Sik diksukumuk wininyak ninye ara, malye winin ning tonok ning babye, kum wininyaka anya arye, Allah el si Yahweh arye, aninye ati, pia moubuka elilulce, bikilule. Ati ara, Allah arye, sik anang ati, arenamle ning ayala-ayala nirya ara, pia kum kum danamle. Allah arye, sik menenga ning arepliba, aninye ap, aning ap, pia aunamle. Aninye ara, kum kum danamake, pia aunamake.
Ibrani 9:15 - Eipomek15 Aning ati ara, Allah arye nunti, “Wininamsin,” nyabuka nyalilamsil yupu, winiryuk yupu ara, akunum kintinipsukopura, Kristus arye, Allah ap, ninye ap dana-dana Ansinilina Deiyoknye usulule. Apil dobuka usilya deiyok ara, ani. Ara, Allah arye yukusilye ninye nirya ara, Allah arye, “Winibuka arenamsine,” nyabuka nyalilamsuk ning, ‘Dipkoprop doprobikirye, aning talibuka pia teleb unamak’ tenen, Kristus arye nun Ansinilina Deiyoknye usulule. Ura, Allah arye, ninye teleb ulina ati, yupu nyalilamukba, minop talak ayupu winilamika noutamak ara, Allah arye yukulamuk ninye, sik malye winilamik ning ap, nun malye wininyap ning ap, kum danalina ati, Kristus dibuk deice arye deksuke. Kristus arye nun lyena ati, punupdeipsuka deice arye, nun malye winilamubu ning noutamak lopdeipsukce, lyebuka deksuke. Nun punupsuka anya arye, Kristus ara nun ap, Allah ap, Ansinilina Deiyoknye usulule. အခန်းကိုကြည့်ပါ။ |
Ibrani 9:15
52 ပူးပေါင်းရင်းမြစ်များ
Allah arye wipdeipnamlanye birye, talipnamsil bukni, lo ton tabakuka, enam puluh dua kali tujuh (62 x 7) talak ton (434) sirya dakuka akunum winiplyopura, el talipnamsilanye bira, el malye winina kum diparyuk opnamake. Obicopura, el ning nirya kum upliba, ninye nirya arye, ‘Se, elda talye urdemuk ulamuke. Elce, ‘Wininamne,’ tenelamuk ning ara, nong kum ubuke,’ tenenamake. Winibice talak ara, yuknye ton yanamle. Anye bira, ninye talina deiyoknye, mikip weiknye ton yalirye, Yerusalem mutuku ap, Allah el si erenyak aik, Yerusalem domice ning ap, nirya ulubuka daklopnamle. Atalak ara, Allah arye, ‘Anye el winilul ning nirya, sirya daknamle talak ani, atalak akunum kum danule,’ tenebuk touk, atalak ara, weik mek mikip arye, minopce olamle atonun, minopce anye, el ulul ning nirya, kum danamle. Atalak arye dipdongobuka, doryanamle talak noutamak nirya ara, mal olana ap, weik imun ning ayala-ayala nirya ap ara, pia weik unamle. Winibuka unamalbuk, Allah tenebuk touk, sirya dakne talak upnamlarya.
Tonda, yatanye do, yata kil do? Ninye yala-yala nirya arye, na nong ap, na yupu peterena ap ati, sik talilamice ning batakikirye, na aminyan tam dobolyanganamniak ninye nirya ara, sikce batakikce ning atonun ning, yupa pia weik dolonamake. Ara, atalak noutam aryuk dolonamake. Ara, sik ulamice mutuku ap, sik aik ap, sik weit yapu ap, sik du yapu ap, sik weit kilapu ap, sik du kilapu ap, sik nin, sik ni yapu ap, sik bidamnye mapu ap, sik wa bun ap, anirya bataklamica ning ati ara, atalak noutam aryuk aning atonun ning, yupa weik dolonamake. Tonda, aminyan yanamle talak ara, kam pia una ati deiyok ning doprobikirye, nong bola koplobuka pia kam unamake.
Deipnyopura, na Raja unamna ati, na sirik taruk tam deipnamne ninye ati ayupu nyapnamne. Sikda na ni Allah arye talima aribukba, bico tenebuka kanye deilisilye ninye ara, na dam wekelyalulume. Allah arye aning-aning nirya min kum kwepdeiyamuk talak arye, ‘Anang aryuk talinamak’ tenen, akunum kintinibuka deiamsuk ning ara dolyalulume.
Yesus arye amapu nirya ati Allah akunum morobukura, sakwetebuka bayuk bukni, bona weik talinanye tonok bik-bik abuka Yesus dam biyukce, Yesus el si erena ati, kutam tuku dibuka Yesus ati asipdeyuk. “Anda peterenanye, telebnye ulyame. Bol koplobuka pia kam Una deiyok ning, narye yata wiribuka doproptinye do?” nyabuka asipdeyuk.
Aning winibuk touk, sik din ning dibuka dakalongoyikura, anggur mek makau arye kwebuka dobukce, ayupu nyabuk. “Amek ara, na ining atonun ulule. Na ining deice arye, winiryuk nyalin yupu nyapdeipsine. Bukni, minop talak ara, Allah arye nyalilamsuk ning ara, akunum punuple. Winiryuk nyapdeipsin yupu ara, minop talak nyalin yupu akunum punupmale. Ara anggun ap, ninye mutuku-mutuku nirya ap ati, opnikceura, na ining saklya deice arye, Allah arye sik malye winin ning namin kiplirye, kum danipnamle. Ninye weik lyeplirye, sik kanye talima pia talinamle. Bukni, minop talak nyalilamsuk touk kume. Wini talak Allah nyalisilye yupu yuk ulule. Ara, wini talak babye, aminyan talak babye, na ining deice arye ninye malye winin ning kum danipnamle. Ara, ninye weik lyena yupu ati, winiryuk nyalilye ning nyapne,” Yesus arye nyabuk. (Ara, “Ninye mutuku-mutuku nirya noutamak, kili sal weik, sik malye ulamice ning ap, malye tenelamak ning ap ati, kum daneipnirye na ining arye lyepnamne.” Yesus arye nyabuk.) Nyabukce, ayupu tonap nyabuk.
Nyabukce ayupu ton nyabuk. “Ura akunuma, tonok yupu ton nyapnusine. Allah yupu ara, Allah el kanye aryuk nun bico ati, talye melisulul yupu ara, ayupu mikip deice arye anggun talima darapdongobuka talipsilirye, talima wisipsilyopura, Allah arye kintinipsuk ning dopdopnamabe. Ara, Allah arye kintinibuka wibuka deiamuk nang nirya, ara, anggun nang babye, Allah arye kintinipdeibuka arepnamsil ning ara, nun adib tenenyap nanguk dopdopnamabe. Ati ara, Allah ap, Allah el yupu mikip deice ap arye, sikcuk anggunti ‘Melipnamsirak’ tenen, anggun nong dobuka Allah arepsine.
Aning ara talye kum nyapsine. Kume, nun ninye nirya arye, ‘Allah ati nun like’ tenen, pia malye-malyeuk ulamubu talak noutamak arye, Allah el Mi Kopropa Yesus arepsukba, nun pununa ati dibuka deice arye, Allah ap, nun ap, teleb kibuka ansinibdeipsukce, wini talak ara Allah ap, nun ap neika uptibye. Winipsuka ati, nun kanye kum boktopsutue. Pia dipkoprop tenebuka kel kinyabe. Kristus arye Allah ap, nun ap, ansinibdeipsukce, akunum teleb kipdeipsuka ati, Kristus pia kam unamla deice arye, el ap nun ap kanye talima dukdongobuka unyaba deice arye lyepnamsile. Aminyan talak Allah arye kum bataknamsile. El ap neika pia ati unamabe.
Anggun ton kel kiplulume. Nun nirya ara, mikip pia kum ninye ulamubu talak, Allah el ulul ning nirya ati, yanibuka malyeuk ulamuburye, Allah el dam pia kum ulamubu. Bukni, wini talak noutamak ara Allah arye, ‘Yesus el dipnamle talak, pia teleb talak atia,’ tenyamuk touk, nun malye ulamubu ning pununa ati, Yesus arye nunti dibuk. Nun malye winilamubu ning wenena ati talye oplopsutu bukni, Kristus arye nunti dipsuke.
Aning ara talye kum nyapsine. Deiyok ara nyapnusine. Ara, nunce dengna ning dolona ati, pil dobibiba, sik pil deiyok nang arye menenga ning, yo bok arisinyak touk, malye winin ninguk tenebuka, pia malyeuk winipra balamibyopura, sirya talak ara dipnamabe. Dibibyopura, Allah ap neika pia kum unamabe. Bukni, Allah bico tenesilirye, el kanye aryuk talye arisilye ning ara, nyapnusine. Ara, nun Deiyoknye Yesus Kristus ap, talima dukdongopsuk deice arye, sirya talak ara kam bukeipsilyeba, Allah ap pia kam unamabe.
Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.
Tonda, minop talak arye akunum wibuka deiamsuk ninye ati, ‘Na damak yalulume,’ nyabuka, nun talima pum tam yukupsuke. Allah arye yukupsuk ninye ara, nun malye winin ning kilipsukce, “Sikda diksukum un ninyeuk akunum keipsine,” nyabuka, teleb kipdeipsukba, el mapu kopropa unyabe. Diksukum teleb ninye akunum teleb kipdeipsuk nang ara, aminyan sirya talak pia teleb kipdeipsilyopura, weik arye erepdeipnamsile.
Allah arye ninye lyena ati, “Wininamsine,” nyabuka nyalisilye yupu ara, ‘Winiryuk yupu dobuka, peterepra banamak’ tenen, nunti wipdeipsuke. Wipdeipsukce, pia moubuka teleb pil dona deiyok ning aresulule. Ayupu ara, ninye lyena ati, winiryuk yupu ara, mem yupu surat sekenyak yupu deice arye kum ulule. Aning kum bukni, Allah El Dib Kanye deice aryuk ulule. Deiyok ara ani. Mem yupu surat deice sekenyak yupu ara, ninye arye, ‘Anyuk talibuka dobolbayapya deice arye wininamap’ tenen, pirinyak bukni, teleb ubuka kum dobol binmanto kum unyaka anya arye, ayupu ara ninye osiliba, derelamak ning atonun ulule. Bukni, Allah El Dib Kanye ara, el pil dosilya deice arye, ninye kam una deiyok ninguk aresulule. Aning ati ara, Allah el ninye lyena yupu, nyalilamsil yupu, winiryuk ning ara, el Dib Kanye arye kam una deiyok ning arisilye ning deiceuk ulule.
Ninye dana-dana noutamak ansinibuka, teleb ulina deiyoknye bira, tonok tam nang atibuk pil kum dolule. Ara, atam ninye ap, ortam unyak ninye ap, ansinilina ati pil dolule. Aning atonun, Allah dantam, min talak ulamik ninye, sik Israel ninye dan tam ulamika ati, Musa birye ansinibuka teleb ulina deiyoknye ulamuk. Bukni, Allah elda tonoknye ulule.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Allah arye sikti, ‘Anang lyepnamne’ tenen, wipdeiamsuka ati, ara nunce anggun Tesalonika mutuku nang ati, Allah el laka teleb yupu, ninye lyena yupu peterelamsupu deice arye, Allah arye anggunti yukupsuke. ‘Wininamak’ tenen, yukupsuka deiyok ara, ani. Ara, nun Deiyoknye Yesus Kristus ap, el yanamle talak upnamle ning ap, urasin pia teleb kibuka yanamle. Atalak ara, ninye nirya arye elti, teleb nyabuka, el si weik arye erepnamak talak ara, ‘Anggun Tesalonika nang babye, neika atonun wininamak’ tenen, yukupsuke.
Allah el yupu ara, kum sekdongopmanto ulula ati ara, yata ikin ning do nirya, kanye imun ning aupmanilya babye, aning tenena kum arye, apiluk donamne. Wininuna ara, talye ati kume. Deiyok ara, Allah arye minop talak, ‘Na mapu unamak’ tenen, wibuka deiamuk nang nirya ara, Yesus Kristus pil dopsuka deice arye, lyen ning kintinipsuk ning ara, ‘Dipkoprop dopropnamak’ tenen, apil kum batakanune. Tonda, ‘Doprobikcebuk, aminyan talak Allah arye teleb updeipsilibuk, oyanamle talak noutamak nirya ara, telebuk pia kam unamak’ tenen, ikin unilya babye, pi dobuka pia pil donune.
Allah arye tilila yupu pia kum nyalule. Aning-aning kabul kum kwepdeiamuk talak ara, “Bol kobuka pia kam una deiyok ning arepnamsine,” nyabuka nyalilamsuke. Nun nirya arye, kanye teniltona kum aryuk, ‘Dipkoprop pia kam un ning arenamsil’ tenen, dib tenebuka dinauk unyabe. Wininyaba deice ara, nun dib tenen ning ap, kel bikinyap ning ap, ulule. Yuk deiyok ton kume.
Allah El Dib Kanye weik arye arepsuka deiyok ara, nun malye winilamubu bukni, Allah el kanye aryuk, bico tenepsuk akarye, nun malye ning nirya, kum kipdeipsuk akarye, pia teleb winin nang atonun, akunum kipdeipsuke. Winipsuka deice arye, bol koplobuka pia kam una deiyok ning arisulula ati ara, im deice tam pia kamuk unamake. El mapu atonun kipdeipsuka ati, kanye bokoltona kum arye, ‘Dipkoprop, pia kam un ning arenamsile,’ tenen, akunum kel bikmuburye, ‘El tamubuka tukwak mutuku yanamle talak ara, yata talak do?’ tenebuka, dinauk unamapya ani, el bisikuk dobolbinamtibye.
Ton talak ara, sik malye nang arye, yuk diba tenyamik nang ati, dobukabikce tapu koubuka, wenena aik dongobik bukni, anang ati bico tenebuka melilamlume. Tonda, malye nang arye, anggun talilamlum ning ubula dolamikba, anggunce engena kum aryuk, ‘Dawaplye, dadopropnyake’ tenen, kanye deibuka ulamlume. Winibuka ulamluma deiyok ara, anggunce, ‘Kume, nun dipkoprop talinyap ning ara, ubula dopropmasiak ninguk kume. Pia teleb talinyap ning ara, kum kum danmanto. Pia unamle ning atia,’ tenelamlumce, kanye deibuka ulamlume.
Ura, anyapmasin ninye nirya ara, pia diba tenenauk ulamik ani, aminyan talak diamik. Allah arye, “Wininamsine, winibuka aning arenamsine,” nyabuka, sikti, nyalilamuk ning ara, min kum areamukba, kum dolamik. Nong kum dolamik bukni, ‘Kume, Allah arye nyalilamsuk ning ara, dipkoprop arenamsile’ tenen, kanye deibuka peratoto arye, kintinibuka dinauk ulamik. Tonda, sikce nyalamik. “Kume, nunda, yuk pera mutuku ninye, asik nang atonun kibuka unyabe. Nunda, tukwak mutuku unyap bukni, asukum ara nun mutuku kopropa kume,” nyalamik.
Tonda, Allah danatam, ninye danatam, noutamak ansinilina deiyoknye, Yesus el un dam yanganmalume. Ninye lyena ati, Allah arye, “Winipnamsine,” nyabuka nyalilamsuk yupu, winiryuk ning ara, Yesus ara, ayupu ati ansinilina deiyoknye usulule. ‘Allah ap, ninye tukwak ninye ap, teleb ubuka neika unamak’ tenen, ansinibuka delisulul deiyoknye ara, Yesus uka. Minop talak ulamuknye Habel arye, Allah el si erena ati, kam ning obuka, ining likdeibuk ning ara, mitik telebuk winibuk bukni, Yesus arye nun lyena ati, el ining sakukce biyuk ning ara, pia mambul weik ulule.
Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.
Elce, “Na mapu,” nyabuk ninye ara, tukwak ninye unyakba, nong kalina ap, ining ap, ululba unyaba anya arye, Yesus el babye, ninye nong atonun dayukce, nun kan-kan ulamuk. Ninye nong dayukce ulamuka deiyok ara ani. Ara, Yesus arye, ‘Ninye lyena ati, na dipnyopura, adeice arye, ninye dipna deiyok ning talibuka mikip ululnye, Isa Mutuku Dongonye biti, malye kipnirye oplopnamne’ tenen, Yesus arye ninye atonun dayuk.
Arup nyapmasin yupu nirya aupmala ati, anyapnusin yupu babye kekenulume. Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba ikin asa unyap talak ara, ‘Nun du kopropa Yesus arye, melinamsil’ tenen, eltibuk diba tenebuka tenenamlume. Na kayapu, Allah arye wibsukba, elti, diba tenelulum ninye ati nyapsine. Allah arye nyapsukba, ‘Allah el dam im deice binamabe’ tenen, diba tenenyap touk, anggun yuk mutuku ton ululum ninye, aning atonun diba tenelulume. Aning ati ara, anggun kanye tenen ning nirya ara, Yesus deiceuk deipmunce, eltibuk diba tenenamlume. Yesus elti, diba tenebuka eluk talibuka unyabe. Yesus ara, Allah arye tukwak ninye lyena ati, el pia kai teleb yupu laka nyana ati, deiyok kouna deiyoknye ulule. Nun ap, Allah ap, neika una ati, ansinilina deiyoknye Yesus usulule. Yesus ati diba tenebibirye, el yupu laka nyalbanyabe.
Ura, yuk yupu ton nyapnusine. Allah arye, nun apu kopropa Abraham biti, “Winipnamkine,” nyabuka, yupu nyalilamuk talak ara, ‘Abraham birye diba tenepnunil’ tenen, Allah arye el bidamang si ap, tabakuka nyabuk. El si nyabuka ara, elda aning-aning deice tam, weik mambulnye ulula anya arye, yuk si tabakuka kum nyapmanto. Weik ning ara, el si koprop uka. Allah arye nyabuk.
Allah arye Yesus ati, ayupu nyalilamuka ati ara, nun kele. Allah ap, ninye ap, talima dukdongobuka neika una ati, Allah arye, winiryuk bisik kintinipsuk ning ara, pia telebe. Minop talak nyapdeiyamuk ning ara, mitik telebe uka. Allah ap, nun ap neika una ati, nun ansinilina deiyoknye Yesus ara, Allah arye akunum kintinipdeipsuka ati, ‘Aning ara, dib unamsil do, tilila do?’ tenen, kum teniptoptibye. Dipkoprop nong upnamle. Yesus elcuk nun diba tenenyap ninye ati, lyepdopnamsile.
Ura, na kayapo, Allah arye ayupu nirya ati, “Winiryuk nyalin yupu nyapsine,” nyabuka deice arye kel kinyabe. Minop talak nyalilamsuk ning ara, winipmanto nyana ati, akunum pun dayukce malye ubuka anya arye, aning ara, akunum punupsuke. Minop talak nyalilamsuk yupu ara, tonap kum talibuka unamabe. Akunum pun dayuk ning ara, minyuma kum danamlarya. Winiryuk nyalin yupu akunum nyapmasila ati, aninguk talibuka unamabe, nyapsine.
Sik minop talak pil dolamik nang arye, tia talak ati, cang kambing bol aik noutamak, ‘Pia Teleb Lek Aik weknuyap’ tenen, kambing basam ining ap, sapi basam ining ap, bobna deice arye wekelbalamik touk, Yesus ara, aning atonun kum winibuk. Aning kum bukni, Yesus Kristus arye, tukwak ninye nirya, nun malye winin ning, pia kum kilina ati deksukce, akunum sirya daksuke. Akunum deksukce, nun punupsuka ati, apil nirya sirya daksuke. Nun malye winin ning kilin pil, akunum sirya daksuka anya arye, Allah el dipkoprop Pia Teleb Lek Aik, like tonok talak wekuk. APia Teleb Lek Aik wekuk talak ara, el bidamang ining deice aryuk wekuk. Ati, ila tuba tonap, apil kum dopnamle. Apil akunum sirya daksuka atia.
Ura, yuk yupu nyapnusine. Ninye dipnukce talak ara, wininyake. Surat deice ara, “Na dipnyopura, na talyamse ning ara, winibuka, winibuka bokeipnamlyame,” nyabuka sekenyake. Asurat sekenyake nang tuba kam unyak talak ara, asurat noutamak nyabikce ning ara, yuk nang arye bokuka kum doproptinge. Asurat deiyok nang arye, dipkoprop dibikceba, yuk nang nirya laka kel kibikcopura, adiparyuk, asurat noutamak nyamikce ning atonun, sik ning bokuka doproptinge.
Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.
Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
ကြော်ငြာတွေ