Ibrani 11:4 - Eipomek

⁴ Tonda, Allah si erena ati, Kain bira mitik teleb ning dobuka yanuka aribuk bukni, Habel arye aning ati, diba tenebuka deice arye, pia teleb ning bobuka yayukce, Allah ati aribuk. Aribukba, aminyan talak Allah arye, Habel aribuk ning ati, yupu nyabuk talak ara, “Na diba tenepnukce, na si erena ati, arepnuk ning ara pia telebe. Ati, Habel ara diksukumnye akunum deipne,” nyapdeibuk. Allah arye Habel ati, diksukum updeibuk ning ara, Habel diba tenebuka deice arye, winibuk. Tonda, Habel akunum diyamuk bukni, weik arye diba tenelamuka anya arye, ‘Habel birye diba tenyamuk touk, nun babye wininamabe,’ tenen ati, Habel ara, winipmantonye Winisulula ati, el diba tenyamuk ning ara, nun tuba tenebuka kel kinyabe.

Ibrani 11:4 ပူးပေါင်းရင်းမြစ်များ

Kejadian 4:10

Nyabuka pilibukba, Allah el si Yahweh arye, nyabuk. “Se, anda yata winipmamu do? Kekelyame! An weit koproba, el ining tuku deice sakmoa arye, ngalukunmalba kekepne.

Kejadian 4:15

Nyabukba, Allah el si Yahweh arye, Kain biti tamubuka nyabuk. “Kume. Anyapmalam tonun kum winipnamkile. Yatanye do, Kain biti oplinye bira, narye nyapdeipniba, anye biti kwang dakuka opnamake. Ara, tonok talak uk kume, tekbarye nukuka, kwang dakalanamake,” nyabuk. Allah arye nyabukce, ‘Yata ninye do nirya, Kain eibikirye, obicak’ tenen, yupu sekelongona ati, Kain el nong deice ara, pitin kilina ning deibuk.

Kejadian 4:25

Aminyan talak Adam ap, Hawa ap daulamdika ani, Hawa arye sal mi ton deibukce, ‘El si ati Set,’ nyabuka deibuk. Asi nyabuka deiyok ara, ‘Kain arye, na mi Habel opnukba, el pununa ati, Allah arye melipnukba, ami akunum arepmanile,’ tenebukce, el mi si Set nyabuk.

Kejadian 4:8

Nyabuk bukni, aminyan ara, Kain birye, el weit koproba Habel ati, tenepce arye nyabuk. “Weito, an ap nun bai talye binaname,” nyabukba, banmarika ani, bai mutuku noutamak unmarek talak ara, Kain birye, el weit Habel biti, onmoka ani, oplobukba, Habel dibuk.

1 Raja-Raja 18:38

Elia birye nyabuka morobukopura, Allah el si Yahweh arye im deice arye uku dopkwetebukba, sapi sekdoba adeipmok ning ap, yo ap, keil yangapdeimok ap, atuku ap, aning-aning nirya ap, tonda amek adikdeipmok ning babye, yanuka uku dibuka sirya dakukba tonok babye ton pia kum ubuk.

Ayub 8:10

Ati ara, moubuka tenipnamlame. Sik minop talak ulamik nang, nun apu yapu arye, kel weik bikamik nang arye nyalamik yupu nirya ara, moubuka tenipmince, wini talak an babye biknalyame. Ara, sik anang arye, akunum bikamika deice arye, anti peterepnamkiaka ati, ayupu deice arye, adiparyuk moubuka biknamlame.

Amsal 15:8

Allah Yahweh elda, malye winin ninye arye elti, morona ap, ‘Nun malye un ning kilipsilirye, namin kipnamsil’ tenen, teleb ning weik arye arena ap, wininyak ning nirya ara, el kanye deibuka kum dolonamle. Allah arye anang ati yu tenelule. Bukni, ninye ton Allah arye, “Wininamlulume, aning ara pia kum wininamlulume,” nyabuka, nyasilye touk kekebikirye, moubuka wininyak ninye nirya ara, el kanye delilule. Sikce Allah ati, arena ning pia teleb ning kum upmalya babye, sik aninye arye morobice ning ara, Allah kekebuka dopdoplirye, sikti, kanye delilule.

Amsal 21:27

Malye ninguk talibuka ulinye birye, ‘Na malye unun ning, Allah arye kilipnuturye, namin kipnamnil’ tenen, teleb ning boyalirye, Allah ati areplya babye, Allah arye anye biti el kanye pia kum delilule. Aninguk kum bukni, amalye ulinye birye, ‘Aning dobuka Allah ati arepnyopura, Allah arye teleb ning arepnilirye, weika arye melinamnile,’ teneplirye, el kanye talima pum tam ulul ning duknuplirye, atenena deice arye, Allah ati areplyopura, Allah Yahweh arye anye biti kanye pia kum delilule. ‘Anye na like,’ tenelule.

Imamat 9:24

Atalak ara, Allah Yahweh el weik dirina noutam arye, talye karin arye, uku dopkwebukba, uku dongon ning, el si mesba deice deipmok domba ato ning ap, meta ning yala-yala nirya ap ara, uku arye minop dibuka sirya daklobuk. Winibuk talak ara, sik Israel nang nirya eibikce, kanye weik deibikce, ‘Seʼ tenen, Allah Yahweh el si erena ati, sik urasin tam ara, tukwak deice mamikce, Allah ati si erebuka kibik.

Matius 23:35

Wininamluma ati, yata nang do nirya, sik diksukum ulamik bukni, oltakalamik nang nirya ara, Habel anyapce opnin yangalamika ani, wini talak Berakia el mi Zakaria, anggun apu yapu arye, Allah arena ati delilamika dam obiknye ap, anang nirya sik ining ara, anggun wini talak ululum nang, anggun taruk deice upnamsile.

Lukas 11:51

Ara, sik diksukum ulamik bukni, Habel arye obik dipdongobuka opnin yangalamika ani, wini talak Zakaria Allah arena ati delilamak sukum obiknye ap, anang nirya sik ining ara, anggun wini talak ululum nang anggun taruk deice upnamsile. Aolamik nang nirya ati, Allah arye wenepnamsile. Winipnamsila ati na dipkoprop nyapsine. Aoltaklamik nang, sik ining ara, anggun wini talak ululum nang, anggun taruk deice upmasila ati, Allah arye anggun wini talak ululum nang ati wenebuka opnamsile. Yesus arye Farisi nang ati nyabuk.

Titus 1:16

Ato wininyak ninye ara, nyanyake. “Kume, Allah diba tenebuka, kanye dukdongobuka unyabe,” nyabuka, talye nyaltakanyak bukni, sik malye-malye ninguk winiyak deice arye, Allah batakuka yaninyake. Anang ara, Allah el yupu nirya, kekena kum arye yaniplobikibuk, Allah arye sikti, pia lik tenelirye, lik ulule. Yata teleb winin ning do, sik pia kum winiptinge. Malye winin ninguk, tenebuka wininyake. Na Paulus arye sekeibkine.

Ibrani 11:2

Nun apu yapu arye Allah ati, weik arye diba tenenlamikba, Allah arye sikti, kanye deiyamuka deice arye, teleb updeiyamukce, ‘Anang ara, na dokola ninye unamak,’ tenebuke.

Ibrani 12:1

Aning ati ara, na kayapo, sik minop talak ulamikce, diba tenebuka diksukumuk ulamik ninye, wini nyapmasin ninye ara, dana-dana tam nirya, yupa weik aunyakce, nunti dinauk usinyake. Disinyaka ati ara, Allah arye, ‘Winibuka diksukum bisikuk banamak’ tenyamsuk touk, ikin upsilya babye, batakna kum, pia pi dobuka, abisik deiceuk mikip arye banamabe. Sik biklamak nang arye, ‘Ikin upnilyak’ tenen, talye ning nirya batakuka, tonok bisikuk mikip arye bik-bik abuka balamak touk, nun babye atonun, ‘Ikin upsilyak’ tenen, talye winin ning nirya batakibirye, Allah tenepsuk bisikuk binamabe. Aning atonun, weik mambul ning ara, malye ning patasilya deice, kanam asa arye tapu koulongona atonun ulamsil ning nirya batakibirye, Allah tenyamsuk bisikuk binamabe.

Ibrani 12:24

Tonda, Allah danatam, ninye danatam, noutamak ansinilina deiyoknye, Yesus el un dam yanganmalume. Ninye lyena ati, Allah arye, “Winipnamsine,” nyabuka nyalilamsuk yupu, winiryuk ning ara, Yesus ara, ayupu ati ansinilina deiyoknye usulule. ‘Allah ap, ninye tukwak ninye ap, teleb ubuka neika unamak’ tenen, ansinibuka delisulul deiyoknye ara, Yesus uka. Minop talak ulamuknye Habel arye, Allah el si erena ati, kam ning obuka, ining likdeibuk ning ara, mitik telebuk winibuk bukni, Yesus arye nun lyena ati, el ining sakukce biyuk ning ara, pia mambul weik ulule.

Ibrani 5:1

Ura, tukwak unyak ninye bukni, ‘Allah dantam, ninye dan tam ansinilina deiyok talibuka pil donamsiyak’ tenen, ninye kan-kan arye ninye arye wibuka delinyake. Ara, anang arye, ‘Nun ap, Allah ap, teleb ubuka neika una ati, pil melibuka donamsiyak’ tenen, wibuka delinyake. Tonda, anang arye, ninye melina ati, Allah arin ning arinyake. Ara, sikce Allah el si erena ap, si kina ap ati, talye arin ning arinyake. Tonda, ‘Ninye malye un ning, kum daneipsitue’ tenen, kam ning obuka, Allah ati, arinyake.

Ibrani 9:22

Aninguk kum bukni, Musa sekamuk yupu, mem yupu noutamak nyasilye touk, aning-aning nirya, teleb ulina ati, ining luptingca dobukapnarye, donoklamik. Aning atonun, ninye arye malye wininyak ning deibuka, mangkau kina ning ati ara, ining kwebuka luptingca dobukapnarye, donoklamik deice aniryuk teleb winilamik. Yuk talye ning deice arye pia kume.

Yudas 1:11

Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.