Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.
Ibrani 11:6 - Eipomek6 Yata ninye do nirya, ‘Allah el si erebuka, el mapu unamap’ tenen, patalul ninye nirya ara, adiparyuk, ‘Allah dipkoprop ulule’ tenen, minyuma diba tenepnamake. Diba tenebikirye, ‘Allah el si erena ati, pia pi dobuka winilamiceba, ‘Allah arye menenga ning arenamle’ tenen, kanye bokoltona kum diparyuk, diba tenenamake. Aning ati ara, yata ninye do nirya, Allah ati dipkoprop diba kum tenebikcopura, Allah arye sikti, kanye kum delinamle. အခန်းကိုကြည့်ပါ။ |
Ibrani 11:6
47 ပူးပေါင်းရင်းမြစ်များ
Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile.
Tonda, sik winin diparyuk, sikce Allah ati, “Nun dam arye batakuka, yukak binulyame! Nun kam unamap talak nirya ara, Allah ance nunti, ‘Aning wininamlume, aning ara pia kum winanamlume,’ nyapdeipsise yupu moubikmunce, telebuk, unamlume,’ nyapsulum yupu ara, talibuka kum unamabe. Nunda anti pia lik, tenenyabe,” nyabikirye, Allah ati yaninauk unyake.
Nirya daulamika ani, aminyan talak ara, pia teleb mutuku, Kanaan mutuku tam winiryuk biyik talak ara, sikce, ‘Kume, amutuku ara, nun lik,’ tenen, malye weik nyalamik. Deiyok ara, Allah arye, “Narye arepnamsin mutuku, Kanaan mutuku tam ara, pia teleb mutuku ati, amutuku noutam ara, teleb kipdeipsiniba, telebuk unamlume,” nyabuka, nyalin yupu deice nyapdeiamuk ning ara, sik Israel nang arye, diba kum tenelamika ati, “Amutuku ara, nun lik,” nyalamik.
Tonda, na kanye talima nirya arye, an deiceuk deipkinirye, asum-asum nirya, antibuk piribuka enamkine. Aning atonun, ance meliniminba, ‘Ance nyapdeiamsulum yupu moubuka tenepnirye, pia dobolbanamne’ tenen, morokunune. Ara ance, “Aning ara, wininamlulume. Aning ara, pia kum wininamlulume,” nyapdeiamsulum yupu nirya ara, ‘Moubuka dobolbanamne’ tenen, nyapne.
An Allah arye, malye wininyak nang wenepmince, kum kipdeipminyopura, dipkoprob ninguk, wininyak nang arye aning ebicopura, pia kanye deibuka unamake. Ara, anda Allah arye, ‘Aning wininamlume, aning ara, pia kum wininamlume,’ nyapdeipsulum yupu ara, aninguk talibuka, wininyak nang ati nyapne. Winipmanto ara, an Allah arye, sik malye wininyak nang ati, yupa pia weik tonun opminba, sik ining weik tonun, tuku deice sakturye, weik tonun uptopura, an yupu talibuka diksukumuk wininyak nang arye, aning yaniptingba, sik yan nirya ara, ining diamuk uptue.
Bukni, nara pia dipkoprop, na ni Allah, an dam anyuk unamne. Aninguk tenebuka ununa ara, teleb uka. Na kanye talima pum tam arye, akunum tenepse. Ara, Allah Yahweh arye, aning-aning deice tam talibuka ulirye, Weik Erena Deiyoknye ulirye, ‘Wininamne,’ tenelye touk, aning nirya dipkoprob winilulnye bira, ‘El dam anyuk unamne. El diparyuk melibuka lyelonamnile’ tenen, unamne. Na ni Allah, ancuk tuba kalikuka melinilyamnye winiminya ati ara, ance mambul pil dolyam ning nirya ara, yuk ninye, sik kekena ati, laka nyabuka peterelbanamne.
Allah arye yu weik ubuka ara, ani. Ara, sik Israel nang nirya arye, elti, diba kum tenelamike. Sikce, ‘Allah ara, nun patapsilye ning nirya, el mikip deice arye melibuka arepsutue,’ kum tenelamika ati, Allah arye sikti, yu weik ubuk. Tonda, sikce, ‘Kume, Allah arye dipkoprob lyepsutu do, kum do?’ tenen, teninauk ulamikce, diba kum tenelamika ati, Allah arye yu weik ubuk.
Allah arye, ‘Anang ati, ikin ning arepnyopura, sik malye wininyak ning bikikirye, bataknamak,’ tenebuk bukni, Allah arye, imun weik un ning arebuk bukni, sik Israel nang ara, tuba-tuba pia malye weik winipnin balamikce, Allah ati yaninauk winilamik. Allah el mikip deice arye, weik ninye dopmankum pil ap, ninye kum winipmanto pil ap, dolamuk ning ara, diba kum tenelamik.
Malye wininyak ninye arye, yo bok ap, bon ning ap, weika arye dolonyak bukni, aning ara tia talak uk talinamake. Aminyan talak ara, sikce talinyak ning nirya ara, kum danamle. Atalak noutamak ara, sikce sik mining atibuk, ‘Kume nunda bona utotoa talin pia unamabe,’ tenebikirye, tilila ninguk tenelilanyake. Sikce talinyak ning nirya ara, talye-talye urdemuk ulule. Winipmanto ara, teleb yala ninguk, taliplirye balulnye bira, aminyan talak pia teleb ning ton talinamle. Ati ara, yata ninye do nirya, diksukum ninguk talibuka unyak ninye ara, aminyan talak Allah arye, dekne ning weika arye arepliba, pia telebuk unamake. Atalak dopronamak ning ara pia kum kum danamle. Apia unamle.
Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.
Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.
Aning atonun, Efraim yala ninye, sik mutuku deiyokak ara, Samaria ulule. Samaria mutuku talibuka ninye deiyoknye bira, Remalya birye deibuk mi, Pekah ulule. Samaria mutuku ninye ap, Pekah ap ara, mikip mitik tonunuk unyake. Sik mikip weik kum anya arye, anang ati ilil kum unamsulule. Ati, na dipkoprob yupu nyapkine. Kanye bokoltona kum diparyuk, anggunce, ‘Allah elcuk melibuka kalikinamsile’ tenen, pia pi dobuka, diba kum tenepnumumnyopura, teleb kibuka kum unamlume.” Allah arye, nabi Yesaya biti, nyapdeibukba, Yesaya birye, Raja Ahaz biti nyabuk.
Se wini talak ululum Israel nango, anggunce na anyapmasin yupu moubuka kekepnululume. Narye anggunti ara, mek kum ati ninye kum ulamik mutuku atonun ubuka, ikin ninguk deipsisa ati, bataknulum do? Akumopura, anggun ululum mutuku ara, kuna daklamle atonun, dirina ap, kel bikna deiyok ning ap, kum arelamsisa ati, bataknulum do? Aning kum winipsisa ati do? Anggun ti narye, teleb kibuka kalikuka melilamsise. Bukni, anggunce nyanululume. ‘Kume, nunda talyeuk ubirye, nun tenenyap ninguk wininamabe. Allah el amu tam bukuka kum unamabe. El nyasilye yupu ara, pia kum kekenamabe. Tonda el dam ara, tamubuka kum banamabe,’ nyanululume. Aning ara, yata deiyok ati do?
Atalak ara, Allah el si Yahweh arye, Musa biti nyabuk. “Dan talak arye, sik akilisal arye nati, ‘Elda talye nyaltakasulule,’ nyabuka malye yupu nyaninyak do? Tonda, narye ninye winipmanto kum pil weik, sik dam dolamseba elilamik bukni, yata talak arye, nati dib tenepnamniak do?” Allah arye nyabuka asibuk.
Winibukba, sik nirya dibik bukni, Allah arye Musa ap, Harun ap ati wenebukce nyabuk. “Anggunce nati kum diba tenenururume. Ara, narye, ‘Akeil dam yupu deice aryuk, ‘Mek kutukuka panaplyame,’ nyapminba, yanamalule,’ nyapse. Nyapkise bukni, na nyapmakunu yupu anyuk, Musa ance, ‘Yupu diparyuk mek kum arepsutue’ tenen, an kama dobukapmumce, akeil deice debumba, mek kutukuka yanmoe. Winipmauma deice arye, ance nati, diba tenebuka, kum si erepmanilame. Nara, pia malye una kum ninye atonunye kum bukni, pia diksukumnye unune. Na Allah pia dirinanye unirye, pia diksukumuk unye nyapmasunu yupu ara, atonun kum winipmarumce, na mapu Israel ninye sik dam malye winipdeipmarume. Ara, ance yu upkuba, keil depmamu deice arye, Israel ninye arye na mikip unye ning, moubuka kum kel biknike. Aning ati ara, narye, ‘Amutuku arepnamsine,’ nyabuka tenelamsirye, Israel nang ati, nyalilamsise mutuku ara, ance anang melibuka kum weknamdurume,” Allah arye Musa ap, Harun ap ati wenebuk.
Ara, Allah arye anggunti, kanye deipsuka anya arye, urdemuk arepnamsil ning, weik arye im deice kintinibuka akunum deipsuke. Aning ati ara, amalye winin ning nirya winipsicopura, anggunda kanye pia deibuka unamlulume. Amalye winin nang, anggun apu yapu arye, na yupu laka nyalamik nang, sik nabi nang ati, atouk ikin ning sik nong deice delilamika anya arye, wini talak unyak nang babye, anggunda na yupu kekelulum ninye ati, atouk malye winin ning winilinamsiake. Winipnamsiyak bukni, im deice binamlum talak ara, Allah arye menenga ning weik arye arenamsile. Aning ati ara, “Anggun kanye pia deibuka unamlulume,” nyapsine.
Yesus arye nyabuk. Sik talimak malye ning tuba aubuk buk, ‘Ninye eipnamsiyak’ tenen, nong bola deiceuk, teleb unyak nang atonun kum unamlulume. Sik anang ara, Allah si erena ati, din dina kum, si tebuka unyak talak ara, ‘Yuk nang eipsikirye, mambul nang tenepnamsiyak’ tenen, sik asok melmel karikuka engepmanto unyake. Tonda, ‘Yuk nang eipsikirye, se Allah ati din dina kumce, urdemuk unmake, tenenamsiyak’ tenen, potong lelekna ap, mek kekena ap, kum diparyuk, malye-malye ubuka lakak banyake. Anang ara, yuk ninye eibikirye, sikti, ‘Se, sikda mambule,’ tenelamak nang akunum dopromaka anya arye, aminyan talak Allah arye, yuk dekna ning ton, sikti, tabakuka kum arepnamle.
Aninguk tenebuka, kum unamlum bukni, weik mambul ning ara, Allah arye, ‘Wininamake,’ tenen, nyasilye touk, diksukum winina ap lyepsilirye, nun kanye talima talibuka unamsil ning ap, im deice welepnamlum ning ap, aninguk minopce tenepmunce, pia moubuka talipmunyopura, yuk yala ning nirya babye, elce dipkoprob arenamsile.
Yesus arye ayupu nyabukopura, ayupu ton nyabuk. Anggun talimak malye ning tuba aupsukbuk, ‘Ninye eipsikirye, teleb nang tenepnamsiyak’ tenen, nong bola deiceuk teleb unyak nang wininyak touk, anggunda na mapu arye, aning kum wininamlulume. Amalye unyak nang ara, ‘Yuk nang arye eipsiting’ tenen, ninye bulubuka balamak bisik ap, Allah yupu peterena aik kopropa ap, ninye dinak tikikirye, Allah moronyake. Awininyak ning nirya ara, ‘Teleb nang tenepnamsiyak’ tenen, unyaka anya arye, na dipkoprop nyapsine. Sik dekna atonun ning ara, adeice arye akunum dolonyake. Aminyan talak, Allah arye anang ati, yuk ning ton tabakuka kum arenamle. Bukni, na mapu, anggunce Allah moronamlum talak nirya ara, sik anang wininyak touk kum wininamlulume.
Nati, diba tenepniak nang ara, yuk nang arye, ‘Allah el mikip deice aryuk pil donyake, tenepnamak’ tenen, na mikip arepnibuk, ninye kum winipmanto ning wininamak ning ara, ani. Ninye talyamlye isa ara, na si deice aryuk yakuka dolkwetenamake. Tonda, sik kum kel bikamice yupu bukni, Allah El Dib Kanye arye el mikip areplibuk, yuk mutuku yupu deice arye nyanamake.
Wininyak bukni, narye nyapsin yupu ara, yuke. Sikce, ‘Anang optibye,’ tenelamsikce nang ati, bico tenebuka, teleb updeipmunce, ‘Aning tamubuka arenamsiake,’ tenena kum aryuk, talye urdemuk arenamlulume. Aning ati ara, anggun ni Allah im deice ululnye birye, pia malye ninye ap, teleb ubuka melilule, sikce tamubuka, ‘Naio telebe,’ pia kum nyanyak ninye ap nirya ati, bico tenebuka kanye arelul touk, anggun babye, yuk ninye nirya ati, bico tenebuka kanye delinamlulume. Anggunce winipmunyopura, Allah el mapu koprop kipdeipnamsile. Tonda aminyan ara, Allah arye im deice teleb ning weika arye arenamsile.
Tomas arye nyabukba, Yesus arye tamubuka nyabuk. “Diksukum Bisik ara, nauk unune. Tonda, Dib Koprop Yupu Nyananye unune. Tonda, Kam Una Deiyoknye bira, na tonok unune. Yata nang do nirya, na Ni koprop el dam bana ati, na deice aryuk binamake. Yuk bisik ton pia kum ulule. Yata ninye do nirya, na deice kum yaicopura, na ni Allah un dam kum binamake.
Arup ara narye anggunti, ‘Anggun malye ululum ning noutamak aryuk dipnamlume,’ nyapmasine. Tonap ayupu ton nyapsine. Narye anggunti, ‘Na aunune,’ nyabuka, na bidamnye ati laka nyasinye yupu kekepmunce, diba kum tenepnumunyopura, dipkoprop anggun malye ululum ning noutamak aryuk dipnamlume.” Yesus arye Yahudi deiyok nang ati nyabuk.
Aning ati ara, mambul yupu ton nyapsine. Ninye im sirya, mutuku sirya nirya atonun unyake. Anye Yesus ati min kum diba tenebikcopura, yata ubuka, ‘Elce lyepnamsil’ tenen, el si nyabuka moropting do? Kume. Tonda, yuk nang arye, aninye ati, Yesus el si ap, el yupu ap min kum peterebikiba, kum kekebice talak ara, yata wiribuka elti, diba teneptinge do? Tonda, yuk nang arye, el yupu min kum dobuka kum peterepra bice talak ara, Yesus arye ninye lyena ati, el laka teleb yupu ara yata ubuka kekeptinge do?
Yesus Kristus ap talima dukdongobuka neika unyaba noutam ara, Allah eipsilirye, el kanye ara, ‘Den bola mouse ning sekna babye, sekna kum babye, mambule pia kume. Aning babye, aning babye nong kum danamle ning atia,’ tenelule. Allah eipsilirye, kanye delinamsil ning ara, tonok ninguk ulule. Ara ani. Yesus ati diba tenenyaba deice arye, yuk ninye ati, ‘Bico’ tenen, melinauk winibibibuk, Allah eipsilirye, a deiceuk kanye delisulule. Mambul ning ara, anyuka. Yuk ning ton kume.
Tonda, utenyamuk. ‘Kume, Mesir mutuku uamuk ning, dekna pia weik ning nirya taliptinya babye, mitik teleb uptinye bukni, Allah arye ninye lyena ati, dopdeipnamsilnye, Kristus ati diba tenepniba, Mesir mutuku nang arye ikin ning, na nong deice deipnicopura, aning ara weik telebe. ‘Pia teleb ning ara, aninguka,’ tenyamuk. Aning tenyamuka deiyok ara, ‘Allah arye aminyan talak menenga ati, arepnamnil ning dopropnamne,’ tenelamukce, diba tenyamuka ati winilamuk.
Anyapmasin yupu aubuka anya arye, na weitcapu atonun ninyeo, anggun babye, anggun bidamang ati, pia moubuka kalekelanamlulume. Ara, ‘Nun kan-kan tonoknye do, tonok kil do, sik kanye talima noutamak ara, malye winin ning weik upliba, diba kum tenekirye, Pia Kam Una Deiyoknye Allah ati, urasin tamubuka yukak bicak’ tenen, moubuka kalekelanamlulume.
Ura, sik minop talak diba kum tenyamik ninye ara, yuk nang arye, Allah el yupu dobuka peterelamikba, ayupu kekelamik bukni, ayupu ati diba kum tenyamika anya arye, talye amul deiceuk kekeltaklamika ati, nong kum uamuk. Sikce diba kum tenelamika ati, Allah arye dikdik senak teleb mutuku kintinipdeibukak kum wekik. Ati, nun babye atonun, yuk nang arye Allah yupu peterelamsikba, kekelamubu bukni, ‘Sik minop tam ninye diba kum tenyamik touk winibibyak’ tenen, kanye moupnamabe, nyapsine.
Ura, minop talak ara, yuk nang arye, Allah arye el pia teleb lake lelin yupu peterelamikba, sik ayupu kekelamik ninye ara, diba kum tenyamikce, Allah el yupu yanilamika anya arye, Allah arye dikdik sena ati, kintinipdeibukak, teleb mutuku kum weklamik. Sik minop talak diba kum tenyamik ninye kum weklamika ati, yuk nang arye, adikdik senak kintinipsuk ning ara, aminyan talak weknamakca.
Yesus ara, pia kam unamla anya arye, ‘Allah ap talima dukdongobuka unamap’ tenen, Yesus ati diba tenebuka, el deiceuk Allah el dam yanamak ninye nirya ara, Yesus arye pia lyebuka sirya dakasulule. Ninye lyena pil ara, etekdop asa ubuka don pil dosulule. Tonok ning babye kum batakalule. Winisilya deiyok ara, ani. Ara, pia kam ulirye, elti, diba tenenyak ninye ara, ‘Allah arye, elti, diba tenepce ninye melinamle’ tenen, Allah dam bilirye, yupu pia melibuka nyalule. Nun melina ati, Allah ati tuba morosulule.
Ara, Allah arye, ‘Sik diksukumuk unamak’ tenen, el pia teleb nyalin yupu akunum areamsuk ning ati ara, anggunce pia pi dobuka pil donamlum ning ara, laka nyapnusine. Anggunce Allah ati, diba akunum tenyamlum bukni, pia diksukum una ara, tonap tabakanamlulume. Diksukum una ning aupmasilyopura, pung un bisik una ati, weik kel bikna kina deiyok ning ton tabakanamlulume.
Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
Ati ara, an kanye lon pil dopnin yangalyam ning nirya ati ara, Allah el si Yahweh aryuk dekna weik ning arepnamkile. Ayam mapu ara ilil upliba, ‘Nun nin irinamsil’ tenen, el dam yakiba, kil ayam arye el mapu el pol amu tam irilamle touk, anda, ‘Allah arye kalikuka melinamnil’ tenen, amutuku yanmalame. Ara, ‘Israel ninye sik ni koprop Allah, el si Yahweh arye, melibuka kalikinamnile’ tenen, amutuku yanmalama anya arye, ‘Allah arye, dekna weik arye arenamkil’ tenen, nyapkine,” Boas birye nyabuk.
ကြော်ငြာတွေ