Allah Yahweh arye, na ninye deiyoknye ati nyabuk. “Anda na sirik tam yanuka bukminba, narye an oldan ninye nirya obuka bisipnirye, aninye nirya dobuka, an yan amu tamuk deipnamkine. An oldan ninye nirya dobuka, an yan amu tam deipkiniba, aninye sik nong deice yanipdongopnalame.” Allah arye nyapdeibuk.
Ibrani 12:2 - Eipomek2 Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk. အခန်းကိုကြည့်ပါ။ |
Ibrani 12:2
78 ပူးပေါင်းရင်းမြစ်များ
Ati ara, na kele. Allah Yahweh ance nati, ‘Anye bira melipniba teleb unamle. Tonda, apil dopnamle, aning ton winipnin banamle,’ tenepnulum ning nirya ara, melipnuluma deice arye, aning nirya dipkoprob nong upnamle. Tonda, aning ton akunum bikamse. Ance nunti, weik tonun bico tenesimince, ‘Winibuka pia teleb kilinamsine,’ nyabuka nyalin yupu deice arye nyasilyam ning nirya ara, pia kum bataklume. Aning nirya, pil donauk ulyame. Weik tonun bico tenesilyam ning ara, pia unamla ati, aning nirya dipkoprob nong upnamle. Ati nun ni Allah morokinyabe. ‘An taruk mikip aryuk kwepdeiamsulum nang nirya ara, tuba tenesimince, pia kum batakasilyame. Melinauk unamsilam’ tenen, morokinyabe na nio.
Allah arye nyapdeibukba, nabi Yesaya birye sekeipsuk. ‘Yuk mutuku nang arye olyanamsiyak talak, nun melibuka lyepnamsiyak’ tenen, Mesir mutuku nang dam morolbanyak nang ara, pia bicoe. Sikce utenenyake. ‘Se, Mesir mutuku yin talin nang ara, yuk ninye olana ati kuda basam deice bukikirye, minopce bikbik abuka bana ati, mikip dobuka banyaka anya arye, sikda weik mambule. Tonda, se, Mesir mutuku yin talin nang pia weik tonun unyake. Sik kuda tuku deice libuka banyak ning ara weik mambule,’ tenenyake. Bukni, winibuka tenenyak nang ara, Allah Yahweh aning-aning nirya talibuka deice tam ulirye, Pia Diksukumuk ulirye Israel ninye melibuka kalikilinye biti, ‘Nun ton melipsilyame,’ nyabuka kum moroninyake. Winibuka unyak ara, walwal arye wininyake, nyapsine. Allah arye nyabuk.
Utenelamuburye, elti, lik ulamsukba, ninye nirya arye lululilamuburye, el dam batakuka yuk sukumuk ulamupu. Anye bira, ikin ning weik el nong deice delilamikba, imun kanye bobuka ulamuk. Ati, ninye arye yuk nang ati, ‘Nun like’ tenen, urasin tamubuka meilolamak touk, tonoknye babye, elti, kum elilamik. Atonun, nun babye elti, ‘Telebnye aulule’ tenen, kanye kum delilamupu. El ti ara, ‘Elda talinye binya arye, dauplye,’ tenelamupu.
Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.
Sik malye-malye wininyak ninye nirya ara, wininamak bukni, na nabi Mika binyuk ara, aning kum wininamne. Nun ni koproba Allah Yahweh, el tibuk, dib tenenuna ati, ‘Elcuk melibuka lyelonamnile’ tenen, el tibuk dib tenebuka kintinip deibuka dinamne. Winipnirye, Allahuk pia moronamne. Moropnyopura, kekeplirye, lyelonamnile.
Ura, Daud birye deibukba, deipdanin yanganyak nang nirya ap, Yerusalem mutuku weik asik noutam unyak nang nirya ap ara, narye sikti, kanye talima namin una deiyok ning arepnamne. Ara, aning arepnyeura, sikce, ‘Seʼ tenen, bico tenebuka, talima lamapdongobuka unamake. Tonda, sikda talima erelana kum aryuk, nemalyap aryuk, na Allah ati, moronuk unamake. Winipnamsina deiyok ara ani. Ara, aminyan talak ara, sik tam nang arye, nati lukuka opnamniake. Aminyan talak ara, sikce lukuka opnikirye, anang nirya arye eipnamniake. Tonda, eipnikirye, ‘Se, bicoeʼ tenen, engepnamake. Nati, engenamniaka ara, sik mi tonok deiamikcak, ami diplyeba, ami ati weik arye engelamak touk, unamake. Tonda, sik anang nirya arye, engenamniaka ara, sik min yuma deiamikce mi tonok, diplyopura, atonok mi ati, engelamak touk, na eipnikirye, atonun weik arye engenamake.
Musa birye, Allah nyapmok touk winibuk. Ara, kat ning el si ara, tembaga dobukabukce, ninye on kwatima urasin atonun puturubuka kintinibukce, cang yo deice deibukopura, yata ninye do nirya, kwatima akunum si topmekak bukni, Musa birye tembaga dobuka, puturubuka deibuk kwatima urasin atonun ning, dinmek nang nirya ara, adiparyuk kum dibik, kam ulamik.
Yesus arye anyapmok yupu moupdeibukce, el nong deice ikin ning deipnamik ning ap, kanye imun ning upnamuk ning ap, el mapu 12 nang ati, deiyok koubuka peterenmokce nyabuk. “Nara, Ninye Mi Koprop Atonunye unune. Narye Yerusalem mutuku binyopura, sik Yahudi yala nang sik deiyok nang ap, Allah arena ati deiyok nang ap, Allah arye, ‘Winamlulume, aning kum wininamlulume,’ nyapdeibukba, Musa arye sekeiyamsuk yupu, mem yupu peterena deiyok nang ap, anang nirya arye nati, ‘Nun like’ tenen, bataknikirye, ikin ning weik na nong deice deipnikirye opnamniyake. Opnikcopura, dipmanyani, weipnikcopura, like winilye sum arye, ila tamubuka Allah arye kam bukeinamnile,” nyabuk.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
Moronmok talak ara, ayupu nyanmok. “Naio, aning-aning nirya anda kanamuk ulyamnye binya arye, na opnamaniyak talak ikin upnilibuk, donmanya dipnaman ara, ‘Ance lyepnutum’ tenen, moronmakine. Bukni, na patanmanil ati tenenman ninguk kume. An min arye tenelamnuluma atouk winipmilyame,” Yesus arye nyabuka moronmok.
Ubula dolamrik nang dana-dana tam deipmekak deice arye, Allah el yupu laka nyalamuknye nabi Yesaya sekamuk yupu, domon yupu deice Mesiasnye biti nyabuk ning ara, nong dipkoprop akunum ubuk. Nabi Yesaya arye Mesiasnye biti nyamuk yupu ara, ani. ‘Anye ap, ninye yupu yaniltan nang ap, ansinibuka deibike,’ Yesaya arye nyabuk. (Yesaya 53:12)
“Sikce, ‘Elia minopce yanamlirye, aning-aning nirya lipsisikuka kintinibuka delinamle,’ nyanyaka ara, dib nyanyake. Na dipkoprop nyapsine. Wini talak ara, Elia ulamuka atonunye Yohanes Pembaptis akunum yayuke. Allah yupu laka nyalamik nang arye, ‘Allah yupu deice sekamik touk, ninye arye anye biti, winiptibye’ tenen, patalamuk ning, akunum winibik. Aning touk, ‘Ninye Mi Koprop Atonunye ikin ning el nong deice deibikibuk donmalebuk, bataknamake,’ nyabuka sekamik ning, deiyok tenipmalum do?” Yesus arye nyabuk.
‘Winipnamne,’ nyapmasina ara, talye ati kum nyapsine. Deiyok ara, na ni koprop Allah arye utenelule. Ara, Allah arye, yata ninye do nirya sikce, ‘Allah el Mi Koprop arye lyepsute’ tenen, na mi ati dib tenebiceura, ‘Dipkoprop pia kam unamake,’ tenelule. ‘Kam pia unamak’ tenen, na Yesus arye sirya talak, aninye nirya ara, kam bukdeipnirye ereipnamne. Yesus arye awekmek ninye nirya ati nyabuk.
Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.
Batakdongobikura, Yesus wipdeiamuk nang Sandeheren nang wekmek ak batakuka yukak biyikopura, utenebik. E sik Sandeheren nang arye, ‘Yesus ap, Yesus el si ap ati, nun like. Ati anang onmabe,’ tenepmasiakce, opmasiaka ati, ‘Allah arye nunti kanye deipmasila ati, opmasiaka babye, telebuka,’ tenebikce kanye deibuka kil-kil asa biyik.
“Weik kel yupu deice arye kum peterenune,” nyapmasina ara, deiyok ton nyapnusine. Ara, dib kum tenebikceura, Allah arye oplopnamle ninye ati ara, “Kristus wanwanun yo deice dipsuka deice arye lyepsuke,” nyabuka peterebibibuk, kekebikirye, ‘Ayupu ara, nong kum ulule. Ayupu ara, walwal arye, lup nang nyalamak touk nyanyake,’ tenepsikirye, akutusinyake. Bukni, nun kele. Diba tenebibibuk, Allah arye, lyesulul ninye ati ara, Kristus el yupu ara, mikip weik ulule. Ayupu kekebuka dib tenebibya deice arye, Allah mikip weik arye pil dosulule.
Sik yuk-yuk winibuka unyak bukni, nunda aning atonun kum unyabe. Nunda, “Kristus wanwanun yo deice arye obikbuk, apil dopsuka deice aryuk lyesulule,” nyabuka peterenyabe. Ayupu uk peterebibyeura, sik Yahudi yala ninye kekebikirye, bisik noutamak keil arye yan dum dukliba balamle touk, nun peterenyap yupu ati, ‘Ayupu ara kume,’ tenebikirye, lik upliba batakanyake. Sik Yahudi yala kum ninye arye, nun yupu kekebikirye, ‘Ayupu ara, pia walwal arye lup nang nyalamak touk nyanyake,’ nyasinyake. ‘Nong kum upnamle’ tenen, lik upliba batakanyake.
Tonda Allah arye, utenyamuk. ‘Na wanwanun yo deice opmaniyaka deice arye, aninye nirya ap, na ap, kanye talima dukdongobuka teleb kipdeipnyopura, Allah ap, aninye nirya ap, ansinibuka teleb ulinamne,’ tenyamsukce, nun pununa ati dibuk. Wanwanun yo deice dibuka deice arye, nun Yahudi yala nang ap, anggun Efesus mutuku ululum Yahudi yala kum nang ap, ‘Nun like,’ tenelalamubu ning deiyok ara, akunum kum kipdeipsuke.
Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.
Tonda dipkoprop na kele, anggun talima noutamak, teleb pil deiyok koubsuknye bira, Allah el uka. Allah arye pia apiluk dopnin balamsilirye, melilamsilya ani, aminyan talak sirya daknamsile. Ara, Yesus Kristus arye ninye yupu bokolina ati, yanamle talak ara, Allah arye anggun talima noutamak teleb pil dosilye ning ara, sirya daknamsile ati nyapsine. Aning nirya ara, na dipkoprop weik kel anya, weik kanye deibuka, anggunti Allah morosunune.
Sikda wininyak bukni, nunuk aning ara, nun mutuku kopropa ara, im deice tamuka. Nun yala ara, im deice nang kipdeipsuke. Tonda, nunce, nun Ninye Lyena Deiyoknye bira, ‘Dan talak im deice dolyanamsil do?’ tenen, elti, kanye deibuka, pia kalekuka dinauk unyabe. Dolyanamsilnye bira, yuknye kume. Ara, nun Ninye Lyena Deiyoknye, el uka. Ada, nun Weik Ninye Deiyoknye, Yesus Kristus el uka.
Winibuka ulamsa ani, wini talak babye, tuba wininune anya arye, Allah arye dekna ning kintinibuka ara, dipkoprop dopropnamne. Ara, Yesus arye ninye mutuku-mutuku nirya ati, yupu bokeipnamsil sum ara, pia diksukum yupu bokolina deiyoknye Allah arye nati, malye ning nirya kilipnilirye, pia diksukumnye kipnamnile. Dekna ning dopropnamne ara, aninguka. Pia teleb updeipnamnil ara, nauk ati kume. Aning kum bukni, yata nang do nirya, ‘Se, nun Deiyoknye Yesus arye, ila tamubuka tonap, tukwak mutuku tamubuka yasutue’ tenen, buku sukubuka, kintinibuka dinauk unyak nang nirya ati, dekni ning arepnamsil ning ara, diksukum kili sal daneipnamsile. Na Paulus arye nyapkine.
Allah el im deice pil don nang malaikat weik aunyakba, Allah arye tonok ning wibuka, asukum nyapnusin yupu nyabuk do? Kume. Allah arye, el Mi Kopropa ati ayupu nyapdeibukba, sik Mazmur noutamak sekamik yupu ara ani. ‘Anda, na sirik taruk tam buklyame. Winipminyeba, malye ninye arye anti, ‘Malye kiptibye’ tenen, an yupu yanikinyak ninye nirya ara, na Allah arye malye kipnirye, an amu tam deipnamne. Winipniba, ninye arye sik yane dikdik sena ati, atika yo deice, yan erebuka delilamak touk, ance amalye nang yanibuka, sik deice tam unamlame.’ (Mazmur 110:1) Allah arye ayupu nirya ara, el Mi Kopropa ati, nyabuka anya arye, el Mi Kopropa ara weik mambule bukni, sik malaikat ara, mitik mambuluk unyake.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Ura, Kristus arye el bidamang nong dobuka, atonok ninguk aribuka deice arye, nun malye winina deiyok ning ati, kum daneipsukce, apil sirya daksuka anya arye, akunuma, diksukum atonun kipdeipsuke. Winipsuka ati, Allah el kanye ara, ‘Yesus ati diba tenenyak ninye ara, diksukum ninyeuk unyake,’ tenesulule. Yesus arye, nunti diksukum kipdeipsuka anya arye, telebuk unamabe. Winipsuka deice arye, el pil sirya daksuka ati, Allah el taruk sirik tam binuka bukuk. Diksukum kipdeipsuk ninye ara, Allah arye nun talima pil melisilya deice arye, malye winin ning kum kipdeipribasilirye, teleb ulisulule.
Atalak noutamak ara, ton talak ara, ninye nirya kekenmek akuk, anggunti, malye yupu nyabuka dopnilibuka lyek-lyek nyalamsike. Ton talak ara, anggun diba tenelamlum ning ati, ikin ning weik anggun nong deice delilamsike. Ton talak ara, sik malye nang arye, yuk nang ati, aning atonun ikin ning ap, malye ning ap, sik nong deice delilamik bukni, anggunce aninye ati, bico tenebuka, sik talima kwa baribuka melilanamlulume. Anang ati, kum batakalanamlulume.
‘Tuba imun ning usiliba, mikip ara, mitang asa ubuka, imun kanye bobibirye, talima bouku sukulamsil talak ara batakipyak’ tenen, ati ara, Yesus winilamuk ning ati, pia tenenauk unamlulume. Diba tenena kum, pia malye winin nang arye, Yesus yanibuka el nong deice ikin ning weik delilamik bukni, Yesus ara, pia batakna kum arye, pi dobuka mikip arye ulamuk.
Yesus arye, winipsuka ati ara, sik Yahudi yala ninye arye, ‘Mem pil dobibya deice arye Allah arye lyepsitue’ tenen, wininyak ninye tam batakuka, yuk tam memeprobibirye, Yesus ati diba tenebibirye, eluk talibuka unamabe. Yahudi yala ninye kan-kan, ton nang arye, ‘Yesus ara, nun like’ tenen, elti, dopnilibuka lyek-lyek abuka, el nong deice ikin ning delilamik touk, nun diba tenenyap ninye ati, diba tenena kum ninye arye ikin ning nun nong deice deipsikirye, malye updeipsica babye, winibuka tenenamabe. ‘Kume, nun deiyoknye Yesus ati, ikin ning el nong deice delilamik touk, nun babye ati, nun nong deice ikin ning delinmasiyak bukni, aning ara telebe uka’ tenen, talye kanye bobuka unamabe.
Ura, na kayapo, arup nyapmasin yupu nirya, deiyok ara nyapnusine. Allah ap, ninye ap dana-dana Ansinilina Deiyoknye, weik mambulnye akunum usulule. Anye bira, Allah el Mi Kopropa Yesus eluk ulule. Aning-aning nirya deice tam, im deice ululnye, Allah el weik deiyoknye bunak sirik tam, Yesus bulbiyuk.
Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.
Ara, Kristus El Dib Kanye arye, nabi nang sik talima noutamak yupu laka nyalamuk. Laka nyalamuk yupu ara, Kristus ikin upnamuk ning ap, ikin ubukura, aminyan sirya talak, weik mambul ning, pia teleb ubuka dirina weik ning upnamuk ning ap ati, yupu laka nyalamuk. Ayupu laka nyalamukbuk, sik nabi-nabi nang arye, ‘Se ayanamle ning yanamle talak ara ani, ayanamle talak noutamak winipnamle ning ara, anye moubuka kel kiptibye,’ tenelamikce, pia piriltaklamik. Piriltaklamik bukni, aning deiyok ara, moubuka kel kum bikmanto ulamik.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.
Allah arye anggunti, bico tenesulula anya arye anggunce, ‘Allah arye, tuba kanye delinamsil’ tenen, elti anggun talima ap, nong ap, arepmunce, el ap, el yupu ap demuk talibuka dobolbanamlulume. Tonda, ‘Dan talak dolyanamsil do?’ tenen, talima kintinibuka dinamlulume. Yesus arye min kum dolyanmasilye talak ara, Allah ati diba tenebuka talipmunce, dobolbanamlulume. Nun malye wininyaba ati, nun deiyoknye Yesus Kristus arye, ‘Bita merekik’ tenen, talye lubaparabuka weneplopbataksutu bukni, bico tenepsukce, nun ap, el ap, neika pia kam unamaba ati, diba dolyanamsile.
Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.
Anye epsirye, mambul kanye bobuka, ‘Si erebuka kipnun’ tenen, el yan dam bisirye, gutam ap, kisok ap, tuku deice dipdongobuka buksirye, pia yupu kum asa bukse. Winibuka buksibuk, anye el sirik taruk arye, na nong deice deibuka talipnukce, ayupu nyapnuke. Ara, ani. Anda ilil una meme. Aning-aning nirya, min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya, akunum kum uplye talak babye, na pia kam unamne anya arye, nara Sirya Dakna Deiyoknye unune.
Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.
Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.
ကြော်ငြာတွေ