Tonda, Allah arye tia ati, Silo mutuku noutam ulamuka ara, amutuku batakuka bindobuk. Ara, Allah el yu weik ubuka ati, tia talak arye, ‘Na ap, Israel nang ap, neika unamap’ tenen, el si eren aik ati, terpal arye, domik aik, el si ara, Ansinilin Tenda Aik, Silo mutuku noutam, tia ati dobik ning babye, Allah arye anyaik batakuka bindobuk.
Hosea 9:15 - Eipomek15 Hosea birye nyabukba, Allah Yahweh arye tamubuka nyabuk. “Kume, Israel nang arye, malye winin ning talibuka, malye weik winilamikce, tuba wininyak ning nirya ara, Gilgal mutuku arye, deiya koubike. Aning winibika deice arye, atalak ara, narye sik anang ati, ‘Na lik, upnile,’ tenenlamse ninye nirya ara, deiyok kouamse. Deiyok ara, sik malye winin ning nirya winipnin yangalamika atia. Ati, sik anang nirya ara, na mutuku arye, yakuka dopkwetepniba, yuk mutuku uk binamake. Narye sik anang ati, ton bico kum tenenamne. Tonda, sik ninye deiyok nang nirya arye, mandipna kanye bobuka, narye nyapdeipse yupu nirya ap, na ap ara, yaninauk unyake. Ati anang nirya ara, kanye kum delinamsine. Tonda, anggunti bicoe tenepsinirye, anggun ton pia kum talinamsine. အခန်းကိုကြည့်ပါ။ |
Hosea 9:15
38 ပူးပေါင်းရင်းမြစ်များ
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Tonda, aning tenipdelulume! Na Allah arye, na mapu koproba ati, bico tenelamse buk, sikce malye ninguk tuba wininyake. Ati ara, na Allah si eren aik, kum wekelyakirye, morolyanganamake. Na aik pum tam kum wektinge. Narye sikti, kum tenenamne. Tonda, sikce tenenyaka ara, ‘Kume, nunce Allah ati, nyalin yupu nyabuka, delinyap ning ap, tonda el arena ati, domba ato ning obuka arelyanganyapa deice arye, Allah el kanye teleb kilinyaba ati, elce ikin ning areplyeba, nun dam yasilyeura, kum dopropnamabe,’ tenenyake. Winibuka tenenyakce, kanye delinyak bukni, aning teneptinga babye, narye sik wenena ati, obuka sice buklopnamne ning ara, adiparyuk kum datu do? Kume, aning ara, kum winipmantoe.
Allah arye, na Yeremia biti nyapnuk. Narye aninye ati, sik wenen ning kum bataknamne. Sik apu yapu, weik mambul nang, Musa ap, Samuel ap, na dam yanuka tikdikirye, ‘Israel ninye ati bico teneplyame,’ nyabuka, yanuka moropnirikce babye, bico kum tenepnamne. Sik aninye malye wininyaka anya arye, dekna ati wenepnamne. Aninye ara, dipkoprob narye sikti, dina lik unulula anya arye, sikda adiparyuk bindopnamnyake. Ance, aninye ati, ‘Allah dam arye batakuka bilulume,’ nyapnalyame.
Nyapsirye, aning ton tenepse. Wini talak ara, weik nang, sik bona talin nang dam binirye, “Sik ap, yupu talipnamabe,’ tenepse. Na kanye ara, ‘Dipkoprop sik bona talin nang ara, sik si erenyak Allah arye, “Aning ara wininamlume. Aning ara, pia kum wininamlume,” nyapdeibuk yupu ara, sikce akunum kel bikamikce, ‘Aninguk talibuka wininyake,’ tenepse. Bukni, anang dam bisirye, yupu talibupuura, akunum kel bikse. Ara, sik anang babye atonun, an Allah arye, ‘Wininamlume,’ nyapdeiamsulum yupu nirya ara, sikce, ‘Aning ara nun lik, Allah arye nyasulul ning ara, nun like,’ tenebuka, ayupu yaninauk wininyake. Ayupu ara, moutalibuka kum wininyake. Winipmanto ara, ninye arye, ‘Tapu arye, nun sapi basam kirikibirye, telebak libuka bobinamapʼ tenen, tapu kirikmace bukni, asapi basam balye potong tiklirye, yu uplyeba, atapu buluploplirye, el teneplye touk, yukak balamle touk, sik anang babye, sik kanye tenen ninguk wininyake.
Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.
Akil ara, sik Asyur mutuku deiyok nang ati ara, batakuk bukni, yuk ninye ap neika mana ara, tuba winilamuk. Aning akunum winibukura, akil arye dowinipnin yangalamuk ning ara, talye yon kiluk, dukunubuka winilamuk bukni, atalak ara, ninye nirya dinak arye, malye winilamuk. Ati, na Allah arye el dukul biti, lik ulamnuk touk, el weit kil babye, na dina lik unulule.
Hosea el kil Gomer, tuba tonap mi bomuka ani, kilmu deibuk. Akunum deibukopura, Allah Yahweh arye, Hosea biti nyabuk. “Akilmu el si ara, Lo-Ruhama si dopnamlyame. Ibrani yupu deice arye, asi Lo-Ruhama nyanyaka deiyok ara, ‘Bico tenebuka melina kume,’ tenena ati nyanyabe. Ara, na Allah arye, anggun Israel ninye ati, bico tenebuka, ton kum melinamsina ati, asi nyapnulyame. Tonda, sik malye wininyak ning, namin kipnirye, kum lyepnamna ati, an kilmu si ara, Lo-Ruhama nyapnulyame, nyapkine.” Allah arye, Hosea biti nyabuk.
Ami bitinyanye akunum deibukopura, Allah Yahweh arye Hosea biti, yanuka nyabuk. “Ami el si ara, Lo-Ami nyapnulyame. (Ibrani yupu deice arye, ami el si ara, Lo-Ami nyalamaka deiyok ara, ‘Na tenena ninye kuma’ tenen ati, nyalamik.) An mi el si ara, Lo-Ami nyapnaluma deiyok ara, sik Israel ninye ara, na mapu koprop tuba kum unyake. Tonda, ‘Nara, anggun ni koprop Allah, ton tuba kum unune,’ tenena ati, asiuk, nyanalyame,” Allah arye, Hosea biti nyabuk.
Tonda, minop talak ara, naryuk anggun nabi-nabi nang ati yanuka, ‘Winipnamlume. Tonda ayupu nyapnamlume,’ nyabuka laka nyamse. Tonda, lengdar deice arye, lak kilin ning babye, pia weik tonun, sik nabi nang ati areyamse. Winipsa ati, wini talak babye, nabi nang dam laka nyapnyopura, sikce aminyan talak, imun weik upnamle ning yanuka laka nyapniba, sik nabi-nabi nang kekebikirye, na mapu anggun Israel nang ati, laka nyanamsiake.
Winipmanto ara, ninye arye, ‘Keting panalyangan tam yangalamle kumanya balamlak ara, nun ton bikibirye, aning tomobuka talipnamabe. ‘Beren tam talak arye, dipdongobuka sintam ara, kumanya talipnamabeʼ tenen, nang atonun unyake. Ara, sik Israel nang arye, ‘Asyur mutuku nang arye, yanuka opsicak ati, yata mutuku nang arye, melibuka lyepsiting do?’ tenen, Mesir mutuku nang morona ati, minyak kwebikirye, dekelbanyake. Tonda, sik Asyur mutuku nang dam bikirye, ‘Se anggun ap, nun ap, mal olana kumce, teleb ubuka neika uptibye do? Nun ap neika, nun kwitcapu, kipdanamabeʼ tenen ati, morolbanyake.
Aning nirya, winipse ning ara, bikilina ati winipse. Winipse ning deiyok nong ara, ani. Ara, sik Israel ninye, sik deiyok nang unyakce, ‘Winiplulume,’ nyan nang ap, ninye deiyok nang, Raja nang ap, Israel ninye kum talinamake. Ara, keting tamun yupa weik noutam arye, urdemuk unamake. Tonda, atalak noutam, sik malye ning kum danana ati, kam ning dobuka, Allah dam arelyanganyak ning ap, Allah el si eren aik bana ap, Allah ap, ninye ap, ansinilina pil dona deiyok nang ap, aning nirya kum danamle. Israel ninye ara, urdemuk unamake. Tonda, talye ning ati, “Nun ni usulule,” nyabuka, Isa Mutuku Dongonye si eren ning babye, kum talinamake. Keting tamun yupa weik noutam arye, talibuka ukirye, mambul kanye bobuka unamake. Allah arye nyabukba, Hosea birye sekuk.
Nyabukce ayupu ton nyabuk. Se, Israel ninye arye, malye-malye weik wininyaka ara, anggun Yehuda tam ululum ninye arye, aning eibuka, kum kel biknamlume. Winipmanto ara, sal arye sik min arye domice kilapu batakikirye, talye yoltalamak kilapu dekikirye, neika malamak touk, sik Israel ninye arye, sik ni na Allah ati, batakaninyake. Bukni, anggun Yudea tam ululum ninye arye, ‘Nun babye atonun, malye winin ninguk talibuka unamap’ tenen, Israel ninye winilamak touk, kum wininamlulume. Sik Israel nang kan-kan arye, ton nang arye, “Allah el si erena ati, teleb ubuka arin ning arenamabe,” nyabuka, talye yupu nyaplobikirye, Gilgal mutuku ap, Betel-Awen mutuku ap banyak bukni, dipkoprob ara, nati si kum ereninyake. Dipkoprop malye wininyaka ara, anang arye, ‘Isa si erenamap’ tenen, amutuku duknulbanyaka anya arye, anggun Yehuda tam ululum ninye ap, amalye winin nang ap, amutuku ara bitinye, Gilgal mutuku ap, Betel-Awen mutuku ap, mutuku deice neika welebana meme nyapsine. Tonda, anggun malye weik winilulum ninye arye, ‘Yuk nang arye, dib tenepnamsiyak’ tenen, “Allah Yahweh dipkoprob kam pia aunamle touk, nunce dib yupu nyapsiyabe,” nyalamak ning ara, anggun nirya arye tonap, ayupu kum nyanamnululume. Israel ninye tilila yupu nyabuka, malye wininyaka atonun, ‘Anggun Yehuda tam ululum ninye babye, malye winipmunyak’ tenen, nyapsine. Ati, sik aninye wininyak touk, anggun Yehuda tam ninye atonunuk, kum wininamlulume. Allah arye Yehuda tam ninye ati, nyabuk.
Tonda, anggun na si eren aik pum tam, pil dona deiyok nang, imam nang ululum bukni, malye ning weik winiluluma atonun, sik Israel ninye nirya babye, malye weik wininyake. Ara, urdem ati kume. Anggun deiyok talibuka peterelulum nang malye ululumba, yuk Israel ninye eibuka kel biksikirye, anggun malye winilulum touk, anggun taliplum ninye babye malye wininyake. Anggun nirya ato touk, malye weik winiluluma ati ara, anggun imam nang babye, sik yuk daunyak Israel ninye nirya babye, weik arye wenebuka opnamsine.
Wininyak bukni, sikce moubuka kum teninyaka ara, ani. Ara, na Allah arye, sik Israel nang nirya ara, sik kanye talima noutam malye un ning nirya uamlya ara, pia lak elinirye, bikinune. Akunum biknyopura, tuba teninauk unune. Ati ara, winipmanto, sik dana-dana tam nirya ara, sik malye weik wininyak ning ara, antanap dongobuka ulyeba, atuba el linauk unune. Malye wininyak ning ara, na urasin dam tuba ulula ati, aning tuba elinune, nyapsine. Allah arye nyabuk.
Allah arye el mapu ati, kanye deiplirye, tuba bicoe kum tenepnamle. Deiyok ara, Allah elce nyalul yupu nirya ara, pia moubuka kum kekelamika atia. Aning winilamika ati, na si erenun Allah, elce sikti, bataknamle. Elce Israel nang akunum bataklyopura, sik anang nirya arye, tonok sukum una kumce, mutuku sirya, im sirya nirya ati, epra banauk unamake. Nabi Hosea birye nyabuk.
Se, anggunda, Israel mutuku noutam ululum nango. Anggun ni Allah Yahweh arye, ‘Pia teleb mutuku arepsiniba, asukumuk unamlume,’ nyabuka, kintinipsukce areamsuk mutuku noutam ara, pia asukumuk kum unamlume. Efraim yala nang arye deiamikba, dadeipdanin yangalamikce, delinyak nang ara, amutuku kum unamlum bukni, anggunda adiparyuk tamubuka, Mesir mutuku uk binuka unamlume. Tonda, anggun yala nang bukni, yuk nang bokuka, Asyur mutuku bobisikiba, amutuku noutam arye, malye kwaning dinamlume. Ara, na Allah arye, ‘Na mapu ara, adin ning pia kum dinamake,’ nyapdeiamsisirye, ‘Aning dina ara, meme. Aning dipmunyopura, na dam ton kum yanamlume,’ nyapdeiamsise ninguk, talye mangkau asa dobuka dilulume.
Aning atonun, anggunce mutuku kon deice memebuka deiplumce, anggun ning nirya bobuka, mutuku kon deipmunce, isa si erena ati, uku dongolulumak nirya ara, narye uluplopnamne. Tonda, isa si erena ati, kin-kin tong ning dobuka, uku dongolbalamlumak nirya ara, dakuka uluplopnirye, kum kipdeipnamne. Winipnyeura, isa si erena ati, weilbalamlum ning, anggun si eren ning nirya ara, sik nong nirya dakukapnirye, donoknamne. Anggun ton oplopsinyeba, dipmunyopura, anggun nong dopropnirye, anggun talye ning si erelulum ning ap, isa si erena ati, memebuka delilulum ning, el si patung ap, dakukapnirye, adeiceuk, anggun nong dobuka, adeice deiplopnamsine. Na kanye talima noutam ara, pia malye weik winilulumba, na lik unulule ati, dukmanto kanye unirye, aning nirya ati ara, ‘Anang ap, aning ap nirya ara, na like,’ tenenune.
Allah Yahweh arye, sik Israel ninye ati nyabuk. Na mapu Israel nang, anggunda ilil una kumce, anggun nirya Betel mutuku bimunce, na si erena ati, kam ning obuka, arelyanganamlume. Aning atouk, Gilgal mutuku bimunce, na si erena ati, yuk ning ton arelyanganamlume. Anggunda, malye ninguk talibuka, tup-tupa wininmalumce, na si erenululume. Ati, kam ning obuka, arelyanganululum ning ara, nong bol deice atonun ning winilulume. Malyeuk winiluluma anya arye, na si ara, dipkoprob kum erenululume. Betel mutuku babye, Gilgal mutuku babye, lukunyan talak nirya, kam ning obuka yamunce, arelulume. Tonda, ining ninguk kum bukni, anggun wa wibuka koulalum ning bokuka, ton tam ning ara, like winilye sum ton, akunum uplyopura, tup-tupa nati, aning arelyanganululume. Bukni, anggunce malye wininmamunye diparyuk, aning-aning nirya arenululuma anya arye, dipkoprob ara, anggunce kam ning ap, wa wibuka koulalum ning ap, arenululuma deice arye, malye ning weik tonap, tabakuka wininmalume.
Aning nirya winiluluma ara, anggunti wenepnamsine. Na akunum tenepse talak ara, narye lo arepneba, yuk pera mutuku yu nang arye, anggun opsikirye, tapu koubuka bobinamsiake. Ara, pia pera weik mutuku, Damasyik mutuku arye, otam mutuku, keting panalyangan tam bobinamsiake. Awinipnamsiyaka ara, narye donoknamsin talak ati, nyapsine. Ara dipkoprop, na Allah Yahweh arye, aning-aning nirya talibuka, deice tam unirye, im deice yin talin nang nirya, sik deiyoknye birye nyapsine. Si Weik Erenanye mikip weiknye bira, na uka. Narye ayupu akunum nyapdeipsine. Allah el si Yahweh arye, sik Israel ninye ati nyabuk.
Anggunce yuk talye ning ap, Isa Mutuku Dongonye si ap erena ati, Betel mutuku bana kume. Tonda, Gilgal mutuku si erenyak isa ati, ‘Sik si erebibirye, melipsiting do?’ tenen, Gilgal mutuku kum elbinamlulume. Atonun tonda, ‘Bersyeba mutuku bibirye, sik isa si erenamap’ tenen, bana kume. Aning ara, talye ati kum nyapsine. Sik Gilgal mutuku asik dobuka, unyak ninye nirya ara, sik wenena ati, narye lo arepneba, yuk mutuku yu nang arye, Gilgal mutuku unyak ninye obisibikirye, tapu koubikirye, sik mutuku bobinamake. Tonda, sik Betel mutuku unyak ninye babye, sik wenena ati, kum kipdeipniba, ton kum upnamake. ‘Wininamap,’ tenenyak ning nirya ara, dipkoprob nong kum upnamle.
Tonda, Yerusalem mutuku noutam unyak ninye nirya ati, yupu lipsisikuka bokolina talak ara, diksukumuk ubuka, yupu kum bokolilulume. Anggun ninye deiyok kibuka, amutuku talilulum deiyok nang nirya arye, sik malye winipmace ninye ati, wenelamtum bukni, aninye arye, “Nun winipmap ning ara, namin kipsilyame,” nyanyake. Ara, yupu sekelana ati, yo bok arebikiba, tilila yupu deice aryuk nyalulume. Aning atonun, Allah el si eren aik noutam talibuka, pil donyak nang, anggun imam-imam nang arye, “Nunda yo bok weik arepsikiba doprobibyopura, amutuku noutam unyak ninye nirya ati peterenamabe,” nyalulume. Tonda, Allah el yupu nyapdeipliba, sik Allah yupu laka len ap, aminyan winipnamle ning ati lak lena ap, ati unyak nang nabi-nabi babye, “Yo bok arepsumunba, dopropmapya deice arye, Allah Yahweh elce nyapmasil ning ara, lak lepnamsiyabe,” nyanyake. Wininyak diparyuk sikce tenenyaka ara, ‘Kume, Allah Yahweh, nun dam ausulula ati, ikin ning nun dam kum yanganamsile. Telebuk unamabe,’ tenekirye nyanyake. Utenenyak deice, Allah arye kanye imun ning dobuka, sik nong deice delinamle.
Tonda, na mapu koproba, Israel ninyeo, anggunce akunum luba kiplum do? Anggun tuba tonap, moubuka tenepnululume. Ara, Moab mutuku ninye nirya taleamuknye, Balak birye, ‘Israel ninye nirya ati, wenepnirye opnamsine,’ tenepmasuk buk, Beor el mi Bileam biti yukubukba, yayukce, ‘Israel ninye luba kina meme,’ nyabuka morobuk bukni, Bileam birye, el dam yata yupu nyamuk do? Bileam birye, anggun Israel ninye ati, teleb yupu nyapsuk deice arye, telebuk upsuke. Tonda, minop talak Sitim mutuku arye batakuka, bisik balamlum ani, Gilgal mutuku noutam bilum talak ara, anggun melina ap, kel bikna ap ati, pil weik tonun dolamsise ning ara, akunum luba kiplum do? Kume, anggun Israel ninye ara, ‘Se, nun ni koproba, Allah Yahweh arye, nun lyena ati, pia dipkoprob mambul weik pil dosulul’ tenen, ‘Kel biknamlum’ tenen ati, narye weik mambul pil dolamsise ning ara, akunum luba kiplum do? Anggun aning nirya moubuka tenipdemunce, kel biknamlulume. Na Allah arye, dipkoprob lyepromsise.
Amutuku noutam weik asik talibuka unyak ninye deiyok nang ara, yu singa kus arye, weik yupu weik tonun nyaplirye, yuk kam ning obuka, dilamle touk, sik adeiyok nang arye, weik yupu nyabikirye, ‘Nunda yata ning ton, ubula doproptibye do?’ tenen, malye weik wininyake. Tonda, amutuku unyak nang malye winipdakiba, amutuku deiyok nang arye, ‘Sik malye winipdanmace ning ati, yupu bokeipnamabeʼ tenen, bulubikirye, yupu bokolina ati, deiyok nang ara, winipmanto unyake. Ara, bai tam yu ulamle kam, dina weik tonun pataplirye, aupmalye ning obuka diplirye, sirya daklamle touk, unyake. Tonda, ayu kam winiplirye, ‘Adin ara, kwal deipmanya ani, beren tam talak ton, tamubuka yanirye, dipnamne,’ pia kum tenelamle touk, amutuku yupu bokolina deiyok nang babye, adiparyuk yuk nang talinyak ning, alubuka dolonyake.
Ati sik domba weina ati deiyok nang winilye nang arye nati, ‘Nun like,’ tenelamnik. Winibuka tenelamnikba, narye sikti, ‘Se, sik anang ara dan talak arye teleb pil donamak do? Pia sikcuk ukirye, teleb ubuka pil kum donyake,’ tenepse ati, ‘Aning ara na pia like,’ tenepsirye, ‘Akunuma sikda dauplye,’ tenepse. Winibuka tenepse ati, tonok wala deice aryuk, sik adeiyok nang winilye ati, wenepsirye, yakuka dopkwetepsirye, obuka sice buklopse.
“Ara, Daud arye nyapdeiamsuk touk, dipkoprop Herodes ap, Pontius Pilatus ap, Yahudi yala kum ninye babye, Yahudi yala ninye ababye, anang ap, Yerusalem mutuku bulubuka wekik akarye, ‘Obisipnamap’ tenen, an yupu uk kekebuka, an piluk melibuka mambul pil dolulnye Yesus ati, yupu sisikinmek. Anye Yesus ara, ance wipdeiamlum akarye, ‘Ninye lyepnamle’ tenen, erepdeiamlumnye biti, yupu sisikinmek.
Nyabukura, daunmeka ani, akunum berekukopura, Yahudi yala nang, sik Allah ati arilbalamik aik buru tam wiyamik poka wekukabikce, anyaik dam binuka wekmek. Wekmekce, Allah el im deice yupu lak lenanye nyapdeipmok touk, awekmek nang ati, deiyok koubuka peterenmek. Sik peterenmek talak ara, Yahudi yala nang sik Allah arena deiyok nang, sik weik deiyoknye ap, el melina nang ap, bulubuka wekikce, Israel nang sik du yapu nirya, ara Sandeheren nang yukubikce, tonda sik amu tam pil dolamik nang ati ayupu nyabik. “Yesus wibuka deiyamuk nang wenena aik pum bisik dongopmapa ara, dobuka boyalulume,” nyabuka anang dopkwetebik.
ကြော်ငြာတွေ