Nuh birye, Allah el si erena ati, aning nirya uku dongobukba, uku dinmokce, nintong teleb ning welebukba, Allah el si Yahweh kekebukce, “Telebe,” tenebuk. Utenebukce, Allah el talima pum arye aning ton tenebuk. “Ura, wini talak arye, dipdongobuka doryanganamle talak noutamak nirya ara, ninye tukwak ninye ati, tukwak mutuku tonap ikin ning deibuka, malye kum updeipnamne. Ninye tukwak ninye nirya ara, winiryuk deibikce talak arye, dipdongobuka, sik kam unamak talak noutamak nirya ara, sik kanye tenenamak ning ap, sik talima patalamle ning nirya ap ara, pia malye unamle bukni, tukwak mutuku ara, tamubuka tonap malye kum kipdeipnamne. Tukwak mutuku nirya ati, tonap tamubuka kum supnamne. Tonda, tukwak mutuku kam ulye ning ayala-yala nirya, obuka kum daneipman touk, yuk talak ara, tup tamubuka tonap kum winipnamne.
Imamat 1:9 - Eipomek9 Wininamnimak bukni, aopmalye basam el yan tup ap, deisuruk deice palilamle meta ap ara, el anye biryuk, dobukaplirye, mek likukaplirye, teleb kibuka kintinilinamlule. Apil dobuka kintiniplyopura, Allah ap, ninye ap, ansililina ati, sapi bol arye domik doltakne tenda aik noutam pil donyak nang, sik imam nang aryuk, akintinip deipmalye ning dobuka, keil pala taplakuka yangabuka kintinip deibik sukumuk binuka, uku dongopliba, aning nirya uku diplirye, siltong teleb ning ara, Allah Yahweh dam welepliba, kekeplirye, el kanye teleb unamle. Aning ara, Israel nang arye, ‘Nun malye wininyap ning nirya, Allah arye namin kipnamsil’ tenen, kam ning obuka, nong nirya boyanuka, uku dongonamak ning ara, Allah elti, aning arebikiba, elcuk kanye delinamle. အခန်းကိုကြည့်ပါ။ |
Imamat 1:9
35 ပူးပေါင်းရင်းမြစ်များ
Ninye deiyoknye Raja Salomo birye nyabukura, el pil dona ati melin nang arye, yangalin ning, el si baskom weik ning ara, takubarye (10) kintinip deibik. Winibikura, apamubarye ara dobuka, iknapnye tam, (arah selatan) deibik. Aning atonun ton apamubarye ara, dabu tam (arah utara) tam, Allah Yahweh si eren aik deibik. Weik baskom pum ara, mek dikdongobik. Ara, aminyan talak nirya, sik Israel nang arye, ‘Allah arena ati, kam ning opnuyik talak ara, akam ning boyayikce, aning takubarye mek makau pum tam mek deiamuk deice arye mek liklamik. Winibikopura, aning opnopura, sekuka deipnarye, uku dongolamik. Sik imam-imam nang aryuk, sik taruk mek likna ati, weik bak mek makau pum arye, mek kwebuka, dikildongolamikak, sik taruk mek liklamik.
Na ni Allah, na malye winipse ning nirya ara, an dam malye winipsirye, antibuk yanipkise. Ance, ‘Aning ara, winina meme,’ nyapdeiamsulum bukni, amalye teneminye ninguk, narye talye luba kibuka winipse. Ati ara, ance nati, “Pia malye winiplume,” nyabuka, wenepnimince, opnutuma babye, anda pia diksukumuk ulyame. Na dipkoprob malye winipsa ati, narye yata yupu tamubuka nyapkitinye do? Kume, ance, “Aning ara, malye ning, aning ara teleb ning,” nyabuka, yupu lipsisikuka bokolina deiyoknye ulyame. Anda pia diksukumnye uminya ati, wenebuka opnetuma babye, anda dipkoprob ulyame, nyapkine.
Ara, an si eren aik dam yanirye, an si erena ati, kam ulye ning bukni, el nong weik wamlye ning opnirye, an arena ati, uku dongopnamne! Ara, weik yim sapi basam ap, weik yim kambing basam ap, yuk kambing basam ap, dobuka, opnyopura, an si erena ap, an arena ap ati, boyanirye, mesba deice deibuka, uku dongopniba, uku arye diplyopura, tulum ara, an dam weleyanamle.
Domba imbik ning babye, tonda, mek buppu yulamak ning babye, pia kum dipnamalume. Aning ara kumce, domba nong nirya kalibuka, uku deice dapmunyeba, oplye ninguk dobuka, sekdoba tonokak nirya ulubuka deipmunce, kisok ap, yan ap, nong noutam ning ap nirya, uku deice dabuka dipnamalume. Tonda yuna kume.
Ayim domba basam kalipmace ning nirya ara, ance na Allah si erena ati, kam ning obuka, uku dongona ati, keil pala tablakuka, yangabuka kintinibuka deipnulumakuk, el si mesba, adeice binuka deipnulyame. Abinuka deipminyeura, an adiparyuk dobuka, uku uk dongonamlyame. Winipminyeba, uku diplirye, siltong teleb ninguk welepliba, na Allah Yahweh arye, asiltong teleb ning kekepnyopura, na kanye pia teleb kinamnile. Winipnyeura, uku diplirye, kin-kin tong teleb ning ara, na damak welebiliba, na Allah Yahweh kekenirye, kanye delinamsine.
Winibikceura, an adiparyuk, sik aning taruk deice arye, aroti kwaning nirya ap, yim domba basam kalimna ap nirya, talimakca ning ara, dopropnalyame. Doropminye ning ara, ‘Na arena ati, keil pala tablakuka, kintinibuka deiplumakuk, uku dongolyanamlyame,’ nyapsiba, kitinilumak el si mesba damak boyamince, ayangabuka deibik keil deice, uku dinmalye damak dongopnulyame. Winipminyeura, uku deiplyeba, siltong teleb welepliba, na Allah Yahweh kekepnirye, kanye teleb kinamnile.
Ara, narye sik anang ati, “Narye anggun dobuka, pia teleb mutuku bobinamsine,” nyabuka, nyalin yupu deice arye nyapdeiamse mutuku noutam bobinamse. Amutuku noutam arye bobinuka deipsopura, sikce, ‘Naʼ tenen, kumce, amutuku noutam arye dilamikak, weik cang mutuku kon bukamukak eibikce, adiparyuk isa si erena ati, kam ning obuka, arelbalamikak, eipseura, yu weik ulamnukba, ‘Na pia lik,’ tenyamse. Tonda, atonun, yata yala tikamuk yo do nirya, taruk ap, pia weik tonun uamuk yo eibikopura, sik adiparyuk amutuku dam kam ning obuka, beyanarye uku dongobuka, isa si erelamik. Tonda, atalye si erena ati, siltong teleb ning ton dobuka, uku dongolamikce, isa ati morolamikce, ‘Nun arenamap ning ati, weik arye kanye deipnamsilʼ tenen, anggur duk purubuka kintinibik mek dobuka, aning deice dikiltaklamik.
Narye anggun bobuka, pia teleb sukum deipnamsin talak ara, min talak anggun bai sakuka, yuk-yuk mutuku dana-dana tam, dabinamlum mutuku noutamuk, dobuka boyanamsine. Winipnamsin talak ara, anggunda yata mutuku, im sirya, mutuku sirya nirya noutam arye, yuk-yuk yala nang, kanye wisibuka unamlum noutam arye, anggun dobuka, Israel koproba tam, boyanuka bulupdeipnamsine. Anggun Israel nang nirya bulupdeipsinyeba, unamlum mutuku noutam, akunum umunyeura, na kanye deipnamsine. Winipmanto ara, ninye arye kam ning obuka, uku dabikceba, uku buk arye, meta ap, tup ap, diplyeura, nintong teleb ning welepnirye, ninye nirya kekebikirye, weik tonun kanye deilinyak touk, narye anggunti, kanye deibuka dopropnamsine. Ati, amutuku dana-dana tam unamak nang, yuk yala-yala nirya arye, anggunti eibicopura, biknamake. Ara, ‘Se, Allah el pia teleb ulula ara, anggun anang anggun talima noutam babye, akunum deibuka ati, sikce pia teleb akunum deibuk. Ati, Allah elda pia dipkoprob telebnyeuk ulule. Elda pia teleb leknye ulule,’ tenepnikirye, moubuka biknamniake.
Awekelbana ati bisik bublan, el si ara, gapura, cang keil arye deibuka domik aik, el bai tam bisik, atolonga dam ara, mitikto aik ton wilibuka domik ning dinmasiba, anyaik atolonga ap, balai nyalamak aik ap, bisik bublan botopdeiamikak eipse. Amitik aik domik ning deiyok, ara, Allah el si erena ati, ‘Ining ning opnarye, aning tup kalebuka, uku dongopnamakʼ tenen, atup mek likdeipnarye, memebuka deiamikakuk eipse.
Bukni, akam ning opmalinye biryuk, abasam el yan tup nirya ap, el deisuruk nirya ap ara, el anye biryuk, aning nirya dobukaplirye, mek likukaplirye, teleb kibuka kintinilinamlule. Winibuka aning nirya akunum pil dobuka, kintinip deiplyopura, Allah Yahweh ap, ninye ap ansilina ati, cang sapi bol arye domik doltakne tenda aik noutam pil don nang, imam-imam nang, sik deiyoknye biryuk, akintinip deipmalye ning dobuka, uku dongopliba, aning nirya, uku diplirye, siltong teleb ning ara, Allah Yahweh el dam welepliba, kekeplirye, Allah el kanye teleb unamle.
Tonda, imamnye birye, maka talibuka, el pol potong sirik ning dana-dana tam taliplirye, delonamlule. Bukni, el potong den talak ara, mitang asa arye, moubuka denamlule. Mikip arye dinmalirye, ‘Potong tuba batakna ap, dila una ap uplyak,’ tenena ati, wininamlule. Imamnye winiplyopura, maka el nong ara, adiparyuk ining ning dana ati, keil pala yangabuka kintinip deiamlumakuk, mesba deiceuk danamlule. Winipliba, el nintong teleb ning ara, Yahweh kekeplirye, kanye teleb unamle. Aning pil donamaka nirya ara, ‘Allah arye, nun malye winin ning kilipnamsilʼ tenen, uku dongobikiba, aning nirya uku diplirye, siltong teleb ning ara, Allah Yahweh el dam welepliba, kekeplirye, el kanye pia telebuk unamle.
Winipmunyopura, Allah ap, ninye ap, ansinilina aik pum tam, pil dona deiyoknye imamnye birye, agandum duk teikmamunye ap, minyak zaitun mek ap, tonda nintong teleb ning, el si kemenyan ap, lake bikilina ati, tonok taruk arye, aning noutam mitik tonun wilibuka doproplirye, Allah Yahweh el si erebuka arena ati, uku dongonamlule. Deiyok ara, ‘Aning nirya, Allah Yahweh, el si eren ap, elti, si erebuka kina ati, elti, akunum arepmabeʼ tenen, lake bikilina ati, aning nirya, uku dongonamake.
Aboyangana ati ara, elce akintinibuka deipmalinye biryuk, Harun elce deiamukba, dadeipdanin yangakirye, na si eren aik pum tam, pil talibuka donyak imam-imam nang, sik dam boyalirye, yanuka arepnulule. Winiplyopura, imam yala nang bukni, asum anyaik koproba pil donmalinye birye, atepung ton tonok taruk arye, mitik tonun ton doropnulule. Atonun, minyak zaitun mek ap, tonda siltong teleb ning, el si kemenyan nyanyak ning ap, dobukaplirye, aning nirya ara, uku dongona ati, keil pala yangabuka taplakikce, kintinibuka deibikak, el si mesba bobilirye, uku dongopnulule. Auku dongoplya deice arye, aning nirya ara, ‘Yahweh ati, akunum arepneʼ tenen, laka kipnulule. Apil doplya deice arye, uku diliba, siltong teleb ning, Allah Yahweh dam biliba, kekeplirye, pia teleb kanye delinamlule.
Allah el si eren aik pum pil donanye, imam arye doplirye, aroti kwaning deiyok ning, el si tepung noutam ara, tonok taruk arye, mitik tonun doproplirye, uku dongona ati, mesba dam bilirye, adiparyuk uku dongopliba, uku arye dipnamle. Deiyok ara, ‘Aning nirya, el Allah Yahweh ati, akunum aripneʼ tenen, lake bikilina ati, wininamlule. Aning bobuka, uku dongopliba, uku diplirye, nintong teleb ning weleplyeura, Allah Yahweh kekeplirye, el kanye teleb unamle.
Allah ap, ninye ap, ansinilina ati, sapi basam bol arye domik doltakne tenda aik pum tam, pil dona deiyoknye, imam atalak pil donmalinye, elce adomba basam mi obuka deipmunce, bokuka yuk kintinip deipmunye ning nirya ara, el anyaik pil donmalye imamnye birye, aning nirya bobilirye, binuka uku dongopliba, uku arye dipnamle. Adin ning binuka uku dongonamle ning ara, Allah Yahweh, el si erena ati, binuka arenamlule.
Adopropnamle ning nirya ap, tonda, ‘Allah ati, arepnamapʼ tenen, yuk tup ning ap, kintinibuka deipmakce ning nirya ap, tabakuka uku dongona ati, amesba memebuka deibika arye, Harun el mapu arye, aning nirya bobuka, amesba deice uku dinmalye noutam, uku dongonamake. Ara, ‘Allah Yahweh ati arepnuyapʼ tenen, uku dongobikiba, atup ning nirya uku diplirye, siltong teleb ning weleplya ati, Allah kekeplirye, kanye teleb unamle.
Aboyaliba, opnamle kil kambing basam el meta ap, kop ap nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipmana ati, ining ning dobuka, Allah dam biniba lyepnilyopura, el ap, na ap, tuba tonap teleb kibuka, neika unanamʼ tenen, meta nirya boyaliba, mesba deice uku dongolamle touk ubuka, pil doplirye, uku dongonamlule. Aning atonun, anye birye, akambing meta nirya boyanuka, imam nang, sik weik deiyoknye biti arepliba, imam adiparyuk ameta nirya, mesba deice deiplyeba, uku diplirye, siltong teleb ning welepliba, Allah Yahweh kekeplirye, el kanye teleb unamle. Aning ara, amankau arye malye ulul ning ara, pununa ap, dekna ap ati, apil donamlule. Tonda aning atonun, aimamnye birye, apil winibuka dolamlye touk ubuka doplyopura, adeice arye, amalye ning mangkau arye winiplinye, el malye winyamlye ning ara, Allah Yahweh arye kilipnamle. Amalye winyamlye ning ati, wenebuka kum opnamle.
Allah arye, Musa ati nyabuk. Aning ara, na Allah Yahweh arena ati, yakong do, terigu do, beras atonun din ning do, ayala ning nirya arelyanganamak din ning bobinuka deilinak ara, “Aninguk winibuka-winibuka wininamlume,” nyapsiniba, aning pia wininamlume. Ara, Harun ap, elce deiamlye ning ap, sikcuk, adin ning bobuka, Allah Yahweh ati, yanuka arenamak ning ara, bobuka uku dongona ati, keil pala yangabuka kintinip deibik ning, el si mesba dam bukni, urasin tam bobanamake.
Bukni, ayim domba el nong pum tam ulamle ning ap, tonda yan ap nirya ara, sekuka doprobuk. Winibukce, mek likuka yuk kintinibuka deibuk. Winibukce, yuk ning nirya ara, uku dongona ati, mesba dobuka kintinip deiamikak, bobinuka, uku dongobuk. Auku dongobuk ning ara, uku diplirye, siltong teleb ning weleplyeura, ‘Allah Yahweh kekeplirye, kanye teleb deipnamleʼ tenen, ‘Allah Yahweh arepnuneʼ tenen, uku dongobuk. Apil dobuk ning nirya ara, Allah Yahweh arye, Musa ati, “Winibuka pil donalyame,” nyabuka, laka nyapdeiamuk touk winibuk.
Sik imam nang arye, aroti kwaning ning akunum binuka, “Telebe,” nyabuka peterebik ning ara, Musa birye, abopmek din ning nirya ara, sik taruk deice arye, tamubuka doprobuk. Doprobukopura, aning uku dongona ati, el si mesba kintinibuka dobuka deiamikakak, boyayukce, uku dongobuk. Aning nirya ara, yim domba uku donogopmuka deice deibukba, uku arye dibuk. Apil dobuk ning nirya deiyok ara, ‘Imam nang arye, mambul pil donamsiakʼ tenen, ninye wibuka delina pil, teleb kina ati, aning nirya tapakukce, uku dongobuk. Winibukba, uku dibukce, siltong teleb ning welebukba, Allah Yahweh kekebukce, el kanye deibuk.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Amutuku noutam bikirye unamak talak ara, sik Israel ninye arye, ‘Nun ni koproba Allah Yahweh ati, nun weinyap domba basam do, sapi basam do, maka yala ning do, dobukabibirye, Allah ati arebibyeba, imam nang arye, uku dongonamake,’ tenebikirye, yanuka arepnamak ning do, akumopura, ‘Allah si erena ati, apil ton donamake,’ nyabuka, nyalin yupu deice nyalamak ning do, Allah arye, ‘Na aren ati, winibuka-winibuka arenamnulume,’ nyapdeiamsuk ning ati do, sik kanye aryuk, ‘Allah si erena ati, urdem arepnuyabe,’ tenepnamak do, atalak nirya, el si erena ati, ‘Aning ton obuka arebibyeba, imam nang arye uku dongobikcopura, siltong teleb ning welepliba, Allah kekeplirye, kanye deilinamsileʼ tenen, arenamniyak do, el nyalin yupu deice arye nyapdeiamlinye birye, boyanuka arelyanganamle ning nirya ara, Allah atibuk arelyanganamnyake.
Allah arye, Musa biti nyabuk. “Ura awala-awala nirya ton wininamlyame. Ara, wala ton oplirye, winiryuk wala tekilyalye talak, tanggal tonok kiplyeura, na Allah ati yanuka arebikceba, uku dongon ati ara, yim sapi basam bitinye, winiryuk nenmalye ning ap, tonda yim domba basam wisi tonok ap, tonda keting tamun tonok winiryuk nenmakce domba basam ara, tekbarye nirya ara, bol pia teleb ning, boyanganamnyake.
Nyabukopura, ayupu ton dukgobuka nyabuk. “Domba basam mi boyanuka arelyangakce talak ara, anggur mek ton kwebuka arenamake. Ara, tonok liter ton kwebikirye, tonok domba mi ap, tabakuka boyakceura, arenamnyake. Aning ara, beren tam talak, imam nang arye anggur mek kwebuka, na si eren aik pum tam dikuka delinamnyake. Winibikirye, nati arenamniyake.
Aning atouk, ton domba basam mi ara, anggur mek tonok liter kwebuka, abitinye ning ap, tonda gandum tepung tonok liter ap tabakuka, sintam boyakce ning babye, atouk ubuka pil dobikirye, na Allah ati arenamniake. Winibikca deice arye, uku dongobikceura, uku diplirye, siltong teleb ning welepliba, na Allah kekepnirye, kanye teleb unamnile,” Allah arye, Musa biti lak nyabuk.
Tonda, nun ap, Kristus ap, talima dukdongobuka ubirye, el yupu peterebibya deice arye, Allah arye kanye delisulule. Allah arye tong teleb ning kekeplirye, kanye deililul touk, Kristus arye, nun dib tenenyap ninye dobuka el Li Koprop Allah ati ariliba, Allah arye nunti kanye delisulule. Bukni, Yesus el teleb yupu peterenyaba deice arye, daunyak ninye kekenyak bukni, sik kanye yuk-yuk tenenyake. Ton ninye ara, kam unamake. Ton ninye ara, dipnamake.
Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.
Nyabukce, ayupu dukdongobuka nyabuk. “Ura, anggun malye ululum ning namin kina ati, kam ning obukapmunce, nong nirya uku dapnamlum ning ara, Allah el si Yahweh dam delilbanamlulume. Ara, Allah el arena ati, pala keil lelebuka yangapdeiamunya deice deipmunyeba, uku arye dipnamle. Ara, aning nong ap, ining ap tabakuka deipmunyeba, uku dipnamle. Winipnamlum bukni, anggunce, ‘Allah ap, yuk nang ap teleb ubuka neika unamap’ tenen, tup ning obuka, Allah ati arenamlum ning ara, yuke. Aning ara, opmunce tup ning kalibuka deipmunce, ining ara, Allah el arena ati keil lelebuka yangabuka deipmunyakuk, aning binuka, diklopmunba, tukwak banamle. Winipmunyopura, tup ning nong tonok ara, anggun babye dina telebe. Anyapmasin ning nirya ara, pia moubuka talipmunce wininamlulume.
Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.