Raja Daud birye, aning wibuka nyabuka ati ara, Allah Yahweh arye, weik kanye ikin uk yala deiyok ning dobuka, sik Israel yala nang ulamik mutuku noutam nirya, asum beren tam talak arye, bulu buka, Allah Yahweh arye tenyamuk talak atouk, dipkoprob winibuk. Aning winibuk talak ara, aweik kanye imun uk dilamuk bukni, sik Israel yala nang ulamik mutuku nang nirya, dibika yupa ara, tujuhpuluh ribu (70.000) nang dibik. Ara iknapye tam, Dan mutuku arye dukdongobuka, utam uamuk weik asik Beer-Sheba mutuku, danoutam nirya ara, ninye weik dibik.
Imamat 26:25 - Eipomek25 Wininamsin ning ara, ani. Ara, narye mal olana deiyok nang dopdeipsiniba, sik parang ya dobukabikirye, anggun dam olyanganamsiake. Narye anggunti, wenenamsina deiyok ning ara, ani. Ara, narye anggunti, “Aning ara, wininamlume. Aning winiplumyopura, narye aning ton teleb kilinamsine,” nyabuka, nyalin yupu akunum nyapdeipsise. Bukni, ayupu tuba-tuba yanimunya atia. Tonda, anggunce, ‘Se, Allah arye wenepsilyakʼ tenen, anggun mutuku binuka, anggun weik asik dana-dana tam, keil poka noutam aryuk, bulubuka unmunce, ‘Asukum ara, elce kum opsutuʼ tenen, unamluma babye, narye anggun dam ara, imun kanye bona weik ning ton, arepsinyeba, anggun kan-kan, uk weik anun talinamsile. Ara, uk ayala-yala nirya ap, suse ap arepsinyeba, auk nirya ara, kwetepmanto kum unamsile. Tonda, nati tuba malye kanye bopnulumakarye, mandipna kanye deiplumnyopura, anggun mal olan nang ton dopdeipnyeba, anggun damuk mal olyanganamsiake. Obuka sirya daksikirye, tapu koupsiceura, anggun pera mutuku bobinamsiyake. အခန်းကိုကြည့်ပါ။ |
Imamat 26:25
42 ပူးပေါင်းရင်းမြစ်များ
Tonda, ayupu nyabuka morobuk. “Winipmanto ara ton, Allah an mapu Israel nang arye, an dam malye winibikcopura, ance wenen ning arepsiminyeba, nun oldan nang arye sirya obuka daksikiba, ilil kanye bobibirye, an aik dam ton tamubuka yabirye, ‘Se na nio, nun malye wininyap ning batakabe. Anda nun ni Allah tonok ulyama ati ara, ancuk lyepsilyame,’ nyabuka moropkeipyopura, ‘Ance kekenamsilam’ tenen, moropkine.
“Tonda winipmanto ning ara, amutuku din patana ap, weik mambul uk talibuka ninye dipna ap, tonda sik koun ning koubikiba lyulamle ning ap, tonda koun ning koluna ap, tonda weik sul kwising arye, weik yakirye nun koulamap ning nirya dibikce talak ap, tonda anggun oldan nang arye yanuka olyasice talak ap, tonda, yata kanye imun ning yanamle talak do nirya, Israel nang arye anti morobikcopura, ‘Ance kekenamsilam’ tenen, moropkine.
Ura, Raja Hosea bira, Israel tam taleamuk talak arye, Asyur mutuku ninye deiyok kibuka taleamuknye, el si Salmaneser, elce Israel tam yanuka obukabukce, Hosea taleamuk mutuku ara, Salmaneser birye, ‘Amutuku alubuka dopropnamne,’ tenebuk. Utenebuka ati, aketing tamun, aketing tamun nirya ara, Raja Hosea birye, el talilamuk bona kan-kan arye, dekna teleb ning, weik tonun dobuka, Asyur mutuku deiyoknye bitibuk arelamuk.
Siriya mutuku yin talin nang kong mitik tonun yanmik bukni, Allah Yahweh arye, Yudea tam nang sik wenena ati, sik Siriya mutuku yin nang deice mikip weik arebukce, lo arebukba, sik Yehuda mutuku yin nang ara, yupa weik ulamik bukni, oplobik. Ara, Yehuda mutuku ulamik nang ara, sik apu yapu arye, ‘Nun ni koprobaʼ tenen, si erelamik Allah Yahweh ati batakuka, isa siuk erelamika deice arye, malye weik ulamik ati, Allah arye aninye wenebukce, ikin ning weik sik nong deice deibuk. Allah arye, ‘Aikin ning arepnamna deice arye, Raja Yoas bira, obuka wenepnamne,’ tenyamuka ati winibuk.
Se, nun ni Allah Yahweh, ninye malye wininyak ning ati, anda kwang dakna deiyoknye ulyama ati, ance, “Aning wininamlume. Aning ara, pia kum wininamlume,” nyapdeiamsulum yupu nyasulul touk ubuka, ninye nirya kum winibikirye, malye wininyak ning ati, wenenamsilame. Diba nun ni Allah, anda sik malye wininyak nang ati, kwang dakna deiyoknye ulyama ati, minop yanuka, ninye nirya ati, yupu lipsisikuka bokeipmince, wenenamlame!
Nyabukura, Musa ap, Harum ap arye tamubuka nyaprik. “Nunda Ibrani nang, nun ni Allah, el si ara Yahweh. Nun ap, neika ansinibuka yupu talibupu. Ati ara, ance, ‘Telebe,’ nyabuka bataksiminba, ninye una kumak pata mutuku bisik, like winilye mabuka bibyopura, nun ni Allah el si Yahweh erena ati, kam ning obuka, el diamuk arenamabe. Aning kum winibipyopura, Allah arye nun wenena ati, nun damuk dipna deiyok ning arepnamsil do? Akumopura, ‘Elce nyapliba, nun mal olan nang arye, parang ya arye, dobuka olyanamsiyak do?’ tenen, ilil kanye bobuka unyaba ati, nyapname,” nyaprik.
Kanye talima kat ulamsuka deice arye, malye weik ulamluma ati, narye obuka sirya dakanamsine. Wenebuka opnamsina deiyok ara ani. Ara, narye anggunti yukulamsise talak nirya ara, anggunce na yupu kum kekelamnulumce, bataklamnulume. Aning ati narye anggunti, yupu nyalilamsise talak nirya ara, anggunce na yupu kum kekelamnulume. Narye, ‘Aning ara mem ning ati, winina meme,’ nyapdeiamsise ning ara, tuba winilulume. Aning atonun, narye, ‘Aning ara na like,’ nyabuka laka nyalamsise ning ara, anggunce tuba winilulume. Winilamluma deice arye, narye nyalamse yupu mitik kililamnulumce, anggun bidamang winin ning atibuk weik kepropnin, balamlumce, nati yanibuka malyeuk kilalume. Ati, narye nyapniba, yuk pera mutuku yu ninye arye, sik nirya obuka sirya dakanamake.”
Aninguk kume. Yehuda yala ninye ap, Yerusalem mutuku ululum ninye ap, anggun nirya arye, ‘Amutuku noutamak ara, winipnamabe,’ tenelulum ning nirya ara, kum kipdeipnamne. Ara, narye sik yuk mutuku unyak nang, mikip arepneba, anggun Yehuda tam noutamak ululum ninye ap, Yerusalem mutuku ululum ninye ap nirya ara, obuka sirya daknamsiake. Atalak ara, narye anggun kum lyepnamsine. Anggunda, bataknamsine. Winipniba, anggun oldan ninye arye, ya dobuka anggunti opsice talak ara, eipnamake. Anggun ti, ‘Nun like,’ tenenyak ninye arye, anggun Israel yala ninye dipnamlum talak eipnamsiyake. Anggun opsicopura, yuk nang arye anggun nong nirya ara, kum weipnamsiyake. Kume, oplopsikiba, talye bai tam unyak ning ap, talye maka ap yakirye, yanuka dipnamsiyake.
Aninguk kum bukni, narye, sik Yehuda mutuku ulamik nang, yuk-yuk mutuku binuka unamak mutuku noutam nirya ara, na Allah arye ninye olan ning deiyokuk arepnyeba, yuk nang ap olanauk wininamake. Tonda, din patan ning arepnyeba, din patana deiceuk unamake. Tonda, ‘Ninye weik tonun diptingʼ tenen, wenen ning, sik dam deipnyopura, sik weik tonun dipnamake. Winipnamne bukni, akunum winipnyopura, yuk-yuk mutuku noutam bukni, sik Yehuda mutuku unamak nang nirya ara, dibuka sirya daknamake. Winibikceba, minop talak, narye sik apu yapu nang ati, ‘Amutuku arepnamsine,’ nyalin yupu deice arye nyalamsa ani, amutuku anggunti arepsise mutuku ara, Yehuda yala nang, ninye tonok babye, tuba kum unamake. Sik nirya kum kipdeipnamnarya! Allah arye nyabukba, na Yeremia birye kekepsirye, asukum sekeipse.
Anggun daunamlum nang mutuku sirya, im sirya nirya ululum nang nirya kekeplulume! Sik Babel mutuku nang arye tomobuka bobinamik Israel yala nang ara, atalak arye deiyok koubuka, Babel mutuku batakuka, Yerusalem mutuku noutam tamubuka yanganamake. Sikce Yerusalem mutuku yanamak nang arye, nyanamak ning ara, ani. Ara, “Nunce si erenyap Allah, nun ni koproba Allah Yahweh arye, sik Babel mutuku nang ara, wenebuka opnamle. Ura, sik malye winilamik ning ati, kwang daknamne! Tonda, sik Babel mutuku nang arye minop talak, nun ni koproba Allah Yahweh, el si eren aik ara, akunum ulubuka, sice buklomika ati, kwang daknamle,” nyabuka, weik yupu arye nyanamake!
Allah Yahweh arye, yuk-yuk mutuku noutam unyak, mikip weik ninye deiyok-deiyok nang, sik kanye talima noutam ara, pil akunum dobuka deice arye, sikce, ‘Ura, nun nirya bulubibirye, Babel mutuku binuka, sik Babel mutuku unyak nang nirya ara, obuka sice buklopnamabe! Ara, sik Media mutuku unyak nang taleamuk ninye deiyoknye ap, Media mutuku nirya talibuka ululnye ap, el yin talin nang arye, Babel mutuku nang olbinamle. Awinipnamle ning deiyok ara, Allah Yahweh arye, ‘Kume, sik Babel mutuku nang ara, pia malye winin ning weik ulya ati, sik wenena ati, wini talak, anang nirya obuka, sice buklopnamne. Tonda, sik Babel mutuku nang arye, na si eren aik ulubuka daklobika ati, wenepnamsine. Sik dengna ati, weik ikin ning sik nong deice deipnirye, sik nirya oplopnamne,’ akunum tenebuke. Ati ara, anggun yuk-yuk mutuku ululum yin talin nang arye, wini talak anggun adiparyuk, mal lupnamlume! Tonda, ninye olban talak, anggun taram dam lelina ati, delilulum kat ning, el si ara perisai babye, aning ton kintinip deipnamlume!
Dipkoprob anggun Israel nang ati, wenepnamsina ara, ani. Narye sik amutuku unyak nang ara, dobukapnirye, sik apu yapu nang babye, pia kum bikamik mutuku nang, yuk pera mutuku nang deice deipnamne. Ara, narye yuk pera mutuku nang ati, lo arepnyopura, anang arye, sik Israel nang dam yanuka obikirye, dobuka tapu koubikirye, sik yuk pera mutuku tamubuka bobinamake. Tonda, mal olan talak arye, ‘Se, nun nirya obuka, sice buklopnamsiak’ tenen, ilil weik upliba, bai sakuka bindobikirye, bokdanuka mutuku yuk-yuk balona ati, bikbik abuka banamake. Bukni, narye yin talin nang ton, tuba dobuka deipniba, Israel nang yuk pera mutuku dabinamak nang nirya ara, ninye on parang ya arye, obuka sirya daknamake. Ara, yin nang dopdeipniba, yanuka opnamaka ara, sik asa arye kum wininamake. Ara, Israel nang, sik wenena ati, na Allah arye mikip weik arepniba, adeice yuk mutuku yin talen nang arye, yanuka obuka sirya daknamake. Allah arye nyabuk.
Tonda, bisik noutam butbuta deiceuk, wisi nang babye, wel nang babye, ninye banyak bisik noutamuk, sakuka poulbanyake. Aning atonun, wel nang ap, wel kilapu ap nirya ara, nun mal olan nang arye, ninye on ya arye obuka batakanyake. Allah ance nunti, yu upkuk sum yanmala ati, anda nunti ton, bico kum tenesilyame. Ance lo arepsulumba, nun mal olan nang arye, talye lubakibuka oltaknauk usinyake. Aning nirya ara, ance teneplum touk winiyake.
Winiptu ura, telebe. Winipmanto ning ton nyapnune. Aning atonun, arup lak nyapmanu mutuku atonun uptopura, naryuk, “Amutuku noutam ara, ninye ona ati, yu yin nang dopdeipnyeura, amutuku noutam nirya ara, ninye nirya obuka, sirya daknamake. Ara, ninye nirya, sikce weinyak kam ning ap, talye bai tam kam ulye ning ap nirya ara, obuka sirya daktinge.
Atalak ara, narye anggunti ara, na mikip deice arye wibuka, yuk-yuk bulupdeipnamsine. Ara, domba basam weina deiyok nang arye, sik kama erebikceba, sik domba basam dam baceba, sik deiyok nang, ‘Aning ara, ‘Naʼ tenen ning, aning ara bobuka opnirye, uku dapnamne. Aning ara, oplopnamne,’ tenelamak touk, narye anggun nirya ati, wenebuka yuk-yuk bokeipnamsine. Tonda, na yupu deice arye, ‘Winipnamlume, winipnamlume. Winibuka winipmunyeura, narye anggunti, winibuka melipnamsine. Ton nang ara, na yupu moubuka kum winipmunyeura, wenepnamsine,’ nyabuka bokeipnamsine. Narye anggun nirya ati, nuknamsine. Winipnyopura, narye nyalamsise yupu, mikip arye, ‘Anggunda, ayupu moubuka kekepmunce, aninguk talebuka wininamlume,’ nyapnamsene. Narye nyapnamsin yupu, moubuka bikmunce, talinamlume.
Ati ara, Na Allah Yahweh, aning-aning talibuka, deice tam erebuka, Pia Mikip Weik Deiyoknye birye, anggun Mesir nang ati nyapsine. Narye, yuk mutuku yin talen nang dopdeipniba, mal olan ning, parang ya, tace ning boyanuka, anggun mutuku noutam unyak nang ap, sik Mesir nang arye talibuka weinyak kam ning ap, anirya ara, obuka sirya daknamake.
“Se, anda ninye sirika arye, deipkiknye ulyama ati, an mutuku nang ati, nyapnulyame. Yata mutuku do nirya, tonok mutuku noutam ara, na Allah arye, ton mal olana yu nang dopdeipniba, olyanganamak talak ara, amutuku nang ara, winipnamake. Amutuku ninye arye, ‘Nun mutuku mal olan nang, olyanamsiyakʼ tenen, sik kan-kan arye, kalikna deiyoknye ton wipdeibikiba, akalikinanye birye, pia moubuka dinauk unamle.
Anggun kwaning patan li arepnamsin bukni, aninguk kume. Narye lo ton arepnyopura, bai tam kam ulamle ning, yu weik ulamle ning ara, singa kus atonun ning do, yu kam do? Anggun dam yanuka, si topsikirye, olyanganamsiyake. Winipsikcopura, anggun mapu weik obuka dibikiba, anggun mapu kumdanin banamake. Tonda, yuk kanye imun weik ning ton, arepnamsine. Ara, kanye imun uk, yala-yala nirya ap, tonda yuk mutuku yu nang arye, parang ya arye dobuka olyanganamsiyak ning ap, anggun deice dobuka deipsikcopura, anggun Yerusalem mutuku noutam ululum nang ara, opsinirye, sirya daknamsine. Nara anggun ni koproba, Allah Yahweh arye, ayupu ara, akunum nyapmasina anya arye, dipkoprob anyapman touk upnamle. Allah Yahweh arye, nyabuk. Ara Allah arye, ‘Yerusalem mutuku unyak nang arye malye weik ulamika ati, sikti wenepnamneʼ tenen, aminyan talak, sik nong deice kanye imun weik ning delinamle ati, na Yeheskiel dam yanuka lak nyapnuke.
Israel mutuku noutam bukamuk mutuku-mutuku dup nirya ap, amutuku noutam unyak nang nirya ap ati, ayupu nyapminba kekepnamnyake. Na Allah Yahweh, aning-aning nirya talibuka deice tam erebuka, pia mikip weik ununye birye, nyapnusine. Na Allah Yahweh, aning-aning nirya talibuka deice tam erebuka, pia mikip weik ununye birye, Yerusalem mutuku dana-dana tam ubuk mutuku-mutuku dupak ap, mitik mutuku bumang-bumang ap, kot dam ap, weik mutuku luh, mek balamlak ap ati, narye nyapdeipnusin yupu nirya ara, moubuka kil bikna ap, kekena ap, unamnyake. Dipkoprop nyapne. Narye, sik yu parang ya talibik nang, yuk mutuku yin talin nang lo arepnirye, dopdeipniba, anggun mutuku yanamake. Ara, sik Israel yala nang arye, talye ning ati, ‘Nun ni koproba aniʼ tenen, isa si erelulumak mutuku dup domlum aik nirya ara, ayin nang yakirye, aning nirya ulubuka uku dabikirye, daklopnamake.
Israel ninye tuba malyeuk ucopura, pera mutuku ninye arye yakirye, Israel ninye aik dobikce, unyak mutuku noutam nirya, yanuka wariknamsiyake. Wariksikirye, parang ya arye opnamsiyake. Wariksikirye, anyasik-anyasik nirya antanabuka, domik keil poka noutam bublan botopdeiamik ning nirya, kat yo ap, besi ning ap arye domik ning nirya, uluplopnamake. Winibikirye, sik Israel ninye ayala-ayala nirya arye, ‘Aminyan talak ara, wininamabe, wininamabe,’ tenelamak ning nirya, kum daneipnamake. Ara, pera mutuku yin talin nang arye, Israel ninye nirya malye kibikirye, sik amu tam deibikcopura, sik nong deice ikin ning deibikirye, sik tenenyak ninguk, pil donamake.
Anggun unamlum mutuku nirya ara, narye melibuka kaleksiniba, pia telebuk unamlume. Amutuku noutam, pia teleb kibuka umunce, talye mangkau asa manamlume. ‘Se, yata ning arye do, yata mutuku nang arye, yanuka opnusiak do?’ tenen, ilil pia kum unamsile. Tonda, yuk talye bai tam yu ulamlye kam ning ara, ninye opmanto kum ulye ning nirya ara, bai basam do, yu kwatima do, yu weik kuse harimau do, aning nirya ara, anggun mutuku noutam arye dopropnirye, kum kipdeipniba, anggun dam kum olyanamsile. Aning atonun, naryuk melibuka kaleksiniba, yuk mutuku yu nang nirya arye, parang ya donogobikirye, ‘Sik Israel nang opnuyapʼ tenen, anggun mutuku noutam kum olyanganamsiake. Narye kaleksiniba, mal olan nang ton pia kum olyanamsiake.
Tonda, narye Mesir mutuku ninye ati, deiyok ning arelamse touk, anggun babye naryuk, uk dina deiyok ning arepnamsine. Tonda, kam nang nirya ara, mal oldanmaca noutam, narye sik obuka, bataknamne. Tonda, aning atonun sik kuda basam babye dopropnamne. Tonda, sik doltakne aik noutam nirya ara, opmace nang, sik tong aryuk weleplirye, tong welepnamle ning ara, anggun kam tuba unmace nang, sik u pum bisik weksiliba, atong kekepnalume. Winipsilya babye, anggunce tamubuka, na dam ton, kum yanamlume. Na Allah Yahweh arye nyapsine.
Nyabukce, ayupu ton dukdongobuka nyabuk. “Narye Israel kili sal kum danalina ati, pia weik uk din ning, sik nong deice deipniba, ninye weik dibikirye, sirya daknamake. Bukni Musa anda, narye melibuka talipnamkine. Adeice arye ance deipminba, dadeipdanin banamak nang nirya ara, akilisal ara, pia weik upra banamake. Tonda, yuk Israel ninye mitik mikip unyak bukni, narye melipkinyopura, ance deipminba, dadeipdanin banamak ninye ara, pia mikip weik arye upra banamake. Tonda, aninye babye weik unamak ning ara, nukmanto kum arye unamake,” Allah arye Musa biti nyabuk.
Atalak aryuk, deiyok kipdeibuk ninye yupa ara, pia weik, empat belas ribu, tujuh ratus (14.700) nang dibik. Mambul weik uk dibukba, dibik nang nukika ara, wilibuka nukik. Anoutam ara, Korah ap, el melin nang ap, dipmek nang ara, anang ap tabakuka kum nukik bukni, asukum unmekce, uk deice dibik nang ati, nukik.
Nyabuk ati, Musa birye Israel ninye nirya ati nyabuk. “Anggun adiparyuk yin talin nang ap, anggun ninye on ning ap kintinibuka deipnululume. Ara anggunce Midian ninye olbinaluma atia. Allah Yahweh arye Midian mutuku unyak nang ati, yu uplirye el mikip ara anggun Israel yala ninye deice deipsilyeura, Midian mutuku nang nirya ati, binuka obuka sirya daknalume.
Winildanmace talak ara, mutuku yuk-yuk weika arye lulukunamle. Tonda, wa wibuka kouamice ning nong kum uplyopura, din pia patana dem unamle. Tonda, mutuku-mutuku nirya yuk-yuk ninyeuk weik touk dilamlyeura, ninye weik dipnamake. Tonda, im deice upnamle ning eibikirye, ilil pia weik unamle ning ap, ‘Sirya talak akunum uple’ tenen, biknamaka ati, Allah arye pitin-pitin kilin ning im deice deipnamle ap, weik upnamle.
Allah Yahweh arye, anggun wenena ati, kanye imun uk, anggun dam deipsiliba, uk talepsilirye, anggunce dakdongopdanin banamlume. Anggun unamlumak ara, kanye imun weikuk, yala-yala nirya, deiyok tuba-tuba yalyeura, dopropmunce, ikin weik deiceuk unamlume. Winibuka ulamunya deice aryuk, anggunce, ‘Amutuku dopropnuyabe, asukumuk unamabeʼ tenen, bimunye noutam ara, dibinamlume. Adeice arye tonoknye babye, anggun unamlum mutuku noutam arye, ton kam kum unamlume. Auk dilamsilya deice arye, anggun nirya ara, dibina dem unamlume.
Tonda, narye arepneba, sik aik dam bisik noutamak nirya, sik mal olan nang arye, parang ya arye, opdanin bakirye, sik mapu weika arye dibinamake. Sik mapu kum upnamake. Winibikiba, asik unmakce nang nirya ara, ilil unamle. Wininamak talak ara, wel kilapu ap, wel nang ap, wisi nang ap, pia mitik mapu ap, sik nirya ara dibikiba, kum daneipnamne.
Wininyak nang, sik menenga ara, na Allah arye, sik malye pil donyak atonun kiklibuka, weik arye wenepneba, sik weik imun kanye bobuka unamake. Ninye kot dam arye, sakuka olamle atonun, sik malye winilamaka ati, aminyan talak, narye anang ati, wenepnamne. Sik anang on talak ara, akunum dam upmale. Anang opnirye, sirya daknamne talak ara, minopce yanamle, akunum dam kipmale. Allah arye nyabuk.
Ati ara, narye sik wenena ap, ona ap ati, parang ya kintinipniba, parang ya yu arye, mele dangdanganamle. Aya bopnamne ning ara, ‘Allah ara, nun like,’ tenenyak ninye ara, wenebuka ona ati, kintinibuka deipnamne. Sik malye nang arye nati, malye winilamnik touk, sikti wenebuka, yupu lipsisikuka bokeipnirye, oplopnamne.
Nyabikba, Yehuda yala nang kekebikopura, yupa weike tiga ribu (3.000) nang biyikce, Simson Etam mutuku keil deiya ulamukak biyikce, Simson ati nyabik. “Kao ance Pilistin nang ati, yata wiriplumba, nun mutuku yanuka opnamsiyak do? Tonda, sik Pilistin nang ara, nun deiyok nang kibuka talisinyaka ara, kum tenepmalam do? Yata ati nun dam yanuka malye kipdeipmasilam do?” Nyabikba, Simson birye tamubuka nyabuk. “Kume, sikce nati malye kipdeipnik touk, narye tamubuka sik babye narye malye kipdeipse,” nyabuk.
ကြော်ငြာတွေ