Kwepdeibukce, sikti, teleb yupu nyabuka, teleb kipdeibukce, nyabuk, “Anggun mapu weika arye, deipnin balamdumunya arye, tukwak ninye weik upnin banamake. Im sirya, mutuku sirya, mutuku-mutuku nirya binuka umunce, aning-aning nirya ati, malye kibuka talinamlume. Mekwen noutam ulye mek pum bal ikan ap, im deice lakuka balamle maka aning-aning nirya ap, tukwak yanibuka balamle kam ulamak ning nirya ap ati, talipmunce, deiyok nang kibuka unamlume.” Allah arye nyabuk.
Imamat 26:9 - Eipomek9 Na Allah ara, anggun damuk bico tenesinirye, anggun dam unamsina ati, narye anggunti melinamsine. Meliamsinya deice arye, anggun mapu babye, weik tonun arenamsine. Ara, anggunce deipmunba, dadeidanen, banamak mapu nirya ara, pia weik unamake. Tonda, narye, “Winibuka unamlume. Winipmunyopura, narye dipkoprob aning ton, aning ton winipnamsine,” nyalin yupu deice nyapdeipsise yupu ara, aning nirya dipkoprob melibuka winipnin banamsine. အခန်းကိုကြည့်ပါ။ |
Imamat 26:9
31 ပူးပေါင်းရင်းမြစ်များ
Ara, pia dipkoprob nyapkine. Narye anti, pia teleb kipdeipkiniba, ance deipminyeba, aminyan elce deipliba, dadeipdanin, balamica ani, aminyan talak unamak ninye ara, yupa pia weik unamake. Ara, lukunyan talak im deice kurya, pia kum nukmanto tikilamle touk, tonda weik laut mek wininga, pia weik tonok-tonok nukmanto kum ulamle touk, an mapu pia weik upnin banamake. An deipkirik danin binamak ninye ap, ara an yala nang, aminyan talak unamak ninye arye, yuk asik nang obuka sirya dakikirye, amutuku alubuka dopropnamake. Ara, yuk mutuku nang arye, ‘Abraham el deipkirik danin binamak ninye ara, obuka sirya daknamap,’ tenepnamak ninye ati, sik asik nirya, an deipkirik danin binamak ninye arye, dopropnamaka ati, nyapkine.
Tonda, ance deipminyeba, dadeipdanin balamica ani, donirye deipnamak ninye, an yala ninye ara, narye melipniba, ninye yupa pia weik upnin banamake. Ara, lukunyan noutam kurya pia nukman kumto tiklamle atonun, an yala nang yupa pia weik upnin banamake. Im sirya, mutuku sirya nirya arepsiniba, an yala nang arye talinamake. An yala nang ara, mambul ning wininamak deice arye, mutuku sirya, im sirya unyak ninye nirya ara, teleb kipdeipnamne.
Ance dadeipminba, dodelinamak ninye ara, yupa pia weik upnin banamake. Tukwak mutuku noutamak nirya ara, keil wininga arye, pia weik ulamliba, kum nukmanto ulye touk unamake. Dana-dana tam nirya, keting yangan tam arye, dipdongobuka oketeng owekelbalye tam, asukum anirya ap ara, iknapye tam arye dipdongobuka, dabu tam utam amutuku-amutuku nirya unamake. Aminyan talak ara, tukwak mutuku im sirya, mutuku sirya nirya unamak ninye ayala-ayala nirya ati ara, an yala nang deice arye teleb kipdeipnamne. Ara, ance deipminba, dadeipdanin balamica ani, sirya talak an yala nang arye deipnamak mi ulya deice arye, ninye mutuku-mutuku nirya teleb kipdeipnamne.
Winilamik bukni, Allah el si Yahweh arye, Israel ninye ati, bico tenelamuka anya arye, elce melilamuk bukni, sik Aram ninye arye, onauk ulamikba, Israel ninye nirya kum obuka, sirya dakik. Aning atonun, atalak arye, diprongobuka anoutam yangalamik talak nirya ara, Allah el si Yahweh arye, Israel ninye ati, pia kalikuka melilamuka ani, anang ati kum tamubuka, yuk mutuku nang arye, Israel ninye olamik bukni, min kum obuka, sirya dakamik. Atalak ara, tuba kam unyake. Tonda Allah arye, tuba melilule. Deiyok ara, minop talak Allah arye, wenyamuk nang, Israel sik apu yapu Abraham ap, Isak ap, Yakub ap ati, “Wininamlulume, Winipmunyopura, narye tuba kalikuka melinamsine,” nyalin yupu nyapdeiamuk. Ayupu nyapdeiamuk ning ara, tuba aubuka ati, Israel ninye pia kum bataklamuk. Allah arye, ‘Anang ara, na dam tuba yanganamake,’ tenesulule.
Nyapsikopura, na Nehemia birye sikti, nyapse. “Kume, Allah im deice tam ulirye, aning-aning nirya talilulnye birye tenepsuk touk, winipnamabe. El melisilya deice arye, apil teleb kibuka dolamepya ani, sirya daknamabe. Nunda, Allah el amu tam ubirye, nun el mapu ara, adiparyuk aning-aning nirya lipsisikuka dobibirye, apil dobuka sirya daknamabe. Bukni, anggun anyapmasulum nang tonok ara, Yerusalem mutuku noutam nun neika kum unamabe. Minop talak babye amutuku kum talibuka ulalum ati, ‘Amutuku ara, nun ning anya,’ kum nyapsutume. ‘Anggun yuke,’ nyapsise.” Nehemia birye, sik winilye nang, malye yupu nyabik nang ati, wenebukce nyabuk.
Ance meliamluma deice arye, Israel ninye sik mapu pia weik arelalumba, kurya im deice tiklamle atonun, aninye arye mapu weik delilamikba, yupa weik kipnin balamik. Tonda, ance nun ni yapu ati, “Teleb mutuku arepnamsine. Amutuku wekmunce talibuka unamlume,” nyapdeiamsulum mutuku, sik delilamik mapu ati areplume. Areplumba doprobikce, amutuku telebuk pia ulamik.
Ance nunti bico tenesimince, melisilyam ning ara, ton pia kum kum danamle. Pia ati aupnamle. Winipmanto ara, im deice ulul ning nirya, pia aubuk touk, Allah ance nunti, bico tenesiminya ara, pia ati aupnamle. Bana kum, pia darabuka aubuk touk, an mikip ara, atonunuk ulule. Ara, Allah ance, ‘Na tenena ninye, pia kalikuka melinamne,’ nyabuka, nyalin yupu im deice arye, akunum nyapdeiamsuluma atia.
Tonda, na Allah arye, Israel nang, anggun punun nang ati, nyalin yupu deice arye nyapse. ‘Israel yala nang nirya ati, Kanaan mutuku nirya arepnamsine. Amutuku nirya ara, sik talibikirye, amutuku ara anggun mutuku kipnamle’ nyapdeipse. Winibuka nyalin yupu deice arye nyapsirye, sik bobinuka, Kanaan mutuku noutam bobinuka deipseba, daulamik bukni, atalak ara, amutuku sik mutuku min kum ulule. Sik punun nang nirya talye tikilyangan nang, ninye asik nang ulamik touk, atalak babye sik Israel nang atonun tuba unyake.
Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.
Narye anggun deiyok-deiyok nang nirya, akunum wenepsinyopura, naryuk na mapu yuk pera mutuku-mutuku nirya, daunyaka noutamak arye dobuka, na dam tamubuka boyanamsine. Ara, sik malye weik winilamikba, sik wenena ati, lo arepsiba, yu mutuku ninye arye bisibuka, tapu koubuka bobinamikce, dabobinuka bataklobikba, yuk-yuk mutuku daunyake. Sik Israel ninye nirya tamubuka, sik mince ulamik mutuku uk, bulubuka boyaniba, amutuku unamake. Winipnyopura, amutuku uk yanuka ukirye, sik mapu deibikirye, dadeipdanin bakiba, ninye pia weik upnin banamake. Na Allah aryuk, aninye bulubuka deipnamne.
Anggun malye winilamlum deiyok nang ara, Israel ninye ton kum kalikinamlulume. Narye, winiryuk nang wipdeipnirye, sik deiyok kibika talipnamak nang deipniba, sikce Israel ninye talibikirye, kalikinamake. Ara, domba weina deiyok nang arye, sik domba basam ati, teleb ubuka weilamak touk, anang arye Israel ninye ati, teleb ubuka kalikikirye melinamake. Atalak ara, na mapu tonoknye babye, kum wangapnamake. Tonda, ‘Se, yata wiriptibye do?’ tenen, ilil kum unamle. Aning ara, dipkoprob winipnamne. Na Allah Yahweh arye nyapsine anya arye, aning ara nong upnamle.” Allah arye nyabuk.
Anggunce amutuku ulamlum ninye arye, nati, ‘Nun ni Allah, aminyan talak upnamle ning ara, lak nyapsilyame,’ nyabuka, moropnimunyopura, narye anggun moropnimunye ning kekebuka, laka nyanamsine. Ara, narye anggun bikina kum yupu, pia mambul weik ning, minop talak min kum laka nyapdeipsise ning, lak arye laka nyapdeipsiniba, kekepmunce, biknululume.
Tonda, narye anggunti, “Aning ara, winipnamlume,” nyapdeipsise yupu ap, “Aning, aninguk, teleb kibuka wininamlume,” nyapsise yupu ap, kum talipmunce, narye, “Winibuka, winibuka, wininamlume,” nyapdeipse ning nirya ati, ‘Nun like,’ tenepmunce, na yupu yanibuka, malye kipmunyopura, dipkoprob wenepnamsine. Aning atonun, narye, “Wininamlume. Winipmunyopura, narye anggunti, winibuka melinamsine,” nyalin yupu deice nyapsise yupu ton, kekena kum arye, ayupu ati yaniplopmunyopura, dipkoprob wenepnamsine.
Allah Yahweh, elce anggun melisilirye, aning-aning nirya telebuk unamsile. Tonok ning ara, anggunce talye mangkau kibuka, mapu weik tonun arepsilyeura, weik upnin banamake. Tonda, anggunce talibuka weinamlum ning, yala-yala nirya babye, weik tonun deibikiba, dadeipdanin bakcopura, pia weik unamsile. Tonda, sik delilamsik nang ati, Allah elce, nyalin yupu nyapdeiamuk ara, “Narye anggun Israel nang ati arepnamsin mutuku ara, aning-aning weik mutuku arepnamsine,” nyapdeiamuk touk ubuka, anggun apia teleb mutuku ulamunce, tuku deice wa wibuka kounamlum ning yala-yala nirya babye, nonguk uplyeura, weik tonun unamsile.
Tonda, Allah arye teleb kipdeipsilyeura, anggun nong babye, teleb kipdeipsiliba, anggunce deipmunyeba, deipdanin banamak nang nirya ara, weik unamake. Tonda, tuku deice arye wibuka, koun ning yala-yala nirya ara, nonguk unamsile. Aning atouk, anggun kambing basam ap, domba basam ap, sapi basam ap, ura anggun weilulum ayam maka ap, yuk yala weilulum maka ap nirya babye, yamubuka arepsilyeura, weik unamsile.
“Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”
Ura, anggun apu yapu Mesir mutuku noutamak ikin ulamikba, narye anggun taruk talibuka yuk mutuku bobinamsise talak nyapsise yupu atonun, kum unamle. Kume. Anggun apu yapu arye, na nyalilamsise yupu yanilamikce, bataklamnikba, anggunti narye urasin tamubuka, bataksise. Ati, minop talak nyalilamsise yupu atonun, aminyan talak kum nyalinamsine. Winiryuk nyalin yupu nyalinamsine. Na Allah Yahweh arye dipkoprop nyapsine.
ကြော်ငြာတွေ