Asipdeyukbuk, sikce tamubuka nyabik. “Kume, nunce an winilyam ning nirya dilenyaba ara, Allah el si Yahweh arye, weika tonun melikiliba, eipkuburye kel bikinyaba ati, winibuka tenepmabe. ‘Kume, teleb ning ara, an ni Isak ap, nun tam nang ap, yupu talipdabirye, nyalin yupu nyapdatibye,’ tenenyabe. Ara, ‘Nun tam ninye ap, an tam ninye ap, olana pia kum diparyuk, telebuk winilanamabe,’ nyabuka, ‘Nyalin yupu nyapdatibirye, ulamtibye,’ tenenmabe.
Ibrani 6:17 - Eipomek17 Winilamak touk, Allah babye atonun winibuk. Ara, Allah arye “Wininamsine,” nyabuka, nyalin yupu nyapdeibuk talak ara, utenebuk. ‘Narye nyalinman yupu nyapniba, kekebuka, aminyan talak aning dopronamak ninye arye, moubuka kel kipnuyak’ tenen, el si deice ap, tabakuka nyabuk. Ara, elce, “Wininamne,” nyabuka, nyalilamuk yupu deiyok ning ara, urasin yuk kum tamupmanto ati, elce nyalul touk, dipkoprop unamle. ‘Moubuka kel kipnuyak’ tenen, el si kopropa deice arye nyalin yupu nyabuk. အခန်းကိုကြည့်ပါ။ |
Ibrani 6:17
31 ပူးပေါင်းရင်းမြစ်များ
Dipkoprop Allah Yahweh arye, na deiyoknye ati nyabuk. Na Allah Yahweh arye, akunum nyapkisa ati, anyapkise ning ara, tonap tenepnirye, yuk ning ton kum punubuka nyapnamne. Ara, na Allah ap, ninye ap, teleb ubuka neika una ati, ansinilina deiyoknye pil talibuka pia donamlyame. Ara, minop talak ulamuknye, el si ara Melkisedek birye, apiluk talibuka dolamuk touk, an babye, apiluk talibuka pia donamlyame.
Bukni, Allah Yahweh arye, ‘Wininamne,’ tenelye ning nirya ara, dipkoprob winilirye, pia ati wininamle. Atonun, Allah el kanye talima pum tam tenelye ning nirya ara, dipkoprob tenelye touk winilulba, aning ara, kum kum danamle. Elce dolul ning ara, pia aunamla ati ara, ninye arye mapu deibikceba, dadeipdanin banamak ninye nirya babye, Allah arye pil dolul ning elinamake.
Na ni Allaho, ance nunti, weik tonun bico tenesimince, “Winibuka teleb kipdeipnamsine,” nyabuka, nyalin yupu deice arye nyapsiminye ning ara, pia batakna kum aryuk, tuba-tuba melisilyame. Narye, ‘Se, aning ara, pia telebe,’ tenenune. Winipmanto ara, kil ayam arye, el mapu nirya, el pol amu tam deiplirye, irilamle atonun kibuka, ninye nirya arye, an dam yanuka ukcopura, ance pia melibuka kalikinamsilame.
Winibuka wenebica ati ara, awein ning tia ati, dopropmalinye bira, minopce Allah si eren aik bilirye, Allah Yahweh kekenak arye, nyanamle. “Kume, Allah Yahweh arye dinmanilak, dipkoprob nyapne. Na kwit birye na ati, ‘Ance, na ning tia weinamnilyame,’ nyabuka moropnukba, weilamse ning ara, na bai tam upula kum dopropse. Tonda, narye kum opse,” nyapnamle. Nyaplyeura, abasam deiyoknye bira, ayupu kekeplirye, ‘Dipkoprop nyapmanile,’ tenenamle. ‘Aupmal do, kum do?’ tenen, pia tuba-tuba kum tenenamle. Aning tia ati weilamlirye, kaliklamlinye birye, “Na kume,” akunum nyaplyopura, akunuma. Abasam tia ati weinmalinye birye, abasam deiyoknye ati, aning pununa ara, dekna kum arepnamlule. Sik nirya arye, ‘Akunuma,’ tenebuka unamake.
Ninye kanye talima noutamak arye, ‘Aminyan talak ara, wininamabe, winibuka unamap ning ara ani,’ tenebikirye, sik kanye tenena weik unyake. Bukni, Allah Yahweh elce, ‘Wininamake,’ tenyamsuk touk, ubuka unyak ning ara, pia nong upnamle. Elce tenesilye ninguk, wininamlulume. Ninye arye tenenyak ninguk, tenebuka una pia kume. Allah elce tenelul ning ara, ninye arye kum bisinyake. Ara, winipmanto kume.
Se narye dopnamkin kilo! Anda na wa win dam atonun unilyama ati, an dam yanmane. Narye na weit kil ati, bico tenenun touk, narye antibuk, pia weik tonun bico tenekunune. Tonda, anda narye akunum dopkise kil atonun ulyame. Ati, anda na wa win dam atonun unilyama ati, awa win dam binyopura, nintong pia teleb nyalamle ning, el si ara mur ap, tonda, to nyalamle ning el si ara rempah-rempah ap, tonda, mong mek ap, anggur duk mek ap, sapi moum yung, el si ara susu ap, aning nirya dobuka dinmance, pia kanye deibuka unmane. Winipmanto ara, din ning ap, teleb anggur duk mek ap, talye mangkau dadinmarumunya ani, kanye walwal upsiliba, akunum boupsilyopura, kanye deipdanuka, telebuk unamdume. Deiyok noutam ara, nun kayapu anggun bitinye asukumuk unmarumce, anggun patapsilye touk, neika mapmarumunya ani, aminyan akunum boupsilyopura, pia kanye deibuka unamrume.
Nara Allah Yahweh, aning-aning nirya talibuka, deice tam erebuka, mikip weiknye unirye, im deice yin talin malaikat nirya, sik deiyoknye unune. Nara, nyalin yupu deice arye ayupu nirya ara, nyapsin ati, dipkoprob aning nirya ara winipnamne. Tonda, narye, ‘Winipnamne,’ akunum tenyamse ning nirya ara, dipkoprob winipnamne! Aning atonun, narye, ‘Aning ara, akunum winipname,’ nyapdeiamse ning nirya ara, kum batakanune, tuba winipnyeba aulula ati, dipkoprob aning nirya ara, winipnamnarya.
Nyabukce ayupu ton nyabuk. “Aning-aning nirya min kum kwepdeiamse talak arye, ‘Sirya talak ara, aning winipnamle,’ nyabuka laka nyapdeiamse. Tonda, minop talak arye do unamle talak ati, ‘Aminyan talak ara aning ton wininamle’ tenen, moubuka tenelamsirye kintinip deiamse ning ara, laka nyapdeiamse. Ati na tenepsirye ‘Aning ara winipnamle,’ nyapdeiamse ning ara, ton kum bataknamne. Anirya tenelamse touk dukdongopnamle. Tonda, na kanye deipsirye, ‘Winipnamne’ tenyamse ning ara, adiparyuk dipkoprob nong upnamle, kum bataknamne.”
Awinilul atonun, na Allah arye anggunti nyalisinye yupu ara, talye urdemuk tamubuka na dam kum yanamle. Aning kum bukni, narye, ‘Winipnamle, aning ara nong upnamlarya,’ tenebuka nyalisinye ning ara, dipkoprob atenenirye nyanun touk nong unamle. Tonda narye, ‘Ayupu dopkwetepniba, nong ara winipnamle,’ tenenye touk dipkoprob nong unamle.
Anggun malye winin ninguk tenebuka ululum nang ara, ‘Nun malye unyabe,’ tenepmunce bataknamlulume. Aning atonun anggun diksukum un ning bataklum nang ara, anggun malye tenelulum ning nirya batakuka teleb ninguk tenenamlume. Winipmunyopura, anggun ni Allah, el si Yahweh dam tamubuka yanamlulume. Ara, ‘Nun malye wininyap ning ati, talye opsutu bukni, el kanye aryuk bico tenesilirye lyepnamsil’ tenen, unamlume. Anggun ni koproba Allah el dam tamubuka yamunyeba, weik tonun bico tenepsilirye, anggun malye ning weik aupmalya babye, namin kipnamsile. Anggun talima mitang usilirye, anggun malye winilulum ning batakmunba, kum kipdeipsilirye namin kipnamsile. Ati, anggun malye winimunye nang ara, tamubuka Allah el dam yanganamlulume.
Allah arye nyabuk. Nara Allah Yahweh, pia min kume kum danmantonye unune. Minop talak ulamse touk, wini talak babye, aminyan talak babye, pia ati aunamne. Na si ton pia kume kum danamnile. Narye nyalin yupu nyapyopura, pia kum luba kinune. Pia teninune. Ati ara, anggun Yakub birye deiamsukba, dadeipdanin yangalulum ninye ara, malye weik umunya ati, talye lukparabuka wenebuka, obuka sirya dakamsitinye bukni, aning ara min kum winipsise.
Aning ati ara, ayupu ton nyapsine. Nunda, Allah el mapu kopropa unyaba anya arye, el tenyamsuk touk, el talilye ning bokuka arenamsile. Allah arye el talilul ning bokuka, el mi kopropa Kristus ati arenamle touk, nun babye atonun tonap, bokuka arenamsile. Malye nang arye Kristus ati, ‘Nun like’ tenen, el nong deice ikin ning delilamik touk, nun nong deice ikin ning delisinyake. Ati, Kristus ikin ulamuk touk, nun babye atonun, ikin unyaba anya arye, wini talak Kristus weik mambulnye, pia teleb ubuka ulul touk, aminyan talak nun babye, teleb kipdeipsilyopura, el ap neika atonun, mambul weik pia teleb nang unamabe. Paulus birye, sik Roma mutuku ninye ati, nyabuk.
Kristus ati diba teneplum ati, ‘Na dokola ninye’ tenen, akunum dopsuk ninye nirya ara, Allah arye nunti winibuka tenesulule. El kanye ara, ‘Abraham birye deibukba, dadeipdanin yangalamik mapu atonun ninye unyaka anya arye, aninye babye, narye Abraham biti nyalilamse ning dopropnamake,’ tenesulule. Tonda, “Abraham birye deipliba dadeipdanin banamak ninye ati, teleb ulinamne. El deipkirikdanin banamak mapu ati, teleb ning arenamne,” nyabuka nyalin yupu deice arye nyamuka ara, ‘Wini talak diba tenenyak ninye ara, sik babye atonun arenamne,’ Allah arye tenesulule. Na Paulus arye laka nyapsine.
Ara, Allah elce, ‘Wininamne, wininamne,’ tenelul touk, aning-aning nirya talilirye, pil doliba, aning nirya elce tenyamuk touk, aninguk winilule. Tonok ning babye, kum batakalule. Aning atonun, minop talak, nun min kum deiamsik talak arye, Allah arye nunti, wepdeiamsukce utenyamsuke. Yesus Kristus ati dib tenebupa deice arye, Yesus ap, kanye talima dukdongobuka ulamibya ani, sirya talak ara, Allah arye, ‘Aning-aning arepnibuk, pia talinamake,’ tenen, kintinipsuk ning nirya ara, arepnamsile.
Ura, Nuh arye Allah ati, diba tenelamuka anya arye, Allah arye, “Ninye kum elilamik ning bukni, mok weika arye cepliba, weik mekwen deipnamla anya arye, tukwak ninye nirya opnamsina ati, kanye mouplulume,” nyapdeibukba, Nuh kekebukce, elda, ‘Allah weik mambule,’ tenyamuknye anya arye, ilil ubuk. Ilil ubukba, ‘Na mapu silip nirya lyepnamsil’ tenen, weik mek liya yo kintinibukce, amek liya yo deice, weik aik ton dobuka kintinipdeibuk. Awinibuka deiyok ara, Allah ati, weik arye diba tenelamuka deice arye winibuk. Nuh bira diba tenyamuk bukni, atalak sik malye winilamik ninye ara, aning nirya kum kekebuka, diba kum tenyamik. Sikce ayupu batakikba, Allah arye aninye nirya wenebuka oplobukce, sirya dakuk. Allah arye ninye teleb ulina ati, lipsisikuka delisilya ara, diba tenenyaba deice aryuk teleb kilisulule. Aning atonun, Nuh diba tenebuka deice arye, Nuh babye doprobukba, Allah arye, Nuh biti, diksukumuk kibuka teleb kipdeibuke.
Biyuk ning ara, el diba tenelamuka deice arye, ninye asik nang arye, yuk karin mutuku binuka, tia talak ati, talye baju tenda aik tia dobuka, mapra balamak atonun ulamuk. Allah arye, “Amutuku arepnamkine,” nyabuka nyalilamuk mutuku, Abraham bira, amutuku binuka wekukce, ninye asik nang arye winilamak touk, ulamuka ani, aminyan ara nun apu yapu Isak ap, Yakup ap atonun winilamrik. Allah arye, Abraham ati “Amutuku arepnamkine,” nyabuka nyalilamuk touk, sik bitinye nang babye ati, ayupu atonun nyalilamuk.
Nunce anggunti, ‘Sikda lik uplyeba, pil nirya batakuka, talya-talyauk winipmunyak’ tenen, kanye moubuka unamlulume, nyasinyabe. Aning ara kum bukni, ton nang ara, diba tenena ap, minyuma batakna kum arye, pia pi dobuka, pil dona ap deice arye, pil dopra balamikca ani, aminyan talak, ‘Allah arye nyalilamuk ning dipkoprop dololamak touk, anggun atalak ululum ninye babye, anggun ton dopropnamlulum’ tenen, nyapsine.
Ura, Allah arye el si ap, tabakuka nyabuk ning ara, deiyok ani. Ara, anggun kele. Ninye arye, “Wininamabe,” nyabikce talak ara, yuk nang kekebikirye, ‘Dip do, tilila do?’ tenebikirye, ‘Yupu deice wapdacak’ tenen, yupu sekelongona ati, weik si ap tabakuka nyanyake. ‘Amambul si deice arye nyapsine,’ nyanyake. Weik si ap deice arye nyabikcopura, sik kekece ninye yupu walana kum diparyuk, weik si ap kekekca deice ara, ‘E, aning ara, pia dib nyapmasiyake,’ tenebikirye, diba tenenyake.
Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.
Yata teleb ning do nirya, pia teleb diksukum winina ning nirya ara, Allah elcuk arepsilyeura, im deice arye yangasulule. Ara, im deice dirina ulul ning nirya kwepdeibuknye, Allah elcuk pia teleb ning arisulule. Tonda, Allah elda, keting deiplirye, kanya urasin yuk-yuk kinim-kinim alamle touk, pia kum ulule. Allah el pil dobuka ulul ning nirya ara, pia tuba telebuk ulule.
Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?
Nun Deiyoknye Yesus Kristus, el Li Koprop Allah ati, “Telebe,” nyabuka, el si pia erenamabe. ‘Telebe’ tenen, nun malye winina ati, adiparyuk wenebuka opsutu bukni, bico tenepsukce namin kipsuke. Winipsukce, winiryuk ninye atonun akunum kipdeipsukce, pia kam una deiyok ning akunum arepsuke. Winiryuk ninye kipsuka ara, Yesus Kristus dibuk bukni, kam bukeibuka deice arye, el mapu kilisulule. Winisululbuk, nun kanye talima Allah el deiceuk deibuka, kam pia unamabe. Wininap ning ati, kanye teniltona kum aniryuk, ‘Aning ara, pia dipkoprop unamabe’ tenen, kanye deibuka unyabe.
Aning atouk, anggun akanye yapu babye, anggun kilapu ap, talima tonok dukdongobuka neika unamlulum talak nirya ara, anggun kilapu sik pataplye ning moubuka tenebuka, melinamlume. Tonda, ‘Nun kilapu ara, mikip mitik ning,’ tenepmunce, Allah arye bola koplobuka, kam pia una deiyok ning talye aresilya ara, ‘Nun ap, nun kilapu ap, neika dolonamabe,’ tenenamlume. Winibuka unamluluma deiyok ara, anyapmasin touk dipkoprop ulamunyopura, anggun Allah ati morolulum talak nirya ara, aning-aning nirya arye kum sekdongopsutue.
ကြော်ငြာတွေ