Winibukopura, Yehu birye, “Ura, Bahal isa, el si erenyaba anya arye, ‘Aning ara, wininamlume. Aning ara, pia kum wininamlume,’ nyan ning arebuk. Ara, tonok weik sum arye, Bahal el si neika erenamaba, ati kintinip deipnamlulume! Winipmunyeba, ninye nirya arye, ‘Asum ara aniʼ tenen, kintinilinamake,” nyabuk. Yehu birye nyapdeibuk touk, winibik.
Imamat 23:2 - Eipomek2 Musa ance, Israel ninye nirya ati, nyapnamlyame. Allah el si Yahweh arye wipdeipsil sum, weik mambul sum nirya ara, el si eren sum anya arye, Israel ninye nirya bulubibirye, ‘Asum-asum ap, atalak-atalak nirya ap ara, nun ni Allah, el si erena sum ati, ‘Asum nirya ara, weik mambule. Tonok ning babye kum bataknamabe,’ tenebuka unamabe. ‘Allah arye nyapnuke,’ ance Musa birye nyapnamlyame,” Allah arye, Musa biti nyabuk. အခန်းကိုကြည့်ပါ။ |
Imamat 23:2
28 ပူးပေါင်းရင်းမြစ်များ
Tonda, aning atouk, asum-asum nirya Allah Yahweh el si erena ap, el arena ap ati, pil dona kumce, dikdik sen sum, Sabat sum deice arye, kam ning opnarye, aning nirya boyangalamikce, uku dongolamik talak babye, Lewi yala nang aryuk mot nyalamikce, Allah el si erelamik. Aning atonun, winiryuk wala upmalye talak babye, Allah arye nyapdeiamuk touk,” Awala, atanggal deice arye, mambul weik sum uplyopura, na arena ap, na si erebuka kina ap, na si erena ap ati, aning arenamnulume,” nyapdeibuk touk, sik Lewi yala nang aryuk, aning boyanuka arelamikce, mot nyalamik. Atalak-atalak nirya ara, sik imam deiyok nang arye, ‘Winipnamlum-winipnamlum,’ nyabuka laka nyapdeiamuk touk, sik amu tam ulamik Lewi yala nang aryuk, apil talibuka dolamik. Minop talak ulamik atonun, winiryuk nang nirya babye, sik aLewi yala nang sikcuk, apil talibuka pia dopnin balamik touk, tuba pil donyake.
Ninye deiyoknye Raja Salomo birye ayupu dobuka, Tirus mutuku nang deiyok kibuka ulamuknye, el si Hiram biti, el dam nyapdeibuk. “Diba na kwit, teleb aik dona ati, ance na ni koproba Daud, el ap yupu taleamdumce winilamlum touk, urasin teleb kat yo, el si ara kipyal yo kintinibuka dopdeipminba, narye urasin pia teleb aik dopnamne. Ara, ance na ni koproba ati melilamlum touk, na babye melipnamnilamʼ tenen, moropkine,” nyabuk.
Aweik kwalina talak akunum upnopura, aning akunum winipnin balamik anya arye, aminyan talak, ‘Nun malye winina ati wenebuka opsilyak,’ tenen, ‘Nun malye ning pununa ati, kam ning obuka, Allah el arenamabe’ tenen, uku dalamik. Tonda, Allah arye, “Wininamlume,” nyapdeiamuk touk, weik sum winiryuk wala upnopura, ‘Asum ara mambul sum,’ tenebuka, Allah ati si erebuka si erena ati, kam ning obuka elti, arelamik. Tonda, Allah el si Yahweh arye, el yupu noutamak, “Atalak wininamlume, atalak ton winibuka wininamlulume,” nyabuka, weik sum wipdeiamuk touk, yuk weik sum nirya ara, atonun winibuka, winipnin balamik. Tonda, sik Israel ninye arye, ‘Allah ati, si erebuka, telebe nyanamap’ tenen, teleb ning talye urdemuk dobukapna arye, Allah el si Yahweh ati, si erelamikce arelamik.
Anyanmek ning kekebukopura, Harun birye aning urasin dam, keil pala dobukabukce, pala keil taplakakuka, yangabuka moupdeibuk. Ara, ‘Kam ning obuka, akeil deice deibibirye, asapi mi atonun ning si erepnamap’ tenen, keil pala yangapdeibuk. Keil yangabuka moupdeibukopura, nyabuk. “Ura kekepnululume. Ambusum ara, nun ni Allah el si Yahweh ati, el si erepnamapa ati, kwalya kwalibuka dinamabe,” nyabuk.
Asyur mutuku ninye ila tuba tonap kum elinamlum bukni, Sion mutuku uk, teleb kipdeipnyopura, amutuku uk elinamlume. Nati, diba tenenyak ninye nirya ara, Sion mutuku yangakirye, na si erena ati, weik kwalya kwalibikirye, pin-pin kanye bobuka, nati si erenamniyake. Winibikiba, elinamlume. Ara, Yerusalem mutuku teleb kipdeipniba, amutuku unamak ninye nirya ara, teleb kanye bobuka lamapdongobuka unamake. Yuk mutuku nang arye, kum benbenenamake. Winipmanto ara, ninye arye baju bol doltakna aik dopnamakca ati, tapu birin yo kat ning moubuka ikikiba, kum lulukmanto ulamle touk winipnamle. Tonda, tapu kum bulukmanto kat tapu kirikikiba, lulukna kumce kat ulamle touk, Sion mutuku babye atonun kipdeipnamne. Winipniba, anggunce elinamlume. Allah arye nyapdeibukba Yesaya birye sekeibuk.
Tonda, pia weik sum akunum dam uplye talak ara, ninye tonoknye babye, nun ni Allah, el aik dam kum yangalula atonun, ‘Sik mot nyanamak’ tenen, wipdeibik kam ninye nirya ara, malye kanye bobuka unyake. Tonda, Allah el aik siltong ning dobuka yayukba, uku dongonyak nang, sik imam-imam nang babye, ‘Se’ tenen, unyake. Sion mutuku weik bisik bublan noutamak, tonoknye tikuknye birye, pia bico kum tenepnamsile.
Tonda, sik imam-imam nang arye, apil ton donamnyake. Ara, malye winin ning ton arepliba, Israel nang arye, yu upliba, yupu deice arye walakcopura, sik imam-imam nang arye, aning nirya kekebikirye, ‘E, teleb winin ning ara ani. Malye una deiyoknye bira aniʼ tenen, yupu nyapnamnyake. Ara, anggun kanye deice arye kum bukni, na Allah arye anggunti, “Aning ara wininamlume, aning ara, pia kum wininamlume,” nyapdeipsise touk, ayupu uk tenebuka, yupu lipsisikuka bokeipnamnyake. Tonda, na Allah ara, “Anggun Israel nang arye, ‘Asum ara, mambul weik sumʼ tenen, kalikinamak sum ara, narye, “Aning-aning winipmunce wininamlume,” nyabuka, laka nyapdeipsise touk, sik imam nang arye deiyok kibikirye, wininamnyake. Atonun, na Allah arye, “Sik Israel nang ara, na si erena ap, anggun dikdik sena ap ati, tonok sum noutam nirya ara, talye pil nirya kum donamlume. Asum ara, Sabat sum ati, kintinip deipsise sum ati, sikce nati, si erebuka kinamniake,” nyapsise touk, sik imam nang nirya arye, ‘Asum ara, pia mambul sum, lek sum upsile,’ tenenamake.
Aning atonun, na Allah arye, sik Israel ninye malye wininyak ning dekna ati, ‘Weik sum tenebuka, kanye deibuka unamak’ tenen, kwalina ati kintinip deipsiba, weik pil aning-aning nirya donyak ning ara, kum kipdeipnamne. Sik weik sum ara, ani. Keting tamun winiryuk ning ap, wala tikin talak ap nirya, na Allah ati si erebikirye, talye pil dona kumce, dikdik senyak sum ap, tonda minop talak arye, ‘Anggun weik sum ani,’ nyabuka arelamsiba, weik sum tenebuka, weik kwalina yunyak sum nirya ara, kum kipdeipnamne.
Ati, sik Israel ninye nirya ati nyapminyeba, din dina kumce, si tebuka ukirye, ‘Dipkoprop asum ara, weik mambul sum’ tenen, ninye weik bulubuka yakirye, yupu talipnamake. Atalak ara, amutuku ninye deiyok nang ap, wisi-wisi nang ap, tonda Yehuda yala nang ap nirya ati, yukupmunyeba, sik nirya arye, Allah el si eren aikuk bulubuka yakirye, Allah Yahweh el tibuk, ‘Se, nun ni Allah Yahweh, ance melipsilyame,’ nyabuka moronamake.
Allah el ululak, Sion mutuku deice arye, pong-pong ana, el si terompet, lelim weik lepnamlulume. Nyapmunyopura, amutuku ninye nirya kekebikirye, utenepnamake. ‘E, bikilina ati, terompet nyanmaka anya arye, asum ara, weik mambul sum upmala ati, ‘Alelim nyanmak’ tenen, din dina kum deice arye, din si tebuka, bulang unmabirye, Allah moronamaba ati, nyanmak’ tenen, sik nirya bulubuka yanamake.
Aning nirya winipmunye sum babye, ance Israel ninye ati, nyapnamlyame. ‘Asum ara, nun nirya bulubukap wekibirye, weik sum upnamsile. Tonda, Allah elti, winilen sum anya arye, asum-asum nirya, ikin pil dolulum ning nirya ara, asum ara, pil ton dona meme. Dikdik sebuka, Allah el si Yahweh, el siuk erenamlulume. Anyapmasin ning ara, anggun ap, anggun mapu ap, anggunce deipmunba, dadeipdanin, banamak ninye nirya ara, aninguk, pia winipra banamake. Tonda, amutuku babye, yuk unamlum mutuku babye, anyapmasin ning pia winipra banamlume. Pia kum bataknamlulume, nyapsine. Allah arye Musa biti, “Ance sik Israel ninye biti, ayupu nyalbinamlyame,” nyabuk. Ayupu nyabukce, ayupu ton nyabuk.
Ura, arup laka nyapmasin yupu nirya ara, na Yahweh arye, akunum wipdeipse sum anya arye, anggun nirya ara, ‘Asum nirya ara, weik mambul sumuk,’ tenenamlume. Tonda, “Asum aning arepnamnulum sum ton, aning arenamlulume,” nyabuka, akunum laka nyapmasin touk, asum nirya, na si erena ap, tonda anggun malye winina ati, kum opnamsin bukni, anggun lyena ati, kam ulamle ning obuka, uku dongopmunce, na si Yahweh erenamnulume. Ton ning ara, gandum atonun ning. Ton ning ara, anggur duk mek. Ton ning ara, kam ning obuka arenamnulume. Aning-aning nirya ara, narye, ‘Asum arye, aning arenamnululume. Orsum ara, aninguk arenamnululume,’ nyapdeiamsise touk, arenamnululume.
Allah arye, Musa biti nyabuk, “Musa ance Israel ninye ati nyapnalyame. Allah el si Yahweh arye, wipdeipsil weik mambul sum nirya ara, el si eren sum ati, Israel ninye nirya bulubuka bukmunce, ‘Asum-asum nirya ara, weik mambule,’ tenebuka unamabe. ‘Allah arye asum ara ani, atalak ara, ani’ tenen, wipdeibuk touk, atalak akunum yalyopura, ‘Israel ninye yukupniba, bulubuka el si erenamabe’ tenen, yanuka weknamake, nyapsuke,’ nyapdeipnalyame,” Allah arye Musa biti nyabuk.
Ura, anggun Yehuda tam ululum nang nirya ara, moubuka dipdelulume. Ara, ninye tonoknye ton, wibuka deipyeura, mutuku dup deice tam arye yanamle. Ayanamlanye bira, laka pia teleb yupu boyanuka nyalnyanamle. Anye birye, laka teleb yupu boyanuka nyalyanamle ara, olana kumce, pia kanye teleb ubuka, talima dukulongona ati, yupu boyanamle. Ati ara, ‘Se, anggun Yehuda nango, wini talak anggun Allah si erena ati, weik sum ara, moubuka tenepmunce, asum ara, weik kwalya kwalibuka, Allah ati, si erebuka kinamlume. Tonda, minop talak, ikin weik ulamlum talak noutam arye, anggunce, ‘Allah arye lyepdopsutopura, nunce Allah ati winipnamabe, winipnamabe. El si erebuka kina ati, aning ton, aning ton arenamabe,’ nyapbuka, nyalin yupu deice, nyapdeiamlum ning nirya ara, dipkoprob aninguk winipnamlume. Ilil una kumce, talye lukparabuka, winipnamluma deiyok ara, ani. Atalak arye dipdongobuka, dounamle talak nirya ara, anggun mutuku noutam nirya ara, yu nang ton yakirye, pia kum olyanganamsiake. Ara, Allah arye, anggun mal olan nang ati, akunum obuka, sice bukloplirye, anang nirya kum kipdeipnamla ati, tonoknye babye ton, pia kum unamake. Anggun el ‘Naʼ tenen nang ara, kanye deibuka, telebuk unamlume. Allah arye nyabuk.
Atonun, anggun kanye delin talak nirya babye, terompet deice pong-pong nyanamlulume. Wala tikilongon talak ap, tonda narye, ‘Na si erena ati, anggun weik kwalya sum ani,’ nyalamse touk, aweik sum akunum kiplyopura, na Allah arelbana ap, si erena ap ati, anggunce cang pong-pong ana, el si terompet, pong-pong anamlulume. Nyapmunyopura, nara anggun ni koproba Allah Yahweh arye kekenamsine. Tonda, anggun malye winilamlum ning ati, wenebuka oplopsitinye bukni, anggun namin kina ati, kam ning obuka, nati arepmunce, uku dalbinumunye talak ara, cang pong-pong ana, el si terompet deice arye, pong-pong nyanamlulume. Aning atonun, na ap, anggun ap, neika teleb kina ati ara, kam ning obuka arepnumunye talak babye, cang pong-pong ana, terompet deice arye, pong-pong anamlulume. Nara, anggun ni koproba, Allah Yahweh arye nyapsine. Allah arye nyabuk.
Aning nirya obuka, Allah Yahweh el si erena ati, ‘Weik kwalya kwalina sum ara ani-ani,’ nyapdeipsuk touk, uku dongon pil dona ati ara, anyapmasen touk wininamlume. Ara, kintinip deipmakce din ning ap, anggur mek ap, tonda anggun malye winyamunye ning ara, ‘Allah arye kilbuka lyepnamsilʼ tenen, arelyangan pil dona ati ap, tonda anggun kanye arye, ‘Allah si erena ati, winipnamne nyalin yupu deice arye arenamlum ning ap, tonda, ‘Allah ap, nun ap, teleb kibuka neika unamapʼ tenen, aren ning ap, tonda yuk aren ning dobuka, Allah ati, telebe nyana ap ati, arenamnulum ning ap, aning nirya ara, min arye akunum nyapdeiamsuk touk ubuka, arelyanganamlume. Musa birye, Israel nang ati nyabuk.
Yesus wanwanun yo deice dipsuka deice arye, aning-aning nirya malye kibuka, deice tam ulirye, nun malye ning nirya kum kipdeipsukce, teleb akunum kipdeipsuke. Akunum teleb keipdeipsuka anya arye, yuk nang arye, anggunti, “Anang ara, malye unyake,” nyapdeipsikcopura, aning ara kekena kumce, dib kum tenenamlulume. Yata nang arye do nirya, anggunti, “Kume, aninye ara, ayala din ning dinyake, ayala mek dinyake, aweik sum ati, ‘Mambul sum,’ kum tenenyake. Tonda, dikdik sen sum, Sabat sum ati, nun wininyap ning atonun ara, kum wininyake. Nunce wala tikilongon talak yunyap ara, kum yunyake. Ati sik malye ninye unyake,” nyabuka, anggun nong deice malye yupu nyapdeipsikcopura, anggunce, ‘Dauplye’ tenen, kum kekenamlulume.
ကြော်ငြာတွေ