Imamat 3:17 - Eipomek17 Ura, aning nirya laka nyapmasin yupu nirya ara, anggun Israel yala nang ara, ‘Allah arye nunti, ‘Wininamlume,’ nyapdeipsuka ati, aning nirya talibuka pia wininamabe,’ tenenamake. Tonda, yata kam ning do nirya, el ining ap, meta ap, kop ap, dobuka dina meme. ‘Aning ton dobuka dipnuyabe,’ tenebuka, pia kum dinamlume. Anyapman yupu ara, batakna meme. Wini talak arye dipdongobuka, dounamle talak nirya ara, pia tuba-tuba nyanauk unamlame. Nyanamlama deice arye, sik Israel yala nang nirya ara, ayupu kekebikirye, bikuka pia winipnin banamnyake. Allah Yahweh arye, anyabuk yupu nirya ara, Musa kekebukce, Israel nang dam, yanuka lak nyabuk. အခန်းကိုကြည့်ပါ။ |
Imamat 3:17
42 ပူးပေါင်းရင်းမြစ်များ
Allah arena ati, kam ning obuka, uku dongonmek ning ara, pia weik boyanganmik. Aning atouk ton, ayanmekce, bulubuka wekmek nang arye, ‘Allah ap, nun ap, teleb kibuka neika unamapʼ tenen, ansinilina ati opmik kam ning kalebuka, abasam-abasam nong arye, meta arye dopropmik ning ara, pia weik aubuk. Tonda, sik imam nang arye, ‘Anye arepmapye ning ara, pia teleb, sah kipnuyapʼ tenen, adiparyuk anggur mek ap, aining ning kintinibuka, mesba deice deipmek deice arye, dikeibik ning ara, pia weik aubuk. Mesba deice deibuka uku dongobikba, uku arye dibukopura, sirya dakuk. Minop talak ara, Raja Ahas birye, Allah el si eren aik bublan tirikdongobuk bukni, asum arye aning-aning nirya winipmek deice arye, Allah Yahweh el si eren aik pil don nang nirya ara, tupa tonap teleb kipdeibikce, sikce, ‘Apil nirya, awinibaba atouk, tuba awininamabe,’ tenebik.
Nyabikura, Nehemia birye sik Israel ninye nirya ati, nyabuk. “Anggunda kum engenamlum bukni, pia teleb din ning ap, to ning ap, teleb mek ap, dilbinamlume. Winipmunce, yuk tam nang ara, ateleb dina kum kintinipmace nang ati, dobuka arepnamlume. Arup ara, Nun ni koprop Allah, el si Yahweh, el weik mambul sum upmasile. Ati, wini talak ara, engena kume. Nun ni Yahweh arye, el melisilya deice arye, kanye pin-pin usulule. Ateleb kanye talima arisilya deice arye, mikip kilisulule. Ati ara, asum engena kume,” nyabuk.
Na Allah ap, ninye ap, neika una ati, kintinipnamlum aik noutam bukni, narye Musa biti, “Aning ara, wininamlulume, aning ara, pia kum wininamlulume,” nyapsiba, Musa birye, kil bitinye deice seksiba, ayupu libuka boyanamuk marikna, el si Peti Perjanjian pum tam deipnamle aik, Pia Teleb Lek Aik nyanyap ati ara, anyaik wilina ati, lapkwetepnamlam cang kain, gorden bai tam atonun upnamle ara, lampu weisa delinamlulume. Alampu upna kalikin nang ara, Harun ap, el mapu ap, sikcuk, ‘Aupna tangaplyakʼ tenen, sikcuk sintam arye dipdongobuka kalikuka, pil donmakcebuk, beren tam kinamle. Atalak noutam nirya ara, anyaik deipnamle upna, pia lana uk unamlulume. Aupna pia lapliba, na Allah Yahweh arye, aupna lapliba, pia dinamne. Narye aupna ati, lak nyapnamkin yupu ara, pia kum bataknamlyame. Ati, atalak arye dukdongobuka, dounalam keting tamun noutam nirya ara, Israel ninye arye, apil pia donamake. Ara, Harun birye deipliba, deipdanin banamak ninye nirya babye, nyapse touk pia ati wininamnyake. Allah arye Musa biti laknyabuk.
Sik, aimam nang ara, na Allah si eren aik ara, na aren ning uku dongona dam binukce talak ap, na Allah Teleb Lek Aik noutam bukni, anyaik si Teleb Aik binukce talak ara, nunukne baju ap, celana ap nirya ongobuka binamnyake. Nunukna baju ap, celana ap, kum ongobikcopura, malye una deiyok ning, sik nong deice tuba aupmalyeura, elce sikti, wenebuka opnamne. Ura, na Allah arye, ‘Abaju ongopnamake,’ nyapdeipmakin yupu nirya ara, Harun ap, el mapu ap, sikce pia wininamake. Tonda, sikce deibikiba, dadeipdanin banamak nang nirya babye, na aik pum tam pil don talak nirya ara, aninguk talibuka, pia winipnin banamke. Atalak arye dipdongobuka, dounamle keting tamun noutam nirya ara, Israel ninye arye, ayupu pia kum bataknamake. Allah arye Musa biti ayupu nirya lak nyabuk.
Ati ara, ance sik Israel nang ati nyapnamlame. “Na Allah Yahweh, aning-aning nirya talibuka, deice tam erebuka, mikip weik ununye birye nyapkina ati, na yupu nyapdeipkin yupu ara, ance bobuka, sik dam laka nyalbinulyame. Ayupu ara, ani. Narye, ‘Aning ara, na like,’ nyapsise bukni, anggunce tuba malye weik winilulum ning ara, laka nyapnusine. Ara, anggunda ining tuba unmalye ninguk, kwalipmunce, ining kipmanuk dobuka dilulume. Tonda, ‘Nun ni birye melipnamsilʼ tenen, anggunda isa mer siuk erelulumce, ninye on nang ululume. Winipnin yangalamluma deice aryuk, pia mandipna kanye bolamlumce, ‘Amutuku nirya ara, nun mutuku koproba kipnamsilʼ tenen, Allah arye, amutuku tuku dobuka, nunti arepnamsile,’ nyaninyake.
Nara, Allah Yahweh, aning-aning nirya talibuka, deice tam erebuka, mikip weik deiyoknye birye, ayupu nyapkine. Israel yala nang, talye daulamik nang weik tam ara, minop talak bataklamnikce, malye weik ulamik bukni, Lewi yala nang kan-kan, ton tam nang ara, kum bataklamnikce, na si eren aik pum tam, pil tuba melilamik. Ara, ninye el si Sadok, elce deiamukba, dadeipdanin yangalamika ani, deibikba unyak nang ara, na si erena ati, Israel nang arye arebikceba, kam ning dobuka obikirye, Israel nang, sik malye winin ning kum danalina ati, mesba deice uku dongonamake. Ara Lewi yala nang bukni, sik tuba teleb unyak imam nang ati nyapne. Minop talak, sik Sadok tam nang ara, Israel yala nang nirya arye, nati batakamnikce, malye weik ulamik talak ara, anang arye tuba teleb ulamikce, na si eren aik pum tam uamuk ning nirya kaliklamik. Ati ara, wini talak ara, sik Sadok tam imam nang arye, na dam yanuka, na si eren aik noutam pil donamake. Ara, Israel yala nang, ‘Nun malye unyap ning, Allah arye namin kibuka kilipsutueʼ tenen, kam ning arebikceba, Sadok yala imam nang arye, opnopura, sikcuk mesba deice uku dongonamak pil talibuka donamake. Israel nang arye, akam ning arebikceba, Sadok yala imam nang arye, aning kalebuka, meta ap, ining ap, doprobikirye, na Allah ati, arenamninyake.
Sik anang ara, malye winin ning, pia weik wininyaka deice arye, na si eren aik pia malye weik kililanyake. Na si erena ap, na si erebuka kina ap ati, sikce domba basam opnarye, abasam el meta ap, ining ap tuba arepnulum bukni, anggunce apia malye-malye weik ululuma deice arye, aning nirya, pia malye kililulume. Tonda, sik Israel yala nang arye, yuk yala nang, talye-talye daunyak nang ara, sik den bama mouse kum sekenyak bukni, sikce, ‘Kume, Allah el si eren aik dam talye mangkau asa wektume,’ nyaluluma deice arye, pia malye ululume. Aning atouk, anang ara, yuk mutuku ninye asik nang unyakce, narye, ‘Aning ara, wininamlume, aning ara, pia kum wininamlume,’ nyapdeiamsise yupu ati, diba kum tenebikirye, yanininyake. Tonda, na siuk kum ereninyaka ati, na dam pia kum yanmanto nang unyake. Sikda, den bama mouse kum sekikirye, sik kanye talima ap, sik nong nirya ara, malye tuba unyaka ati, na dam kum yatinge. Ati, sik Israel nang arye, na si erena ati, kam ning nirya obuka, ining ap, meta ap dobuka, nati arelyanganinyak talak ara, sik aninye asik nang ap ansinipmunce, na si eren aik dam kum yatume. Amalye ning weik winimunya deice arye, na si eren aik, pia malye kipdeipnuluma deice arye, na pia like unulule. Narye sik Israel nang ati, ‘Aninguk wininamlume, aning ara, pia kum wininamlume. Winipmunyopura, naryuk, winibuka kaliksinirye, pia melinamsine,’ nyabuka, nyalin yupu deice arye nyapdeiamsise ning nirya ara, anggunce akunum yaniltanauk ululume.
Ura, akunum laka nyapdeipsise touk, abasam yan keil tup, sirik tam ning ap, abasam mun ap, Allah Yahweh el arena ati, el urasin damuk, Israel nang arye, sik taruk erebuka talibikirye, binuka peterebikirye, ‘Telebe,’ nyabiceura, sik imam-imam nang arye, aning kintinibibirye, sekuka delinamlume. Tonda, aning boyanganamak talak ara, abasam meta ara, adiparyuk bobinuka arelbanamake. Israel nang arye, aning nirya Allah ati, bobikcopura, imam nang arye, mesba dam binuka uku dongonamlume. Bukni, abasam mun ap, sirik tam yan keil tup ap, meta ara, tuba aupmalye ning ara, ance dopropnamlyame. Abasam mun ap, sirik tam yan ap, meta ara, Harun an ap, an mapu nirya ap, anggun dina ati, dopnamlume. Ati, aning nirya ara, dobuka dinamlume. Ara, mince Allah arye, “Anggun imam-imam nang ap, anggun mapu silip ap, dipnamak ning ara, ani. Anggunce wininalum touk, anggunce deipmunyeba, dadeipdanin banamak nang nirya ara, aning atonun doyanamle talak babye, atonun pia wininamnyake,” nyapdeipse touk nyapsine. Allah Yahweh arye, ayupu na dam yanuka nyapdeipnuke ati, laka nyapsine.” Ayupu nirya ara, Musa birye Harun ap, el mapu ap nirya ati, laka nyabuk.
Harun, an ap, ance deiamlum nang, an mapu ap, sik nirya ara, kanye walawalan anggur mek, yu mek do, yuk yala kanye walawalan mek do, dipmunye talak ara, na Allah ap, ninye ap ansinilina aik pum tam ara, pia kum wekelyanganamlume. Anyapmasin ning kum kekemunce, talye lubakibuka anyaik wekmunyopura, anggun adiparyuk dipnamlume. Ayupu nyapdeipsin ning ara, anggun ap, anggunce deipmunyeba, dadeipdanin banamak nang, sik imam-imam nang ap nirya ara, pia kum bataknamlume. Ayupu dem nyapdeipdanin bamunce, pia talibuka wininamlume. Ayupu ara, pia kum bataknamlume. Allah arye nyabuk.
Allah arye Musa biti nyabuk. Wini talak anyapnusin yupu nirya ara, pia, adiparyuk wininamlulume. Apil nirya kum bataknamlulume. Ara, wala tekbarye ning, awala noutam like tagu barye sum (tanggal 10) deice arye outam sum, akunum uplyopura, anggun kanye nimalyap asa ubuka, Allah el amu tam umunce, din dina kum, pil babye ton dona kume. Awininamlum ning ara, anggun Israel ninye koproba babye, anggun dam tikilyangan nang babye, sik yuk mutuku ninye bukni, anggun neika umunye nang babye, anggun nirya ati nyapsine,” Allah arye nyabuk.
“Anyapmasin ning ara, anggun pia ati, aketing tamun, aketing tamun nirya, like tonok deice aryuk, apil dopnin banamlulume. Ara, na adiparyuk opsitinye bukni, anggun pununa ati, Israel ninye anggun malye winin ning kilibuka lyena ati, anyapmasin pil pia donamlulume,” na Allah arye nyapsine. Aning ara, Allah el si Yahweh arye, ‘Wininamlulume,’ nyabuka, Musa biti nyabuk touk, Harun birye anyapmok ning nirya atonun, binuka pil dopnin balamuk.
Sik Israel yala nang nirya ara, Allah Yahweh arye, “Winibuka aning wininamlume. Aning ara, pia kum wininamlume,” nyapdeipsuk ninguk, pia ati moubuka talibikirye, wininamyake. Tonda, domba ato ning obukabikirye, sikce kum bikinyak ning, malye un isa-isa si eren ati, kambing basam urasin atonun memebuka deibikirye, aning si erena ati, aning obuka kum arenamyake. Aisa mer si erena ati, kam ning obuka arebikceura, yuk talye kilapu ubula yona atonun winin ning winiyak ati nyapsine. Aning ara, ‘Na pia like,’ tenenune. Ati, Allah arye akunum nyapdeipmasil yupu, “Aninguk winibuka talipmunyakarye wininamlume,” nyapsuk ning ara, ayupu pia ati, moubuka talibikirye, wininamyake.
Anyapmasin ning nirya ara, pia tuba-tuba winipra banamlume. Ara, moulamle ning min yuma ning ara, na Allah ati, min kum arepmanumunye talak ara, roti ap, gandum imbik ning ap, ura gandum do, yakong do, ato ning, uku dapmaminye ning babye, mitik ning babye, ton kum dinamlulume. Nati, min yuma lipmamunye ning, wibuka akunum arepnumunyopura, aminyan talak ara, anyapmasin ning nirya, dina telebe. Anyapmasin ning ara, anggun ap, anggun mapu ap, anggunce deipnamlumba, dadeipdanin binamak ninye nirya ap, aning pia winipra banamake. Tonda, amutuku babye, yuk unamlum mutuku babye, anyapmasin ning pia winipra banamlume, kum bataknamlulume, nyapsine. Allah arye Musa biti, nyabuk.
Aning nirya winipmunye sum babye, ance Israel ninye ati, nyapnamlyame. ‘Asum ara, nun nirya bulubukap wekibirye, weik sum upnamsile. Tonda, Allah elti, winilen sum anya arye, asum-asum nirya, ikin pil dolulum ning nirya ara, asum ara, pil ton dona meme. Dikdik sebuka, Allah el si Yahweh, el siuk erenamlulume. Anyapmasin ning ara, anggun ap, anggun mapu ap, anggunce deipmunba, dadeipdanin, banamak ninye nirya ara, aninguk, pia winipra banamake. Tonda, amutuku babye, yuk unamlum mutuku babye, anyapmasin ning pia winipra banamlume. Pia kum bataknamlulume, nyapsine. Allah arye Musa biti, “Ance sik Israel ninye biti, ayupu nyalbinamlyame,” nyabuk. Ayupu nyabukce, ayupu ton nyabuk.
Alampu weisa nirya ara, Harun elcuk moubuka kintiniplirye, pil donamle. Ara, kum inipmalye talak arye dipdongobuka, lukunyan nirya lapmalya ani, bereknamle talak nirya, moubuka kaliknamle. Allah Yahweh, elda asukumuk pia unamla ati, elce aweisa lampu dinamle. Allah el nyalin yupu lin peti yo marikna, el si Peti Perjanjian, amekina pum tam deibik aik otam, Pia Teleb Lek Aik ubukak bukni, atam ara, yuk aik wilibuka deibik aik, el si Teleb Lek Aik anoutam ara, cang weik kain lapkwetebik. Ara, Pia Teleb Aik wilibuka lelibuk ati, Pia Teleb Lek Aik otam ubuk buk, atam ara, aweisa teleb kibuka lanamle. Anyapmasin ning nirya ara, anggunce deiplumba, dadeipdanin banamlum nang babye, atonun pia apiluk dopnin banamake. Ara, wini talak unyak ninye arye apil winibuka, aminyan talak nirya aunamak ninye ara, atouk pia apiluk wininamake.
Aroti kwaning dabuka delinamak ning ara, Harun ap, Harun birye deiplyeba, dadeipdanin banamak nang nirya ara, sik din ning upnamla atia. Sik imam nang arye, aroti kwaning dinamak sukum ara, pia teleb aik pum tam aryuk dinamake. Aroti ara, pia teleb lek mingne ning ulula ati, pia teleb sukumuk dinamyake. Tonda, yuk ning, Allah Yahweh si erena ati, imam nang dam boyakirye, arenamak ning ara, sikce doprobikikirye dinyak ning ara, mitik mambul ulul bukni, aroti kwaning ara, mambul weik ning ulule. Tonda, aning nirya ara, Allah Yahweh, el si erena ati, uku dongolamak atonun ning upnamlule.
Aning-aning nirya ara, Allah ap, ninye ap ansinilina ati, sapi basam bol arye domik doltakne tenda aik pum tam, pil talibuka dona deiyok nang, sik imam-imam bukni, atalak pil donmalinye biryuk, aning nirya doproplirye, pala keil yangabuka kintinip deibikak, aning bobilirye, binuka uku dongopnulule. Winibuka uku dongopliba, atup ap, meta ap, kop ap ara, uku diplirye, siltong teleb ning ara, weleplirya ati, Allah Yahweh kekeplirye, el kanye teleb unamle. Luba kina meme. Akam ning noutam wamlye meta ap, deisuruk dam palilamle kop nirya ara, Allah elti, arenamlule. Aning nirya ara, Allah Yahweh, el ninguk ulula atia.
Sik imam-imam nang noutam bukni, ‘Atalak ara, anye pil donamsilʼ tenen, wipdeibiknye, el aimam deiyoknye, adiparyuk roti kwaning deiyok ning, el si tepung, pia teleb atu atonun, noutam arye tonok taruk deice mitik tonun boyalirye, tonda minyak mek ap, tonda siltong teleb nyan ning, el si kemenyan ap, kam ning obuka, uku dongonak arye, yanuka uku dongonamlule. Deiyok ara, ‘Auku dongon din ning nirya ara, Allah Yahweh ati arepne. Aning nirya ara, el ning ukaʼ tenen, lake bikilina ati, wininamlule. Uku dongopliba, uku diplirye, siltong teleb ning ara, Allah Yahweh el dam welepliba, kekeplirye, el kanye teleb unamle.
Adin ara, pia ati, Harun ap, elce deiplyeba, dadeipdanin banamak nanguk nirya bukni, aroti din ning arepnamak noutam arye, Allah ap, ninye ap, ansinilina ati, doltakna aik pum tam pil dopra banamak nang ati ning ara, Allah Yahweh ati, yanuka arebikiba, uku dongobikceura, ton tuba aupmalyopura, Harun el yala nang, sik dina atia ati, aning dobuka dinamnyake. Ara, Harun el yala nanguk, aning-aning nirya, pia ati winipra banamake. Allah el kanye ara, ‘Aning ara, pia teleb ning, na ning,’ tenelule. Ati ara, anyaik pil dona kum, talye nang arye, Allah ati, arepmace ning noutam ara, dobuka dina pia meme. Allah ati arepnamak ning ara, yatanye birye do nirya, aning sik bolpibikcopura, Allah el kanye ara, ‘Sik anang adiparyuk telebuk wininamake,’ tenelule. Deiyok ara, Allah el kanye ara, ‘Aning ara, ‘Naʼ tenen ning, pia teleb ulule ati, adina deice ara, pia mikip weik ulule.
Awininamlum ning ara, atalak-atalak nirya wininamlume. Bukni, aminyan talak ara, Harun birye deiamlye nang, sik kan-kan noutam bukni, el pununa ati, tonoknye wipnamlume. Ara, ‘Atalak Allah arena pil talibuka dolulnye, Harun el pununa ati, elce deiamuk mi tonok wipminba, anye Imam nang, sik deiyoknye unamleʼ tenen, anye wibuka deipnamlume. Anye wibuka deipnalum sum ara, anye diamuk, ateleb roti din deiyok ning, tepung kintiniplirye, elcuk Allah ati, arepnamle. Aning pia ati, arepra banamniake. Ara, Allah Yahweh, el ‘Naʼ tenen ning ati, el arena ning ati nirya ara, aning kintinipmince, bobuka winibuka uku dongobikirye, arenamnyake. Uku buk arye, aning nirya dipnamle.
Ura, ara talye ati kum nyapsine. Deiyok ara, aopmace basam yan tup ap, basam taram ap, na Allah Yahweh, na si erena ati, na din tam erebuka binuka taliplirye, na arena ati, lake kilinamnulule. Winiplye talak ara, ‘Aning ara, Allah Yahweh el ning ukaʼ tenen, yukak kintinibuka delinamlule. Ara, aning ara, nati arenamnulule. Akunum arepnilyopura, narye, ‘Aning ara, sik imam pil don nang, sik ning,’ tenepnirye, narye sikti, arenamne. Ati, anggunce, ‘Allah ap, nun ap, teleb kibuka neika unamapʼ tenen, arenamnulum domba ato ning ara, kalebikiba, sik imam nang arye, aopmace basam sirik yan tup ap, basam mun ap, dopropnamniyake. Ara, Harun ap, elce deiamlye nang, sik imam-imam nang, sik ning ati, na si eren aik pum tam talibuka, pil donamak nang bulubuka, deibikirye, yanuka arenamlume. Aning ara, asum arye dipdongobuka, doyanamle talak nirya ara, pia ati, aninguk wininamlume.
Sik Israel deiyok nang arye, ‘Aning arye, Allah ati arenamap ning dobuka, nun pununa ati, Allah Yahweh ati arenamake,’ tenebuka, anggunce anang wipdeiamlum sum deice arye, na Allah arye laka nyapdeipsise. Ara, “Aimam nang, sik pil donamak ning pununa ati, sik Israel nang arye arenamlum ning ara, ani,” nyapdeipsise. Ati, atalak arye dipdongobuka, dounamle talak nirya babye, anyapmasin ning dobuka, sik imam-imam nang, sik dina ati, winibuka arenamlume. Anyapdeipmasin ning ara, anggun Israel yala nang arye, moubuka talipmunce, namin arye pia ati winipnin banamlume. Aning atonun, anggunce deiplumba, dadeipdanin banamak Israel nang babye, aning atonun, sik imam nang ati arelbanamniake.
Anyapdeipmasin yupu ara, wini talak arye dipdongobuka, pia dounamle talak ati, anggun Israel nang arye, aninguk winipnin banamlume. Aning ara, pia kum batanamlume. Ara, malye ning bol pipmakce nang, akunum malye winibikcopura, sik malye winin ning kum kilina ati, narye, ‘Winipnamlume,’ nyapdeipsise touk, mek likin pil donamlume. Anggun tuba tonap, teleb ulina ati, pil dopmalinye, el nong babye, el ongoplye baju babye, adiparyuk mek likilongonauk wininamlule. Tonda, mek likdalirye, bataknamle mek ara, aning ton bol pina kume. Yatanye do nirya, amek ton bol pipnamlanye bira, malye updeipdanamle. Amek bol piplyopura, malye ning bol pipmalula anya arye, atalak arye dipdongobuka, asum noutam nirya ara, malnye uk daunmalya ani, asum akunum iniplyopura, tuba tonap telebuk unamle.
Nyabukce, el yupu kekebuka dobolbalamik nang ap, abulubuka wekmek nang nirya ap ati, “Na dam yalulume,” nyabukce ayupu ton nyanmok. Yata kil do, yatanye do, nati diba tenepnikirye, na dobolyanganamniyak nang ara, sik ning atibuk, ‘Aning mambule,’ kum tenenamake. Sik wenebikiba dipnamak nanguk, wanwanun yo bobuka talya mangkau asa balamikirye, ‘Akunuma, anang arye oplopnamniaka ara telebuka, na kam unmana ara mambul kume,’ tenenyak touk, na mapu ababye, ‘Yu nang arye opnamniak do?’ tenena kumce, sik kam un ning ap, sik patalye ning ap atibuk, kum tenenamake. Yesus dib tenenyaka ning ati ara, yuk nang arye opnukcopura, ‘Ara mambul,’ kum tenenamake. Na yupu uk kekebuka dobolyanganamniake.
“Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.
Yata din ning do nirya, yuk nang arye, ‘Nun ni’ tenen, si talye erenyak ning, ‘Kibuka si erepnamabe’ tenen, obuka arebice ning ara, nun dib tenenyap nang kum dipnamtibye ning ati, anggun Yahudi yala kum nang babye, adin yala nirya pia kum dinamlume. Tonda, ining mek yala nirya pia kum dinamlume. Tonda, ngang kotokuka obikcebuk diplyopura, ining kum saklamle ning nirya, nong pia talye kalibuka kum dinamlume. Tonda, pia talye-talye ubula kilapu kum yoldanamlulume. Aning pia kum winipmunyopura, telebuk kibuka unamlume. Telebe, ayupu asukumuk sekdeipsiape.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Kristus arye, elti, dib tenebupu ninye ati, dibukce lyepsuka deiyok ara, nyapnusine. Ara, elce utenyamsuke. ‘Anang ara, na mapu unamak’ tenen, na laka teleb yupu deice arye, sik malye winin ning kum danalina ati, aninye ara, mek likina atonun kipdeipnirye, sik malye winin ning nirya kilipnirye, kum daneipnyopura, aninye pia teleb kipdeipniba, ‘Na mapu dipkoprop unamake,’ tenepsukce dibuke.
Tup ning toubuka dina teleb bukni, ining kipman dina pia meme. Deiyok ara, ining ara kam una deiyok ning ulula atia. Yata yala ning do nirya, ining tuba kum uptopura, kam tuba kum uptu ati, ining dina ara pia meme. Ati, kam ning ayala-yala nirya opmunce, el tup ap, ining ap tabakuka dina pia meme. Ining dipmunyopura, pia malye upmunyake.
Tonda, Allah arye melilamukba, sik sapi basam ap, kambing basam ap, moum yung mek weik aubukba, dololamikce dilamik. Tonda, domba basam ap, kambing ap, nong weik ning areamukba, obuka tup diamuk dilamik. Ton ning ara, Basan mutuku domba yim ning, pia teleb ning ton areamukba, obuka dilamik. Tonda jagung atonun din ning, gandum ap, tonda anggur mek teleb ninguk, areamukba dobuka dilamik.
ကြော်ငြာတွေ