Keluaran 14:14 - Eipomek

¹⁴ “Allah el si Yahweh arye sikti, Mesir ninye nirya obuka malye kipnamale. Elcuk aning nirya winilisulula ati, anggunce yata tenebuka winiptum do? Kum ati ara, anggunce kanye lamapdongobuka dinauk unamalulume.” Musa birye Israel ninye ati nyabuk.

Keluaran 14:14 ပူးပေါင်းရင်းမြစ်များ

2 Tawarikh 20:15

Yahasiel birye nyabuk, “Na deiyoknye Raja Yosafat ap, na kayapu nang, anggun Yehuda tam ululum nang ap, Yerusalem weik asik noutam ululum nang ap, anggun nirya ati nyapsine. Wini talak ara, nun ni koproba Allah Yahweh arye nyapsile. Ara anggun ona ati yin talin nang yupa pia weik arye yanganmacak, eipmunyakarye ilil una ap, kanye bokoltona ap, una kume. Deiyok ara, ayanganmak nang ona ati ara, anggun mikip deice aryuk, kum opnamalume. Allah aryuk, anang opnamale.

2 Tawarikh 20:17

Nyapdeipman mutuku akunum wekelbimunyeura, anggunce anang ati, ‘Nun babye mikip arye opdanamabe tenen kum kaleknamalume. Anggunda, anang olana ati kalikmasicak uk binuka dipra buknamlulume. Dipra wekmamunye buk, anggunti Allah Yahweh arye ninye obuka sirya daknamal ning ara, anggunce eipnamlume. Ati ara, anggun Yerusalem mutuku ululum nang ap, Yehuda tam ululum nang nirya ap, anggunda ilil una ap, kanye bokoltona ap, talima dakalsakna ap, una meme. Mapmamunya bereklyeura, mal olanak ara, talye mangkau kanye bobuka weknamalulume. Ara anggunti, Allah Yahweh arye dipkoprob melibuka lyelonamasile.” Yahasiel birye nyabuk.

2 Tawarikh 20:29

Atalak ara, yuk-yuk mutuku ulamik nang nirya ara, “Allah arye Israel yala nang, sik mal olan nang nirya ati, mambul weik pil dobuk deice arye, sik mal olan nang nirya obuka sirya dakle,” nyabikba, kekebikce, Se, yata wiribuka opmal do? Aning ara weik mambuleʼ tenen, ilil weik ubuk.

Nehemia 4:14

Aning nirya moubuka dipdebuka kel biksakarye, tikukapsirye, sik Yahudi ninye deiyok taleamik nang ap, sik mambul weik nang ap, sik talye nang nirya ap ati nyapse. “Anggunda sik yuk nang ati, ilil una kume. Allah atibuk teninamlulume. Allah ara, el mikip pia weik ulirye, ninye arye winipmanto kum pil donanye binya arye, el tibuk tenipmunyeura, ilil kum unamsile. Tonda, ‘Elcuk melinamsil’ tenen, tenipbibirye, anggun yala nang ap, anggun tam nang ap, anggun mapu ap, anggun kilmapu ap, anggun kilapu ap, anggun asik nang ap ati, aning-aning nirya ara, pia pi dobuka unamlulume. Anggun malye nang olana ati, kintinip deipnamlume,” nyapse.

Nehemia 4:20

Pong-pong an ning, el si terompet pong-pong nyabikiba, anggunce lelim kekepmunyopura, ‘Nun mal olan nang akunum yanganmake’ tenen, anggun nirya minop bulupmunce, nun dam yanamlulume. Nun ni koproba Allah arye, nunti melipsiliba, nun mal olan nang ati obuka sirya daknamabe,” nyapse.

Nehemia 9:11

Minop talak, nun apu yapu Israel nang, sik dinmekak arye, weik laut mekwen cepdobukba, tuku mikuka deice ak, koubuka yanamik. Bukni, ‘Israel ninye opnuyap’ tenen, dobolbanmek nang, Mesir ninye ara, an mikip deice arye, mek siklipdongobuka oplume. Ninye arye keil dobuka, weik mek mekwen noutam donokikiba, mek pum bisik saklirye, mek lontik abuka dilamle atonun, Mesir ninye laut mekwen noutam kintinip deipmalum bisik wekelyayik talak ara, ance mambul pil domluma deice arye, anang sik nong deice mek siklipdongobuka, dibuk. Anang nirya obuka sirya daklume.

Mazmur 35:1

Raja Daud birye, Mazmur yupu mot sekuk. Daud birye nyabuk yupu ara, ani. Se na ni koproba Allah, ance na olyanganinyak nang arye, mal olyanganinyaka ati, ‘Ance sik anang ati, tamubuka optume’ tenen, moropkine. Yu nang arye nati, ‘Anye opnuyap,’ teneninyak nang ara, ‘An Allah arye anang ati, wenebuka opnamlam’ tenen, moropkine na nio.

Mazmur 50:3

Nun ni Allah ara, talye tunim abuka, kum ulirye, talye panabuka yangalule. Elce yalye talak nirya ara, weik uku buk dilule. Tonda, el yalye talak ara, weik mikip kum ap, mok cena ap, weik dua ap, yalyebuk, elda aminyan tam yangalule.

Mazmur 83:1

Asap birye, aMazmur mot yupu sekuk. Asap birye nyabuk yupu ara, ani.

Keluaran 14:15

Allah el si Yahweh arye Musa biti nyabuk. “An yata ati, yupu weik arye nati nyanmanilam do? Ance Israel ninye ati nyapminba, bana uk unamake.

Keluaran 14:25

Tonda Allah arye arebukba, Mesir ninye sik kuda basam deice bukuka balamik ning yan nirya bental pum bisik wekukce, ben arye bibukba, yane kwinipman kum kibuk. Bibukopura, sik tuku deice bana ning nirya ikin kibukce, kum binmanto ubukba, Mesir ninye arye nyabik. “Nun kanye imun upsile. Allah el si Yahweh arye ‘Na mapu arye Mesir ninye obuka sirya daknamak’ tenen, Israel ninye ati melipmale. Ati, Israel nang binmakak batakuka, pia yukak bitibye. Anang asukumuk batakuka bindoptibye,” nyabuka ngalukunmek.

Keluaran 15:3

Nun ni Yahweh elda mal olana weik deiyoknye atonun ulule. Allah elda tonoka, el si ara Yahweh ulule.

Yesaya 30:15

Nyabukce ayupu ton nyabuk. “Ati, na Allah Yahweh, aning-aning nirya talibuka deice tam Weik Erena Deiyoknye unune. Narye, ‘Winipnamne,’ tenenye touk wininune. Narye nyapnusine. Nara, Pia Diksukumuk unirye, Israel ninye kalikuka talinunye birye nyapsine. Ara, ‘Allah arye wenepsilirye, obuka sirya daksilyak’ tenen, wininamlum ning ara, nyapnusine. Anggun malye winimunye ning nirya batakmumce, tupto tamubuka na tam kipnamlulume. Winipmunce, nati dib tenepmunce, kanye lamapdongobuka unamlulume. Kanye talima namin deice darapdongobuka upmunce, ‘Nun ni Allah elce lyepnamsil’ tenen, nati dib tenebuka umunyopura, narye mikip kilinamsine. Narye, ‘Winibuka wininamlulume,’ nyapsise bukni, anggun malye umunce, aning bataklume.

Ratapan 3:26

Ati ara, teleb una ara, ani. Yata nang do nirya ap, tonda nun nirya babye, duknubuka unyapce, el tonok, ‘Elcuk melinamsileʼ tenen, dinamabe. Winilamepye buk, Allah Yahweh elda, nunti melibuka lyelonamsile.

Ulangan 1:30

“Anggun ni Allah Yahweh arye, anggunti melibuka bobanamsile. Elce menekuka baliba, nunda el aminyan tamuk melibuka banamabe. El mikip weik deice arye, Amori nang, omutuku unyak nang ati, oplirye, sirya daknamle. Tonda, anggunti, el mikip weik deice arye, moubuka kaliksilirye, bobanamsile. Ara, anggun Mesir mutuku noutam ikin weik daulamlumba, Allah Yahweh el mikip weik arye, pil dopsukce, boyanamsukba, anggun asing arye eiamlum touk, wini talak babye atonun, winipnamasile.

Ulangan 20:4

Anyapmasin yupu ara, talye ati kum nyapsine. Deiyok ara, anggun ni koproba Allah Yahweh, elce melipra binamsile. Elce melipra banamsil deice arye, el mikip anggun deice deipsiliba, anggun mal olan nang nirya ati, obuka sirya dakanamlume. Ati ilil una meme.”

Ulangan 3:22

Amutuku noutam talibuka ulamikce, ninye deiyok nang ap, amutuku nang nirya ap ati, ilil kum unamsile. Deiyok ara, anggun ni Allah Yahweh arye, anggunti mikip weik arepsilirye, tonda, elce kalikuka pia melinmasilya deice arye, anggunce omutuku talibik nang nirya opnamluma ati nyapsine.

Yosua 10:10

Olbiyik talak ara, Allah el si Yahweh arye Amori tam ninye ati, walwal kanye bona ap, kanye bokoltona ap, weik arye arebukba, kanye moubuka tenepmanto kum ubik. Winibikba, Israel nang yayikce, Amori nang nirya ati, obuka sirya dakik. Gibeon mutuku noutam Israel ninye arye, Amori nang ati, weik obik. Obikba, Amori ninye ton, bikbik abuka biyikce, dipnin banmekba, Israel nang arye, sik aminyan tam bikbik abuka, yanganmekce, aninye weik arye ton, Bet-Horon mutuku bisik arye obik. Tonda, tuba opnin yanganmeka ani, amutuku noutamak bukni, otam mutuku opnin banmeka ani, mutuku si Aseka mutuku ap, Makeda mutuku ap, aninye olbiyik.

Yosua 10:14

Asum arye winibuk ning ara, minop talak arye diprongobuka, wini talak noutamak nirya, pia kum winilamuk. Aning ara, Israel ninye ap, Amori ninye ap, olanmek talakuk winibuk. Ara, Yosua birye, ‘Naio aning adiparyuk winipsutume,’ nyabuka morobuk touk, adiparyuk Allah el si Yahweh arye, talye tukwaknye bukni, Yosua moropmok touk, kekebukce winibuk. Atalak tonok aryuk winibuk. Winibuk ati ara, nun kele, atalak ara, dipkoprob Allah el si Yahweh arye, Israel ninye ati weik arye melibukba, sikce Amori ninye obuka, sirya dakik.

Yosua 10:42

Yosua birye, tonok talak aryuk, amutuku noutam nirya ara, biyukce obuka ara, ninye deiyok Raja-Raja nang ap, sikce talilamik nang ap nirya ara, biyukce obuk. Israel nang nirya arye, amutuku noutam ulamik nang obik. Ara, sik mikip deice aryuk kume. Sik ni koproba Allah Yahweh arye, melibukce, el mikip sik Israel nang deice deibukba, obuka sirya dakik.

Yosua 23:10

Anggun Israel yala nang ara, tonoknye unmatuba, anggun mal olan nang, yupa weik 1.000 yin talin nang yantinga babye, anggun kan-kan arye, tonoknye, elcuk ayupa weik yanmating nang obuka, sirya daktue. Anggun ni koproba Allah Yahweh arye, melipsuturye, anang nirya ara, obisiptue. Ara, anggun ni koproba Allah elce, “Winipnamsine,” nyabuka, nyalina yupu deice arye, akunum nyapdeiamsuk touk, winipsiliba unamlume.

Yosua 23:3

Amapo, wini talak ara, na akunum wisi dane. Anggun Israel nango, anggun ni koprop Allah Yahweh arye, anggun ap neika ulamuburye, Allah elce ninye winipmanto kum pil yala nirya ara, aunmalum mutuku Kanaan noutam, atam ulamik nang nirya ara, sik dam ulamupuba eililamlume. Ara, el mikip areamsukba, anggunce sik dana-dana tam ulamik nang ati, obuka yaklumce, akunum sirya yakamlume. Aning nirya ara, anggun asing arye akunum eililamlume. Allah Yahweh el mikip deice arye, pia melibuka pil dolamsuke. Allah elcuk anggun melina ati, el mikip weik arye, anggun deice deiamsuka arye, pia pi dobuka, anggun mal olan nang ati, obuka sirya dakamlume.

Hakim-Hakim 5:20

Sik opmandasike sum ara, kurya im deice ubuk ning nirya babye, weiknye Sisera el ona ati, long-long abikce, Sisera el ona ati melipsike.

1 Samuel 4:7

Sik Pilistin ninye nirya arye, ayupu pia moubuka kekenmek talak ara, sik ilil weik ubuk. Sik ilil ubukba sikce nyabik. “Se, sik talibuka unyak Allah ara, sik baju bol doltakna tenda aik domiknye dam yanuka deipmakba unmale. Se, nun bicoe. Awinipmala atonun ning ton, minop talak arye, dipdongobuka wini talak ton, pia kum winilamsuke. Ati ara, aning nun dam yanmala ati, kanye imun upsile,” nyabuka, malye yupu nyabik.