Tonda, urasin teleb ning, emas arye laka ongon ati, anyapmakin yupu sekuka deipmunce, Harun bira, anyaik pil donamle talak nirya ara, el kisok deice koupdongopnamle ning, el si serban taram tam, koupdongobikcopura, aning pia ongonamle. Ayupu sekuka moupdeipmamunye ning ara, Harun el kisok kalulamak bukni, el asok deice tam deipnamlume. Winibuka deiplyopura, anggun Israel ninye arye, malye wininyak ning deiyok ara, el Harun deice winipnamlume. Ara, Israel ninye arye, ‘Allah arye nun malye unyap ning namin kipsilirye, lyepnamsilʼ tenen, kam un ning obuka, nati arelyanganam ninyak ning, aning-aning weik aupnamle bukni, anggun malye wining deiyok ara, Harun el deice uk deipniba, aupnamle. Ati ara, laka kina ati, emas deice amambul yupu sekuka deipminba, Harun el kisok deice ongonamle ning ara, na Allah Yahweh, ayupu eipnirye, sik nirya ati, ‘Telebe, Israel ninye sik malye ning kum kipdeipnam narya. Ati, na dam yatinge,’ tenenamle. Tonda, adeice arye, sik Israel ninye malye unyak ning aupmalibuk, teleb aren ning, na Allah Yahweh dam arelyanamnulum ning nirya babye, ‘Teleb,’ tenepnirye dolonamne.
Imamat 1:4 - Eipomek4 Tonda, wininamake. Nati, arenamniak ning boyanuka deiplyopura, anye el taruk ara, dobuka akam ning, el kisok deice deiplyopura, na Allah eipnirye, ‘Telebe, ayanuka arepnamnil ning ara, anye el pununa ati, dopropne. Ara, anye el malye winilye ning wenena ati, talye optinye bukni, el kilina ati, anye el pununa ara, akam ning dopropne,’ tenenamne. Na Allah arye, kanye deibuka akam ning dolonamne. Winipnyopura, anye el malye winilamlye ning ara, adiparyuk kiliptinirye, anye biti, teleb kipdeipnamne. အခန်းကိုကြည့်ပါ။ |
Imamat 1:4
44 ပူးပေါင်းရင်းမြစ်များ
Aning nirya akunum pil dopminyeura, min kintinipmaminyebuk, batamaminye yim domba basam bitinye ning ara, aning babye dobuka yanulyame. Winipmince, yupu nyapminyeba, na Allah si eren aik pum tam pil dona ati, wibuka deipmaminye nang ati nyabibyeba, yakceura, Harun ap, el mapu ap, sik nirya arye, ayim domba basam, el kisok deice ara, sik taruk adiparyuk deipnunyake.
Sik adiparyuk, na aik pum noutamak pil dona ati, wipdeipnalam nang, sik imam-imam nanguk, adomba basam kalipdoba dapmaminye ning ap, keranjang aling pum tam dongomamunye, roti kwaning ap, dinamake. Yuk nang ton, aning kum diptinge. Aning nirya ara, ‘Nun ni Allah Yahweh arye, nun malye ning nirya kum kipdeipsilirye lyelonamsilʼ tenen, na Allah ati akunum arepmalyame. Ara, ‘Harun ap, el mapu ap arye, Allah el si eren aik pum tam, pil talibuka donamakʼ tenen, sik wibuka deilin sum ati, ‘Asum ap, apil ap, teleb upnamleʼ tenen, akunum arepmanulume. Tonda, Harun ap, el mapu ap, ‘Allah el pil pia donamakʼ tenen, aning wipdeipnamlam talak, arepmanulum yim domba basam kalipdoba ap, tup ap, roti kwaning ap ara, aninguk dinamake. Sik imam pil talibuka donamak nanguk, dina telebe. Bukni, yuk nang ara, pia kume. ‘Deiyok ara, aning ning nirya ara, ‘Naʼ tenen, ninguk ulula ati, yuk talye nang arye aning dina ara, pia meme,’ nyapsine.
Narye aninyasik nang nirya dobuka, Sion pia lek teleb aik bobinamne. Na aik ara, ‘Ninye nirya arye, na Allah ati, anyaik yanuka moronamniakeʼ tenen, deipsa ati, narye lo arepniba, anyaik wekuka moronamniak talak ara, pia teleb kanye kipdeipsiniba, pin-pin kanye bobuka unamake. Tonda, na si erena ati, sikce domba ato ning obikirye, ‘Allah arye, nun malye winin ning kum kibuka deipnamsilʼ tenen, na mesba deice arye, uku dongobikirye, arenamniak ning ap, tonda sikce nati teleb aren ning ap, arepnicopura, sik ninye nirya arye, nati morolyangana ati wininamle,’ tenyamse. Akunum tenyamsa ati aning ara, dipkoprob nong kunupnamlarya nyapsine!
Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.
Ayupu nyabukopura, ayupu ton dukdongobuka nyabuk. “Harun el taruk bitinye arye dobuka, akambing basam kam kipman ning, kisok deice deipnamlule. Winipnamla ara, Israel ninye sik malye winin ning ati, lak kibuka nyanamlule. Aning atonun, Allah el yupu kum kekebikirye, batakanyak nang, malye wininyak ning nirya ara, ninye kekenak lakak arye, laka nyaplirye, aning nirya akambing basam kisok deice deiplyopura, adiparyuk akambing lolinamlule. Winiplyopura, akambing batakliba, ninye una kum mutuku, pata mutuku noutam, akambing binamlule. Atalak ara, akunum wipdeiamikinye biti, wipdeipnirye, akambing dobuka, bai tam, pia pata mutuku noutam bobilirye, yakdonoknamlule. Akambing tamubuka ninye unyak mutuku, pia kum yanamle. Dapia banamlule,” Allah arye nyabuk.
Nyabukce, ayupu ton nyabuk. “Aning akunum winiplyopura, anyaik pum tam bukni, el yuk tonok telebak ton bilirye, el nong mek keknamle. Winiplye talak ara, asum el yuk baju kwiribuka deipmalye ning ara, tuba tonap tamubuka ongoplyopura, anyaik batakuka bai tam banamlule. Bilyopura, el malye winin ning kum kilina ati, kam ning oplirye, uku dongonamlule. Aning akunum winiplirye, Israel ninye nirya, sik malye wininyak ning kum kilina ati, kam ning ton oplirye, uku dongonamlule. Aning deiyok ara, na Allah arye, aninye nirya talye lukparabuka optinye bukni, sik malye winin ning pununa ati, kam ning obuka, uku danamlule,” Allah arye nyabuk.
Tonda, Israel nang, sik malye winipmakirye, ‘Se, nun ni koproba Allah arye, nun malye ning kilipsilirye, lyepsilirye, teleb kibuka neika unamabeʼ tenen, domba ato ning obuka, arelyanganamak ning ara, bol malye bomlye ning pia kum boyanamnyake. Ara sikce yuk-yuk bukni, ‘Na ni Allah, el si erena ati, winipnamne, winipnamne,’ nyabikirye, nyalin yupu nyabikca deice arye arepnamak ning do, tonda, sik kanye aryuk, talye arepnamniak ning do, nirya ati ara ato uka nyapne. Malye bol bomlye ning kum bukni, bol pia teleb ning arelyanganamniake. Ara, sikce na Allah ati arenamaniyak ning ara, sapi basam do, domba basam do, kambing do, aning nirya ara, bol teleb ning arebikceba, na Allah arye kanye deipnirye, aning dolonamne.
Ura, sapi basam do, domba basam do, kambing basam do, mi winiryuk deiplye talak arye, nukuka like tekbarye (7) sum ara, el lin ap unamdake. Bukni, like pinbarye (8) sum akunum kiplyopura, anggunce, ‘Nun ni Allah ati arepnuyabe,’ tenepmunyopura, na Allah arena ati, ur boyanamnulume. Pinbarye sum akunum kipmalye ning ara, dopropmunce, na Allah Yahweh si erena ati, na dam arelyangana ara, teleb uka. “Arepmunyeba, imam nang obikirye, mesba deice uku dongona teleb uka,” nyapne.
Asukum boyalyopura, adiparyuk anye el taruk akambing basam kisok deice deiplirye, ‘Akambing ara, na malye winina punun ning ati winipleʼ tenen, akambing basam ara, Allah ap, ninye ap, ansinilina ati, sapi basam bol arye domik doltakne tenda aik pum tam, wekelban bisik bublan dam aryuk onamlule. Akambing basam, el ining banmalye ning ara, Harun el mapu, sik imam nang arye, aining doprobikirye, taruk arye burubukabikirye, ining ning obuka, uku dongona ati, pala keil taplakuka yangabik sukum, mesba dam obinuka, aning deice burubuka donokikiba, ining poulbinuka, akeil deice dulbinamlule.
Asapi basam bobuka yalyeura, anye birye, ‘Anyarepnun ning ara, na malye wininun ning pununa ati, arepneʼ tenen, el taruk dobuka, akam ning, el kisok deice deiplyopura, adiparyuk asapi basam opnamlule. Aning opnulyopura, ninye ap, Allah ap, ansinilina ati, sapi basam bol arye domik doltakne tenda aik wekelbana ati, bublan dam arye binuka onamlule. Oplyeopura, Allah si eren aik pum tam talibuka pil dolamlinye, Harun elce deibukba, deipdanin yangakirye, anyaik pum tam talibuka pil donyak nang, sik imam-imam nang dam boyalirye, yanuka arepnulule. Winipyopura, imam yala nang arye, aopmalye ning, el ining dobukabikirye, Allah arena ati, keil pala yangabuka taplakuka memepdeibikce, ining ning obuka uku dongona ati, el si mesba memebuka deiamunye sukum, mesba el kup-kup dam dana-dana nirya ara, aining ara, el taruk arye burubukabikirye, pala keil taplakuka yangabik sukum obinuka, aining ning deice purup donokikiba, ining dulbinamle.
Adomba basam mi, anyaik dam bobuka bilyopura, anyaik bublan dam binuka deiplirye, anye el taruk dobuka, adomba basam mi, el kisok deice deiplyopura, ‘Aning ara, na malye winilamse ning, punupnilirye, kilipnamnileʼ tenen, adiparyuk adomba mi onamlule. Winiplyopura, Allah el si erena ati, sapi basam bol arye domik doltakne tenda aik pum tam talibuka pil dona nang, Harun el mapu, sik imam-imam nang arye, adomba obuka, ining doprobikirye, ining ning obuka uku dongona ati, mesba memebuka deiamice sukum, amesba el kup-kup dam dana-dana nirya ara, el taruk arye aining burubukabikirye, pala keil taplakuka yangabik sukum obinuka, mesba deice purup donokikiba, ining poulbinuka dulbinamlule.
Adekna ning yanuka arenamak ning ara, Israel nang, sik weik deiyok nang, sik wise-wise nang nirya arye, ayim sapi basam boyanuka kintinibikirye, ayim sapi kisok deice taruk deibuka, ‘Kume, ara nun ap, Israel nang ap, nun nirya mangkau arye malye winipmaba ati, asapi basam ara, yanuka arepmabe,’ tenebikirye, asukum aryuk asapi basam opnamake. Ara, na Allah Yahweh arye dinmanyakuk, na arena ati, na si eren aik damuk opnamake.
Aning uku dongon pil don ara, ‘Malye winipmace nang ati, lyepropsutueʼ tenen, yim sapi basam winiryuk nenmalye ning, obuka boyaceba, imam nang sik deiyoknye birye, aning dobuka, uku dongolula atonun ubuka, winiryuk nyapmasin pil atonun doplirye, asapi nong babye atonun, uku dongonamlule. Imam-imam nang, sik deiyoknye biryuk apil donamlule. Aimamnye birye apil donamla deice arye, Israel nang nirya, sik mangkau arye malye winipmakce ning ara, Allah Yahweh arye, aning nirya lyebuka kum kipdeiplirye, teleb kilinamle. Sik malye winipmace nang ati, weneptu bukni, asapi basam opnamaka deice arye, sikti, punupnamle. Adeice arye, Allah Yahweh arye, anggun Israel nang ati, teleb kipdeipnamsile.
Ayanuka areplya deiyoknye, el taruk dobuka, akambing basam el kisok deice deiplyeba, onamlule. Akambing ona talak ara, ining ning obuka, uku dongona ati, mesba memepdeiamicak utamuk, binuka deiplirye onamlule. Ara, Allah Yahweh el arena ati, kam ning obuka, uku dongopmunce arena ati ara, ‘Asukum aryuk, Allah dinmasilyakuk, binuka opnamapʼ tenen, keil taplakuka yangap deiplumce, memepdeiplumak aryuk, binuka onamlule. Akambing basam onamla deiyok ara, el malye winin ning pununa ap, kum kina ap atia.
Winibuka apil dobuka kintinip deiplyopura, amutuku nang sik deiyok kibuka taleamlimye bira, mangkau arye malye winipnamlye ning ara, Allah arye teleb kipdeipnamle. Aning teleb kilina ati, yanuka opmalye kambing basam, el meta nirya ara, amesba deice uku dongonamlule. Ara, amalye winipnamlya deiyoknye birye, ‘Na malye winipman ning ara, ‘Allah arye lyepnuturye, teleb kipdeipnutueʼ tenen, kam ning obuka, meta nirya boyaliba, imamnye birye, aning dobuka, mesba deice uku dongonamlule. Ara, ‘Allah ap, nun ap tuba teleb kibuka, neika uptibyeʼ tenen, pil dolamle touk ubuka, adeiyoknye el melina ati, imamnye birye, apiluk donamlule. Winipnamla deice arye, Israel nang talina deiyoknye, el malye winipmalye ning ara, Allah arye namin kiplirye, kum kipdeipnamle. Amalye winipmalye ning ati, kum wenepnamle. Tuba tonap, teleb kipdeipnamle.
Akambing basam yanuka areplinye bira, el taruk dobuka, akil kambing, el kisok deice deiplirye, onamlule. Akambing on talak ara, ining ning obuka, uku dongona ati, keil pala yangabuka memepdeibika, el si mesba utamuk, binuka onamlule. Ara, ‘Allah arena ati, kam ning obuka uku dongobuka arena ati, asukumuk binuka opnamapʼ tenen, memepdeiamlumak uk, binuka onamlule.
Aboyaliba, opnamle kil kambing basam el meta ap, kop ap nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipmana ati, ining ning dobuka, Allah dam biniba lyepnilyopura, el ap, na ap, tuba tonap teleb kibuka, neika unanamʼ tenen, meta nirya boyaliba, mesba deice uku dongolamle touk ubuka, pil doplirye, uku dongonamlule. Aning atonun, anye birye, akambing meta nirya boyanuka, imam nang, sik weik deiyoknye biti arepliba, imam adiparyuk ameta nirya, mesba deice deiplyeba, uku diplirye, siltong teleb ning welepliba, Allah Yahweh kekeplirye, el kanye teleb unamle. Aning ara, amankau arye malye ulul ning ara, pununa ap, dekna ap ati, apil donamlule. Tonda aning atonun, aimamnye birye, apil winibuka dolamlye touk ubuka doplyopura, adeice arye, amalye ning mangkau arye winiplinye, el malye winyamlye ning ara, Allah Yahweh arye kilipnamle. Amalye winyamlye ning ati, wenebuka kum opnamle.
Ayanuka areplinye, el taruk ara, dobuka akil domba basam, el kisok deice deiplyeura, onamlule. Adomba on talak ara, ining ning obuka, uku dongona ati, utam memepdeiamicak arye, binuka deiplirye onamlule. Ara, Allah arena ati, kam ning obuka, uku dongobuka arena ati, ‘Mesbah damuk binuka deibibirye, opnamapʼ tenen, memepdeiamlumak uk, binuka onamlule.
Aboyaliba, opnamle kil domba basam el meta nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipman ning ara, ining ning dobuka, Allah dam binuka arepniba, Allah arye lyepnilirye, teleb kipdeipniliba, Allah ap, na ap, tuba tonap teleb kibuka, neika ansinibuka neika unanamʼ tenen, boyaliba, obuka, uku dongolamla atonun kibuka, pil doplirye, uku dongonamlule. Anye birye, aopmalye kil domba, meta nirya bobinuka, imam nang, sik weik deiyoknye biti arepliba, imam adiparyuk, ameta nirya mesba memepdeibika deice binuka, uku dongonamlule. Ara, amalye winipmalinye, el pununa ap, dekna ap ati, arepnamlule. Ameta dobuka uku dongopliba, uku diplirye, siltong teleb ning welepliba, Allah Yahweh kekeplirye, el kanye teleb unamle. Tonda aning atonun, aimamnye birye, apil winibuka dolamlye touk, ubuka doplyopura, adeice arye, atonoknye el mangkau arye malye winipmalye ning ara, Allah Yahweh arye kilipnamle. Amalye winipmok ning ati, kum wenebuka opnamle.
Ayim sapi basam bobuka, Allah ap, ninye ap ansinilina ati, sapi bol arye domik doltakne tenda aik bublan botobuka deiamikak, asapi basam bobuka binamlule. Bobuka bilirye, aimam deiyoknye, el bidamnye aryuk, aboyanuka deipmalye yim sapi basam, el kisok deice, el taruk dobuka deiplirye, asapi basam ara, onamlule. Ara, ‘Aopman basam ara, na ni Allah arye eipmalce, na malye winina pununa ap, kum kilina ap ati, dopropnuleʼ winipnamle.
Atonun ning winipmalya deice arye, malye winipmace nang nirya ara, Allah arye amalye winin ning kum kipdeiplirye, teleb kilina ati, amalye winin ning pununa ara, amalye winipmalinye, el adiparyuk Allah Yahweh ati, teleb aren ning boyanamle. Ara, domba basam do, kambing basam do, kil ninguk bobuka, anye birye, Allah Yahweh ati arelyanganamlule. Akam ning bobuka, Allah ap, ninye ap, ansinilina aik pum tam pil dona nang, sik deiyok imamnye ati, areplyopura, aimamnye birye dobuka, Allah ati, arelyanganamle. Winiplye deice arye, amalye winipmalinye, el malye ning ati, Allah arye namin kibuka kiliplirye, teleb kilinamle.
Amalye winyamlinye birye, teleb yim domba basam boyanuka, Allah ap, ninye ap ansinilina aik pum tam pil talibuka, deiyok kibuka pil donanye, imam el dam yanuka arepliba, aning dobuka, Allah ati arena atonun ati, aning areplyopura, adeice arye, anye el malye winyamlye ning ara, Allah Yahweh eiplirye, anye el malye winilamuk ning nirya ati, namin kibuka teleb kilinamle.
Aning nirya akunum pil dobuka, sirya dakukopura, Musa birye, ‘Harun ap, el mapu ap, sik malye winilamik ning ara, Allah arye namin kiliplirye, kum daneipnamleʼ tenen, yim sapi basam tonok obuka yayuk. Ayanuka deibuk sapi basam deice arye, Harun ap, el mapu ap, sik taruk ara, asapi basam, el kisok deice deibik. Ara, ‘Nun malye winin ning, asapi basam el nong deice deibibyeura, nun malye winina ning punuba lyena ati, opnamapʼ tenen, el kisok deice, sik taruk deibik.
Aning akunum pil dobukopura, kam ning obuka, uku dongona ati ara, Musa birye, yim domba basam yim ning bobuka yayuk. Adobuka yayuk domba basam, el kisok deice ara, Harun ap, el mapu ap, sik taruk ara, ayim domba basam el kisok deice deibik. Ara, ‘Allah arye, nun malye winin ning ati, wenebuka opsutu bukni, nun pununa ati, ayim domba obibyeba, ‘Allah arye nun malye ning biksilyakarye, lyebuka teleb kideipnamsilʼ tenen, winibik.
Aning atonun, Musa birye domba basam yim bitinye, tuba batakmuk ning tonok ton dobuka yayuk. Ara, ‘Aning arye, Allah arena pil donamsiakʼ tenen, awibuka deibuk imam nang, sik malye winin ning, kum kibuka, teleb kilina ati, adomba basam yim bitinye boyayuk. Aboyanuka yayukopura, aning ara, Harun ap, el mapu ap, ‘Nun malye un ning ati, Allah arye wenebuka opsutu bukni, aning pununa ati, abasam opnuyabeʼ tenen, sik taruk nirya dobuka, adomba basam yim, el kisok deice deibik.
Ura, aning nirya akunum winibikura, Musa birye, Harun biti nyabuk. “An adiparyuk kam ning opmince, uku dongona ati, pala keil yangabuka kintinip deibikak, el si mesba dam binulyame. Biminyopura, ‘Allah arye nun malye winin ning namin kibuka, kum kipdeipsilirye, lyepdopnamsilʼ tenen, kam ning obuka, Allah aren ning ap, aning atonun kam ning obuka, uku dongon ning ara, adiparyuk binuka kintinip deipnulyame. Nun malye wininyap ning ati, Allah arye talye lubakibuka oplopsutu bukni, anya aren ning arepminya deice arye, an malye winiminye ning ap, sik Israel nang malye wininyak ning ap nirya ara, Allah Yahweh arye namin kipsilirye, nun malye wininyap ning kum kipsilyakarye, teleb kipdeipnamsile. Aning nirya, Allah ati arepnumunye ning nirya ara, Allah Yahweh arye, na dam yanuka, “Winibuka winipnamlume,” nyapdeiamsuk touk, winibuka, pil dopnulyame. Musa birye Harun biti, nyabuk.
Winipmunyopura, imamnye adiparyuk, ‘Allah arye nun mangkau arye, malye winipmap ning kiliplirye, kum daneipnamsilʼ tenen, elcuk kam ning oplirye, na Allah arena ati, uku dongoplirye, apil nirya akunum dopliba, Israel ninye, anggun malye umunye ning ara, na Allah arye kum daneipsinirye, teleb kilinamsine. Ara, anggun malye winilulum ning, aupmalye ning ati, kam ning obuka boyakiba, imam nang arye, uku dongopnamaka ati, amalye ning kilibuka, teleb kilinamsine.
Akambing boyalyopura, Allah ap, ninye ap, eldana ati, dolamik aik pil donanye, imamnye birye, kam ning dobuka, na Allah dam bobilirye, uku dongoplyopura, aning kum dalye deice arye, anye bira el mangkau arye malye upnamlye ning ara, kum daneipnirye, teleb kipdeipnamne. Ara, el malye uamuk ning ati, adiparyuk optinye bukni, imamnye birye, kam ning arepnamnila deice arye, amalye uamuknye biti, punupnamle.
“Tonda, ‘Pinehas ap, elce deiplyeba, dadeipdanin banamak nang ati ara, sik anang aryuk, imam pil don nang ara, moubuka talibikirye, pia ati pil dopnamake,’ nyapne. Aning deiyok ara, ani. El Pineas birye, na Allah ati, ‘Elda weik mambulnye ati, el siuk pia erenamabʼ tenen, anang bitinye obuka deice arye, teleb pil dobuka, teleb ulamukce, mikip arye pil dolamuka ati nyapne. Tonda, Israel nang ara, malye weik upmangubuk elce, ‘Allah arye, sik malye unyak ning ara, kum kipdeipnusilʼ tenen, pia teleb pil dobuk deice arye, anggunti teleb kipdeipmanue. Ati, el ap, na ap pia teleb kibuka neika unamname,” Allah arye nyabuk.
Tonda, atalak aryuk, sik Lewi yala nang, sik taruk dobuka, sapi basam yim bitinye boyanuka deipmakce ning deice, sik taruk dibikcopura, sik anang malye un ning kilina ati, imamnye birye, tonok sapi basam boyanuka oplirye, uku dongonamle. Tonok sapi basam boyanuka oplirye, na Allah si erena ati, uku dongopnamle. Adeice arye, sik Lewi yala nang malye uamikce ning ara, na Allah arye kum daneipnirye, sikti, teleb updeipnyopura, anang arye, na pil talibuka donamake.
Na kayapo, malye unyaba ati, Allah arye adiparyuk talye wenebuka oplopsutu bukni, weik arye bico tenesulule. Bico tenesilirye, pia teleb kibuka melisulule. Aning ati ara, minop talak Allah el si erena ati, kam ning obuka arilamik touk, ‘Anggun kanye talima ap, nong ap nirya ara, Allah ati arepmunce, diksukumuk unamlum’ tenen, mikip arye nyapsine. Wininamlum ning ara, talye yupu deiceuk nyabuka, nong bol deice atonun una kum bukni, anggun kanye talima pum tam ara, dipkopropa pia diksukumuk umunce, ‘Allah el pil dobuka, el siuk erenamnap’ tenen, unamlume. Winibuka upmunyopura, Allah arye kanye delinamsile.
Allah arye Kristus ati utenyamuk. ‘Yesus Kristus obikiba, el ining binamla deice arye, ninye tukwak ninye sik malye winilamikce ning nirya kum kipdeipnamle. Ninye tukwak ninye, sik pununa ati dipnamle. Yesus obikiba dipnamal deice arye, diba tenebikcopura, tukwak ninye sik malye wininyak ning pununa ati lyepnamle,’ Allah arye tenyamuk. Minop talak ara, ninye nirya arye malyeuk winilamikba, Allah arye, ‘Dauplye’ tenen, namin kilamuk. Bukni, Allah arye, tukwak ninye nirya ati, ‘Allah ara pia diksukumuk ulule’ tenen, ‘Moubuka kel kipnamak,’ tenebukce, Yesus Kristus tukwak mutuku dopkwetepsuke. Ara, tukwak ninye nirya arye, ‘Kume, Allah elda, malye winilamikce ning ati kum bataktue. Malye winilamikce ning nirya ati, yupu lipsisikuka wenelule,’ tenebikirye, ‘Moubuka kel kekepnamak’ tenen, nun pununa ati, Allah arye Yesus Kristus tukwak mutuku dopkwetepsuke.
Tonda, aninguk kum bukni, minop talak ara, nun ap, Allah ap neikak kum upmanto ninye ulamubu bukni, Yesus Kristus dibuka deice arye nun ap, Allah ap ansinibdeipsukba, Allah ap neika pia unamabe. Wini talak ara, nun Deiyoknye Yesus ap neik kanye talima dukdongobuka upra banamap talak noutamak nirya ara, nun Ni Kopropa Allah ati kanye delinyabe.
Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.
Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.