Tonok domba basam mi ara, beren tam talak opmunce, na si erena ati, keil pala tablakuka, yangabuka kintiniplumakuk, yanuka uku dongonamlulume. Atalakuk, aning ap tabakuka arenamlume. Ara, roti kwaning dan ati deiyok ning, el si ara tepung terigu, pia teleb ning nukuka, el ikin ara, tonok (1) kilogram ap, tonda, zaitun yo duk minyak pia teleb ning, tonok liter ap, tabakmunce, aning ara arepnamnulume. Tonda atalakuk, anggur tapu duk mek nukuka, tonok liter ap, dobuka yamunyeura, na arena ati, uku dongonamlulume.
Hosea 9:4 - Eipomek4 Amutuku noutam unamlum talak nirya ara, anggunce anggur mek ton dobuka boyamunce, ‘Allah ati kam ning obuka boyanarye, arenamap ning ara, pia teleb kipdeibibiba, Allah arye kanye deipnamsilʼ tenen, na Allah Yahweh ati arelyanganamlum deice arye, anggur mek kum diklopnamlume. Atalak ara, anggunce kam ning obuka arepnumunya babye, na Allah Yahweh eipnirye, kanye kum deipnamsine. Aning boyanuka, na dam yanuka arena pia meme. Anggunce, kam ning obuka, na dam arelyamunya babye, ninye dipneura, wein sum arye dilamak roti kwaning ara, na si erenyak nang arye, aning pia kum dilamak touk upnamle. Ara, aning boyanuka dibikcopura, adeice arye sik bidamnye aryuk, malye kipdeipdakiba, na dam ton kum yatinge. Deiyok ara, ani. Ara, anang nirya arye, aning dobuka dinamaka ara, na si erebuka kina ati, kum dilulum bukni, talye din patana ati dilulume. Anggun patan ninguk tenepmunyopura, ato ning dobuka, na si eren aik dam bobinuka arelbana ara, pia kum boyanganamnulume. Winina ara, meme nyapsine. အခန်းကိုကြည့်ပါ။ |
Hosea 9:4
33 ပူးပေါင်းရင်းမြစ်များ
Ati ara, weik mek balamlye lilun teleb keil, alap piting alamle keil uamlyak ara, anggunce si erelulum isa daunyaka ati, asukumuk bimunce, anggun si erelulum isa ati, ‘Nun ni melipsilyame,’ nyabuka, morolbinamlume. Anggunce na Allah ati akunum bataknuluma ati, anggun si erelulum isa aryuk, melipnamsiake. Narye kuma! Narye anggun teleb ning areamnutum bukni, anggunce anggur mek kweplumce, alap piting alamle keil deice dikilulume. Tonda, ‘Isa arye melinamsil’ tenen, aisa arena ati, gandum duk bulubuka arelulume. Ati, anggun tenipdelulume! Anggunce isa si erelulumce, areluluma deice arye, anggunti na yu unulul ning ara, kum danamle do? Anggun malye ululum ning ati, narye, ‘Anang weik tonun wenebuka opnamne,’ tenebuka kintinipsise ning ara, ‘Dauplye’ tenen, biknirye, bataknamne do? Kume, aning ara, winipmanto kume.
Bukni, anggun Israel yala nang ara, anggun kanye aryuk, ‘Winipnamabʼ tenen, malye tenelulum ninguk winilulume. Ara, anggunce isa el siuk erelulum deice arye, pia malye ning weik winilulum bukni, tonda, ‘Allah ati arepnuyabe,’ tenelulumce, na arena ati, yuk ning ton arenululume. Winiplulum ning ara, pia malye uka. Ara, yatanye do nirya, yim sapi basam obuka, Allah el si erena ati boyanuka arebikce talakuk, anang aryuk, sik mapu ton obikirye, isa si erena ati boyanuka arelbanyake. Tonda, domba basam mi winiryuk weinye nenmalye ning, na Allah ati binuka arebikce talakuk, sik anang aryuk, sik Kanaan tam nang ulamak touk, kam dobuka, el ngang talibuka bobikirye, isa si erena ati arelbanyake. Aning atonun ton, gandum duk boyanuka, na Allah si erena ati, yanuka arebikce talakuk, anang aryuk, sik Kanaan tam nang ulamak touk, basam ining boyanuka, isa si erena ati binuka arenyake. Tonda, gandum duk teikikirye, nintong teleb mek, el si kemenyan tabakikirye, na Allah ati, telebe nyana ati ara, na si erenyakce, aning dobuka, uku dongonmakce talakuk, anang aryuk, sik Kanaan tam nang ulamak touk, isa si erena ati, isa urasin atonun ning memebuka deiamik ning ati, ‘Nun ni telebe,’ nyabikirye, aisa si erenyake. Ati ara, sik amalye ning talibuka unyak nang nirya ara, na bataknikirye, sik kanye aryuk, ‘Winipnamabe,’ tenebikce ninguk ubuka, pia malye ning ukirye, aning nirya ati, kanye deibuka unyake. Aning nirya ara, pia malye weik wininyake.
Dipmalinye deibuka unmakce nang ati, yuknye birye, ‘Na kayapu nang talima melipnamneʼ tenen, roti kwaning dabuka boyalirye, kum yanuka arepnamle. Tonda, ‘Se sik wisi nang, na kayapu nang ara, sik ni yapu ap, sik nin yapu ap akunum dipmarakba, malye kanye bobuka unmak nang ati, sik ikin unmalya ati melipnuyapʼ tenen, teleb din ap, mek ap kwebuka, arebibiba, kum dinamake. Aning nirya ara bataknamlume.
Yata winipnamaka ati, siltong teleb ning, el si ara kemenyan ara, weik pera mutuku el si ara, Syeba mutuku arye bobuka, na dam boyanganyak do? Tonda, pia teleb gwei ap, yuk-yuk bona ap, weik pera mutuku arye bobuka, na dam boyanganyak do? Tonda, kam ning obuka, ‘Nun malye winin ning kum daneipnamsil’ tenen, boyakirye, uku dongonyak do? Aning atouk, yuk teleb ning ayala-yala nirya, na si erena ati, arelyanganyaka ara, yata deiyok ati do? Aning-aning nirya boyakirye, nati areninyak bukni, sik talima ara, na dam pia kum ulule. Malye wininyak diparyuk aning areniyake. Ati, aning nirya ara, ‘Na like,’ nyapsine.”
Ance, ‘Se, bicoʼ tenen, kanye aryuk tenapnalam bukni, yuk nang, sik aik ninye dibikcopura, sikce ngalukuka, malye weik nyalamak touk, kum winipnalyame. Aning kume. Tonda, an kisok kitina ara, kwiribuka batakmince bana ap, tonda an yan kinikna ning, sandal banang bana ara, kume. Sik kayapu dipmakceba, deipmakirye engelamak atonun, winina kume. Tonda, yuk nang arye, ‘Yuk nang eibikirye, bico tenepnamsiakʼ tenen, kalun ning arye, sik urasin outam kilongona ap, ninye dipmakceba, engebikcak arye, atalak dinyak din ning roti kwaning dilamak touk, an dina meme.” Allah arye nyapnuke.
Ati, Allah arye lo areplyeba, yu nang arye winipsikceura, anggun amutuku ululum Israel yala nang arye, na kil dipmokba, na atalak winipmana eipmalum touk, anggun babye winipnamlume. Allah arye nyabuk. “Ara, kisok kalun ning arye, anggun urasin amu tam kum lelipdanamlulume. Tonda, anggun yan kinikna ning sendal batakna kumce, anggun kinikuka banamlulume. Tonda, ninye dipmakce ati deipmamunce, engelamlum talak dapmaminye roti kwaning ara, pia kum dipnamlume.
Daniel birye, pia moubuka tenebukce, ‘Ninye deiyoknye Raja ap, el melin nang ap, sik dinyak din ara, nara kum dinamne. Ara, adin dipnya deice arye, na nong malye bol bopniba, Allah arye kanye kum deipnilyake,’ tenebuk. ‘Na malye kum winipdeipdanune’ tenen, Aspenas biti, ‘Yuk din ton boyanutume,’ nyabukce, binuka morobuk.
Aning nirya, winipse ning ara, bikilina ati winipse. Winipse ning deiyok nong ara, ani. Ara, sik Israel ninye, sik deiyok nang unyakce, ‘Winiplulume,’ nyan nang ap, ninye deiyok nang, Raja nang ap, Israel ninye kum talinamake. Ara, keting tamun yupa weik noutam arye, urdemuk unamake. Tonda, atalak noutam, sik malye ning kum danana ati, kam ning dobuka, Allah dam arelyanganyak ning ap, Allah el si eren aik bana ap, Allah ap, ninye ap, ansinilina pil dona deiyok nang ap, aning nirya kum danamle. Israel ninye ara, urdemuk unamake. Tonda, talye ning ati, “Nun ni usulule,” nyabuka, Isa Mutuku Dongonye si eren ning babye, kum talinamake. Keting tamun yupa weik noutam arye, talibuka ukirye, mambul kanye bobuka unamake. Allah arye nyabukba, Hosea birye sekuk.
Sik anang nirya arye, na Allah ati batakaninyak bukni, tuba-tuba isa, el si ara dewa-dewa, tonda Bahal ati, dipkoprob mikip kum ning, talye ninguk ulul bukni, el si erenyake. Aisa ara, sikti, pia kum meliptue. Winipmanto ara, sik anang ara, ‘Mal dopnamapʼ tenen, yin talibuka pipnamak bukni, yin malye arye mal dopmanto kum ulamak touk unyake. Tonda, sik talibuka unyak ninye deiyok nang nirya ara, kwalina deice arye, maknya kintinin yupu nyanyake. Wininyaka ati ara, lo arepniba, yu nang yakirye, pia yu parang boyanuka, aya arye sik anang nirya ara, opnamake. Bukni aning nirya ara, narya, winipniba, sik Mesir mutuku unyak nang nirya arye, Israel yala nang ati, akutunamake. Aning nirya ara, Allah arye nyabuk.
Aning kum bukni, tonda, sik Israel nang arye, ‘Allah el si erebibirye, elti, si erebuka kinamapʼ tenen, kam ning obuka, boyanuka arelyanganinyake. Tonda, kam ning boyanuka, Allah ati yanuka arepnikirye, atup kalinyaka noutam arye, bokuka dinyake. Wininyaka babye, na Allah Yahweh ara, ‘Pia na lik,’ tenenuna ati, sikce areninyak ning ara, ‘Na likʼ tenen, kum dolonune. Ati wini talak ara, narye sik malye wininyak ning nirya ati, tenepnirye wenepnamane. Adeiyok ara, sik malye unyaka ati, weik tonun wenepnamne. Ati naryuk sik tamubuka, Mesir mutuku uk dopkwetepnamne!
Nabi Yoel birye nyabuk. Se, Allah Yahweh el si eren aik koproba noutam talibuka, Allah si erena ati, kam ning obuka, uku dongolalum nang, imam-imam nang nirya arye, malye kanye bobuka engepnamlume. Anggun Allah si eren aik noutam, ongobuka pil dolulum baju kwiribuka batakmunce, malye baju arye, kisok kwatibuka malye yupu nyapmunce, engenamlulume. Ara, lukunyan noutam nirya ngalukuka, malye yupu nyabuka engenamlume. Deiyok ara, sul kwising arye, anggun wa kouamunye ning nirya, dibuka sirya dakanmaka ati, Allah arin ning ati, gandum ap, anggur mek ap, kum arelyanganamaka ati, malye yupu nyabuka, engenamlulume.
Tonda, sul kwising arye, aning-aning nirya akunum dipliba, yakong atonun ning el si ara, gandum ap, anggur tapu duk purubikiba, anggur mek nirya ap, Allah Yahweh el arena ati, el si eren aik delilbalamik ning nirya ara, akunum kum danamale. Winipmalba, Allah Yahweh el yupu nyan aik, pia talibuka tuba-tuba pil donyak nang, imam-imam ara, ‘Se, nun ni Allah ati, kum areptibye’ tenen, malye yupu nyabuka engenmake.
Yoel birye nyabuk. Nun ni koproba Allah arye nunti, bico tenesulul ning ara, yatanye birye, ton biktua kume. Allah elcuk teneplirye, ‘Aninye wenebuka opnune,’ tenebuk ning ara, batakturye, ‘Aning ara, kum winipnune,’ teneptu do? Bico tenepsuturye, namin kipnamsil do? Winiplirye, Allah elcuk tamubuka, weika arye anggun dam teleb ulinamsil do? Nun walwal bukni, ‘Winipsutu’ tenen ati, anggun nirya arye, Allah el si erena ati, anggur mek ap, gandum ap bobuka, arelyanamnulume.
Ayupu nyapman ara, talye ati kum nyapsine. Deiyok ara, ani. Domba ato ning ayala-yala nirya ara, ining deice aryuk, kam unyake. Ati ara, na Allah Yahweh arye, ‘Iningʼ kum dinamlume,’ nyapsise ninguk kekebuka wininamlume. Tonda, domba ato ning nirya opmunye ning ara, “Aining ning nirya, boyamunba, Allah si eren aik dam, yanuka arebikceba, uku dongolulumak, el si mesba deice, aining likeipmunya deice arye, anggun malye winilulum ning nirya ara, kilibuka kum kum daneipnirye, kum kilinamsile. Ining arenamluma deiyok ara, ining noutam ara, kam una deiyok ning aulule. Ati, ining arepnumunya deice arye, anggun malye winin ning nirya pununa ati, aning nirya kilipnirye, kum kipdeipsinirye, lyepnamsine.
Anyapdeipnun yupu ara, ance Harun biti, laka nyapdeipnulyame. Yatanye do nirya, ance deipminyeba, dadeipdanin yanganyak nang bukni, tonoknye ton el taruk do, yan do, tonda el nong bol deice nirya ara, malye wamlinye birye, na si erena ati aren ning ara, kum arelyanganamnulule. Aning nyapmakin yupu ara, wini talakuk kum bukni, wini talak arye dipdongobuka, doupnin banamak talak nirya babye, malye wamlye nang arye, pia kum arelyanganamnilule.
Aning nirya deiyok ara, ani. Harun elce deiamukba, dadeipdanin banamak nang, sik imam nang nirya ara, sik nong bol malye wamlye nang nirya ara, na Allah Yahweh arena ati, din ning boyanuka, na dam kum arelyanganamniake. Atonun nang nirya ara, na aren ning boyanuka, uku kum dongolyanganamake. Deiyok ara, sik nong bol deice, malye ning wamlula ati, sik ni koproba Allah, na dam kum yanganamnyake. Na si erena ati, din ning boyanuka, kum arelyanganamniyake.
Deiyok ara, sik imam nang ara, na Allah ap, ninye ap, elana aik noutam pil don nang unyaka ati, nyapne. Sikda ‘Naʼ tenen, nanguk unamake. Tonda, Israel nang, ‘Allah arye, nun malye winipmap ning, kilibuka lyepnamsilʼ tenen, domba ato ning dobuka obikirye, uku dongolbanyake. Din ning, ayala-yala weike, na Allah, na si erena ati, arelyanganinyake. Ati ara, malye ning dam una do, talina do, ubikce deice arye, nara Allah, na si malye kum kilinamniyake. Tonda, sikce na si erena ati, mambul pil donyakce, nara pia teleb, ektedopnye, leknye biti, si ereninyak ati, ara sikce malye ning, bol pina kum aryuk, pia telebuk unamyake.
Israel nang nirya ara, bikinamake. ‘Imam nang nirya ara, Allah arye wibuka deibuk nang unyaka ati, sikda malye winin ning pia kumce, pia teleb ninguk wininyake. Ati sikda, nong teleb, lek nang unyake,’ tenenamake. Deiyok ara, sik imam nang arye, din ning bobuka, na Allah si erena ati, arelyanganamniyake. Nara, Allah Yahweh unune. Nara, Pia Teleb, Lek Weiknye unune. Tonda, naryuk, ‘Naʼ tenen nang, na mapu Israel nang anggunti, pia teleb ubuka, lek nang kilisunune.
Anggun malye weik tuba-tuba winilulum ninye ara, ‘Nun malye ning dekna ati, kam ning obuka uku dabibirye, Allah ati si erebibirye, moronamabe,’ nyamunce, kam ning domba basam ap, kambing basam ap, anggun wa wining gandum ap, yakong atonun ning ap, boyanganauk ululum bukni, aning nirya ara, na like. Anggunce, ‘Nun ni Allah arye lyepnamsilarya’ tenen, kam ning ap, gandum ap, na dam boyangalulum ning ara, kum dolosunune. Tonda, anggunce na arena ati, meta weik ning obuka boyamunce, tup sekdoba uku dongopmunce, ‘Nun malye wininyap ning ara, kum kipdeipsila ati, nun Allah ap epdanuyabe,’ tenelulum ning ara, kum epdanamabe. Aning nirya ara, talye atibuk tenebuka winilulume. Anggun malyeuk winimunyeba, aning boyanuka arenululuma anya arye, narye aning nirya, pia kum dolosunune. Aning na lik anya arye, kum dinamne.
Tonda, yuk malye winin ning ton awinilulume. Ara, Allah Yahweh ati, arin ning delilyangana ati, keil lelebuka yangapdeibikak boyangamunce, malye kanye bobuka, asing maka deice arye, engemunce nyalulume. “Se, yata ati, Allah Yahweh elti, arepmap ning ara, kanye deibuka kum dopropmasil do? Yata deiyok ati, nun ni Allah ara, nun moronyap ning kekebuka kum aresulul do?” nyabuka engelulume.
“Ance sik Israel nang ati, binuka nyapnulyame. Na Allah Yahweh si erena ap, arena ati, sik adiparyuk din ning nirya ara, yanuka arebikceba, imam nang arye bobuka, uku dongobikceura, uku arye diplirye, siltong teleb ning ara, tulum welepliba, kekepnirye, na kanye delinamne. Aning arepnamniyak ning ara, narye, ‘Aning ara, atalak arenamnulume. Aning ara, atalak ton arenamnulume,’ nyapdeipse touk arepnikirye, pia moubuka kalikikirye, dinmakibuk uku dinamle.
Winibicopura, ‘Allah Yahweh ara, nun dam aululeʼ tenena ati, roti kwaning delinyakak ati, memebuka delinyak meja ara, cang kain el bol ara, im sukulamle atonun ning arye, bibikdeipnamnyake. Winibikiba, teleb uplye talak ara, siltong teleb nyana ati, uku dabuka delina ati piring ap, mek makau ap, cangkir ap, tonda anggur duk arye, purubuka delin mek libuka delina ati, amek makau ton, yuk-yuk kintinbuka, im sukulamle atonun kain deice deipnamnyake. Tonda, Allah el arena ati, din mek arena ati mek makau ap, tonda din ati kintinbuka dalulum roti kwaning ap, kintinbuka, im sukulamle atonun kain deice deipnamnyake. Aning-aning nirya ara, akain deice, kintinbuka deipnamnyake.
Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.
“Tonda, nun ni Allah, anti arekinyap ning ara, tonok babye ton, nun kwit capu dibikiba, engebuka bulunyap talak ara, an tenen ning ton, kum dibupu. Tonda, nun malye winibupe talak ara, an dam kum wekmanto winibupe talak ara, nunce an ‘Naʼ tenen ning dobuka, kum dibupu. Tonda, ‘Akunum diamik ninye, sik sambala arye melipnamsil’ tenen, an ‘Naʼ tenen, ning ton bobuka, sikti, kum arebupe. Aning nirya kum bukni, an Yahweh arye, ‘Aning ara, winipnamlulume. Winibuka winipnamlulume,’ nyapdeiamlum yupu nirya, moubuka kekelamuburye, aninguk winilamupu.”
ကြော်ငြာတွေ