Hosea 7:2 - Eipomek

² Wininyak bukni, sikce moubuka kum teninyaka ara, ani. Ara, na Allah arye, sik Israel nang nirya ara, sik kanye talima noutam malye un ning nirya uamlya ara, pia lak elinirye, bikinune. Akunum biknyopura, tuba teninauk unune. Ati ara, winipmanto, sik dana-dana tam nirya ara, sik malye weik wininyak ning ara, antanap dongobuka ulyeba, atuba el linauk unune. Malye wininyak ning ara, na urasin dam tuba ulula ati, aning tuba elinune, nyapsine. Allah arye nyabuk.

Hosea 7:2 ပူးပေါင်းရင်းမြစ်များ

Ayub 34:21

Winibuka ninye ati wenebuka olula ara, talye ati kume. Allah elce nun ninye ubirye, dan tam banyak bisik nirya ara, ‘Teleb unyak do? Malyeuk unyak do?’ tenen, disilirye, moubuka kalikisulule. Nun ninye winilamepye touk, wenebuka dengna arepnamsile.

Mazmur 10:11

Sik maknya kintininyak nang, sik talima noutam ara, ‘Kume Allah ara, nun unyap ning ara, pia kum bikisulule. Elce nunti, akunum luba kipsuka ati, malye winin ninguk talye mangkau asa wininamabe,’ tenenyake. Tonda sikce, ‘Allah elda, nun malye wininyap ning ara, kum elisulula ati, yuk nang ati, ikin ning pia weik tonun, sik nong deice deiptibya babye, Allah arye eibuka kum biksutue,’ tenenyake.

Mazmur 25:7

Ati ara, ‘Na wel ulamse talak ara, malye ning talibuka ulamse ning ap, tuba kum teneninamnilam’ tenen, moropkine na nio. Ance nunti, ‘Aning ara, wininamlume, aning ara, pia kum wininamlume,’ nyapdeiamsulum yupu yanipsirye, malye ulamse ning nirya ara, tuba kum teneninamnilam’ tenen, moropkine na nio. Winipsiminyopura, yuk nang nirya eipsikirye, ‘Se, Allah Yahweh, elda pia diksukum koprop unanye ulule,’ nyabuka, bikinamake.

Mazmur 50:22

Anggunce na Allah ati, ‘Elda bataknyabe. El ti kum tenenamabe’ tenen, pia lubakipnulum nang nirya ara, moubuka kekepnululume! Narye akunum nyapsise yupu ap, wini talak nyapsin yupu ap, moubuka kum kekepmunce, aninguk talibuka kum wininamlum nang nirya ara, wenebuka opsinirye, sice buklopnamsine! Winipyeura, yuknye tonok babye, anggun melina ati, yanuka kum lyepsitinge.

Mazmur 9:16

Sik mutuku sirya, im sirya nirya, yala yuk-yuk unyak nang nirya ara, ‘Ninye opnamap’ tenen, kintinibik ning ara, aning sik nong deiceuk tamubuka yanamle. Winipmanto ara, ninye arye ‘Kam ning opnuyap’ tenen, tuku palyamikca pum tam bukni, mangkau kanye bobuka, banmalya ani, sik mining lukamice tuku pum tamuk sakuka olanyake. Atonun, ninye arye ton, ‘Bai basam do? Yua basam do? Youpnamleʼ tenen, tapu dungnubuka welamak touk, ayu nang babye, sikce yuk nang ati, malye ning dobuka deilinyak nang ara, tamubuka yalirye, sik nong deiceuk upnamle!

Mazmur 90:8

Na ni Allah, nun malye wininyap ning nirya ara, ancuk kel bikisilyame. Tonda, ‘Ninye arye kum dinmaniake’ tenen, malye wininyap ning nirya ara, an asing arye eibuka, akunum bikisilyame. Anda dirina weiknye ulyama anya arye, nun malye wininyap ning, kum dungnuptibye.

Yesaya 1:3

Winipmanto ning ara, sapi basam babye, sik weilamak deiyok nang kel bikinyake. Atonun keledai basam babye, sik weilamak deiyok nang kel kibikirye, sik din arin sukum kintinililamak ara, akunum bikinyak bukni, sik Yehuda yala ninye ara, nati moubuka tenena kumce, sikce bita kel kum bikininyake.

Yesaya 26:16

Se nun ni Allah Yahweh, nunda ikin weik ulamupu talak ara, ‘Allah aryuk melipnamsilʼ tenen, anti morolamkupu. Ance nunti akunum wenyapsulumba, kanye imun ulamsuka ani, nunce, ‘Nun ni Allah antibuk, melipsilyame!’ nyabuka, morolamupu.

Yesaya 44:19

Yo arye ninye urasin atonun kibuka memenyak nang ara, pia moubuka kum tenenyake. Ara, ‘Ayo aniryuk, uku dabikirye, peikna ap, roti kwaning dana ap, kam ning ap, dabuka dinyap ning,’ kum tenenyake. Ara, ‘Wininyap yo sirya aniryuk dobukabikirye, ninye urasin atonun ning kintinibuka deibibirye, si erenyaba ara, talye urdemuk unyabe,’ kum tenenyake. Moubuka tenena kumce, talye kanye uk bonyake. Tonda, ‘Nun si erenyap ning ara, talye ning uka,’ kum tenenyake.

Yesaya 5:12

Sik anang arye, weik kwalya kwalibuka dinmace talak ara, mot sena ati, lelim len ning, el si kecapi ap, gambus ap, tonda rebana ap, suling ap onmakirye, kanye wangalamak mek, anggur mekuk dinyake. Wininyak deice sikce, ‘Se, nun ni Allah Yahweh, elce amambul pil donamleʼ tenen, sikce elti, moubuka bita tenebikirye, el taruk arye mambul pil dolamuk ning ati, si kum erenyake.

Yeremia 14:10

Nyabukce, ayupu ton dukdongobuka nyabuk. Allah el si Yahweh arye nyapmasile. Anggun amutuku ululum Israel ninye ara, na dam arye batakuka, yukak tuba-tuba balulume. ‘Malye una ati, yukak bipyak’ tenen, anggun babye anggun bidamang ati, kel bikuka kum kalikildalulume. Talye luba kibuka, malyeuk winiluluma anya arye, anggunti, kanye kum deilisunune. Anggun malye winiluluma ati, lik unulula anya arye, na dam ton kum yanamlume. Ati ara, narye anggun malye winilulum ning nirya ara, namin kibuka kum batakdongopnamsine. Tuba tenenuna arye, anggun malye winimunye ning ati, wenebuka opnamsine. “Allah arye nyapdeipnuke,” Yeremia birye nyabuk.

Yeremia 16:17

Winipnamna deiyok ara ani. Ara, narye sik amutuku nang wininyak ning nirya ara, akunum elinune. Sik wininyak ning nirya ara, na dam arye duknupmanto kum ati, yata ning do nirya, lakauk elinune. Ati ara, anggun amutuku nang arye, pia malye ning talibuka, wininyak ning nirya ara, elinauk unune. Aning nirya ara, kum duknupmanto. Ati, narye anang nirya wenebuka opnamnarya.

Yeremia 17:1

Allah arye, sik Israel nang ati, nyabuk. Se, anggun Yehuda mutuku tam ululum nango, anggun malye winilulum ning nirya ara, akunum anggun talima noutam pia aunamle. Winipmanto ara, ninye arye, kat ning el si besi dobikirye, kat keil deice teleb uka delilamak touk, anggun malye winilulum ning pia aunamsile. Winipmanto ning ara, ton ninye arye, anggun mesba sirik tam, dana-dana tam dumbarye belelamle deice, ara sapi basam kisok deice tiklamle tace ning atonun, aning deice, pia kat seken ning doptingce, teleb uka deipting touk, anggun malye winilulum ning ara, anggun talima noutam pia ati aunamle.

Yeremia 2:19

Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk.

Yeremia 32:19

Tonda na nio, ance sikti, ‘Aning ara, winipnamlume, aning ara, pia kum winipnamlume. Teleb winina ara ani,’ nyabuka laka nyasilyam ning ara, ninye arye kum tenipmanto, pia mambul ninguk melibuka nyasilyame. Tonda, ance pil dopminye ning nirya ara, ninye arye pil kum dopmanto ninguk, mikip weik deice arye, an pil dopra ulyame. Ninye nirya arye, pil donyak ning nirya ara, ance disilyamce, apil donyaba atonunuk dengna ara, aresilyame. Malye winin ning ati, ikin ning dolonyabe. Diksukum winin ning ati, teleb dengna ning dolonyabe. Moubuka eipsimince, nun winilamap touk, dengna ning arisilyame.

Yeremia 4:18

Se, Yehuda mutuku ululum nang ap, Yerusalem mutuku ululum nang ap, angguncuk malye weik ululuma deice arye, ikin dobuka, anggun dam deipdanamlume. Anggun domunye pil dolulum ning ap, tonda anggun deice ikin yalirye, anggun talima yanuka luksilyeba, uk dinamsile.

Yeremia 44:21

“Ura, anggun ton kekeplulume! Yerusalem mutuku noutam bisikak nirya ap, tonda Yehuda mutuku noutam asik nirya domikce, daulamik nang nirya ap, tonda anggun apu yapu ap, sik ninye deiyok kibuka taleamsikce, Raja-Raja ulamik nang ap, sik amu tam pil dona deiyok kiamik nang ap, anoutam nirya daulamik nang nirya arye, minop talak isa mer ati, sik si erebuka domba ato ning obuka, arelbalamlum ning ara, nun ni Allah Yahweh arye, kum eibuka ati, kum bikilule. Tonda, ‘Aning nirya akunum lubakibuk,’ tenepmalumce, ayupu nyapmanulum do? Allah Yahweh arye, ‘Nun malye winin ning nirya, tonap kum teninamabe,’ tenepnamlum do? Kume, anggun walwal aryuk aning tenepmalumce nyapmanulume.

Yehezkiel 21:29

Tonda, sik Israel mutuku nang, tilila yupu nyanyak nang arye, anggunti, talye yupu weika arye nyapsike. Ara, sik nabi palsu nang arye, ‘Kume, anyapmap yupu ara, Allah aryuk arepsukba, lengdar mapmuka deice arye, akunum nyapmasilak, kekepmabe. Israel nang ati ara, winibuka-winibuka winipnamsile,’ nyabuka, laka nyalamik bukni, sikce nyalamik yupu nirya ara, nong kum upnamle. Aning atonun ton, sik nabi palsu nang ara, isa ap yupu talilanyak nang do, isa merye sik deiyok nang do, sik dam binuka, asipdeyikba, anang sik isa mikip deice arye, ‘Aning ton, aning ton dipkoprob winipnamsile,’ nyalamik bukni, anang babye, talye tilila yupu deice aryuk nyalamik. Aning ati ara, Allah arye, lo areplyeba, anggun olan tam nang arye, ninye on parang ya dobikirye, yanuka, sik tilila yupu nyalamik nang ap, tilila yupu kekelamik nang ap ati, oplopnamake. Atalak ara, Allah arye, lo areplyeba, sik mal olan nang arye, parang ya bobikirye, sik pia malye-malye weik wininyak nang ara, ngang yok sekuka bataknamake. Sik pia malye weik wininyak ning ati, weik wenen sum ara, akunum yale. Ati, asum deice ara, Allah arye, amalye weik unyak nang ati, wenelirye, sirya akunum dakanamle. Allah arye anggunti, sirya ning wenepnamsile.

Hosea 12:2

Winipmanto ara, ninye arye, ‘Keting panalyangan tam yangalamle kumanya balamlak ara, nun ton bikibirye, aning tomobuka talipnamabe. ‘Beren tam talak arye, dipdongobuka sintam ara, kumanya talipnamabeʼ tenen, nang atonun unyake. Ara, sik Israel nang arye, ‘Asyur mutuku nang arye, yanuka opsicak ati, yata mutuku nang arye, melibuka lyepsiting do?’ tenen, Mesir mutuku nang morona ati, minyak kwebikirye, dekelbanyake. Tonda, sik Asyur mutuku nang dam bikirye, ‘Se anggun ap, nun ap, mal olana kumce, teleb ubuka neika uptibye do? Nun ap neika, nun kwitcapu, kipdanamabeʼ tenen ati, morolbanyake.

Hosea 4:9

Tonda, anggun na si eren aik pum tam, pil dona deiyok nang, imam nang ululum bukni, malye ning weik winiluluma atonun, sik Israel ninye nirya babye, malye weik wininyake. Ara, urdem ati kume. Anggun deiyok talibuka peterelulum nang malye ululumba, yuk Israel ninye eibuka kel biksikirye, anggun malye winilulum touk, anggun taliplum ninye babye malye wininyake. Anggun nirya ato touk, malye weik winiluluma ati ara, anggun imam nang babye, sik yuk daunyak Israel ninye nirya babye, weik arye wenebuka opnamsine.

Hosea 6:2

Winipsilyopura, like bitinye sum do, winilye sum do, mabipyopura, adiparyuk nipdopsilirye, teleb upnamsile. Allah arye, teleb kibuka kwetepsilyopura, elcuk nunti, teleb kilinamsile. Like winilye sum deice arye, pia teleb kipdeipsiliba, nunda el dam ton, tuba tamubuka tonap unamabe. Ara, elcuk, nun malye wininyap ning nirya, kum daneipsiliba, tuba tonap el damuk unamabe.

Hosea 8:13

Aning kum bukni, tonda, sik Israel nang arye, ‘Allah el si erebibirye, elti, si erebuka kinamapʼ tenen, kam ning obuka, boyanuka arelyanganinyake. Tonda, kam ning boyanuka, Allah ati yanuka arepnikirye, atup kalinyaka noutam arye, bokuka dinyake. Wininyaka babye, na Allah Yahweh ara, ‘Pia na lik,’ tenenuna ati, sikce areninyak ning ara, ‘Na likʼ tenen, kum dolonune. Ati wini talak ara, narye sik malye wininyak ning nirya ati, tenepnirye wenepnamane. Adeiyok ara, sik malye unyaka ati, weik tonun wenepnamne. Ati naryuk sik tamubuka, Mesir mutuku uk dopkwetepnamne!

Hosea 9:15

Hosea birye nyabukba, Allah Yahweh arye tamubuka nyabuk. “Kume, Israel nang arye, malye winin ning talibuka, malye weik winilamikce, tuba wininyak ning nirya ara, Gilgal mutuku arye, deiya koubike. Aning winibika deice arye, atalak ara, narye sik anang ati, ‘Na lik, upnile,’ tenenlamse ninye nirya ara, deiyok kouamse. Deiyok ara, sik malye winin ning nirya winipnin yangalamika atia. Ati, sik anang nirya ara, na mutuku arye, yakuka dopkwetepniba, yuk mutuku uk binamake. Narye sik anang ati, ton bico kum tenenamne. Tonda, sik ninye deiyok nang nirya arye, mandipna kanye bobuka, narye nyapdeipse yupu nirya ap, na ap ara, yaninauk unyake. Ati anang nirya ara, kanye kum delinamsine. Tonda, anggunti bicoe tenepsinirye, anggun ton pia kum talinamsine.

Hosea 9:9

Anggunce malye winilulum ning nirya ara, pia malye weik winilulume. Ara, sik Gibea mutuku nang arye, malye winin ning weik talibuka winilamikce, malye kipdeipdayik touk, anggun amutuku ululum Israel nang babye, atonun winilulume. Winiluluma ati ara, Allah arye anggun malye winilulum ning nirya ara, tuba tenipsilirye, wenepnamsile. Ara anggun malye winimunye ning atonun, dengna arepsilirye, wenepnamsile. Nabi Hosea birye, sik Israel yala nang ati nyabuk.

Amos 8:7

Nyabukce, ayupu ton dukdongobuka nyabuk. “Amalye ning nirya, tuba winiluluma ati, nara Allah Yahweh, Israel ninye arye, na si erenyak Allah, na si deice arye dipkoprob nyapsine. Sik malye unyak ninye arye, wininyak ning ara, dipkoprob kum luba kipnamne. Aning ara, luba kipnirye, kum bataknamne. Pia tuba tenenamne.

Yunus 1:2

“Weik asik mutuku si, Niniwe binulyame. Niniwe mutuku unyak ninye nirya ara, pia malye-malyeuk winiceba, na elinunce bikinune. Malye wininyakba elinune ati, anda amutuku bimince, nyapnamlame. ‘Anggunda, malye ning tuba-tuba winilamunyeba, Allah arye wenepnamsile,’ nyabuka, laka nyalbinamlyame.” Allah arye, Yunus biti nyabuk.

Bilangan 32:23

Bukni, anggunce, ‘Wininamabe,’ nyabuka nyalin yupu deice arye nyapmalum ning ara, tuba tenenamlume. Anggunce aning nirya ara, kum winipmunyeura, Allah el dam malye unamlume. Aning atonun malye kipmunyeura, dipkoprob nyapsine. Amalye kipnamluma ati, menenga ara, ikin ning weik dopropnamlume. Allah arye wenepnamsilarya, nyapsine.

Lukas 12:2

Ayupu ton nyabuk. “Ninye nirya, ‘Yuk nang arye kel biksicak’ tenen, talima noutam tenebuka duknulamak ning nirya ara, Allah arye lak kipdeipnamle. Lak noutam arye laka nyanamle.

1 Korintus 4:5

Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile.

Ulangan 32:29

Se, sikce, ‘Tuba malye winibipyopura, aminyan talak imun kanye bobuka unamabe’ tenen, kel kiptingopura, teleb uptinge bukni, aning kum kel biknamake. Aning ara, dipkoprob kel kiptingopura, teleb upnamting bukni, kum upnamake.

Ibrani 4:13

Yata ning do nirya, Allah arye kintinipdeiyamuk ning nirya ara, pia kum duknupmanto. Allah arye aning-aning nirya ati, pia dilule. Baju arye singipdongopmakce ning auplyeba, abaju dopdobikcopura, laka ulamle touk, Allah arye aning-aning nirya lak akuk dilule. Aning-aning nirya dilinye Allah ati, nun wininyap ning nirya laka nyabibyeba, elce kekebuka dipdesilirye, “Aning teleb, aning malye,” nyabuka, yupu lipsisikuka bokeipnamsile. Nun wininyap ning nirya ati, Allah el dam laka nyabibyeba, dipdesilirye, yupu lipsisikuka bokeipnamsile. Tonok ning babye kum duknuptibye.