Ibrani 11:27 - Eipomek

²⁷ Tonda Musa arye, Allah ati diba tenelamuka deice arye, ‘Mesir mutuku weik ninye deiyoknye Firaun arye derepnilyak’ tenen, ilil asa arye, Mesir mutuku batakuka, yukak biyuk. Talye ninye asing arye kum eipmantonye Allah ati, Musa arye eibuka anya arye, ikin ning weik el nong deice deiyamikba, ikin ulamuka babye, pia kum bataklamuk.

Ibrani 11:27 ပူးပေါင်းရင်းမြစ်များ

Mazmur 16:8

Nara, Allah anti, tuba tenenauk ununa ati ara, na kanye ara, anda na dam tuba tikuka melinilyame. Na dam anyuk unilyama ati, ikin ning, na dam yatua babye, ‘Allah arye meliniliba, teleb aniryuk wininamne’ tenen, kanye delinune. Ton ilil kum unulule.

Keluaran 11:8

Nyabukce, ayupu ton nyabuk. “Allah arye winiplyopura, Firaun an pil dona deiyok nang nirya, na si erena ati, na dam yanuka kekebuka bukikirye, nyanamake. ‘An ap, an yupu kekebuka dobolbakinyak ninye, sik Israel ninye nirya ap, nun mutuku batakuka, adiparyuk bilulume,’ nyapnamake. Winibicopura, nunce anggun batakuka bindopnamabe,” Musa birye Firaun biti nyabukce, yu weik ubukba, adiparyuk Musa birye Firaun dam arye batakuka biyuk.

Keluaran 12:11

Aning dibuka seng apdopmunye talak ara, bisik binamluma ati, anggun baju ongobuka kentinipnamalume. Tonda, anggun yan tatang ongon ning, sendal ap, ongobuka, anggun talelulum kama taruk talibuka kentinipnamalume. Winipmunyopura, domba tup ap, aning nirya ara, ‘Adibaryuk minop binamapʼ tenen, pola dibuka seng apropnamalume. Aning nirya ara, na si Yahweh, na Allah arye nyapdeipsin touk winipnamalume. Ara anggun winiryuk mapu ona kumce, anggun asik kaplibuka binamne ati, aning dipnamalume. Allah arye nyabuk.

Keluaran 12:50

Aning atonun, yata yupu do nirya, na Allah Yahweh arye, Harun ap, Musa ap ati, “Aning ara, wininamlume, aning ara, pia kum wininamlume,” nyapdeiamsise yupu nirya ara, anggun Israel ninye nirya, ayupu pia moubuka kekepmunce, ‘Dibʼ tenen, aninguk talibuka unamlume.

Keluaran 4:19

Ura, Allah el si Yahweh arye, Musa biti aminyan talak ayupu akunum nyalamuk. “Midian mutuku yanuminye talak ara, nyapdeiamkise touk, tamubuka Mesir mutuku binulyame. ‘Musa opnamabe,’ tenelamkik nang nirya ara, akunum dibike,” nyabuk.

Matius 10:22

Nati, diba tenenululumce, na yupu nyalbinamluma ati, ninye nirya arye, anggunti pia lik tenebuka, mal pinamsiyake. Bukni, yatanye do nirya, na batakna kumce, pia tunim abuka ulamlenye obice ning ababye, Allah arye anye lyepnamle.

Matius 24:13

Bukni, yatanye do nirya, na batakna kumce, na ap, ninye yuk nang ap ati, bico tenebikirye, kanye bokoltona kum diparyuk, pia kanye lamapdongobuka ulamice nang ara, yuk nang arye anang ati obica babye, Allah arye aninye lyepnamle.

Markus 13:13

Nati, dib teneluluma ati, yuk dib tenena kum ninye nirya arye, anggunti, ‘Aninye ara, pia nun lik,’ tenebuka, malye yupu nyabuka, anggun nong deice ikin ning weik delinamsiake. Bukni, yatanye do nirya, na batakna kumce, dib tenyamlirye, pia kanye lamabuka ulamlinye bira, malye nang arye obica babye, Allah arye anye biti dipkoprop lyepnamle. Lyeplirye, im deice bobinamle. Yesus arye el mapu winilye nang ati nyabuk.

Markus 4:17

Dolonyak bukni, yala ning yating tukwak teleb ubuka kum banmokbuk, koulubuka atonun, anang ara, Allah yupu moubuka kekena kumce, kum dolonyakce, minopce batakalongonyake. Diba tenebikca ati, yuk nang arye yu uplibuk, ikin ning sik nong deice deibicopura, anang arye minopce batakalongonyake.

Rasul 2:25

Minop talak Daud arye Yesus ati ayupu nyabuka sekiamuk. ‘Na ni Allah na urasin dam pia dinune. Na sirik tam ulula ati, ‘Elce na melipnamnil’ tenen, na ilil una kum ap, kanye bokoltona kum unamne.

1 Korintus 13:7

Yuk ninye ati bico tenebuka melilamikce nang arye, kanye imun ning aupmalye babye, batakana kum aryuk, ‘Nun kayapu ati, kalikinauk unamne’ tenen, pia bico tenebuka melinyake. Sik anang ara, yuk nang arye, sik kayapu nang ati, malye nyanyak yupu ara, kekebikirye, adiparyuk talye kanye bobuka minopce dib kum tenenyake. Tonda, sikce yuk nang ati, ‘Kume, malye upmal bukni, wini talak daupmalibuk, aminyan ara, teleb winipnamlarya’ tenen, dinauk unyake. Kanye imun ning winipmalye talak nirya ara, sikce, ‘Adip aryuk bataknuyabe,’ kum tenenyake. Aning kum bukni, batakana kum pia lamapdongobuka tuba telebuk unyake. Tonda, yuk nang ati bico tenenyak nang ara, sik bidamang tenen ning aupmalya babye, yuk nang ati, tuba bico tenebuka melinauk unyake.

2 Korintus 4:18

‘Aning ara, yata wiribuka arye, teneptibye do?’ tenena kume. Deiyok aupmale. Ara, nun asing arye eibibirye, pia tenenyap ning ara, talye ninye asing arye eiptibye ning kume. Nun pia tenenyap ning ara, ninye asing arye kum eiptibye ning uka. Deiyok ton aupmale. Ara, ninye asing arye dinyap ning nirya ara, dipkoprop tia ninguk ulula anya arye, kum winipnamlarya. Bukni, asing arye kum elinyap ninguk ara, tia talak ning kume. Aning ara, pia aunamla anya arye, kum winipmanto ning winilula ati, aninguk tenenyabe. Na Paulus arye nyapsine.

Kolose 1:15

Allah el ulye touk, el Mi Koprop Yesus babye, pia dipkoprop atouk ulule. Allah ara, ninye asing arye kum eipmantonye ulule. Allah arye aning-aning nirya kintinibuka, deiamuk. Bukni, winipmanto ning ara, ninye arye winiryuk mi deibikceura, ami arye anggun ning nirya talibuka ulamle touk, Allah el Mi Koprop Yesus ara, deiyok kouna deiyoknye pia weik mambulnye ulule. Ulirye, aning-aning nirya talibuka, deice tam ulule.

1 Timotius 1:17

Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.

1 Timotius 6:16

El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

Ibrani 10:32

Bukni, na kayapo, sikce peterepsikba, Allah el yupu kekeplumce, Allah el dirina arepsukba, doproplum talak ara, ila tuba tonap tenenamlume. Malye nang arye, ikin ning weik anggun nong deice delilamsika deice arye, pia winilelamsik bukni, ikin ulamsuka babye, pia batakna kumce talibuka diba tenenauk unamlulume.

Ibrani 11:1

Ura, diba tenena ara, laka nyapnusine. Ara nunda, ‘Allah arye wininamsile’ tenen, kintinibuka dinauk unyap ning nirya ap, tonda asing arye min kum elinyap bukni, ‘Allah arye wininamle,’ tenenyap ning ap ati, nunce Allah ati, diba tenebibya deice arye, kanye bokoltona kum arye, ‘Dipkoprop unamsile’ tenenauk unyabe.

Ibrani 11:13

Ura, anyapmasin ninye nirya ara, pia diba tenenauk ulamik ani, aminyan talak diamik. Allah arye, “Wininamsine, winibuka aning arenamsine,” nyabuka, sikti, nyalilamuk ning ara, min kum areamukba, kum dolamik. Nong kum dolamik bukni, ‘Kume, Allah arye nyalilamsuk ning ara, dipkoprop arenamsile’ tenen, kanye deibuka peratoto arye, kintinibuka dinauk ulamik. Tonda, sikce nyalamik. “Kume, nunda, yuk pera mutuku ninye, asik nang atonun kibuka unyabe. Nunda, tukwak mutuku unyap bukni, asukum ara nun mutuku kopropa kume,” nyalamik.

Ibrani 6:15

Allah arye anyalin yupu nyapdeibukba, Abraham kekebukce, ‘Dip do, tilila do?’ tenena kum bukni, ‘Allah arye nyalilamnuk yupu dan talak arepnamnil do?’ tenen, pia darapdongobuka, nimalye arye dipra daulamuka ani, aminyan talak Allah arye nyalilamuk touk, aning aribukba, Abraham arye doprobuk.

Yakobus 5:11

Anggun kele, ikin ning weik ulamu bukni, sik batakna kum arye, diba tenelamikce, pia pi dobuka, pil dolamik nang ulamik. Winilamika ati, Allah arye sikti, teleb ubuka kipdeiamukbuk, kanye deibuka ulamik. Tonda, nunce, ‘Anang ara, weik mambule, sik pia telebuk ulamik,’ tenenyabe. Anggunda ayupu akunum kekelamlume. Ayub ara, el nong deice ikin ning pia weik ulamu bukni, teniltona kum arye, pia palibuka tunim abuka ulamuk. Daulamukba, Allah arye ila tamubuka aribuk ning ara, akunum kekelamlumce kel biklume. Nun ni Allah ara, pia bico tenepsilirye, nun malye wininyap ning ati optapsitu bukni, lubakipsilirye, nun patapsilye ning nirya ati, talye arisulule.

1 Peterus 1:8

Yesus Kristus ara, minop talak kum elilamlum bukni, elti, kanye arepbuka, anggun kanye talima el deice deililulume. Wini talak babye, el nong kum elilulum bukni, elti, diba tenebuka, eluk talibuka umunyeura, elce anggun talima noutam, kanye deibuka pin-pin kilisulule. Kanye deibuka pin-pin kilisulul ning ara, talye ninye yupu deice arye, nun kum laka nyaptibye.