“Tenipdelulume. Narye deipseba, dadeipdanin yangalamik nang, na yala ninye ara, Allah arye sikti, ‘Telebe,’ tenebuka, kanye kum delilul do? Anggun kele, Allah arye nati, “Winipnamsine,” nyabuka, nyalina yupu nyalilamsuk yupu ara, kum bataknamle, pia aunamle. Allah arye, ‘Wininamne,’ tenelamnuk ning nirya ara, tonok ning babye kum bataknamle. Elce tenepnuk ning nirya, dipkoprob na ap, na yala ninye ap ati, winipnamsile. Aning atouk, elce lyepnamnil ning ara, dipkoprob winipnamle. Tonda, na patalamnil ning nirya ara, elce tonok ning babye kum bataklirye, nirya arepnamnile. Nyalilamnuk ning nirya ara, kum bataknamle, aning nirya akunum kintinibuka arepnamnile.” Raja Daud birye nyabuk.
Ibrani 13:20 - Eipomek20 Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule. အခန်းကိုကြည့်ပါ။ |
Ibrani 13:20
53 ပူးပေါင်းရင်းမြစ်များ
Tonda, anyapdeiamuk yupu dem, ‘Tuba aupnamleʼ tenen, kanye tenibuka, Allah arye nun apu koproba Yakub, el dam yayukce, “Min arye yanuka nyapdeipkise yupu ara, dipkoprob nong upnamle,” nyabuka, Ila tamubuka tonap nyabuk. Ara, Yakub birye deiamukba, dadeipdanin yangalamik nang, nun Israel yala nang nirya ati, elce, ayupu nyabuk. “Na yupu moubuka talipmunyeura, teleb kipdeipnamsine,” nyapdeipsuka ati, nunce ayupu pia moubuka tuba-tuba tenenamabe. Elce, ayupu ara pia tuba tenelule.
Aning atonun ton, Yehuda tam ulamik nang ara, Allah arye sik talima pum tam pil dobukba, sik nirya ara, tonok kanye uk bobikce, ‘Dipkoprob Allah Yahweh el tenelirye, nyapsilye ninguk moubuka talibibirye unamabeʼ tenen, kintinibik. Utenebikce, Raja Heskia ap, el amu tam pil don nang ap, sikce nyapmik yupu uk, ara Allah arye nyabuk ninguk moubuka kekebik.
Nyabikopura, Musa birye yangalin makau dikdongopmok ining, taruk arye burubuka, sik nong deice ining purupdonokuk. Winibukopura, nyabuk. “Aining deice arye, Allah el si Yahweh arye, ‘Wininamlulume,’ nyapdeiamsuk yupu ap, elce ‘Anggun melinamsine,’ nyapdeipsuk yupu ap, moupdeipsine. Elce, ‘Anggun melinamsine,’ nyabuka nyalin ati nyapsuk ning ara, talye kum nyaplopsuk bukni, elce, ‘Wininamlulume, aning ara kum wininamlulume,’ nyabuka deipsuk yupu deice arye winilule. Aining deice arye moupdeipsile,” Musa birye nyabuk.
Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.
Allah Yahweh arye nyabuk. “Ninye wenebuka yupu lipsisikuka bokolina deiyok nang arye, diksukumuk winibicopura, winibica ati, na kanye delinune. Bukni, malye winin ning aning-aning nirya ap, ubula dona ap, ton nang arye ton nang ati, yu upliba malye winililana ning nirya ap ati, ‘Aning nirya ara na like,’ tenenune. Na Allah arye ‘Israel ninye ara, ‘Naʼ tenen, ninye unyaka anya arye, pia kum batakanamne’ tenenirye, keting tamun weik tonun arye, imun kanye bobuka ulamik ning pununa ati, narye anggunti, pia teleb un ning dekna arenamsine. Winibuka narye anggunti, ‘Wininamsine,’ nyabuka nyalin yupu nyapnyopura, aning ara pia min kume kum danamle. Dipkoprop nong upnamle.
Allah arye Israel ninye ati wenelamukba, adeice arye sik moubuka tenelamik. Minop talak Musa ap, sik apu yapu ap, neika balamik ning ati teneipre ulamik. Winilamikce nyabik. “Musa birye nun apu yapu nang, Mesir mutuku ulamikba, boyangalamuk Allah ara, wini talak dan unmal do? Nun apu yapu yangalamik talak, Ining bi Laut mekwen noutam bokuka, dana-dana kiprobukba, anoutam bisik menekuka balamukba, sik aminyan yangalamik. Bukni, nun ni Allah ara, wini talak dan mutuku ulul do? Winipmanto ara, domba basam weina deiyoknye birye, el domba basam ati melibuka weilamle touk, nun apu koproba Musa biti melibuka nyalilamuk Allah ara, wini talak dan mutuku ulul do? Tonda, minop talak ulamik Israel ninye, sik noutamak, el Dib Kanye dolkwetelamuk Allah ara, wini talak dan mutuku ulul do? Akunum bataksuk do?” nyabuka asilelamik. Aning nirya ara, sik Israel ninye malye winilamikba, Allah arye sikti, wenelamuk talak ara, sik mining ninye uk asilalelamik.
Tonda, atalak ara, anggun dam narye pia nyalina teleb yupu nyapdeipnamsine. Narye anggunti tuba tonap, pia kum bataknamsine. Anyapdeipnamne yupu ara, pia min kume kum danmanto bukni, pia teleb kilinamsine. Narye, ‘Anggunda tuba tonap bataknikcakʼ tenen, narye anggun kanye tenen ning ap, anggun talima ap, tamubuka teleb kipdeipniba, anggunda na Allah ati ilil upsiliba nati si erenamnulume. Sikda na si pia erenikirye, yuk talak ara na dam arye batakuka, pia pera sukum kum binamake.
Aning nirya winipnamne talak ara, narye ninye deiyoknye Raja tonokuk, ‘Sik aninye nirya taliplirye, yupu nyanamleʼ tenen, na amu tam pil teleb kibuka dolulnye, el si Daud, domba deiyoknye atouk kipnirye, elti wibuka, sik dam deipnyopura, elcuk, ‘Naʼ tenen, nang, Israel yala nang talibuka, Raja kiplirye, yupu nyapnamle. Domba basam weina deiyoknye telebuk ulamle touk, Daud babye, ‘Naʼ tenen, nang, Israel yala nang nirya taliplirye, sik din ning teleb ninguk arepnamle. Areplirye, ‘Adomba telebuk unamakʼ tenen, anang ati, teleb kibuka kalikinamlule. Elti wipdeipyeba, Raja Daud, elcuk, na domba basam atonun nang nirya ara, ninye deiyok kiplirye, teleb kibuka weinamle.
Tonda, na pil donanye Daud el yalanye wibuka deipnebuk, sik nirya talibuka ninye deiyoknye unamle. Winipmanto ara, domba basam weik unyak bukni, sik domba weina deiyoknye tonok ulirye, el domba nirya tonok kibuka deiplirye, teleb ubuka weilamle atonun, Israel ninye ayala-ayala nirya ara, sik deiyoknye tonok dem unamle. Elce Israel ninye nirya talinamle talak ara, sikce teleb un ninguk wininamake. Ara, na Allah arye, ‘Aning ara wininamlume, aning ara kum wininamlulume,’ nyapdeiamse ninguk talibuka unamake. Na yupu nirya moubuka kekenamake.
Na Allah ap, sik Israel ninye nirya ap, ansinibuka telebuk una ati, nyalina yupu tonok ning nyapdeipnamne. Ayupu ara, pia min kume kum danamle yupu anya arye, pia aunamle. Winipnyopura, narye sikti, pia melibuka kaliklamniba, pia telebuk unamake. Nara, sik dam unirye, sikti, melinamna deice arye, sik yupa weik arye, tonap tabakuka upre banamke. Aunamak mutuku noutamuk, na si eren aik dopdeipniba, pia ati asukumuk unamle. Na siuk pia erenamniyake.
Allah el si Yahweh arye, el wipdeiamuk ninye ati nyabuk. “Na Allah arye anggunti, ‘Teleb kilinamsine,’ nyabuka, nyalin yupu deice arye nyalilamsise ning ara, dipkoprob nong upnamle. Ara, anggun malye ulamlum ning nirya, namin kina ati, kam ning obuka arelyanganumunya deice arye, ‘Akunum winipsuke,’ tenenamlume. Ayupu nyalilamsise ning ara, dipkoprob nong upnamle. Ayupu ara, min kum winiptue. Ati, narye, ‘Wininamsine,’ nyabuka, nukamsise ning ara, dipkoprob nong upnamle. Pera mutuku nang arye anggunti, tapu koubuka mek dina ati, lukamik pum bisik mek cemuk pum tam, dolkwetelamsikba, imun kanye bobuka, ulamluma noutamak arye, lobuka lyepdopnamsine.”
“Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.
Anggur mek dinmek talak ara, Yesus arye ayupu nyabuk. “Winipmanto ning ara, amek ara, na ining atonun ulula ati, dobuka diplulume. Amek ara, na ining atonun nyapmasina ara, lak nyapnusine. Ara, Allah min arye nyalilamsuk touk, ninye mutuku-mutuku nirya noutam arye ninye weik arye lyepnirye talinamne. Aning ara, ‘Diba tenepnamniak’ tenen, na opniceura, na ining binamle. Na ining banamla ara, talye ati kume. Ara, ninye mutuku-mutuku nirya, sik malye wininyak ning ap, malye tenenyak ning ap, ati, kum daneipnirye, na ining arye lyepnamna ati, lak bikilina ati aning arepsine,” Yesus arye nyabuk.
Aning winibuk touk, sik din ning dibuka dakalongoyikura, anggur mek makau arye kwebuka dobukce, ayupu nyabuk. “Amek ara, na ining atonun ulule. Na ining deice arye, winiryuk nyalin yupu nyapdeipsine. Bukni, minop talak ara, Allah arye nyalilamsuk ning ara, akunum punuple. Winiryuk nyapdeipsin yupu ara, minop talak nyalin yupu akunum punupmale. Ara anggun ap, ninye mutuku-mutuku nirya ap ati, opnikceura, na ining saklya deice arye, Allah arye sik malye winin ning namin kiplirye, kum danipnamle. Ninye weik lyeplirye, sik kanye talima pia talinamle. Bukni, minop talak nyalilamsuk touk kume. Wini talak Allah nyalisilye yupu yuk ulule. Ara, wini talak babye, aminyan talak babye, na ining deice arye ninye malye winin ning kum danipnamle. Ara, ninye weik lyena yupu ati, winiryuk nyalilye ning nyapne,” Yesus arye nyabuk. (Ara, “Ninye mutuku-mutuku nirya noutamak, kili sal weik, sik malye ulamice ning ap, malye tenelamak ning ap ati, kum daneipnirye na ining arye lyepnamne.” Yesus arye nyabuk.) Nyabukce, ayupu tonap nyabuk.
Nyabukce ayupu ton nyabuk. Na Yesus ara, domba basam weina Deiyoknye atonun, pia telebnye unune. Teleb weina deiyoknye birye, el kam una ati, ‘Na ning,’ kum teneplirye, el domba ati el kanye talima ap, el kam un ning ap arilule. ‘Na domba kalikmanye talak ara, ikin weik kum unulule. ‘Opnikcak’ tenen, kum dukuldalule. ‘Opnicak babye, telebuk,’ tenelule.
Ara, talye kume. Allah arye, ‘Atalakuk wibuka bokdeipnamne,’ tenebukce akunum kintinipdeibuka ati, aminyan talak ninye mutuku sirya im sirya nirya ati, malye unyak ning ap, teleb unyak ning ap, wibuka dipdelirye, “Aning malye, aning telebe,” nyabuka, teleb kibuka yuk-yuk wibuka bokuka deipnamle. Ara Allah arye nyaplibuk, el menopa arye wipdeibuk nang arye, ninye nirya ati, yuk-yuk wibuka bokuka deipnamake. Allah arye, ‘Ninye mutuku-mutuku nirya diba tenepnamak’ tenen, elce wipdeibuknye dipmokbuk, kam bukeibuka deice arye, aning nirya akunum lakak nyapmasile. Paulus arye ayupu nirya abulubuka wekmek nang, Arepagus nang ati, nyabuk.
Yesus Kristus ara akunum dipmok bukni, Allah arye Yesus ati tamubuka kam bukeibuka deice arye laka kipdeipsuke. Ara Allah El Dib Kanye mikip deice arye nyapsuke. “Yesus ara Allah el Mi Kopropa ulule. Allah el malye winina kumce, pia telebuk ulul touk, el mi kopropa Yesus babye, malye un ning tonok babye kum winilirye, pia diksukumuk ulule. Elda pia mikip weik unamle,” nyabuka, laka kibuka ayupu laka nyapsuke. Lakak kibuka deipsuknye bira, yuknye kume. Elda, nun Deiyoknye Yesus Kristus el tonok ulule.
Narye anggunti Allah morosunun ning ara, tonok ning tonap nyapnusine. Ara, ‘Walana ap, olana ap, ikin kanye bona ap nirya kumce, kanye deibuka teleb una ati, deiyok ning arisilya deiyoknye bira, Allah ulula anya arye, el ap, anggun nirya ap, kanye talima dukdongobuka neikauk umunyopura, telebuk unamlum’ tenen, Allah morosunune. Na Paulus arye, anggun Roma mutuku umunye ninye ati nyapsine.
Na nyapmasin touk winilamupa ani, aminyan talak ara, Allah arye Isa Mutuku Dongonye dobuka, sik amu tam deiplirye, wenepnamle. Allah arye olana ap, walana ap, ikin kanye bona ap deiyok ning nirya kum kibuka delisilirye, talye kanye bobuka teleb winina ati deiyok ning arisululnye ulule. Allah arye Isa Mutuku Dongonye dobuka, sik amu tam deiplirye, wenepnamle. Aning ara minopce upnamle. Na Paulus arye anggun Roma mutuku umunye ninye nirya ati, ‘Nun Deiyoknye Yesus bico tenesilirye, el kanye aryuk melisilye ning ara, pia arenamsile’ tenen, narye anggunti Allah morosunune.
Tonda, Yesus dibukba, elti, kam bukdeibuknye Allah, El Dib Kanye arye, anggun talima pum tam usilye ninye ara, aminyan talak anggun dipmunya babye, Allah arye kam bukeipnamsile. Ara, Yesus dibukba, kam bukeibuknye, Allah arye anggun diba tenelulum ninye babye, aminyan talak kam bukeipsilyeba, kam pia unamlume. Anggun kam bukeipnamsila ara, anggun talima pum tam usilinye, Allah El Dib Kanye melipsilya deice arye, kam bukeipnamsile.
Aninguk kum bukni, nunce Allah el winibuk ning ati, “Kristus obikbuk, dibuk bukni, Allah arye kam bukeibuk,” nyabuka peterenyaba anya arye, dipkoprop ara, Allah arye, Kristus ati kum kam bukeiptu toura, nunce Allah winibuk ning ati ara, tilila yupu uk nyanyabe. Nunce, “Dipkoprop Allah arye, Kristus kam bukeibuk,” nyabuka peterenyaba anya arye, aning kum uptuopura, tilila nyan nanguk unyabe. Allah arye, akunum diamik ninye ati, kam kum bukeipnamtuopura, aning deice arye, Kristus babye kam kum bukeibuk, tenetibye.
Ara, Yesus dib teneluluma ati, nun du weit atonun ululum ninyeo, anggun sal babye, kilapu ababye kekepnululume. Narye anggunti, ‘Se, winibuka, winibuka winipting’ tenen, patapnil ning ara nyapsinibuk, anggun kekebuka wininamlulume. Ara, ‘Allah arye nun malye winin ning nirya kum daneipsuturye, pia diksukumuk updeipsilibuk, kanye talima wisipnamsile’ tenen, patasilibuk, unamlulume. Tonda, tonok kanyeuk tenebuka, teleb ubuka neika unamlulume. Walana ap, oldana ap, malye winilana ap kumce, nimalye arye teleb ubuka neika unamlulume. Aning-aning nirya akunum upmunyopura, nun Ni Koprop Allah ap, anggun ap kanye talima dukdongobuka unamlulume. Anggunti bataksilirye, el Allah yuk kum unamle. Allah elda, yuk nang ati bico tenebuka melildana deiyok ning aresulule. Tonda, nun ap, yuk nang ap, kanye talima namin ubuka teleb ubuka neika una ati, deiyok ning aresulule. ‘El ap, anggun ap neika unamlum’ tenen, Allah morosunune.
Telebe, na kayapu. Na Paulus ap, sik yuk nang diba tenyamikce, na ap neika ubirye, nun du weit atonun unyap ninye arye, anggunti asurat sekeipsiyabe. Anggunda, nun du weit atonun ululum ninye, anggun Galatia mutuku tam diba tenelulum ninye ati, asurat sekeipsiyabe. Nun nirya arye anggunti, “Telebe,” nyapsiyabe. Na Paulus ara, Allah el yupu dobuka peterelbana ati, deiyok kouna deiyoknye, Rasulnye unune. Talye nang arye sik kanye aryuk, ‘Peterepre banamle’ tenen, kum wipdeibnike. Tonda, talye nang aryuk, ‘Elda pil donamle’ tenen, kum dopdeipnike. Aning kum bukni, nun Deiyoknye Yesus Kristus ap, Yesus dibukba, elti, kam bukeibuknye, nun Ni kopropa Allah ap, sik bitinye aryuk wibuka dopdeipnirik ati, apiluk donune.
Allah el mikip weika arye, melibuka arisilye ning ara, yuk mikip kume. Ara, Allah el mikip deice arye, Yesus kam bukeibuk. Amikip deice aryuk nun ton arisilirye, melisulule. Yesus Kristus dibukopura, Allah el mikip deice aryuk Yesus kam bukdeibukce, ‘Weik Deiyoknye unamle’ tenen, Allah el sirik taruk tam im deice bobinuka deibukba, bukuk. Yesus ara, Allah el sirik taruk tam bukukce ulule.
Tonda, narye peterelamsibuk, diba tenebuka doproplum ning ap, na nyapdeiamsise yupu ap, narye teleb winilamsibuk elilamlum ning ap, anirya tenebuka dobolbanauk wininamlulume. Anyapmasin touk, diksukumuk winilamunyopura, kanye bon ning arisilya Deiyoknye, Allah ap, anggun neika dukdongobuka unamlume.
Kristus arye winiryuk ninye atonun kibuka, teleb kipdeipsuk ning ara, laka nyapnusine. Ara, yuk nang arye, “Kristus dibukura, Allah el weik mikip deice arye kam bukeibuk,” nyabuka peterepsikura, kekeplumce, ‘Allah ara, el mikip weik’ tenen, diba teneluluma deice arye, akunum teleb kipdeipsuke. Winipsuka ara, winipmanto ning ton nyapnusine. Ara, minop talak anggun ap, Yesus ap, diptum ak, tuku pum bisik neika weipmasitinge. Amenyan ara, anggun ap, Kristus ap, Allah arye tamubuka neika kam bukeipsutue atonun ati nyapsine. Anggun malye ning kum kipdeipsukce, winiryuk ninye atonun kibuka teleb kipdeipsuk talak ara, diba teneplum ak, mek dongopsik talak arye winipsuke. Nun ap, Yesus ap, neika dibupubuk, neika kam bukeipsuk ara, mek dongopsik talak arye winipsuke.
Tonda, ‘Allah arye el Mi Koprop Yesus dibukce, kam bukeibuknye birye, im deice arye dolyanamsil’ tenen, pia kanye deiplumce, kintinibuka dinauk ululum ning ara, aning ton laka nyaninyake. Ara, Allah arye, malye winilamice nang ap, malye winin ning nirya ap ati, weik arye weneplirye, oplopnamle talak noutamak ara, Yesus arye lyebuka loplopnamsile.
Ninye oldana ap, walana ap kum aniryuk, kanye deibuka nimalye arye teleb ubuka neika una ati ara, nun ni Allah, el pil dosilya deice aryuk unyabe. Allah, elce anggunti, ‘Nauk talinamniak’ tenen, anggun nong ap, anggun kanye talima ap, anggun winin ning nirya ap, ‘Pia teleb ulinamsile’ tenen, Allah morosunune. Aning pia winibuka daulamsilye bukni, nun Deiyoknye Yesus Kristus tukwak tamubuka yanamle talak ara, anggun sambala ap, anggun kanye talima ap, anggun nong nirya ap ara, ‘Malye ning tonok ning babye, kum upsiliba, pia diksukumuk wininamak’ tenen, Allah morosunune.
Ara, Allah ara ikin una ap, oldana ap, kum arye, pia telebuk ubuka, kanye deibuka una deiyoknye, elce anggunti, atalak-atalak nirya ap, anggun winin ning noutam nirya ap, ‘Kanye deibuka teleb una deiyok ning pia arenamsil’ tenen, Allah morosunune. Tonda, ‘Allah arye, anggun melipsilibuk, el ap, kanye talima dukdongobuka neika unamak’ tenen, Allah morosenyabe.
Aning ati ara, tenepce nyana kum bukni, pia diksukumuk ubuka, nun kanye talima noutam, teniltona kum diparyuk, weik arye diba tenebibirye, ‘Allah ap talima dukdongobuka unamap’ tenen, elti, tenenauk unamabe. Tonda, sik minop talak Allah arena deiyok nang arye, malye winin ning kilina ati, ining dobuka likuka delilamik touk, nunce Allah talibuka, el amu tam unyaba, elce, nun kanye talima noutamak ‘Se, nunda malyeuka,’ tenenyap ning kilibuka, diksukumuk kipdeipnamsile. Winisulula ati, el ap neika talima dukdongobuka unamabe. Tonda, sik minop talak Allah arena deiyok nang arye, pil dopnuyik talak, sik nong nirya teleb kibuka mek liklamik touk, nun babye atonun, Allah arye nun kanye talima noutamak, malye ning usilye ning nirya kilipsilirye, teleb kipdeipsilyopura, el dam wekelbinamabe. Wini talak ara, el ap talima dukdongobuka unamabe.
Musa sekamuk yupu yanilamik nang oltakalamik ning ara, mitik ikin uamuk bukni, Allah el Mi Kopropa ati, yaniltanyak ninye ati, Allah arye wenebuka onamle ning ara, ikin weik kum unamle do? Kume, na kayapo, anggun ton teneipdelulume. Allah arye, “Wininamsine,” nyabuka, nyalilamsuk yupu deice, diksukum ulisilye ning, ‘Nong unamle’ tenen, Yesus el ining arepsukba, biyuke. Aning ara, weik mambul bukni, sik malye nang arye, ‘Kume, aining ara, talye ninguk ulule. Malye ning uka,’ tenenyak ninye ara, Allah arye aninye ati, weik arye weneplirye, kum onamle do? Tonda, Allah El Dib Kanye arye, bico tenesilirye, el kanye aryuk melisilye Dib Kanye ati, el nong deice malye yupu nyabuka, lyek-lyek alamak ninye ara, weik arye wenebuka kum onamle do? Kume, weika arye opliba, aninye ara ikin weik unamake.
Aining ap, mek ap tabakuka, aninye sik nong deice arye ining luptingca dobuka pakalilamuk talak ara, ayupu ton nyapra balamuk. “Allah arye anggun nirya ati nyalin yupu nyalisulule. ‘Wininamlulume, winipmunba, narye wininamsine,’ nyabuka nyalinmasil yupu ara, ‘Atalak aniryuk talibuka dobolbanamak’ tenen, arepmasilba, deiyok koupnuyaba ati, aining ara, likeipra banmasina,” nyabuk. Musa arye ayupu nyabukabukce, ining luptingca dobuka pakalilamuk.
Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.
Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.
ကြော်ငြာတွေ