Ibrani 6:4 - Eipomek

⁴ Ura, yata ninye do nirya, sik diba tenenyak ning nirya akunum batakikcopura, yata wiribuka arye, tamubuka bobitibyopura, ila tuba tonap, sik malye unyak ning ati bataktingce, urasin tamupting do? Kume, aning ara, kum winipmanto. Minop arye, kunukna akuk ulamik bukni, Allah el dirina dobuka sik talima noutamak aribukba, doprobikce el ulamle ning kel kiyamik. Tonda, Allah arye arisilye ning doprobik. Tonda, Allah arye el Dib Kanye aribukba, sik ton doprobik.

Ibrani 6:4 ပူးပေါင်းရင်းမြစ်များ

Imamat 13:55

Like tekbarye sum akunum mabiceura, asumuk, Imamnye dam boyakiba, dilenamlule. Dipdelyeba, ton tabakna kum wamlirye, min arye awamlye urasin touk tuba aupmalye bukni, min bol sukamlye ning kilina kumce, tuba upmalyak eiplyeura, “Kume, abaju deice ara, malye barye suse bol sukamuk ning ara, tuba aubuka ati, aning ara, pia malye weik ulule. Ati, adiparyuk uku dongopnulyame,” nyanamle. Ara, pukle suse malye una ning ara, abaju deice do, abaju kain pum tam do, tuba aubuka ati, winibuka uku dongopnulyame,” nyabuka, laka nyanamlule.

Imamat 14:43

Winibuka min arye lyulamlye ning ton, dakuka bai tam akunum dobikcopura, aik taramak taplakne ning, el si pelester winiryuk ninguk, akunum taplak deibikcak arye, aning nirya, winibuka sirya dakiceura, anyaik talye daupmalya ani, aminyan talak Imamnye birye, anyaik tamubuka dipdenamle.

Bilangan 24:3

Allah el Dib Kanye arye, Bileam talima pum tam yanuka wekukopura, el mikip deice Bileam birye doryanamuk talak, sik Israel yala ninye arye winipnamik ning ati, laka nyapdeibuk. Ayupu nyabuk, “Aminyan otam wininamle ning ati nyapnune. Nara, Beor el mi Bileam birye nyapne. Nara, na asing arye aning-aning teleb ubuka elinun ati, teleb ubuka eipna arye, aminyan winipnamle ning laka nyanunye birye nyapnune.

Matius 12:45

Utenebukce, elda mitikto yu bukni, weik yu isa tekbarye binuka doyaliba, anye el talima noutamak wekuka unamake. Anye el talima talyamuk ning ara, min arye mitikto malye ulamuk bukni, wini talak ara, pia weik malye unamle.” Yesus arye nyabuk. [Ara, Yesus arye, “Ayupu nyapmasin touk, anggun babye, min arye malye winilalum ning, mitikto akunum bataklum bukni, talima lo upmasil ning ara, Allah arye ninye nirya talinamle talak nyasinye yupu ara, kum talipmunyopura, ‘Aminyan ara, pia malye upmunyak’ tenen, nyabuk.]

Matius 5:13

Winipmanto yupu nyapnusine. Din ningto kum nyaple ati, ‘To lepnamle’ tenen, garam dongobuka dilamak touk, anggunce nati, diba tenelulum ninye ara, tukwak mutuku unyak ninye kan-kan, garam uwa atonun ululume. Ara, anggunce namin una ap, ninye melina ap winimunyopura, anggun winilulum ning, yuk nang eibikirye, kel bikikirye, diba tenenamaka ati, nyapsine. Garam uwa teleb lepnamle deiyok ning ara, kum uptuba, ila tamubuka teleb kipdeiptumba, to nyaptu do? Kume, aning ara, pia kum winipmanto ati, to kum nyaptu ati, kum diptinge. Talya buru tam donokiceba, ninye arye aning deice yaniltakanyake.

Yohanes 15:6

Yata ninye do nirya, na ap talima dukdongobuka, nauk talibuka kum unyak ninye ara, sikda anggur tapu taruk deiplobiceura, sisal lyeplirye, koululamle ning atonun unyake. Akunum koulyamlye taruk ara, ninye arye dobuka uku dongobicopura, uku arye dilamle.

Yohanes 3:27

Nyanmekba, Yohanes arye anang ati nyabuk. Yata nang do nirya, mambul pil dona deiyok ning dolonyaka ara, Allah im deice arye arepsutopura, doproptingce, apil dopting bukni, Allah im deice arye, apil dona deiyok ning kum arepsilyopura, apil kum doptinge.

Yohanes 4:10

Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk.

Yohanes 6:32

Nyabikba, Yesus arye aninye ati tamubuka nyabuk. “Na dipkoprop nyapsine. Musa arye im deice din ning roti, kwaning el si ara mana kwaning, dipkoprop ning ara kum areamsuke. Na Ni Koprop Allah arye im deice roti dipkoprop ning ara arisulule.

Rasul 10:45

Musa arye nyapdeibuk touk, sik den bam bol mouse ning akunum sekik nang, ara Yahudi yala nang, Yesus diba tenelamikce, Peterus ap neika yanmek nang ara, anirya eibik. Eibik bukni, anyaik wekik nang ara, Yahudi yala kum nang ulamik bukni, Allah El Dib Kanye yanuka, weik arye sik talima pum tam wekuka deice arye, nong deice deibukura, anang arye yuk-yuk mutuku ninye nyanyak yupu deice arye, Allah si erebik. Allah el si erebikura, Peterus ap, neika yanmek nang arye aning eibika ati, sik lukdayikce, ‘Mambule’ tenen, kanye pum tam teninmek. Aning eibikopura, ‘Mambule’ tenebik deiyok ara, ‘Allah arye bico tenesilya deice arye, el talye arisulul Dib Kanye, ato talye Yahudi yala kum ninye ara, sik den bola mouse ning kum seklamika ati, Allah arye yata wiribuka areptu do? Amalye wininyak ning ton sik babye, Allah El Dib Kanye kum doproptinge,’ tenebika ati teniltonmek.

Rasul 11:17

Nun min arye, nun ni Yesus Kristus diba tenebupu talak ara, Allah el talye arepsuk Dib Kanye ara, aning atonun, anang Yahudi yala kum ninye babye aribuk. Arebuka ati ara, nara yatatonye birye, Allah el tenyamuk ning ati, yupu sektinye do?” Peterus arye, sik Yerusalem mutuku ulamikce, Yahudi yala nang ati, nyabuk.

Rasul 15:8

Allah arye nun kanye talima tenenyap ning kel kilisulule. Allah El Dib Kanye arepsuk touk, anang babye, dib tenebik deice arye Allah El Dib Kanye sikti, akunum aribuk. Aning winibuka deice arye, ‘Sik Yahudi yala kum ninye babye, diba tenebiceura, na mapu kiptinge’ tenen, Allah arye akunum laka nyapmasile.

Rasul 8:20

Nyabukura, Peterus arye tamubuka nyabuk. “Se, anda, Allah arye bico tenesilirye, elce urdem talye arisulul ning, El Dib Kanye ara, ance, ‘Yo bok deice arye dektinye,’ tenepmalama ati, an dipminopura, an yo bok kum danamlarya.

Roma 1:11

Tonda, ‘Se, sik Roma mutuku unyak ninye ap epdatibye’ tenen, patanilye ning deiyok ara aupmanile. Ara, Allah El Dib Kanye mikip deice arye arisilye pil dona deiyok ning, narye Roma mutuku ululum ninye ati melibuka arepsitiniba, ‘Anggun kanye talima mikip kibuka unamlum’ tenen, ‘Se,’ tenenune.

2 Korintus 4:4

Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.

2 Korintus 4:6

Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.

Galatia 3:2

‘Anggunce laka nyapnumunba, kekebuka kel kipnun’ tenen, asipdenusine. Allah arye el Dib Kanye arepsukba, anggun talima noutam weksuka ara, yata arye do? Musa sekamuk yupu, mem yupu kekebuka dobolbalamluma deice arye, el Dib Kanye arepsukba, doproplum do? Akumopura, Allah el kai teleb yupu peterelamububa, diba tenepluma deice aryuk, Allah arye El Dib Kanye arepsukba, doproplum do?

Galatia 3:5

Anggun ton teneipdelulume. Allah arye El Dib Kanye areamsuk ning ap, tonda, elce etekdop ubuka don pil, ninye kum winiptibye pil dosulul ning ara, aning nirya arisilya deiyok ara, Musa sekamuk yupu moubuka dobolbalamluma deice arye areamsuk do? Akumopura, nunce peterelamububa, kekelamlumce, diba tenyamluma deice arye, arilamsukba dololulum do? Kume, yuk deiyok ton kume. Anggunce diba tenelamluma deice aryuk, Allah El Dib Kanye arisulule. Tonda diba tenelamluma deice aryuk, Allah arye ninye kum winipmanto pil dosulule.

Efesus 1:18

Tonda, aning ton Allah ati morosunune. Ara, Allah arye, anggun kanye talima noutamak, kel kina deiyok ning, dirina arepsilibuk, elce kintenyamsuk ning nirya ati, ‘Pia moubuka kel kinamlum’ tenen, Allah morosunune. Elce kintenyamsuk ning ara, ani. Ara, Allah arye, ‘Na ap, sik ap, aminyan talak ara, pia teleb akuk neika unamabe’ tenen, yukupsukba, anggunce kintinibuka dinauk ululum ning nirya ara, moubuka kele kinamlulume. Tonda, Allah arye, ‘Na mapu ati, pia teleb kipdeipnirye, pia telebuk wininamake. Winibikiba, na ap neika unamabe’ tenen, pia weik arye, kintinpdeiamsuk ning, ‘Aning nirya kele kinamlum’ tenen, Allah morosunune.

Efesus 2:8

Allah el kanye aryuk lyepsuke nyapmasina ara, talye ati kum nyapmasine. Deiyok ara, ani. Anggunce, Allah ati dib tenelulum deice arye, Allah bico tenepsilirye, talyeuk lyesulule. Aning ara, anggun teleb pil dobuka, diksukum ululuma deice arye, kum lyesulule. El kanye aryuk bico tenepsukce, lyepsuke. El kanye aryuk lyesulula ara, ‘Talye dem aryuk dib tenena deiyok ning arepniba, aninye arye, dib teneptinge’ tenen, arepsilirye, kanye deibuka lyesulule.

Efesus 3:7

Ara, Allah arye ninye lyena ati, el laka teleb yupu peteren, pil donanye kipdeipnuka deiyok ara, laka nyapnusine. Ara, Allah bico tenepnukce, el kanye aryuk, apil dona deiyok ning talya urdemuk arepnuke. Allah el mikip arye, pil dopnuk deice arye, ‘Na laka teleb yupu peterena deiyok kounanye unamle’ tenen, akunum wipdeipnuke.

Efesus 4:7

Ara, nun nirya ara, nong tonok atonun unyap bukni, Kristus arye, tenyamsuk touk bico tenepsukce, ‘Mambul pil teleb kibuka donamak’ tenen, el mikip deice arye, pil dona deiyok ning yala-yala nirya bokuka, yuk-yuk aresulule.

1 Timotius 4:14

Minop talak apil min kum dolamlum talak ara, Allah yupu aik deiyok nang arye, sik taruk an nong deice deibuka, “Allah el pil moubuka winipman kum pil winibuka, winibuka donamle,” nyalilamkika deice arye, Allah El Dib Kanye arye pil bita dona deiyok ning arepkuk. Aripkuk ning ara, ‘Dauplye’ tenen, batakna meme. Anyuk tenebuka pi dobuka mikip arye pil donalyame.

2 Timotius 2:25

Yuk nang arye, Allah el yupu peteren nang ati, ‘Nun lik’ tenen, el yupu yanibikirye, malye kibuka bisibikcopura, elce anang ati, teleb yupu nyabuka, nimalye arye peterenamle. Sik walwal arye wininyak ning ati lipsisikuka peterenamlyame. Ara, talye ati kume. Ara, ‘Allah arye anang ati, sik kanye noutamak pil melibuka doptubuk, sikce, “Nun malye un ning batakape,” nyaptingce, Allah el bisikuk tamubuka yanamak do?’ tenen, nimalye arye peterenamlume. ‘Sik malye ning batakikcopura, Allah el dipkoprop yupu kel biktingce, teleb uptinge,’ tenenamlame.

2 Timotius 4:14

Ura, yuk yupu nyapnukine. Tonoknye el si ara, Aleksander ara, kat ning tembaga dobuka, aning-aning memelulnye birye, ikin ning pia weik arye, na nong deice delilamnuke. Elce nati, kanye imun ning weik areamnuke. Ati ara, Allah arye anye bira, kwa dibuka wenena ati, kanye imun ning weik arenamle.

Ibrani 10:32

Bukni, na kayapo, sikce peterepsikba, Allah el yupu kekeplumce, Allah el dirina arepsukba, doproplum talak ara, ila tuba tonap tenenamlume. Malye nang arye, ikin ning weik anggun nong deice delilamsika deice arye, pia winilelamsik bukni, ikin ulamsuka babye, pia batakna kumce talibuka diba tenenauk unamlulume.

Ibrani 2:4

Tonda, Allah arye nunti, ‘Na yupu, ninye lyena ati kai teleb yupu ara, tukwak ninye diba tenepnamak’ tenen, sik peterelamsik talak ara, mambul pil weik dolamsuke. Ara, ‘Allah aryuk apil donmasile, tenepnamniting’ tenen, talye nang arye kum winipmanto ning ap, weik mambul pil ap, ninye kum winipmanto pil ap dolamsukba, ninye weika arye, ‘Se, aning ara dipkoprop Allah elca,’ tenelamubu. Tonda, elce tenelamsuk touk, Allah El Dib Kanye arye el mikip deice arye arisilye pil dona deiyok ning ton, bokuka areamsuke.

1 Yohanes 5:16

Ara Allah arye wenebuka oltakasulul atonun, malye una ning kum bukni, yatanye do nirya, el mening dam ululnye birye malye ulamlye bukni, eiplyopura, amalye ulamlenye ati, Allah moronamlule. Allah moroplyopura, Allah arye amalye ulamlenye ati, lyebuka deiplibuk, kam unamle. Na nyapmasi ning ara, sik malye wininyakba, Allah arye wenelul bukni, amalye winilamikibuk kum olye ning ati, nyapne. Ton yala malye winilamice ning ara, aminyan ara Allah arye oblyeba, dibinyake. Amalye winilamice ati ning ara, Allah moronamlume kum nyapsine.