Nalinmek bukni, Elisa tamubukabukce, amapu dipdeyukce, amapu ati, ‘Yata deiyok ati nalinmaniyak do? Allah arye, anang wenebuka opnamle,’ tenebukce, Allah el si Yahweh, el si deice arye, malye yupu nyabuka ngalukuk. Winibuka ati ara, adiparyuk buru tam weik yu ning, el si ara beruang basam bitinye, yo noutamak tam arye, kutukuka yarikce, amapu empat puluh nang nirya yanuka obukaprikce sirya dakmanto kiprikopura, amapu 42 dipmanto unmek.
Imamat 26:6 - Eipomek6 Anggun unamlum mutuku nirya ara, narye melibuka kaleksiniba, pia telebuk unamlume. Amutuku noutam, pia teleb kibuka umunce, talye mangkau asa manamlume. ‘Se, yata ning arye do, yata mutuku nang arye, yanuka opnusiak do?’ tenen, ilil pia kum unamsile. Tonda, yuk talye bai tam yu ulamlye kam ning ara, ninye opmanto kum ulye ning nirya ara, bai basam do, yu kwatima do, yu weik kuse harimau do, aning nirya ara, anggun mutuku noutam arye dopropnirye, kum kipdeipniba, anggun dam kum olyanamsile. Aning atonun, naryuk melibuka kaleksiniba, yuk mutuku yu nang nirya arye, parang ya donogobikirye, ‘Sik Israel nang opnuyapʼ tenen, anggun mutuku noutam kum olyanganamsiake. Narye kaleksiniba, mal olan nang ton pia kum olyanamsiake. အခန်းကိုကြည့်ပါ။ |
Imamat 26:6
43 ပူးပေါင်းရင်းမြစ်များ
Bukni, pia dipkoprob winipnamkin ning ara, ani. Ance sal deipnamlame. Anye bira, pia namin arye dakeiam asa unanye unamle. Elda yuk nang ap yu upliba kum olanamake. Tonda, na Allah arye elti, pia melipniba, elti, mal olan nang ara, dana-dana tam mutuku nang ara, el dam kum olyanganamake. Aning wininmale ning deiyok ara, el si Salomo nyanamake. Tonda, na Allah arye arepnyeba, an mi Salomo birye, deiyok kibuka Israel nang talipnamle talak noutam nirya ara, elcuk yupu nyalamliba unamake. Tonda, na Allah arye arepnyeba, dana-dana tam unyak nang ap, Israel nang ap, mal olana kumce, namin arye teleb kibuka neika unamake. Salomo birye talibuka yupu nyapnamle talak nirya ara, olana kumce, telebuk unamake.
Ati ara, Yudea tam taleamuka ninye deiyoknye Raja Yosafat birye, taleamuk mutuku ulamik nang nirya ara, pia teleb aryuk talima lamabuka teleb arye ulamik. Sik ap yuk mutuku nang ap ton kum oldalamik. Ara urdem arye kume. Yosafat birye si erelamuk Allah arye, talima lamabuka una deiyok ning arebukce, lo arebukba, Yosafat birye taleamukak ulamik mutuku nirya ara, Allah arye meilyamukba, teleb ulamik.
Ilil kum unamkila deiyok ara ani. Allah arye kalikuka melisilya deice arye, nun wa win dam keil weik wamlya babye, ikin kum upnamsile. Tonda, bai tam ulul yu kam ning nirya arye, nun kum olyanganamsiyake. Ara, winipmanto ara, ton tam nang arye, yuk mutuku nang ati, ‘Teleb asa arye neika unamabe,’ nyabuka, nyalin yupu nyalalamak touk, unamaba ati nyapkine.
Tonda, ‘Ance melipsiminyeba, nunce weinyap sapi basam kil nirya babye, mi bomica ani, mapu pia weik, nukman kumto, delinamsiak’ tenen, moropkine na nio! Tonda, aweinyab sapi basam ara, melibuka kalikinamsila ati, ‘Akil sapi basam nirya arye, min yuma mapu tonok babye, pia ton kum delinamak’ tenen, moropkiabe. Tonda, ‘Nun mal olan nang arye, yanuka kum opnamsiakʼ tenen, moropkiabe. Tonda, nun weik asik dobupu noutam nirya ara, ‘Ikin weik upsilyeba, nun Israel yala nang nirya ara engebuka, kum ngaluknamap’ tenen, moropkiabe na nio. Tonda na nio, ‘Aning atonun, yu nang arye nunti ton winipsikcak’ tenen, ‘Ance melibuka kalikinamsilamʼ tenen, moropkiabe na nio!
Tonda, anggun ululum mutuku noutam nirya ara, Allah arye melibuka kalikisilyeba, anggun mal olan nang arye, kum olyangasinyake. Israel mutuku noutam nirya ara, olana kum aryuk, talye kanye bobuka ululume. Tonda, anggun din ning patana ati, gandum duk weik ap, yuk din ning yala-yala nirya ap, weika arye arisulule.
Ancuk meliniminya deice arye, nara pin-pin kanye bonirye, kanye deibuka unune. Talya daunyak nang arye, wa wina lin li noutam arye, lin nin gandum do, anggur mek din ning do, aning-aning weik arye, libicopura, pia kanye deibuka unyake. Bunki, sikda mitik tonun dem, narye anti weika arye, kanye deibuka unune.
Winipnamlum bukni, sik amutuku unyak ninye ara, tonok keting tamun aryuk kum yakdononamne. Deiyok ara, amutuku noutamak, ninye kum ukceura, bai tam kam unyak ning yuk-yuk ning nirya yakirye, anggun unamlum sukum yanuka langdibikiba, anggunce aning nirya kum optume. Tonda, amutuku noutam, tonok talak aryuk ninye nirya kum ubicopura, pia pata mutuku, ninye kum ulamice sukum atouk, ‘Amutuku nirya tunim apsilyakʼ tenen, sik anang ara, adiparyuk kum yaknamne. Ati ara, amutuku ninye nirya ara, tonok keting tamun deice arye, kum yakdonoknamne. Tonok keting tamun deice arye, ton ninye yakdonoknamne, ton keting tamun deice arye, ton yala ninye yakdonokname.
Anggun ti nyalilamsik yupu tuba tenebuka umunyopura, ayupu aniryuk anggun banamlumak nirya ara, ‘Diksukum bisik ani, malye un bisik ani,’ tenebuka, kel bikinamlulume. Anggun mapnumunye talak ara, ayupu anyuk kalikuka melinamsile. Ara, anggun banumunye talak babye, lukunyan mapnumunye talak babye, bukuka banumunye talak babye, el dem arye talibuka basilirye, nyapre banamsile.
Asukum ara, weik bisik aunamle. Abisik el si ati Pia Diksukum una ati Banamak Bisik nyanamake. Malye ning wininyak ninye ara abisik ara, pia kum binamake. Tonda aning-aning nirya ati walwal upliba, moubuka bita kel kum bikinyak ninye babye, abisik bakirye, abisik ara kum walwalapdanamake. Allah arye abisik yapdeipnamsile, ‘Na ti dib teneninyak ninye uk, abisik banamake’ tenen, yapdeipnamsile.
Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.
Ati ara, na mapu koproba Israel nango, anggun ilil una meme! Na amu tam pil donanye Yakub birye, deiamukba, dadeipdanin yangalamlum nang babye, anggun ilil asa una kumce, ‘Yata wiriptibye do?’ pia kum tenenamlume. Anggun ap, anggunce deiamlumba, dadeipdanin banyak nang ap, anggun mapsilip ap, anggun tam nang nirya ap ara, na Allah arye lyepdopnamsine. Ara, anggun mal olan nang arye opsikce, bobinuka, pia pere sukum deiamsikba, daululumak arye lyepdopnamsine. Winipsilyeba, anggun apu koproba, Yakub birye deiamukba, dadeipdanin yangalamlum nang ara, melibuka lyepropsinya deice arye, anggun tamubuka yamunyakarye, anggunti arepsise mutuku uk yanuka, pia telebuk unamlume. Aminyan talak ara, tonap ilil kum unamsil bukni, telebuk unamlume. Yuk-yuk mutuku nang nirya babye, anggunti, malye kum kipdeipnamsiake.
Winipmanto ning ton nyapnusin. Diba ato mutuku ati ara, na adiparyuk bai tam, yuk kam ning yu weik ning ton, sik si ara binatang buas, dobuka deiptinyeba, ayu weik kam ulul ning ara, yu kam do, yu singa kus do, yuk yala ning do yatingce, amutuku noutam unyak nang nirya, obuka diptinge. Amutuku nang nirya, obuka diptingba, yuk mutuku nang, dana-dana unyak nang, tonoknye babye, amutuku noutam kum binmanto uptingba, amutuku ara, tuba ton teleb kum uptue. Amutuku ara, pia asik oldem uptue.
Winiptu ura, telebe. Winipmanto ning ton nyapnune. Aning atonun, arup lak nyapmanu mutuku atonun uptopura, naryuk, “Amutuku noutam ara, ninye ona ati, yu yin nang dopdeipnyeura, amutuku noutam nirya ara, ninye nirya obuka, sirya daknamake. Ara, ninye nirya, sikce weinyak kam ning ap, talye bai tam kam ulye ning ap nirya ara, obuka sirya daktinge.
Ura, na Allah arye, sik mutuku imun kanye bona uk areptinyeba, ninye nukmanto kum dipting bukni, aning ara, mitik tonun winiptue. Bukni, ninye ara, yupa pia weik, nukmanto kum dipnamtinga ara, ani. Ara, na Allah Yahweh arye, weik tonun erebuka, aning-aning nirya talibuka, Pia Mikip Weik Deiyoknye ununa ati, narye kanye imun wenen ning, dumbarye dopdeiptinyeura, ninye nukmanto kum diptinge. Ara, pia kanye imun ning ara, Yerusalem mutuku noutam adumbarye wenen ning arepnyeba, amutuku noutam unyak nang ap, sikce weinyak kam ning ap, nirya kum kipdeiptinye. Awenen ning ara, ani. Ara, yuk mutuku yu nang wibuka, sik dam arepnyeba, anggunce Yerusalem mutuku noutam ululum nang ati, adiparyuk olyasitinge. Tonda, weik din patana deice arye, ninye weik diptinge. Tonda, yu weik talye bai tam daulul ning arye, ninye weik ton obuka diptinge. Tonda, imun kanye bobuka, Yerusalem mutuku noutam dobuka, deiptinyeba, ninye weika arye diptinge. Winiptinye deice arye, ninye nukmanto kum ap, kam ulye ning ap, weika arye opnirye, kum kipdeiptinye. Dipkoprob ning ara, sik Yerusalem mutuku noutam tuba unyak nang, malye weik wininyaka ati, sik wenena ati, imun kanye nirya bobuka, sik deice deipnamle!
Ati ara, nara pia mikip weiknye birye, sikda na amu tam mitang nang unyaka ati, na kanye aryuk, sik kalikuka melina ati, ‘Winipnamsine,’ nyabuka, nyalin yupu deice arye, anggunti teleb kipdeipnamsine. Winipnyopura, sikda olana kumce, kanye deibuka, pia teleb kibuka unamake. Ara, amutuku noutam, sikce talibuka wininamak ning nirya ati, teleb kipdeipnamne. Tonda, amutuku noutam bai tam yu unyak kam ning nirya, kum kilina atonun, narye anggun mal olan nang, dana-dana tam nirya yakuka dopkwetepnirye, kum kipdeipyopura, anggun ‘Naʼ tenen nang ara, dan mutuku do nirya, bai tam do, pata mutuku noutam do, weik asik tam do, kanye deibuka, pia telebuk unamake. Amutuku-amutuku noutam nirya babye, ilil una kumce, teleb aryuk manamake.
Narye mok arepnyopura, mok cepliba, amutuku noutam tiknamle yo, yuk-yuk ning nirya ara, duk mounauk unamle. Sikce wa wibuka kounyak ning nirya ara, pabukablirye, teleb kibuka nonguk unamle. Winiplyopura, sik anang nirya, dakeiam asa arye dakuka, ilil una kumce, teleb kanye deibuka, sik mutuku tuku noutam unamake. Winilamikca ani, na mapu koproba Israel nang, ninye arye tapu koun ati tapu, el si rantai bulukulamak touk, narye sik yuk ninye asik nang mutuku binuka deiamikiba, adiparyuk loplopniba, kanye pia deipnamake. Anggun mal olan nang obuka, sirya daknamne atia. Winapnamne deice arye, akunum winipnyopura, sik anang nirya arye nati, ‘Se, diba elda dipkoprob Allah Yahweh ululeʼ tenen, biknamniake.
Anggun kwaning patan li arepnamsin bukni, aninguk kume. Narye lo ton arepnyopura, bai tam kam ulamle ning, yu weik ulamle ning ara, singa kus atonun ning do, yu kam do? Anggun dam yanuka, si topsikirye, olyanganamsiyake. Winipsikcopura, anggun mapu weik obuka dibikiba, anggun mapu kumdanin banamake. Tonda, yuk kanye imun weik ning ton, arepnamsine. Ara, kanye imun uk, yala-yala nirya ap, tonda yuk mutuku yu nang arye, parang ya arye dobuka olyanganamsiyak ning ap, anggun deice dobuka deipsikcopura, anggun Yerusalem mutuku noutam ululum nang ara, opsinirye, sirya daknamsine. Nara anggun ni koproba, Allah Yahweh arye, ayupu ara, akunum nyapmasina anya arye, dipkoprob anyapman touk upnamle. Allah Yahweh arye, nyabuk. Ara Allah arye, ‘Yerusalem mutuku unyak nang arye malye weik ulamika ati, sikti wenepnamneʼ tenen, aminyan talak, sik nong deice kanye imun weik ning delinamle ati, na Yeheskiel dam yanuka lak nyapnuke.
“Atalak ara, ‘Bai mutuku yo kan-kan unyak ning ap, maka im deice laklamle ning ap, tonda tukwak ulul ning aning-aning nirya ara, ton kum olyanganamsiyak’ tenen, narye akunum yupu seknamne. Aning ayala-yala nirya ara, talye kanye bobuka unamake. Tonda, sikti, yu kanye bobuka, opdanmanto ninye nirya ara, kum kipdeipnamne. Ati, anggun mal ap, yin ap, parang ya ap, yo taice ap nirya ara, kum daneipnamne. Ati ara, anggun Israel ninye ara, ‘Dan mutuku ninye arye olyanamsiyak do?’ pia ton kum teninamlulume. Teleb kanye bobuka, unamlulume.
Allah arye, “Aning ara, wininamlume. Aning ara, pia kum wininamlume,” nyapdeipse yupu ara, moubuka kekenamlume. Tonda, narye, “Aning ara, wininamlume, aning ara, kum wininamlume,” nyapdeipsise yupu nirya ara, luba kina kum aryuk, pia talipmunce, telebuk unamlume. Ayupu nirya ara, pia moubuka teneipmunce, namin arye pia telebuk unamlume. Winibuka unamluma deice arye, narye melipsinyeba, anggun amutuku noutam unamlum talak ara, pia teleb kibuka, namin arye, dakeiam asa unamlume. Winipmunyopura, narye kaleksiniba, ikin ning anggun dam kum yanganamsile. Kanye deibuka, telebuk unamlume.
Anyapmasin touk, telebuk umunyopura, narye melipsiniba, amutuku noutam binuka unamlumak ara, wa wipmunyeura, nong weik tonun linamlume. Atuku deice arye, ninye dopman kumto ubuka, arepsiliba, anggun din ning nirya ara, pia weik usiliba, weik tonun dinamlume. Din ning ara, kum suktalipnamsile. Tonda, narye kaleksiniba, ikin ning anggun dam kum yanganamsile. Kanye deipmunce, amutuku noutam, pia telebuk unamlume.
Na Allah arye, bai tam pia yu ulamle ning, kam ning nirya dobuka deipneba, anggun dam olyanganamsiake. Aning boyakirye, anggun mapu weika tonun, yanuka obuka sirya daknamsiake. Tonda, anggunce talibuka weinamlum ning ayala-yala nirya, yanuka obuka sirya dakanamsiake. Atonun, anggun wisi nang babye onamsiake. Winipsikce bukni, ninye weik dibikcopura, anggun yupa ara, mitik tonunuk unamlume. Ninye weik dibikceba, kum danin bacopura, anggun unamlum mutuku nirya babye, anggun banalun bisik babye, dipdemunyeba, talye louk uplyeba, banmamunce eipmunba, yuk-yuk ning kum dalya arye, amutuku nirya ara, din bulanguk, walang yo uk unalume.
Wininamsin ning ara, ani. Ara, narye mal olana deiyok nang dopdeipsiniba, sik parang ya dobukabikirye, anggun dam olyanganamsiake. Narye anggunti, wenenamsina deiyok ning ara, ani. Ara, narye anggunti, “Aning ara, wininamlume. Aning winiplumyopura, narye aning ton teleb kilinamsine,” nyabuka, nyalin yupu akunum nyapdeipsise. Bukni, ayupu tuba-tuba yanimunya atia. Tonda, anggunce, ‘Se, Allah arye wenepsilyakʼ tenen, anggun mutuku binuka, anggun weik asik dana-dana tam, keil poka noutam aryuk, bulubuka unmunce, ‘Asukum ara, elce kum opsutuʼ tenen, unamluma babye, narye anggun dam ara, imun kanye bona weik ning ton, arepsinyeba, anggun kan-kan, uk weik anun talinamsile. Ara, uk ayala-yala nirya ap, suse ap arepsinyeba, auk nirya ara, kwetepmanto kum unamsile. Tonda, nati tuba malye kanye bopnulumakarye, mandipna kanye deiplumnyopura, anggun mal olan nang ton dopdeipnyeba, anggun damuk mal olyanganamsiake. Obuka sirya daksikirye, tapu koupsiceura, anggun pera mutuku bobinamsiyake.
Tonda, anggun mal olan nang yanuka opsikce talak ara, anggun Israel nang ara, ilil una kumce, mikip weik umunce, sik yu nang ati, yupa weik ubikca babye, anggun parang ya dobuka, obuka sirya dakmunce, malye kipnamlume. Sik yu nang ara, weik tonun oplopnamlume. Ton nang ara, ilil weik uplye ati, bikbik abuka bai sakuka bendopnamake.
Ton tam ninye arye, yuk tam ninye ati, kum olanamake. Bukni, sik nirya yuk-yuk kam unamak talak ara, neika dukdongobuka, tonok kanye bobuka, telebuk unamake. Aunamak talak ara, anggur tapu duk wa ap ara, yo duk wa ap, sikce sik bidamnye wa wiamice, mutuku noutamuk bukikirye, talye kanye bobuka unamake. Atalak unamak ninye nirya ara, ilil asa arye, kum unamake. Yuk mutuku ninye arye, yuk mutuku ninye ati, ilil kanye kum bonamake. Alaka nyapmasin ning nirya ara, na Allah Yahweh arye, im deice yin talibuka unyak malaikat nirya, sik weik deiyoknye unirye, nyalin yupu nyapmasina ati, aning nirya dipkoprob nong upnamle. Nara, mikip weiknye birye, aning nirya teleb kibuka delinamna ati nyapsine.
Tukwak mutuku sirya, im sirya nirya noutam, malye un ninguk talibuka, wininyak nang ati, yu weik arye wenebuka opnirye, sirya daknamne. Bukni, anggun tuba kam unamlum Israel nang ara, mitik tonun tuba aunmace nang ara, tonap tamubuka, malye un ning, kum wininamlume. Yata nang do, sik aninye arye, tonap tilila yupu nyana kumce, malye kum kilinamake. Tonda, sikce talye yupu nyana ap, tenepce nyan yupu ap, kwinisa don yupu ap ara, sikce pia kum nyanamake. Sik teleb unamak Israel nang ara, yuk nang ap kanye deibuka, neika teleb aryuk, tunim abuka unamake. Wini talak arye dipdongobuka, doyanamle talak nirya ara, sikda yuk nang ati ton, ilil pia kum unamle.
Pia teleb ning, ayala-yala nirya dobuka, na si eren aik punubuka donamnulumak boyacopura, atalak ara, na si eren aik winiryuk dopnamlum ning ara, urasin pia teleb unamle. Minop talak, na si erena ati, domik aik ara, mitik teleb aik domik bukni, aminyan talak dopnamlum aik ara, pia teleb unamle. Tonda, na si eren aik dopnamlumak ara, narye anggunti, pia teleb kipdeipnamsine. Ara, anggun olan ninye nirya ara, kum kipdeipniba, anggun nirya ara, talye kanye bobuka, telebuk unamlume. Yuk ninye ap, olana ap, yupu deice walana ap, pia kum unamlume. Ara, narye na mapu koprop, anggun Israel ninye nirya ati, telebuk kipdeipsiniba, kanye deibuka unamlume. Ayupu ara, na Allah Yahweh, aning-aning nirya talibuka, im deice yin talin malaikat nirya, sik weik deiyoknye birye, nyapsine. Narye anggunti, ayupu akunum nyapdeipsine anya arye, dipkoprob nong upnamle nyapne.” Allah arye nyabuk.
Allah arye nyabuk, “Epraim yala yin talin nang arye, ninye olanmace talak bukikirye, balamle kuda basam arye, libuka tuku deice balamak ning, mal olalbalamak kereta ap, kuda basam ap nirya ara, na Allah arye kum kipdeipnamne. Tonda, Yerusalem mutuku nang balye deice bukuka, banyak kuda basam nirya babye, kum kipdeipnamne. Tonda, ninye olana ati, bolamak yin nirya ara, yuk ninye on ning, ayala-ayala nirya ap, cebuka atu atonun kiplopnirye, kum kipdeipnamne. Aning ara talye ati kum nyapsine. Ara, Israel ninye anggun ninye deiyoknye, na Allah arye, anggun nirya ati, talye kanye bobuka, teleb unamlum talak arepnamsina ati, nyapsine. Ara, ‘Anggun ap, mutuku-mutuku nirya daunyak ninye ap, tonok kanye bobuka, dukdongobuka unamlum’ tenen, ayupu nyanamsine. Otam deibuk laut mekwen ap, atam deibuk laut mekwen ap, anoutam dipdongobuka unyak ninye nirya ara, na Allah aryuk talinamne. Tonda, Efrat mek dam arye dipdongobuka, mutuku sirya, dana-dana nirya, naryuk talinamne.”
Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.
Peterus wenena aik pum tam mapmoka berekukura, ambusumto ara, Herodes arye, ‘Peterus el yupu nyapdeipnamane,’ tenebuk lukunyanuk mabuk. Kawat rantai tapu arye Peterus taruk kirikdongobuka, yin nang taruk dana-dana kirikdongobuka, Peterus noutamak mabukura, sik neika anyaik pum tamuk unmek. Tonda, yuk yin nang arye buplan dam kalikinmek.
ကြော်ငြာတွေ