Ibrani 10:22 - Eipomek22 Aning ati ara, tenepce nyana kum bukni, pia diksukumuk ubuka, nun kanye talima noutam, teniltona kum diparyuk, weik arye diba tenebibirye, ‘Allah ap talima dukdongobuka unamap’ tenen, elti, tenenauk unamabe. Tonda, sik minop talak Allah arena deiyok nang arye, malye winin ning kilina ati, ining dobuka likuka delilamik touk, nunce Allah talibuka, el amu tam unyaba, elce, nun kanye talima noutamak ‘Se, nunda malyeuka,’ tenenyap ning kilibuka, diksukumuk kipdeipnamsile. Winisulula ati, el ap neika talima dukdongobuka unamabe. Tonda, sik minop talak Allah arena deiyok nang arye, pil dopnuyik talak, sik nong nirya teleb kibuka mek liklamik touk, nun babye atonun, Allah arye nun kanye talima noutamak, malye ning usilye ning nirya kilipsilirye, teleb kipdeipsilyopura, el dam wekelbinamabe. Wini talak ara, el ap talima dukdongobuka unamabe. အခန်းကိုကြည့်ပါ။ |
Ibrani 10:22
66 ပူးပေါင်းရင်းမြစ်များ
Atouk ton, Zebulon yala nang ara, yupa pia weik, lima puluh ribu (50.000) yin talin nang ton, Daud tam kibikce, yayik. Ayin nang nirya ara, ninye olban tenen nang nirya ap, ninye ona ati, yin yala-yala nirya ara, ‘Winibuka winiptibye, winibuka winiptibyeʼ tenen, weik kel nang ulamikce, Daud tam kina ati, Hebron mutuku yayik. Anang nirya ara, kanye teniltona pia kum aryuk, ‘Daud elcuk nun weik deiyoknye kibuka, elcuk Raja kibuka talepnamsile,’ tenelamikce yayik.
Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile.
Na Daud birye akunum kele bikamse. Na ni koproba Allah, ninye nirya sik kanye noutamuk deipmince, asilelyame. Tonda, el talima noutam pia teleb ulamlanye bira, diksukum ulamlanye biti, kanye pia delilyame. Ati, narye aning nirya ara, na kanye pia teleb deice aryuk talye arepkine. Tonda wini talak ara, narye an mapu koproba, abulupmak Israel nang babye, akunum eipmane. Ara, asukum yanmakce, aning nirya, sik kanye talima noutam arye, ‘Se, nun ni Allah ara pia telebeʼ tenen, teleb kanye bobuka, pin-pin deice arye, aning boyanuka arepmak nang ara, akunum eipmane.
Nun nirya ara, nun ni koproba Yahweh ati, “Anda pia telebuk ulyame!” nyabuka, elti, si erenamabe. Tonda, na kanye talima noutam nirya arye, Yahweh ati, “Anda pia telebuk ulyame!” nyabuka, el siuk erenamne! Tonda, Allah arye, ‘Aning wininamlume. Aning ara, pia kum wininamlume,’ nyapdeiamsuk yupu, moubuka talikirye, diksukumuk wininyak nang bulunyakak binuka, Allah ati, ‘Telebe,’ nyanamne. Aning atonun, sik Israel yala ninye nirya arye, ‘Allah el dam binuka unamabe’ tenen, bulunyakak ara, narye, Allah ati, “Anda pia telebuk ulyame,” nyabuka, el si erena ati nyanamne.
Tonda, na kanye talima nirya arye, an deiceuk deipkinirye, asum-asum nirya, antibuk piribuka enamkine. Aning atonun, ance meliniminba, ‘Ance nyapdeiamsulum yupu moubuka tenepnirye, pia dobolbanamne’ tenen, morokunune. Ara ance, “Aning ara, wininamlulume. Aning ara, pia kum wininamlulume,” nyapdeiamsulum yupu nirya ara, ‘Moubuka dobolbanamne’ tenen, nyapne.
Na kanye talima nirya ara, an deiceuk deipnirye, na ni Allah Yahweh anti, “Na melipnilyame,” nyabuka morokunune. Diba, na ni Allah Yahweh, anti nyapkine. Nara, dipkoprob ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu uk, talibuka amu tam unirye, kekebuka dobolbanamne.
Ance, “Aning ara, wininamlulume. Aning ara, pia kum wininamlulume,” nyalisiminye yupu nirya peterepnimince, kel bikna deiyok ning arepniminba, narye, an yupu uk, tenebuka wininamne. Winibuka unamne talak nirya ara, na kanye tenen ning nirya ara, an deiceuk delinamkine. Ance nyasiminye yupu uk, talibuka dobolbanamne.
Ara, sik kanye talima erebuka kwalinyak nang arye, nati malye yupu nyalininyakce, lululin yupu weik nyaninyake. Tilila yupu nyaninyak bukni, ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu nirya ara, na kanye talima noutamak nirya arye, ayupu tenepnirye, talibuka wininamne.
Na kanye talima nirya, an deiceuk deipnirye, ance, “Aning wininamlulume. Teleb winina ara ani,” nyalisiminye yupu nirya ara, ‘Moubuka kekepnirye, diksukumuk wininamne’ tenen, moropkine. Tonda, malye winin ning, pia kum winipnyopura, yuk ninye eipnikirye, “El malye winibuk ning ara ani,” nyabuka, ‘Malye yupu, na deice nyapmanto kum unamake’ tenen, moropkine. ‘Winibuka melipnutumba, telebuk winitinyopura, narye ilil uniliba, alye pia kum dakdanamne’ tenen, moropkine na ni Allah.
Aning ati ara, anggunce Allah Yahweh atibuk, diba tenepmunce, el yupu moubuka kekepmunce, pia diksukumuk winilulum ninye nirya ara, pia kanye deibuka, telebuk wininamlume. Yata ninye do, sik kanye talima pum tam, malye ning kum winipmal bukni, malye ning nirya bataklumce, diksukumuk winilulum ninye nirya ara, kanye deibuka, pin-pin asa arye umunce, Allah el si erena ati, yupu weik arye, “Telebe,” nyabuka nyanamlulume. Winipmunce, anggun nirya kanye talima namin asa ululumce, kanye teleb arye wininamlulume. Raja Daud birye nyabuk.
Winibuka, ance teleb kibuka deipniminyopura, ila tuba tonap, kanye deibuka unamne. Tonda, na malye winipsa ati, ance kel biknulumce, ‘Elda malye winibuknye,’ tenebuka wenepnulumce, pia weik ikin ning arepnuluma deice arye, imun kanye bobuka unun bukni, ‘Ance aikin ning dobuka lyepnulumce, kum kipdeipnulumba, ila tuba tonap teleb unamne’ tenen, moropkine.
Bukni, nara pia dipkoprop, na ni Allah, an dam anyuk unamne. Aninguk tenebuka ununa ara, teleb uka. Na kanye talima pum tam arye, akunum tenepse. Ara, Allah Yahweh arye, aning-aning deice tam talibuka ulirye, Weik Erena Deiyoknye ulirye, ‘Wininamne,’ tenelye touk, aning nirya dipkoprob winilulnye bira, ‘El dam anyuk unamne. El diparyuk melibuka lyelonamnile’ tenen, unamne. Na ni Allah, ancuk tuba kalikuka melinilyamnye winiminya ati ara, ance mambul pil dolyam ning nirya ara, yuk ninye, sik kekena ati, laka nyabuka peterelbanamne.
Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.
Aning ara, talye ati kume. Deiyok ara, Allah ance, “Aning wininamlume, aning ara, pia kum wininamlume,” nyapdeiamsulum yupu, moubuka kekebikirye, dipkoprob uk wininyak nang ara, ance pia teleb kibuka, yupu lipsisikuka bokeipsimince, ton ap tamubuka, teleb kilinamsilame. Allah ancuk, “Winipnamne,” nyabuka, diksukum ulyama deice arye, nyanamsilam yupu nirya ara, sik talima noutam dipkoprob uk wininyak nang arye, ayupu kekebikirye, pia moubuka talibikirye, aninguk wininamake.
Se, na mapu nirya ara, anggun kanye talima ap, anggun tenen ning nirya ara, anggun ni koprop Allah el deice uk delinamlume. Allah arye, ‘Aning ara wininamlulume, aning ara kum wininamlulume,’ nyapdeiamsuk yupu nirya ara, aninguk eibuka, pia moubuka kel kipmunce, ‘Allah arye nyapdeiamsuk touk, abisikuk binamap’ tenen, Allah el yupu uk moubuka talinamlulume.
Aning-aning nirya ati, Pia Mikip Weik ulye deiyoknye Allah arye, na Yesaya biti nyapnuk. Sik Israel nang ara, yupu deice aryuk, na si ereninyake. Bukni, dipkoprob ara, sik kanye talima noutam arye, nati pia moubuka kum teneninyake. Nati, walwal nang unyaka ati, sikda pia pera ninye asik nang atonun unyake. Tonda, sikce talibuka, si erenyak ning ara, talye nang sik kanye aryuk, ‘Aning-aning talibuka, si erenamlume,’ nyanyak ninguk, sik asok deice deilinyak bukni, sik talima noutam ara, nati moubuka kum tenepnikirye, na si dipkoprob kum ereninyake.
Minop talak ara, yu weik nang arye elti, wenebuka olamikba, urasin yuk ubukba, ninye elilamikce, ‘Se,’ tenen, lukdanuka kisok kwisi meka bongolamuk. Bukni, aminyan talak ara, ninye mutuku-mutuku nirya arye, el wininamle ning mambul pil doplyopura, ninye weik tonun, ‘Se, elda weik mambule, pia telebnye ulule’ tenen, kel biknamake. Tonda, yata mutuku do nirya, ninye deiyok nang, Raja nang weik tonun, elti, eibikirye, sik yupu nyana kumce na nie tenen, elti, dinamake. Winibuka eibikirye, pia lukuldana uk unamake. Ara, urdem ati kume. Deiyok ara, minop talak arye kum winilamuk ani, sik Raja nang bita kel kum biklamik ning ap, tonda yuk ninye arye sikti, kum laka nyalamikba, moubuka bita kel kum biklamik ning ap, talak arye aning winipliba eibikirye, moubuka kel kipnamaka ati nyapsine. Allah Yahweh arye nyabuk.
Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.
Aminyan talak nirya ara, sik amutuku unamak nang, talipnamaka deiyok nang ara, sik mutuku nang kan-kan aryuk, ninye deiyok kibuka talibikirye, unamake. El aninye deiyok kibuka talipnamsilanye bira, na dam talye lukparabuka yanganamle. Narye elti, yukupnyopura, adiparyuk, na dam talye lukparabuka yanganamle. Na siuk erenamnile. Anggun ton tenipdelulume! Ara, narye lo kum areptinyopura, yatanye birye ton, el kanye aryuk tenipturye, mikip dobuka, na dam yatu do? Kume, ara kum winipmanto. Wini talak ara, anggun Israel nang ara, na mapu koproba kipsiniba, unamlume. Tonda, nara anggun ni koproba unamsine.” Ayupu ara, na Allah Yahweh arye, akunum nyapdeipsine.” Allah arye nyabuk.
Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.
Imamnye birye, maka ining dobuka, pukle suse dilamuknye, el nong deice likililamlya ani, anye like tekbarye, tujuh kali deice arye likilinamle. Likilamlya ani, akunum teleb uplyopura, anye biti, “Akunum teleb upmalya ati, akunum,” teneplirye, nyapnamle. Tonda, kam tuba unmalye maka buk, tonok ton, ining burupmalye ning, tuba unmalya maka batakdongopliba, lakuka bai tam talye balonamle.
Aning akunum kintiniplyopura, atalak wininamle ning ara, ani. Allah el si eren aik bukni, mambul aik el si ara, Pia Teleb Lek Aik min kum binulye talak ara, mem aik pia teleb lekak weknamla ati, min yuma ara, el nong nirya mek kekenamlule. Mek keklyopura, Allah ap, ninye ap, ansinilina deiyok nang ongolamice baju, pia lek baju ongonamlule. Ara, el baju amu ning babye, tonda baju alip tam ning babye, pia lek ulul baju uk ongonamlule. Winiplirye, alek baju yala ninguk bukni, cang ning dobuka, el deiyatinga koulongonamlule. Winiplyopura, el kisok nirya, kurun baju aryuk kitinamlule. Akurun baju kum ongoplyopura, na Pia Teleb Lek Aik kum wektue. Allah arye nyabuk.
Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.
Ura, sik Lewi yala nang, teleb kilina ati, winipnamrurume. Sik bol deice ara winipnamrurume. Ara, an taruk arye, pia teleb mek burubuka, sik anang bol deice likuka dikdonokminba, amek arye anang sik bol piplirye teleb upnamlule. Apil winibuka dobikcopura, sik anang nong bol deice nirya potong aupmalyopura, ‘Sik potong nirya ara, silet arye kopnamlume,’ nyapminba, sik nong bol deice nirya adiparyuk silet arye kopnamake. Tonda, sik ongonyak baju nirya ara, “Mek liknamlume,’ nyapminba, mek liknamyake. Adeice arye, sik nong nirya ara, teleb updeipnamnyake.
“Anggun malye ning nirya batakmunba, mek sirika dem dongosunun bukni, nada mitik mambulnye anya arye, aminyan talak yanamla weik deiyoknye bira, elda weik mambulnye. Nada, mambulnye kum ati, pia malye piluk bukni, el sandal koulongon tapu narye kum loploptinye. Aminyan yanamlanye bira, el mikip pia weik ati, elce Allah El Dib Kanye arenamsile. Narye mek sirika, dem dongopsiniba, anggun nong nirya mek singilamle touk, aminyan yanamlanye bira, el mikip pia weike ati, elce Allah El Dib Kanye arepsiliba, anggun kanye talima nirya talinamsile. Uku arye malye ning dilamle touk, Allah El Dib Kanye arye, anggun malye winin ning nirya dobuka, kum kipdeipnamsile.
Amalye winin ning nirya nyapmasina ara, minop talak anggun Korintus mutuku ninye, anggun babye aning atonun winilamlum bukni, nun Deiyoknye Yesus Kristus el si deice ap, Allah El Dib Kanye pil dopsuka ap deice arye, Allah akunum teleb kipdeipsuke. Ara, malye ning talibikirye, mek iliklamak touk, Allah arye, nun malye winin ning nirya kum kipdeipsukce, ‘Na ninye, unamak’ tenen, ansinibuka wipsukce, teleb kipdeipsuke. Winipsuka deice arye, Allah el kanye ara, ‘Aninye ara, akunum diksukumuk unyake,’ tenesulule. ‘Sikda, teleb ninye unamak,’ nyabuka wipdeipsukce, wini talak ara, kanye deibuka tenesulule.
Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.
Nunce Yesus Kristus ati dib tenebibirye, el ap, talima dukdongobuka unyap deice arye, nun Ni Kopropa Allah ati moroptibye. Tonda, Allah ati moronyap talak ara, kanye teniltona kumce, ‘Dipkoprop kekepsilirye, kum bataknamsile’ tenen, ilil kum asa aryuk, nun talye kanye bobuka yupu nyaptibirye, elti, moroptibye. Ara, Yesus dib tenenyap deice arye, wininyabe.
Kristus arye, elti, dib tenebupu ninye ati, dibukce lyepsuka deiyok ara, nyapnusine. Ara, elce utenyamsuke. ‘Anang ara, na mapu unamak’ tenen, na laka teleb yupu deice arye, sik malye winin ning kum danalina ati, aninye ara, mek likina atonun kipdeipnirye, sik malye winin ning nirya kilipnirye, kum daneipnyopura, aninye pia teleb kipdeipniba, ‘Na mapu dipkoprop unamake,’ tenepsukce dibuke.
Sik yo bok deice deksikiba, talye ati pil domunye nang ara, anggun deiyok nang arye, nyasice yupu ara, moubuka kekepmunce, ‘Nun deiyok nang ara, pia mambule’ tenen, si erebuka unamlume. Aning nirya ara, tenepce winina kum bukni, anggun kanye talima diksukum ubuka telebuk wininamlulume. Ara, ‘Kristus nyapsutuba, el yupu kekebuka dobolbana atonun winipnuyabe’ tenen, anggun deiyok nang arye, nyasice yupu ara, kekebuka teleb ubuka wininamlulume.
Atilila yupu peteren ning ara, pia malye yupu, nyanyak nang peterenyaka deice arye yangasulule. Anang ara, ‘Tilila yupu nyanyaba,’ akunum tenenyak bukni, ‘Aning dauplye, tilila yupu auplibuk, talye kanye bobuka peterenamabe,’ tenenyake. Anang sik kanye tenen ning ara, yan diplamsil atonun ulule. Minop talak, teleb ubuka tenelamik bukni, malye weik winilamik deice arye, wini talak ara, merekuka kum kel biktingce, moubuka kum kel bikinyake. Ati wini talak ara, sik kanye tenena deice arye, ‘Malye ning ani, teleb ning ani’ tenen, moubuka kum biknamake.
Nun Lyena Deiyoknye, elce lyepsuka deiyok ara, nun teleb ubuka, diksukum pil weik dolamubu deice arye, pia kume. Aning deice arye, pia kum lyepsuk bukni, nun malye winin ning ati, talya merekuka obuka bataksutu bukni, nunti kanye arepsukce, bicoe tenepsuk deice arye, el minang kanye aryuk, wibuka lyepsuke. Ninye arye, deliltakne ning dobuka, mek liklamak atonun, Allah arye, nun malye winin ning kilipsukce, winiryuk delilamak mapu atonun ubuka deipsuka deice arye, kunum lyepsukce, teleb kibuka deipsuke. Tonda, Allah El Dib Kanye arye, nun kanye noutamak wekuka pil dopsukba, kanye winiryuk ning atonun punubuka deipsuka deice arye, lyepsukce, teleb kibuka deipsuke.
Ura, yuk yupu ton nyapnusine. Allah arye nyapdeibukba, Musa arye sekamuk yupu, mem yupu ara, winipmanto ninguk, keting kukia atonun ulamuk. Aminyan talak nong dipkoprop yanamle ning, el urasin yuk ulule. Minop talak mem yupu ara, mitik anun keting kukia atonun ulamuk bukni, aminyan talak nong dipkoprop yanamle ning ara, minop talak uamuk yupu atonun kume. Aminop yupu ara, keting kukia atonun ulamuka ati ara, sik Allah ati, arilamik deiyok nang arye aketing tamun, aketing tamun nirya, weik deice arye, sik arilamik ning uk, tuba-tuba arilyangalamik. Winilamika deice arye, ‘Allah el si erepnuyap’ tenen, el si erena aik dam weklamik ninye ati, sik malye winin ning nirya kum kipdeipnarye, diksukumuk kum daneipmanto winilamik.
Musa diba tenyamuka deice arye, sik Israel ninye arye, Kaplina ati Kwalina pil dolamik ning ara, kum bataklamuk. Tonda, kam ning obuka, ining likuka buplan dana-dana delilamik ning ara, Musa el babye kum bataklamuk. Aining likibuk ning ara talye ati kume. Ara, Allah arye Mesir mutuku ulamik ninye, sik minyuma mapu opnuyuk talak, ‘Ninye Ona Deiyok malaikat arye, Israel ninye nun minyuma mapu ton kum opnusil’ tenen, winibuk.
Tonda, Allah danatam, ninye danatam, noutamak ansinilina deiyoknye, Yesus el un dam yanganmalume. Ninye lyena ati, Allah arye, “Winipnamsine,” nyabuka nyalilamsuk yupu, winiryuk ning ara, Yesus ara, ayupu ati ansinilina deiyoknye usulule. ‘Allah ap, ninye tukwak ninye ap, teleb ubuka neika unamak’ tenen, ansinibuka delisulul deiyoknye ara, Yesus uka. Minop talak ulamuknye Habel arye, Allah el si erena ati, kam ning obuka, ining likdeibuk ning ara, mitik telebuk winibuk bukni, Yesus arye nun lyena ati, el ining sakukce biyuk ning ara, pia mambul weik ulule.
Yesus arye, nun kanye talima mitang usilye ning ara kel kisilirye, bico tenesulula anya arye, nun ilil una kum arye, ‘Dipkoprop melipnunile’ tenen, Allah el kanye aryuk bico tenesilirye, melisilinye bira, elti, talye lukparabuka moronamabe. ‘Diba’ tenen, moronamaba ara, talye ati kume. Ara, nun ikin usilye talak noutamak nirya ara, Allah arye talye luparabuka oplopsutu bukni, aning kum usulule. Winina kum arye, ‘Kekepsilirye, nun patasilye touk bico tenebuka, el kanye aryuk talye luparabuka melinamsil’ tenen, nun ni Allah ati moronamabe.
Apil dolulum touk, wini talak arye dipdongobuka doryanamle talak nirya ara, pia pi dobuka, pil teleb ubuka dolamunya ani, sirya dakanamlume. Wininamluma deiyok ara, ‘Allah arye lyepnamsil’ tenen, diba tenebuka dilamunyani, ‘Aminyan ara, dipkoprop nong upnamsile. Allah arye dipkoprop lyepropnamsile’ tenen, pia batakna kumce talibuka unamlulume.
Apil-apil dolamik ning nirya ara, talye arena ning ap, talye din ning ap, talye dinmek ap, ninye talima teleb ulina ati, talye mek likuka pil dolamik ning ap, apil-apil dolamik ning nirya ara, mem pil uamuk bukni, talye winipmanto ning, nong bol deice atonun piluk dolamik. Apil ara, minop talak arye dipdongobuka, anoutam talak nirya pil dopra yangalamik bukni, wini talak ara, Allah arye winiryuk nyalisilye yupu, akunum nyapsuka ati, aminop pil dolamik ning ara, tuba kum talinamabe. Minop talak dolamik mem pil nirya, akunum sirya dakubu.
Allah arye nyapdeibukba, Musa arye sekamuk yupu, mem yupu nirya akunum laka nyabukce, sapi basam mi obuka, ining doprobuk. Aining ap, mek ap, tabakukabukce, bi baju ap, yo si ara, hisop yo bisila ap dobuka, kintinipmanarye ining mekwen burubukabukce, amem yupu sekmok ning deice ap, ayupu kekenmek nang nirya ap, sik nong deice ining luptingca dobuka pakalilamuk.
Allah el tam kipdopmunyopura, Allah elce anggun dam unamle. Sik malye ning paliplibuk, taruk mek liklamak touk, anggun malye winimunye nang ara, anggun malye ning batakanamlulume. Anggun kanye bitinye kisululbuk, kanye bokoltosulul nang ara, anggun kanye talima noutam malye upsilye ning nirya batakanamlulume. Allah arye nyasilye yupu kekebuka wininamlulume. ‘Tonok kanye bobuka unamlum’ tenen, nyapsine.
Nun ni Allah arye minop talak akunum wiamsukce tenyamsuk touk, Allah El Dib Kanye arye, anggun talima noutamak malye ning kum deipsukce, teleb kipdeilisulul deice, Allah arye wibuka deipsuke. ‘Wininamak’ tenen, Allah arye wibuka deiamsuka deiyok ara, nyapnusine. Ara, ‘Yesus Kristus el ining biyuka deice arye, anggun malye ning kum danyaipsilirce, lyepsiliryopura, el yupu uk talibuka dobolbanamak’ tenen, wibuka deipsuke. Allah arye bico tenepsilirye, nun patapsilye ning talye arisulul ning ap, Allah ap kanye dukdongobuka umunce, yuk ninye ap kanye deibuka, teleb ubuka neika unamlulum ap, ‘Aning nirya weik upnin banamsil’ tenen, Allah morosunune.
Weik mekwen deice aninye lyebuka ara, ‘Dip tenepnamak’ tenena ati upsuke. Ara, diba tenebibibuk, Allah lyepsilyopura, mek dongolamsiaka atonun ulule. Dib tenebibibuk, mek dongosinyaka ara, nun nong bol deice nininga usilye ning, mek liksilirye, kum danalisulul bukni, mek dongopnusikce talak ara, na tenena kum arye, ‘Allah arye lyebuka melipnilibuk, malye un ning nirya batakuka diksukumuk unamne’ tenen, lak akarye nyanyabe. Mek dongolamsiaka deice arye kum lyesulul bukni, Yesus Kristus dibukura, Allah arye, Yesus kam bukeibuka deice aryuk lyesulule.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
ကြော်ငြာတွေ