Keluaran 12:29 - Eipomek

²⁹ Alukunyan noutam ara, Allah el si Yahweh arye, Mesir ninye sik winiryuk mapu nirya obuk. Tonok babye, ton kum batakuka ati, Mesir mutuku deiyoknye Firaun bira, weik nang bulamak buna deice bulamuk bukni, el winiryuk mi ton obuk. Tonda, amutuku wenen aik pum tam dongamikba ulamik nang ton, sik winiryuk mapu ton obuk. Aning atonun, amutuku nang, sik sapi ap, sik weilamik kam ning nirya ap, winiryuk ning ara, Allah arye obukba dibik.

Keluaran 12:29 ပူးပေါင်းရင်းမြစ်များ

Kejadian 15:14

Yuk mutuku nang arye, an mapu ikin ning weik, sik nong deice delilamica ani, aminyan talak ara, narye aninye ati weik arye, wenepnirye, an mapu ara, lopdeipniba, amutuku batakuka bindopnamake. Ara, talye ati kume. Bona pia weik arepneba, aning-aning nirya dobuka talilyanamake.

Ayub 34:20

Aning ton kum tenepmalum do? Yata nang do nirya, sik kan-kan noutam ara, ton tam nang ara, sik mapmaca lukunyan talak noutam ara, talye karin aryuk dibinyake. Allah el mikip weik ululnye bira, ninye deiyok kibuka talinyak nang babye, wenebuka oplyeura, sik babye dibinauk unyake. Talye ninye arye, kum onyake. Aning ara, Allah el arye!

Mazmur 105:36

Tonda, aning nirya akunum bukni, sik Mesir mutuku ulamik ninye ara, mandipna kanye uk ulamikba, Allah elce, Mesir mutuku ulamik ninye, sik min yuma sal mapu nirya ara, oplobuk. Ara, amutuku ulamikce, kil dopdanuka delilamik min yuma mapu nirya ara, obuka sirya dakuk. Mesir mutuku ninye arye, sik min yuma mapu ati, ‘Nun mapu mikip unamaka deice arye, telebuk unamabe,’ tenelamik bukni, Allah arye, min yuma mapu nirya obuka, sirya dakuk.

Mazmur 135:8

Tonda, minop talak ara, Mesir mutuku noutam ulamik nang arye, min yuma deiamik mapu nirya ara, obuka sirya dakuk. Sik nirya dibik. Ara, ninye arye deiamik mapu, sik min yuma mapu nirya, ninye arye weilamik ning arye, min yuma delilamik yim ning nirya ara, atalak aryuk obukba, dibike.

Mazmur 136:10

Tonda, minop talak sik Mesir mutuku noutam nirya ulamik nang, sik minop deiamik mapu nirya ara, Allah elcuk amapu nirya obuka, sirya dakuk. Winibuka deice arye, sik Mesir mutuku nang ati, imun kanye weik bobuka ulamik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe,’ nyabuka, nyanamabe.

Mazmur 78:50

Tonda, Allah el yu weik ubuka ati, ‘Aning kum obuka sirya daknamne,’ kum tenebuk. Elce tenyamuk touk, anang deice, el yu weik arebuk. Tonda, ‘Anang wenebuka kum opnamne,’ tenena kumce, sik atalak ulamik Israel yala nang kan-kan arye, yupa pia weik tonun, obukba dibik. Ara, Nakina yala weik arebuka deice arye, atalak ulamik Israel yala nang ara, yupa pia weik tonun diamik.

Mazmur 78:51

Tonda, Mesir mutuku noutam ulamik nang arye, akunum deiamik mapu, sik min yuma mapu nirya ara, atalak aryuk, Allah arye, mambul weik ning, dibina deiyok ning arebukba, sik min yuma mapu nirya, adiparyuk dibik. Amapu ara, sik Mesir mutuku nang arye, ‘Se, nunce min yuma deiamupu mapu ara, akunum nebikcopura, aminyan talak ara, sikce mapu ton deibikiba, dadeipdanin banamak mapu ara, nun mutuku talibikirye, mikip unamake,’ tenelamikce, ‘Nun min yuma mapu nirya ara, pia telebe,’ tenelamik bukni, Allah arye, sik Mesir mutuku min yuma mapu nirya oplobukce, sirya dakuk.

Keluaran 11:1

Allah el si Yahweh arye Musa biti, nyabuk. “Narye winilen ati kanye ikin weik ning, tonok ning ton, Firaun ap, Mesir ninye ap ati arepnamne. Aning ton arepneba, akunum winiplyopura, Firaun birye anggun bataksiliba, ‘Nun mutuku batakuka binamlume,’ nyabuka, Mesir mutuku noutamak arye yaknamsile.

Keluaran 12:12

Nyabukopura, ayupu ton nyabuk. Ura asum lukunyan noutamuk, na Allah arye, Mesir mutuku nirya binirye, Mesir mutuku winiryuk mapu nirya ap, sik weinyak kam ning, weik ning nirya ap, opnamne. Tonda, Mesir mutuku isa si erenyak ning nirya ara, na Allah arye wenepnirye, ikin weik ning, sik deice deipnamne. Na si Yahweh, na Allah arye nyapsina ati, aning dipkoprob winipnamne. Allah el si Yahweh arye nyabuk.

Keluaran 12:28

Winibikopura, aminyan talak, sik Israel ninye biyikce, Allah el si Yahweh arye Musa ap, Harun ap ati, ‘Aning ara wininamlume’, nyapdeibukba, kekepdikce laka nyapdik touk, sik Israel ninye nirya babye, atonun winibik.

Keluaran 13:15

Tonda nyanamlume. “Atalak ara, Mesir mutuku ninye deiyoknye Firaun birye, nun Israel ninye ati, pia lik kanye bobuka ulamukce, ‘Sik Israel ninye ara, yuk mutuku pia kum binamake’, tenelamsuke. Utenelamsuk bukni, Allah Yahweh arye, sik Mesir mutuku ninye arye, min yubuka delilamik mapu nirya ap, tonda sik domba basam do, sapi basam do, sikce weilamik ning nirya ap, minop deiamik yim ning nirya ara, Allah arye obuka sirya dakamuk. Allah arye winibuka ati, aninguk tenebibirye, nun weilamap ning arye, minop deiplye ning nirya ara, obibirye, nun ni Allah ati arelyanganamnyabe. Atonun, nun min yuma mapu nirya, sik pununa ati, domba basam mi ton obuka, Allah ati arelyanganamnyabe.

Keluaran 4:23

Narye nyapkise. Aninye ara, na du mapu atonun ati, batakminba, sik bindopnamake. Bikcopura, na si erepnamniaka ati, sik bataknamlyame, akunum nyapkise. Akunum nyapkise bukni, anda malye kibuka weik upkukba, na mapu Israel ninye ati, ‘Kume, kum bataknamne,’ nyapmalama ati, narye an du mi babye opnamne. Allah arye Musa biti, Firaun dam ayupu nyalbinamlyame,” nyabuk.

Keluaran 9:6

Sik mapmeka ani akunum berekukopura, Allah arye asum talak nyapmok touk winibuk. Mesir ninye ara, sik basam ayala-yala nirya ara, dipna uk kibuk bukni, Israel ninye sik basam ara, tonok ning babye kum dibik, nirya kam tuba ubuk.

Yesaya 24:22

Sik aning ap, anang ap nirya ara, tuku pum tam arye bulubuka tonokak uk deipnamle. Ara, ninye arye malye winibikceura, deiyok nang arye anang bulubuka, wenen aik dongolamak touk, Allah arye amalye un ning nirya bulubuka tonokak pum tam uk deipnamle. Sik anang ara, asukumuk deibuka bublan tirikdongobuka, weik tonun ton asukumuk daulamikca ani, aminyan talak elce tenyamlye talak akunum kiplyopura, atalak aryuk amalye un ning nirya ap, malye unyak deiyok nang ap wenebuka oplirye, kum kipdeipnamle.

Yesaya 41:11

Nara anggun ni koproba Allah arye, pia melinamsina ati ara, yuk yala ninye nirya arye, yu upliba anggunti ‘Yanuka optibye’ tenen, piripdenamsiaka babye, anggun deice ikin ning kum deipnamsiake. Narye melipsiniba, anggun mal olan nang ara, alye weik upnamle. Tonda, yuk mutuku nang arye anggun mal olan nang ati, ‘E, anang ara, talye nang uka,’ nyabuka wabuka nyanamake. Yuk mutuku ninye arye, anggunti, ‘Anang optibye,’ tenenamak ninye nirya ara, narye melipsiniba, anang dipnamake. Anang ati obuka sirya daknyopura, aninye kum upnamake. Anggunce, anang ati, ‘Sikda pia talye nang uka. Sik mambule kume,’ tenenamlume.

Yesaya 51:14

Sik wenen aik dongolamikba, tuba daunyak nang ara, narye adiparyuk lopdeipnamne. Anang ara, sik din ton min kum, kum danamle. Tonda, sik anang nirya ara, dibikiba, tuku pum tam ton kum weipnamake.

Yeremia 38:13

Winibukopura, sik awinilye nang arye, tapu talipdongobuka, liboweleyayikce, Yeremia yanuka deibik. Akunum dobuka deibikopura, ninye deiyoknye, Raja el yin talin nang, sik aik damuk, deipmekba unmok.”

Yeremia 38:6

Nyabukba, sik anang arye, Yeremia dobuka, ninye deiyoknye, el mi Malkia palyamuk sumur pum bisik, tapu kirikdongobuka, apum dopkwetebik. Asumur lukamukak ara, ninye deiyoknye Raja, el aik dam lukamuk. Atalak ara, mok kum li anya arye, asumur ara, mekwen ton kum deiamuk bukni, benuk uamuka anya arye, Yeremia atuku pum bisik dokwetebikba, bental pum bisik wekmanto ubuk.

Habakuk 3:5

Allah arye, ‘Amutuku binun’ tenen, binulumak nirya ara, weik uk dina deiyok ning arelalumba, malye ninye weik arye, uk taleamukba, diplamik. Aning atouk, an balalum mutuku noutamak nirya ara, weik kanye imun uk arelalumba, malye nang weik arye, uk dilamukba diplamik.

Zakaria 9:11

Allah el si Yahweh arye, el wipdeiamuk ninye ati nyabuk. “Na Allah arye anggunti, ‘Teleb kilinamsine,’ nyabuka, nyalin yupu deice arye nyalilamsise ning ara, dipkoprob nong upnamle. Ara, anggun malye ulamlum ning nirya, namin kina ati, kam ning obuka arelyanganumunya deice arye, ‘Akunum winipsuke,’ tenenamlume. Ayupu nyalilamsise ning ara, dipkoprob nong upnamle. Ayupu ara, min kum winiptue. Ati, narye, ‘Wininamsine,’ nyabuka, nukamsise ning ara, dipkoprob nong upnamle. Pera mutuku nang arye anggunti, tapu koubuka mek dina ati, lukamik pum bisik mek cemuk pum tam, dolkwetelamsikba, imun kanye bobuka, ulamluma noutamak arye, lobuka lyepdopnamsine.”

Bilangan 3:13

Aning ara, talye ati kum nyapkine. Deiyok ara, Israel ninye arye, minop delinamak mapu nirya ara, na mapu unamaka ati nyapne. Ura, Israel ninye, anggun Mesir mutuku ulamlum talak ara, narye Mesir nang, min yuma sik mapu nirya omse. Winyamse talak ara, anggun Israel ninye arye, min yuma deiamlum mapu ap, deilinamlum mapu ap, ura, anggun weinamlum kam un ning nirya arye, minop deilinamak mapu ap ara, ‘Na mapu uk unamakeʼ tenen, wipdeipsise. Atalak ara, anggun uniryuk ning nirya kum omse ati, anggun Israel ninye arye, minop winiryuk deipnamlum mapu ap, domba ato ning arye delinamak mapu ap, delinamak ning ara, na ninguk unamle. Na Allah Yahweh arye, Lewi yala nang ati ara, ‘Na ninguk unamake,’ nyapse ati, sikda, ‘Naʼ tenen, nang unamake. Nara, sik ni koproba, Allah Yahweh unune.

Bilangan 33:4

Israel nang Mesir mutuku batakuka kouluksakuka, bisik biyik talak ara, Mesir mutuku yala nang minop deiamik mapu nirya ara, Allah arye sik wenena ati obukba, amapu nirya, tuba weinmik sumuk, Israel ninye biyik. Aning winibik ara, Allah Yahweh arye, ‘Aning winipnyeba, na mikip weik, sik nirya biknamakʼ tenen, winibuk. Adeice arye, sik Mesir mutuku ninye, sik si erelamik ning, talye ning bukni, sikce, ‘Nun ni yapuʼ tenen, allah-allah nirya si erelamik ning nirya ati ara, Allah arye, sik wenena ati, ikin ning weik, sik deice arebuk. Ara, Mesir mutuku nang arye, ‘Se, el Allah Yahweh ara, dipkoprob weiknye ululeʼ tenen, bikna ati winibuk.

Bilangan 8:17

Aning babye, talye ati kum nyapsine. Deiyok ara, na Allah arye sik Mesir mutuku ninye min yuma deiamik mapu nirya ap, sikce weilamik kam ning ara winiryuk deiamik ning ap, obuka batakse. Aopse talak ara, sik Israel ninye arye, min yuma deiamik mapu nirya ap, sik weilamik kam ning yala-yala nirya ap, min yuma delilamik kam ning yala nirya ara, kum omsirye, aning nirya ara, ‘Na mapu unamakʼ tenen, bokukapsirye, wipdeipse. Na ning koproba kiamse.

Ibrani 11:28

Musa diba tenyamuka deice arye, sik Israel ninye arye, Kaplina ati Kwalina pil dolamik ning ara, kum bataklamuk. Tonda, kam ning obuka, ining likuka buplan dana-dana delilamik ning ara, Musa el babye kum bataklamuk. Aining likibuk ning ara talye ati kume. Ara, Allah arye Mesir mutuku ulamik ninye, sik minyuma mapu opnuyuk talak, ‘Ninye Ona Deiyok malaikat arye, Israel ninye nun minyuma mapu ton kum opnusil’ tenen, winibuk.

Ibrani 12:23

Anggunda, Allah arye, ‘Aninye ara, mambule. Anggunda, na mapu kopropa unamak’ tenen, minyuma talak akunum wipdeiyamuk ninye dam yanganmalume. Aninye ara, Allah el Mi Kopropa Yesus arye talilule. Allah arye aninye sik si sekuka im deice akunum deiyamuk. Ura, ninye im sirya, mutuku sirya nirya ati, ‘Teleb ning ani, malye ning ani,’ nyabuka, yupu lipsisikuka bokeipnamsil Deiyoknye Allah, el dam yanganmalume. Tonda, diksukum ulamik ninye delilamikba, Allah arye sik dib kanye dobuka, akunum pia ansinibuka, teleb updeibukba, sik unyakak dam yanganmalume.