Imamat 26:36 - Eipomek36 Sik yuk mutuku nang, yu weik yin talen nang arye, anggun Israel nang weika tonun opnamsiak bukni, ton nang ara, mitik tonun aryuk batakikiba, kam tuba unamake. Kam tuba unamlum nang ara, yuk mutuku nang arye, sik mutuku delilbisikceba, daunamlum talak ara, anggun ap neika unamlum nang nirya ati, ilil deiyok ning ton, arepsinyopura, anggunda pia ilil weik unamsile. Winibuka daulamunye buk, narye kumanya mikip weik ning arepnyeba, pu aplirye, lelim weik nyalirye, yo nirya lokukaplirye, yo bok ton saklya deice arye, lelim mitik tonun aryuk nyapnamle deice arye, anang nirya kekebikirye, ‘Se, yu nang arye, parang ya bobuka olyanmasiak do?’ tenen, ilil weik upsilyeba, anggun bikbik abuka bendopnamlume. Winipmanto ara, ninye arye olanukce talak, bikbik abuka perak balolamak atonun, upnamlume. ‘Bikbik abuka balamunyak ton, sakmunyopura, nun mal olan nang arye opnusiak do?’ tenebuka, ilil kum unamsile. Ara, anggun mal olan nang ton, dam kum dobolbanmasiki bukni, ilil weik upsilyeba, bikbik abuka banamlume. အခန်းကိုကြည့်ပါ။ |
Imamat 26:36
31 ပူးပေါင်းရင်းမြစ်များ
Tonda, dan mutuku do nirya, tukwak mutuku nirya, wa wibuka koupnalam bukni, paplirye el nong pia kum upnamkile. Aning-aning nirya kum papnamkilba, talye diamuk pil donalame. Wini talak arye, dipdongobuka doyanamle talak nirya ara, ‘Amutuku binun do, omutuku binun do?’ tenen, teniltonauk upkiliba, tukwak mutuku im sirya, mutuku sirya nirya noutamak arye, pia balsusunuk unalame,” nyabuka wenebuk.
Doprobikura, Yehuda tam yin talin nang arye, Gerar mutuku nang ap, aweik asik ap, anyaik dam uamuk mitik mutuku-mutuku nirya ap, obuka malye kibuka, bataklobik. Ara, Allah Yahweh arye amutuku ninye nirya ati, sik talima noutam ilil un ning arebukba, sikce, Allah Yahweh ati, Se tenebikce, lukunyan ara ilil weik ubuk. Winibuk talak aryuk, sik Yehuda tam yin talin nang arye, amutuku noutam ulamik nang arye talilamik ning, sik bona yala-yala pia weik buk alubuka doprobik.
Winipmanto ara, yo bok kolupmalya ati, koulupmalye ning, kum mikip doplirye, ayo bok dakuka bobiliba, anda yata deiyok ati, talye koulubuk yo bok ati, ilil weik ning arenamlam do? Aning atonun, gandum duk teikikceba, sung-sunga saklyeba, kum doplirye, asung-sunga bobalamle touk, ance talye sung-sunga ati, ‘Dopnunʼ tenen, dobolbinuka dolbinutum do? Aning atonun, na babye mambul pia kumnye bukni, yata deiyok ati, ance tuba dobolbinimince, wenenilyam do? Tonda, yata deiyok ati, ance na dam winipniminba, lukdanuka ilil upnilirye, ‘Se yukak bikbik abuka binirye duknuptinyeʼ tenen, unun do?
Ninye malye ninguk talibuka wininyak nang nirya ara, pia kum bikamika atonun, teleb winin ning ara, pia kum kel bikinyak do? Malye ninguk talibuka wininyak nang arye, din ning el si roti minop dibikirye, sirya dakalamak touk, na Allah ara, na mapu koproba, sik nirya ara, minop obuka, sirya dakanyake. Tonda, nara Allah, na si Yahweh ati, ‘Naio yata yupu nyapsiminba, aninguk talibuka wininamap do?’ tenen, nati pia kum morokinyabe.
Malye ninguk talibuka wininyak nang nirya ara, aminyan talak, pia weik tonun ilil weik unamake. Lyepliba, sik kan-kan uk unamle bukni, Allah ati diba kum tenenyak nang ara, ilil weik unamle. Ara, minop talak ara, mitik tonun ilil ulamik bukni, aminyan unamle talak ara, weik tonun pia ilil weik, kum tenepmanto ning unamle. Deiyok ara, Allah ati diba tenebuka diksukum kum unyak nang ati, Allah arye, anang nirya obuka, sice bukloplyopura, sik nong pum tam, yok nirya dobuka, yuk-yuk mutuku dana-dana tam dopkwetepnamle. Allah arye, amalye wininyak nang wenebuka oplyopura, alye weik tonun daknamake. Ara, talye ati kum bukni, Allah arye amalye wininyak nang nirya, obuka bataknamle. Elce sikti, ‘Na dam ton, pia kum yanuka unamake,’ akunum tenebuk atia.
Ninye ton teleb ubuka una kumce malye winin ninguk talibuka ulamice nang ara, yu nang arye sikti, kum dobolyanganmakibuk, sikcuk ilil upliba, bikbik abuka bai tam sakuka banyake. Bukni, ninye ton diksukumuk ubuka ululnye elda, kanye imun ning auple bukni, ilil una kumce, kanye lamapdongobuka ulule. Winipmanto ara, bai tam singa kus mandipna arye tiklamle tonun, ubuka unyake.
Aminyan tam, anggun mal olan nang yakcopura, winipnamlulume. Anggun mal olan nang kan-kan, tonoknye ton eipmunyopura, ‘Se, anye birye opnamasile,’ tenen, ilil upliba, anggunda yupa weik 1.000 nang bikbik abuka, bindopnamlulume. Aning atonun, anggun mal olan nang kan-kan, pamubarye nang eipmunyopura, ‘Se, anang arye opnamasiyake,’ tenen, ilil upsiliba, anggun nirya bikbik abuka, bindopnamlulume. Anggun mal olan nang arye, aminyan dobolbanmasikca ani, batakikiba, anggunda yupa weik kum unamlum bukni, tonok-tonok uk, kam unamlume. Winipmanto ara, mutuku deice tonok bendera ikdeibikiba, el yuk tiklamle touk unamlume. Ara, anggunda ninye pia weik ulamlum bukni, akunum opsikcopura, mitik tonun unamluma ati nyapsine.” Allah arye sik Israel yala ninye nirya ati nyabuk.
Atalak ara, yuk nang arye, Daud el yala ninye dam yupu nyalbiyikce, “Kume, sik Aram mutuku ninye ap, Efraim yala ninye ap ansinibuka, ‘Yehuda yala ninye opnamap’ tenen, warikil yanmasiake,” nyabuka, laka nyanmek. Nyabikba, sik deiyoknye Raja Ahaz birye kekenmokce, el ap, el tam ninye nirya ap, ikin kanye bobikce, sik ilil ubuk. Ara, Israel tam ninye arye, sik mutuku warikilyanganmeka ati, Yehuda tam ninye nirya ara, sik deiyoknye Ahaz ap, ilil ubukba, kanye talima nirya sirim talibukce, yo tikamli bukni, kumanya yanuka dopliba, loklamle touk winibuk.
Birumunyopura, ninye deiyoknye Ahaz biti, nyapnamlyame. ‘Anda talima mikip kibuka kanye moubuka, kintinibuka unamlyame. Bukni, ilil asa kum unamlame. Anda kanye boktopkiliba, ilil asa kum unamkile.’ Ara, Aram mutuku talilula deiyoknye Resin ap, Remalya deibuk mi Israel ninye deiyoknye Pekah ap, sik yin talin nang ap nirya ati, ‘Sik nirya yakirye, warikuka opnamsiyak do?’ tenen, ilil asa una meme. Aninye deiyok nang ara, ‘Sikda mikip weik nang,’ tenelulum bukni, narye dipkoprob nyapkine. Sikda, yo uku dongobikiba dilamlye ani, lola sirika batakaltaklamle atonun, unyake. Sik min arye tenelamdik ning ara, nong kum upnamle ati, anda ilil una meme.”
Winipmanto ara, anggun Yudea tam ululum ninye arye, Babel mutuku yin nang nirya ati optumce, kam tuba upting nang ara, dilauk doploptumba, sik tenda aik buktinga babye ara, sik Babel mutuku nang aniryuk, anggun nirya obuka, sirya daksitinge. Sirya opsitingce, anggun Yudea tam dolulum aik nirya, uku dongobuka, sirya daksitinge. Aning ara, dipkoprob winipnamsina ati nyapsine. Allah arye, Yeremia biti nyabukba, Yeremia birye, el dam yanmarek nang bitinye ati, laka nyabuk.
Sik Mesir mutuku yin talin nang ap, sikti, melibuka yanamek nang nirya ap ara, yupa pia weik unyak bukni, Allah arye anang obuk talak ara, sik nirya ara, ilil pia weik ubukba, ‘Bikbik abuka bindopnuyap’ tenen, banmekbuk, mitang ubuka ati, yan dum duklirye, sakuka tukwak poulbalamak touk, akunum winibik. Winibikopura, sik bidamang nang ati nyapdayik, “Tuba amutuku uk ubipyopura, nun mal olan nang arye, obuka sirya daksikcak ati, nun nirya ara, tamubuka nun mutuku koproba uk bindopnuyabe,” nyalamik.
Yehuda mutuku talibuka unyak ninye nirya arye, sik mutuku koproba batakanye. Winibuka batakikirye, ‘Malye ubuka unamabe,’ tenebuka unyakce, pia malye piluk talibuka unyake. Sik amutuku unyak nang nirya ap, sik aninye mitang asa arye dopropmanto ning, sik dam ton pia kume. Yata ninye do, ‘Minopce wektinye’ tenen, weklinye bira, elce doproptue. ‘Sik ti opnamabe,’ tenenyak nang arye, warikuka antanap dongoptinga babye, sik aninye nirya arye, malye kanye boptinge.
‘Yerusalem mutuku noutam dorapce, upra yangalamik deiamne ninguk winipnarye, na yuk winipmane,’ nyabuka, kwalipnarye kiklap daklamik. Sikce, ‘Winipnululume,’ nyabuka, nyalamik ninye deiyok nang nirya babye, mitang upnaba ulamik. Winipmanto ara, Rusa basam arye, el din ning patanmaliba malamle touk, ulule. Sik anang ara, ‘Nun kayapu nang mal olan nang arye adobol yanganmasiake,’ kum tenenyake.
Anang arye nunti, ‘Anang ara, obuka sirya daknamabeʼ tenen, dobolbalamsike. Ara winipmanto, Ambun ma maka lakuka balamle ning ara, sik piribuka balamle bukni, nun mal olan nang arye dobolamsik ning ara, pirina kum aryuk, minop dobolbalamsike. Sik anang arye, nunda mutuku tam balamupu talak babye, tonda mutuku pata mutuku noutamuk balamupu talak babye, sikda nunti dobolbanauk ulamsikce, nun dam yanuka, obuka batakamsike.
Aning ati ara, ninye arye deipkiknye, Yeheskiel anda, ngalukuka malye nyamince, weik arye engenamlyame. Aparang ya ara, na mapu koproba, Israel nang ap, sik talina ati, ninye deiyok talibuka, unyak deiyok-deiyok nang ap, anggun nirya ona ati, aparang ya akunum kintinipse. Israel nang talibuka unyak deiyok nang ap, sik amu tam talinyak nang, anirya ap ara, sik yu nang ara, aya arye lukuka obikceba, dipnamake. Ati Yeheskiel, anda ‘Seʼ tenen, malye kanye bopmince, bikilina ati, anggun Israel nang ulamlum touk, an keil deiceuk taruk arye, opdanulyame. Winipminyeba, ninye nirya eibikirye, ‘Se, kanye imun ning yanamsila ati, el ikin kanye bobuka egenmale,ʼ tenebuka, biknamkiake.
Ninye on nang arye, sik warikdongobuka yakceura, aparang ya arye, na mapu koproba, deiyok koubuka, opnin banmaceura, sik Israel mutuku unyak nang mikip-mikip unyak nang ara, mitang kipdeiplyeba, talima daksaknamle. Atalak ara, ninye weika arye obikceba, tukwak sakuka poulbikirye, dipnamake. Anggun nirya eipnalume! Anggun ululum mutuku nirya ara, anggun weik asik wekelbana ati bisik, cang keil poka bublan dam ara, narye yu yin nang deipnyeba, ninye on nang kintinipnamake. Amutuku nang, weika arye opnamak ati, sik yin nang arye, na ninye on ya erebuka talibiceba, aya si ara, perereng alamle touk upnamle. Ara, aparang ya, narye kintinip deiamseba, pereng-pereng alul ning ara, ninye opnamak ati, winipse.
Winiminye ati, sik Israel nang wekmakirye, yupu kekebikceura, sikce anti asipdenamkiake. Ara, ngalukuka malye nyabuka engepminyeba, Israel nang arye, ‘Se, yata deiyok ati, ngalukuka malye nyanmalam do?’ nyabuka asipkikceura, ance sik anang ati, nyapnulyame. Kume, dotalak ara, kanye ikin yupu ton boyasikceura, kekepnamaba atia. Ayupu nirya yanuka nyabikceura, kekepnamak nang ara, ‘Se, yata wiriptibye do?’ tenen, ikin kanye bobuka, sik talima dakalsanamle. Tonda, sik anang nirya ara, taruk mitang uplyeba, daksaknamle. Sik kanye bobuka unyak nang nirya ara, kum kipnamle. Tonda, sik anang yok sirim taliplya deice arye, sik yok babye, sirim talibuka, mikip kum upnamle. Sik kanye tenen ning ap, sik kisok yung ap ara, mek atonun uplyeba, pia mikip kum upnamle. ‘Weik ikin ning yanamle,’ nyapmasina ara, pia dipkoprob yanamle. Anggun dibinauk unamlume. Aning yalyopura, aning nirya ara, winipnamle. Na Allah Yahweh, aning-aning deice tam erebuka, Pia Mikip Weik Deiyoknya ununye birye, akunum nyapdeipsine. Allah arye, na Yeheskiel biti nyapnuke. Nyapnukopura, yupu tonap dukdongobuka nyapnuk.
Aning atonun, narye anggunti ‘Anang ara, na like,’ tenepnirye, anggun wenena ati winipnamsine. Anggun mal olan nang dobuka deipneba yakirye, yanuka obukapsikirye, sirya daksikirye, sikcuk yanuka talipsikiba, unamlume. Tonda, anang ara, anggunti, ‘Nun like,’ tenesinyak nang aryuk, talinamsiake. Sikce, anggun kan-kan ton nang ara, obuka sirya dakicak arye, oplobikceba dipnamake. Ton nang ati, obuka sirya dakicak arye, talipsikcopura, sik amu tamuk, ikin kanye bobuka unamlume. Anggun Israel nang arye, ayu mal olan nang ati, ilil usilirye, anggun mutuku batakmunce, bai sakuka bindopnalume. Tonda, ilil weik upnamsila ati, yuk talak ara, yu nang arye kum dobonmasice babye, anggun kanye aryuk, ‘Se olyanganamsiak do?’ tenen, ilil upsiliba, bai sakuka bikbik abuka bindopnalume.
Ati, anggun min talak taleamlum mutuku nirya ara, dikdik sena atonun talye daunamle. Anggunda, amutuku talibuka ulamlum talak nirya ara, Sabat sum deice dikdik sena atonun, keting tamun kum arelamluma ati, amutuku deice ara, wa wina ap, yala kouna ap, pana ap, dola wena ap, lina ap, pia winilamlume. Ati, wenen ning, anggun deice deipsinyopura, yuk pera mutuku bobisikiba, daunamlum talak nirya ara, anggun mutuku dikdik sena atonun talye daunamle.
Anggunce winilamluma deice arye, sik Amori yala nang ara, amutuku dam noutam ulamika anya arye, anang kutuk sakuka yayikce, anggun nirya obuka, sirya dakamsike. Amori nang sik yupa ara, pia weik ulamike. Winipmanto ara, mong weklamlak weik tonun arye ulamaka atonun ulamike. Tonda, sik anang arye, eibuka dobolbisikba, Sin mutuku arye batakuka, yukak Horma mutuku dam ton dobolbinamsike. Dobolbalamsika ani, otam mutuku, Edom mutuku damuk binuka, anggun nirya ati, obuka sirya daksike.
Ura, Yordan mek duman, keting kumulban tam ulamik ninye ara, Amori yala deiyok nang, Raja nang ap, tonda, Kanaan tam bukni, weik laut mekwen kup-kup, pantai dam ulamik ninye deiyok nang ap arye kekebik. “Allah el si Yahweh arye, Israel ninye amutuku yanamaka ati, Yordan mek cepromalaba, koubuka yanganmake,” nyabikura, kekebikopura, pia ilil weik ubuk. Ara, sik Israel ninye ati, sik yuk yala ninye pia ilil ubukce, sirim talibuk. Sik kanye talima daksakukba, ‘Israel ninye obuka sirya daknamap,’ tenelamik ning ara, batakik. Sik ilil weik ubuk atia.
Bikbik abuka yanmek bukni, sik Ai mutuku yin talena nang arye, sik Israel nang nirya ati, dobuka opnin yanganmekce, Ai mutuku weik bisik bublan dam arye kupsakuka, kat ning, logam ena ati ulamik mutuku, Syebarim mutuku dam yayik. Yayikopura, amutuku taram anyapce, kiklina ara, ninye tiga puluh enam (36) nang ara, sik Israel tam nang, amutuku taramak arye oplobik. Winibikba, sik Israel nang nirya, ‘Seʼ tenen, ilil pia weik ubukba, ‘Nunda dipkoprob kum winiptibyeʼ tenen, malye nyanmekce, engebuka batakik.
ကြော်ငြာတွေ