Tonda Asyur mutuku ninye deiyoknye birye, yin talina deiyoknye biti nyalinmoba, nyapdeipmasil yupu nirya ara, Allah el si Yahweh arye, kekenmal do, kum do? Allah ara kam pia ulamlanye ulul bukni, Asyur mutuku weik deiyoknye birye, Allah elti, pia malye yupu nyabuka nalinmoke. Aning ara, Allah akunum kekepmalce bikmal do? Na kanye ara, ance el si erebuka el piluk dolyam Allah arye, amalye yupu kekeptopura, ‘Dipkoprop Asyur mutuku talibuka deiyoknye biti wenepnamlarya,’ tenepne. Na walwal bukni, Allah elda kele. Ati ara, ‘Allah el si Yahweh arye, wenen ning el nong deice deipnamimile. Tonda anye birye, bisibuka opsilyopura, Allah ati moronamsulum’ tenen, nyapkine. Tonda, opsiliba, mitik anun tuba kam unamak nang ati, ‘Allah arye, anang meliptue’ tenen, Nun ni Allah ati moropnamsulume. “Nun ni koproba Hizkia birye ayupu nyapdeipmalba, nunce nyapkiyabe,” nyabik.
Ibrani 12:22 - Eipomek22 Ura, na kayapo. Sik minop talak ulamik Israel ninye, asing eipmanto ning dam yangalamik bukni, anggun wini talak ululum ninye ara, pia yuk nang dam yanmalume. Anggunda, Sion mutuku, Pia Kam Una Deiyoknye Allah, el ulul mutuku, im deice Yerusalem asik dam yanganmalume. Anggunda, weik yupa weik kum nukmanto, im deice pil don nang teleb kanye deibuka, malaikat beribu-ribuan bulubuka, weklamak dam yanganmalume. အခန်းကိုကြည့်ပါ။ |
Ibrani 12:22
49 ပူးပေါင်းရင်းမြစ်များ
Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.
Nun ni Allah Yahweh bira, aning-aning nirya talibuka, deice tam ulirye, Pia Mikip Weiknye ulul ati ara, nun nirya arye el tibuk, ‘Se, anda pia telebuk ulyame,’ nyabuka, el siuk pia erenamabe. Ara, Allah el kanye delilul weik asik noutam ara, Yerusalem mutuku noutam arye, el siuk erenamabe. Anyasik ara, Allah arye, ‘Na mutuku’ tenen, wipdeiamuk mutuku dup, wini talak babye, tuba abuke. Amutuku ara, pia teleb, Lekuk ulule.
Anggun weik mutuku kon deice ululum nang ara, yata deiyok ati, Sion mutuku eiplumce, ‘Se, yata ati, Allah arye nun mutuku kum weibuk do?’ teneplumce, malye kanye boplum do? Ara, sikda, Allah el si Yahweh arye, ‘Sion mutuku noutam ara, amutuku akunum kanye deipmana ati, nara amutuku noutam pia-pia aunamne,’ tenebukce, akunum wibuka ati, nun like,’ teneplum do?
Anggun Sion mutuku ululum nango, kanye lopsiliba, weik yupu ara, weika arye nyapmunce, Allah si eren mot senamlume. Wininamluma ara, talye ati kum bukni, deiyok ara, Israel nang anggun ni koproba Allah, malye winin ning tonok babye kum winilirye, Pia Diksukum Leknye ulule. Tonda, elda pia weik si erenanye, anggun kan-kan ulamlibuk, anggun ap neika ansinibuka unamlume.
Aning ati ara, sik Pilistin mutuku nang arye, dobuka deibikceba, nun dam yupu asilyanganamsiak nang yakirye, asipdesikceura, anang ati, yata yupu nyapnalum do? Kume, na nabi Yesaya birye, na kanye ara, ani. Sik adopdeibikceba, yanganamak nang ati ara, nunce nyapnamabe. “Allah arye elcuk, el tenen nang, sik melina ati, Sion mutuku akunum teleb kibuka tamupdeipmale. Ati, Allah Yahweh, el mapu ikin deiceuk ulamik nang ati ara, amutuku upceba, kalikinamla ati, talye kanye deibuka, telebuk unamake,” nyabuka, laka nyapnamabe. Nabi Yesaya birye nyabuk.
Aning akunum winiplyeura, atalak ara wala dirina ara, mitik tonun kunuknamle. Aning atonun, keting buppu weik ulye ning ara, mitik tonun ikip upnamle. Ara, talye ati kume. Deiyok ara, Allah Yahweh, aning-aning nirya talibuka, deice tam erebuka, mikip weiknye birye, im deice yin talin malaikat nirya talilule. Elcuk aning-aning nirya deice tam ulirye, aning nirya talibuka Raja kipnamle. Elce Raja kibuka, Yerusalem mutuku noutam bukni, Sion mutuku kon unamle. Tonda, Allah Yahweh arye, el pia teleb ulye ning ap, mikip weik pil dolul ning ap, el dirina ap, ‘Ninye nirya eipnamakeʼ tenen, laka kipdeiplyeura, sik Yerusalem mutuku noutam unyak deiyok-deiyok nang nirya arye eipnamake.
Atalak ara, weik lelim nyalamle ning, el si terompet, lelim weik tonun pong-pong nyaplirye, yukupliba, sik Israel nang, minop talak Asyur mutuku noutam bobinamikba, daulamika ani, sik bisik wangamuk nang ap, tonda Israel mutuku noutam, Allah arye sik apu yapu malye ulamik ning ati, inibuka donokamukba, bindomikce, Mesir mutuku noutam binuka ulamik nang ap, sik anang nirya ara, terompet lelim kekepnamake. Kekebikirye, adiparyuk tuba tonap tamubuka, Yerusalem mutuku weik asikuk yakirye, pia teleb lek aikuk, Yerusalem mutuku deice tamubuka yakirye, sik ni koproba Allah Yahweh, el siuk yanuka erenamake.
Ati, na Allah Yahweh, aning-aning deice tam unirye, Weik Erena Deiyoknye ununa anya arye, narye, ‘Winipnamne,’ tenenye touk wininune. Narye dipkoprob nyapsine. Narye weik mambul keil tonok Sion mutuku noutam deipne. Akeil ara dipkoprob pia mikip keil deipne. Tonda akeil ara, dekna weik keil deipniba, pia darabuka buknamla ati, yata ninye do nirya, akeil ati diba tenebice ninye ara, alye pia kum dakdanamake.
Ati ara, nun babye winibuka melisilyame. Minop talak weik mambul pil dolamlum touk, wini talak babye, melibuka lyepdopnamsilyame. Ara, an mapu koproba ara, yu nang arye yanuka, obuka sirya daksikce, sik pera mutuku bobinamsikce, ikin ning nun nong deice deiamsik bukni, Allah Yahweh ancuk, akunum lyepdomsulum nang nirya ara, tamubuka Sion mutuku yanamabe. Ara, ‘Pia telebuk unamap,’ tenebikirye, Yerusalem mutuku tamubuka yanamake! Tonda, tamubuka yanamak talak ara, sik asok deice, lang-lang nyapliba, kanye deibuka, weik yupu arye kanye deilin mot nyabikirye, sik adiparyuk tamubuka, Yerusalem mutuku yanamake. Tonda, sik anang ara, tia talak ati kum bukni, pia ati, kanye weik deibikirye, anti si erenamkiyake. Tonda, sik anang ikin-ikin ulamukba, kanye imun weik kanye bobuka ulamik ning nirya ara, akunum kum danamla ati, pin-pin asa tuba si erenamkiyake. Sik Israel nang arye, Allah ati, nyabik.
Na Allah arye, ‘Na yupu arepniba kekeplirye, lak nyalbinamleʼ tenen, an Yesaya biti, na yupu dobuka an si pum akunum dongopkise. Tonda, narye anti, tuba kalikinauk ukunune. Winipmanto ara, na taruk pum tam ulyama anya arye, yata ning do nirya anti kum yanuka opkutue. Na Allah ara, im deice tam uamlye ning nirya babye, akunum bibikuka deiamse. Aning atonun, naryuk tukwak mutuku amu tam barina ati, teleb kipdeipsiba, tuba aupnamle. Wininuna ati ara, narye Sion mutuku unyak nang ati, nyapsine. “Anggunda, na mapu koprop, ‘Naʼ tenen, nang ululume,” nyapsine.
Allah el mikip arye, tukwak mutuku tamubuka yanamle talak ara, Yakub birye deiamukba, dadeipdanin yangalamik nang, el mapu koproba ati nyapnamle. “Na Yerusalem mutuku weik asik noutam tamubuka yanamna ara, ninye Lyena Deiyoknye kipnirye yanamne. Ara, na mapu, anggun nirya malye winimunye ning batakmunce, tamubuka na tam kipnumunye nang lyepnamne ati, yanamne,” nyapnamle. Nara, Allah Yahweh arye, ayupu nyapsina ati, dipkoprob aning nirya nong upnamle!
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.
Ara ani. Dipkoprop, anggunda, na nyapdeipsise yupu moubuka talepmunce, dobolbamunyopura, ninye deiyoknye, Raja Daud birye, amutuku nirya talibuka winilamuk touk, aminyan talak, yuk deiyok nang, Raja-Raja nang ap, tonda sik amu tam pil dona deiyok koubuka talinyak nang ap, Daud bitonun Raja nang ap, tonda, Yehuda yala nang ap, Yerusalem mutuku weik asik noutam unyak nang ap, amutuku bisik bublan wekelyanganamake. Ara, minop talak sik neika, Yerusalem mutuku weik asik domikce, weik keil poka antanap dongobuka domikce, apoka noutam bisik botopdeiamika nirya ara, abisik wekenamake. Tonda, sik Raja-Raja nang ap, sik amu tam pil dona deiyok nang ap arye, sik ninye olbana ati, tuku deice ban ning, el si kereta kuda perang ap, kuda basam ap, aning deice bukikirye, binamake. Tonda, Yerusalem mutuku ara, lo mutuku pia kum upnamle. Ninye pia weik tonun, amutuku yanuka, pia aunamake. Doupnamle talak nirya ara, Yerusalem mutuku noutam ara, ninye pia aunamake.
Tonda, ayupu ton nyabuk. “Na taleamsiseba, ninye mutuku-mutuku nirya ululum nang ati, nyapsine. Nun nirya arye, Daniel birye si erelye Allah uka, el si erebibirye unamabe. Elda Kam Una Deiyoknye, pia tuba ulula ati, pia aunamle. Winiplirye, elcuk talisiliba unamabe. Tonda, Allah arye talipnamsil ning ara, pia kum kum danamle. Deiyok ara, Allah ara, mikip weiknye ulula ati, elda kum kum danamle.”
Atalak ara, el yanuka bukmoka dam arye, weik mek balamle touk, uku dilamuk mek, kutukuka sakukce biyuk. Winibukba, im deice ninye, yupa pia weik, nukmanto kum beribu-beribuan ap, berjuta-jutaan nang ap nirya arye, el tibuk kanye deibikce kinmek. Sik nirya arye, ‘Elce tenebuka nyapsilye touk wininamap’ tenen, el dam kintinibuka kekenmek. Atalakuk, sik im deice unyak ninye, pia kum nukmanto ninye ton, el dam yanuka wekuka, antanap dongopmek diparyuk, tukwak ninye nirya bukni, sik yuk-yuk winilamik ning, sekiamuk buku yanuka deibikce, ‘Ninye yupu bokeipnuyap’ tenen, abuku yanuka yok deibik.”
Allah arye, Hosea biti nyabuk. “Dipkoprop Israel ninye ati, weik arye wenepnamne bukni, doupnin banamak talak ara, narye tuba tamubuka tonap melipniba, Israel ninye yupa pia weik, nukmanto kum upnin banamake. Winipmanto ara, laut mekwen kup-kup, mek wininga delilyangalamle atonun ning, ninye arye nukmanto kum ulamak touk, Israel ninye babye, ninye yupa pia weik upnin banamake. Sik wininamak ning nirya ara, teleb unamle. Winipliba, yuk mutuku ninye arye, ‘Se, Israel ninye ara, mambul weik ninye unyake,’ tenebuka nyanamake. Ati dounamle talak ara, minop talak Allah arye, Israel ninye ati, ‘Anggunda, na mapu kum ululume,’ nyapdeiamuk ning ara, bataklirye, teleb kipdeiplyopura, tonap tuba tamubuka, el mapu koprobauk ukiba, ninye nirya arye, Israel ninye ati, ‘Se, sik Israel yala ninye ara, dipkoprob Allah el mapu kopropa unyake. Wininyakba, Allah ara, Pia Kam Ululnye birye, Israel ninye talilule,’ nyanamsiake.
Bukni, atalak noutam ara, yatanye do nirya, Allah Yahweh el tibuk si erelirye, ‘Naio, na melibuka lyepnilyame,’ nyabukam morolulnye bira, Allah aryuk aninye nirya lyepnamle. Ara, urdem ati, kum nyapsine. Deiyok ara, minop talak arye, Allah Yahweh elce nyabuk touk, Sion mutuku ap, Yerusalem mutuku noutam ap ara, ton ninye lyepnamle. Kam tuba unamak ninye ara, Allah Yahweh elce wipdeiamuk ninye ati, nyapliba, kekebice ninyeuk, kam unamake. Yuk ninye ara, Allah arye oplopliba, dibikirye, sirya daknamake. Allah arye nyapdeibukba, nabi Yoel birye sekuk.
Tonda, anggunce, “Tukwak mutuku im sirya, mutuku sirya nirya si deice arye nyapsine,” nyamunye ning ara, batakanamlulume. Tukwak mutuku im sirya, mutuku sirya nirya ara, Allah elce talilula anya arye, el yan deice didik selula atonun ulule. Ati ayupu nyana meme. Tonda, “Kota Yerusalem mutuku si deice arye nyapsine,” nyamunye ning ara, batakanamlulume. Ara, ‘Nun weik ninye deiyoknye, nun ni Allah arye, ‘Yerusalem mutuku unamne,’ tenen, wibuka deiyamuk mutuku ulula ati, nyana meme.
Allah tenyamuk touk, talye buru tam unyak ninye yupa pia weik lyeplyopura, aminyan talak sik Israel yala ninye nirya lyepnamle. Allah yupu noutamak ara, nabi Yesaya birye sekamuk touk winipnamle. Ayupu ara ani. ‘Ninye Lyena Deiyoknye bira, Sion mutuku noutamak arye yanamle. Yalyopura, Yakup birye deibukba, dadeipdanin yangalamik Israel yala ninye arye, Allah ati, ‘Nun like,’ tenebuka malye ulamikce ning nirya ara, kum kipdeipnamle.
Aning atonun, nabi Hosea birye ayupu ton sekamuk. ‘Allah arye nyabuk. Anyapnusin ning ara, dipkoprop nong upnamle. Ton nang arye, yuk mutuku ninye ati, “Anggunda, Allah el mapu kopropa kum ululume,” nyalamik ninye ara, aminyan talak amutuku ninye ati, “Wini talak anggunda, kam una Deiyoknye Allah, el mapu kopropa ululume,” nyanamake.’ (Hosea 1:10)
Bukni, nunce Yesus ati diba tenenyap ninye ara, aning atonun kum unyabe. Ara talye ati kum nyapsine. Deiyok ara, Allah arye im deice Yerusalem kintinipdeibuk ning ara, nun nin bitonun usulule. Ara domon yupu atonun ati nyapsine. Im deice unyak Yerusalem mutuku ninye ara, yuk talye nang amu tam bukuka kum unyake. Sik kanye aryuk unyake. Ikin ning amu tam kum unyake. Nun babye, aning atonun unyaba anya arye, im deice Yerusalem ara, nun nin bitonun usulule.
Kristus deice arye, Allah ap, neika unyaba ati ara, minop talak anggun Yahudi yala kum ninye ara, yuk mutuku ninye asik nang atonun, pia bai tam ninye atonun ulamlum bukni, wini talak ara, kume. Wini talak ara, anggunda Allah arye, ‘Anang ara, na mapu koprop’ tenen, talisulul ninye nirya ara, ansinibuka, tonok mutuku nang atonun kipdeipsukba, neiktoto unyabe. Anggunda, dipkoprop Allah el yala nang, el mapu koprop ululume.
Allah arye, Sinai mutuku dup yayukce, Seir mutuku deice keting sinarya kutukuka, pata tikilamle atonun yayukba, sik eibikba, sikti yanuka melibuk. Tonda, elda Paran mutuku dup, dirin weik arebukba eibik. Allah el yayuk talak ara, Allah el im deici pil don nang malaikat ara, yupa sepuluh ribu (10.000) malaikat nang ap, weik nukmanto kum arye, neika yayikce, el sirik taruk tam ara, uku buk paklamle atonun, ubukba eibik.
Aning ara, talye ati kum nyabape. Deiyok ara, yata nang do, yata kam unyak ning yala-yala nirya do? Allah Kam Una Deiyoknye birye, weik uku buk kan-kan noutam arye, el yupu nyapliba, ninye kekebikirye, kam upting do? Kum, ati, nun babye, ‘El yupu ton nyapliba, kekebipyopura, nun ton adiparyuk dibibyakʼ tenen, ilil upmasila ati, nyapkiyabe.
Sikda wininyak bukni, nunuk aning ara, nun mutuku kopropa ara, im deice tamuka. Nun yala ara, im deice nang kipdeipsuke. Tonda, nunce, nun Ninye Lyena Deiyoknye bira, ‘Dan talak im deice dolyanamsil do?’ tenen, elti, kanye deibuka, pia kalekuka dinauk unyabe. Dolyanamsilnye bira, yuknye kume. Ara, nun Ninye Lyena Deiyoknye, el uka. Ada, nun Weik Ninye Deiyoknye, Yesus Kristus el uka.
Anyapmap mutuku-amutuku nang nirya arye, akunum kel bikamika anya arye, sikce laka nyanyake. Ara, nunce anggun dam yapubuk, kanye deibuka yukulamsulum ning ap, Allah yupu kekebuka dololamlum ning ap laka nyanyake. Sikce laka nyasinyak yupu ara, ani. Ara, “Sik Tesalonika ninye arye, ‘Allah el ara, pia dipkoprop Kam Unanye, el tonoka’ tenen, diba tenebikirye, ‘Eluk talibuka, el piluk donamape’ tenen, sik mem ning isa si erebuka, talyamik ning nirya ara, akunum batakik.” Yuk nang arye nyabuka laka nyaninyake.
Atalak arye melipnuk touk, aminyan yanamle talak noutam nirya ara, malye ninye arye nati, ‘Paulus optibye,’ tenepniting bukni, na kele, nun Deiyoknye Yesus arye lyepnamnile. Winibuka ulamnilya ani, aminyan talak ara, elce aning-aning nirya talibuka, weik deiyoknye unamlak ara, teleb ubuka dopdopnilirye, im deice bobinamnile. ‘Ninye mutuku-mutuku nirya arye, el Yesus ati, el si erebuka el si pia erenamak’ tenen, patanulule. Anyapman touk, ‘Winipting’ tenen, “Amin,” nyapne.
Abraham arye utenebuka dinauk ulamuk. ‘Kume, aminyan talak, na pia unamne mutuku ara, Allah elcuk dopnamle. Allah arye, ‘Winibuka dopnamne,’ teneplirye, aik dona deiyoknye ulule. Aweik aik aruma noutamak ara, tuku palibuka apum noutamak keil deibikirye, anyaik ayukumna yo akeil deice ikuka deibikirye, anyaik nirya dobikiba, pia aunamle. Anyaik ara, tia aik kume. Allah arye dolul aik nirya ara, pia aunamle.’ Abraham arye utenebuka dinauk ulamuk.
Bukni, aning ara pia kum winilamikbuk, ‘Nunda pia teleb mutuku, im deice mutuku binuka unamap’ tenen, weika arye patalamukba, kintinibuka dinauk ulamik. Aning ati ara, Allah arye aninye ati, pia teleb weik asik akunum kintinibuka ati, alye una kum diparyuk, “Aninye ara, na mapu kopropa unyake. Nara, sik Ni Kopropa Allah unune,” nyalule.
Aning ara, talye ati kum nyapsine. Deiyok ara, tukwak mutuku im sirya, mutuku sirya nirya noutamak ara, nun aik pia unamsilak kum ulule. Aning kum bukni, ‘Nun pia unamap aik ara, aminyan talak yanamsil’ tenen, kintinibuka dinauk unyabe. Ati Yesus atibuk diba tenebibirye, eluk talibibirye, yuk ninye arye lyek-lyek nyabuka, ikin ning nun nong deice deipsica babye, ‘Aning ara telebe uka,’ tenebibirye unamabe.
Anyapmasin yupu aubuka anya arye, na weitcapu atonun ninyeo, anggun babye, anggun bidamang ati, pia moubuka kalekelanamlulume. Ara, ‘Nun kan-kan tonoknye do, tonok kil do, sik kanye talima noutamak ara, malye winin ning weik upliba, diba kum tenekirye, Pia Kam Una Deiyoknye Allah ati, urasin tamubuka yukak bicak’ tenen, moubuka kalekelanamlulume.
Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.
“Anggun nirya ara, ‘E, nun ni Allah, kam ululnye bira, dipkoprob nun noutamak tiklirye, bobinamsil’ tenen, kel biknamalume. Tonda, ‘Nun omutuku bibyopura, Allah elce melisilya deice aniryuk, amutuku unyak ninye obuka, sirya daknamabe’ tenen, ‘Kel biknalum’ tenen, nyapne. Ara, sik Kanaan mutuku tam unyak ninye, Het nang ap, Hewi nang ap, Feris nang ap, Girgasi nang ap, Amori nang ap, Yebus nang ap nirya ara, Allah melipsilya deice arye, obuka sirya daknamabe. Tonda, Allah melipsilya deice arye, sik ilil weik upliba, bikbik abuka bindopnamake. ‘Aning biknamlum’ tenen, lak nyalin ning laka nyapnusine,” Yosua birye nyabuk.
Henok elda, minop talak ulamuk. Adam arye deibukura, dadeipdanin, balamika ani, tekbarinye Henok deibik. Allah arye atilila yupu nyanyak nang wenepnamla ati, Henok arye nyalilamuk yupu ani. “Adilulume, nun ni Allah ap, Allah arye nyapdeiplibuk el pil im deice donyak nang malaikat ap, yupa pia weik beribu-ribu yanamake.
Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.
Allah El Dib Kanye talipnuka deice arye, amalaikat dobuka bobinukce, weik mutuku dup deipnuk. Weik mutuku dup deipnukba, Allah im deice tam arye dopkwetebukba, koluka yanganmok ara weik asik Yerusalem Winiryuk ning eipse. Anyasik noutamak nirya ara, malye ning tonok babye kum uamuk. Pia telebuk uamukak eipse.
Allah im deice tam noutamak arye, weik asik el si ara, Yerusalem Winiryuk dopkwetebukba, koluka yanganmoka, eipse. Yerusalem Winiryuk asik noutamak ara, malye ning tonok babye kum ulamukce, pia telebuk uamuk asik eipse. Winipmanto ara, ninye arye, ‘Nun tam nang kil dopnul’ tenen, kam kil el nong deice pia urasin teleb baju ap, kwerya ning ap weika arye memebuka dolilamak touk, Yerusalem Winiryuk (Yerusalem Baru nyalamiknye) asik nirya ara, urasin pia telebuk ubukba, eipse.
Aning atonun, abuku noutamak aminyan winipnamle ning ati, lak len yupu ton wilibuka batakikirye, ‘Aning kum nyapnuyap’ tenen, ayupu tonok ning babye batakanyak ninye ati ara, Allah arye aninye ati weik arye wenepnamle. Ara, abuku noutamak laka nyapmakin ning, kam una deiyok yo duk dina ap, Allah el teleb asik el si ara, Yerusalem Winiryuk mutuku una ap, aninye dopdopmanto ning, Allah arye aning ila tamubuka dopropliba, aninye amutuku wekuka pia kum unamake.”
Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle.
Tonok malaikat ton keting yangan tam arye yanmokak, eipse. Amalaikat arye, laka kilin ning talibuka yanmok. Elce bopmok ning ara, Allah arye, ‘Aninye na tenen ninye unamak’ tenen, laka kilin ning dirina bopmok. Amalaikat arye, Allah el mapu pitin kilina deiyok ning talipmokce, sik yuk malaikat dana-danatikmek malaikat ati, weik yupu deice arye ayupu nyabuk. “Tukwak mutuku nirya ap, laut mekwen nirya ap, malye kilina deiyok mikip akunum arepsuk bukni, kabula.”