Winibukopura, Allah el si Yahweh arye, Abram biti nyabuk. Ance deipminyeba, dadeipdanin banamak mapu ara, sik mutuku koproba kum unamak bukni, yuk mutuku nang, mikip arye doprobikirye, tapu koubuka, sik nong deice ikin pil weik delinamake. Ance deipminyeba, dadeipdanin banamak mapu bukni, amutuku noutam ara, ninye asik nang atonun ubikiba, keting tamun yupa weik 400 tahun arye, ikin asa weik unamake.
Keluaran 1:14 - Eipomek14 Mesir mutuku nang arye, ‘Israel ninye, sik kanye imun kanye bobuka unamak’ tenen, wa pil aning-aning nirya ap, batu tehel memena ati, ikin pil weik tonap, sik nong deice delilamika deice arye, Israel ninye imun kanye bobuka ulamikce, weik engebuka ulamik. Winilamik bukni, Mesir mutuku ninye arye sikti, pia bico kum tenelamikce, “Ikin piluk doplulume,” nyabuka aruklamik. အခန်းကိုကြည့်ပါ။ |
Keluaran 1:14
30 ပူးပေါင်းရင်းမြစ်များ
Rehabeam birye nyabuk ara, el ap neika ulamik nang, sik wel nang arye nyapdeipmek ning atonun sik dam binuka nyabuk. “Na ni koproba arye, anggunti weik ikin pil dilamsukce talye tapu arye wenebuka olamsuk bukni, nara aning atonun kume, nara dipkoprob ikin pil dipsinirye, tatce ning kat ning arye obuka wenenamsine,” nyabuk.
Israel yala nang nirya ara, weik sum akunum upne talak ara, Yerusalem mutuku bana ati, amutuku welepnarye, amot nyalamike. Se, nun ni Allah, nun mal olan nang arye, min talak babye, wini talak babye, weik tonun tuba olyangasinyake. Ara, na mitikop ulamse talak arye dipdongobuka, na weik nebuka unye talak nirya ara, tuba pia wininyake. Diba, nun Israel yala nang nirya arye, neika ayupu ton nyanamabe.
Ance nyaplumba, ninye arye kekebuka laka nyalamik yupu ara, ani. “Anggun kekeplulume! Israel nang arye, yuk-yuk mutuku talibuka, deiyok-deiyok kiamik nang ara, akunum obuka batakikce, sirya dakik. Sik yuk mutuku yin talin nang ara, akunum obuka, sirya dakika ati, sik amutuku nang arye, talilamik ning alubuka doprobikce, tamubuka amutuku boyanuka arepsikura, nun mutuku urasin teleb kilapu arye, sik aik pum bisik ara, yuk-yuk ning nirya, bokuka arelanyake.
Tonda, nun apu koproba, Yusuf ap, el mapu silip nirya ati, Allah arye, ‘Aning ara, pia wininamlume,’ nyapdeibuk. Ara, Yusuf birye amutuku batakuka, Mesir mutuku ulamik nang ati, olbinamuk talak ara, Allah arye, ‘Aning wininamlume,’ nyapdeiamuk touk, wini talak nun babye atonun wininamabe. Allah arye, ‘Aning winipnamlume,’ nyapdeipsuk talak ara, ayupu min kum kekelamse. Asaf birye nyabuk.
Mesir mutuku winiryuk Raja, Firaun arye nyapdeibukba, el mapu arye, pil dona deiyok nang, yu nang dobuka kintinip deibik. Ara, ‘Sik Israel ninye kalikikirye, ikin ning, sik nong deice deipnamak’ tenen, wipdeibik. Winibikba, ayu nang arye, Israel ninye mikip arye talibukabikce, sik nong deice, ikin pil pia weik deibikba, ikin kanye bobuka, weik ikin piluk dolamik. Ara, Israel ninye arye, Firaun el ‘Na’ tenen ning delinak ati, kota si Piton mutuku ap, Ramses mutuku ap, pia ikin pil dolamika deice arye, akota bitinye pil dolamik.
Atalak noutamak ara, keting tamun weik, Israel ninye ap, neika amutuku daulamika ani, aminyan talak Mesir mutuku ninye deiyoknye, Firaun dibuk. Tonda, atalak noutamak ara, Israel nang keting tamun deice arye, ikin pil pia talye urdem pil dolamikce, weik mambul kanye bobuka engelamik. Sik ikin pil dona ap, mambul kanye bona ap ati engelamikce, “Se, nun ni Allah melibuka lyepsilyame,” nyabuka morolamikba, Allah arye kekelamuk.
Allah arye Musa dam nyapdeiamuk ning nirya ara, Musa birye Israel nang dam binuka lak nyabukba, Israel nang arye el yupu kekebik bukni, diba kum tenebika ati, elti, tamubuka kum dobolbalamik. Deiyok ara, ikin pil dolamik ati, mambul kanye bobuka ulamik deice arye, talima mitang kibukba, teleb ubuka kum tenepmanto ulamikce, Musa biti diba kum tenebikce, ‘Musa birye talye yupu nyapmasile’ tenebik.
Ninye ton malye winin ninguk talibuka ulamlanye biti, ‘Nun ninye deiyoknye upnamsil’ tenen, wibuka erepdeibikiba, elce amutuku ninye nirya taliplyopura, aning ara pia malye weik ulule. Ayupu ara talye ati kum nyapne. Winipmanto ara, bai tam ulamle yu singa kus do, bai tam ulamlarye ninye olamle ning, kam ning el si beruang do, ninye ati talye lukparabuka obikirye dinyake. Aning atonun, sik malye ninguk talibuka unyak nang arye, ninye deiyok nang bikikirye, talibuka ubicopura, sik amu tam bona utotoa talina kum ninye ara, pia ikin weik ning dobuka, sik nong deice delinyake. Ati, bai tam kam ulamlirye ninye olamle ning arye, ninye malye unyak nang arye, deiyok nang ubikirye, sik amu tam unyak ninye deice, ikin ning delinyaka ara neiktoto uka. Abitinye ning ara, kanye imun usulule.
Allah Yahweh, im deice unyak yin talin malaikat nirya, sik deiyoknye ulule. Elce nyapdeipsuke. “Na kayapu koproba, Israel nang bukni, sik Sion mutuku noutam unyak nang ati nyapsine. Sikda, Asyur mutuku nang ati, ilil kum unamlule. Sik Israel nang ara, minop talak Mesir mutuku ulamikba, sik deice ikin ning deibikce, yo kama dobuka, sik nong deice olamik touk, sik Asyur nang babye, atonun winipnamsiak talak ara, anang ati ilil kum unamsile.
Min talak ara, sik amalye ninye deiyok nang arye, pia yu upnukba, yuk mutuku nang nirya ati, tuba-tuba sik deice ikin ning deibuka olamik. Tonda, aninye deiyok nang arye, mutuku sirya, im sirya nirya ulamik nang nirya ati, ‘Anang ara, nun amu tam deipnamabeʼ tenen, yu ubukba, batakna kumce, anang ati pia tuba-tuba onauk ulamik.
Narye minop talak, anggun ikin upnaba, kanye imun kanye bobuka ulamsuk ning nirya ara, narye dopropnirye, anggun nong deice ikin ning delilamsik nang, anggun mal olan nang ati ara, sik deiceuk aning tamubuka deipnamne. Ara, anggun oldana ati yangalamik nang arye, anggunti, ‘Tuku deice mapmunyeba, anggun nong deice yanibuka binuyabe,’ nyabuka, anggun deice yanilamsik yu nang ati, narye wenepnamne. Sik anang arye, anggunti, ‘Tuku deice mapmunyeba, anggun nong deice yanibuka binamsiyabe,’ nyabika deice arye, winipmanto ara, anggunce tuku deice mapmunye talak ara, sik ayuk mutuku nang arye yanuka, anggun deice yanipdongopsike. Anggun deice ara, talye tuku bisik deice atonun ubuka, anggun nong deice yanibuka balamik. Bukni, wini talak ara, anggun Israel nang ati, ikin weik ulamsuk ning nirya ara, dopropnirye, anggun yanilongolamsik nang ati, sik deice deipnirye, weik tonun wenepnamne
Ati, wini talak ara, ‘Naʼ tenen, ninye yata wiribuka unyak do? Nara Allah Yahweh arye, nyapsine. Malye nang arye nati nyaninyak ning ara, pia malye ati, na lik weik unulule. Ara, Babel mutuku nang arye, yanuka obuka sirya daksikce, anggun ning nirya yanduka alabuka dopromsik ning ara, anggun dekna ati, Babel ninye arye nati kum arelamnike. Winilamikce, ‘Israel ninye pia talinamap’ tenen, kanye talima erelakirye, na Allah ati yep-yep anikirye, na si ati, malye yupu nyaninyake. Asum-asum nirya, na si deice pia malye nyaninyake. Nara, Allah Yahweh arye, nyapsine.
Na Allah arye anggun Israel ninye ati nyapsine. Anggunce nati, ‘Elce melipnamsil’ tenen, din dina kumce si tebuka umunce, teleb winipmunyopura, aning ara, mitik teleb bukni, dipkoprob pia teleb unamlum tenepse ning ara atia. Mikip nang arye yuk talye nang ati, deiyok kum wamlibuk, yu ubikirye tapu koubuka delinyak ninye ara, ‘Anang ati bico tenepmunce anang loltakanamlum’ tenen nyapsise. Tonda aninye ara deiyok kum wamliba, rantai tapu arye tapu koubuka, wenena aik dongonyak ninye ati, ‘Anang ati bico tenepmunce, loltakanamlum’ tenen, nyapsise. Tonda mutuku-mutuku nirya talibuka unyak weik deiyok nang arye, sik amu tam nang nong deice ikin ning delinyak ning ara, kum danaipmunce, aninye ati lobuka melipnamlulume. Winipmunyopura, na Allah arye anggunti kanye delinamsine. Talye kanye deibuka, din dina kumce si tebuka una ara kume.
Ati, anggun Israel nang arye, anggun tam nang buk, pia bona talina kumce, talye kankan unyak nang ati, pil dolamiki buk, dekna kumce, malye yupu nyana ap, ikin ning, sik nong deice delina ap ara, pia kum wininamlume. ‘Nunce talye kankan unyak nang deknamabe,’ teneplumce, talye lukparabuka kum wininamlume. Aning ara, kum bukni, ‘Se, nun ni Allah arye, wenepsilyakʼ tenen, anggun ni Allah, nati ilil tenebuka unamlume.
Ati, anggunce, sik yuk mutuku nang do, sikce delinamak mapu do, dekmunyeba, anggun pil don nang ubikirye, daulamikca ani, aminyan talak ara, anggun Israel nang arye, deiplum mapu ati, apil don nang arena telebe. Aminyan talak ara, anggun mapu ati, pil melibuka donamake. Apil don nang nirya bokukapmunce, anggun mapu koproba ati, apil don nang kipnamke. Ati ara, yuk mutuku arye tikilyangan nang, ninye asik nang ara, yo bok deice arye dekelumce, pil arukna ara, teleb uka. Bukni, anggun Israel nang arye, anggun tam nang, yuk Israel nang, anggun ap neika unamak nang, anggun kweit yapu nang ara, malye yupu ton kum nyalinamlume. Tonda, ikin ning sik nong deice, pia kum delinamlulume.
Sik pil melibuka donamak nang ara, deiyoknye el amu tam unamake. Apil donamak talak noutam ara, deiyoknye birye, “Aning ara, pil donamlume. Aning ara, kum wininamlulume,” nyalilamle touk ubuka, el pil dona melinanye birye, adiparyuk winipnamle. Bukni, anggun damuk unamaka ati, anye el pil melilamle deiyoknye birye, el pil melinanye biti, ikin ning weik, el nong deice kum delinamle. Tonda, elti, malye yupu ton kum nyanamle. Anggun yuk Israel nang nirya arye, ‘Pil deiyoknye birye, nun kwit biti, malye uplyakʼ tenen, el winilamlye ning ap, elce nyalamle yupu ap, moubuka kekenamlume.
Tonda, winipmanto ara, anggunce na mapu koproba Israel yala ninye ati, sik tup noutam, aubuk ning dobuka, dipnumunye talak ara, sik aninye nirya ati, yok cebuka batakmumce, sik tup kulolulume. Tonda, sik bol nirya sekuka, batakalulume. Winipmanto ara, basam tup toubukabikirye, makau pum bisik dongolamak touk winilulume. Aning atonun, basam toubuka mitik-mitik kibuka, yangalin ning, el si ara kuali deice arye, dabuka dilamak touk, anggunce na mapu koproba ati, winibuka dilulume.
Ati ara, anggun mal olan nang arye, minop yakirye, anggun asik nirya warekuka, antanap dongopnamaka ati, anggunda bai tam kum binmanto unamlume. Ati, anggun Niniwe mutuku nang arye, kintinip deipnamlume. Ara, anggun mek dina ati, mek weik tonun kwebuka, telebak dikdongobuka, kintinipnamlume. Tonda, anggunce, ‘Nun mal olan nang arye, kum wekuka opsitingeʼ tenen, anggun dam doplum mikip asik, aubuk benteng-benteng nirya ara, mikip tonap tabakuka, kintinip dopnamlume! Winimunce, anggun poka ulubuka bataknamak ning, tuba tamubuka lipsisikuka dopnamluma ati, mek bental noutam yanibukapmunce, kat keil, el si ara batu tehel, weik tonun tonap, memebuka kintinipnamlume. Tonda akeil, batu tehel yangap deipnamluma ati, aning deice taplakuka, mikip kilin ning, el si semen ton, kintinipnamlume. Tonda, akeil batu tehel memen yo babye kintinip deimunce, kintinibuka delinamlume!
Na mapu Israel ninye Mesir mutuku unyakbuk, sik nong deice ikin ning delinyakce daraldongonyaka ara, na dipkoprop elinune. Tonda, sik ikin kanye bobikce malye nyanyak ning ara, na kekepsirye, ‘Sik lyepnamne’ tenen, kolukuka yanmane. Ati, wini talak ara, narye tamubuka Mesir mutuku dopkwetepnamakine, nyabuk.’ (Keluaran 3:5-10) Allah arye Musa ati nyabuk yupu ara, Stefanus arye dobuka aSandeheren nang ati nyabuk.
Aning nirya ara, talye ning ulul bukni, anggun Israel ninye tonok ara, Allah arye akunum wipdeipsukce, ‘Na tenena ninye’ nyabuka, akunum nyapsuke. Tonda, ninye arye besi do, emas do, ‘Malye ning kum dalirye, teleb ning pia upnamle’ tenen, uku dalamikiba, uku diplirye, malye ning kum danalule. Aning atonun, Mesir mutuku noutamak, Allah arye anggun Israel ninye malye winin ning ati, kilipsukce, ‘Winira, anggunda diksukum ninye unyake,’ nyapdeipsukce, teleb ninye uk kipdeipsuke. Teleb kipdeipsukce, Mesir mutuku noutamak arye, ikin weik ulamupu buk, dalubuka dobukapsukce, lyepsuke. Wini talak, anggunda, el ‘Naʼ tenen, ninye akunum ululume. Allah arye anggunti, ‘Na mapu’ tenen, melibuka pia talipnamsile.” Musa birye nyabuk.
Nyanmekba, Naomi birye sikti, nyabuk. “Anggunce na si ati, ‘Naomi’ nyalamnulum bukni, asi tuba sinina kume. Asi sina deiyok ara, ‘Kanye teleb bolul kil,’ ulula anya arye, asi tonap tuba kum sipnamnulume. Anggunce nati, minop si batakuka, na winiryuk si, ‘Mara’ nyapnamnulume. Asi sinina deiyok ara, nara ikin kanye weik bobuka, unun kil ati ara, akil si, ‘Mara’ nyapnamnulume. Mara nyana si ara, ‘Ikin kanye bolul kil,’ ulula anya arye, asi uk sisinamnulume. Deiyok ara, Allah aning-aning deice tam ulirye, el mikip weiknye El-Sadai birye, walwal kipdeipmanukba, na dam kanye ikin weik ninguk unulul ati, nyapsine,” Naomi birye nyabuk.
ကြော်ငြာတွေ