Keluaran 11:6 - Eipomek

⁶ Nyabukce, ayupu ton nyabuk. “Dibikcopopura, Mesir mutuku ninye nirya arye engepnamake. Pia malye kanye bobuka enggenamaka ara, minop talak arye dipdongobuka anoutam talak babye aning Atonun ton kum uamuke. Tonda, aminyan yanamle talak nirya ara, enggenamaka ara, mitik mambuluk unamle. Narye wini talak arepnaman kanye imun ning ara, pia ikin ati, weik mambule,” Allah arye nyabuk.

Keluaran 11:6 ပူးပေါင်းရင်းမြစ်များ

Keluaran 11:7

Nyabukce, ayupu ton nyabuk. “Bukni, ‘Sik Mesir mutuku ninye kel kekepnanak’ tenen, Mesir ninye yuk, Israel ninye yuk kipdeipnamake. Ara, Mesir mutuku nang, sik du mapu nirya dipnamak bukni, Israel ninye sik un dam ara, ninye ap domba ap, sapi basam ap nirya ara, sal mapu du mapu ara kum dipnamake. Ati, sik unyakak ara, ninye on malaikat kum yanamala anya arye, tonok kam babye malye nyabuka kum daneipnamle. Telebuk unamake. Winipnyopura, adeice arye, ‘Se, dipkoprob Yahweh, elda mikip weiknye ulula anya arye, Mesir mutuku ninye wenepnamal bukni, Israel ninye kume. Ati elce bokuka arisilye ning ara, yuk-yuk uka.’ Utenepmunce, kel biknamlame.” Musa birye, Firaun biti, “Allah arye nyapkile,” nyabuk.

Keluaran 12:30

Obukba dibikopura, alukunyan noutam arye, Firaun ap, el pil dona deiyok nang ap, Mesir mutuku ninye nirya ap, alukunyan noutam bukuka dinmekce, sik winiryuk mapu nirya akunum dipmek ning eibikce, pia malye yupu nyabuka engebik. Engebik ning ara, talye ati kume. Ara Allah arye Mesir ninye, sik winiryuk mapu nirya obukba, dibika atia.

Keluaran 3:7

Atalak ara, Allah el si Yahweh arye nyabuk. Na mapu Israel nang ara, Mesir mutuku noutamak, ikin weik unyaka ara, na elinunce, kel kinune. Ara, Mesir nang arye, ikin pil arukunyakbuk, donyak ning ara, akunum elinune. Israel ninye engenyaka ara, na kele. Tonda, ikin asa unyaka ati, na mambul kanye bonune.

Keluaran 9:18

Ati ara, dipkoprob ambusum beren tam, aunmanam keting anyuk, narye weik dekne duk-duka purwu mok arepnamakine. Aning ara, na dam arye dobuka dopdeipnamane. Dopdeipniba, weik ikin ning, Mesir mutuku noutamak deiyok kouna talak arye dipdongobuka, wini talak nirya kum ulamuk ning winipnamane.

Amsal 21:13

Yata ninye do nirya, mitangnye birye el patalamle ning ati, ‘Se, na melipnululume,’ nyabuka, malye nyabuka morolamle ning ati, moubuka kum kekebicopura, amul kunukdongobikirye aminyan talak ara, sikce pia imun kanye bobuka, tuba malye nyanmatinga babye, yuk ninye arye sikti, pia kum melinamake. Batakalongona uk unamake.

Yesaya 15:8

Dan tam do nirya, Moab mutuku noutam unmak nang nirya ara, weik arye engenmakceba, anggun tam tuku wilinak ara, pia karenak, iknapye tam (arah selatan) unmak nang babye, dabu tam (arah utara) unmak nang babye, kekenmake. Ninye ngalukuka malye nyanmakirye, engena lelimuk nyanmaceak, kekebikirye, ‘Seʼ tenen, malye kanye bobuka, unamake. Angalukuka engenmace lelim ara, Eglaim mutuku ap, Beer-Elim mutuku unyak nang ap nirya ara, kekepnamake.

Yesaya 19:16

Atalak akunum kiplyeura, Mesir mutuku noutam unyak nang nirya ara, kilapu ulamak touk, mitang asa ubikirye, ilil weik upnamle. Deiyok ara, Allah Yahweh, el mikip weik taruk erebuka, sik amutuku unyak nang deice deiplirye, sikti, wenebuka oplyeura, sik amutuku nang nirya arye eibikirye, yok berber abuka, ilil upnamle. Deiyok ara, Allah Yahweh elda aning-aning nirya talibuka, deice tam erebuka, mikip weiknye ulirye, im deice yin talin malaikat nirya talilule.

Yeremia 31:15

Allah el si Yahweh arye nyabuk. “Minop talak ara, ikin weik ning, sik Israel ninye deice yanamle. Winiplyopura, mutuku si, Rama mutuku ulamuk kil, el si Rael, el mapu nirya obikiba, dibikcopura, pia bico tenen, talima sukupliba, engenauk unamle. Pia engebuka, yuk nang arye, el talima kum kwa dipmanto upnamake. Ara, el mapu nirya obikiba, ‘Se, na mapu nirya ara, akunum obuka sirya dakmake. Tonok mapu babye, kam kum unamake,’ teneplirye, engenauk unamle.”

Ratapan 3:8

Narye Allah ati, “Melibuka lyepnilyame,” nyabuka, ngalukulamsirye morolamse bukni, elce na yupu kum kekepmanto ulamnuke.

Amos 5:17

Tonda, anggur tapu duk wa win dam unmakce ninye nirya arye, sik ton engenamake. Ara, urdem ati kum engenamake. Deiyok ara, na Yahweh yanirye, anggun nirya wenebuka opnamsina ati, engenauk unamake. Ayupu ara, na Allah Yahweh arye, akunum nyapsine.

Zefanya 1:10

Na Allah Yahweh arye nyapsine. Anang nirya, wenebuka opnamne sum, akunum uplyeura, sik malye wininyak nang wenepnyeura, anang weika arye, imun kanye bobikirye, ngalukuka, lelim weik nyabicopura, ninye weika arye kekepnamake. Yerusalem mutuku weik asik antanap dongobuka, domik keil poka noutam bukni, “Ikan bublan (Gerbang Ikan) tam nyabuka, botopdeibik sukum, weik bisik bublan tam arye, ngalukna lelim nyanamake. Tonda, Yerusalem mutuku noutam bukni, asik winiryuk talak donmace tam arye, engena lelim nyabikceba, kekepnamake. Tonda, Yerusalem mutuku kon deice, aik domik ning nirya, yu nang arye uluplobice talak ara, engena lelimuk nyaplyeba, yuk tam nang nirya arye, kekepnamake.

Lukas 13:28

Nyaplirye, pia buru tam dopkwetepsilye karen, yukak bimunyopura, Abraham ap, Isak ap, Yakup ap, Allah yupu laka nyalamik nang sik nabi-nabi nirya ap, Allah pia talinamsilak neika unamaba eipmunce, pia imun kanye bobuka, gisok talibuka engepmunce, yuk anye bopnamlume.