Israel ninye malye weik ulamik talak ara, sikti, ance asilen ning areplumce, “Narye, ‘Aning ara wininamlume, aning ara kum wininamlume,’ nyabuka nyapse Mem Yupu, tuba tonap kekebuka dobolbanamlume. Winipmunce, teleb unamlum bukni, kumopura, wenenamsine,” nyapdeiamlume. Nyabuka wenelalum bukni, mandipna kanye bobuka kwalilamikce, an nyalalum yupu yanibikce, sikce tenepne ninguk winilamik. Ance nyalalum yupu talye yaniplobuka bisina uk ulamik. Bukni, yatanye do nirya, ance, ‘Aning ara wininamlume, aning ara kum wininamlume,’ nyapdeiamsulum yupu, moubuka kekeplirye, dobolbilyopura, anye bira dipkoprob kam unamle. Bukni, atalak ara, Israel nang arye, mandipna weik ulamikce, ‘Allah el yupu ara pia kekena kumce wininamabe,’ nyaltaklamikce, an tam donga anipna arye, yuk tam kilolamik. An yupu kum moubuka taleamika deice arye, pia malye weik ulamike.
Imamat 18:5 - Eipomek5 Ton ap ayupu ton nyapsine. Anggunda, na amu tam unmunce, narye anggunti, “Aning wininamlume. Aning ara, pia kum wininamlume,” nyapdeipsise yupu, aninguk moubuka talipmunyakarye, aninguk wininamlume. Anggunce anyapmasin yupu nirya, kekebuka wininmunce, aninguk talibuka umunyopura, anggun teleb kibuka unamlume. Anggun unamlumak nirya ara, telebuk unamlume. Nara Allah Yahweh arye, ayupu nyapdeipsine. အခန်းကိုကြည့်ပါ။ |
Imamat 18:5
19 ပူးပေါင်းရင်းမြစ်များ
Ara, Allah arye, na Musa biti nyapnuk. “Narye nyapmakinye bira, Allah unune. Na si koproba ara, Yahweh unune. Narye, ‘Winibuka nyalbinulyame,’ nyapkinye touk, ance Mesir mutuku taleamuk ninye deiyoknye, Raja Firaun dam bimince, ayupu uk lak nyapnalyame,” nyapdeipnuk. Ara, “Ance Firaun biti, ‘Aning-aning nirya talibuka, ulya deiyoknye Allah arye nyapdeiamnuk yupu ara, narye anti nyapkine,’ nyabuka, lak nyalbinamlyame.” Allah arye nyapnuk.
Ati ara, Israel nang nirya ati, nyapnalame. Allah arye nyasulule, “Nara anggun ni koproba Allah, na si Yahweh unune. Na mikip deice arye, Mesir nang anggun nong deice ikin pil weik disinyak noutam ara, lyepdopnamsine. Ara, na mikip ap, mambul weik ning winipnamne deice arye, Mesir nang wenebuka opnirye, lyepnamsine.
Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.
Tonda, na Allah arye, sik Israel ninye ati, ‘Aning ara, wininamlulume. Aning ara, pia kum wininamlume,’ nyapdeiamse yupu ara, moubuka kekelule. Narye nyanun yupu nirya ara, moubuka tenelirye, talibuka pil dolule. Tonok ning babye, kum batakalule. Elce, ‘Winipnamne,’ nyalul touk, aninguk dipkoprob winilule. Tenepce arye tilila yupu ton, kum nyalule. Ato winilulnye bira, dipkoprob kam pia unamle, nyapsine. Allah Yahweh arye aning-aning nirya talibuka, deice tam Weik Erena Deiyoknye ulirye, ‘Winipnamne,’ tenelul touk, winilulnye birye nyabuk.
Israel nang bobuka, padang pasir noutam delilbisopura, naryuk sikti, “Aning ara, wininamlume. Aning ara, pia kum wininamlume,” nyapsirye yupu arepse. Tonda aning atonun, narye, ‘Anggunda winipnamlume, winipnamlume. Aning talibuka umunyopura, narye melipsinyeba, teleb kibuka, tuba kam unamlume,’ nyapdeipse yupu, ton lak kipdeipse.
Aning-aning nirya nyapdeipse bukni, sik Israel nang nirya ara, aweik kata mutuku noutam, padang pasir mutuku noutam arye balamik talak nirya ara, ‘Allah nyasilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina mem ning,” nyapdeipse yupu nirya ara, “Anggun nirya arye, ayupu moubuka taliplumakarye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik ulamikce, malye winilamik. Malye weik winilamik ati ara, narye, ‘Ura akunuma, apata mutuku noutam aryuk, anggun malye winin ning ati, yu weik usilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Nyapse bukni, wini talak, sik wel nang arye winilamik. Sik atalak wel Israel nang nirya arye, aweik kata mutuku noutam, padang pasir mutuku noutam arye, tuba ulamik talak nirya ara, ‘Allah nyapsilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina malye ning,” nyapdeipse yupu nirya ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,’ nyapdeiamse yupu nirya ap ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik winilamikce, malye ulalamik. Malye weik ulamika ati ara, narye, ‘Ura akunuma, akata mutuku noutam aryuk, sik malye winin ning ati, yu weik upnilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Allah arye, “Aning-aning pia kum wininamlume. Aning nirya ara, pia meme,” nyapdeibuk ning ara, ani. Tonoknye ton, tonoknye, el weit du koproba do, el yala nang koproba do, anye birye, el kwit koproba deiplye kilmu ara, pia kum doptue, Neika pia kum mapdiktinge. Aning ara, meme. Tonda, ‘Akilmu ap, na ap, neika maptinimnye,’ pia kum tenenamlume.
Allah arye nyabuk. Nara Allah Yahweh, pia min kume kum danmantonye unune. Minop talak ulamse touk, wini talak babye, aminyan talak babye, pia ati aunamne. Na si ton pia kume kum danamnile. Narye nyalin yupu nyapyopura, pia kum luba kinune. Pia teninune. Ati ara, anggun Yakub birye deiamsukba, dadeipdanin yangalulum ninye ara, malye weik umunya ati, talye lukparabuka wenebuka, obuka sirya dakamsitinye bukni, aning ara min kum winipsise.
Asipdeyukura, Yesus arye tamubuka nyabuk. “Ance, ‘Yata teleb pil doptinye do?’ nyapmanilama ara, deiyok ara, yata ati ayupu nyapmalamce, asipdemanilam do? Tukwak mutuku-mutuku nirya unyak ninye ara, tonoknye babye, teleb nang ton kum unyake. Dipkoprop teleb ululnye bira, Allah el tonok ulule. ‘Bol koplobuka pia kam una deiyok ning doproptinye’ tenen, patapkilyopura, Allah arye, ‘Wininamlulume, aning ara kum wininamlulume,’ nyapdeibuk ati, Musa arye sekeiamuk yupu mem yupu wamlye ning ara, ayupu nirya moubuka kekepmince, pia diksukumuk unamlame,” nyabuk.
Minop talak Musa birye, nyabuk. ‘Allah arye, “Aning ara wininamlulume, aning ara kum wininamlulume,” nyabuka mem yupu arepsuk ning moubuka kekeplirye, dobolbalinye bira, kam pia unamle. Yatanye do nirya, amem yupu moubuka talilirye, dobolbalya deice, Allah arye anye biti, “Elda diksukum ulule,” nyabuka teleb ulinamle, Musa birye nyabuk.’ (Imamat 18:5)
Atalak ara, Musa arye sekamuk mem yupu talibuka dobolbanyopura, kam unamne,’ tenelamsi bukni, ayupu talibuka, kum dobol binmanto upsopura, ‘Kume, ayupu kum winipmanto unulule ati, na malyeuk wininuna anya arye, Allah arye wenebuka opniliba, dipkoprop dipnamnarya’ tenen, amem yupu deice arye kel kiyamse.
Musa arye sekeiyamsuk yupu, mem yupu moubuka talinyak ninye ara, diba tenena deice arye kum unyake. Sikda pia pi dobuka, pil dona deice arye unyake. Sikce utenenyake. ‘Kume, amem yupu uk moubuka kekebibirye, pia pi dobuka dobolbanyaba deice arye, kam unmabe,’ tenekirye pia piribuka unyak bukni, kum winiptinge. Allah yupu sekamik yupu noutamak ara, ayupu ton aubuk. ‘Yatanye do nirya, Musa arye sekeiyamsuk mem yupu kekeplirye, tonok ning babye kum bataklirye, ayupu nirya dipkoprop dobolbilyopura, ayupu deice aryuk kam unamle. Bukni, ayupu noutamak ara, tonok ning babye bataklyopura, kam pia kum unamle.’ (Imamat 18:5) Ayupu aubuka anya arye, adeice arye kel kinyabe. Musa sekamuk mem yupu talibuka unyak ninye ara, utenenyake. ‘Ayupu kekebibirye, pia pi dobuka dobolbipopura, awininyaba deice arye Allah arye lyepnamsile,’ tenenyake. Mem yupu talibuka dobolbanyak ninye ara, diba tenena deice arye kum wininyake. Sik bidamang mikip deice aryuk wininyake.
Tonda, kam una deiyok ning wipmunyopura, ‘Anggunce anggun ni koproba Allah, el si Yahweh ati, kanye deipmunce, el nyalul yupu moubuka kekepmunce, eluk talibuka, dukdongobuka unamlum’ tenen, nyapsine. Wininamlum ning deiyok ara, Allah el si Yahweh ara, anggun Kam Una Deiyoknye ulula ati nyapsine. Winipmunyopura, anggun wekelbinamlum mutuku noutamak ara, anggun koproba ap, tonda anggunce deiplumba, dadeipdanin banamak ninye nirya ap, kam unamlum talak ara, lo weik arepnamsile. Ara, anggun apu yapu nang, Abraham ap, Isak ap, Yakub ap ati, Allah arye, ‘Amutuku arepnamsine,’ nyabuka, nyalilamuk mutuku ‘Bina unamlum talak ara, weik winipnamle,’ tenena ati, aning ara nyapsine. Musa birye Israel ninye ati, nyabuk.
Winipmunye talak ara, anggun ni Allah, el si Yahweh arye, anggun talima pum tam mambul pil donamsile. Ara, mitik mapu, ‘Allah el ninguk wininamak’ tenen, sik den bam bol sekenyak touk, Allah arye anggunti, winiryuk kanye talima arenamsile. Ara, anggun ap, anggunce deipnamlum mapu ap nirya ati, Allah el si Yahweh arye, elti, pia dib tenen kanye arepnamsile. Arepnamsil ning deiyok ara, ‘Anggun kanye talima ap, anggun nong ap, na Allah ati tamubuka arepnamniyake. Tonda, pia unamak’ tenen, winiryuk kanye talima arepnamsile.
Atalak ara, Musa birye, Israel ninye ati nyabuk. Anggun nirya moubuka kekeplulume. Allah arye, ‘Aning ara, wininamlulume. Tonda, aning ara kum wininamlulume,’ nyapdeipsuk yupu, narye anggunti laka nyapnusine. Ayupu moubuka kekepmunce, nimalya ap asa arye, Allah el amu tam umunyopura, kam pia unamlume. Winibuka umunyopura, Allah arye winiryuk ning arepnamsil, pia teleb weik mutuku binuka wekmunce, amutuku talibuka unamlume. Ara, anggun ni koproba, el si Yahweh, anggun apu yapu ati, kalikuka meliamukba, sikce el si erelamik Allah, elcuk nyapsuk yupu ati nyapsine.