Ayupu nirya ara, urdem ati kum nyapsine. Nun tukwak ninye nirya arye, pil donyap ning ap, tenebuka duknunyap ning aning-aning nirya ap ati, Allah eipsilirye, kel kisulula anya arye, aning nirya ati wenebuka yupu lipsisikuka bokeipnamsile. Ara, ‘Malye winilamik ning ara ani. Teleb winilamik ning ara ani,’ tenen, wipsilirye, nun pil erebirye winilamepya touk, Allah arye dekna arepnamsile. Ayupu ara, abuku Penghotba sekamuka deiyoknye birye nyabuk.
Ibrani 6:2 - Eipomek2 diba tenebikceura, mek dongona ati, lak len yupu ap; ninye nong deice taruk tatang deibikirye, ninye kwetena yupu ap; akunum diamik ninye kam buknamak yupu ap; sirya talak ara, Allah arye, tukwak ninye nirya yupu lepsisikuka boksilirye, malye winin ninye oplopnamle nyana yupu ap; ayupu nirya ara, deiyok kouna yupu ati nyapsine. အခန်းကိုကြည့်ပါ။ |
Ibrani 6:2
57 ပူးပေါင်းရင်းမြစ်များ
Nun ni Allah, an mapu koprop bukni, akunum min arye diamik nang ara, aminyan ance kam bukeipminba, kam unamake. Sik deiamik nang ara, akunum tuku palibuka wiamik bukni, sik nong ara, tamubuka kam buknamake! Tamubuka kam bukmunyopura, weik tonun kanye deipmunce, weik yupu weik tonun mot nyapnamlume! Winipmanto ara, mok purye tuku deice saklirye, dua pito weleplirye, dirina arye teleb ulilamle touk upnamle. Aning deiyok ara, Allah ance an mapu akunum diamik ara, tuba tamubuka, kam bukeipnalame.
Tonda, atalak noutam aryuk, ninye weik tonun akunum diamikce nang babye, tamubuka kam buknamake. Ara diamikba, tuku palyamik nang ara, tuku pum tam arye kam buknamake. Kam bukikirye, ton tam nang ara, pia bola koplobuka, kam una deiyok ning dopropbikirye, tuba tamubuka bukikirye, kam kipman pia telebuk unamake. Bukni, ton tam nang ara, kanye imun weik ning doprobikirye, alye dakdanamake. Sikda, kanye imun weik ning doprobikirye, uku bisik bikirye, malye nyabuka ngalukikirye, pia engenauk unamake.
Ati ara, ninye mutuku-mutuku nirya, na yupu moubuka kekebikirye, ‘Na wininye ning atonun wininamak’ tenen, anggunda na mapu arye, ‘Ninye mutuku-mutuku im sirya, mutuku sirya nirya kekenamak’ tenena ati, peterelbanamlume. Peterepra balamunyebuk, ninye dib tenebikceopura, Allah el si deice ap, el Mi Koprop, Yesus na si deice ap, Allah El Dib Kanye si deice ap, sik diba tenepnamak ninye mek dongopdeipnin banamlume.
Peterelbimunyebuk, yata kil do, yatanye do nirya, na yupu diba tenebikceura, mek dongopmunyopura, Allah arye aninye lyenamle. Bukni, yata nang do nirya, na yupu diba kum tenebikceopura, Allah arye aninye ati, el dam kum dobuka deipnamle. Pia weneplirye, yukak dopkweteplibuk, sik ap, el ap, neika pia kum unamake.
Dinmokura, Yesus el taruk mek kum likmokcuk dinmoka ati, aFarisinye dinmokce ngalukunmok. (Ara, sik Farisi nang arye, ‘Kume, taruk mek likna ara, mem ning ato ning ati, aning kum winibibyopura, Allah arye derepsilyak ati, kum bataktibye’ tenen, taruk mek likna ning weika arye peterelamik touk, sik babye, ton winilamik.)
Winilamunyopura, Allah arye anggunti teleb ulinamsile. Ato ninye ara, sikce tamubuka, yuna kwalibuka kum deipsiting bukni, Allah arye sik diksukum wininyak ninye kam bukeipnamle talak ara, Allah arye sik areamuk ning dekna ati, mininga ning weike urdem arenamsile.” Yesus arye el bukmok aik deiyoknye biti nyabuk.
Utenebuka nyanmeka ati, Yohanes arye aninye ati nyabuk. “Anggun malye ning nirya batakmunyeura, mek dem dongosunun bukni, nara mitik mambul tonye binya arye, aminyan talak yanamlanye deiyoknye bira, elda weik mambulnye. Nara, mambulnye kuma ati ara, pia malye piluk bukni, el sandal kulongon tapu narye kum loploptinye. Narye mek dem dongosinibuk, anggun nong nirya mek siknilamle atonunuk, aminyan yanamlanye bira, el mikip pia weike ati, elce Allah Dib Kanye arepsilyeura, anggun kanye talima nirya talinamsile. Uku arye malye ning dilolamle touk, Allah El Dib Kanye arye, anggun malye winin ning nirya dobuka donoksilirye, kum daneipnamsile.
Anye bira, na babye kum bikamtinye bukni, ‘Yohanes birye dib tenenyak ninye mek dongonamle’ tenen, dopdeipnukce Allah arye, nyapnuke. ‘Allah El Dib Kanye im deice yalirye, el nong deice bukuka, el talima noutam pia aunamlanye bira, el akunuma. Anye birye yuk dib tenenamak nang ati, Allah El Dib Kanye dobuka arenamsile,’ nyabuka laka nyapdeipnuke. Winibuka laka nyapdeiamnuk atonun, aning nirya akunum winibukba eipse ati, ‘Anye bira Yesus adano’ tenen, akunum bikamse.
Nyabukopura, ayupu ton dukdongobuka nyabuk. “Atalak ara na yupu kekebiceura, tuku lukamicebuk kam bukikirye, kubuka yanamake. Sik diksukum ulamice ninye ara, kam pia unamake. Bukni, sik malye-malye winilamice ninye ara, kubuka tiknamak bukni, narye Ninye Mi Koprop Atonunye, sikti, yupu lipsisikuka bokipnirye, wenebuka opnamne.
Teniltonmek bukni, aminyan talak, Peterus arye nyabuk. “Yata nang arye, ‘Kume,’ nyapsitingura, anang dobuka mek kum dongoptibye do? Nunda Allah El Dib Kanye akunum doprobupu touk, sik anang babye, Yahudi yala kum nang bukni, Allah El Dib Kanye akunum dopropmaka ati, mek dongoptibye,” Peterus arye nyabuk.
Dib tenebukura, el ap, el aik pum neika ulamik ninye ap, diba tenebika ati, mek dongobikura, elce ‘Na aik yanamak’ tenen, moropsuk. “Anggunce nati, ‘Akil ara, nun ni koprop Yesus dipkoprop diba tenepmale,’ tenepmanuluma ati ara, na aik yamunce, tia talakuk neika unamabe,” nyabuka moropsuk. Weika arye moropsuka ati, el aik wekupu.
Ura tonok talak arye, sik Epikuros tam nang ap, Setoa tam nang ap ara, aning-aning nirya tenelamikce, laka nyalamik nang ara, sikce Paulus ati, yupu bisibikce yupu nyapdayik. Yupu nyapdayikce, ton tam nang arye Paulus nalinmek. “Ayupu nyanmalnye bira, yata yupu yanuka peterenmasil do?” nyabik. Ton tam nang arye nyabik. “Kume, nun walwal bukni, nun tenepmapa ara, ‘Sik dib tenepnamak’ tenen, sikce nunti peteresice touk, el babye, yuk mutuku allah-allah si nunti peterenmasile,” nyabuka, sikuk nyapdayik. Paulus arye, ‘Yesus arye lyepnamsile,’ nyabuka, el laka teleb yupu ap, kam bulina yupu ap, peterelamuka ati, sikce ayupu nyabik.
Nyabikura, Peterus arye tamubuka nyabuk. “Anggun nirya ara, anggun malye winilulum ning ap, kanye malye tenelulum ning ap, ‘Allah arye namin kipsilirye, kum daneipnamsil’ tenen, anggun malye ning nirya batakmunyak arye, donga tamubuka, Allah el tam kipropmunyeura, nunda Yesus el si deice aryuk mek dongopnamsiape. Winibibyeura, Allah arye nun bico ati, talye arisulul Dib Kanye ara, arepsilyeura, dopropnalume.
Peterus arye awekmek nang ati ayupu nyanmok talak ara, ‘Dipkoprop nyanmasile’ tenen, kekebuka doprobik ninye ara, mek dongobik. Mek akunum dongobikopura, sik winiryuk dib tenebik ninye ara, min arye diba tenyamik ninye ap, tabakik. Tabakikopura, yupa weik kipnin balamuk. Asum deice arye tabakik ninye ara, 3.000 ninye diba tenebikce, Yesus ati diba tenyamik ninye ap tabakik.
Nyabukce, awekmek nang dipdeyukce, ‘E ton tam nang Saduki nang wekmake, ton tam Farisi nang wekmake’ tenen, kel kibukce, aSandeheren nang kekenmekak ayupu weik arye nyabuk. “Na kayapu, na apu yapu Farisi nang ulamik atonun, na babye Farisi nang atonun unune. Na kayapu, na apu yapu Farisi nang ulamik touk, na babye, Farisinye unune. Nara, kanye teniltona kumce, pia kanye talima lamabuka, ‘Allah arye akunum diamice nang kam bukipnamle sum ara, dan talak winipnamle do?’ tenen, kanye deibuka pia dipra unune. Aning dib tenenuna ati ara, arup arye anggunce yupu lepsisikuka bokolinmanulume,” Paulus arye nyabuk
Tonda, narye Allah ati, kanye tenildena kumce, pia kanye talima lamabuka, dipra unun ning ara, aYahudi yala deiyok nang babye, atonun lamabuka dipra unyake. Ara, Allah el yupu nyasilya atonun, telebuk ulamice nang babye, ayupu yanibuka malye-malye ulamice nang babye, Allah arye akunum diamice ninye nirya kam bukeipnamle sum, ‘Yata talak winipnamsil do’ tenen, dinauk unyabe.
Bukni, tonok ninguk ara, narye winipse ning ara, lak nyapnusine. Ara, narye Sandeheren nang ati, nyapse. “Na kayapu, ‘Allah arye akunum diplamak ninye nirya kam bukeipnamle’ tenen, diba tenebuka talinya ati, anggunce, ‘An malye winiplume,’ nyabuka nyapmanulume. Ati ara, ‘Asum anggun yupu bokolinmanulume,’ nyabuka, ninye yupu lepsisikra bokolina deiyok nang, Sandeheren nang ati, nyapse. Anyapse ning ati malye tenepmaniak tenepne,” Paulus arye nyabuk.
Paulus arye nyanmoka ani, yupu deiyok winilye nyabuk. Tonok ning ara, ‘Allah yupu nyasilya atonun diksukumuk unyabe,’ nyabuk. Tonda, ‘Nunce malye ning patapsilye ati, malye winibibyak’ tenen, ‘Nun bidamnang aryuk kalikdanyapce, malye ning batakanyap,’ yupu ap, nyabuk. Tonda, ‘Aminyan talak Allah arye ninye weik arye lipdesilirye, yupu bokeipnamsile,’ nyabuka ayupu ap, Paulus arye laka nyanmoka ani, Feliks kekebukce ilil weik ubukura, nyabuk. “Atalak ati ara, akunuma. Yuk yupu ton kum nyapnalyame. Anda tia talak ati dabilyame. Yuk talak ara, talye lo ton upnilyopura, yukupnamkineba, yupu ton nyapnamnilame,” nyabuk.
Yayikura, abitinye nang arye, “Nun kele. Yesus dibukba, Allah arye kam bukeibuk ati, yatanye do, Allah yupu dib tenen ninye nirya dibicopura, aminyan talak Allah arye tamubuka kam bukeipnamle,” nyabuka peterenmarik anyak, kekebikura, sik Saduki yala nang arye kekebikura, sik talima ak yu ubuk ati, ‘Ayupu ara, nun like’ tenen, sik kanye talima tulum weik ubuk.
Ura, Allah arye tenyamuk sum akunum uplyopura, tukwak ninye im sirya, mutuku sirya nirya ati, yupu lepsisikuka bokeipsilirye, wenepnamsile. Ara, Allah arye nyapliba, Yesus Kristus arye ninye nirya ati, sik kanye talima pum tam arye duknubuka tenelamice ning babye, nirya lakak kipdeipsilyopura, aning nirya Allah arye dipdelirye, yupu lepsisikuka bokeipsilirye, wenepnamsile. Ton nang ati ara, “Anggunda diksukum kibuka deipsine,” nyapnamsile. Ton nang ara, “Anggunda malye ulamlume,” nyabuka bataknamsile. Awinipnamsil ning nirya ara, narye Yesus el laka teleb yupu, ninye lyena yupu laka nyasununa deice arye peteresunune.
Musa menekuka balamukba, nun apu yapu nirya arye, Allah dua kan-kan ulamukce, adua menekuka balamukba, sik nirya arye, adua amuak balamik ning ap, weik mekwen dana-dana kipdopbukba, tuku kel-kel abuk bisik biyik ning ap deice kel biklamikce, “Musa ara, nun deiyoknye ulule,” nyabuka ulamikce, Musa el yupu kekelamik. Winilamik ning ara, winipmanto ning ton nyapnusine. Ara, dib tenebibirye, yuk ninye nirya nunti, ‘Anye bira, Yesus el mi akunum ulule kel biknamsiak’ tenen, mek dongolamak touk, nun apu yapu ara, Musa el amu tam ulamikce, elti, melilamik.
Nun nirya ara, Yahudi yala nang babye, Yahudi yala kum nang babye, yo bok deice dekenyak ninye babye, nun kanye aryuk talye pil dobuka unyap nang babye, nun nirya ati ara, Allah El Dib Kanye tonokuk arepsukbuk, nun talima ak weksuke. Tonda, Allah El Dib Kanye tonok, nun talima ak usulula deice arye, nong tonok kipdeipsukce dukdongopsuke.
Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.
Yata ning do nirya, Yesus el weik mikip deice arye, aning-aning nirya talibuka, el amutamak delilule. Atouk el mikip deice aniryuk, nun talye tukwak nong bataksilirye, nun dobuka urasin pia yuk ning kipsilirye, el pia teleb im deice nong ulye touk ubuka, kwepdeipnamsile. El pia teleb ulye touk, nun babye, teleb winipsiliba unamabe. Na Paulus arye, anggun Pilipi ninye ati, nyapsine.
Kristus arye winiryuk ninye atonun kibuka, teleb kipdeipsuk ning ara, laka nyapnusine. Ara, yuk nang arye, “Kristus dibukura, Allah el weik mikip deice arye kam bukeibuk,” nyabuka peterepsikura, kekeplumce, ‘Allah ara, el mikip weik’ tenen, diba teneluluma deice arye, akunum teleb kipdeipsuke. Winipsuka ara, winipmanto ning ton nyapnusine. Ara, minop talak anggun ap, Yesus ap, diptum ak, tuku pum bisik neika weipmasitinge. Amenyan ara, anggun ap, Kristus ap, Allah arye tamubuka neika kam bukeipsutue atonun ati nyapsine. Anggun malye ning kum kipdeipsukce, winiryuk ninye atonun kibuka teleb kipdeipsuk talak ara, diba teneplum ak, mek dongopsik talak arye winipsuke. Nun ap, Yesus ap, neika dibupubuk, neika kam bukeipsuk ara, mek dongopsik talak arye winipsuke.
Anang bitinye ara, Allah el dipkoprop bisik balamrikbuk, akunum lekuka, yuk malye bisik birikce, tilila ninguk talibuka winirurake. Abitinye nang arye, “Kume, Allah arye akunum diamik nang kam bukeipnamla ara, akunum ubuk,” nyarurake. Ayupu petererikca deice arye, ton nang kekebikirye, Yesus ati diba tenepnin banyak ning ara, akunum batakanyake. Tuba Yesus ati dib kum tenenyake.
Ton talak ara, kilapu sik mapu do, sik akanye yapu do, akunum diplamik bukni, Allah arye tamubuka aninye kam bukeipnaba, sik kilapu dam tamubuka yangalamik. Ton diba tenelamik ninye ara, yu nang arye dobuka, ‘Sik diba tenenyak ning nirya bataknamak’ tenen, kama dobuka sik nong deice kulalamikce, pia ikin ning weik sik nong deice delilamik. Winilamik bukni, sik diba tenena nang arye, “Se, lopdongopsululume,” nyabuka kum morolamik. Sik anang arye Allah ati, diba tenebuka kum bataklamika deiyok ara, ani. Ara sikce, ‘Kume, diba tenenyapnye Allah ati batakipyopura, ayu nang arye lopdongopsiting bukni, ara malyeuka. Oplopsicopura, aminyan ara, nun Ni Kopropa Allah arye, tamubuka kam bukeipsiliba, pia kam unamabe. Pia teleb ning ara, aninguka ati, anang arye opsica babye mambul kume. “Lopdongopsululume,” nyabuka kum moropnuyabe,’ tenenlamikba, sik yu nang arye aninye olamik.
Apil-apil dolamik ning nirya ara, talye arena ning ap, talye din ning ap, talye dinmek ap, ninye talima teleb ulina ati, talye mek likuka pil dolamik ning ap, apil-apil dolamik ning nirya ara, mem pil uamuk bukni, talye winipmanto ning, nong bol deice atonun piluk dolamik. Apil ara, minop talak arye dipdongobuka, anoutam talak nirya pil dopra yangalamik bukni, wini talak ara, Allah arye winiryuk nyalisilye yupu, akunum nyapsuka ati, aminop pil dolamik ning ara, tuba kum talinamabe. Minop talak dolamik mem pil nirya, akunum sirya dakubu.
Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.
ကြော်ငြာတွေ