Na nio, anda Yahweh ulyame. Aning-aning talibuka, deice tam Weik Erena Deiyoknye umince, an tenelyam ning nirya, ninye winipmanto kum pil dolyamnye. Yuk tukwak mutuku nang noutamak, an atonunye ton kum ulule. Anda Allah tonoka, Yahweh ulyame. Yuk nang ton nyanyakba, nun amul arye, ton kum kekenyabe. Yuk Allah ton pia kum ulule. Ati, nun kele, nun ni Allah atonunye, ton kum ulule, an tonoka.
Keluaran 15:11 - Eipomek11 Yatanye do? Ninye arye, ‘Aning ara Allah atonun’ tenebikirye, yuk ning si erenyak ning nirya ara, an Yahweh uminya atonun kum uptinge. An winilyam touk, yuk Isa Mutuku Dongonye, sik mikip koproba deice arye, kum winiptinge. Tonda, yuk nang nirya ara, an winiminya atonun kum wininyake. An tonok ara, pia diksukumuk ulyame. Pia telebuk ulyame. Pia telebnye, dirina weiknye umince, ninye kum winipmanto ning, mambul pil, ninye winipmanto kum pil weik dolyame. Yata ning do nirya, an winiminya atonun kum wininyake. အခန်းကိုကြည့်ပါ။ |
Keluaran 15:11
51 ပူးပေါင်းရင်းမြစ်များ
“Na ni Allah, an si Yahweh ati, an si erepkine. Na nio, Israel ninye ati pia kalikuka melisilyame. Nun deiyoknye an tonok ulyame. Im deice babye, tukwak mutuku babye, an atonunye ton pia kum ulule. Anda Allah tonoka. Anti pia tuba diba tenekinyak nang arye, yuk talye ning patana kumce, an nyalyam yupu moubuka talibikirye dobolbanyak nang ati ara, ance pia bico tenesilyame. An amu tam unyak nang ati, ‘Wininamsine,’ nyapdeiamsulum yupu ara, dipkoprob tuba winisilyame. Ati tukwak mutuku babye, im deice babye, an atonunye ton pia kum ulule.
Ayupu nyanamluma deiyok ara ani. Yuk nang mutuku sirya im sirya nirya kekepnamaka ara, talye ati kume. Deiyok ara, Allah el si Yahweh pia ilil weiknye ulula ati, el tibuk pia kanye deibuka, weik tonun winilinamabe. Yuk talye ning ap, isa si ap ati, ninye tukwak nang arye, ‘Nun ni koproba,’ tenebikirye mambul tenen, atalye ning ati, si erebuka unyak bukni, Allah ara aning-aning nirya deice tam talibuka ulul ati, ilil weik uliba, elti, si erenamabe. Ara talye ati kume, talye isa mer nirya ara, amu tamuk ulule. El Allah ara, aning nirya deice tam ulule. El tonok ara, mambul weiknye ulul ati, teleb aryuk el si dem erenamabe.
Na teninun ning ara, Allah Yahweh el si eren aik ati, narye dopnamne ning ara, weik aik ap, tonda pia urasin teleb kibuka dopnamne. Winipnamna deiyok ara, yuk nang im sirya, mutuku sirya nirya arye, ‘Nun ni koprobaʼ tenen, yuk talye ning ap, isa ati si erenamak ning ara, talye ulul bukni, nun si erenyap Allah ara, weik mambul ap, mikip weik ap ulule.
Raja Salomo birye morobuk ning ara, ani. “Na ni Allah Yahweh, an si erepkine. Na nio anda nun Israel yala nang nirya ati, kalekuka melisilyam touk, tuba melisilyame. Nun deiyoknye, an tonok ulyame. Im deice ap, tukwak mutuku noutam ap ara, an atonun pia ton kum unyake. An Allah tonok ulyamak, ninye nirya arye antibuk diba tenekinyake. Yuk talye ning ton patana kumcuk, an nyasilyam yupu uk moubuka talibikirye, sik kanye talima nirya ara, teilintona kumce, an yupu dobolbanyak nang ati, ance pia bico tenesilyame. An amu tam unyak nang ati, ‘Weik tonun bico tenesiminya ati, wininamlume, aning ara pia kum wininamlume. Winipmunyopura, narye kalekuka melisinirye, pia teleb kipdeipnamsine,’ nyabuka nyalin yupu deice arye nyapdeiamsulum yupu ara, dipkoprob tuba usulule. Anda, aning pia batakna kumce, tuba kalekuka melisilyame.
Ara, aning-aning yala nirya kwepdeiamuka deiyoknye ulirye, elcuk pia mambul weiknye winilirye, dopmanto kum pil ap, ninye kum winipmanto pil ap, dolule. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye, el tibuk si erebuka kina ati, ‘Naio nunce anti, pia telebe nyabuka,’ nyanamabe.
Allah Yahweh, ance tenebuka, winiminye ning nirya ara, pia diksukumuk winilyame. Malye winin ning tonok babye, pia kum winilyame. Ninye nirya sik wininyak atonun, moubuka tenemince, diksukum yupu uk, nyabuka lipsisikuka bokolisilyame. Tonda, tukwak ninye nirya ap, kam ulul ning nirya ap, Allah ance kwepdeialum ning nirya ati, Allah ance pil dosilyame. Winisiminye ning nirya ara, ance pia bico tenesiminya deice arye, teleb ubuka pil domince, melisilyame.
Ati ara, Allah Yahweh elti, diba tenebibirye, elti, ilil usilye ninye nirya arye, el siuk erenamabe. Tonda, nun apu koproba Yakub birye deibukba, dadeipdanin yanganyap nang nirya ara, Allah el siuk, erebuka kinamabe. Aning atonun, nun Israel yala ninye nirya arye, nun ni koproba Allah ati, “Elda weik mambule,” nyabuka, el siuk erebuka si erenmabe.
Kanye deipnopura, na ni Allah, anda Yahweh ati, nyanamkine. Ara, “Se, Yahweh, anda pia teleb winilyama ati, yatanye birye ton, an winilyama atonun winiptu do? Kume kum winiptinge,” nyabuka, an si erenamkine. Mikip weik unyak yu nang arye, pia mitang unyak nang ati, akunum tomobikcopura, sik talye bona uto-toa talina kum nang arye, pia kum lyepdatinge. Bukni, dipkoprob an Allah Yahweh arye, sik mitang nang ara, lobuka lyelolyame. Atonun ton, sik bona nirya kum talikirye, pia mitang asa unyak nang ara, yu nang arye anang ati, obikirye, yanibikcopura, an Allah Yahweh aryuk, ayu nang opmince, sik talye bona uto-toa talina kum nang ati, lobuka lyelolyame.
Tonda, yuk-yuk nang, sik Mesopotamia mutuku Aram nang ap, tonda sik Zoba mutuku nang ap arye, ‘Israel nang opnuyap’ tenen, mal olyangalamik talak ara, Daud birye ayupu sekuk. Tonda, Daud el yin talin nang, sik deiyoknye, el si Yoab birye, Edom tam nang, yupa weik dua belas ribu (12.000) nang ati obuk talak arye, aMazmur yupu sekuk. Yoab birye anang obukak ara, lu weik mutuku, el si, ‘Asing Palin Lu’ nyalamik mutuku noutam arye obuk. Daud birye nyabuk yupu ara, ani.
Se nun ni Allah, ance winilamlum ning nirya ara, malye winina kumce, pia dipkoprob teleb piluk dosilyame. Yuknye birye, tonok ning babye, ance dipkoprob pil dosiminya atonun, kum doptue! Nunce si erekinyap Allah ara, an tonoka. Yuk Allah ton pia kum ulula ati, an atonunye ton, dipkoprob pia kum ulule. Allah an tonok ulyame.
Mikip weik kum yayukce, kumanya weik dobukba, amutuku palamuk ning nirya, lokuka pounmokce, bebeya lakuka piripna dobuka, amutuku nirya dirina weik ubukce, weik liman lebuka, lelim ton nyabuk. Aning nirya winibuka ati, atalak ara tukwak mutuku sirya, im nirya ara, lulukuka, long-long abukba, lulukunmok.
An siuk erenamkiaka deiyok ara, ani. Ara, ance pia teleb pil, weik tonun ninye dopman kum pil dominye talak nirya ara, ninye nirya arye, ‘Se, aweik mikip pil ara, ouku weikto uptu do?’ tenen, ilil weik upliba, sik kanye deibikirye, pin-pin asa unyake. Dipkoprop, Allah an tonok ulyame, yuknye ton kum ulule.
Yuk yala ninye nirya arye, yuk talye ning ati, Nun ni bira ani,’ nyabuka, isa si erenyak bukni, sik si erenyak ning ara, talye ninguk ulule. Bukni, an tonok ara, dipkoprob Allah ulyame. Ara, anda aning-aning nirya talimince, deice tam erebuka, Pia Mikip Weik Deiyoknye ulyama ati, anda Allah pia mikipnye ulyame! Tonda, an mikip arye weik mambul pil dolyam ning ara, yuk nang arye, ton pia kum winiptinge.
Yitro birye nyabukopura, ayupu ton nyabuk. “Wini talak ara, ance ayupu nyapmanilam deice arye, dipkoprob na akunum bikmane. Anggun ni koproba, Allah Yahweh ara, dipkoprob mikip weiknye ulule. Yuk ninye nirya arye, talye ning yala-yala nirya ati, “Nun ni koproba, nun kwepdeipsuknye,” nyabuka, si erenyak ning ara, talye atibuk si erebuka kinyake. Asi erenyak ning yala nirya ara, Allah Yahweh el amu tamuk unyake. Allah anggun nong deice ulule anya arye, el mikip weik ulul bukni, sik si erenyak allah ara, talye ati wininyake. Tonda aning ara, na akunum kel bikinune. Mesir mutuku ninye arye, ‘Nunda mikip weik nang unyabe,’ tenebuka, kwalilamikce, sik kanye erelan nang ulamik anye, Israel ninye ati, ikin weik ning sik nong deice delilamik bukni, Allah Yahweh arye, “Mesir mutuku nang ati nirya obuka dakuke. Aning nirya winibuka ati, ‘Elda, mikip pia weiknye ululeʼ tenen, akunum bikmane,” nyabuk.
Musa nyabukura, Mesir mutuku ninye deiyoknye Firaun birye, nyabuk. “Ambusum Allah moropnamnurum do?” nyabuk. Nyabukura, Musa birye tamubuka nyabuk. “An nyapmanilama atonun winipnamane. Ara, ‘Allah yuk ton kum ulule. Sik ni Yahweh, Allah el tonok ulula’ tenen, kel kipnamalama ati, Allah moropnamakine.
Nyapmakin bukni, anda malye winibuka, na yupu kum kekepnimince, ‘Israel ninye bana kume,’ nyapminyopura, anggun mutuku noutamak nirya, na mikip deice arye kanye imun ning pia weika arye arepnamasine. Ara, an ap, an pil dona deiyok nang ap, anggun amu tam unyak ninye nirya ap, ikin weik unamlume. Winipnamna deiyok ara, an ap yuk ninye nirya ap, ‘Se, Allah ara, tukwak mutuku im sirya, mutuku sirya nirya noutamak ara, el atonunye ton kum ulule’ tenen, kel biknamnululuma atia.” Allah arye Musa biti, “Ayupu ara, Firaun dam laka nyalbanamlyame,” nyabuk.
Tonda nyalulume. “Anyasululum yupu ara, nun lik ati, yuk tam yupu ton nyanamsululume. Nun Israel ninye ap, Yehuda ninye ap, talibuka usilinye Allah ara, Pia Teleb uk Ulinye birye, wenepnamsil yupu ara, tonap kum nyanamsululume.” Anggun Yehuda yala ninye ap, Israel yala ninye ap arye, Allah na yupu lak lena nang ati nyalulume. Allah arye nyabuk.
Ati ara, sikda yatanye birye Allah el ulul touk uptuba, ‘El anye bira atonun ulule,’ nyaptum do? Tonda, ninye taruk arye puturubuka delilamak ning ara, urasin pia teleb ning babye, Allah asum-asum teleb ulul touk ulul do? Kume, aning ara, dipkoprob kum winipmanto. Allah el tonok anya arye, yata ning ton Allah el ulul touk uptu do? Kume.
Ati ara, anggunda, ‘E, anye bira, Allah atonun ulule,’ teneptum do? Yatanye bira, na mikip ap, weik mambul ap unun touk ulul do? Nara, pia teleb weik Erebuka eitamnye unye touk, yatanye ton, ‘Allah ulul touk anye ton winilule’ tenen, nyapnutum do? Kume na tonoka ati ara, talye tukwak nang nirya ara, na Allah unye touk kum unyake. Ara, winipmanto kum atia.
Ara, minop talak na Allah arye pil dolamseba, winipra yangalamuk ning tuba tonap, aning nirya moubuka tenepmunce, kel kinamlulume. Winipmunce, ‘Allah ara el tonok ulule. Elcuk aning nirya winyamuk’ tenen, na siuk kel kipnumunce, erenamnulume. Ara, na ununa atonye bira, yuk Allah ton kum ulule. Na tonok unune,” Allah arye nyabuk.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Winibuka banmekce, tonye ap, ton yuknye ap, yupu nyalanmekba kekepse. Ara, sikce, sik bidamnye ati, lakuka balsusunmekce, nyanmek yupu ara, ani. “Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyame. Allah Yahweh, anda, malye ning tonok babye kum ukilya ati, anda Pia Telebnye, Pia Telebnye, Pia Telebnye ulyame. Anda dikdik senauk umince, aning-aning nirya talibuka deice tam, Weik Erenanye ulyame. Ati, an pia mambul ap, pia teleb ap, weik dirina ap, uminye ning ara, tukwak mutuku unyak ninye nirya arye elikinyake. Aning-aning nirya elinyaka deice arye, an pia mambul uminye ning nirya ara, laka ululba, eibuka kel bikinyake,” nyanmekba eipse.
Allah el si Yahweh arye, aning-aning nirya kwepdeibuka Deirina Deiyoknye ulule. Allah arye sik Israel yala nang nirya ati, nyabuk. “Yakub birye deibukba, deipdanin balamik nang nirya ara, ‘Naʼ tenen, nanguk unamake. Na mapu koproba unamak tenen, wipdeiamse,” nyabuk. Allah Yahweh, el si ara, “Im deice unyak yin talin malaikat nirya ara, sik deiyoknye ulule,” nyabuka nyanyabe.
Tonda, Yordan mek biyuka, lilun tam, bai tam arye, weik yu singa arye ubuka, domba basam sik maning dilamakak, tikilyakirye olamle touk, na babye, talye karin arye, Edom mutuku yanamne. Winibuka tikilyanirye, sik Edom nang ati, sik mutuku noutam unamakak arye, yakuka dopkwetepniba, sik bikbik abuka bindopnamake. Akunum bindobikcopura, na Allah arye, ‘Anye wibuka deipnamne,’ tenenye touk, amutuku noutam talibuka ulirye, ninye deiyok kibuka, yupu nyanamlanye biti, wipdeipnamne. Aning ara, talye ati kum nyapsine. Na mikip weik unye touk, yatanye ton aulul do? Tonda, yatanye do, ilil tenena kumce, mikip kanye bobuka ululnye birye, na tenepman ning ati, ‘Kume aning ara, kum kiptume,’ nyabuka, yupu seknutu do? Aning atonun, yata ninye deiyoknye ton, na yupu yanipnuturye, malye kipnutu do? Kume, tonoknye babye, pia ton kum ulule. Nara, na tenenye touk wininune.
Ance Israel ninye nirya ati, nyapnamlyame. “Anggunda, malye winin ning nirya batakuka, diksukumuk winimunce, telebuk unamlulume. Nara, Yahweh unune. Nara, anggun ni Allah, malye ning ara, tonok babye kum uniliba, diksukumuk winibuka, teleb unun touk, anggun babye, malye ning nirya batakuka, diksukumuk winibuka, teleb unamlulume.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
“Anggun ni Allah Yahweh arye, anggunti melibuka bobanamsile. Elce menekuka baliba, nunda el aminyan tamuk melibuka banamabe. El mikip weik deice arye, Amori nang, omutuku unyak nang ati, oplirye, sirya daknamle. Tonda, anggunti, el mikip weik deice arye, moubuka kaliksilirye, bobanamsile. Ara, anggun Mesir mutuku noutam ikin weik daulamlumba, Allah Yahweh el mikip weik arye, pil dopsukce, boyanamsukba, anggun asing arye eiamlum touk, wini talak babye atonun, winipnamasile.
“Diba na ni Allah Yahweh, anda aning-aning nirya erebuka, deice tam Weik Erenanye ulyame. Ance mikip weik arye winilyam ning ara, na an amu tam pil donanye birye, akunum elinirye bikinun bukni, weik tonun tonap bikmanto ning tuba aupmal buk, nara, mitik anunuk akunum bikamse. Anda, ninye kum winipmanto ning, minop talak arye deiyok koubuka winilamlum ning ap, tonda anoutam arye kanye imun weik ning winiminye ning nirya ara, ancuk winilyame. Yuk mikip weik ning, allah-allah nirya ap, isa ap, mikip ulye ning ap nirya ara, im deice do, tukwak mutuku do nirya, an uminya atonun ton, pia kum unyake. Ancuk weik mambul pil nirya dolyame.
Nyabukopura, ayupu ton nyabuk. Israel ninye ati kalikuka melilul Allah ara, el atonunye ton, pia kum ulule. El tonoka. Sik yuk yala ninye yuk-yuk Isa Mutuku Dongonye si erenyak ning ara, talye ninguk. Israel yala ninye, sik si erenyak Allah, elda pia teleb, mikip weiknye ulule. Sik ni koproba Allah arye, ‘Israel ninye melipnamne’ tenen, im ap, dua ap, deice arye, yanuka melisulule.
Aning atonun, anggun kel do? Dan mutuku ninye ati, yuk mutuku ninye talilamika noutamak, Allah arye dalubuka lyebukce, yukak bobiyuk do? Bukni, Allah arye anggun Israel ninye ati, Mesir mutuku noutam arye lyebuka boyanamsuka deiyok ara, ‘Israel nang, ‘Naʼ tenen, ninye unamak’ tenen, winibuk. Kume, yuk ninye nirya ara, ‘Allah arye aning atonun winipsuke,’ kum nyaptinge. Anggun Israel ninye uka. Allah arye aning winibuka deiyok ara, ‘Israel ninye ‘Naʼ tenen, nang unamak’ tenen, winibuk. Tonda, Allah arye anggun Israel ninye ati, Mesir mutuku noutamak arye dalubuka dobukapsukce, lyepsuk talak ara, winilina ap, ninye kum winipmanto ning ap, im deice mambul pil dona ap, ninye olana ning ap, el bidamang mikip weik kina ap, el taruk koproba arye mikip weik pil dolamuk ning ap, anirya deice arye, anggunti dalubuka lyepsuke. Aning babye, weik mambule. Aning-aning nirya ara, anggun ni koproba Allah, Yahweh, el bidamang taruk arye, mikip weik ning winibukba, ninye nirya ilil weik ulamukba, anggun Israel ninye arye, aning-aning nirya ara, anggun bidamang asing arye elilalumce, akunum kel bikamlume. Aning ara, weik mambule.
Mem Kwatima Urasin Atonye birye, laut mekwen pum tam arye yanmoknye biti, el mikip weik aribuka anya arye, tukwak mutuku ninye weik arye Mem Kwatima Atonye biti si erelamik. Tonda tukwak nang weik arye, laut mekwen pum tam yanmok malye ning kam ulul ning ati, ‘Se, yata ning nirya ara, el ulul touk ulul do? Kume, el pia yuk ulirye, mikip pia weiknye ulula anya arye, yata ninye arye mikip uptuba, anya biti malye kibuka opnuyap’ tenen, ‘El ti obisipting do? Kume, anye bira kum optinge ati, el si babye erenamabe,’ tenenmekce, el si erenauk ulamik.
Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse.
Akam unyak ning dumbarye nirya, sik yuk-yuk bukni, sik pol ara naku barye ubuk. Sik nong bol deice ara, asing pia weik ubuk. Sik pol amu tam babye asing ubuk. Sik nong ap, urasin ap, anyapmasin touk ubukba eipse. Lukunyan babye, keting noutam babye, batakna pia kumce, tuba-tuba ayupu pia nyanyake. “Minop talak ulamuka ani, wini talak tuba ulirye, aminyan sirya talak yanamlanye bira, aning-aning nirya malye kibuka, aning nirya deice tam ulirye, weik mikipnye ulule. Elda nun Weik Deiyoknye ulule. Elda malye winin ning tonok babye kum ulula ati, pia telebuk pia telebnye ulule, pia telebuk pia telebnye ulule, pia telebuk, pia telebnye ulule,” nyabuka mot senyake.
Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe.
ကြော်ငြာတွေ