Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.
Ibrani 1:3 - Eipomek3 Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke. အခန်းကိုကြည့်ပါ။ |
Ibrani 1:3
42 ပူးပေါင်းရင်းမြစ်များ
Dirina urasin pia teleb ning ara, dabu tam arye panubuka yalyeba, dengna weik ning emas urasin pia porolul touk uplyeba, ‘Se, aning ara, urasin pia teleb ulule,’ tenebuka nyanyabe. Tonda, Allah el dam dana-dana tam nirya ara, el dirina weik ap, el mikip weik ulye ning ap, el pia teleb ulye ning ap, nun bikuka kum laka nyaptibye. Kanye lopsilya ati, nunce, ‘Seʼ tenenauk unyabe.
Allah Yahweh arye, na ninye deiyoknye ati nyabuk. “Anda na sirik tam yanuka bukminba, narye an oldan ninye nirya obuka bisipnirye, aninye nirya dobuka, an yan amu tamuk deipnamkine. An oldan ninye nirya dobuka, an yan amu tam deipkiniba, aninye sik nong deice yanipdongopnalame.” Allah arye nyapdeibuk.
Aning ara, talye ati kum nyapsine. Deiyok ara, ninye deiyoknye Raja arye, “Winipnamne,” nyalul yupu nirya ara mikip weik ulule. ‘Winipnamne,’ teneplyopura, adiparyuk aninguk wininamle. Ati, yatanye birye, ninye deiyoknye Raja ati, weneplirye, “Anda yata wiripmalam do,” nyabuka, elce nyalul yupu kekena kumce, mania kanye bobuka, yupu sekting do? Kume, aning kum winiptibye.
Amaka ara, bobuka, Imamnye el dam boyanuka areplyeba, Imamnye elce, Allah Yahweh ati arenamle. Maka bitinye ati, tonok ning ara, ‘Anyuk dilamlibuk, lopmalinye, el malye winin ning ati, Allah arye namin kiplirye, kilibuka aning nirya kum daneipnamleʼ tenena ati, arenamlule. Ton bitinye maka ara, anyuk dilamuknye, el malye winin ning pununa ati, Imamnye birye, amaka obukaplirye, uku dongonamlule. Imamnye birye, aning pil bitinye akunum winilyopura, anye el malye winin ning, namin kiplirye, kum kiliplirye, teleb kilina ati, anyuk dilamuknye bira, akunum dopropmalula ati, akunum teleb unmalula ati, tuba tonap tamubuka Allah Yahweh, el dam yanganamle.
Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Ura, yata mutuku ninye do nirya, yuk nang arye Allah el laka teleb yupu, ninye lyen yupu peterebikiba, kekebikirye dib tenebicopura, Allah el mikip deice arye aninye lyelule. Allah el yupu ati tuba-tuba dib tenenyak ninye ara, Allah arye aninye ati lyelule. Minyuma ning ara, Yahudi yala ninye lyelule. Aminyan talak ara, Yunani yala ninye babye kekebuka dib tenebicopura, lyelule. Ati ara, ‘Allah el lak teleb yupu, ninye lyena yupu dobuka peterenamne do, kum do?’ tenen, alye kum dakalanune. Teniltona kum diparyuk, kanye deipnirye, pia pi dobuka peterenauk unune.
Aning atonun, yatanye birye, nunti wenebuka oplopnamsil do? Kume. Yesus Kristus arye nun lyena ati dibuk. Yesus dipsuka ara aupmal bukni, weik mambul ning ara, Yesus dibukba, Allah arye tamubuka kam bukeibukba, Yesus ara Allah el sirik taruk tam bulbiyuk. Allah el dam bul biyukce, Yesus nun melina ati, melibuka Allah ati morosulule. Aning ati ara, yatato nang arye, nunti, “Anggun malye winimunye ning ati, Allah weik arye wenepnamsila ati, el ap neika pia kum unamlume,” nyabuka wenepsitingce, yupu lepsisikuka bokeipsiting do? Kume, aning ara kum nyapsiting.
Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.
Ara, Allah arye Kristus kam bukeibuk talak ara, anggun ap, neika kam bukeipsuke. Ara, diba teneplum ati, Allah arye bol kobuka pia kam una deiyok ning akunum areamsuk ning ati nyapsine. Anggun ap, Kristus ap, akunum arepsuka anya arye, im deice ulul ninguk tenebuka, aning deiceuk anggun kanye talima delinamlulume. Im deice ara, Kristus arye Allah el sirik taruk tam bukukce, aning-aning nirya talibuka, im deice tam Deiyoknye ulule.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Allah el im deice pil don nang malaikat weik aunyakba, Allah arye tonok ning wibuka, asukum nyapnusin yupu nyabuk do? Kume. Allah arye, el Mi Kopropa ati ayupu nyapdeibukba, sik Mazmur noutamak sekamik yupu ara ani. ‘Anda, na sirik taruk tam buklyame. Winipminyeba, malye ninye arye anti, ‘Malye kiptibye’ tenen, an yupu yanikinyak ninye nirya ara, na Allah arye malye kipnirye, an amu tam deipnamne. Winipniba, ninye arye sik yane dikdik sena ati, atika yo deice, yan erebuka delilamak touk, ance amalye nang yanibuka, sik deice tam unamlame.’ (Mazmur 110:1) Allah arye ayupu nirya ara, el Mi Kopropa ati, nyabuka anya arye, el Mi Kopropa ara weik mambule bukni, sik malaikat ara, mitik mambuluk unyake.
Sik tukwak ninye arye winibuka pil donyak bukni, anye Yesus ara, sik pil dolamak touk kum winibuke. Aning ara kume. Elda, dipkoprop Allah ap, ninye ap, dana-dana ansinilina weik deiyoknye ulula anya arye, minop talak ara, ninye malye winin ning kum kilina ati, tonok ninguk aribuk. Aning like tonok talak arye, aribuka deice arye, akunuma. Ninye malye winin ning minop ning babye, wini talak ning babye, aminyan doryanamle talak ning babye, amalye winin ning nirya ati, akunum kum daneipsukce sirya daksuke. Winibukce, adiparyuk Allah el taruk sirik tam bukukce, el ap Allah ap, aning-aning nirya talinamrake.
Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.
Allah dan tam, ninye dan tam ansinilina deiyoknye bira, Yesus eluk ulule. Weik mambulnye Yesus ara, Allah el Mi Kopropa ulule. Elda Allah el ulyak im deice noutamak akunum biyuk. Aning ati ara, nunce diba tenebuka, ninye kekenyakak arye, laka nyanyap yupu nirya ati, batakna kumce, pia talibuka unamabe. Batakna kum diparyuk, diba tenebuka unamabe.
Ura, yuk tukwak ninye bukni, Allah ap, ninye ap ansinilina deiyok nang pil dolamak nang arye winilamak touk, Yesus ara, aning atonun kum ulule. Sikda, ‘Allah arye nun malye wininyap ning kum daneipnamsile’ tenen, kam ulamle ning obuka, Allah el kanye namin kina ati, asum-asum nirya obuka arilyanganyake. Ara minyuma ara, sik babye malye wininyak ning ap, aminyan ara, yuk nang malye wininyak ning ap, ‘Allah arye kum kipdeipnusil’ tenen, kam ning obuka, asum-asum nirya arilyanganyake. Bukni, Yesus ara, aning atonun pia kum winilule. Yesus arye, tukwak ninye nirya, sik malye winin ning kum kilina ati, el babye, el bidamang nong dobuka, Allah ati arepdayukba, sik malye nang arye el Yesus obika deice arye, tonok talak deice aryuk akunum lyepsukce teleb kipdeipsuke. Nun malye winin ning kum danalina ara akunum sirya daksukce pil dopsuke.
Ura, na kayapo, arup nyapmasin yupu nirya, deiyok ara nyapnusine. Allah ap, ninye ap dana-dana Ansinilina Deiyoknye, weik mambulnye akunum usulule. Anye bira, Allah el Mi Kopropa Yesus eluk ulule. Aning-aning nirya deice tam, im deice ululnye, Allah el weik deiyoknye bunak sirik tam, Yesus bulbiyuk.
Ura, yuk yupu nyapnusine. Ninye dipnukce talak ara, wininyake. Surat deice ara, “Na dipnyopura, na talyamse ning ara, winibuka, winibuka bokeipnamlyame,” nyabuka sekenyake. Asurat sekenyake nang tuba kam unyak talak ara, asurat noutamak nyabikce ning ara, yuk nang arye bokuka kum doproptinge. Asurat deiyok nang arye, dipkoprop dibikceba, yuk nang nirya laka kel kibikcopura, adiparyuk, asurat noutamak nyamikce ning atonun, sik ning bokuka doproptinge.
Sik tukwak ninye bukni, Allah arena ati, deiyok nang arye, tuba-tuba arilbalamak touk, Kristus arye aning kum winibuk. Kristus ara, anang arye tuba-tuba arenauk, winilamak touk, el babye atonun winiptopura, like tonok talak deice aryuk, el bidamang nong dobuka, Allah ati kum areamtue. Aning kum bukni, weika arye tonap, im deice wekelbalamtue. Ara, Allah arye aning-aning nirya kwepdeibuk talak arye dipdongobuka, anoutam talak nirya ara, ila tuba tonap, weika arye im deice wekelbalamturye, Allah ati areamtue. Bukni, wini talak ara, sirya talak dam akunum ubukba, Kristus ara, like tonok talak deice arye akunum yayuke. Kristus yayuka deiyok ara ani. Ara, el bidamang, el nong kopropa dobuka, Allah ati akunum aribuka deice arye, nun punupsuke. Malye nang arye elti, obika deice arye, ninye malye wininyak ning nirya ara, akunum kum kipdeipsukce, nun punupsuke.
Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.
Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.
Nunce, anggunti, “Nun Deiyoknye Yesus Kristus ara, weik mikipnye ulirye, aminyan talak ara, tukwak mutuku tamubuka yanamle,” nyabuka peterelamsupu ning ara, talye ninye sik kanye aniryuk tenebuka, talye-talye yupu weik kililamsikba kumdisinak touk, kum peterelamsupu. Aning ara kum bukni, nun bidamnye aryuk, Yesus Kristus mikip weik ulamuka ap, pia teleb mambul pil dolamuka ap ara, nun asing kopropa arye elilamubu ati, ayupu lakak ubuka peterelamsupu.
Nun pi asing kopropa arye eibupu ning ap, amul arye kekebupu ning ap nyapnusine. Ara, nun ni Allah arye Yesus ati, “Anye bira, na Mi Koprop ulule. Elti na bico tenepnirye, elti, na kanye deipne,” nyabuka deice arye, Allah arye Yesus ati si erebuka, el si weik aribuk. Allah pia telebnye, weik mambulnye birye, im deice arye ayupu nyapdeibukura, nunce kekebupe.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Nun ni Allah arye nyapdeibukura, Yesus Kristus pil dopsuka deice arye, nun Lyena Deiyoknye Allah el tonokuk ulule. Allah yuknye ton kum ulule. El tonokuk ulule. Aning ati ara, el si weik arye erenamabe. Allah elda mikip pia weik ulirye, aning-aning nirya, Talena Deiyoknye ulule. Elda, pia teleb, dirina weik Sisinanye, Raja atonun ulule. Aning-aning nirya min kweipdeibuk talak arye, aning nirya, Talena Deiyoknye ulamuka ani, wini talak tuba ulirye, aminyan yanamle talak nirya babye, pia unamle. Ati, dipkoprop el siuk erebuka unamabe. ‘Aning nirya winipnamle’ tenen, “Amin” nyapne. Telebe, na Yudas arye, asukumuk deipne.
“Malye winin ning nirya ati, ‘Nun like’ tenen, malye kilamice ninye ati ara, weik ninye deiyok ning arepniba, na weik deiyoknye buna ning deice ara, na ap, sik ap, neika bunamabe. Aning ara, narye malye winin ning nirya ati malye kipsirye, na Ni Kopropa Allah, el deiyoknye ulul ati bulul sukum deice, el ap neika bunyam touk ati, nyapsine. Aning ara, narye malye winin ning nirya ati malye kipsirye, na ni Allah el deiyoknye ulul ati bululak deice, el ap neika bunyame. Anggunce malye winin ning batakmunce, diksukumuk upmunyopura, na ni ap neika bunyam touk, anggun ap, na ap, neika bunamtibye nyapsine.
“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.