Nuh birye, Allah el si erena ati, aning nirya uku dongobukba, uku dinmokce, nintong teleb ning welebukba, Allah el si Yahweh kekebukce, “Telebe,” tenebuk. Utenebukce, Allah el talima pum arye aning ton tenebuk. “Ura, wini talak arye, dipdongobuka doryanganamle talak noutamak nirya ara, ninye tukwak ninye ati, tukwak mutuku tonap ikin ning deibuka, malye kum updeipnamne. Ninye tukwak ninye nirya ara, winiryuk deibikce talak arye, dipdongobuka, sik kam unamak talak noutamak nirya ara, sik kanye tenenamak ning ap, sik talima patalamle ning nirya ap ara, pia malye unamle bukni, tukwak mutuku ara, tamubuka tonap malye kum kipdeipnamne. Tukwak mutuku nirya ati, tonap tamubuka kum supnamne. Tonda, tukwak mutuku kam ulye ning ayala-yala nirya, obuka kum daneipman touk, yuk talak ara, tup tamubuka tonap kum winipnamne.
Imamat 26:31 - Eipomek31 Tonda, anggun umunye asik, kota noutam nirya, anggun aik weik domluma nirya ara, narye malye kibuka uluplopnirye, kum kipniba, talye louk kipdeipnamne. Anggunce, teleb sukum teneplumce, domba basam ato ning opmunyakarye, isa si erena ati, arelulumak nirya ara, narye daklopnamne. Tonda, na si erena ati, arelyanganamnulum ning nirya ara, arepnutuma babye, narye siltong kum kekenirye, dipkoprob kanye deibuka, kum dolonamsine. Aning ara, batakniba, talye daupnamle. အခန်းကိုကြည့်ပါ။ |
Imamat 26:31
45 ပူးပေါင်းရင်းမြစ်များ
“Minop talak, Allah narye, Israel ninye ati, ‘Aning ara wininamlume, aning ara kum wininamlume,’ nyapse. Tonda, nyapse. ‘Na yupu kum kekepmunyopura, winibuka-winibuka wenepsinirya, ikin ning anggun nong deice delinamsine. Winipsinirya, anggun mutuku ap, anggun nirya ap ara, obuka sirya daknamsine,’ nyapdeiamse. Anda anyamse yupu winiryuk kekeplum talak ara, talima mitang upkuke. Winipkukba, anda Yosia birye, ‘Se, nun apu yape ap, nun ap ara, dipkoprob malye weik ulamupue,’ tenyamlume. Utenyamlum, ‘Ati, nun ni Allah, el si Yahweh arye, nyapnamsil yupu moubuka kekenamabe’ tenen, talima kintiniplumce, ikin kanye bona ati, an baju kwilikloplumba, malye kanye boplumce, na dam yanuka engebuka, nati moropnulume. Aning nirya ara, na Allah arye, akunum eipkise. Aning nirya winipluma ara, nara Allah, na si Yahweh arye, nyapkine. Ance moropmanilam yupu ara, akunum kekepkine.”
Aninguk kum bukni, sik Babel mutuku yin talin nang, winibik ning ara, Yerusalem weik asik keil poka dobuka aknapdongomik ning ara, uluplobik. Tonda, Allah Yahweh, el si eren ati domik aik ap, tonda, amutuku ninye deiyok nang nirya, sik un aik nirya ap, tonda weik mambul ning, ninye deiyok nang, sik ulamik aik nirya ap, tonda amutuku noutam tuba awamuk dekna teleb ning nirya ap ara, dakuka batakik.
Asipdesibuk, sik anang arye tamubuka, “Persia mutuku nang arye obuka sirya daksikce, sik mutuku bobinamsik nang ara, ton nang ara diamik bukni, ton nang yupa ara, mitik tonun tuba kam ukirye, tamubuka Yerusalem biyike. Sikda, Yehuda tam Yerusalem mutuku dam tamubuka biyik bukni, ikin weik unyake. Unyak buk, yuk mutuku nang arye, anang ati nalinyakba, alye weik ulule. Tonda, Yerusalem mutuku weik keil poka domik ning ara, dakuka uluplobik touk, tuba aubuke. Apoka bublan ara, uku dongobike,” nyapnike.
Winipmasa ani, tamubuka yasopura, sik nirya ati yanuka nyapse. “Amapo ikin weik upsilye ning ara, anggun nirya akunum kel biklume. Yerusalem asik nirya ara, minop ulamupu atonun kum unyabe. Yerusalem dana-dana wiamik poka ap, apoka bublan ap, ninye aik nirya ap ara, daklobikce poka bublan nirya dakuka uku dongobik. Winibika ati, wini talak ara, anyasik cang poka tuba tonap lipsisikuka dopnamabe. Winibipyopura, nun nirya tuba tamubuka teleb kanye bobuka unamabe. Tonda, yuk nang arye, tuba kum nalinamsiyake. Wini talak alye weik usulul touk, tuba alye kum unamsile,” nyapse. Nyapsirye ayupu ton lak nyapse.
Lukdaseryuk, narye tamubuka Raja ati nyapse. “Naio, na patapnil ning ara, anda pia kam unalame. Na ikin upnil ning ara, na ni yapu diamikba, tuku palibuka wilamik mutuku ap, anyasik domik ning ap, yu nang arye dakuka uluplomik touk, tuba malye ulule. Tonda, anyaik buru tam sik bisik wekelbalimik poka bublan ara, dakuka uku dabikba uku dibuke. Aning nirya malye unmala ati, na lik kanye bopne,” nyapse.
Aning atonun, anggun mutuku nirya ara, yuk pera mutuku yu weik nang arye, akunum opsike. Anggun aik dolamlum ning nirya ara, akunum uku dongopsikba, uku dibuka sirya daksuke. Yuk pera mutuku ninye arye, anggun taleamlum mutuku dalubuka dopropsikce, anggun wa wibuka kouamlumba, palamuk ning nirya ara, alabuka dololanyake. Anggun mining dam dinmamunyak arye, malye winilisinyake. Anggun ning nirya dibuka sirya dakanyake. Winibikirye, anggun mutuku nirya obuka atu kiplopsike.
Nyabukopura, narye tamubuka asipdese. “Se, na ni Allah, kum kekepmanto unamak talak ara, yata talak arye talima kat ninye uk unamak do?” nyabuka asipdese. Asipdesiba, Allah arye, tamubuka nyapnuk. Amul arye kekena kum ap, asing arye el lina kum ap, talima kat ap unamak ara, weik tonun tonap pia aunamake. Ilil kum asa winilamice buk, sik wenena ati, narye nyapniba, yuk mutuku yu nang arye yacopura, sik aik dolamikce ning nirya, dakuka atu kiplopnamake. Sik aik ulamikcak nirya ara, ninye una kum ati, asik oldemuk upnamle. Sik wa wilamik ning nirya ara, yu nang arye alapdobikirye, yaniptabikiba, tuku nirya babye, malyeuk upnamle. Sik koulamak ning tonok ning babye, teleb ton kum upnamle. Aning nirya ara, kum danamle.
Yata deiyok ati ance bataksulumba, an mal olan nang arye, an si eren aik, Yerusalem mutuku noutam mambul aik ara, daklomik ninguk tuba malye kilinyak do? Minop talak ance, ‘Na si amutuku deice deipniba, pia kurun mutuku unamle,’ nyalamlum bukni, nun an mapu arye, tia taleamupu buk, wini talak ara, malye nang aryuk akunum yaninyake.
Ati, nun ni Allah Yahweh, ance nun malye winilamap ning ati, pia yu weik upkiliba derepnirye, ‘Wenepnamne’ tenen, ‘Aning ara, tuba kum tenenamsilyam’ tenen, moropkinyabe. Nunda ance wiamsulumce, an mapu koproba una ati, kintinip deiamsulumba, unyaba anya arye, nun malye wininyap ning ara, ‘Tuba kum tenenamsilam’ tenen, morokinyabe. Aning kum bukni, ‘Ance nunti tamubuka kanye deipsimince, nun ikin usilye ning ati, melinamsilam’ tenen, morokinyabe, na nio.
Bukni, anggun Israel yala nang ara, anggun kanye aryuk, ‘Winipnamabʼ tenen, malye tenelulum ninguk winilulume. Ara, anggunce isa el siuk erelulum deice arye, pia malye ning weik winilulum bukni, tonda, ‘Allah ati arepnuyabe,’ tenelulumce, na arena ati, yuk ning ton arenululume. Winiplulum ning ara, pia malye uka. Ara, yatanye do nirya, yim sapi basam obuka, Allah el si erena ati boyanuka arebikce talakuk, anang aryuk, sik mapu ton obikirye, isa si erena ati boyanuka arelbanyake. Tonda, domba basam mi winiryuk weinye nenmalye ning, na Allah ati binuka arebikce talakuk, sik anang aryuk, sik Kanaan tam nang ulamak touk, kam dobuka, el ngang talibuka bobikirye, isa si erena ati arelbanyake. Aning atonun ton, gandum duk boyanuka, na Allah si erena ati, yanuka arebikce talakuk, anang aryuk, sik Kanaan tam nang ulamak touk, basam ining boyanuka, isa si erena ati binuka arenyake. Tonda, gandum duk teikikirye, nintong teleb mek, el si kemenyan tabakikirye, na Allah ati, telebe nyana ati ara, na si erenyakce, aning dobuka, uku dongonmakce talakuk, anang aryuk, sik Kanaan tam nang ulamak touk, isa si erena ati, isa urasin atonun ning memebuka deiamik ning ati, ‘Nun ni telebe,’ nyabikirye, aisa si erenyake. Ati ara, sik amalye ning talibuka unyak nang nirya ara, na bataknikirye, sik kanye aryuk, ‘Winipnamabe,’ tenebikce ninguk ubuka, pia malye ning ukirye, aning nirya ati, kanye deibuka unyake. Aning nirya ara, pia malye weik wininyake.
Bukni, moubuka kekepnululume! Na Allah arye, asum arye anggunti, ‘Aning-aning talibuka wininamlume,’ nyabuka, nyapdeipmasin yupu kekebuka, ayupu atonun kum winilamunyopura, dipkoprob nyapsine. Narye lo arepniba, yuk mutuku yu nang arye, anggun mutuku ninye deiyoknye, Raja ulye aik, el si istana, Raja nirya ara, ulubuka sice buklobikiba, kum danamle. Ayupu ara, na Allah Yahweh arye, “Akunum nyapdeipmasina ati, nong dipkoprob upnamlarya,” nyapsine.
Anggunda, Allah el yupu kum kekepmunce, pia mandipna uk winipmunyopura, Allah weik arye wenepnamsile. Ara, minop talak Silo mutuku ulamik ninye, wenebuka oplomse touk, anggun atalak ululum Israel yala ninye nirya babye, anggun malye winimunya dekna ati, opnamsine. Tonda, anggunce anyasik-anyasik nirya, Yerusalem mutuku domlum aik nirya ara, anggun wenena ati, malye kipdeipniba, yuk mutuku ninye mutuku-mutuku unyak ninye nirya arye, “Se, Yerusalem mutuku ara, malyeuk winilamikba, Allah arye malye nyabuka, supdongobuk mutuku ani,” nyanamsiyake. “Allah arye nyaipmanil yupu akunum nyapsine,” nyabuka, laka nyapnalyame. Allah arye Yeremia biti, nyabuk.
Aninye arye, Yeremia tomobikce, mikip arye talibikopura, ayupu ton nyabik. “Anda weik mandipna kanye bopmalamce, Allah el si deice arye, ‘Yerusalem mutuku nirya ap, Israel yala ninye nirya ap, Allah el si eren aik ap ara, Allah arye malye ulinamsile. Ara, minop talak, Silo mutuku ulamik ninye wenebuka oplobuk touk, anggun amutuku ululum ninye babye, atonun upnamsile,’ nyapmasilam ning ara, yata deiyok ati do? Tonda ance, ‘Amutuku noutamak ara, yuk nang arye, obuka kum kipdeipsikiba, ninye ton kum unamake. Amutuku domunye asik nirya ara, asik oldemuk upnamsile,’ nyapmasilam ning ara, yata deiyok ati do? Nun kanye ara, ayupu nirya ara, talye nyamasilame, tenenyabe,” nyabik. Nyabikce, aunmek ninye nirya arye, yep-yep abuka malye nyanmekce, Yeremia el nong dana-dana tam bulubuka yayik. Ara, Yeremia unmokakuk, Allah el si eren aik dam, bulubuka yayik.
Tukwak mutuku-mutuku nirya dipdesiba, Allah arye, el mapu ati, yu ubukba wenebuk ning ara, min talak teleb sukun tuku uamuk bukni, adilamsak, tuku ara sisal sebuka, pia kata uk ubuk. Tonda, weik asik dobuka ulamik mutuku nirya ara, anyasik nirya akunum dakuka batakikba asik oldemuk ubukak, eipse. Allah Yahweh el dam, aning-aning nirya, pia malye ubukba, asik oldemuk ubuk. Ara, Allah Yahweh el weik yu arye, el mapu koproba, sik wenena ati winibuk.
Yehuda yala nang, sik mal olan ati yanamak nang ara, winipmanto, Singa kus duknubuka ulamlya ani, ‘Din ton obuka diptinye’ tenen, elamle atonun, Yehuda nang, anggunti, yu tenesinyak nang ara, akunum kintinibuka yanamake. Ara, Yehuda mutuku nang, asik dobuka ulamikce mutuku nirya, daklobikba, asik oldemuk uplirye, tunim apnamle. Ninye ton amutuku pia kum unamake.
Israel nang arye, ‘Nun ni koproba,’ nyabuka, sikce si erenyak Allah ara, na Yahweh arye nyapsine. Nara, im deice unyak yin talin malaikat nirya ara, sik deiyoknye ununa ati, na mikip weiknye birye nyapsine. Ura, anggun nirya moubuka tenipnamlume! Yerusalem mutuku ap, Yehuda mutuku noutam unyak nang nirya, sik asik dobuka unyak mutuku nirya ara, narye sik wenena ati, ikin ning arepsiba, imun kanye bobuka unyaka ara, anggun ton akunum elilulume. Wini talak ara, anggunce, amutuku tenipnamlume. Sik wenena ati, lo arepsiba, sik yuk mutuku yu nang arye, yanamikce, Yerusalem ap, Yehuda mutuku weik asik dobuka ulamik mutuku nirya ara, ulubukabikce, malye kibuka oplobikba, ton nang dibik, ton nang bobinamik. Ati ara, anggun mutuku koproba ara, oldemuk ulule. Ninye ton amutuku noutam kum unyake. Aning ara, na Allah arye ikin ning dobuka, sik deice deipseba, anggunce akunum eibuka biknamlume.
Ati ara, anggun malye ulamlum ning ati, na yu weik upnukba, wenen ning dobuka, anggun deice deipsise. Tonda, Yehuda mutuku noutam ulamik nang, sik asik dobuka ulamik sukum ap, Yerusalem mutuku, weik asik noutam ulamik nang, sik bisik yamikce balamikak nirya ara, na yu upnukba, amutuku nirya ara, obuka sice buklopseba, oldemuk ubuk. Winipmanto ara, ninye arye, uku sekikirye diplyeba, tuku nirya silal selamle atonun, wini talak Yehuda mutuku nirya, eibuka biknamlume.
Babel mutuku ninye deiyoknye birye, nyapdeibuk touk, elti, kalikina deiyoknye, Nebuzaradan birye, Yerusalem mutuku wekukce, el ap, el yin talin nang ap arye, Allah el si eren aik yanuka uluplobik. Ara, Yahudi yala ninye, sik Allah si eren aik ap, tonda, Raja Zedeikia, el teleb weik ulamuk aik ap, tonda el amu tam pili yuk-yuk deiyok kibuka, dolamik nang ulamik aik ap, amutuku weik aik nirya ap, adiparyuk yanuka uluplobikce, uku dabuka sirya dakik.
Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk.
Minop talak ulamik mutuku nirya ara, kanye deibuka, kil-kil asa arye teleb ubuka ulamik. Bukni, wini talak unyap Yerusalem mutuku ara, asik ol dem ubuku ati, wini talak ara, langapdongobuka, namin asa arye unyabe. Minop talak ara, mutuku nirya teleb asauk ulamik bukni, wini talak ara, youwak kilapu ulamak touk unyake. Minop dorapce, dib dongobuka, upra yangalamupu nirya ara, pia teleb bukni, wini talak tuba malye updeibik.
Ninye arye, ‘Aning ara, nauk taliptinye,’ tenenyak ning nirya ara, sik mal olan nang arye, nirya dalubuka dolonyake. Winibuka dolonyak ninye ara, sik yuk ninye dinmakibuk, Allah el si eren aik noutamak wekelbanyake. Allah Yahweh arye, el mapu koproba, ubuka una kum nang ati, ‘Pia winibuka kum unamlyame,’ nyapdeibuk.
Bai tam talye palamle yo webuka bataklamaka touk, nun ni Allah arye, lo arebukba, nun mal olan nang arye, Allah el si eren aik babye, dakuka batakik. Ara, Allah el mapu tonok, nun Israel ninye, bulubuka wekibirye, el si erenyap aik ara, akunum daklopsike. Winibik deice arye, nun Israel nang, nun ni Allah si erebuka kina ati, didik sen sum, Sabat sum ap, Allah el si erebuka kina ati, asum ara, weik sum anye, asum babye, weik sum ton asukum nyabuka kintinibupu sum ara, ‘Lubakibikirye, kwalya kwalina kum unamakeʼ tenen, ikin ning weik, nun deice deipsuke Tonda, Allah el yu ubuka deice arye, nun mutuku Raja nang ap, imam ap babye, sik nirya arye nyanyak yupu ara, elce ton kum kekelule. ‘Sikda dauplyeʼ tenen, kum kekeplirye, batakasulule.
Allah el lek ning arena ati, keil pala taplakuka yangabuka deibikce, kam ning obuka arelyangalamikba, imam nang arye, aning dobuka, adeice uku sekuka, Allah ati arelamik ning, el si mesba, aning babye, ‘Na likeʼ tenen, batakuka mangkau kililule. Aning atonun, Allah el si eren aik, pia pum tam teleb lek babye, batakuka mangkau kililule. Allah ara, aning-aning nirya talilirye, pia mikip weik deiyoknye, elce nunti, namin kipsukce, lo arebuk ning ara, nun mal olan nang yayikce, nun mutuku deiyok nang arye unyak aik, istana ap, nun unyap aik dana-dana tam, weik cang keil poka dobuka, antanap dongobupu ning ap, aning nirya ara, dakuka bataknamsiake. Ati ara, nun mal olan nang yayikce, obuka sirya daksik ning ara, min talak nun Israel nang arye, Allah el si eren sum upneba, anyaik wekuka, el si erena ati, kilina ap, pin-pin kanye deibuka mot nyana ap, ulamikce touk, nun mal olan nang babye, talye luparabuka anyaik noutam wekikce, “Nunce sik Israel nang nirya ara, akunum obububirye, sik mutuku ara, alubuka dopropmabe,” nyabuka, winilanuk unmik.
Atalak noutam ara, Israel yala nang ululum mutuku nirya ara, pia malye uplyopura, aik oldem upnamle. Anggun weik asik dolamlumak nirya babye, yuk mutuku yu nang arye yanuka opsikirye, sice bukuka bataknamsiake. Atonun, anggun wa wilulum tuku nirya babye, adiparyuk malye kipdeipyeba, aning-aning nirya kum mutuku upnamle. Anggun wenena ati, arepnamsin ikin ning nirya ara, anggun kam tuba unamlum nang nirya arye, ‘Se, Allah Yahweh, elda dipkoprob aning-aning nirya talibuka, Pia Mikip Weik Deiyoknye ulule’ tenen, biknamnulume.
Ninye on nang arye, sik warikdongobuka yakceura, aparang ya arye, na mapu koproba, deiyok koubuka, opnin banmaceura, sik Israel mutuku unyak nang mikip-mikip unyak nang ara, mitang kipdeiplyeba, talima daksaknamle. Atalak ara, ninye weika arye obikceba, tukwak sakuka poulbikirye, dipnamake. Anggun nirya eipnalume! Anggun ululum mutuku nirya ara, anggun weik asik wekelbana ati bisik, cang keil poka bublan dam ara, narye yu yin nang deipnyeba, ninye on nang kintinipnamake. Amutuku nang, weika arye opnamak ati, sik yin nang arye, na ninye on ya erebuka talibiceba, aya si ara, perereng alamle touk upnamle. Ara, aparang ya, narye kintinip deiamseba, pereng-pereng alul ning ara, ninye opnamak ati, winipse.
Winiminye ati, sik Israel nang wekmakirye, yupu kekebikceura, sikce anti asipdenamkiake. Ara, ngalukuka malye nyabuka engepminyeba, Israel nang arye, ‘Se, yata deiyok ati, ngalukuka malye nyanmalam do?’ nyabuka asipkikceura, ance sik anang ati, nyapnulyame. Kume, dotalak ara, kanye ikin yupu ton boyasikceura, kekepnamaba atia. Ayupu nirya yanuka nyabikceura, kekepnamak nang ara, ‘Se, yata wiriptibye do?’ tenen, ikin kanye bobuka, sik talima dakalsanamle. Tonda, sik anang nirya ara, taruk mitang uplyeba, daksaknamle. Sik kanye bobuka unyak nang nirya ara, kum kipnamle. Tonda, sik anang yok sirim taliplya deice arye, sik yok babye, sirim talibuka, mikip kum upnamle. Sik kanye tenen ning ap, sik kisok yung ap ara, mek atonun uplyeba, pia mikip kum upnamle. ‘Weik ikin ning yanamle,’ nyapmasina ara, pia dipkoprob yanamle. Anggun dibinauk unamlume. Aning yalyopura, aning nirya ara, winipnamle. Na Allah Yahweh, aning-aning deice tam erebuka, Pia Mikip Weik Deiyoknya ununye birye, akunum nyapdeipsine. Allah arye, na Yeheskiel biti nyapnuke. Nyapnukopura, yupu tonap dukdongobuka nyapnuk.
Tonda, nyapse. “Allah arye, ‘Ayupu ara, sik Israel nang dam nyapnulyame, nyapdeipmanilba, anggunti yanuka nyapsine. Ara, Allah arye, “Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapsine. Anggunda, Yerusalem mutuku noutam, Allah si erena ati, weik aik dopluma ati, anyaik eibuka, talima erepdalumce kwaliplume. Anggunce, ‘Se, nun mikip deice arye, pia urasin teleb aik akunum dobupu,’ teneplumce, kanye delilulume. Anggunda anyaik doplum ning dilbana atibuk, tuba patapsilyeba, binuka sekelulume. Bukni, na Allah arye, anyaik uluplopnirye, sice kibuka, malye kipdeipnamnarya. Tonda, anggunti, Babel mutuku boyanamse talak ara, anggun mitik mapu ara, Yerusalem mutuku noutam batakamlumak, tuba unyak nang ara, sik mapu ap, kilmapu ap ara, yu nang arye, mal olan deice arye ona ap, parang ya sekna deice arye dipnamake.” Allah arye nyapnuka ati, laka nyapmasine.
Anggun Israel noutam ululum nang nirya ara, wenebuka opsikirye, kum kipdeipnamsiyake. Ara, anggun ululum mutuku nirya ara, weik asik doplumak, ulubuka sikce buklopnamake. Atalakuk anggunce, si erelulum isa si erenak ap, isa arena ati, mesba doplumak ap, tonda anggunce, ‘Isa si erenamapʼ tenen, puturubuka deiplum patung ap, tonda, ‘Isa mer arye kekepnamsiyakʼ tenen, sik si eremunce, siltong lena teleb ning dobuka, uku dongopmunyak babye, sikce buklopnirye, kum kipdeipnamne. Tonda, yata ning do nirya, anggunce, ‘Isa si erepnamapʼ tenen, kintinibuka deiplum ning nirya babye, uluplopnirye, sirya daknamne. Aning nirya ara, sikce bukuka bataknamne. Allah Yahweh arye nyabuk
Winipnalam talak ara, wisi nang ap, wisi kilapu ap, wel nang ap, wel kilapu ap, mitik mapu ap, kilmapu ap, sik nirya ara, opnamalyame. Winibuka opnalam bukni, aning moubuka kekepnamalulume. Yata nang do nirya, akain lenan ongopmalinye birye, ninye tonoknye babye, sik urasin deice lak kina ati, seken ning akunum sekdeipmalye nang ara, bol ton kum pipnamlume. Seken ning, sik urasin deice akunum wamlye nang ara, olana meme. Ati ara, wini talak asukum noutam arye, na si eren aik dam arye, deiyok koupnamalume,” Allah arye, sik yin talin nang ati nyabuk. Nyabuk talak aryuk, sikda ninye olana ati, deiyok koubikce, Israel nang ninye deiyok nang nirya, Allah el si eren aik urasin dam tikmek nang kan-kan arye, kong kibuka wipmekce, opnin banmekba eipse.
Daniel birye, ayupu nirya akunum nyabukopura, ninye deiyoknye, Nebukadnesar birye, Daniel el kanye deibukce kina ati, gutam tuku dipdongobuka, kanupdongobuk. Winibukopura, el amu tam pil don nang ati, yupu nyapdeibukba, sikce Daniel biti, kanye deibuka kibikce, siltong teleb lelamle ning ap, dekna teleb ning, yuk ning ap, dobuka boyayikce, Daniel biti arebik.
Winipnamne talak ara, Isak birye, talye ning Isa Mutuku Dongonye si erena ati, mutuku deice keil pala deiamuk ning ara, narye ulubuka bataknirye, kum kipdeipniba, aminyan talak ara, ninye ara, amutuku pia kum binamake. Tonda, Isak birye deibukba, dadeipdanin yanganyak ninye, Israel ninye arye, ‘Isa Mutuku Dongonye si erenamap’ tenen, domikba, teleb uamuk aik nirya ara, narye ulubuka bataknamne. Winipniba amutuku nirya ap, anyasik nirya ap, oldemuk upnamle. Winipnyopura, sik ninye deiyoknye, el si ara Raja Yerobeam, el taleamuk ning ap, el yala ninye ap, el taleamuk mutuku ap, el amu tam deiyok kibuka ulamik ninye nirya ap, obuka sirya daknamne. Winipnirye, yuk mutuku yu nang ati, lo arepneba, parang ya boyakirye, Raja Yerobeam taleamuk ning ap, ninye nirya ap, obuka sirya daknamake.” Allah arye, na Amos biti nyapdeipnukba kekepse.
Ati, na nabi Mika birye nyapsine. Anggun weik malye winimunye ati, Sion mutuku ara, tuku palibuka, wa win dam atonun upnamle. Ara, Allah arye lo arepliba, Yerusalem mutuku noutam asik domik ning nirya ara, yuk mutuku nang arye yanuka, uluplobikiba, asik oldem upnamle. Winibikirye, Yerusalem mutuku noutam ulul asik nirya ara, uluplobikiba, sice butbuta atonun upnamle. Amutuku noutam dolamik asik nirya ara, kum danamle. Winiplyopura, aminyan talak yo mutmuta paplirye tiklyopura, talye bai mutuku atonun upnamle. Allah Yahweh, el si eren aik amutuku deice ulul bukni, aminyan talak, anyaik babye uluplobikiba, kum danamle. Amutuku deice ara, talye yo mutmuta palamla atonun upnamle. Na nabi Mika birye, anggun amutuku deiyok nang ati nyapsine.
Nara, Allah Yahweh arye nyapsine. Narye, yata yala nang nirya do, narye sik malye winin ninguk, talinyak nang ton, yupu akunum seksirye, anang akunum kum kipdeipse. Sik ayala nang, amutuku noutam ulamik ninye arye, weik asik dobuka, ulamik mutuku nirya ara, aning nirya narye dakuka, sice buklopseba, oldemuk kibuk. Winipseba, sik anyasik noutam pala bisik yamik ning ara, minop talak ninye weik balamik bukni, narye abisik nirya, dakuka sice buklopseba, wini talak ara, tonoknye babye, abisik kum balule. Tunim abuka oldemuk ulule. Tonda, sik amutuku asik dobuka, ulamikak ara, ‘Yuk tam yu nang arye olyasicakʼ tenen, kalikna ati, dolamik cang keil aik ap, kat keil arye, cang poka domik ning nirya ara, narye akunum dakuka bataksiba, wini talak ara, oldem kibuke. Tonda, amutuku noutam ara, ninye tonok babye ton, amutuku noutam kum unyaka ati, amutuku noutam yamik bisik ara, kum banyaka ati, tunim abuka, oldemuk ulule.
Amutuku yanuka obisipnamak nang arye, Yahudi yala ninye weik parang ya arye olonamake. Ton nang ara tapu koubukabikirye, yuk karen mutuku bobikirye pil dinamake. Yerusalem asik dokcak nirya ara, Yahudi yala kum ninye arye, ‘Amutuku ara mambul ak,’ tenena kum aryuk, talye yan yanibuka unamake. Winibuka daulamiceura, Yahudi yala kum ninye weik ninye deiyok nang kibikirye, mutuku-mutuku nirya pia talinamake. Allah arye tenyamuk talakuk wininamake.
El nyabukura, kekebupu yupu ara, ani. Ara, ‘Nasaret mutuku deiamiknye Yesus arye nun malye wininyap ning dekna ati, Allah arebibirye el si erenyap aik uluplopnamle. Tonda, Allah arye nyapdeibukura, Musa arye peterelamukbuk, kekelamikak arye winipnin yangalamik ani, wini talak nun peterepsikura, wininyap ning nirya ara, aning batakikirye, ‘Winiryuk ning yuk punubuka dobolbinamak’ tenen, Yesus arye kintinibuka deipnamsile,’ nyabuka, Stefanus arye ayupu nyabuka peterepsukura, kekebupe.” Tilila yupu nyabik nang arye, ayupu nyabik.
Ura, yuk yupu ton nyapnusine. Yata ninye do nirya, Allah el dipkoprop yupu akunum peteresikceba, kekebikirye, moubuka kel kinyak bukni, ‘Dawaplye’ tenen, sik kanye aryuk tuba-tuba malye winibikcopura, akunuma. Aning ara, kum lipsisikmantoe. Ara, sik malye winin ning kum kilina ati, yuk ning ton areptinga babye, diksukum kibuka kum kipdeipdatinge.