce, dukulongosulule. Anyaik pum tam atonun ara, nun talima ara, Allah El Dib Kanye arisilibuk, wekuka usilya deice arye, Allah el babye, nun talima pum tam usulule.
Anggun ni koproba Allah ati, ‘Telebe,’ nyabuka, el siuk erenamlulume. Allah arye anggunti, mikip weik deice arye, ninye kum winipmanto ning ap, mambul ning ap, melibuka pil dolamsuk ning nirya ara, minop talak arye elilamlume. Wini talak tuba ululba, anggun asing arye elilulume. Ati, ‘Telebe,’ nyabuka, Allah ati kanye deibuka, mot nyanamlume.
Tonda, yata mutuku ninye do nirya, ninye mutuku-mutuku nirya, Yesus el si kekebikirye, “Yesus Kristus elda, Weik Ninye Deiyoknye Allah ulule,” nyabuka lakak nyapnamake. Anyapnamaka deice arye, nun ni Allah, el si weik erepnamake. ‘Allah ara, weik mambule,’ tenepnamake. ‘Winipnamak’ tenen, Allah arye, Yesus ereipdeibuk. Na Paulus arye, nyapsine.
Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame.
Ayupu nirya Kekepsopura, im deice tam noutamak arye, ninye yupa pia weika arye, yupu weik arye nyanmekba, ayupu tonap kekepse. “Haleluya, nun nirya arye, Allah el siuk pia erenamabe. Nun Ni kopropa Allah pia telebuk ulule anya arye, el dirina ara pia weik ulule. Ninye Lyena Deiyok ning ap, weik Mikip Deiyok Ulul ning nirya ap, el deiceuk ulule. Elda Weik Erenanye ulula ati ara, nun nirya arye Allah el siuk pia erenamabe.
Winibikopura, mek si, Kison mek pu tam arye mek deibuka obukba, bental weik ubuka arye, sik kuda basam arye lipdakuka tuku deice balamuk ning ara, kum binmanto ubuka ati, anang obuka sirya dakik. Aning ati, nun kanye talima ara, ilil una kum diparyuk, mikip arye, ‘Nun mal olan nang ati dobolbinamabe,’ tenelamuburye, anang nirya dobolbinuka obuka sirya dakupu.
ကြော်ငြာတွေ