Akamnye bira, akunum bikbik abuka biyukopura, Yehu bira tamubuka, el kwitcapu sik Raja Yoram, el yin talen deiyok nang dam tamubuka biyukopura, sik awekmek nang bukni, tonoknye birye asipdeyuk. “Arup yanmarumnye bira, Luba talibuknye birye, yate yupu ton nyapmakil do? Yata deiyok ati, an dam yanuka nyapdeipmakil do? Anda teleb ulyam do, kum do?” nyabuka asipdeyuk. Nyabuka asipdeyukbuk, Yehu birye tamubuka nyabuk. “Kume, daupmalye. Anggunce akunum bikamlume. Ato lup nang ara, deiyok kum upmalibuk, talye-talye yupu uk nyanyake,” nyabuka, Yehu birye nyabuk.
Hosea 9:7 - Eipomek7 Ati ara, anggun moubuka kekeplulume! Na nabi Hosea birye nyapsine. Weik wenen sum akunum dam uple. Ara, Allah arye yu uplyopura, anggun Israel nang nirya ati, wenepsilirye, ikin deipnamsile. Ninye arye yuk-yuk ning nirya, malye ulamikce ning, dengna dolon sum upnamla ati nyapne! Winiplyopura, sik Israel nang nirya ara, ikin ning dopropnamake. Bukni, sik Israel yala nang arye, wini talak ara, winibuka nyanyake. “Kume, nabinye birye nyasulul yupu ara, nunce diba kum tenenyabe. Allah el Pia Teleb, Lek Dip Kanye areamuknye, nabinye bira, motonanye atonun ulul ati, pia walwal aryuk nyalule,” nyabuka, nalibuka nyanamake. Bukni, na kele. Anggun Israel nang arye, anggun malye winin ning, yuk-yuk ning nirya akunum winiluluma ati, Allah arye nyasulul yupu ap, na nabi Hosea birye nyasunun yupu ati, anggun aululum nang arye, ‘Ayupu ara, dabataknuyabe! Nun like, ayupu kum kekepnamabe,’ nyabuka batakalulume. အခန်းကိုကြည့်ပါ။ |
Hosea 9:7
40 ပူးပေါင်းရင်းမြစ်များ
Allah arye anggun nirya ati, wenepnamsil talak ara, anggunda yata wiripnamlum do? Tonda, anggun wenena ati, lo arepsilirye, ikin ning dopdeipsiliba, pia pera mutuku, yu nang arye mal piyanamsiyak talak ara, anggunda yata wiripnamlum do? Allah arye lo arepsiliba, pera mutuku arye, mal piyanamsiyak nang arye yakceura, anggunda dan mutuku nang arye mikip kiptingba, sikce amutuku nang dam binuka, ‘Se nun ton melipsululume,’ nyabuka, moroptum do? Tonda yata tonye biti, ‘Melipsilyame,’ nyabuka moropnamlum do? Tonda, anggunce talibuka umunce, bona talin nang umunye ning nirya ati ara, ‘Duknubuka deiptibiba, ubula kum dopropnamsiyakʼ tenen, dan mutuku duknupnamlum do? Kume, aning kum winipnamlume.
Se, na ni Allah Yahweh, ance sik malye weik unyak nang ati, yu tenipmince, ‘Anang wenepnamneʼ tenen, kintinip deipmalam ning ara, pia kum tenebikirye, kel bikuka kum elinyake. Ance an mapu ati, ‘Bicoe, sikda dipkoprob melibuka kalikinamne,’ tenipmince, melinamlam ning ara, sik amalye wininyak nang kum eilinyaka anya arye, ance aning lak kipdeipminba, eiptingopura, aminyan ara sikce, ‘Se, nun malye wininyabe,’ tenen, ilil upliba, alye dakanamake. Ance sik malyeuk wininyak nang ati, yu weik upkiliba, ance wenebuka opnamalam nang ara, akunum kintinip deipmalam ning ara, sikti, wenebuka opmince, uku buk dilamle touk, anang kum kipdeipnalame.
Na Allah aryuk, aminyan talak winipnamle ning laka lena deiyok nang bukni, sik tilila yupu nyanyak nang ara, sik tilila nyanyak yupu ati malye kibuka yaniltanyake. Sikce, ‘Winipnamle, winipnamle,’ nyanyak yupu ara, narye yupu sengneba, nong kum ulule. Tonda, Isa mikip deice arye, akunum diamice ninye kanya ap yupu talinyak ninye arye nyanyak yupu ara, narye yaniltanune. Sik nyanyak tilila yupu yaniptapnyopura, yuk nang arye, ‘E, anang ara walwal nang arye nyanyake’ tenen, kel kinyake.
Talye ning ati, “Nun deiyok ning,” nyabuka, si erenyak ning nirya ara, nong kum upnamle. Ati ara, aning nirya memebikce, sik anang babye, aning ati, “Nun ni koproba ani,” nyabuka si erenyak nang babye, tilila yupu uk nyalanyake. Ati, anggunce talye ning nyabuka nalimunce, malye kibuka akutunamlume. Allah arye, ‘Atalak akunuma,’ tenyamuk ning akunum yalyeura, aning nirya ara, Allah arye kum kipdeipnamle. Ati, aning yala-yala nirya ati ara, anggunce nalibuka akutunamlume.
Allah Yahweh arye sik Anatot mutuku unyak nang ati, ikin ning areplyeba, dopropnamaka talak ara, akunum kintinip deibuk. Tonda, Allah arye sik amutuku unyak nang ati, ‘Wenebuka opnamne,’ tenyamuk keting tamun ap, asum ap akunum yalyeura, tonoknye babye, ton kum bai sakuka binamake. Na Allah arye, kanye imun weik ning arepnamle deice arye, anang nirya oltakanauk winipnamnarya!” Allah arye, na Yeremia biti nyapdeipnuke.
Sik malye wininyak ning nirya ara, yu weik unulula ati, narye tamubuka, anggun amutuku nang ati, like bitinye deice arye wenepnirye, kwang daknamne. Deiyok ara ani. Ara, sikce talye isa ati, “Nun ni koproba,” nyabuka, si erenyak deice arye, na mutuku koproba nirya, akunum malye kipdeipnika ati, amutuku noutam ara, na dam yakirye, na si kum erepnitinge. Sikce, ‘Nun ni,’ nyabuka, isa si erenyak ning ara, talye ning, kam ton kum ulul ning ati, si erenyake. Narye, ‘Amutuku ara, pia talipnamne,’ tenyamse mutuku, na mutuku koproba noutam ara, sik isa si eren ning, weik tonun akunum delilamika deice arye, amutuku akunum malye kipdeibike. Sikce amalye wininyak ning ap, aisa mer nirya si erena ati, patung ning delilamik ning ara, ‘Na pia like, tenenune. Allah arye na Yeremia biti, nyapnuk.
Nyabukce, ayupu ton nyabuk. “Samaria mutuku unyak nabi-nabi, sik malye wininyak ning ara, akunum elinune. Sik tilila nabi nang arye, Isa Mutuku Dongonye, el si Bahal, aisa si erebikirye, el mikip deice arye, ‘Aminyan upnamle ning ani, anye,’ nyabuka, tilila yupu nyanyake. Wininyaka deice, na mapu Israel ninye arye, sik tilila yupu kekebuka, dib tenebikirye, malye bisikuk dobolbanyake. Aning ara, na pia like.
Ara, sik Babel mutuku unyak nang arye, Yehuda mutuku noutam unyak nang, yuk-yuk nirya, sik deice malye-malye kibuka, ikin weik ning delilamsik ning ati, na Allah arye, sik deice tamubuka, kwang daknamne. Winipnyopura, Babel mutuku nang arye, amalye unamsiaka ati, lo arepniba, yuk-yuk mutuku nang arye, Babel mutuku unyak nang nirya, opnamake. Obicopura, sik yuk-yuk mutuku nang nirya ap, sik talinyak pia weik Raja-Raja nang ap arye, Babel mutuku nang nirya talibikirye, anggun amu tam deipnamsiake. Winipsikcopura, Babel nang arye, sik yuk mutuku nang ati, sik piluk donamake. Aning winipnamla deiyok ara ani. Ara, na Allah arye, sik Babel mutuku nang arye, pia malye-malye weik winilamik ning wenena ati, narye kwang daknamnarya! Sik taruk arye, malye winiun ning, winilamik ning atonun ubuka, narye ikin weik ning, sik nong deice deipnye deice arye, kwang daknamne. Allah arye nyabuk.
“Anda Zefanya bira, imam Yoyada, el pil punubuka dona ati, Allah Yahweh arye, akunum wipdeipmakile. Ati, wini talak ara, ance imam Yodaya, el pil dolamuk ning ara punubuka donamlame. Apil donamlam talak ara, anda Allah el si eren aik kaliknanye unalame. Winipminyopura, yatanye birye do nirya, sikce, ‘Nara nabi ununa,’ nyabikirye bukni, sikda motona talin nang nyalamak touk nyace nang ara, ‘Bikbik abuka bicakʼ tenen, ance kat besi tapu, el si rantai arye, anye el yan ap, taruk ap, ngang dam ap, atapu arye, kirikdongobuka, koulongonamlyame.
Tonda, anggun Mesir mutuku nang ara, ‘Yuk mutuku nang arye, yanuka opsicakʼ tenen, yuk-yuk mutuku yin nang arye nunti, melibuka kalikinamsiakʼ tenen, yo bok weik areamlumce, dekamlumba, yuk mutuku yin talin nang akunum yayikce, anggun mutuku akunum kalikisinyake. Bukni, winipmanto ara, sapi basam nong weik nemlye buk, mikip weik kum balamle atonun, anggun melin yin talin nang babye, akunum upmake. Ati ara, anggun Mesir mutuku nang wenena ati, arup akunum yalyopura, ikin ning dolon talak upmala ati, anggun melin yin talin nang, minopce yayik yin talen nang babye, ‘Se, nunti, wenebuka opsilirye, malye kipdeipnamsileʼ tenen, talipdarabuka, kum winipnamake. Sik ilil upliba, sik lyeldana ati, sik mutuku koproba tamubuka bindopnamake.
Na mapu nirya ara, sik wenena ati, malye kibuka akunum oplopse. Winipsa ati, sik nirya ikin weik unyake. Winipmanto ara, sik deice pia dila weik ubuk bukni, amutuku nabi-nabi nang ap, imam-imam nang ap, sik ning ara, ‘Kume daupmalye, amutuku nang ara, ikin weik kum unyaka ap, ara mitik tonun dila atonunuka tenebikirye, nyanyake. Utenebikirye, yuk nang ap epdakce talak ara, anang ati, “Yo, telebe nun kayapu. Nun nirya ara, teleb kibuka wininyabe. Nun wininyap ning ara, telebe uka, dauaplye. Nun nirya ara, teleb aryuk tunim abuka unamabe,” nyanyake. Bukni, sikce nyanyaka ara, tilila yupu uka. Amutuku nang nirya ara, teleb aryuk tunim abuka kum unyake. Sik nirya ara, tuba malyeuk wininyake.
Sik imam nang babye, nabi nang babye, na mapu koproba, sik Israel nang nirya ati, ‘Yo, daupye, anggunce malye winilalum ning ara, tenena kume. Aning ara, weik malye winin ning kume,’ nyabuka, pilinyak deice arye, pia malye wininyake. Winipmanto ara, pia weik suse dilamle bukni, anang arye, ‘Kume, nun asuse disulul ning ara, weik mambul kume. Aning ara malye. Asuse ara, talye suse disulula ati, aning nirya ara, el yuk lopliba, telebuk unamabe,’ tenebikirye, nyanyake. Nyasinyak bukni, na Allah arye, dipkoprob nyapsine. Anggunda, talye kanye bobuka, telebuk kum unamlume. Ikin weik unamsila ati, imun kanye tuba bobuka, unamlume.
Yehuda yala nang, sik dam dotalak winipnamle ning ati, Allah arye laka nyaplyeba, sik kekebikirye, laka nyasinyak nang, nabi-nabi nang arye nyanyak yupu ara, talye tilila yupu uk nyanyaka ati, nong kum upnamle aryuk, talye yupu uk nyasinyake. Anggun Israel nang, malye upmunye bukni, anabi nang arye, anggun malye ululum ning ara, ‘Ani,’ nyabuka, kum laka nyasikceba, anggun malye ululum ning nirya ara, batakmunce, tamubuka yamunyeba, Allah arye kum lyelosulule. Sik anabi nang arye, anggun dam laka nyasinyak yupu ara, ‘Dipsuksum una ati bisik ara, ani,’ nyabuka kum nyasinyake. Aning kum bukni, tilila yupu deice aryuk, malye un tam bisik ban ning ati ara, laka nyasikceba, anggun abisikuk balulume.
Se, aning nirya dipkoprob winipnamna deiyok ara, ani. Ara, anggun talye-talye yupu nyalulum nabi-nabi nang ara, na mapu koproba, sik Israel yala nang nirya ati, nyalamlume. ‘Kume, weik kanye imun ning ara, nun dam pia kum yanamsile. Nun nirya ara, talye kanye bobuka, teleb unamabe!’ nyabuka, pia tilila yupu nyalulume. Winipmanto ara, ninye arye, mikip pia kum keil poka tembok domikce, poka lokuka sakmanto uplyeba, sik amutuku deiyok nang arye, ‘Aning moubuka, kum teninamak’ tenen, anggunda talye yamunyak arye, abilinga likna mek, cat kurun ning arye liklamak touk, ululume. Ara, dipkoprob yupu nyana kum bukni, talye nyaltakan yupu atonun nyaluluma ati, nyapsine.
Allah Yahweh, weik deice tam erebuka, aning-aning nirya talibuka, Pia Mikip Weik Deiyoknye ulule. Elce nyapsile. Ara, anggun talye-talye yupu nyalulum nabi-nabi nang ara, anggunda pia bicoe. Ara, aminyan talak, Allah arye obuka, kum kipdeipnamsile! Deiyok ara, ani. Ara, Allah arye lengdar mana deice arye, mambul yupu anggun dam kum nyasiliba, anggunce kum elilulume. El yupu kum kekelulum bukni, anggun kanye tenina deice aryuk, tenibuka tilila yupu nyalulume.
Narye sikti, yu weik upmanila ati, sik wenena ara, weik ikin ning, sik deice deipnamne. Tonda narye sikti, ‘Aninye kwang daknamne,’ tenepse ning dobuka, sik deice deipnyeura, kanye teleb upnamle. Atalak na yu weik upmanila arye, sikti weik tonun wenepnamne. Winibuka kwang daknyeura, sik Pilistin nang nirya arye, nati, ‘Se, dipkoprob Allah ara, aning-aning deice tam erebuka, Pia Mikip Weik Deiyoknye ulule. Ara, ‘El ukaʼ tenen, moubuka biknamake. Ara, na yu deice arye, sik tibuk weik tonun wenepnirye kwang daknyeura, adeice arye, na Allah ati, ‘Se, elda dipnyeʼ tenen, moubuka biknamake.
Aning nirya winipnye deice arye, ‘Yuk-yuk mutuku nang mutuku sirya im sirya nirya ati, na mikip weik ap, mambul pil donun ning ap, malye un ning kumce, pia teleb, lek diamuk unun ning ap, sik nirya biknamakʼ tenen, aning nirya sikti, wenepnirye, peterepnamne. Adeice arye, sikce nati, ‘Se, Allah Yahweh ara, dipkoprob eluk ululeʼ tenen, moubuka biknamniake. Ayupu nirya ara, Allah arye, nabi Yehezkiel dam yanuka nyapdeibukba, kekebukce, laka nyabuka sekuk.
Anang arye, nyanyaka ati ara, na Allah arye, sik anang nirya ati, eipnyopura, sikti bico pia kum tenepnamne. Kume, sik Israel nang nirya ara, yuk nang ati, pia malye-malye weik wininyak touk, narye sik anang ati, sik malye unyak ning ara, sik nong deice deipnamne. Winibuka pia wenebuka opnamne” Allah arye, na Yeheskiel biti, lengdar mapsa deice arye nyapnuke.
Anggun Efraim yala ninye ara, anggun wenena ati, weik ikin ning, anggun nong deice deipnamsine. Ara, anggun wenena sum ati winipnamne. Anggun mutuku noutam umunce, aik dobuka umunya nirya ara, asik oldemuk upnamle. Ara, urdem ati, kum nyapsine. Na Allah arye nyapsine anya arye, anggun Israel ninye ayala-ayala nirya ati, nyanun yupu ara, dipkoprob nong upnamle.”
Aning kum bukni, tonda, sik Israel nang arye, ‘Allah el si erebibirye, elti, si erebuka kinamapʼ tenen, kam ning obuka, boyanuka arelyanganinyake. Tonda, kam ning boyanuka, Allah ati yanuka arepnikirye, atup kalinyaka noutam arye, bokuka dinyake. Wininyaka babye, na Allah Yahweh ara, ‘Pia na lik,’ tenenuna ati, sikce areninyak ning ara, ‘Na likʼ tenen, kum dolonune. Ati wini talak ara, narye sik malye wininyak ning nirya ati, tenepnirye wenepnamane. Adeiyok ara, sik malye unyaka ati, weik tonun wenepnamne. Ati naryuk sik tamubuka, Mesir mutuku uk dopkwetepnamne!
Bukni, dipkoprob nyapsine. Allah arye wipdeipnukba, el yupu lak nyana deiyoknye, nabinye unune. Ati, anggunda el mapu koproba, anggun Israel yala nang ara, ‘Kanye mouplulume! Allah arye wenepnamsile,’ nyapsine. Ara, ‘Mangkau kanye bobuka, talye lukparabuka, tuba malye-malyeuk ubiceba, Allah arye kanye imun weik ning, anggun wenena ati arepsilyak,’ tenen ati, ‘Anggunda kanye mouplulume,’ nyapsine. Bukni, na banun mutuku nirya ara, sik Israel nang arye nati, ‘Anye nun likʼ tenen, ‘Opnuyabe,’ tenepnikirye, maka webuka youlamaka atouk, ubuka kirikininyake. Tonda, Allah el si eren aik pum tam babye, Israel nang arye, nati, ‘Nun like,’ tenepnikirye, ikin ning dobuka, na nong deice delininyake.
Aning akunum eipsopura, Allah arye, na Amos biti nyapnuk. “Amos anda yata ning ton upmoba eipmamum do?” nyabuka asipnuk. Nyapnukba, narye tamubuka nyapse. “Tonok tower tapu arye wiamik aling pum bisik ara, yo duk buppu li arye, duk eklamuk ning ayala-yala nirya weik lipmoba eipmanue,” nyapse. Nyapsiba, Allah Yahweh arye, tamubuka nyapnuk. “Tonok tower tapu pum tam yo duk eklamuk ning, ayala-yala nirya weik lipmoba, eipmamu ning deiyok ara, ani. Ayo duk akunum eklamuk touk, Israel ninye, sik wenen talak akunum wisina atonun upmala anya arye, sik wenen talak dam upmala ati, ayo duk eipmalame. Tuba-tuba malyeuk wininyaka ati, minop talak aning nirya, namin kibuka luba kiamse bukni, wini talak ara tuba tonap, kum namin kipnamne. Narye, ‘Sik malye wininyak ning wenena ati oplopnamne’ tenen, kintinipse ning ara, kum bataknamne. ‘Dipkoprop Israel ninye wenebuka opnamne,’ tenelamse talak ara, akunum dam uple.
Tonda, anggunce tenelulum ning ara ani. ‘Kume, Allah arye, el yupu nyapliba, laka nyanyak nang, nabi-nabi arye tilila yupu deice arye, peteresikce yupu ara telebe,’ tenemunce, ‘Dipkoprop nyan yupu ara, nun like,’ tenelulume. Tonda, tilila yupu nyan nabi-nabi nang arye, “Amutuku uk ubirye, anggur mek kanye wangalamak ning ap, yuk yu mek ap, teleb nyalamle ning nirya, weika arye dina ara teleb uka,” nyabuka nyapsitingopura, anggun malye winilulum ninye arye, atilila yupu nyana nang ati, kanye deiptume. ‘Tilila yupu nyanyak nabi-nabi nang ara, nun kanye telebe,’ tenemunce, ato nang ati kanye delilulume. Winiluluma ati, amutuku arye batakuka, yuk mutuku bindopnamlume, nyapsine. Allah arye nyabukba, nabi Mika kekebukce, sekuk.
Ati, sik amalye weik wininyaka deiyok nang arye, yuk nang nirya ati, malye winilinyake. Winipmanto ara, taca ning luksiliba, lik ulamsil touk, malye winilisinyake. Tonda tace ning, weika arye papliba, cang weik akunum upliba, tilib weik uplirye, ninye arye abisik kum binmanto ulamap touk, sikce teleb ban bisik sekelongosinyake. Mitik teleb ubuka unyak deiyok nang babye, pia kwanim bisik banyaka ati, sik nirya ara, dipkoprob malyeuk wininyake. Winimunya ati, Allah arye anggunti. weik arye wenepnusile. Anggun malyeuk winimunya dekna ati, Allah arye yupu bokeipsilirye, wenebuka oplopnamsile. Wini talak akunum dam uple nyapsine. Ara, Allah arye, “Sik amalye unyak ninye ati, malye kipdeipnamle,” nyapdeiamuk talak akunum dam uple.
Aning atouk, Yerusalem noutam unyak nabi-nabi nang, pil donyak ning ara, dipkoprob ning ton, kum donyaka ati, ‘Ayupu ara, dipkoprob Allah arye nyasilye touk, aninguk nyanamabeʼ tenen, tenebuka kum unyake. Sik mining kanye aryuk tenenyak ning dem, talye nyaltakanyake. Ati, sikce nyanyak yupu ara, yuk ninye arye, ‘Dipkoprop yupu nyapsiake,’ kum teneptinge. Tonda Allah arye, ‘Aning ara, naʼ tenen, el bidamnye ati, kintinibuk ning ara, sik imam pil dona deiyok nang arye, aning ati malye kilinyake. Ara, ‘Aning doprobibirye, talye luparabuka doptibye,’ tenebikirye, mambul teleb lek ning ati, malye kilinyake. Winibikceura, Allah el si eren pil, aning dobuka, pil kum doptinge. Tonda, amalye wininyak imam nang, sik patan ning atibuk winikirye, Allah arye, ‘Aning ara, wininamlume. Aning ara, pia kum wininamlumeʼ, nyapdeiamsuk yupu nirya ara, yanikirye, tamubuka sik tenibikce ninguk, wininyake.
Ara, ton ninye arye ara nunti, “Sik wininyak ning ara, teleb nang arye wininyak atonun wininyake,” nyasinyak. Luba talin nang kum unyap bukni, teleb nang atonun uptibya babye, ‘Yuk ninye nirya arye, Allah el pia teleb winilya ara, moubuka kel bikting’ tenen, Allah el pil donyabe. Kanye bobuka, moubuka wininyak ning atonun winibibyopura, aning ara, anggun Korintus ninye, anggun melina ati wininyabe.
Mutuku lulukna weik arye lulukukba, adiparyuk weik asik domik mutuku, el si ara Babel mutuku noutamak arye, tuku nirya dilikukce, bokuka winilye kibuk. Tukwak mutuku im sirya, mutuku sirya nirya noutamak arye, weik asik domikak nirya adiparyuk lokuka biyukce, atu atonun kiplobuk. Deiyok ara, Allah arye weik mutuku si Babel mutuku ninye arye, pia malye ulamik ning nirya ati, tuba tenebukce, amutuku ninye wenena ati, yu pia weik ulamuka ati, asirya dakne talak, yu pia weik ubukba, weik mikip arye oplobuk. Allah el yu upmanto ning ara, yu weik arye kanye wangalamak mek kwebuka, tonok mek makau pum tam weika arye dikdongobikirye, yuk nang ati, mikip arye sik si bam bol pum tam dikdongobicopura mek si amubuka lupdonokmanto kum winiptingopura, Ara, Allah arye weik wenena ning arebuk ati, sik Babel mutuku tam ninye lyepdanmanto kum unmekak eipse.
ကြော်ငြာတွေ