Samaria mutuku binuka warikinmek talak ara, pia ilil weik ulamik ati, amutuku imun kanye weik bolamik. Winilamuk talak ara, din pia weik patalamuk. Winilamukba, keledai basam opneura, kalibuka dekna ati ara, abasam kisok tonok ara, dekna weik ning el si uang perak 1 kilo deice arye, deklamik. Tonda yalma maka deibup dekna ati ara, uang perak setengah kilo kintinibuka arelamik. Ara, yalma maka deibup, tonok kilo doprobikce, noutam arye, bokuka dumbarye, deibikopura, setengah kilo uang perak deice arye, deklamik. Ati ara, aning-aning nirya ara, kum danamuka ati ara, awamuk ning aning-aning nirya ara, pia dekna weik arye, deklamik. Ati imun kanye weik bolamik.
Imamat 26:26 - Eipomek26 Tonda, anggun din ning pana deiyok ning nirya ara, kum kilinamsine. Winipnyopura, anggun din ning, pia mitika aryuk uplyeura, anggun mutuku kilapu takubarye, kilapu arye, ‘Roti kwaning din ning dapnuyapʼ tenen, pataplyeura, roti bun ning ara, mitika aryuk upnamla ati, roti dana tonok aryuk danamake. Aroti kwaning danmaca ani, akunum dabuka deibikcopura, ‘Ninye nong ikin ulamlye touk, roti kwaning ning ton, dobuka arebibyeura, dinamakʼ tenen, ninye nong ton ikin ati, dipdekirye, din ning bokuka arelenmake. Winipdenamak bukni, timbangan arye kiklibiceba, auplye touk bokuka arebikce babye, din ning mitikuk upmalya ati, din ning kum bounamsile. Din patanauk unamsile. အခန်းကိုကြည့်ပါ။ |
Imamat 26:26
17 ပူးပေါင်းရင်းမြစ်များ
Dipkoprob, Allah Yahweh, elda aning-aning nirya deice tam erebuka, pia mikip weik ulul deiyoknye birye, im deice yin talin malaikat nirya talilirye, mikip weiknye ulule. Elcuk, Yerusalem mutuku weik asik ap, Yehuda tam noutam ap, sik amutuku bitinye noutam unyak nang arye, sik din ning ap, mek ap, bulubuka kintinibuka delilamik ning ara, doproplirye, kum kipdeipnamle. Din patana weik upnamsile.
Ninye ap, sik sapi basam ap arye, pala weik wa, lo 10 hektar ubuk ning ara, wa wibikirye, anggur yala koupnamak bukni, aminyan talak anggur duk li yalyopura, anggur duk dakuka, mek purubuka deipnamak ning ara, pia mitik tonunuk, 22 literuk upnamle. Aning atonun ton, gandum yala ati, kintinibuka deipnamak yala ara, 220 liter bobuka koupnamak bukni, gandum wa wibuka kouamica ani, paplirye, el nong moupnamle ning ara, weik kum bukni, mitik tonunuk, 10 liter dem lipnamake. Deiyok ara, narye din patan talak arepnamsin ati, anggunce koulalum ning nirya ara, aminyan talak pia kum kipdeipnamne.
Allah Yahweh ara, aning-aning nirya eitam ulirye, im deice unyak yin talin malaikat nirya talibuka, sik deiyoknye ulule. Allah elce, sik Israel yala nang ati, pia yu weik ubukba, anang wenebuk. Yu weik ubukba, amutuku ulamik Israel nang, sikti, wenebuka deice arye, weik uku buk dilamle touk ubukba, sik taleamik mutuku nirya, uku dibuk. Sik amutuku ulamik nang nirya babye, uku buk dinmalibuk, adeice yo webuka dongolamak touk ubikba, uku arye dibuka, sirya dakuk. Tonye birye, el kwit ati obuk. Tonoknye babye, ton kum bico tenepdayik. Sik nirya arye, olanauk ulamik.
Atalak ara, kwaning weik patan li kibuka ati, tonok asik nang arye, sik sirik tam unyak nang ati, obinuka obikce, sik din ning alubuka doprobikopura, dibuka sirya dakdobik. Bukni, kum boubukba, tuba kwaning patanuk ulamuk. Ati, sik sirik tam neika ulamik nang ati, obinuka obikce, sik din ning babye, alubuka doprobikopura, dibuka sirya dakdobik. Bukni, aning dibika babye, kum boubuka ati, tuba kwaning patanuk ulamuk. Pia kwaning patana weik ulamuka ati, sikcuk deiamik mapu ap, sik tam nang ap nirya ara, obikce, sik nong babye dipdobik.
Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.
Se, anda ninye sirika arye deipkiknye ulyame. Yata mutuku nang do nirya ara, amutuku noutam ulamikce nang nirya arye, malye winilamtingce nati, ‘Elda pia diba kum tenenyaba ati, elce nyapsilye yupu, talibuka pia kum wininamabe’ nyabuka, bataklamniting toura, na adiparyuk amutuku noutam ulamikce nang nirya ati, wenebuka, weik ikin ning, sik deice deipnamne. Aning winipnirye, na taruk mikip arye, adiparyuk wa wilamik ning nirya, kum kipdeipnirye, sik din ning kintinibuka deilinyak ning nirya babye, malye kipdeipnamne. Winipnyopura, kanye imun weik din patan talak arepnyeba, yanamle. Tonda, amutuku nirya malye kipdakceura, amutuku noutam unyak nang nirya, opnyeba dibikceura, sikce taruk talibuka weinyak kam ulye ning nirya babye, obuka sirya daknamne. Winipyeba, atalak ara, yuk mutuku nang babye, amutuku kum yanuka unamake. Amutuku ara, asik oldem upnamle.
“Tonok sum deice arye, aroti kwaning dana deiyok ning bokukapmince, dapnalam ning ara, mitik tonunuk 230 gram kintinibuka dapnalame. Akunum dapminyopura, asum-asum nirya ap tonda, ‘Aketing-aketing akunum uplyopura, dipnamne,’ tenepminye touk, ance 230 gramuk bokuka dinalame. Ton aning ara, aning arye deice tam ara, ton dobuka pia kum dinalame.”
Nyabukopura, elce ayupu ton nyapnuk “Anda ninye koprop arye deipkiknye ulyame. Narye Yerusalem mutuku nang dinamak din ning nirya ara, kum kipdeipnirye, sirya dakeipnamne. Winibuka akunum kum kipdeipniba, din yala aning-aning nirya ara, kum kipdeipnamne. Winipniba, sik din ning yala-yala nirya ara, sukdopnamle. Winipliba, sikce, “Se tenena ap, ikin una ap ukirye, sik din ap, mek ap nirya ara, kum kipdeipnamne.
Sik aninye nirya ara, din ning nirya ap, mek ap, kum danamle ning ati, sik nirya malye bol bobicopura, sik eipdakirye, ‘Se,’ tenen, ilil upliba, sik kanye talima nirya daksakliba, mambul kanye bobuka unamake. Bukni, winipnamaka deiyok ara, sik malye winilamik ning ap, tupa malye wininyak ning ap, adeice arye ikin ning, sik nong deice deipniba, sik dibuka sirya daknamake.
Ati ara, na Allah ati, anggunce kintinibuka deipnamlum din ning nirya ara, anggun wenena ati, kum kipdeipniba, anggun din ning nirya ara, kum daneipnamne. Weik din patana akunum upsilyopura, winipmanto ara, ninye arye mal lubikiba, urup tatce ulamle ning arye, yuk nang el mun luklamak touk, upnamsile. Winipmanto ara, mal doplyopura, ara talye ati kum bukni, dipkoprob anggun oltakana ap, kum kilina ap ati, winipnamsine. Ati ara, anggunce taliplum mutuku nirya ara, bataknirye, anggun din ning kum kipdeipnyopura, dipkoprob kwaning patan ning weik yanamle. Wininamle talak ara, anggun amutuku ululum nang nirya ara, kwaning patana deice arye, ‘Se’ tenena ap, kwaning patana ap, unamlume.
Tonda, Israel ninye sik din ning nirya ara, dinamak bukni, kum boupnamle. Winipmanto ara, sik talye-talye uk yolalamak kilapu ara, sik talye nang ap, yolanyak deice arye, bona weik talinyake. Bukni, sik akilapu ara, mapu kum deiplilamak touk, Israel yala kilapu nirya, sik mapu ton pia deipmanto kum unamake. Aning nirya ara, urdem ati kum winipnamle. Deiyok ara, na Allah Yahweh, sik ni koproba unun bukni, nati bataknikirye, talye ning ati, ‘Nun ni koproba,’ nyabuka si erenyake. Wininyaka deice arye, yu weik unulula ati ara, anggunti wenebuka bataknamsine.” Allah arye nyabuk.
Ati, anggun din ning weik tonun dinamlum bukni, pia kum bounamsile. Pia tuba patanauk unamsile. Tonda, anggun bon-bona ara, pia weik tonun, dobuka talinamlum bukni, ‘Abon-bona ning, pia tuba kum unamsile. Anggunda, abona ning weik tonun, ‘Naʼ tenen, dokola deibipyopura, aminyan talak telebuk unamap’ tenen, abona delinamlum bukni, aning deice arye, teleb kibuka kum unamlume. Aning nirya ara, narye kum kipdeipniba, kum danamsile. Tonda, abona bobuka, teleb kibuka delilamunya babye, narye lo arepneba, anggun mal olan nang yakirye, onamsiyak talak arye, ubula dalubuka dolonamsiyake. Narye, abona nirya yamubuka bataknirye, kum kipdeipnamsine.
Winipmanto ara, anggun yala ning ara, weik arye dokolulum bukni, ayala ning dokamunya ani, nong lin talak ara, mitik anunuk lilulume. Tonda, anggun din ning ara, weik ausulul bukni, adina bobuka dipmunye talak ara, mun noutamak saksilirye, kum boupsiliba, teleb kanye bobuka, kum ululume. Tonda, anggun anggur yo duk wa ara, weik welulum bukni, dakuka dilulum talak ara, kum bousulule. Atonun tonda, buppu una ati, anggun baju weik tonun ongomunya babye, anggun nong buppu kum pirisulule. Tonda, ‘Yuk nang melibuka pil dobipyeura, dekna ning arepsikiba, deibibirye, kam tuba unamabe,’ tenemunya babye, adelilulum ning nirya ara, bisik arye sakaliba, ‘Naʼ tenen, kum delilulume. Ara, anggunce nati, ‘Allah elda weik mambule’ tenen, kibuka si kum erenululume ati, anggunce, ‘Winipnamepe,’ tenelulum ning nirya ara, talyeuk ulule. Nong kum upnamle.
ကြော်ငြာတွေ