Keluaran 1:12 - Eipomek

¹² Mesir mutuku nang arye, ikin ning weik, Israel ninye nong deice deiamikba, ikin weik ulamik touk, Israel ninye arye, mapu weik deibuka, dadeipdanin biyik deice arye, amutuku noutamak binuka ulamikce, weik ubukba, Mesir mutuku ninye arye sikti, ilil weik ubuk.

Keluaran 1:12 ပူးပေါင်းရင်းမြစ်များ

Kejadian 46:3

Nyabukura, Allah arye nyabuk. “Nara Allah unune. An ni koproba Isak birye, si erelamuk Allahuk unune. Mesir mutuku koulukuka bana ati, ilil una pia kume. Deiyok ara, oumutuku bimunyeura, narye amutuku noutamuk pia teleb kipdeipnamkine. Narye meliamkiniba, an mapu arye deibikiba, dadeipdanin banamak ninye nirya, pia weik upnin banamake.

Nehemia 9:23

Ance meliamluma deice arye, Israel ninye sik mapu pia weik arelalumba, kurya im deice tiklamle atonun, aninye arye mapu weik delilamikba, yupa weik kipnin balamik. Tonda, ance nun ni yapu ati, “Teleb mutuku arepnamsine. Amutuku wekmunce talibuka unamlume,” nyapdeiamsulum mutuku, sik delilamik mapu ati areplume. Areplumba doprobikce, amutuku telebuk pia ulamik.

Ayub 5:2

Nyabukce, ayupu ton nyabuk. Bita moubuka kum teneplirye, walwal uk ululnye bira, kanye talima noutamuk, yuk nang arye elti, malye winibik ning ara, tuba-tuba teneplirye yu uplyopura, adeice arye dibilule. Aning atouk, moubuka kum tenenyak nang ara, yuk nang unyak ning ap, talinyak ning ap ati, ‘Se, aning ara, na uk doproptinye,’ tenen, kanye talima uk dilya deice dibinyake.

Mazmur 105:24

Allah arye Yakub el mapu weik kibuka deipnin balamukce, mikip arelamukba, pia mikip weik ulamika anya arye, sik mal olan nang arye, yanuka kum obuka, bisipmanto ulamik. Israel ninye ulamik mutuku dana-dana tam ulamik ninye ara, mikip mitik asa arye ulamik bukni, Israel ninye ara, mikip weik asa arye ulamik.

Mazmur 107:38

Allah Yahweh arye, sik aninye ati melilamliba, sik mapu delina ati ara, weik tabakuka arepnin baliba, delinamake. Winipnin banamaka deice arye, sik mapu nirya, pia weik deipnin banamake. Tonda, sikce talibuka weinamak kam ning ayala-yala nirya babye, pia weik upnin banamle.

Keluaran 1:20

Nyaprikba, Allah arye sik mapu delin ati, kwetena kilapu ati, kanye deibuka teleb kipdeibukopura, Israel yala ninye mapu weik deibuka, dadeipdanin balamika ani, ninye pia weik ubuk. Minop talak, weik aulamuk bukni, atalak diprongobuka otam ara, ninye pia weik upra balamik.

Keluaran 1:7

Bukni, sikce delilamik mapu ara, Israel ninye Mesir mutuku ulamik talak ara, mapu weik minopce deipunubikba, ninye weik ubuka ulamik. Israel ninye pia weik ulamika anya arye, Mesir mutuku noutamak nirya, ninye weik ubuk.

Keluaran 1:9

Anye birye, el amu tam ulamik ninye ati nyabuk. “Anggun ton dipdelulume, Israel ninye, yupa pia weik akunum upmaka ati ara, sik mikip weik ubikca deice arye, nun yanipnamsiyake.

Amsal 21:30

Yata ninye do nirya, sikce, ‘Wininamabe, teleb una ara ani. Nunce pil donamap ning ara ani,’ tenebikirye, ‘Yata wiripnamap do?’ tenen, pia weik kel kilamik nang ap, yupu taliptingce, pia mambul kirikuka piripdeca babye, Allah Yahweh arye, ‘Wininamne,’ tenyamuk ning ati ara, tukwak ninye arye kum malye kiptinge. Allah arye tenelul touk ulula atie.

Amsal 27:4

Tulum weik upsiliba, malye yupu weik arye nyabibiba, yuk nang kekebikirye, talima uk dilule. Tonda obuka bataklobikirye, yan tamnanyake. Tonda, winipmanto ara, weik mek oplirye, aning-aning nirya dobuka bobaliba, ninye arye, ‘Se, aning ara mambul weik,’ tenebikirye, engenyake. Talima uk dilamsil ning ap, mek oplirye nun ning bobalamsil ning ap ara, mitik ikin ulul bukni, aminyan talak aning nirya ati, “Dauplye,” tenebibirye, tuba tamubuka teleb kanye bobuka unyabe. Bukni ninye tonoknye birye yuk nang ati, ‘Sik talinyak ning ara, naryuk taliptinye’ tenen, el talima uk dilamliba tenelinye bira, yata nang arye el ap neika upting do? Kume, atenenyak ninye arye, malye weik kilisikiba, ikin pia weik usulula anya arye, ninye nirya arye ato nang ati, ‘Nun like,’ tenenyake. Kume, aning ara, ikin pia weik anya arye, aning ara malye weik ulisulule.

Bilangan 22:3

Tonda, Moab mutuku noutamak ulamik ninye arye, Israel ninye, sik ninye yupa pia weik ulamikba, ninye kum nukmanto ulamikba eiyamika ati, sik amutuku ninye ilil ubukba, yok sirim talibuk. Ara, mitik anun arye kume. Dipkoprop Moab mutuku ninye arye, Israel ninye ara, ninye weik yangayika ati, weik ilil ubuk.

Yohanes 12:19

Ninye yupa weik arye Yesus dam balamikbuk, sik Farisi nang arye nyapdayik. “Se, anye biti yupu sekmaba ara, nong kum upnamsile. Dipdelulume, amutuku-amutuku ninye nirya ara, el tam kipropmaka atia,” nyabuka nyaldanmek.

Roma 8:28

Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.

Ulangan 26:5

Winiplyopura, anggunce Allah dam ati, nyapnamlulume. Minop talak ara, na yok pununanye Yakub bira, Aram mutukunye ulamukce, el mutuku koproba ton, kum ubuka ati, tonok mutuku uk, kum ulamukce, obinuka, ayanuka talye balsusulamuke. Balsusulamuka ani, el ap, el kilapu ap, el mapu ap, el kilmapu ap, sik mapsilip nirya ap, mitik tonun dem ulamikce, sik Mesir mutuku biyikce ulamik. Mesir mutuku ulamik talak ara, ikin pil dolamikce, tonda talye tikilyangan nang atonun bukni, sik mapu weik deipdanin balamika ani, yupa weik kipnin balamukce, sik mikip ton weik upre balamukba, yuk mutuku ninye nirya arye, ‘Se, anang ara, mambule,’ tenelamikce, bikamik. Sik ninye weik upnin balamik ati, wini talak ara, nun weik unyabe.