Keluaran 13:9 - Eipomek9 Aweik sum deice pil donamlum ning nirya ati deiyok, winipmanto ning ara, ninye winyamice ning tuba tenena ati, taruk deice ap, asok deice ap, denelamaka atonun winina ati wininamlume. Tonda, ‘Allah Yahweh arye, mikip weik deice arye mambul pil dopsukba, Mesir mutuku ikin weik ulamupubuk, Allah arye lobuka lyepdopsukce, amutuku boyanamsuke’, tenena ati, apil dopmunce, Allah el si eren sum, Allah ati kinamlume. Tonda Allah Yahweh arye anggun Israel ninye ara, “Aning ara, wininamlume, aning ara, pia kum wininamlume,” nyapdeiamsuk yupu ati, ‘Ayupu uk tuba tenenamapʼ tenen, aweik sum deice arye apil donamlume. အခန်းကိုကြည့်ပါ။ |
Keluaran 13:9
38 ပူးပေါင်းရင်းမြစ်များ
Mesir mutuku nang, sik minop arye deiamik mapu nirya akunum obukopura, el mapu koproba, sik Israel yala nang batakuka dobukabukce, Mesir mutuku noutam arye, bobinamuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe,’ nyabuka, nyanamabe.
Ara, el mikip taruk ap, el pia mikip weik ulya deice arye, sik Israel nang dobuka, Mesir mutuku noutam arye, lyebuka bobinamuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.
Arup winipmanye ning ati, anggunce asum-asum pia teninamlume. Anggunce, ‘Asum ara, Allah el weik sum ulule’, tenebuka, oketeng tamun, oketeng tamun nirya, kwalina pia kwalinamlume. Ara na si Yahweh, na si erena ati, akwalina pia kum bataknamlume. Keting tamun nirya, kaplina kwalya ara, pia batakalongona kume, apia kwalipmunce, na si erepnin banamnulume. Allah el si Yahweh arye nyabuk.
Winilamunyeba, doyanamle talak ara, anggun mapu arye, “Awinilamunye ning nirya ara, yata deiyok ati winilulum do?” nyabuka asipsicopura, anggunce tamubuka anggun mapu ati nyanamlume. “Kume, aning ara, nun Mesir mutuku noutam ulamupubuk, sik Mesir mutuku nang arye, ikin weik pil dilamsikba, talye piluk dolamupu bukni, ‘Allah Yahweh, el taruk mikip deice arye lopdeipsukce, lyebuka Kanaan mutuku boyanamsuk ning’, tenena ati wininyabe,” nyanamlume.
Aning wininyaba deiyok ara, ‘Allah Yahweh arye, winyamuke’, tenena ati wininyabe. Ara winipmanto, ninye arye winyamice ning tenena ati, taruk deice ap, asok deice ap, denelamaka touk, ‘Nun ni Allah arye winyamsuke’, tenena ati wininyabe. Tonda, ‘Nun Mesir mutuku noutam ulamupubuk, Allah Yahweh el taruk, mikip deice arye boyanamsuk’, tenena ati, wininyabe. Aning ton, anggun mapu nirya ati nyanamlume. Musa birye sik Israel ninye ati nyabuk.
Nyabukba, Musa tamubuka Israel ninye dam yayukce, ayupu nirya Israel ninye ati, nyabuk. Asum ara, nun ni koprop Allah Yahweh, el taruk mikip deice arye, Mesir mutuku ikin kanye bobuka ulamlum talak arye, akunum lyebuka lopdeiamsuke. Ara, Mesir mutuku ninye arye tapu koubukapsikce, ikin weik pil pia, anggun nong deice delilamsikba, ikin piluk talye dolamlum bukni, Allah arye lyebuka lopdeipsuke. Ati ara, ‘Asum arye aning nirya pia tenenamapʼ tenen, keting tamun nirya ara, asum arye anggunce, ‘Kume nunda Mesir mutuku ulamupu talak ara, ikin weik pil pia weik tonun dolamupubuk, Allah Yahweh el mikip weiknye birye, lyebuka lopdeipsukce, boyanamsuka ati, pia teninamapʼ tenen, wininamlume. Ati, aning ara, asum arye pia tenenamlume. Aning tenina ati, asum arye, roti kwaning nen ning ara, pia kum dinamlume. “Allah arye nyapdeipmasile,” nyabuka, Musa birye, Israel ninye ati nyabuk.
Ara, anggun ni yapu ap, anggun nin yapu ap, sikce nyanyak yupu moubuka kekepmunyopura, pia telebuk unamlume. Winipmanto ara, ninye arye, urasin pia teleb ning dobuka, ‘Nun ninye deiyoknye ati, ninye nirya arye kwerya dolinamap’ tenen, el kisok deice dolilamak. Aning atouk, ninye arye, pia dekna weik ning dobuka, rantai tapu atonun ning kintinip deibikirye, weik sisin nang sik ngang dam karaklamak touk, anggun ni yapu ap, anggun nin yapu ap arye, nyasinyak yupu nirya ati, moubuka kekenamak mapu ara, pia teleb ulinamsile.
Akamnye bira, moubuka bita kel kum kibuka ati ara, winipmanto ara, rusa basam wena tapu wemikiba, youplirye tikamli bukni, binmanto kum ulamlopura, ninye arye mal marabikiba, nong noutamak wekliba dibilamak touk ubuk. Akamnye birye, ‘Ikin weik ning upnamne arya,’ tenena kum diparyuk, talye kanye bobuka, akil ap neika birik. Tonda ninye arye, ‘Maka mangkau arye balibuk, youpliba tomobibirye opnamap’ tenen, maka balamle bisik, maka youn ning deibikiba, mangkau arye abisik wekliba, youlamle atonun ubuk. Ara, maka arye, ‘Aning pum tam wekna arye, youpnilyopura, tomobuka opnicake,’ kum tenelamak touk, kamnye babye walwalto winibuk. Akamnye birye, ‘Ikin weik ning upnamne arya,’ tenena kum diparyuk, talye kanye bobuka, akil el aik birik.
Ance nati, weik tonun bico tenenimince, kanye akunum deipnuluma ati, wini talak babye, aminyan dounamle talak babye, ance talipniminba, an damuk neika pia unamname! Winipmanto ara, an kanye ara, na si sekeipniminyopura, apia unamle. Deiyok ara, ‘Yuk kilapu nirya ara, pia tenimince, kum patapnamkila ati nyapkine. Winipmanto ara, an taruk toupne deice, toupne dama wibuka dongopminyopura, pia aulula atonun, nati an kanye delinamnilame. Nun bitinye arye, weik tonun bico tenebuka, tuba-tuba kanye delilanauk unimnya ara, pia mikip weik ulule. Winipmanto ara, ninye dibina ara mikip weik ulye touk, nunce kanye delilanauk unimnye ning ara, pia mikip weik ulula ati, min kum winipmanto ulule. Tonda, ninye tukwak nang arye kam ulamikca ani, pia wisi dakcopura dibina uk unamake. ‘Aning ara kum winipsutue,’ teneptibya babye, dipkoprob aning winipnamsilca! Aning atonun, nun bitinye arye weik tonun bico tenenimirye, kanye delilana uk unimnya ara, pia aunamle. Min kum winiptue tenepne. Winipmanto ning ton, weik uku dinmalya ani, ninye arye auku kum tangalamak touk, weik tonun bico tenepnimince, kanye delilanauk uniminya ara, pia aunamle. Min kum winiptue tenepne. Aning ara, pia min kum winipnamle.
Allah arye tenyamlye talak akunum yalyopura, Allah Yahweh arye, el ona ati, pia mikip weik tatce parang ya taleplirye, Lewiatan nyanyak yu weik kam ning ati opnamle. Ara, cakuka balirye, binuka kwanibuka, weik kwatima babye, yalirye wenebuka opnamle. Tonda elcuk, el si Naga Kwatima nyalamak ning, laut kwen noutam ulul kwatima babye, wenebuka opnamle.
Anggun nirya ara adilulume! Aning-aning deice tam ulirye, Weik Erena Deiyoknye Allah ara, elce, ‘Winipnamne,’ tenelye touk winilule anya arye, el mikip weik deice arye yanmale. El taruk koproba mikip deice arye, im sirya, mutuku sirya nirya unyak ninye ati, malye kibuka talinamle. El taruk mikip deice arye malye kibukce, talinamle ning ap, ninye ap ara, boyanmale. Tonda, el mining mapu, sik dengna ati arenamle ning babye, talibuka boyanmale. Aning-aning nirya menekuka yanganmal buk, el Allah ara aminyan yanganmale.
Teleb ubuka ukiba eibikirye, aninye nirya tonok-tonok, ‘Nara Allah el tamnye unune’ tenen, na siuk nyanamake. Ton nang ara, ‘Yakub el yalanye unune,’ tenebikcopura, sik aninye ara Yakub ance deipminba, dadeipdanin banamak ninye tam uk kilyanganamake. Winibicopura, anang sikce seknamaka ara, ‘Nara, Allah Yahweh el tamnye unune,’ tenebuka, sik taruk deice arye sekenamake. Tonda sikce sik bidamang ati, ‘Nara Allah el tamnye, el tenenanye unune,’ tenen, Israel si nyanamake.
Yerusalem ninyeo, na Allah arye anggunti kum luba kipsise. Pia tuba tenesunune. Ati winipmanto ning ara, anggun si ara, na taruk tatang deice akunum sekeipse. Anggun ululum mutuku dana-dana tam cang keil poka doplumce, anoutam umunye mutuku ap, anggun amutuku umunye ninye ap ara, pia tuba tenesunune.
Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.
Ura, Allah arye ayupu nyabuk. Narye na mapu koprop, anggun deice ara, ‘Narye winipnamsine. Winipsinyopura, anggunce ton wininamlume,’ nyabuka, nyalin yupu deice arye nyapsine. Na mikip weik ulye, Allah el Pia Teleb, Lek Dip Kanye ara, na mapu koproba, anggun Israel nang deice deipnamsine. Tonda, narye na nyasinye yupu dobuka peterepsinirye, anggun si pum bisik dongopnamsine. Ayupu peterepsiniba, anggunce, ‘Aninguk aupsiliba, pia ati talibuka unamabe, tenepmunyopura, ayupu ara, tuba nyapnamlume. Pia ati kum bataknamlume. Tonda, anggunce deipmunba, dadeipdanin banamak mapu babye, na nyasinye yupu dobuka, sik deice peterenamake. Anang arye deilinamak mapu ati, peterebikiba, anang babye ayupu kekebikiba kel bikikirye, talinamake. Ara, na Allah Yahweh arye, ayupu nyapsina anya arye, dipkoprob nong upnamlarya! Ara, atalak arye dipdongobuka, doyanamle talak nirya ara, peterepdanin bana uk unamlume,” nyapsine. Allah arye, sik Israel nang ati nyapdeibuk.
Nara Allah Yahweh arye, pia kam ununa ati, na si deice arye, pia dipkoprob nyalin yupu uk nyapdeipsine. Ara, Yehuda yala nang talibuka ulamuknye, Raja Yoyakim, el mi Raja Yoyakhin biti nyapne. Lak kilina ati, na sirik taruk duk deice, cincin dongolamsiba, ninye nirya aning eibikirye, ‘E, anye bira, dipkoprob weik deiyoknye Raja ulule,’ tenenyake. Anda, acincin atonun dongoptumce, na taruk duk deice dongopnutuma babye, aning dobuka donoknamtinye. Deiyok ara, anda Raja weiknye ulyam bukni, wini talak ara, aning ara, an dam arye dopropnirye, donoknamkine.
“Ati ara, na ni Allah, ance aning-aning nirya talebuka, pia deice tam erebuka Pia Mikip Weik Deiyoknye ulyama ati, an siuk erenyape. Ance an mapu Israel ninye, Mesir mutuku noutamak ulamik talak ara, ikin weik asa ulamik bukni, an taruk mikip deice arye, bobuka yanamsulume. Ara, ‘Sikce na mikip ara, biknamak’ tenen, winyamlume. Ance weik mambul pil dolamluma deice arye, ninye weika arye, an siuk erenyake. An si ara, luba pia kum kipnamake. Tuba tenenauk unamake. Bukni, wini talak nunda tuba malye winibirye, an si yanikinyabe. Ara, nunce an nyapdeiamsulum touk, kum wininyaba deice, an dam malye wininyabe.
Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.
Benang tapu arye, urasin teleb ubuka yangapdeipnamlum ning ara, ‘Nun ni koproba Allah arye winyamsukʼ tenen, anggun kel bikna ati, lak kelinamlume. Winipmunya deice arye, narye anggunti, “Aning wininamlume. Aning ara, pia kum wininamlume,” nyapdeipsise yupu ara, anggunce bikilina ati, tupa-tupa tenipmunce, wininamlume. Adeice arye, anggunda na nyapdeipsise yupu, lubakipmunyopura, benang tapu wipnamlum ning eipmunce, tamubuka teninamnuluma ati, lak kipdeipnamlume. ‘Anggun bidamnye, kanye tenina deice arye, malye winipmunyak’ tenen ati, narye “Aning wininamlume. Aning ara, pia kum wininamlume,” nyapsise ning kum winipnin bamunce, luba kipmunyak tenen ati nyapsine.
Sik winilamak ning ap, pil dolamak ning ap nirya ara, ‘Yuk ninye eipsikirye, se anang ara pia teleb nang, tenepnamsiyak’ tenen, wininyake. Sikda kanye talima ereldanyake. Ton ning ara, Allah yupu kekebuka diba tenenyak ninye ara, ‘Allah yupu ati pia tenenamap’ tenen, mitik pala ning deice arye, Allah yupu ayat sekdeipnopura, taruk nakup deice ap, asok deice ap, deibuka kitilongonyak. Bukni, sik Farisi nang ap, Musa sekamuk yupu peterena deiyok nang ap ara, ‘Ninye eipnamsiyak’ tenen, pala weik ning deice kitildongokirye dinyake. Winilamaka nirya ara, ‘Yuk ninye eipsikirye, ara pia teleb nang, weik kel nang tenepnamsiyak’ tenen, wininyake. Ton ning ara, Allah diba tenenyak ninye ara, sik Allah morona talak ara, kisok pakunyak baju mouse ak ara, bumang baju sekuka tipmenikuka mitik-mitikuk kirikildongonyake. Bukni, sik Farisi nang ara, ‘Yuk nang eipsikirye, ara Allah morona weik kel nang tenepnamsiyak’ tenen, weik cang baju sekuka, tipmenikuka mitik-mitikuk kisok pakunyak baju mouse ak kirikildongonyake.
Ayupu bitinye ara, pia kum nyanamap bukni, diba tenebupa deice, Allah arye nunti, “Sikda diksukum ninye unyake,” tenebuka teleb kibuka deipsuk ninye ara, ayupu nyanyabe. Ara, ‘Allah arye ninye lyena ati nyasulul yupu ara, akunum dam usulule. Ayupu ara, anggun talima pum tam akunum ulule. Anggun yupu kopropa aryuk, “Nun ni Allah lyepsilyame,” nyabuka moroptume.’ (Ulangan 30:14) Ayupu nyanyabe. Nyanyaba deice, “Anggun yupu kopropa aryuk nyaptume,” nyapmasin yupu ara, yuk yupu kume. Ara, nunce peterenyap yupu, “Yesus ati diba tenebibya deice, Allah arye lyelosulule,” nyabuka, peterenyap yupu ati nyapmasine.
Aning wininamluma deiyok ton nyapnusine. Ara, anggunce pia moubuka teninalume. Ara, ‘Minop talak, nunda Mesir mutuku ulamupu talak nirya ara, amutuku nang, sik amu tamuk ulamupuba, ikin weik pil aruklamsik ati, sik talye pil melin nanguk ulamupu ani, nun ni Allah Yahweh, el mikip weik ap, el mikip weik taruk deice arye boyanamsuke,’ tenenalume. Ati ara, narye anggunti, ‘Wininamlume, anggun dikdik sen sum, Sabat sum kintinipnamnulume,’ nyapdeipsise touk, dikdik sen sum, Sabat sum yuk, wibuka kintinipmunce, na Allah ati, si erenamnulume.
Babel mutuku unyak kili sal arye, ‘Nunda pia telebuk wininyabe,’ tenelamika ati ara, akunuma. Allah arye tonok sum noutamak ara, Babel mutuku ninye, sik kanye imun ning adiparyuk weika arye arepniba, weikto upnamle. Ara, dipna ap, din patapliba, din bulang patan asa una ap, ikin kanye bobuka engena ap weik upnamle. Tonda weik uku buk dopkwetepliba, sik mutuku ap, sik nong ap dipnamle. Aning-aning nirya talibuka Weik Deiyoknye, Allah arye, Babel mutuku unyak ninye yupu lipsisikuka, bokeiplirye, wenepnamlanye bira, el mikip pia weik ulula ati, anyapman ning nirya nong upnamle, nyapne.” Im deice arye nyanmok yupu nyanmokba, kekepse.
Winilamika deice arye, sik Israel ninye arye, Allah el si Yahweh ati yaniptabik. Ara, sik apu yapu arye si erelamikba, melilamuk Allah batakike. Tonda, Yahweh arye sik apu yapu Mesir mutuku noutam arye, lyebuka melipnin yangalamukce, winiryuk teleb mutuku bobuka delilyayuknye, Allah ati yanibik. Winilamikce, Kanaan mutuku noutam bukni, amutuku-amutuku binuka ulamika noutamak, amutuku-amutuku ulamik ninye arye, si erelamik ninguk, sik Israel ninye babye, aisa si eren ninguk talibuka si erelamikce, isa piluk dolamikce, amalye pil dobolbalamik. Winilamika ati, Allah el kanye talima yu weik ubukba, Allah eibukce, yu pia weik ubuk.
ကြော်ငြာတွေ